1. ¿Alkye tiquʼn at tuʼn qtzalaj?

NIM in qo jaw tzalaj aj tel qnikʼ tiʼj qa kukx in chʼiy ttnam Jehová. Tuʼn jlu jaku txi qqʼamaʼn qa in qoptzʼaj kyspikʼumal tmajen Dios. Toj abʼqʼi ma kyaj, xi qqʼoʼn xnaqʼtzbʼil tiʼj Tyol Dios kye mas te lajaj millón xjal. Ax ikx e pon nim millón xjal toj Nabʼitz Tkyimlen Jesucristo ex el kynikʼ tiʼjju tkʼujlabʼil Jehová kubʼ tyekʼin tej ttzaj tsamaʼn Tkʼwaʼl tuʼn qklet tiʼj il (1 Juan 4:9).

2, 3. a) ¿Alkye jun tiʼ mintiʼ in nel tiʼn ambʼil qe tuʼn tjaw qnimsaʼn Jehová junx? b) ¿Tiʼ qo xnaqʼtzal tiʼj toj xnaqʼtzbʼil lu?

² Toj ttnam Jehová, in che yolin erman tiʼj nim yol. Pero nya tuʼn jlu mlay tzʼok qmojbʼan qibʼ tuʼn tjaw qnimsaʼn Qtat Jehová, aju at toj kyaʼj (Apoc. 7:9). Noq alkyexku yol in qo yolin tiʼj ex noq jaxku tumel in qo anqʼin, jaku qoptzʼaj qspikʼumal «kyxol xjal ateʼ tuj qlol» (Filip. 2:15).

³ In nonin qiʼj tuʼn tjaw qnimsaʼn Jehová aj tok qqʼoʼn qwitz tiʼj qa in chʼiy qbʼet, aj tten mujbʼabʼil qxol ex aj tel qnikʼ tiʼj qa noq chʼintl ambʼil atx. Tuʼn jlu jaku che tzaj laqʼeʼ xjal toj ttnam Jehová. Toj xnaqʼtzbʼil lu, kʼelel qnikʼ tiʼj alkye tten jaku qoptzʼaj qspikʼumal kyoj qeju oxe tten ma qqʼama (kjawil uʼjit Mateo 5:14-16).

4, 5. a) Aj qpakbʼan, ¿alkye junjuntl tiʼ jaku bʼant quʼn tuʼntzun tqoptzʼaj qspikʼumal? b) ¿Tiʼ in tzaj qa ma kubʼ qyekʼin tbʼanel qmod? (Qʼonka twitza tiʼj tnejel tilbʼilal).

⁴ Tojju tajlal Aju Xqʼuqil etz toj inglés te 1 te junio te 1925, etz jun xnaqʼtzbʼil tok tbʼi, «Spikʼun toj qlolj» ex tqʼama xnaqʼtzbʼil jlu: «Ni jun jaku ten tzʼaqli twitz Qajaw ex axix tok tuʼn kyoj bʼajsbʼil tqʼijlalil [...], oʼkx jaku bʼant tuʼn qa ma txi tqʼoʼn ambʼil tuʼn tqoptzʼaj tspikʼumal». Ex tqʼamatl: «Jaku bʼant jlu tuʼn qa ma txi tiʼn tbʼanel tqanil kyoj qe tnam ex qa ma tzʼanqʼin ik tzeʼn in tzaj tyekʼin bʼe te spikʼun». Tuʼn jlu in nel qnikʼ tiʼj qa ax ikx in qoptzʼaj qspikʼumal aj qpakbʼan tiʼj Tkawbʼil Dios ex aj kyok xjal te t-xnaqʼtzbʼen Jesús quʼn (Mat. 28:19, 20). Ax ikx in nonin qmod tuʼn tjaw qnimsaʼn Jehová. Aj qpakbʼan, in nok kyqʼoʼn xjal kywitz tiʼj qmod. Qa in qo tzalaj ex qa ma qoʼx qʼolbʼen kye xjal toj tumel, jaku che yolin bʼaʼn qiʼj ex tiʼj Dios in qo ajbʼen te.

