«AX TOK, nimxix twitz awal at, atzun qe aqʼnal mya nim; kyjaʼtzun, che kubʼsane twitz Tajaw awal tuʼn kyxi t-samaʼn aqʼnal tuʼn tjaw chmet twitz awal» (Luc. 10:2). Ma tzikʼ junlo kabʼe mil abʼqʼi tkyajlen tqʼamaʼn Jesús qe yol lu ex in japun twiʼ tiʼjju in bʼaj toj tnam Myanmar. ¿Tiquʼn in xi qqʼamaʼn jlu? Tuʼnju toj tnam Myanmar oʼkx at 4,200 pakbʼal ex in che pakbʼan kye 55 millón xjal tiʼj Tkawbʼil Dios.

Noqtzun tuʼnj, o tzʼonin Jehová, aju «Tajaw awal», kyiʼj nim syent erman te junxichaq tnam tuʼn kyxiʼ anqʼil toj tnam lu aju tok kubʼni te tjawitz Qʼij te Asia, tuʼntzun kyonin kyiʼj xjal tuʼn tel kynikʼ tiʼj Tyol Dios. ¿Tiʼ o tzʼonin kyiʼj tuʼn tkyaj kyqʼoʼn kytnam? ¿Tzeʼn bʼant jlu kyuʼn? ¿Alkyeqe kʼiwlabʼil in tzaj kykʼamoʼn? Kʼelel qnikʼ tiʼj.

Ma tzikʼ junjun abʼqʼi, tzaj jun ataque epiléptico tiʼj Kazuhiro, jun precursor te tnam Japón, naj tnabʼil ex tuʼn jlu xi qʼiʼn toj spital. Tqʼama aj qʼanil te tuʼn miʼn tmanejarin kabʼe abʼqʼi. Mintiʼ xi tnimen Kazuhiro jlu ex kubʼ t-ximen. «¿Tiʼ kbʼantel wuʼne? Ngane tuʼn wajbʼene te precursor ex nya waje tuʼn tkyaj ntzaqpiʼne». Xi tqanin tuʼn tkyaqil tkʼuʼj te Jehová tuʼn tkanet jun tumel tuʼn tuʼn kukx tajbʼen te precursor.

In tzaj tqʼamaʼn Kazuhiro jlu: «Tej tikʼ jun xjaw, ok tbʼiʼn jun wamiwe in najbʼentoq atz Myanmar aju otoq bʼaj wiʼje. Tzaj llamarin wiʼje ex tqʼama: ‹Mas in che bʼet xjal kyoj kamionet tzalu Myanmar. Qa ma tzaja, kukxlo jaku tzʼajbʼena te precursor ex nya il tiʼj tuʼn tajbʼen jun kar tuʼna›. Xi nqanine te aj qʼanil qa jakutoq chinxe anqʼil atz Myanmar maske yabʼ qine. Noq in jaw labʼine tej tqʼama jlu: ‹Ma tzul jun neurólogo te Myanmar visitaril tzalu Japón. Kxel nyekʼine teya. Qa ma tzaj juntl maj ataque tiʼja, a kʼokel keʼyin teya›. Toj nwitze atzun tzaqʼwebʼil tiʼj nnaʼj Diose tzaj tqʼoʼn Jehová».

Jun rat naj xi ttzʼibʼin Kazuhiro jun correo electrónico te ninja qʼil twitz aqʼuntl te Myanmar ex xi tqʼamaʼn qa kyajtoq tuʼn kyajbʼen te precursor tukʼil t-xuʼjil toj tnam aju. Oʼkx ikʼ jweʼ qʼij tej ttzaj ttzaqʼweʼn ninja jlu kye: «Che tzaje, qaje tuʼn kyul mas precursor». Xi kykʼayin Kazuhiro ex Mari qe kykar, i eʼx qanil kyvisa ex tzaj kylaqʼoʼn kyboleto te avión. Toj ambʼil jaʼlo in che tzalaj tuʼnju in che ajbʼen toj kʼloj okslal toj kyyol men te tnam Mandalay. Tqʼamatl Kazuhiro jlu: «Aju o tzikʼ toj qanqʼibʼile o tzʼonin qiʼje tuʼn tok qeʼ qkʼuʼje kyiʼj  yol tkuʼx toj Salmo 37:5, aju in tqʼamaʼn: ‹Oqxenanx tibʼa tuj tqʼabʼ Qman, qeʼk tkʼuʼja tiʼj ex tzul onil teya›».

