1. ¿Alkye tten kubʼ tyekʼin aju xjal te Samaria qa xi tqʼoʼn chjonte tuʼnju bʼanix tuʼn Jesús?

OTOQ tzaj bʼaj kykʼuʼj qeju lajaj xinaq tuʼnju attoq lepra kyiʼj. Otoq tzʼok kybʼiʼn tqanil tiʼj Jesús, aju Tbʼanel aj Xnaqʼtzal, aju in bʼanix alkyexku yabʼil tuʼn ex qʼuqli kykʼuʼj tiʼj qa jakutoq che bʼanix tuʼn. Tuʼntzunju tej t-xi kykeʼyin Jesús najchaq e jaw schʼin ex kyqʼama: «Jesús, Xnaqʼtzal, qʼaqʼantz tkʼuʼja qiʼje». E ok bʼiʼn tuʼn Jesús ex e qʼanit qeju lajaj xjal lu tuʼn. Xilo kyqʼoʼn chjonte te Jesús tuʼnju otoq bʼant tuʼn kyiʼj. Pero oʼkx jun kubʼ tyekʼin tukʼil yol. Aju xjal te Samaria, ex kubʼ t-ximen tuʼn tjaw tnimsaʼn tbʼi Dios tukʼil tkyaqil tqʼajqʼajel twiʼ (Luc. 17:12-19). *

2, 3. a) ¿Tiquʼn jaku tzikʼ tnaʼl quʼn tuʼn t-xi qqʼoʼn chjonte junjun maj? b) ¿Tiʼ qo xnaqʼtzal tiʼj toj xnaqʼtzbʼil lu?

² Ik tzeʼn aju xjal te Samaria, ax ikx qe qaj tuʼn tkubʼ qyekʼin qa in xi qqʼoʼn chjonte kye qeju in bʼant tbʼanel tiʼchaq kyuʼn qiʼj. Noqtzun tuʼnj, at maj jaku tzikʼ tnaʼl quʼn tuʼn qqʼon chjonte tukʼil qyol ex qbʼinchbʼen.

³ Toj xnaqʼtzbʼil lu kʼelel qnikʼ tiʼj tiquʼn nim toklen tuʼn qqʼon chjonte. Ax ikx qo xnaqʼtzal kyiʼj junjun xjal in yolin Tyol Dios tiʼj aqeju e qʼon chjonte ex qeju mintiʼ. Yajxitl, qo xnaqʼtzal tiʼj junjun tumel tzeʼn tuʼn t-xi qqʼon chjonte.

4, 5. ¿Tiquʼn il tiʼj tuʼn tkubʼ qyekʼin qa in xi qqʼoʼn chjonte?

⁴ A Jehová in kubʼ qʼonte tbʼanel techel qwitz ex in bʼant tuʼn toj nimku tten, ik tzeʼn aj t-xi tqʼoʼn t-xel kye qeju in che ajbʼen te (2 Sam. 22:21; Sal. 13:6; Mat. 10:40, 41). Ex in tzaj tqʼamaʼn Xjan Uʼj tuʼn tbʼant jlu quʼn: «Kykanoʼmile tiʼj Dios, porke tkʼwaʼl Dios qeye, kʼujlaʼnxix qeye tuʼn» (Efes. 5:1). Tuʼnju qaj tuʼn qok ik tzeʼn te Jehová, in nok tilil quʼn tuʼn qqʼon chjonte.

⁵ Tukʼil jun techel kʼelel qnikʼ tiʼjju tkabʼin tiquʼn kbʼantel jlu quʼn. Aju tuʼn qqʼoʼn chjonte ik tten ik tzeʼn jun tbʼanel wabʼj, mas in qo tzalaj tiʼj aj t-xi qqʼoʼn chʼin kye txqantl. Aj tel qnikʼ tiʼj qa in nok kyqʼoʼn txqantl toklen aju in bʼant quʼn kyiʼj in qo tzalaj tuʼn jlu. Ex aj tkubʼ qyekʼin qe qa in xi qqʼon chjonte, ax ikx in che tzalaj txqantl quʼn. ¿Tiquʼn? Tuʼnju in nel kynikʼ tiʼj qa in nok qqʼoʼn toklen aju in bʼant kyuʼn tuʼn kyonin qiʼj moqa aj ttzaj kyqʼoʼn jun tiʼ at tajbʼen qe. Ex tuʼn jlu in chʼiy mas qamiwbʼil kyukʼil.