⁵ Tqʼama Jesús jlu kye t-xnaqʼtzbʼen: «Oktzun kyokxe tuj tja xjal lu, nej kyqʼonxe jun qʼolbʼebʼl» (Mat. 10:12). Kyoj tnam jatumel e pakbʼan, naqʼli qe xjal tuʼn tokx kykʼamoʼn qeju mintiʼ ojtzqiʼn kywitz kyuʼn toj kyja. Ax tok, bʼalo nya naqʼli qe xjal tuʼn tbʼant jlu kyuʼn jatumel in qo anqʼin. Axpe ikx, ateʼ xjal in che tzaj xobʼ moqa in tzaj kyqʼoj qa ma pon jun xjal tokʼchalte ttzi kyja ex mintiʼ ojtzqiʼn twitz kyuʼn. Pero qa ma kubʼ qyekʼin tbʼanel qmod, bʼalo mlay che tzaj xobʼ. Nim maj, jaku tzʼonin aju tuʼn qtzeʼn kyukʼil txqantl. Ax jlu in bʼaj toj pakbʼabʼil jatumel in che ikʼ nim xjal. Aqeju in che pakbʼan ik tzeʼn jlu, olo tzʼok kyqʼoʼn kywitz tiʼj qa in kubʼ kyyekʼin xjal tbʼanel kymod aj in cheʼx tzeʼn toj kywitz. Ateʼ junjun in che pon laqʼeʼ jatumel kykubʼ uʼj, in xi kyiʼn jun kyuʼj ex ateʼ junjun in che ok ten yolil kyukʼil erman.

6. ¿Tiʼ o bʼant tuʼn jun mejebʼleʼn tuʼn miʼn tkubʼ yupj tspikʼumal?

⁶ At jun mejebʼleʼn ya ma tijen toj tnam Inglaterra ex ya mintiʼxix in che pakbʼan ttziyele ja tuʼnju at yabʼil kyiʼj. Noqtzun tuʼnj, o kubʼ kyximen tuʼn kukx tqoptzʼaj kyspikʼumal, o txi tzyet tuʼn kypakbʼan twitz kyja. Tuʼn tbʼant jlu kyuʼn, in netz kyiʼn jun mes kyukʼil uʼj tiʼj Tyol Dios tojju or aj in che pon mambʼaj qʼilte kykʼwaʼl aj kyel toj jun tja xnaqʼtzbʼil nqa tok tiʼj kyja. Ateʼ junjun in che jaw labʼin tiʼj jlu ex nim kye in xi kyiʼn qeju kabʼe volumen te uʼj Los jóvenes preguntan ex junjuntl uʼj. Ax ikx xi tzyet tuʼn tpakbʼan jun precursora tukʼil mejebʼleʼn lu. Noq tuʼnju in kubʼ tyekʼin precursora tbʼanel tmod ex tuʼnju in nok tilil tuʼn mejebʼleʼn, o txi tzyet tuʼn t-xnaqʼtzan jun mambʼaj tiʼj Tyol Dios.

7. ¿Tzeʼn jaku qo onin kyiʼj xjal in che ul klol kyibʼ?

⁷ Kyoj abʼqʼi tzma in che ikʼ, nim xjal in nok kyqʼoʼn kywitz tiʼj qa in che pon xjal klol kyibʼ toj kytnam. ¿Tzeʼn jaku qo onin kyiʼj xjal lu tuʼn tok kyojtzqiʼn Jehová ex alkye t-ximbʼetz at? Aju tnejel jaku bʼant quʼn, aju qa ma qo qxnaqʼtzan tiʼj jun qʼolbʼebʼil toj kyyol. Tuʼn tbʼant jlu, jakulo tzʼajbʼen aplicación JW Language quʼn. Ax ikx jaku qo xnaqʼtzan kyiʼj junjun txol yol tbʼanel jaku tzʼela toj kywitz. Yajxitl, jaku qo yolin tiʼj qtembʼil at toj Internet ex jaku txi qyekʼin junjun video ex uʼj ateʼ toj kyyol (Deut. 10:19).

