Tenx qʼaqʼbʼil qkʼuʼj tiʼj alkyexku xjal
TEJ t-xi t-xnaqʼtzaʼn Jesús qe t-xnaqʼtzbʼen tuʼn kypakbʼan tiʼj tbʼanel tqanil, ojtzqiʼntoq tuʼn qa nya kykyaqil xjal tzalajel aj kypon (Luc. 10:3, 5, 6). At maj in che kanet xjal quʼn toj pakbʼabʼil, aqeju nya bʼaʼn kymod ex at junjun kyaj tuʼn qok kykʼixbʼisaʼn. Ex tuʼn jlu kwest tuʼn tten qʼaqʼbʼil qkʼuʼj kyiʼj xjal tuʼnju in kubʼ kyyekʼin nya bʼaʼn kymod.
Aju xjal at qʼaqʼbʼil tkʼuʼj in nel tnikʼ tiʼjju at tajbʼen kye txqantl ex tiʼjju nya bʼaʼn in tzaj kyiʼj, in tzaj tlastmi ex tajbʼil tuʼn tonin kyiʼj. Qa ma chewix qʼaqʼbʼil qkʼuʼj, jaku naj tzalajbʼil in kubʼ qnaʼn toj pakbʼabʼil ex ya mlay tzʼok tilil quʼn. Qatzun ma tzʼok tilil quʼn tuʼn tten qʼaqʼbʼil qkʼuʼj, kʼonil qiʼj tuʼn qtzalaj toj pakbʼabʼil. Ik tten jlu ik tzeʼn aj tokx qqʼoʼn siʼ toj qʼaqʼ tuʼn kukx tkʼant (1 Tes. 5:19).
¿Tzeʼn jaku kubʼ qyekʼin qʼaqʼbʼil qkʼuʼj, axpe ikx kyoj ambʼil kwest? Qo xnaqʼtzan tiʼj oxe techel jaku tzʼel qkanoʼn: tiʼj Jehová, tiʼj Jesús ex tiʼj apóstol Pablo.
QKANOʼMIL TIʼJ QʼAQʼBʼIL TKʼUʼJ JEHOVÁ
Kyoj nim mil abʼqʼi ma che ikʼ, kukx in nikʼx tuʼn Jehová aj kyyolin txqantl nya ax tok yol tiʼj. Maske ikju, kukx in tzaj tqʼoʼn aju «bʼaʼn kye qeju mintiʼ in xi kyqʼoʼn chjonte te ex kye qeju mya bʼaʼn» (Luc. 6:35). In kubʼ tyekʼin jlu tuʼnju at tpasens. Taj Jehová «tuʼn kyklet kykyaqil xjal» (1 Tim. 2:3, 4). Ax tok ikʼun nya bʼaʼn tuʼn, pero in nok tqʼoʼn kyoklen xjal ex tkʼiʼ tuʼn tkyim jun (2 Ped. 3:9).
Ojtzqiʼn tuʼn Jehová qa o tzʼok tmoẍsaʼn Satanás kynabʼil qeju mintiʼ in che nimen te (2 Cor. 4:3, 4). Nim xjal atxix tej kʼwaʼlx qe xi xnaqʼtzaʼn nya ax tok kye tiʼj Jehová. Tuʼntzunju kwest tuʼn tchʼexpaj kyximbʼetz tuʼn tel kynikʼ tiʼjju axix tok. Pero taj Jehová tuʼn tonin kyiʼj. ¿Tzeʼn ojtzqiʼn jlu quʼn?
Qbʼinx aju bʼaj kyiʼj xjal te tnam Nínive. Maske bʼaʼntoq che bʼiyen, xi tqʼamaʼn Jehová te Jonás qa tzul tzʼeʼy tkʼuʼj tiʼj tnam, jatumel attoq mas te 120 mil xjal ex tqʼama qa «mixtiʼ bʼiʼn kyuʼn seʼn tuʼn kykletaʼ», moqa mintiʼ in nel kynikʼ tiʼj alkye bʼaʼn ex nya bʼaʼn (Jon. 4:11, XT). El tnikʼ Jehová tiʼj qa mintiʼtoq chʼin kyojtzqibʼil xjal te Nínive tiʼj. Tuʼntzunju, tzaj qʼaqʼin tkʼuʼj kyiʼj ex xi tsamaʼn Jonás tuʼn t-xi tqʼamaʼn kye tiʼtoq tuʼn tbʼant tuʼn.