6. ¿Tiquʼn chʼixme ik qe tbʼanel yol te qʼobʼil chjonte ik tzeʼn aju mansan qʼan pwaq ttxʼotxʼil?

⁶ Nim kyoklen qe yol te qʼobʼil chjonte. In tzaj tqʼamaʼn Tyol Dios jlu: «Ok ttzaj qʼmaʼn jun yol at tajbʼen, ik tten jlu ik tzaʼn jun tilbʼilal mansan qʼan pwaq ttxʼotxʼil ex kyok junjun tilbʼilal tiʼj saq pwaq kytxʼotxʼil» (Prov. 25:11). ¿Nyapetzun tbʼanel jun tilbʼilal mansan qʼan pwaq ttxʼotxʼil aju tok qe tbʼanel tiʼchaq tiʼj tukʼil saq pwaq? Tbʼanel, ex wiʼyilxix. ¿Tiʼ jaku kubʼ qnaʼn noqwit tzaj qʼoʼn jun oyaj qe ik tzeʼn jlu? Chʼixme junx taʼ jlu tukʼilju aj t-xi qqʼmaʼn qyol te qʼobʼil chjonte te jun xjal. Ik tzeʼn aju mansan qʼan pwaq ttxʼotxʼil jaku txi  qkʼuʼn toj nimku ambʼil, ax ikx qe tbʼanel qyol kukx jaku che tzaj tnaʼn jun xjal toj tkyaqil tanqʼibʼil.

7. a) Ik tzeʼn in tzaj tyekʼin Salmo 30:12, ¿alkye tten kubʼ tyekʼin David qa tajtoq tuʼn tqʼon chjonte? b) ¿Tzeʼn kubʼ kyyekʼin tyajil Asaf qa e qʼon chjonte?

⁷ Ten David kyxol tmajen Jehová e ten toj ambʼil ojtxe aʼyeju e qʼon chjonte (kjawil uʼjit Salmo 30:12). Tukʼil tbʼinchbʼen kubʼ tyekʼin qa xi tqʼoʼn chjonte te Jehová tuʼn tkyaqil tkʼuʼj. Jun techel, onin tukʼil nim tiʼchaq tuʼn tjaw bʼinchet Tja Dios. Juntl techel tiʼj jlu aqeju tyajil, moqa tiyjil Asaf. Xi kyqʼoʼn chjonte tej tkubʼ kytzʼibʼin qe salmo, moqa bʼitz te nimsabʼil Dios. Toj jun kyxol qe bʼitz lu xi kyqʼoʼn chjonte te Jehová ex e jaw labʼin kyiʼj tbʼinchbʼen «maʼxix kyxilen» (Sal. 75:1). In nel qnikʼ tiʼj qa tajtoq David ex qe tyajil Asaf tuʼn tkubʼ kyyekʼin qa ok kyqʼoʼn toklen qe kʼiwlabʼil tzaj tqʼoʼn Jehová kye. Yajtzun qe, ¿alkye tten jaku tzʼel qkanoʼn kyiʼj?

8, 9. a) ¿Tzeʼn kubʼ tyekʼin apóstol Pablo qa ok tqʼoʼn kyoklen erman? b) ¿Tiʼ tbʼanel tzaj tuʼnju tqʼama Pablo kyiʼj?