8, 9. a) ¿Alkye onbʼil in tzaj qkʼamoʼn kyoj chmabʼil in nok txolekxi qʼij? b) ¿Alkye tten jaku che onin mambʼaj kyiʼj kykʼwaʼl tuʼntzun t-xi kyqʼoʼn kyyol kyoj chmabʼil?

⁸ O tzaj tqʼoʼn Jehová aju chmabʼil Kyanqʼibʼil okslal ex kypakbʼabʼil qe tuʼntzun tbʼant-xix qpakbʼan. Aqeju tbʼanel nabʼil in tzaj qʼoʼn qe, jaku che kubʼ qqʼoʼn toj  xnaqʼtzbʼil ex jaku che onin qiʼj tuʼntzun miʼn ttzaj bʼajxix qkʼuʼj aj qmeltzʼaj kyukʼil xjal ex aj t-xi qqʼoʼn xnaqʼtzbʼil kye.

⁹ Ateʼ nim xjal in che jaw labʼin aj kypon kyoj chmabʼil tuʼnju in nok kykeʼyin qa ax ikx qe kʼwaʼl in xi kyqʼoʼn kyyol. Tuʼntzunju, tbʼanel qa ma txi kyxnaqʼtzaʼn mambʼaj kye kykʼwaʼl tuʼn t-xi kyqʼamaʼn kyex kyyol kyoj chmabʼil tuʼn tqoptzʼaj kyspikʼumal. Aqeju yol nya kwest in xi kyqʼamaʼn tal kʼwaʼl ex in jatz toj kyanmi, jakulo tzʼonin kyiʼj xjal tuʼn tel kynikʼ tiʼj qa otoq kanet axix tok kyuʼn (1 Cor. 14:25).

10. ¿Alkye tten in nonin kyiʼj ja xjal tuʼn tten mujbʼabʼil kyxol qa ma tzʼel kypaʼn ambʼil tuʼn kykʼulin kyukʼil toj kyja te Jehová?

¹⁰ Juntl tten tuʼn tqoptzʼaj qspikʼumal, aju qa ma qo onin tuʼn kukx tten mujbʼabʼil kyukʼil toj qja ex kyukʼil erman. Jun techel, nim toklen tuʼn kukx tel kypaʼn mambʼaj ambʼil tuʼn kykʼulin kyukʼil toj kyja te Jehová. Nim kye in najbʼen aju programa JW Broadcasting tkyaqil xjaw kyuʼn. Aj tkubʼ bʼaj, tbʼanel qa ma che yolin tiʼj tzeʼn jaku kubʼ kyqʼoʼn toj xnaqʼtzbʼil aju otoq tzʼel kynikʼ tiʼj. Ax ikx, bʼaʼn tuʼn ttzaj tnaʼn aju in kubʼ nej twitz xnaqʼtzbʼil qa junxitl kyaj tal kʼwaʼl kywitz qeju ma che okx toj kykuʼxumal. Tuʼntzunju, nim toklen tuʼn tok tilil kyuʼn tuʼn t-xi kyjyoʼn junjun xnaqʼtzbʼil jaku tzʼonin kyiʼj kykyaqilx (Sal. 148:12, 13).

11-13. ¿Alkye tten jaku qo onin tuʼn kukx tten mujbʼabʼil kyxol erman ex tuʼn qonin kyiʼj txqantl tuʼn tqoptzʼaj kyspikʼumal?

