Mintiʼ jun xjal jaku tzʼel tnikʼ tiʼj toj ambʼil jaʼlo tzeʼnxixtoq apóstol Pablo. Aʼyeju tilbʼilal Pablo in che ajbʼen quʼn toj uʼj, noq jun techel qe ex nya tzajni tiʼj junjun tqanil o kanet kyuʼn xjal.

Noqtzun tuʼnj, at junjun tqanil tiʼj tzeʼntoq keʼyin Pablo. Jun techel, toj uʼj Aju Xqʼuqil etz toj 1 te marzo te 1902, yolin tiʼj jun uʼj bʼinchaʼn kyuʼn xjal aju tok tbʼi Hechos de Pablo y Tecla, aju kubʼ tzʼibʼin tej chʼixtoq tjapun abʼqʼi 150, jatumel in tzaj tqʼamaʼn qa mas bʼaʼn qa ma txi qʼamet qa ik Pablo ik tzeʼn jlu: «Jun xjal nya nim twaʼlil, otoq kutz bʼaj twiʼ, nya jiqun qe tqan, attoq tipumal, attoq nim t-xiwitz twitz ex matij chʼin twi ttxaʼn».

In tzaj tqʼamaʼn jun diccionario qa jaku kanet tqanil tiʼj ambʼil ojtxe ex tzʼaqlixix toj uʼj Hechos de Pablo y Tecla. (The Oxford Dictionary of the Christian Church [aju etz toj 1997]). Ok qʼoʼn nim toklen uʼj lu kyoj tnejel syent abʼqʼi tiʼj ambʼil qʼiʼn quʼn jaʼlo. In xi qqʼamaʼn jlu tuʼnju at 80 copia tiʼj toj yol griego ex toj junjuntl yol, aju kubʼ tzʼibʼin tuʼn qʼabʼaj. Tuʼntzunju, aʼyeju tilbʼilal Pablo in che kubʼ qʼoʼn toj quʼj at tmojbʼabʼil tibʼ kyukʼil junjun tqanil in tzaj qʼamaʼn kyoj junjun ojtxe uʼj.

Noqtzun tuʼnj, bʼaʼn tuʼn ttzaj qnaʼn qa at junjuntl tiʼchaq mas nim kyoklen twitzju tzeʼntoq keʼyin Pablo. Tej tpakbʼan, ateʼ junjun e xmayin tiʼj ex in kyqʼamaʼntoq: «Ok in ten qukʼil mintiʼxix tipun ex ju tyol mintiʼ tajbʼen» (2 Cor. 10:10). Pero mintiʼ tuʼn tikʼ tnaʼl quʼn qa ok te okslal tuʼnju kubʼ tyekʼin tibʼ Jesús twitz. Ax ikx bʼaʼn tuʼn qximen tiʼjju bʼant tuʼn ik tzeʼn jun xinaq «skʼoʼmaj» tuʼn t-xi tqʼamaʼn tqanil tiʼj Jesús kye «txqantl xjal» (Hech. 9:3-5, 15; 22:6-8). Ex qo ximen tiʼj alkye tten in che onin qe uʼj qiʼj, aʼyeju kubʼ ttzʼibʼin toj Tyol Dios tukʼil tonbʼil xewbʼaj xjan.

Mintiʼ tqʼama Pablo tzeʼntoq keʼyin ex mintiʼ jaw tnimsan tibʼ tiʼjju otoq bʼant tuʼn tej naʼmxtoq tok te okslal (Hech. 26:4, 5; Filip. 3:4-6). Tqʼama jlu: «Aqine tal chʼin qine kywitz qe mastl apostl, mya bʼaʼn qine tuʼn tok qʼoʼn nbʼiye apostl» (1 Cor. 15:9). Ax ikx kubʼ ttzʼibʼin jlu: «Aqine mas tal chʼin kywitz kykyaqil okslal; pero ma tzaj tqʼoʼn Dios t-xtalbʼil weye tuʼn t-xi npakbʼaʼne tqanil kolbʼil kye xjal mya judiy, aju tqanil lu in yolin tiʼj tqʼinumabʼl Crist mlay tzʼel bʼaj qnikʼ tiʼj» (Efes. 3:8). Qʼuqli qkʼuʼj tiʼj qa mas nim toklen tqanil lu twitzju tzeʼntoq keʼyin apóstol Pablo.