Toj abʼqʼi 2014 ten jun tbʼanel kyoklen testigos de Jehová te Myanmar tuʼnju ok jun nimaq chmabʼil nim toklen toj tnam aju. E pon nim erman te junxichaq tnam toj chmabʼil lu. Kyxol jlu pon Monique, jun ermana te Estados Unidos aju qʼiʼn 34 abʼqʼi tuʼn. Tqʼama jlu: «Tej nmeltzʼaje toj nimaq chmabʼil, in naʼne Dios te Jehová tuʼn tel nnikʼe tiʼj tiʼ tuʼn tbʼant wuʼne tukʼil wanqʼibʼile. Ax ikx in yoline kyukʼil ntate tiʼj wajbʼebʼile te Jehová. Tbʼanel ela toj kywitz tuʼn nxiʼye ajbʼel atz Myanmar. Noqtzun tuʼnj, naʼmxtoq tkubʼ nximane tiʼ tuʼn tbʼant wuʼne, nim maj in naʼne Dios ex kubʼ nyoʼne chʼin ambʼil». In tzaj tqʼamaʼn Monique tiquʼn bʼant jlu tuʼn.

Tzaj tchikʼbʼaʼn jlu: «Tqʼama Jesús kye t-xnaqʼtzbʼen qa tnejel che ximel tiʼj jniʼ pwaq kʼajbʼel kyuʼn. Tuʼntzunju, kubʼ nxjeline jlu: ‹¿Atpe nim npwaq tuʼn nxiʼye ajbʼel toj juntl lugar? ¿Jakupe kanet qe tiʼchaq weye ex miʼn chin aqʼunane nim ambʼil?›». El tnikʼ Monique tiʼj jlu: «Jun rat el nnikʼe tiʼj qa nyatoq nim npwaqe at tuʼn nxiʼye anqʼil toj juntl plaj twitz txʼotxʼ». Pero, ¿tiʼ bʼant tuʼn tuʼn t-xiʼ anqʼil toj juntl tnam? (Luc. 14:28).

Tqʼamaʼntl Monique jlu: «Jun qʼij, tzaj tqanin xuʼj nejenel toj aqʼuntl tuʼn nxiʼye yolil tukʼil. Tzaj t-xobʼil wiʼje, kubʼ nximane qa kʼelel qʼiʼn waqʼune. Pero nya ik bʼaj, sino tzaj tqʼoʼn chjonte tiʼjju tbʼanel aqʼuntl in bʼanttoq wuʼne ex tqʼama qa tzultoq tqʼoʼn chʼintl npwaqe. Ex atzun tajlal pwaq lu tuʼn tajbʼen wuʼne tuʼn t-xi nchjoʼne qe nkʼase».

Atxix toj diciembre te 2014 in najbʼen Monique atz Myanmar. ¿Tiʼtzulo in kubʼ tnaʼn tuʼnju in najbʼen toj jun lugar jatumel nya nim kybʼet pakbʼal at? In tzaj ttzaqʼweʼn jlu: «Nim in chin tzalaje tuʼnju atine tzalu. In xi nqʼoʼne xnaqʼtzbʼil kye oxe xjal tiʼj Tyol Dios. Jun kyxol qe jlu at jun xuʼj te 67 abʼqʼi, aj in chin pone, tkyaqil maj in tzalaj ex in chinx tchleʼne. Tej tel tnikʼ tiʼj qa Jehová tbʼi Dios, etz taʼl twitz. Ex tzaj tqʼamaʼn weye: ‹Tzma tnejel maj in nok nbʼine tbʼi Dios. Mas txin teya nwitze ex ma tzaj t-xnaqʼtzaʼna aju mas nim toklen toj wanqʼibʼile›. Ax ikx weye in jaw oqʼe. Aj in bʼaj jlu toj qanqʼibʼil, mas tbʼanel in nok qpakbʼabʼil toj juntl lugar jatumel nya nim kybʼet pakbʼal at». Kʼitzqeku ten Monique toj Xnaqʼtzbʼil kye Pakbʼal tiʼj Tkawbʼil Dios.

