1. ¿Tiquʼn junxitl qoʼ kywitz txkup?

O TZAJ tqʼoʼn Jehová jun tiʼ qe aju in qo ok tuʼn te junxitl kywitz txkup: aju qximbʼetz. Attoq t-ximbʼetz Adán ex Eva. ¿Tiquʼn in xi qqʼamaʼn jlu? Tuʼnju xi kyewin kyibʼ tej mintiʼ xi kybʼiʼn Dios. A jlu in tzaj tyekʼin qa kubʼ kynaʼn nya bʼaʼn.

2. ¿Tiquʼn chʼixme ik qximbʼetz ik tzeʼn jun brújula? (Qʼonka twitza tiʼj tnejel tilbʼilal).

² Aju qximbʼetz, atzun jun tiʼ in tzaj qʼamante aju bʼaʼn ex aju nya bʼaʼn, ex at tajbʼen tuʼn ttzaj tyekʼin qbʼe toj qanqʼibʼil. Chʼixme ik jlu ik tzeʼn jun brújula. Qa toj tumel in naqʼunan jun brújula, in nonin tiʼj yukil bark tuʼn miʼn tel tzpet tiʼj tbʼe. Pero, ¿tiʼ in bʼaj qa nya toj tumel in naqʼunan brújula? Jaku txi qʼiʼn yukil bark toj junxitl bʼe tuʼn, tuʼnju at nim kyqʼiqʼ ex nim ola toj mar. Chʼixme axju in bʼaj tukʼil qximbʼetz, qa xnaqʼtzaʼn maj, jaku qox tiʼn toj tbʼanel bʼe, qatzun nya xnaqʼtzaʼn maj, jaku qox tiʼn toj nya bʼaʼn.

3. ¿Tiʼ jaku bʼaj qa nya toj tumel xnaqʼtzaʼn t-ximbʼetz jun xjal?

³ Qa nya toj tumel xnaqʼtzaʼn t-ximbʼetz jun xjal, mlay tzʼel  tnikʼ tiʼjju nya bʼaʼn ex mlay tzaj tqʼamaʼn tuʼn miʼn tkubʼ tbʼinchaʼn (1 Tim. 4:1, 2). Ax ikx jaku tqʼamaʼn qa «bʼaʼn aju mya bʼaʼn» (Is. 5:20). Tqʼama Jesús jlu kye t-xnaqʼtzbʼen: «Tzul tqʼijlalil kbʼel kyximan xjal qa te Dios in che ajbʼen ok kykubʼ bʼyoʼne kyuʼn» (Juan 16:2). Atzun jlu kubʼ kyximen xjal kubʼ bʼyonte Esteban, ex ax jlu in kubʼ kyximen qeju ik kybʼinchbʼen ik tzeʼn kye (Hech. 6:8, 12; 7:54-60). Aqeju xjal in kubʼ kybʼinchaʼn junjun matij bʼiybʼil ex in nokxix kyqʼon kyibʼ te okslal, aju in bʼant kyuʼn in nel kyikʼen qe tkawbʼil Jehová (Éx. 20:13). Tuʼn jlu in nel qnikʼ tiʼj qa in che kubʼ sbʼun tuʼn kyximbʼetz.

4. ¿Tiʼ jaku bʼant quʼn tuʼn miʼn qkubʼ sbʼuʼn tuʼn qximbʼetz?

⁴ ¿Tiʼ jaku bʼant quʼn tuʼn miʼn qkubʼ sbʼuʼn tuʼn qximbʼetz? Aʼyeju kawbʼil ex nabʼil ateʼ toj Tyol Dios at kyajbʼen «te xnaqʼtzbʼil qe, ex tuʼn qmayonjtz tuʼn miʼn qbʼinchante mya bʼaʼn, ex tuʼn tjiqumanjtz tiʼj qnabʼl, ex tuʼn qxnaqʼtzanjtz tuʼn qbʼet tuj tumelxix» (2 Tim. 3:16). Tuʼn tok qximbʼetz ik tzeʼn te Jehová ex tuʼn qtzaj tonin, il tiʼj tuʼn qok te tbʼanel xnaqʼtzal tiʼj Tyol Dios, tuʼn qximen tiʼjju in tzaj tqʼamaʼn ex tuʼn tkubʼ qqʼoʼn toj xnaqʼtzbʼil. Tuʼntzunju, qo xnaqʼtzan tiʼj tzeʼn in che onin tkawbʼil Jehová qiʼj ex qe nabʼil tuʼntzun t-xi qxnaqʼtzaʼn qximbʼetz.