¹¹ Qkyaqilx jaku qo onin tuʼn kukx tten mujbʼabʼil kyxol erman, axpe ikx qeju kuʼxun, iktzun tten qo onil kyiʼj txqantl tuʼn tqoptzʼaj kyspikʼumal. Jun techel, jaku che ximen kuʼxun kyiʼj erman ma che tijen. Jaku txi kyqʼanin kye tiʼ o tzikʼ toj kyanqʼibʼil kyoj qe abʼqʼi in che ajbʼen te Jehová. Tuʼn jlu kbʼel kynaʼn qa kyajbʼil tuʼn kukx tqoptzʼaj axix tok, ex ax jlu kbʼel kynaʼn erman ma che tijen. Ax ikx, qkyaqilx jaku txi qqʼamaʼn bʼaʼn kyulene kye qeju in che pon toj Ja te Chmabʼil. Jaku qox tzeʼn kyukʼil aj kypon, jaku txi qjyoʼn kyqʼuqbʼil ex jaku txi qqʼamaʼn kybʼi kye txqantl. Iktzun tten kbʼel kynaʼn qa ateʼ kyja.

¹² Ax ikx jaku che onin qeju in che ex qʼinte kye erman toj pakbʼabʼil kyiʼj qeju ma che tijen tuʼn kukx tqoptzʼaj  kyspikʼumal. Tuʼn tbʼant jlu kyuʼn, il tiʼj tuʼn tok tilil kyuʼn tuʼn tok kybʼiʼn qa at jun tbʼanel tembʼil tuʼn kypakbʼan erman toj. At maj jaku txi kyqanin te juntl kuʼxun tuʼn tex kyukʼil ex tuʼn tonin kyiʼj. Ax ikx bʼaʼn tuʼn kyximen kyiʼj qeju mlay bʼant tuʼn kypakbʼan nim ambʼil tuʼnju at jun yabʼil kyiʼj moqa tuʼn alkyexku juntl nya bʼaʼn. Qa ma che ximen kyiʼj, che onil tuʼn kypakbʼan kykyaqil erman, qa kuʼxun qe, qa ma che tijen, qa tzma akʼaj qe ex qa ma tzʼel nim ambʼil in che ajbʼen te Jehová (Lev. 19:32).

¹³ Kubʼ ttzʼibʼin jun aj bʼitzil jlu: «Puro bʼaʼn ex tzalajbʼil kye qe xjal kyerman kyibʼ in che anqʼin junx ex junx kynabʼl» (kjawil uʼjit Salmo 133:1, 2). Tzaj tiʼn nim tbʼanel kye aj Israel tej kykʼulin junx te Jehová. Ok tmojbʼaʼn aj bʼitzil aju mujbʼabʼil tukʼilju perjum bʼaʼnxix, tuʼnju at tkʼokʼjal ex in chewix qanmi tuʼn. Toj ambʼil jaʼlo, ¿jakupe qo ximen tiʼj alkye tten jaku kubʼ qyekʼin tbʼanel qbʼinchbʼen ex tuʼn qonin tuʼn kukx tten mujbʼabʼil kyxol erman? Qa ya in bʼant quʼn, bʼaʼnlo tuʼn ttzaj qʼoʼn chjonte qe. Ex bʼaʼn tuʼn tok tilil quʼn tuʼn tok qojtzqiʼn txqantl erman ex tuʼn tten qkʼujlabʼil kyiʼj (2 Cor. 6:11-13, TNM).

14. ¿Tiʼ jaku bʼant quʼn tuʼntzun tqoptzʼaj qspikʼumal kywitz qe xjal in che anqʼin qtxlaj?