⁸ Ok tqʼoʼn apóstol Pablo kyoklen erman ex kubʼ tyekʼin jlu tukʼilju tqʼama kyiʼj. Jun techel, kukx xi tqʼoʼn chjonte te Jehová kyiʼj toj tnaʼj Dios. Ex kyoj uʼj xi ttzʼibʼin tqʼama qa at nimxix tkʼuʼj kyiʼj. Qo yolin tiʼj jun. Toj Romanos 16:1-15 tqʼama kybʼi 27 okslal. Jun techel, tzaj tnaʼn Prisca ex Áquila, aʼyeju chʼixme e kubʼ bʼyoʼn tuʼn tklet, ax ikx tqʼama qa onin Febe kyiʼj nimku, axpe ikx onin tiʼj Pablo. Tuʼn jlu tqʼama qe tbʼanel yol kyiʼj erman tuʼnju ok tilil kyuʼn.

⁹ Ojtzqiʼntoq tuʼn Pablo qa nya tzʼaqli qe erman. Maske ikju, tej chʼixtoq tkubʼaj ttzʼibʼin uʼj kye okslal te Roma, mas ok tqʼoʼn twiʼ kyiʼj tbʼanel kymod. Tuʼntzunju, tej tjaw uʼjit uʼj lu kyxol erman kubʼlo kynaʼn nim tzalajbʼil tej tok kybʼiʼn aju tqʼama Pablo kyiʼj. Ex chʼiylo mas kyamiwbʼil tukʼil. ¿Ikpe qoʼ ik tzeʼn Pablo ex in xipe qqʼoʼn chjonte kye erman toj kʼloj okslal tuʼnju in tzaj kyqʼamaʼn ex in bʼant kyuʼn?

10. ¿Tiʼ xnaqʼtzbʼil jaku tzʼel qiʼn tiʼj Jesús tej t-xi tqʼoʼn chjonte kye qeju e ok lepeʼ tiʼj?

¹⁰ Kyoj yol tqʼama Jesús kyiʼj junjun kʼloj okslal te Asia Menor, ok tqʼoʼn toklen kyaqʼun qeju e ok lepeʼ tiʼj. Jun techel, tnejel xi tqʼamaʼn qe yol lu te kʼloj okslal te Tiatira: «Ojtzqiʼn qe kybʼinchbʼene wuʼne ex bʼaʼn wuʼne at kykʼujlalile, at kyokslabʼle, bʼaʼn kyajbʼebʼle, at kypasense ex mas bʼaʼn kybʼinchbʼene jaʼlo ik tzaʼn nej» (Apoc. 2:19). Nya oʼkx tqʼama qa ok tilil kyuʼn, sino xi tqʼamaʼn tbʼanel yol kye tuʼnju tbʼanel kymod kubʼ kyyekʼin tiʼj aqʼuntl. Ax tok, i ex tkawin junjun erman te kʼloj okslal aju, pero xi tzyet ex kubʼ bʼaj aju tqanil xi tsamaʼn kye kyukʼil tbʼanel yol (Apoc. 2:25-28). A Jesús nejenel kyxol kykyaqil kʼloj okslal, tuʼntzunju at toklen kyibʼaj. Nya il tiʼj tuʼn ttzaj tqʼoʼn chjonte qe tiʼjju in bʼant quʼn, noqtzun tuʼnj, in bʼant tuʼn. Ex a mas tbʼanel techel kywitz ansyan.

11. Ik tzeʼn in tzaj tyekʼin Hebreos 12:16, ¿tiʼ tmod Esaú kubʼ tyekʼin kyiʼj tiʼchaq xjan?

¹¹ Bʼisbʼajilxix tuʼnju ateʼ junjun tmajen Dios mintiʼ e qʼon chjonte. A jlu bʼaj tiʼj Esaú. Maske ok kʼujlaʼn Jehová kyuʼn ttat, mintiʼ ok tqʼoʼn Esaú kyoklen qe tiʼchaq xjan (kjawil uʼjit Hebreos 12:16, TNM). ¿Alkye tten kubʼ tyekʼin tmod lu? Kubʼ tyekʼin tej t-xi tkʼayin naj toklen te tnejel kʼwalbʼaj te Jacob, aju titzʼin, noq tuʼn jun laq tchi chenaqʼ (Gén. 25:30-34). Yajxitl,  tzaj tbʼis tiʼjju otoq bʼant tuʼn ex tzaj nim tqʼoj tuʼnju mintiʼ tzaj tkʼamoʼn aju toklen ik tzeʼn tnejel kʼwalbʼaj. Noqtzun tuʼnj, ya mintiʼ jun tiquʼn tuʼn ttzaj tqʼoj, tuʼnju mintiʼ ok tqʼoʼn toklen attoq tnejel.