5, 6. ¿Alkye tten in che onin tkawbʼil Jehová qiʼj qa ma chex qbʼiʼn?

⁵ Tuʼn kyonin tkawbʼil Jehová qiʼj, nya oʼkx tuʼn kykubʼ quʼjin moqa tuʼn kyok qojtzqiʼn. Il tiʼj tuʼn kyok qkʼujlaʼn ex tuʼn kyxi qbʼiʼn. In tzaj tqʼamaʼn Tyol Dios jlu: «Kyikʼun ele aju mya bʼaʼn ex kykʼujlame aju bʼaʼn» (Amós 5:15). Jun tten tuʼn tbʼant jlu quʼn, aju tuʼn tten qximbʼetz kyiʼj tiʼchaq ik tzeʼn te Jehová. Qo ximen tiʼj qa ma tzʼel ambʼil mintiʼ in nokx qwatl. In tzajtzun tqʼamaʼn jun aj qʼanil alkye wabʼj kxel qwaʼn, tuʼn qbʼinchaʼn ejercicio ex tuʼn tkubʼ qchʼixpuʼn junjun tiʼchaq in bʼant quʼn. Qa ma tzʼel qnikʼ tiʼj qa mas bʼaʼn atoʼ tuʼnju tzaj tqʼamaʼn aj qʼanil, ¿mlaype tzʼok qqʼoʼn toklen aj qʼanil ex qe tconsej?

⁶ Chʼixme axju in bʼaj qiʼj, o tzaj tqʼoʼn Jehová junjun kawbʼil tuʼn miʼn kytzaj nya bʼaʼn qiʼj tuʼn il ex mas tbʼanel in nok qanqʼibʼil kyuʼn. Jun techel, qo ximen tiʼj tzeʼn in xqʼuqin qiʼj aju in tzaj tqʼamaʼn Tyol Dios tiʼj nya ax tok yol, tiʼj sbʼubʼil, tiʼj elqʼabʼil, tiʼj yaẍbʼil, tiʼj bʼiybʼel ex tiʼj kyaqʼun chman (kjawil uʼjit Proverbios 6:16-19; Apoc. 21:8). Aj in nok qqʼoʼn qwitz tiʼjju tbʼanel in tzaj qe tuʼnju in xi qbʼiʼn Jehová, in chʼiy qkʼujlabʼil tiʼj ex kyiʼj tkawbʼil.

7. ¿Alkye tten in che onin txʼolbʼabʼil toj Tyol Dios qiʼj qa ma qo ximen kyiʼj?

⁷ Nya il tiʼj tuʼn qikʼ toj kʼixkʼoj tuʼntzun tel qnikʼ tiʼj alkye bʼaʼn ex nya bʼaʼn. Jaku tzʼel qnikʼ tiʼj qa ma qo uʼjin tiʼjju bʼaj kyiʼj xjal mintiʼ xi kybʼiʼn Jehová, ex tuʼn qximen tiʼjju in tzaj t-xnaqʼtzaʼn qe. In tzaj tqʼamaʼn Proverbios 1:5 jlu: «Aju xjal at tnabʼl ex list in kubʼ tqʼoʼn twiʼ kyiʼj qe yol bʼaʼn». Aju xnaqʼtzbʼil lu atz tzajni tukʼil Jehová ex atzun mas tbʼanel. Jun techel, qo ximen tiʼjju nya bʼaʼn ikʼ tiʼj aj kawil David tej tyaẍin tukʼil Bat-seba tuʼnju mintiʼ nimen te Jehová (2 Sam. 12:7-14). Akux in qo uʼjin tiʼj txʼolbʼabʼil lu, bʼaʼn tuʼn qximen kyiʼj xjel ik tzeʼn jlu: «¿Tiʼ jakutoq bʼant tuʼn David tuʼn miʼn tikʼ twitz tiʼj nya bʼaʼn lu? Qa ma chin ok weʼye twitz jun nya bʼaʼn ik tzeʼn jlu, ¿tiʼ jaku bʼant wuʼne? ¿Okpe chin elel oqe ik tzeʼn bʼant tuʼn José, moqa kbʼel wiʼje tuʼn nya bʼaʼn  ik tzeʼn bʼaj tiʼj David?» (Gén. 39:11-15). Qa ma qo ximen tiʼj tiʼ jaku tzaj qiʼj qa ma kubʼ qbʼinchaʼn il, mas kʼelel qikʼen aju nya bʼaʼn.

