¿Ope jaw tuʼjina qe uʼj Aju Xqʼuqil kʼitzqeku che etz? Jaku tzʼel tnikʼa tiʼj qa ma che tzaqʼwet xjel lu tuʼna:

¿Tiʼ kyaje tiʼ jaku bʼant quʼn tuʼn tbʼant-xix qbʼitzin?

Bʼaʼn tuʼn qkubʼ weʼ toj tumel tuʼntzun tjaw qiʼn qbʼitzbʼil jawni, tuʼn t-xi qjukʼuʼn nim kyqʼiqʼ, tuʼn tjaw qjaqoʼn qtziʼ ex toj qqul, ex tuʼn qbʼitzin tukʼil tqʼajqʼajel qwiʼ. Iktzun tten qo bʼitzil tukʼil tkyaqil qipumal (w17.11, t-xaq 5).

¿Tiʼ xnaqʼtzbʼil in nel qiʼn tiʼjju jatumel e kubʼ qʼoʼn qe tnam te kolbʼil toj tnam Israel ex tiʼjju alkye tten bʼinchaʼn maj qe bʼe?

Attoq qaq tnam te kolbʼil toj tkyaqil tnam, ex bʼinchan maj qe bʼe. Noq tuʼn jlu nya kwest ex jun rat jakutoq che pon xjal klol kyibʼ (w17.11, t-xaq 14).

¿Tiquʼn in nok chojbʼil te tbʼanelxix oyaj o tzaj tqʼoʼn Dios?

Tuʼnju in tzaj tqʼoʼn ambʼil qe tuʼn qanqʼin te jumajx ex in qo etz tiʼn tjaqʼ il ex kamik. Tuʼnju kʼujlaʼn qe tyajil Adán tuʼn Jehová, tzaj tsamaʼn Jesús tuʼn tkyim tuʼn qpaj (wp17.6, t-xaq 6 ex 7).

¿Tiquʼn in xi qqʼamaʼn qa atz in yolin Salmo 118:22 tiʼjju tuʼn tjatz anqʼin Jesús?

Mintiʼ xi kykʼamoʼn xjal tuʼn tok Jesús te Mesías ex kubʼ kybʼyoʼn. Iltoq tiʼj tuʼn tjaw anqʼin juntl maj tuʼn tok «skyini te simyent» (w17.12, t-xaq 9 ex 10).

¿Ilpe tiʼj tuʼn tok jun xjal te tnejel kʼwalbʼaj tuʼntzun tok te t-xeʼchel Mesías?

At maj atz e tzaj t-xeʼchel Jesús kyiʼj tnejel kʼwaʼlbʼaj, pero nya tkyaqil maj bʼaj jlu. Ojtzqiʼntoq jlu kyuʼn aj Judiy, jun techel, in neltoq kynikʼ tiʼj qa atztoq tuʼn tul Mesías kyiʼj toj tja David aju tkʼwaʼl Jesé mas chʼin (w17.12, t-xaq 14 ex 15).

¿Alkye junjun nabʼil in che kanet quʼn toj Tyol Dios tiʼj kyaqʼun aj qʼanil?

In tzaj tqʼamaʼntoq Ley tzaj qʼoʼn te Moisés qa iltoq tiʼj tuʼn kyel paʼn qe xjal yabʼ kyiʼj txqantl, tuʼn tel kytxʼjoʼn kyqʼabʼ qa otoq tzʼok kymakoʼn kyimni ex tuʼn tkux kymaquʼn kytzʼaʼl. Ax ikx tqʼama tuʼn tbʼaj circuncidarit jun tal neʼẍ aj tikʼ wajxaq qʼij tulen itzʼj, tbʼanel ambʼil jlu tuʼnju jun rat in tzqij chikʼ (wp18.1, t-xaq 7).

¿Tiquʼn bʼaʼn tuʼn tok tkʼujlan tibʼ jun okslal toj tumel?

Il tiʼj tuʼn kyok qkʼujlaʼn qe xjal ik tzeʼn qe in nok qkʼujlan qibʼ (Mar. 12:31). Ax ikx qe chmilbʼaj il tiʼj tuʼn tok kykʼujlaʼn «kyxuʼjil ik tzaʼn in kykʼujlaʼn kyximlal» (Efes. 5:28). Pero jaku tzaj nya bʼaʼn tiʼj jun xjal qa oʼkx in nok tkʼujlan tibʼ (w18.01, t-xaq 23).

¿Tiʼ jaku bʼant quʼn tuʼn tchʼiy qamiwbʼil tukʼil Jehová?

Il tiʼj tuʼn qxnaqʼtzan tiʼj Tyol Dios, tuʼn qximen tiʼjju in kubʼ quʼjin ex tuʼn tkubʼ qanqʼiʼn. Nim toklen tuʼn qok lepeʼ tiʼj onbʼil in tzaj tqʼoʼn xewbʼaj xjan. Qqʼonx chjonte ex qbʼinx aju onbʼil in tzaj kyqʼoʼn txqantl qe (w18.02, t-xaq 26).

¿Tiquʼn mintiʼ tuʼn kyajbʼen cheʼw nix adivinación quʼn tuʼn tel qnikʼ tiʼjju kbʼajel toj ambʼil tzul?

At nim tiquʼn mintiʼ tuʼn kyajbʼen quʼn. Pero aju mas nim toklen, mintiʼ in tzaj tqʼoʼn Tyol Dios ambʼil tuʼn kyajbʼen quʼn (wp18.2, t-xaq 4 ex 5).

¿Alkye qmod kbʼel qyekʼin qa otoq tzaj qkʼamoʼn jun txokbʼil?

Qa ma tzaj qkʼamoʼn jun txokbʼil, kʼokel tilil quʼn tuʼn tjapun twi qyol (Sal. 15:4). Mintiʼ tuʼn tkubʼ qximen qa ya mlay qoʼx noq tuʼn jun tiʼ nya nim toklen. Aju erman otoq tzaj qʼonte txokbʼil qiʼj, bʼalo otoq tzʼaqʼunan nim tuʼn tbʼaj tbʼinchaʼn wabʼj (w18.03, t-xaq 18).

¿Tiʼ xnaqʼtzbʼil jaku tzʼel kyiʼn qeju o txi qʼoʼn jun kyoklen tiʼj Timoteo?

Ximen Timoteo kyiʼj txqantl ex kubʼ tqʼoʼn tnejel aju tajbʼebʼil te Jehová twitz alkyexku juntl tiʼ. Aqʼunan nim tuʼn tajbʼen te Jehová ex kubʼ tqʼoʼn toj xnaqʼtzbʼil aju el tnikʼ tiʼj. Kukx ok tilil tuʼn tuʼn tchʼiy tamiwbʼil tukʼil Jehová ex ok qeʼ tkʼuʼj tiʼjju onbʼil tzaj tqʼoʼn xewbʼaj xjan. Nya oʼkx qe ansyan jaku tzʼel kykanoʼn tbʼanel techel kyaj tqʼoʼn, sino kykyaqil erman jaku bʼant kyuʼn (w18.04, t-xaq 13 ex 14).