12, 13. ¿Tzeʼn kubʼ kyyekʼin aj Israel qa mintiʼ e qʼon chjonte ex tiʼ tzaj kyiʼj tuʼn jlu?

¹² Attoq nim tiquʼn tuʼn t-xi kyqʼoʼn aj Israel chjonte te Jehová. Otoq kubʼ tqʼoʼn lajaj kʼixbʼisabʼil tibʼaj tnam Egipto tuʼntzun miʼn kytentl te majen. Ex tej tikʼ chʼintl ambʼil, e klet tuʼn kyiʼj soldad te Egipto tej kykubʼ tbʼyoʼn toj mar Rojo. Nim e tzalaj aj Israel tuʼn jlu ex xi kybʼitzin jun bʼitz te kambʼabʼil tuʼnju otoq che klet. Pero ¿jniʼ ambʼil ten tzalajbʼil kubʼ kynaʼn?

¹³ Tej kyok weʼ twitz junjuntl nya bʼaʼn, mintiʼ tzaj kynaʼn aju otoq bʼant tuʼn Jehová kyiʼj ex mintiʼ e qʼon chjonte (Sal. 106:7). In tzaj tqʼamaʼn Tyol Dios qa «kykyaqil aj Israel e ok ten yolil mya bʼaʼn tiʼj Moisés ex tiʼj Aarón», toj juntl yol atz e yolin tiʼj Jehová (Éx. 16:2, 8). Tzaj nimxix tbʼis Jehová kyuʼn ex yajxitl tqʼama qa kykyaqil xjal lu che kyimeltoq toj tzqij txʼotxʼ, ex oʼkx Josué ex Caleb tuʼntoq kyklet (Núm. 14:22-24; 26:65). ¿Tiʼ jaku bʼant quʼn tuʼn miʼn tel qkanoʼn techel lu ex tzeʼn jaku tzʼel qkanoʼn kyiʼj tbʼanel techel? Qo xnaqʼtzan tiʼj.

14, 15. a) ¿Alkye tten jaku kubʼ kyyekʼin mejebʼleʼn qa in xi kyqʼoʼn chjonte kyxolx? b) ¿Alkye tten jaku txi kyxnaqʼtzaʼn mambʼaj kykʼwaʼl tuʼn tbʼant kyqʼon chjonte?

¹⁴ Kye toj qja. In tzaj tbʼanel kye ja xjal qa kykyaqil bʼaʼn che qʼon chjonte. Mas che tel mejebʼleʼn junx qa ma che qʼon chjonte kyxolx ex mas nya kwest kbʼel kynajsaʼn kyil. Aju chmilbʼaj in nok tqʼoʼn toklen t-xuʼjil, nya oʼkx in nok tqʼoʼn toklen kyiʼj tbʼanel tiʼchaq in tzaj tqʼamaʼn ex in bʼant tuʼn, sino «in tzalaj tiʼj ex in xi tmaʼn te» (Prov. 31:10, 28). Atzunte xuʼjilbʼaj at tnabʼil in xi tqʼamaʼn te tchmil qe tbʼanel tiʼchaq in bʼant tuʼn.

