1. ¿Tiquʼn jaku txi tqʼamaʼn Jehová qa a tajaw tkyaqil tiʼchaq at? (Qʼonka twitza tiʼj tnejel tilbʼilal).

A JEHOVÁ «tajaw kyaʼj ex tajaw tkyaqil jatum ponin bʼaj kyaʼj, ex ax [...] tajaw txʼotxʼ ex tkyaqilju at twitz» (Deut. 10:14; Apoc. 4:11). Tuʼnju a Jehová kubʼ bʼinchante qe xjal, ax ikx in qo ok te tetzbʼil (Sal. 100:3). Noqtzun tuʼnj, toj tkyaqil ambʼil o tzikʼ o jaw tskʼoʼn Jehová jun kʼloj xjal tuʼn kyajbʼen oʼkxku te.

2. ¿Alkyeqe kʼloj xjal in tzaj tqʼamaʼn Xjan Uʼj qa tekuxix Jehová ex in che ajbʼen oʼkxku te?

² Jun techel, in tzaj tqʼamaʼn Salmo 135 qa e jaw tskʼoʼn Jehová qe aj Israel «tuʼn kyok te tekuxix», aʼyeju kukx e ajbʼen te (Sal. 135:4). Ax ikx tqʼama uʼj te Oseas qa che oketz junjun xjal nya aj Judiy toj ttnam Jehová (Os. 2:23). Japun twiʼ yol lu tej t-xi tzyet tuʼn kyten xjal nya aj Judiy kyxol qeju che kawil tukʼil Jesús toj kyaʼj (Hech. 10:45; Rom. 9:23-26). In nok qʼoʼn kybʼi xjal lu te «jun tnam oʼkx te Dios» ex te «jun tnam tekuxix Dios» (1 Ped. 2:9, 10). Ax in che ok tqʼoʼn Dios te ttnam ex te tetzbʼil qeju okslal kukx in che ajbʼen te toj ambʼil jaʼlo, aqeju che anqʼil tzalu twitz Txʼotxʼ (Is. 65:22).

3. a) ¿Alkyeqe at jun tbʼanel kyamiwbʼil tukʼil Jehová toj ambʼil jaʼlo? b) ¿Tiʼ qo xnaqʼtzal tiʼj toj xnaqʼtzbʼil lu?

 ³ Toj ambʼil jaʼlo, aqeju at qʼuqbʼil kykʼuʼj tuʼn kyxiʼ anqʼil toj kyaj, aʼyeju skʼoʼn maj ex qeju txqantl ẍneʼl in che ayon tuʼn kyanqʼin tzalu twitz Txʼotxʼ, in che ajbʼen junx te Jehová ik tzeʼn «jun peʼnx ẍneʼl» (Luc. 12:32; Juan 10:16). Ax tok qaj tuʼn t-xi qqʼoʼn chjonte te Dios tuʼnju o tzaj tqʼoʼn ambʼil tuʼn tten tbʼanel qamiwbʼil lu tukʼil. Qo xnaqʼtzal tiʼj elaʼ tten tzeʼn tuʼn t-xi qqʼoʼn chjonte tiʼj tbʼanel qoklen o tzaj tqʼoʼn Dios.

4. a) ¿Alkye jun tten jaku txi qqʼoʼn chjonte te Jehová tuʼnju in tzaj tqʼoʼn ambʼil qe tuʼn qok te tamiw? b) ¿Tzeʼn kubʼ tyekʼin Jesús jlu?

⁴ Jun tten tuʼn t-xi qqʼoʼn chjonte te Jehová aju tuʼn qajbʼen oʼkx te. Aj tjaw aʼ qwiʼ, in kubʼ qyekʼin kywitz txqantl qa teku Jehová qoʼ ex qa qaj tuʼn qnimen te (Heb. 12:9). Chʼixme ik bʼant tuʼn Jesús tej tjaw aʼ twiʼ, iklo xi tqʼamaʼn te Ttat ik tzeʼn jlu: «Nman Dios, in chin tzalaje tuʼn tbʼant tajbʼila» wuʼne (Sal. 40:7, 8). Kubʼ tyekʼin Jesús qa taj tuʼn tbʼant tajbʼil Dios tuʼn maske ya tokxtoq toj jun tnam etzan tuʼn Jehová atxix tej tul itzʼj.