¹⁴ ¿Kukxpe jaku tzʼok tilil quʼn tuʼn tqoptzʼaj tspikʼumal axix tok jatumel in qo anqʼin? Qa at tbʼanel qmod kyukʼil qeju in che anqʼin qtxlaj, jakulo tzaj kyajbʼil tuʼn tok kyojtzqiʼn axix tok. Qxjelinku jlu: «¿Tiʼ kyyol xjal at wiʼje? ¿Tzeʼn taʼ njaye, ntxʼotxʼe ex junjuntl tiʼchaq weye? ¿In nonipe tuʼn tok te jun tbʼanel lugar jatumel in chin anqʼine? ¿In nokpe tilil wuʼne tuʼn wonine kyiʼj txqantl?». Aj qyolin kyukʼil erman, bʼaʼn tuʼn t-xi qqanin kye tzeʼn o tzʼonin tbʼanel kymod kyiʼj xjal in che anqʼin kytxlaj, kyiʼj toj kyja, kyiʼj kyukʼil toj aqʼuntl ex toj tja xnaqʼtzbʼil. Jakulo tzaj kyqʼamaʼn qe tbʼanel tiʼ o tzikʼ kyiʼj (Efes. 5:9).

15. ¿Tiquʼn nim toklen tuʼn kukx tok qxqʼuqin qibʼ?

¹⁵ Qa qaj tuʼn kukx tok tipumal qspikʼumal, il tiʼj tuʼn tel qnikʼ tiʼj qa in qo anqʼin kyoj bʼajsbʼil tqʼijlalil. Tqʼama Jesús jlu jun ex juntl maj kye t-xnaqʼtzbʼen: «Che xqʼuqine» (Mat. 24:42; 25:13; 26:41). Pero qa in kubʼ qximen qa atx nim ambʼil tuʼn tul «kʼixbʼisabʼl maʼxix» ex qa ya mlay tzʼok qqʼoʼn qwitz tiʼj, tuʼn jlu mlay tzʼok tilil quʼn tuʼn qpakbʼan (Mat. 24:21). Chebʼe chebʼe jaku tzʼel tipun qspikʼumal ex jaku kubʼ yupj.

16, 17. ¿Tiʼ jaku bʼant quʼn tuʼn tok qxqʼuqin qibʼ?

¹⁶ Akux in xi mas toj il aju nya bʼaʼn at toj ambʼil jaʼlo, il tiʼj tuʼn kukx tok qxqʼuqin qibʼ. Kxel tbʼinchaʼn Jehová kyiʼj nya bʼaʼn tojxix ambʼil bʼantni tiʼj tuʼn ex qʼuqli qkʼuʼj tiʼj jlu (Mat. 24:42-44). Akux in nul ambʼil lu, bʼaʼn tuʼn tten qpasens ex tuʼn tok qxqʼuqin qibʼ toj tkyaqil ambʼil. Qo uʼjin tiʼj Tyol Dios tkyaqil qʼij ex qxqʼuqink qibʼ tiʼj «naʼj Dios» (1 Ped. 4:7). Bʼaʼn tuʼn tok qqʼoʼn qwitz tiʼj techel in kubʼ kyyekʼin erman in nok kyxqʼuqin kyibʼ ex in qoptzʼaj kyspikʼumal. Kkanetel jun tbʼanel techel quʼn tojju xnaqʼtzbʼil «Siete décadas aferrado a la falda de un judío», aju etz toj uʼj Aju Xqʼuqil toj kastiy te 15 te abril te 2012 toj t-xaq 18 a 21.

¹⁷ Qqʼonk qwiʼ tiʼj qajbʼebʼil te Jehová, qbʼincham bʼaʼn kyiʼj txqantl ex qpaʼmil ambʼil tuʼn qten kyukʼil erman. Iktzun tten kbʼel qnaʼn mas tzalajbʼil ex mlay qnaʼ aj tikʼ ambʼil (Efes. 5:16). Tojju syent abʼqʼi ma kyaj, bʼant nim tiʼchaq kyuʼn erman toj kyajbʼebʼil te Jehová. Atzun jaʼlo, in tzaj tqʼoʼn Jehová ambʼil tuʼn tbʼant mas tiʼchaq  quʼn. Mas in qoptzʼaj qspikʼumal twitzju jakutoq kubʼ qximen.