8, 9. a) ¿Tiʼ tajbʼen aju qximbʼetz? b) ¿Alkye tten in che onin tiʼj qximbʼetz qe nabʼil in tzaj tqʼoʼn Jehová?

⁸ Qkyaqilx in nel qpan qibʼ kyiʼj tiʼchaq ikʼun tuʼn Jehová. Noqtzun tuʼnj, at junjun tiʼchaq mintiʼxix in tzaj tqʼoʼn Tyol Dios tqanil tiʼj. Aj qok weʼ twitz jlu, ¿tzeʼn kʼelel qnikʼ tiʼj tiʼ taj Jehová tuʼn tbʼant quʼn? Qa xnaqʼtzaʼn maj qximbʼetz tuʼn Tyol, kjawil qskʼoʼn aju mas bʼaʼn.

⁹ Kʼujlaʼn qoʼ tuʼn Jehová, tuʼntzunju o tzaj tqʼoʼn qe nabʼil tuʼn tbʼaj xnaqʼtzet qximbʼetz. Ax Jehová in tzaj qʼamante jlu: «Aqine Dios aju Kymane, aqine chin xel xnaqʼtzante ju bʼaʼn tuʼn tajbʼen te kyeye, aqine chin xel ẍaqlunte kyeye tuj bʼe kxel kyiʼne» (Is. 48:17, 18). Aj qximen kyiʼj nabʼil ateʼkux toj Xjan Uʼj ex in xi qqʼoʼn ambʼil tuʼn kypon toj qanmi, tuʼn jlu in bʼaj qchʼixpuʼn, in bʼaj qxnaqʼtzaʼn ex in bʼaj qtzʼaqsaʼn qximbʼetz. Ax ikx, in nonin jlu qiʼj tuʼn tjaw qjyoʼn aju mas bʼaʼn.

10. a) ¿Tiʼ in nok te jun nabʼil? b) ¿Tzeʼn e ajbʼen nabʼil tuʼn Jesús?

¹⁰ Jun nabʼil, atzun jun xnaqʼtzbʼil nim toklen in nonin tiʼj qximbʼetz ex tiʼjju in bʼant quʼn. Aj tel qnikʼ kyiʼj nabʼil ateʼ toj Xjan Uʼj, ax ikx in nel qnikʼ tiʼj t-ximbʼetz Jehová ex tiquʼn tzaj tqʼoʼn qe kawbʼil. Toj ambʼil tej tpakbʼan Jesús, yolin kyiʼj xnaqʼtzbʼil nim toklen kyukʼil t-xnaqʼtzbʼen tuʼn tel kynikʼ tiʼj tiʼ jaku tzaj tuʼn kybʼinchbʼen ex kymod. Jun techel, xi tqʼamaʼn kye qa jaku che ok ten bʼiyel qa ma kux kykʼuʼn qʼoj toj kyanmi ex qa tuʼn nya bʼaʼn ximbʼetz jaku kubʼ tbʼinchaʼn jun xjal aj pajil (Mat. 5:21, 22, 27, 28). Qa ma txi qqʼoʼn ambʼil tuʼn kyonin nabʼil ateʼ toj Tyol Dios qiʼj, kxel qxnaqʼtzaʼn qximbʼetz ex kbʼel qbʼinchaʼn aju in tzalaj Jehová tiʼj (1 Cor. 10:31).

