Tiʼ kʼonil tiʼja tuʼn ttzalaja aj t-xnaqʼtzana tiʼj Tyol Dios

TUʼN TOK QBʼIʼN TOJ

ILTOQ tiʼj tuʼn tbʼant jun aqʼuntl kwest tuʼn Josué: tuʼn kyokx tiʼn qe aj Israel tojju Txʼotxʼ Tziyen maj. Tuʼn tbʼant jlu tuʼn, kbʼel kyiʼj junjun nya bʼaʼn tuʼn. Noqtzun tuʼnj, xi tqʼamaʼn Jehová te qa toj tumel kbʼantel tkyaqil ex xi tqʼuqbʼaʼn tkʼuʼj tuʼn miʼn ttzaj xobʼ ex tuʼn tten tipun. Tqʼama Jehová te tuʼn t-xi tnimen Tley ex tuʼn tuʼjin tiʼj qʼijtl ex qonikʼen tuʼntzun tkubʼ tbʼinchaʼn ik tzeʼnx in tzaj tqʼamaʼn Tley. Ex tqʼamatl te qa bʼaʼn kʼelel tkyaqil qa ma bʼant jlu tuʼn ex qa kteltoq tnabʼil (Jos. 1:7, 8).

Ax ikx qe in qo ok weʼ kywitz junjun nya bʼaʼn kyoj qeju «mankbʼil tqʼijlalil» jaʼlo (2 Tim. 3:1). Noqtzun tuʼnj, ax ikx tbʼanel kʼelel tkyaqil toj qanqʼibʼil qa ma kubʼ qbʼinchaʼn ik tzeʼn tqʼama Jehová te Josué. Aj qok weʼ kywitz joybʼil, che onil qe nabʼil ateʼ toj Tyol Dios qiʼj qa ma jaw quʼjin tkyaqil qʼij.

In nel qnikʼ tiʼj qa nim qe mintiʼ ojtzqiʼn quʼn alkye tten tuʼn qxnaqʼtzan, axpe ikx nya qgan tuʼn qxnaqʼtzan. Pero nim toklen tuʼn qxnaqʼtzan tiʼj Tyol Dios ex tuʼntzunju bʼaʼn tuʼn tok qqʼoʼn qwitz tiʼj recuadro « Bʼaʼn tuʼn kyajbʼen nabʼil lu tuʼna». Toj jlu che kanetel tbʼanel nabʼil tuʼna tuʼn ttzalaja tiʼj t-xnaqʼtzbʼila tiʼj Tyol Dios.

Tqʼama jun aj bʼitzil jlu: «Onintza qine tuʼn nnimane tmandamyenta, porke atzun in knet tzalajbʼil wuʼne» (Sal. 119:35). Ax ikx teya jaku tzalaja aj t-xnaqʼtzana tiʼj Tyol Dios. Aj tokxix tojtzqiʼna Xjan Uʼj, che kanetel tbʼanel qʼinumabʼil tuʼna toj.

Mlaylo kubʼ neja twitz jun kʼloj xjal ik tzeʼn te Josué, pero kʼokel weʼya kywitz qe nya bʼaʼn. Tuʼntzunju, xnaqʼtzana tiʼjju tzʼibʼin toj Tyol Dios ex qʼonkuya toj xnaqʼtzbʼil ik tzeʼn te Josué. Qa ma bʼant jlu tuʼna, tbʼanel kʼelel tkyaqil toj tanqʼibʼila ex ktel tnabʼila.