5, 6. a) ¿Tiʼ tnaʼ Jehová tej tjaw aʼ twiʼ Jesús? b) Qʼamantza jun techel aju in tzaj tyekʼin tiʼ in tnaʼn Jehová aj t-xi qtziyen tuʼn qajbʼen te.

⁵ ¿Tiʼ tnaʼ Jehová tej tjaw aʼ twiʼ Jesús? In tzaj tqʼamaʼn Xjan Uʼj jlu: «Tej tbʼyan Jesús, jatz tuj aʼ ex jaqet ttzi kyaʼj, ex o til Jesús T-xew Dios kuʼtz tuj kyaʼj ik keʼyin ik tzaʼn jun paloma, kubʼil tibʼaj Jesús. Ex tzaj qʼajt Dios tuj kyaʼj in tmaʼn: —Atzun Nkʼwaʼle jlu kʼujlaʼnxix wuʼne, in chin tzalaje tiʼj» (Mat. 3:16, 17). Maske ya otoq tzʼok Jesús te tetzbʼil Jehová, nim jaw tzalaj tej tok tkeʼyin Tkʼwaʼl otoq kubʼ t-ximen tuʼn tajbʼen oʼkxku te. Axju in bʼaj aj t-xi tkʼamoʼn Jehová qtziybʼil tuʼn qajbʼen oʼkxku te, ex tuʼn jlu qo tzajel tkʼiwlaʼn (Sal. 149:4).

⁶ Qo ximen tiʼj jun techel aju kʼonil qiʼj tuʼn tel qnikʼ tiʼj tiʼ in tnaʼn Jehová aj t-xi qtziyen tuʼn qajbʼen te. Qo ximen tiʼj jun tatbʼaj in kux tawaʼn kjoʼn. Ajtzun tchʼiy kjoʼn, in nel tiʼn tal tmeʼjel jun iʼẍ tiʼj ex in xi tqʼoʼn te ttat. Maske a tatbʼaj tajaw tkyaqil kjoʼn, in jaw tzalajxix tuʼnju in xi tqʼoʼn tal tmeʼjel jun iʼẍ te tuʼn tkubʼ tyekʼin tkʼujlabʼil tiʼj. Toj twitz tatbʼaj alo iʼẍ lu mas tbʼanel twitz tkyaqil iʼẍ. Axju in bʼaj aj t-xi qtziyen tuʼn qajbʼen oʼkxku te Jehová, nim in jaw tzalaj aj tbʼant jlu quʼn (Éx. 34:14).

7. ¿Tzeʼn in nonin Malaquías qiʼj tuʼn tel qnikʼ tiʼjju in tnaʼn Jehová kyiʼj qeju in kubʼ kyximen tuʼn kyajbʼen te tuʼn tkyaqil kykʼuʼj?

⁷ (Kjawil uʼjit Malaquías 3:16). Aqeju naʼmx t-xi kytziyen tuʼn kyajbʼen te Jehová ex naʼmx tjaw aʼ kywiʼ, il tiʼj tuʼn kyximen tiʼj qa nim toklen tuʼn tbʼant jlu kyuʼn. Ax tok, te Jehová qoʼ atxix tej qok ten toj talbʼil qtxuʼ, ik tzeʼn kykyaqil xjal. Noqtzun tuʼnj, qo ximen tiʼj tiʼ in tnaʼn Jehová aj tkubʼ qyekʼin qa in nok qqʼoʼn ik tzeʼn aj Kawil qibʼaj ex tuʼn jlu in kubʼ qximen tuʼn t-xi qtziyen tuʼn qajbʼen te ex tuʼn tbʼant tajbʼil quʼn (Prov. 23:15). Ax ikx te, in xi tkʼamoʼn qeju in che ajbʼen te tuʼn tkyaqil kykʼuʼj ex in kux ttzʼibʼin kybʼi toj «libro jatum in che tzaj naʼn qe xjal bʼaʼn che niman» te.

8, 9. ¿Tiʼ taj Jehová tuʼn tbʼant kyuʼn qeju tkuʼx kybʼi toj uʼj te chwinqlal?