11. ¿Tiquʼn nya junx taʼ qximbʼetz kywitz txqantl?

¹¹ ¿Ape t-xilen jlu qa axju kbʼel qbʼinchaʼn qkyaqilx? Miʼn. Jakulo kubʼ kybʼinchaʼn kabʼe okslal junxitl jun tiʼ twitz juntl ex xnaqʼtzaʼn maj kyximbʼetz tuʼn Tyol Dios. Qqʼonku jun techel tiʼj kʼaj qʼeʼn. Mintiʼ in tzaj tqʼoʼn Tyol Dios ambʼil tuʼn t-xi tkʼaʼn xjal nim qʼeʼn, moqa tuʼn ttzaj sutin toj twitz, oʼkx in tzaj tqʼoʼn ambʼil tuʼn t-xi qkʼaʼn chʼin qʼeʼn (Prov. 20:1; 1 Tim. 3:8). Noqtzun tuʼnj, aj tkubʼ qximen qa qo kʼal moqa miʼn, ¿okxpe qo ximel tiʼj jniʼ qʼeʼn kxel qkʼaʼn? Miʼn. Nya oʼkx tuʼn tkubʼ qnaʼn bʼaʼn tukʼil qximbʼetz, sino il tiʼj tuʼn qximen tiʼj kyximbʼetz txqantl.

12. ¿Tzeʼn jaku tzʼonin qiʼj aju tkuʼx toj Romanos 14:21?

¹² Kyaj t-xnaqʼtzaʼn Pablo qa il tiʼj tuʼn qximen tiʼj kyximbʼetz txqantl. Tqʼama: «Bʼaʼn tuʼn miʼn t-xi tchyoʼna chibʼj ex tuʼn miʼn t-xi tkʼaʼna vin ex mi jun tuʼn tbʼinchanteya aju jaku jaw tolj termaniya tuʼn» (Rom. 14:21). Qa at jun erman mintiʼ in xi tkʼaʼn qʼeʼn tuʼnju in kubʼ tnaʼ nya bʼaʼn, ¿qo onilpe tiʼj tuʼn miʼn tkubʼ qqʼoʼn tolsabʼil toj tbʼe? Qo onil tiʼj. Ateʼ junjun e kʼan nim qʼeʼn tej naʼmxtoq kyok te tmajen Jehová, atzun jaʼlo o kubʼ kyximen tuʼn miʼn t-xi kykʼan chʼin. Ax tok, nya qaj tuʼn qonin tuʼn kykubʼ tzʼaq ex tuʼn ttzaj nya bʼaʼn kyiʼj tuʼn tpaj qʼeʼn (1 Cor. 6:9, 10). Tuʼntzunju, qa ma txi qqʼamaʼn te jun erman tuʼn t-xi tkʼaʼn chʼin qʼeʼn ex nya taj tuʼn t-xi tkʼamoʼn, mlay kubʼ qyekʼin qkʼujlabʼil tiʼj qa kukx ma txi qqʼamaʼn te tuʼn t-xi tkʼaʼn.

13. ¿Tiʼ bʼant tuʼn Timoteo tuʼn tonin kyiʼj txqantl tuʼn tok kybʼiʼn tbʼanel tqanil?

 ¹³ Qo ximen tiʼjju bʼant tuʼn Timoteo. Tej qʼiʼntoq 20 abʼqʼi tuʼn, kubʼ t-ximen tuʼn tkubʼ tcircuncidarin tibʼ maske kʼixkʼoj operación lu, tuʼntzun miʼn tkubʼ tqʼoʼn tolsabʼil kywitz aj Judiy jatumel tuʼn tpakbʼaʼn. Iktzun tten el tkanoʼn tiʼj Pablo (Hech. 16:3; 1 Cor. 9:19-23). ¿Yajtzun qe? ¿Kʼokelpe tilil quʼn tuʼn miʼn tkubʼ qbʼinchaʼn junjun tiʼchaq tuʼntzun tkubʼ kynaʼn txqantl bʼaʼn?