BʼAʼN TUʼN KYAJBʼEN NABʼIL LU TUʼNA

Naʼna Dios naʼmxtoq t-xnaqʼtzana. Te Jehová qe t-ximbʼetz tkuʼx toj Xjan Uʼj ex bʼaj tbʼinchaʼn tkyaqil tuʼntzun kyonin qe yol tzʼibʼin toj qiʼj. Tuʼntzunju, aj tjaw tuʼjina Tyol Dios qaninxa onbʼil te Jehová tuʼn tel tnikʼa tiʼj, tuʼn ttzaj tnaʼna ex tuʼn tkubʼ tqʼoʼna toj xnaqʼtzbʼil aju kjawil tuʼjina (Esd. 7:10, TNM).
Ximana kyiʼj junjun xjel. Akux in jaw tuʼjina Tyol Dios moqa qeju quʼj, bʼaʼn tuʼn tkubʼ t-xjelina jlu: «¿Tiʼ xnaqʼtzbʼil in tzaj tqʼoʼn jlu weye tiʼj Jehová? ¿Tiʼ toklen jlu tukʼil xnaqʼtzbʼil mas nim toklen in yolin Tyol Dios tiʼj? ¿Alkye tten jaku che ajbʼen versículo lu wuʼne tuʼn wonine kyiʼj txqantl?».
Ximana tiʼjju in xnaqʼtzana tiʼj. Akux in nuʼjina, bʼaʼn tuʼn tweʼya ex ximana tiʼj jlu: «¿Tiʼ in kubʼ nnaʼne tuʼn xnaqʼtzbʼil lu? ¿Tiquʼn in kubʼ nnaʼne jlu? ¿Tiʼ toklen jlu tukʼilju o tzikʼ toj wanqʼibʼile, tukʼilju in chin ikʼe toj jaʼlo ex tukʼilju jaku tzaj wiʼje toj ambʼil tzul? ¿Tzeʼn jaku che kubʼ nqʼoʼne toj xnaqʼtzbʼil qeju nabʼil lu?» (Job 23:5; Sal. 49:3). Bʼaʼn tuʼn t-ximana tiʼj qa jaku t-xi tchikʼbʼaʼna tiquʼn nya taj Jehová tuʼn tkubʼ qbʼinchaʼn jun tiʼ ex tiʼj jaku tzaj qiʼj qa mintiʼ ma chex qbʼiʼn nabʼil in tzaj tqʼoʼn (Deut. 32:28, 29).
Tzʼajbʼenx t-ximbʼetza aj tjaw tuʼjina qe txʼolbʼabʼil toj Tyol Dios. Jun techel, ¿in kubʼpe t-ximana qe ttzik José akux in xi kykʼayin te kye aj Ismael? (Gén. 37:18-28). ¿Tiʼ in nok tkeʼyina, tiʼ in tbʼiʼna ex tiʼ in kubʼ tnaʼna? Tzʼok tililxix tuʼna tuʼn tkubʼ tanqʼina aju in bʼaj ex xjelinkuya: «¿Tiʼ in che ximen tiʼj?». Aj qximen kyiʼj xjel lu, mas tbʼanel kʼelel qe txʼolbʼabʼil lu toj qwitz ex che onil qiʼj.
Che ajbʼen qe onbʼil tuʼna aj t-xnaqʼtzana. O che bʼaj bʼinchaʼn jlu tuʼn qjyon mas tqanil. Bʼaʼn tuʼn tok tojtzqiʼna qeju at toj teya tyol, ik tzeʼn qeju ateʼ toj Internet ex qeju uʼj. Bʼaʼn tuʼn t-xi tqanina onbʼil kye txqantl tuʼntzun tel tnikʼa tiʼj tzeʼn jaku che ajbʼen tuʼna. Jun techel, tojju Índice de las publicaciones Watch Tower aju at toj kastiy, ex aju Onbʼil tuʼn kyxnaqʼtzan testigos de Jehová, kyoj jlu jaku che kanet nim xnaqʼtzbʼil tuʼna ex in tzaj kychikʼbʼaʼn junjun taqikʼ Tyol Dios. Nya oʼkxju, tojju uʼj Jun onbʼil tuʼn qxnaqʼtzan tiʼj Tyol Dios, che kanetel tqanil tuʼna kyiʼj mapa, kyiʼj tajlal ambʼil, kyiʼj qe talil pwaq, kyiʼj malbʼil ex junjuntl tqanil.
Naʼntza qe xnaqʼtzbʼil nim kyoklen. Kʼonil jlu tiʼja tuʼn ttzaj tnaʼna aju ma xnaqʼtzana tiʼj. Ex qa ma yolina tiʼj jlu kyukʼil txqantl, atzun mas tbʼanel jaku bʼant tuʼna. Ximana tiʼj jlu: «¿Jakupe tzʼajbʼen xnaqʼtzbʼil lu wuʼne toj pakbʼabʼil?». Aqeju nabʼil lu che onil tiʼja tuʼn ttzaj tnaʼna aju mas nim toklen, ex jaku tzʼajbʼen tuʼna tuʼn tonina kyiʼj txqantl.