¹⁵ Aqeye mambʼaj, ¿alkye tten jaku chex kyxnaqʼtzane kykʼwaʼle tuʼn tbʼant kyqʼon chjonte? Bʼaʼn tuʼn ttzaj kynaʼne qa kʼelel kykanoʼn aju in xi kyqʼamaʼne ex in bʼant kyuʼne. Tuʼntzunju, kyqʼonkuye jun tbʼanel techel kywitz aj t-xi kyqʼoʼne chjonte kye tiʼjju in bʼant kyuʼn kyiʼje. Ax ikx, kyxnaqʼtzanxe kye tuʼn t-xi kyqʼoʼn chjonte kye qeju in kybʼinchaʼn jun tiʼ kyiʼj. Che onine  kyiʼj tuʼn tel kynikʼ tiʼj qa toj qanmi in tzaj jlu ex qa jaku tzʼonin kyyol kyiʼj txqantl. Jun techel, in tzaj tqʼamaʼn jun ermana Clary tbʼi jlu: «Tej qʼiʼntoq 32 abʼqʼi tuʼn ntxuʼye, xi qʼiʼn nmane pres ex tzyet tuʼn t-xqʼuqin ntxuʼye tiʼj oxe qbʼete. Tej njapune twiʼ 32 abʼqʼi, in nok tene ximel tiʼj qa kwest ok jlu te te. Tuʼntzunju xi nqʼamaʼne te qa nnok nqʼoʼne toklen tkyaqilju bʼant tuʼn tuʼn qchʼiye. Kʼitzqeku tzaj tqʼamaʼn weye qa kʼuʼn qe nyole tuʼn toj tanmi, qa kukx in ximen kyiʼj junjun qʼij ex qa in tzalaj kyuʼn».

16. Qʼamantza jun techel tiʼj tzeʼn jaku tzʼonin kyiʼj erman qa ma txi qqʼoʼn chjonte kye.

¹⁶ Kye erman toj kʼloj okslal. In xi qqʼuqbʼaʼn kykʼuʼj erman aj t-xi qqʼoʼn chjonte kye. Qo xnaqʼtzan tiʼjju bʼaj tiʼj jun ansyan te 28 abʼqʼi, aju Jorge tbʼi. Tuʼnju tzaj jun yabʼil kyuw tiʼj ya mintiʼ bʼant tuʼn t-xiʼ jun xjaw kyoj chmabʼil. Ex yajxitl tzyet tuʼn tbʼet juntl maj kyoj chmabʼil, noqtzun tuʼnj, naʼmxtoq tbʼanix tuʼn kyex tchikʼbʼabʼil. Tzaj tqʼamaʼn ermano jlu: «Kubʼ nximane qa ya mintiʼ wajbʼene tuʼnju mlaytoq bʼant nim tiʼ wuʼne ex tuʼnju mintiʼ in che bʼant woklene toj Ja te Chmabʼil. Jun qʼij, tzaj tqʼamaʼn jun ermano weye tej tkubʼ tbʼaj chmabʼil: ‹Waje tuʼn t-xi nqʼoʼne chjonte teya tuʼnju tbʼanel techel in kubʼ tqʼoʼna kywitz toj njaye. Mintiʼ ojtzqiʼn tuʼna jniʼ o che onin tchikʼbʼabʼila qiʼje kyoj qeju abʼqʼi o che ikʼ. O qo chʼiye toj qokslabʼile kyuʼn›. Toj ambʼil lu, chʼixme in jaw oqʼe. Atzun jlu wajtoqe tuʼn tok nbʼiʼne».

17. Ik tzeʼn in tzaj tqʼamaʼn Colosenses 3:15, ¿alkye tten jaku txi qqʼoʼn chjonte te Jehová tuʼnju in tzaj tqʼoʼn nim tiʼchaq qe?

¹⁷ Te Jehová Dios. In tzaj tqʼoʼn Jehová nimxix xnaqʼtzbʼil qe. Jun techel, in nok qbʼiʼn tbʼanel xnaqʼtzbʼil kyoj chmabʼil, kyoj qrevista ex toj qtembʼil te Internet. ¿Ope qo tzalaj jun maj tiʼj jun chikʼbʼabʼil, jun xnaqʼtzbʼil moqa tiʼj jun programa toj JW Broadcasting ex kubʼ qximen qa atzunju in qo ayon tiʼj? Qa ikju, ¿tzeʼn jaku txi qqʼoʼn chjonte te Jehová kyiʼj kykyaqil oyaj in tzaj tqʼoʼn qe? (Kjawil uʼjit Colosenses 3:15). Jun tten, aju tuʼn kukx t-xi qqʼoʼn chjonte te toj qnaʼj Dios (Sant. 1:17).