14, 15. a) ¿Tiʼ kbʼantel quʼn tuʼn qchʼiy toj qokslabʼil? b) ¿Tiʼ toklen aju tuʼn qchʼiy toj qokslabʼil tukʼilju tuʼn tkubʼ qyekʼin qkʼujlabʼil?

¹⁴ Aqoʼ tmajen Jehová il tiʼj tuʼn qchʼiy toj qokslabʼil ex nya oʼkx tuʼn «qyolin tiʼj tuj tnejel xnaqʼtzbʼil tiʼj Crist» (Heb. 6:1). Pero nya tuʼnx tibʼ qokslabʼil in chʼiy, sino il tiʼj tuʼn tok tilil quʼn. Tuʼn qchʼiy toj qokslabʼil, il tiʼj tuʼn kukx tchʼiy qojtzqibʼil ex qnabʼil. Tuʼntzunju kukx in tzaj qʼamaʼn jun ex juntl maj qe tuʼn quʼjin tiʼj Tyol Dios tkyaqil qʼij (Sal. 1:1-3). ¿Ape qximbʼetz jlu? Qa ma qo uʼjin tiʼj Tyol Dios tkyaqil qʼij, kʼonil qiʼj tuʼn tel qnikʼ kyiʼj kawbʼil ex nabʼil in tzaj tqʼoʼn Jehová.

¹⁵ Aju kʼujlabʼil, atzun kawbʼilju mas nim toklen kye okslal. Tqʼama Jesús jlu kye t-xnaqʼtzbʼen: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:35). Ok tqʼoʼn Santiago aju medio terman Jesús tbʼi kʼujlabʼil te: «Tkawbʼil Dyos nimxiʼx toklen» (Sant. 2:8, XT). Ex tqʼama Pablo jlu: «Tuʼnju at kykʼujlalile in japun ju ley kyuʼne» (Rom. 13:10). Toj tumel aj tok tqʼoʼn Xjan Uʼj nim toklen kʼujlabʼil tuʼnju «ate Dios at tkʼujlalil» (1 Juan 4:8). Toj twitz Jehová, nya oʼkx in kubʼ tnaʼn kʼujlabʼil sino in kubʼ tyekʼin tukʼil tbʼinchbʼen. Kubʼ ttzʼibʼin Juan jlu: «Tuʼn jlu ma tzaj tyekʼun Dios tkʼujlalil qiʼj; tuʼnju tzaj t-samaʼn Dios oʼkxku jun Tkʼwaʼl, ul tzalu twitz txʼotxʼ tuʼntzun tten qchwinqlal noq tuʼn» (1 Juan 4:9). Tuʼntzunju, aj tkubʼ qyekʼin qa kʼujlaʼn Jehová quʼn ex Tkʼwaʼl, ex qe erman ex txqantl xjal, in kubʼ qyekʼin qa in qo chʼiy toj qokslabʼil (Mat. 22:37-39).

16. Akux in qo chʼiy toj qokslabʼil, ¿tiquʼn in nok qqʼoʼn mas kyoklen nabʼil toj Tyol Dios?

¹⁶ Oʼkx in che ajbʼen kawbʼil tiʼj jun tiʼ, atzun qe nabʼil at kyajbʼen tiʼj nimku tiʼ.  Tuʼntzunju, akux in qo chʼiy toj qokslabʼil mas in nok qqʼoʼn kyoklen nabʼil toj Tyol Dios. Jaku tzʼok qmojbʼaʼn jlu tukʼilju in bʼaj kyiʼj tal kʼwaʼl. Aj tzma in che chʼiy, mintiʼ in nel kynikʼ tiʼjju nya bʼaʼn jaku tzaj kyiʼj qa ma ten nya bʼaʼn kyamiw, tuʼntzunju, il-lo tiʼj tuʼn tkubʼ kyqʼoʼn tatbʼaj kawbʼil tuʼntzun kyxqʼuqin kyiʼj (1 Cor. 15:33). Pero akux in che chʼiy, chebʼe chebʼe in nok kynabʼil tuʼn Tyol Dios ex in nonin kyiʼj tuʼn tjaw kyjyoʼn tbʼanel kyamiw (kjawil uʼjit 1 Corintios 13:11; 14:20). Chʼixme axju in bʼaj qiʼj, aj qximen kyiʼj nabʼil ateʼkux toj Tyol Dios, in nok qximbʼetz ik tzeʼn te Jehová ex qʼuqli qkʼuʼj tiʼj qa tzul tyekʼin tbʼanel qbʼe.