⁸ Qa tzʼibʼin qbʼi toj «libro jatum in che tzaj naʼn qe xjal bʼaʼn che niman» te Jehová, ax ikx il tiʼj tuʼn tbʼant junjun tiʼ quʼn. Tqʼama Malaquías qa il tiʼj tuʼn qxobʼ twitz Dios ex tuʼn qximen tiʼj tbʼi.  Qa ma qo kʼulin twitz jun tiʼ, ex nya te Jehová, ok kjawitz tiʼn qbʼi toj uʼj te chwinqlal (Éx. 32:33; Sal. 69:28).

⁹ Tuʼntzunju, nya oʼkx tuʼn t-xi qtziyen te Jehová qa kbʼantel tajbʼil quʼn ex tuʼn tjaw aʼ qwiʼ. Tuʼnju oʼkx jun maj in bʼant jlu quʼn, atzunte tuʼn qkʼulin te Jehová kbʼantel quʼn te jumajx. Il tiʼj tuʼn tkubʼ qyekʼin junjun qʼij tukʼil qbʼinchbʼen qa in qo nimen te Jehová (1 Ped. 4:1, 2).

10. ¿Junxpe taʼ jun xjal in najbʼen te Jehová twitz jun xjal mintiʼ in najbʼen te?

¹⁰ Toj xnaqʼtzbʼil ma kyaj o xnaqʼtzan tiʼj txʼolbʼabʼil tiʼj Caín, Salomón ex kyiʼj aj Israel. Kykyaqilx kyqʼama qa in che kʼulin twitz Dios, pero mintiʼ e ajbʼen oʼkxku te. Aqeju techel lu in tzaj kyyekʼin qa aʼyeju in che ajbʼen te Jehová, il tiʼj tuʼn tok kykʼujlaʼn aju bʼaʼn ex tuʼn tel kyikʼun aju nya bʼaʼn (Rom. 12:9). Tej otoqxi yolin Malaquías tiʼj «libro jatum in che tzaj naʼn qe xjal bʼaʼn che niman» te Dios, yolin Jehová tiʼj «qa mya junx taʼ ju xjal bʼaʼn tukʼil ju xjal mya bʼaʼn, ex mya junx taʼ ju xjal in kʼulun te Dios tukʼil ju xjal mintiʼ in kʼulun te» (Mal. 3:18).

11. ¿Tiquʼn il tiʼj tuʼn tel kynikʼ txqantl xjal tiʼj qa oʼkxku te Jehová in qo ajbʼen?

¹¹ Juntl tten tuʼn t-xi qqʼoʼn chjonte te Jehová tuʼnju o qo jaw tskʼoʼn tuʼn qok te tmajen, aju tuʼn tok kykeʼyin txqantl qa in qo chʼiy toj qokslabʼil (1 Tim. 4:15; Mat. 5:16). Bʼaʼn tuʼn tkubʼ qxjelin jlu: «¿In nelpe kynikʼ txqantl xjal qa oʼkxku te Dios in chin ajbʼene? ¿In kubʼpe nyekʼine qa testigo de Jehová qine toj tkyaqil ambʼil?». Jakulo tzaj tbʼis Jehová aj tok tkeʼyin qa in tzaj kychʼixwi qeju o che oktz toj ttnam tuʼn t-xi kyqʼamaʼn qa in che ajbʼen te (Sal. 119:46; kjawil uʼjit Marcos 8:38).

12, 13. ¿Tiquʼn kwest tuʼn tel nikʼbʼaj kyiʼj junjun erman qa testigo de Jehová qe?

¹² Bʼisbʼajilxix, tuʼnju ateʼ junjun erman in nel kykanoʼn «kynabʼl xjal» te twitz txʼotxʼ ex tuʼntzunju nya junxitl qe  kywitz xjal mintiʼ in che ajbʼen te Dios (1 Cor. 2:12). Aqeju xjal lu oʼkx in che ximen kyiʼjx (Efes. 2:3). Jun techel, maske at nim nabʼil o tzaj qʼoʼn, ateʼ junjun in bʼaj kyxbʼalumin kyibʼ ex in bʼaj kybʼinchaʼn kyten ik tzeʼn qe xjal te twitz txʼotxʼ. In nok kyqʼoʼn kyxbʼalun jitzʼ ex qʼanchaʼl kyximlal toj, axpe ikx aj kyxiʼ kyoj chmabʼil. Junjuntl in bʼaj kymatzoʼn ex in bʼaj kyxyebʼin kywiʼ ik tzeʼn jun xjal nya okslal (1 Tim. 2:9, 10). Ex aj kyten kyukʼil txqantl xjal, kwest tuʼn tel nikʼbʼaj kyiʼj qa okslal qe (Sant. 4:4).