Ik tzeʼn te Jehová, ax ikx qe in kubʼ qximen qa nim kyoklen xjal. Jaku tzʼel qkanoʼn tiʼj qa ma ten qajbʼil tuʼn qonin kyiʼj xjal in qok kybʼiʼn, maske in kubʼ qximen qa nya kyaj tuʼn tel kynikʼ tiʼj axix tok.
QKANOʼMIL TIʼJ QʼAQʼBʼIL TKʼUʼJ JESÚS
Ik tzeʼn te Ttat, ax ikx te Jesús tzaj qʼaqʼin tkʼuʼj kyiʼj xjal kyajtoq tuʼn tel kynikʼ tiʼj Jehová. Tej tok tkeʼyin «Jesús nim xjal, tzaj qʼaqʼan tkʼuʼj kyiʼj; porke otoq che sikt ex in che bʼisun, ik kyten ik tzaʼn qe ẍneʼl mintiʼ pastoril kye» (Mat. 9:36). Nya oʼkx ok tqʼoʼn twitz Jesús tiʼj tzeʼn che keʼyin xjal. El tnikʼ tiʼj qa ok kybʼinchaʼn nejenel kye okslabʼil nya bʼaʼn kyiʼj xjal e pon bʼilte ex xi kyqʼamaʼn nya ax tok xnaqʼtzbʼil kye. Ojtzqiʼntoq tuʼn Jesús qa nim xjal kyxel kyqʼoʼn ambʼil te nya bʼaʼn ex tuʼn jlu ya mlaytoq che ok lepeʼ tiʼj, pero ok ten qʼamalte «nimku xnaqʼtzbʼil [...] kye» (Mar. 4:1-9).
Miʼn tzaj bʼaj qkʼuʼj qa mintiʼ ma tzʼok tbʼiʼn jun xjal tbʼanel tqanil aj qyolin tnejel maj tukʼil.
In chʼexpaj kyanqʼibʼil xjal ex tuʼn jlu jaku chʼexpaj kyximbʼetz tiʼj axix tok.
Aj tkubʼ kyyekʼin xjal nya bʼaʼn kymod tiʼj tbʼanel tqanil, bʼaʼn tuʼn qximen tiʼj tiquʼn in kubʼ kyyekʼin kymod ikju ex kʼokel tilil quʼn tuʼn tel qnikʼ tiʼj. Bʼalo at junjun jaku tzʼel kyikʼen Tyol Dios moqa aju okslabʼil axix tok, noq tuʼnju nya bʼaʼn techel in kubʼ kyqʼoʼn qeju in kyqʼamaʼn qa okslal qe. Atzun junjuntl, olo txi qʼamaʼn nya ax tok kye tiʼjju nimen quʼn. Ex atlo junjuntl mintiʼ in qo ok kybʼiʼn tuʼnju in che tzaj xobʼ kywitz kyvesin moqa kye toj kyja aj kyok ten xmayil kyiʼj.
At junjun xjal nya toj tumel in tzaj kytzaqʼweʼn tuʼnju o tzikʼ nim nya bʼaʼn toj kyanqʼibʼil, aju in tzaj kybʼis tuʼn. In tzaj tqʼamaʼn jun ermana Kim tbʼi aju xi samaʼn ajbʼel toj juntl tnam: «Toj jun tembʼil te pakbʼabʼil jatumel in qo pakbʼane, nim xjal naj tkyaqil aju at kye tuʼn tpaj jun qʼoj. Mintiʼ qʼuqbʼil kykʼuʼj tiʼj ambʼil tzul, in tzaj bʼajxix kykʼuʼj ex mintiʼ in nok qeʼ kykʼuʼj kyiʼj txqantl. Nim maj in che kanet xjal quʼne aqeju in tzaj kyqʼoj tiʼj tbʼanel tqanil. Jun maj e ok tzoqpaj wiʼje akux in chin pakbʼane».