17. ¿Tiquʼn jaku txi qqʼamaʼn qa at tkyaqilju at tajbʼen qe tuʼn tjaw qjyoʼn aju mas bʼaʼn?

¹⁷ O tzaj tqʼoʼn Jehová tkyaqilju at tajbʼen qe tuʼn tjaw qjyoʼn aju in tzalaj tiʼj. ¿Tiquʼn in xi qqʼamaʼn jlu? Tuʼnju aʼyeju kawbʼil ex nabʼil in che kanet quʼn toj Tyol Dios, in nonin tiʼj jun okslal tuʼn «tten tnabʼl» ex tuʼn tbʼaj tbʼinchaʼn «tten tuʼn tbʼinchante tkyaqil aqʼuntl bʼaʼn» (2 Tim. 3:16, 17). Pero qa qaj tuʼn tel qnikʼ tiʼj «alkyeju tajbʼil» Jehová, il tiʼj tuʼn tok tilil quʼn (Efes. 5:17). Il tiʼj tuʼn kyajbʼen onbʼil in tzaj tqʼoʼn ttnam Jehová qe, ik tzeʼn Índice de las publicaciones Watch Tower, aju at toj kastiy, Onbʼil tuʼn kyxnaqʼtzan testigos de Jehová, aju programa Watchtower Library, aju KʼUBʼIL UʼJ TOJ INTERNET Watchtower ex aju aplicación JW Library. Kykyaqil jlu in che onin qiʼj aj qxnaqʼtzan qjunalx tiʼj Tyol Dios ex qa kyukʼil toj qja.

18. ¿Alkyeqe kʼiwlabʼil tzul qkʼamoʼn qa ma txi qbʼiʼn qe kawbʼil ex nabʼil in tzaj tqʼoʼn Jehová?

¹⁸ Qa ma chex qbʼiʼn kawbʼil ex nabʼil in tzaj tqʼoʼn Jehová, tzul qkʼamoʼn nim kʼiwlabʼil. In tzaj tqʼamaʼn Salmo 119:97-100 jlu: «Kʼujlaʼnxix tleya wuʼne. Tkyaqil qʼij in chin ximane tiʼj. Kyuʼn qe tmandamyenta at mas nnabʼle kywitz aj qʼoj wiʼje porke kukx ateʼ qe tmandamyenta wukʼile. Mas ma tzikʼ nnabʼle kywitz qe xnaqʼtzal weye tuʼnju kukx in chin ximane tiʼj ju in tmaʼna weye tuʼn nbʼinchanteye. Mas ma tzikʼ nnabʼle kywitz qe tij xjal tuʼnju niman qe tmandamyenta wuʼne». Aj tel qpaʼn ambʼil tuʼn qximen kyiʼj kawbʼil ex nabʼil ateʼ toj Tyol Dios kʼonil qiʼj tuʼn tten mas qnabʼil, tuʼn tten qojtzqibʼil ex tuʼn tel qnikʼ kyiʼj tiʼchaq. Qa ma tzʼok tilil quʼn tuʼn t-xi qxnaqʼtzaʼn qximbʼetz kyuʼn jlu, kʼonil qiʼj tuʼn tchʼiy qnabʼil «tuʼntzun ttzʼaqet-xix quʼn ik tzaʼn te Crist tzʼaqlxix» (Efes. 4:13).