18, 19. ¿Alkye tten jaku che onin ansyan tuʼn tok qxqʼuqin qibʼ ex tuʼn kukx qajbʼen te Jehová? Qʼamantza jun techel.

¹⁸ Maske nim maj in qo el txalpaj, kukx in tzaj tqʼoʼn Jehová ambʼil qe tuʼn qajbʼen te. Tuʼn tonin qiʼj tuʼn tok qxqʼuqin qibʼ, o tzaj qʼoʼn «kyoklen xjal», toj juntl yol, o che tzaj tqʼoʼn ansyan kyxol okslal (kjawil uʼjit Efesios 4:8, 11, 12). Tuʼntzunju, toj juntl maj aj tpon jun ansyan visitaril qe, bʼaʼn tuʼn tajbʼen ambʼil lu quʼn tuʼn t-xi qbʼiʼn nabʼil tzul kyqʼoʼn tuʼntzun tonin qiʼj.

¹⁹ Tzaj junjun nya bʼaʼn tiʼj jun mejebʼleʼn te tnam Inglaterra ex xi kyqanin onbʼil kye kabʼe ansyan. Tqʼama xuʼjilbʼaj qa kubʼ tnaʼn qa in nanqʼintoq tukʼil jun xjal nya ax t-ximbʼetz ik tzeʼn te toj tokslabʼil. Ax ikx te chmilbʼaj el tnikʼ tiʼj qa nya jun tbʼanel aj xnaqʼtzal ex mintiʼtoq in nel tpaʼn ambʼil tuʼn kykʼulin junx te Jehová. E yolin ansyan tiʼj Jesús tukʼil mejebʼleʼn, tuʼnju xqʼuqin kyiʼj t-xnaqʼtzbʼen ex ximen tiʼjju attoq tajbʼen kye. Xi kyqʼamaʼn te chmilbʼaj qa bʼaʼn tuʼn tel tkanoʼn tiʼj Jesús, atzunte xuʼjilbʼaj xi qʼamaʼn te qa bʼaʼn tuʼn tten tpasens. Ax ikx xi qʼoʼn junjun nabʼil kye tzeʼn jaku bʼaj kyonin kyibʼ tuʼn tel kypaʼn ambʼil in xi kyqʼoʼn te Jehová kyukʼil kabʼe kykʼwaʼl (Efes. 5:21-29). Tej tel chʼintl ambʼil, xi kyqʼamaʼn te chmilbʼaj qa tbʼanel aju ya otoq bʼant tuʼn ex qa bʼaʼn tuʼn kukx tok tilil tuʼn, ex tuʼn tok qeʼ tkʼuʼj qa tzul onin tuʼn xewbʼaj xjan tuʼntzun tok te jun tbʼanel wibʼaj toj ja. Tej kyximen, tej kyonin ex tej tkubʼ kyyekʼin ansyan kykʼujlabʼil tiʼj mejebʼleʼn lu, bʼant tuʼn tqoptzʼaj kyspikʼumal.

20. ¿Tiʼ tbʼanel tzul qa ma qoptzʼaj qspikʼumal?

²⁰ In tzaj tqʼamaʼn Salmo 128:1 jlu: «At tzalajbʼil kye qe xjal in che xobʼ twitz Qman ex bʼaʼn che niman te». Toj xnaqʼtzbʼil lu ma tzʼel qnikʼ tiʼj tzeʼn jaku qoptzʼaj qspikʼumal: aj t-xi qqʼoʼn txokbʼil kyiʼj xjal tuʼn kyajbʼen te Jehová, aj tok tilil quʼn tuʼn kukx tten mujbʼabʼil qxol ex aj tok qxqʼuqin qibʼ. Qa ma bʼant jlu quʼn, qo tzalajel, kʼokel kykeʼyin txqantl tbʼanel qbʼinchbʼen ex nim xjal ktel kyajbʼil tuʼn tjaw kynimsaʼn Qtat Jehová (Mat. 5:16).