¿Tiʼ in bʼant tuʼn Kim tuʼn kukx tten qʼaqʼbʼil tkʼuʼj? Tqʼamatl jlu: «Qa mintiʼ in kubʼ kyyekʼin xjal tbʼanel kymod, in tzaj nnaʼne aju tkuʼx toj Proverbios 19:11: ‹Tuʼnju at tnabʼl xjal mya jurat in jaw qʼojl›. Tuʼnju in nel nnikʼe tiʼjju in bʼaj kyiʼj, o tzʼonin wiʼje tuʼn tkubʼ nyekʼine qʼaqʼbʼil nkʼuʼje. Axpe ikx nya kykyaqil xjal in bʼant jlu kyuʼn. Tojxju tembʼil te pakbʼabʼil, in qo meltzʼaje visitaril junjun tbʼanel xjal».
Noqwit aqoʼ atoʼ toj tembʼil te pakbʼabʼil, jaku kubʼ qxjelin jlu: ¿Tzeʼnwtlo qmod jaku kubʼ qyekʼin tiʼjju tbʼanel tqanil tiʼj Tkawbʼil Dios? Jun techel, qa nim maj o tzaj qʼamaʼn nya ax tok yol qe kyiʼj testigos de Jehová, jakulo kubʼ qyekʼin nya bʼaʼn qmod ex il-lo tiʼj tuʼn tkubʼ kyyekʼin qʼaqʼbʼil kykʼuʼj qiʼj. Aj ttzaj qnaʼn aju nabʼil tqʼama Jesús qa bʼaʼn tuʼn tkubʼ qyekʼin qmod kyiʼj txqantl ik tzeʼn qajbʼil tuʼn tkubʼ kyyekʼin qukʼil, kʼonil qiʼj tuʼn tel qnikʼ tiʼjju in bʼaj kyiʼj axpe ikx kyoj ambʼil kwest (Mat. 7:12).
QKANOʼMIL TIʼJ QʼAQʼBʼIL TKʼUʼJ PABLO
Ten qʼaqʼbʼil tkʼuʼj Pablo, axpe ikx kyiʼj qeju el kyikʼen axix tok. ¿Tiquʼn? Tuʼnju mintiʼ el naj tiʼj tkʼuʼj tzeʼntoq tmod otoq ten. Tqʼama jlu: «Ojtxi in yasune tiʼj, ex in yajlane kyiʼj okslal, ex o nbʼinchaye mya bʼaʼn kyiʼj; pero o tzaj qʼaqʼan tkʼuʼj Dios wiʼje, porke mintiʼ el nnikʼe tiʼj ju o nbʼinchaye naʼnxtoq wokslane» (1 Tim. 1:13). El tnikʼ tiʼj qa kubʼ tyekʼin Jehová ex Jesús qʼaqʼbʼil kykʼuʼj tiʼj. Bʼalo tzaj tnaʼn aju tmod tej tok tkeʼyin junjun xjal nya bʼaʼn kymod akux in pakbʼaʼn.
At maj e kanet junjun xjal tuʼn Pablo toj pakbʼabʼil, aju atxix kykʼuʼj tiʼj kyokslabʼil. ¿Tiʼ bʼant tuʼn Pablo kyoj ambʼil lu? In tzaj tqʼamaʼn Hechos 17:16 qa jun maj, «tzaj taʼw tuj tanmi tej tkeʼyinte nojni tuj tnam kyuʼn qe tilbʼilal» akux attoq toj tnam Atenas. Pero axju tbʼis ajbʼen tuʼn tuʼn t-xi tqʼoʼn jun tbʼanel tqanil kye xjal (Hech. 17:22, 23). Ximen Pablo tiʼjju nimen kyuʼn xjal ex jyon tumel tzeʼn tuʼn tpakbʼan kye tuʼntzun kyklet junjun (1 Cor. 9:20-23).