Aju etz qʼamaʼn toj Anuario de los testigos de Jehová te 2013 tiʼj tnam Myanmar, onin kyiʼj junjun tuʼn kyxiʼ anqʼil toj tnam aju. At jun ermana qʼiʼn junlo 30 abʼqʼi tuʼn ex atz in nanqʼintoq kubʼni te tjawitz Qʼij te Asia. Li tbʼi ermana lu ex in naqʼunantoq tkyaqil ambʼil. Tej tjaw tuʼjin Anuario, onin tiʼj tuʼn t-xiʼ ajbʼel atz Myanmar. In tzaj tqʼamaʼn jlu: «Tej ntene toj nimaq chmabʼil nim toklen toj tnam Yangón toj 2014, ok wojtzqiʼne jun mejebʼleʼn in che onintoq atz Myanmar toj yol chino. Tuʼnju in bʼanttoq yol lu wuʼne, kubʼ nximane tuʼn nxiʼye onil atztzun toj jun tal kʼloj okslal toj yol chino. Kubʼ qximane tukʼil Monique tuʼn qajbʼene toj tnam Mandalay. O qo tzaj kʼiwlaʼne tuʼn Jehová ex kanet jun qaqʼune te chʼin ambʼil te aj xnaqʼtzal toj ax tja xnaqʼtzbʼil. Kanet jun ja quʼne jatumel tuʼn qanqʼine ex nqa taʼ. Maske at nim kyaq ex junjuntl nya bʼaʼn, nim in chin tzalaje tuʼnju in chin ajbʼene tzalu. Aʼyeju xjal te Myanmar in che anqʼin tukʼil nya nim tiʼchaq, tbʼanel kymod ex kygan tuʼn tok kybʼiʼn Tyol Dios. In chin tzalaje aj tok nkeʼyine tzeʼn in tzaj tkʼiwlaʼn Jehová pakbʼabʼil. Qʼuqli nkʼuʼje tiʼj qa taj tuʼn ntene tzalu Mandalay».

Aqeju erman in che onin kyoj lugar jatumel mintiʼxix pakbʼal at, nim kye o tzʼok kyqʼoʼn kywitz tiʼj tipumal  naʼj Dios. Jun techel, atztoq in najbʼen Jumpei tukʼil Nao, aju t-xuʼjil, toj jun kʼloj okslal toj kyyol men atz Japón, kykabʼil ma che ikʼ tibʼaj 30 abʼqʼi. Pero i eʼx anqʼil atz Myanmar, ¿tiquʼn? In tzaj tqʼamaʼn Jumpei tiquʼn: «Kukx o kubʼ nximane tukʼil nxuʼjile tuʼn qajbʼene toj juntl tnam. Attoq jun ermano jatumel in noktoq qchmon qibʼe otoq txiʼ anqʼil atz Myanmar. Ax ikx qeye o xiʼye anqʼil toj tnam aju toj mayo te 2010 maske nyatoq nim qpwaqe at. Nim e tzalaj erman tej qpone». ¿Tiʼ t-xim Jumpei tiʼj pakbʼabʼil atz Myanmar? In tzaj tqʼamaʼn jlu: «Kyaj xjal tuʼn tok kybʼiʼn Tyol Jehová. Aj in nok kykeʼyin qeju mintiʼ in bʼant kybʼin qe video toj kyyol men, in netz kywitz tiʼj. In qo tzalaje tuʼnju kubʼ qximane tuʼn qtzaje ajbʼel tzalu».

¿Tiʼ o bʼant tuʼn Jumpei ex Nao tuʼn tchjet aju at tajbʼen kye? In tzaj tqʼamaʼn Jumpei jlu: «Tej tikʼ oxe abʼqʼi, ya otoq bʼaj qpwaqe ex ya mintiʼtl qpwaqe tuʼn tchjet juntl abʼqʼi ja majen quʼne. Nim o naʼne Dios te Jehová. Pero o jaw labʼine tej ttzaj tqʼoʼn ninja qʼil twitz aqʼuntl txokbʼil qiʼje tuʼn qajbʼene te precursor especial toj chʼin ambʼil. Ok qeʼ qkʼuʼje tiʼj Jehová ex mintiʼ kyaj ttzaqpiʼn qoʼye. Kukx o xqʼuqin qiʼje». Kʼitzqeku e ten Jumpei ex Nao toj Xnaqʼtzbʼil kye Pakbʼal tiʼj Tkawbʼil Dios.