¹³ Ax ikx in kubʼ kyyekʼin junjun erman qa naʼmx tel kyikʼun aju kymod xjal mintiʼ in che ajbʼen te Jehová. Jun techel, aj kyten toj jun ninqʼij, in che ok ten bʼixil ex in kubʼ kyyekʼin kymod ik tzeʼn jun xjal nya okslal. In jax kyqʼoʼn qe kyilbʼilal ex kyyol kyoj redes sociales ik tzeʼn jun xjal naʼmx tchʼiy toj tokslabʼil. Bʼalo naʼmx kytzaj kawin kyuʼn ansyan tuʼnju mintiʼ o bʼant jun matij il kyuʼn, pero in che ok te jun tolsabʼil kye qeju in nok tilil kyuʼn tuʼn tten tbʼanel kymod (kjawil uʼjit 1 Pedro 2:11, 12).

14. ¿Tiʼ il tiʼj tuʼn tbʼant quʼn tuʼn tok qxqʼuqin aju tbʼanel qamiwbʼil at tukʼil Jehová?

¹⁴ In nok tilil kyuʼn xjal tuʼn tchʼiy tajbʼil kychibʼjal nya bʼaʼn, ex tkyaqilju nya bʼaʼn nnoʼk kykeʼyin ex in pon kykʼuʼj tiʼj, ex aju kynimbʼil kyibʼ (1 Juan 2:16). Atzun qe, teku Jehová qoʼ, tuʼntzunju in tzaj tqʼamaʼn tuʼn tel qikʼun «aju mya bʼaʼn ex aju achbʼil twitz txʼotxʼ» ex tuʼn tten «qnabʼl tuj tqʼijlalil jaʼlo, ex tuʼn qbʼet tuj tumelxix, ex tuʼn qniman Dios» (Tito 2:12). Tuʼn tel kynikʼ xjal qa oʼkxku te Jehová in qo ajbʼen il tiʼj tuʼn tkubʼ qyekʼin tukʼil qbʼinchbʼen toj tkyaqil tten qanqʼibʼil. Ik tzeʼn alkye tten qo yolin, qo waʼn ex qo kʼan, tukʼil qxbʼalun ex alkye tten in bʼaj qbʼinchaʼn qten, ex aju qmod toj aqʼuntl (kjawil uʼjit 1 Corintios 10:31, 32).

15. ¿Tiquʼn kukx kbʼel qyekʼin qkʼujlabʼil ex tbʼanel qmod kyukʼil erman?

¹⁵ In nel nikʼbʼaj tiʼj qa in xi qqʼoʼn  chjonte te Jehová tiʼj tbʼanel qamiwbʼil at tukʼil aj tkubʼ qyekʼin tbʼanel qmod kyukʼil erman, tuʼnju ax ikx etzan qe tuʼn Jehová. Qa kukx ma tzaj qnaʼn jlu, kukx kbʼel qyekʼin qkʼujlabʼil kyiʼj ex tbʼanel qmod (1 Tes. 5:15). Tqʼama Jesús jlu kye t-xnaqʼtzbʼen: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:35).

16. ¿Alkye techel tkuʼx toj Tley Moisés aju in tzaj tyekʼin tiʼ in kubʼ tnaʼn Jehová kyiʼj tmajen?

¹⁶ Qo keʼyin tiʼj jun techel aju kʼonil qiʼj tzeʼn qmod kbʼel qyekʼin kyukʼil erman ateʼ kyxol kʼloj okslal. Aʼyeju makbʼil ateʼ toj Tja Dios oʼkx jaku che ajbʼen toj kʼulbʼil axix tok in xi qʼet te Jehová. Toj Tley Moisés in tzaj qʼamaʼn tzeʼnxix tuʼn kyok xqʼuqet, ex iltoq tiʼj tuʼn tkubʼ bʼyet aju xjal mintiʼ in xi tbʼiʼn qe kawbʼil lu (Núm. 1:50, 51). Qa ok t-xqʼuqen Jehová qe tiʼchaq lu, aʼyeju e ajbʼen toj kʼulbʼil te, mas che okel t-xqʼuqin qeju kukx in che ajbʼen te. Jun maj tqʼama jlu tiʼj ttnam: «Alkye ma tzʼok tbʼinchaʼn mya bʼaʼn tiʼj tnam etzan wuʼne junx taʼ ik tzaʼn tiʼj t-santil tbʼaqʼ nwitze nnoʼk tbʼinchaʼn jlu» (Zac. 2:8).