Aj tetz ilin jun xjal qiʼj toj pakbʼabʼil ex qa nya toj tumel qe xnaqʼtzbʼil nimen tuʼn, axju jaku bʼant quʼn ik tzeʼn te Pablo. Bʼaʼn tuʼn tajbʼen aju ojtzqiʼn quʼn kyiʼj xjal tuʼntzun qonin kyiʼj tuʼn tok kybʼiʼn «tqanil bʼaʼn» (Is. 52:7). Jun techel, tqʼama jun ermana Dorothy tbʼi: «Toj lugar jatumel in qo pakbʼane, at nim xjal o txi xnaqʼtzaʼn kye qa kyuw in kubʼ tqʼoʼn Dios qkastiw. Tnejel, in xi nqʼamaʼne qa tbʼanel aju in bʼant kyuʼn tuʼnju nimen kyuʼn qa at Dios, yajxitl in xi nxnaqʼtzaʼne kye aju in tzaj tyekʼin Xjan Uʼj tiʼj tkʼujlabʼil Jehová ex kyiʼj ttziybʼil toj ambʼil tzul».
TZʼOK TILIL TUʼNA TUʼN TKUBʼ TIʼJ NYA BʼAʼN
Aju kymod junjun xjal in qo pakbʼan kye mas kyxel toj il, akux in qo anqʼin kyoj «mankbʼil tqʼijlalil» (2 Tim. 3:1, 13). Noqtzun tuʼnj, mintiʼ tuʼn t-xi qqʼoʼn ambʼil te jlu tuʼn tnaj qʼaqʼbʼil qkʼuʼj moqa aju tzalajbʼil in kubʼ qnaʼn. In tzaj qʼoʼn Jehová qipumal tuʼn tkubʼ tiʼj nya bʼaʼn quʼn tukʼil tbʼanel qbʼinchbʼen (Rom. 12:21). Jun precursora Jessica tbʼi in tzaj tqʼamaʼn jlu: «Nim maj in che kanet xjal wuʼne aʼyeju in jaw kynimsan kyibʼ, ikʼun qoʼ kyuʼn ex aju tbʼanel tqanil. Jaku tzaj qqʼoj tuʼn jlu. Aj in xi tzyet tuʼn yoline tukʼil jun xjal, in xi nqanine te Jehová toj wanmiye tuʼn tten nximbʼetze tiʼj ik tzeʼn te. Iktzun tten mintiʼ in nok nqʼoʼn nwiʼye tiʼjju in kubʼ nnaʼne ex in chin ximane tiʼj tzeʼn jaku chin onine tiʼj xjal».
Kukx qo jyon kyiʼj qeju kyaj tuʼn tel kynikʼ tiʼj axix tok.
Aj tel ambʼil, at junjun kbʼel kyyekʼin kyajbʼil tiʼj axix tok qa ma tzʼok tilil quʼn tuʼn qonin kyiʼj tuʼn tel kynikʼ tiʼj Jehová.
Ax ikx bʼaʼn tuʼn qximen tiʼj tzeʼn jaku qo onin kyiʼj erman in qo pakbʼan kyukʼil. Tqʼamatl Jessica jlu: «Qa ma tzikʼ jun nya bʼaʼn qiʼje toj pakbʼabʼil, in nok tilil wuʼne tuʼn miʼn nximane tiʼj. In xi tzyet tuʼn nyoline tiʼj juntl tiʼj jaku tzʼonin qiʼje, ik tzeʼn aju tbʼanel in tzaj qiʼj toj pakbʼabʼil maske at junjun xjal in kubʼ kyyekʼin nya bʼaʼn kymod».
Ojtzqiʼn tuʼn Jehová alkye nya bʼaʼn in qo ok weʼ twitz toj pakbʼabʼil, ex qʼuqli qkʼuʼj tiʼj qa nimxix in jaw tzalaj aj tkubʼ qyekʼin qʼaqʼbʼil qkʼuʼj ik tzeʼn te (Luc. 6:36). Ax tok, nya a t-xilen jlu qa kukx kbʼel tyekʼin qʼaqʼbʼil tkʼuʼj te jumajx. Jaku tzʼok qe qkʼuʼj tiʼj qa ojtzqiʼn tuʼn jtoj kbʼel tnajsaʼn tkyaqil nya bʼaʼn at jaʼlo. Akux in pon ambʼil lu, nim toklen tuʼn kukx qpakbʼan (2 Tim. 4:2). Tuʼntzunju, kukx qbʼincham tajbʼil Jehová tukʼil nim tzalajbʼil ex tenx qʼaqʼbʼil qkʼuʼj kyiʼj kykyaqil xjal.