Jun ermano Simone tbʼi te tnam Italia, qʼiʼn 43 abʼqʼi tuʼn, atzunte Anna, aju t-xuʼjil, qʼiʼn 37 abʼqʼi tuʼn ex tzajni toj tnam Nueva Zelanda, i eʼx anqʼil atz Myanmar. ¿Tiʼ onin kyiʼj? In tzaj tqʼamaʼn Anna jlu: «Aju Anuario te 2013 aju yolin tiʼj Myanmar». Tqʼamatl Simone jlu: «Jun tbʼanel oklenj tuʼnju atoʼye Myanmar. Jaku qo ten kyukʼil nya nim tiʼchaq qe ex jaku chin ajbʼene mas te Jehová. Nim tzalajbʼil in tzaj tiʼn aj in nok qkeʼyin tzeʼn in xqʼuqin Jehová qiʼj aj qajbʼen toj juntl lugar jatumel mintiʼxix pakbʼal at» (Sal. 121:5). Tqʼamaʼntl Anna: «Bʼajxtoq chin tzalaje ik tzeʼn jlu. Nya nim tiʼchaq at weye ex in chin tene mas ambʼil tukʼil nchmile ex at mas mujbʼil qxole jaʼlo. Ax ikx ateʼ tbʼanel qamiwe. Nya ikʼun kywitz testigos de Jehová kyuʼn xjal ex kyaj tuʼn telxix kynikʼ tiʼj ax tok». ¿Alqiʼj in yolin?

Tzaj tchikʼbʼaʼn Anna jlu: «Jun qʼij in pakbʼane te jun txin toj plas, aju in xnaqʼtzan toj universidad ex kyaj bʼant tiʼj tuʼn nmeltzʼaje tukʼil. Tej nmeltzʼaje, otoq tzaj tiʼn juntl txin tukʼil. Tej nmeltzʼaje juntl maj, otoq tzaj tiʼn junjuntl. Yajxitl tzaj tiʼn txqantl. Atzun jaʼlo in xi nqʼoʼne xnaqʼtzbʼil kye jweʼ txin». In tzaj tqʼamaʼn Simone jlu: «Tbʼanel kymod xjal in qo pakbʼane kye ex at nim kyxjel. Kyaj tuʼn tel kynikʼ tiʼjju tqanil. Pero mintiʼ in kanin ambʼil tuʼn t-xi qqʼoʼne xnaqʼtzbʼil kye kykyaqil».

¿Tiʼ bʼant kyuʼn junjun tej naʼmxtoq kyxiʼ anqʼil atz Myanmar? In tzaj tqʼamaʼn Mizuho te Japón jlu: «Kukx kubʼ qximane tukʼil nchmile Sachio tuʼn qxiʼye ajbʼel toj juntl tnam jatumel mintiʼxix pakbʼal at, noqtzun tuʼnj, ¿toj alkye tnam? Aqeju tbʼanel tiʼchaq in nikʼ toj kyanqʼibʼil txqantl erman etz qʼamaʼn toj Anuario te 2013 pon toj qanmiye. Tuʼntzunju kubʼ qximane  tuʼn qxiʼye ajbʼel atz Myanmar». Tqʼamatl Sachio jlu: «Kubʼ qximane tuʼn qtene jun seman toj Yangón aju tnam nim toklen te Myanmar. Qajtoqe tuʼn tok qqʼoʼn qwitze tiʼj tzeʼn taʼ lugar, qe xjal ex junjuntl tiʼchaq. Tuʼnju o tene chʼin ambʼil atztzun, el qnikʼe tiʼj qa iltoq tiʼj tuʼn qxiʼye anqʼil atz».