17. ¿Alkyeqe tiʼchaq in nok tqʼoʼn Jehová twiʼ tiʼj?

¹⁷ Nim toklen tej tqʼama Malaquías qa in tzaj tqʼoʼn Jehová twiʼ kyiʼj tmajen aj kyten junx ex in bʼin tiʼjju in bʼaj kyxol (Mal. 3:16). Ax tok, ojtzqiʼn tuʼn Jehová «alkye qeju tekuxix» (2 Tim. 2:19). Tajxix tuʼn tel tnikʼ tiʼj tkyaqilju in bʼant quʼn ex tiʼj junjun tiʼ in xi qqʼamaʼn (Heb. 4:13). Qa mintiʼ in kubʼ qyekʼin qkʼujlabʼil kyiʼj erman, in nel tnikʼ Jehová tiʼj. Pero qʼuqli qkʼuʼj qa qʼiʼn tajlal tuʼn aj tkubʼ qnajsaʼn qil qxolx, aj tbʼaj qonin qibʼ, aj qbʼinchante xtalbʼil ex aj ttzaj qʼaqʼin qkʼuʼj kyiʼj txqantl (Heb. 13:16; 1 Ped. 4:8, 9).

18. ¿Tzeʼn in xi qqʼoʼn chjonte te Jehová tuʼnju o qo ok te tmajen?

¹⁸ Ax tok, qajxix tuʼn t-xi qqʼoʼn chjonte te Jehová tuʼnju o tzaj tqʼoʼn qoklen tuʼn qok te tmajen. Ojtzqiʼn quʼn qa aju mas tbʼanel kubʼ qximen tuʼn tbʼant quʼn aju tej t-xi qtziyen tuʼn qajbʼen te Jehová. Maske in qo anqʼin «kyxol qe xjal mya bʼaʼn qe ex mibʼan che bʼin», qaj tuʼn tel kynikʼ xjal qiʼj qa mintiʼ qpaltil ex mintiʼ qil, tuʼntzun qqoptzʼaj kyxol xjal (Filip. 2:15). Qikʼumel tkyaqilju nya bʼaʼn (Sant. 4:7). In nok qqʼoʼn kyoklen erman ex in che ok qkʼujlaʼn, tuʼnju ojtzqiʼn quʼn qa ax ikx etzan qe tuʼn Jehová (Rom. 12:10).

19. ¿Tzeʼn in tzaj tkʼiwlaʼn Jehová qeju in che ajbʼen te?

¹⁹ In tzaj qʼuqbʼaʼn qkʼuʼj tuʼn tziybʼil lu: «Mlay kyaj tkolin Qman qe xjal etzan tuʼn» (Sal. 94:14). Noq tiʼxku jaku tzaj qiʼj jaku tzʼok qeʼ qkʼuʼj tiʼj tziybʼil lu. Nix aju kamik jaku tzʼel qʼinte ambʼil tuʼn qok tkʼujlaʼn Jehová (Rom. 8:38, 39). «Qa nqo anqʼin teteʼ Qajaw nqo anqʼina; exqa maqo kyim tex Qajaw qo kyimelaʼ. Quʼmtzun te Dyosqoʼ qa itzʼqoʼ exqa kyimniqoʼ» (Rom. 14:8, XT). Qajxix tuʼn tpon qʼij jatumel kxel tqʼoʼn Jehová kyanqʼibʼil kykyaqil tamiw o che kyim ex kukx e ajbʼen te (Mat. 22:32). Axpe ikx toj ambʼil jaʼlo in tzaj qkʼamoʼn nim kʼiwlabʼil. Ik tzeʼn in tzaj tqʼamaʼn Tyol Dios, «at tzalajbʼil teju nasyon a Qman [Jehová] ma tzʼok te Kydios, aju ma jaw t-skʼoʼn Dios tuʼn tok te tekuxix» (Sal. 33:12).