18. ¿Alkye tten kbʼel qyekʼin qa in nok qqʼoʼn toklen Ja te Chmabʼil?

¹⁸ Juntl tten tuʼn t-xi qqʼoʼn chjonte te Jehová aju tuʼn tten saq ex nukʼun aju tembʼil jatumel in noq qchmon qibʼ tuʼn  qkʼulin te. Tuʼntzunju, in qo onin tuʼn tbʼaj saqset ex tuʼn tbʼaj bʼinchet chʼintl Ja te Chmabʼil. Ax ikx qeju in che aqʼunan tiʼj audio ex video toj Ja te Chmabʼil il tiʼj tuʼn kyajbʼen tiʼchaq kyuʼn toj tumel. Qa ma che ok xqʼuqet qe tiʼchaq, kʼonil tuʼn kyten mas ambʼil ex nya il tiʼj tuʼn kybʼaj bʼinchet chʼintl. Iktzun tten, qo onil tuʼn miʼn t-xi najset nim pwaq ex tuʼn kyjaw bʼinchet Ja te Chmabʼil twitz tkyaqil Txʼotxʼ.

19. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj ansyan in bʼet kyojele Ja te Chmabʼil tukʼil t-xuʼjil?

¹⁹ Kye qeju in che aqʼunan nimxix qiʼj. Aʼyeju yol te qʼobʼil chjonte jaku tzʼonin kyiʼj txqantl tuʼn tten tbʼanel kyximbʼetz kyiʼj nya bʼaʼn in che ok weʼ twitz. Qo xnaqʼtzan tiʼjju bʼaj tiʼj jun ansyan in bʼet kyojele Ja te Chmabʼil tukʼil t-xuʼjil. Tej otoq che pakbʼan tkyaqil qʼij ex attoq nim cheʼw, e meltzʼaj jatumel in che anqʼintoq ex otoq che sikt. Tuʼnju attoq nim cheʼw, xiʼ t-xuʼjil jtal tukʼix t-xbʼalun tok. Toj juntl qʼij te prim, xi tqʼamaʼn te tchmil qa ya mlay bʼant tuʼn t-xiʼ visitaril qe kʼloj okslal tukʼil. Tojx prim aju pon tsamaʼn ninja qʼil twitz aqʼuntl jun carta te ermana. Tqʼamaʼn carta qe tbʼanel yol tiʼjju aqʼuntl in bʼanttoq tuʼn ermana ex tuʼnju kukx in nikʼx tuʼn, ax ikx tqʼama qa kwestlo aju tuʼn kyten toj junxitl lugar junjun seman. In tzaj tqʼamaʼn ermano jlu: «Aqeju yol lu e pon toj tanmi ex ya mintiʼ tzaj tqʼamaʼn juntl maj tuʼn miʼn t-xi visitaril qe kʼloj okslal wukʼile. Axpe ikx at maj kubʼ nximane tuʼn tkyaj nkoline woklene lu pero a nxuʼjile tzaj qʼuqbʼante nkʼuʼje». Aju mejebʼleʼn lu ajbʼen 40 abʼqʼi toj oklenj lu.

20. ¿Tiʼ kbʼantel quʼn junjun qʼij ex tiquʼn?

²⁰ Tzʼok tilil quʼn junjun qʼij tuʼn qqʼon chjonte. Aqeju qyol ex qbʼinchbʼen axix tok jaku tzʼonin tiʼj jun xjal tuʼn kukx tok tilil tuʼn maske in qo anqʼin toj ambʼil kwest. Ax ikx, qa ma qo qʼon chjonte, jaku chʼiy qamiwbʼil tuʼn jlu ex jaku ten te jumajx. Aju mas nim toklen, kʼelel qkanoʼn tiʼj Jehová, aju Qtat bʼaʼn qʼoʼn chjonte ex bʼaʼn bʼinchan xtalbʼil.