Bʼalo qʼiʼn jun 50 abʼqʼi tuʼn Rodney ex Jane, aju t-xuʼjil, atz tzajniqe toj tnam Australia. Atxix toj 2010 tzaj tzyet tuʼn kyajbʼen Myanmar kyukʼil kabʼe kykʼwaʼl, Jordan ex Danica kybʼi. Tqʼamaʼn Rodney jlu: «Tzaj qbʼise tuʼnju mintiʼ ojtzqiʼn Tyol Dios kyuʼn xjal. In xi nqʼamaʼne kye ja xjal tuʼn kyximen tiʼj qa jaku bʼant tuʼn kyxiʼ ajbʼel toj juntl tnam ik tzeʼn Myanmar». ¿Tiquʼn tqʼama jlu? Ax in tzaj chikʼbʼante: «Aʼyeju kʼiwlabʼil o che tzaj qkʼamoʼne tzalu, mlay tzʼok qmojbʼaʼne tukʼil junjuntl tiʼchaq. Nim kuʼxun oʼkx tok kywiʼ tiʼj kyyolbʼil, tiʼj kykar, tiʼj kyaqʼun ex txqantl tiʼchaq. Atzun qe qkʼwaʼle tok kywiʼ tiʼj tuʼn tbʼant juntl yol kyuʼn tuʼn tajbʼen toj pakbʼabʼil. Kyaj tuʼn tkanet tumel kyuʼn tzeʼn jaku tzʼok kyojtzqiʼn xjal Tyol Dios ex tuʼn t-xi kyqʼoʼn kyyol kyoj chmabʼil. Atzun jlu in che ximen tiʼj ex tiʼj kyajbʼebʼil te Jehová».

Atzunte Oliver qʼiʼn 37 abʼqʼi tuʼn, jun ermano te Estados Unidos. In tzaj tqʼamaʼn tiquʼn bʼaʼn tuʼn qxiʼ onil toj juntl tnam: «O tzaj tiʼn nim tbʼanel weye tuʼnju in chin ajbʼene toj juntl lugar ex nya tojju ntname jatumel jaku ten nim tiʼchaq qe. O tzʼonin jlu wiʼje tuʼn tchʼiy wokslabʼile ex tuʼn tten qʼuqbʼil nkʼuʼje tiʼj Jehová, ex noq tzeʼnxku lugar. Tuʼnju in chin ajbʼene kyukʼil erman, aʼyeju mintiʼ ojtzqiʼn kywitz wuʼne tnejel, pero axju nimen kyuʼn ik tzeʼn weye, o tzʼonin wiʼje tuʼn tel nnikʼe tiʼj qa mintiʼ juntl tiʼ mas nim toklen ik tzeʼn Tkawbʼil Dios». Toj ambʼil jaʼlo, kukx in nok tilil tuʼn Oliver ex Anna, aju t-xuʼjil, tuʼn kypakbʼan kye xjal in che yolin toj yol chino.

Atxix toj 2004 tzyet tajbʼen ermana Trazel toj tnam Myanmar, tzajni toj tnam Australia ex qʼiʼn 52 abʼqʼi tuʼn. In tzaj tqʼamaʼn jlu: «In xi nqʼamaʼne kye kykyaqil qeju jaku bʼant kyuʼn tuʼn kyxiʼ ajbʼel toj juntl lugar jatumel nya nim kybʼet pakbʼal at. O tzʼok nkeʼyine qa in tzaj tkʼiwlaʼn Jehová aju xjal taj tuʼn tajbʼen mas te. Mintiʼ kubʼ nximane qa tuʼn wanqʼine ik tzeʼn jlu. Atzun anqʼibʼil mas tbʼanel jakutoq tzʼok nwitzʼkʼaʼne».

Kuchiwt tzʼonin kyyol erman lu tiʼja tuʼn t-ximana tiʼj qa jaku bʼant tuʼn t-xiʼya onil kyiʼj xjal jatumel naʼmx t-xi pakbʼet Tyol Dios. Ik tten jlu ik tzeʼn in tzaj kyqʼamaʼn qeju erman teya, aqeju in che ajbʼen kyoj lugar aju: «¡Tzaja tzalu Myanmar ex tzʼonina qiʼje!».