1. Ik tzeʼn in tzaj tqʼamaʼn 1 Pedro 3:8, ¿tiquʼn in qnaʼn bʼaʼn aj qten kyukʼil qeju kyaj tuʼn tel kynikʼ tiʼjju in qnaʼn ex kyaj tuʼn qten toj tbʼanel?

QKYAQILX in qnaʼn bʼaʼn aj qten kyukʼil xjal kyaj tuʼn tel kynikʼ tiʼjju in qnaʼn ex kyaj tuʼn qten toj tbʼanel. In nok tilil kyuʼn xjal lu tuʼn tel kynikʼ tiʼjju in bʼaj qiʼj, tiʼj qximbʼetz ex tiʼjju in kubʼ qnaʼn. In nel kynikʼ tiʼjju atx taj qe ex in tzaj kyqʼoʼn onbʼil qe, axpe ikx qa naʼmxtoq t-xi qkanin onbʼil kye. In nok qqʼoʼn kyoklen xjal lu tuʼnju in nel kynikʼ qiʼj moqa in che ok ik tzeʼn qerman, * ik tzeʼn in tzaj tqʼamaʼn 1 Pedro 3:8 (uʼjinktza).

2. ¿Tiquʼn kwestlo tuʼn tkubʼ qnaʼn aju in kynaʼn txqantl?

² Qkyaqilx qaj tuʼn tel qnikʼ tiʼjju in kynaʼn txqantl. Noqtzun tuʼnj, at maj kwest tuʼn tbʼant jlu quʼn. In bʼaj jlu tuʼnju aj il xjal qoʼ ex il tiʼj tuʼn tok tilil quʼn tuʼn miʼn qximen oʼkx qiʼjx (Rom. 3:23). At junjun qe kwest in nela jlu toj twitz tuʼnju alkye tten jaw chʼiysaʼn ex tuʼnju o tzikʼ toj qanqʼibʼil. Ax ikx, bʼalo tuʼnju in nel qkanoʼn kymod xjal te twitz txʼotxʼ, tuʼnju toj mankbʼil tqʼijlalil, ateʼ nim xjal oʼkx in che ximen kyiʼjx ex mintiʼ in che ximen kyiʼj txqantl (2 Tim. 3:1, 2). ¿Tiʼ jaku tzʼonin qiʼj tuʼn miʼn tel qkanoʼn jlu ex tuʼn qximen kyiʼj txqantl?

3. a) ¿Tiʼ kʼonil tuʼn tkubʼ qyekʼin qa in nel qnikʼ tiʼjju in kynaʼn txqantl? b) ¿Tiʼ qo xnaqʼtzal tiʼj toj xnaqʼtzal lu?

³ Jun tiʼ jaku tzʼonin qiʼj tuʼn t-xi qyekʼin qa in nel qnikʼ tiʼjju in kynaʼn txqantl, aju qa ma tzʼel qkanoʼn tiʼj Jehová ex tiʼj Jesucristo, aju Tkʼwaʼl. A Jehová aju Dios te  kʼujlabʼil ex in kubʼ tqʼoʼn tbʼanel techel qwitz (1 Juan 4:8). Kubʼ tyekʼin Jesús qe tmod Ttat (Juan 14:9). Tej tten tzalu twitz Txʼotxʼ, kyaj tyekʼin qa jaku kubʼ kyyekʼin xjal qʼaqʼbʼil kykʼuʼj. Toj xnaqʼtzbʼil lu, tnejel qo xnaqʼtzal tiʼj tzeʼn o kubʼ tyekʼin Jehová ex Jesús qa el kynikʼ tiʼjju kynaʼn txqantl ex yajxitl qo xnaqʼtzal tiʼj tzeʼn jaku tzʼel qkanoʼn techel kyaj kyqʼoʼn.

4. ¿Tzeʼn in tzaj tyekʼin Isaías 63:7 a 9 qa in nok tqʼoʼn Jehová toklen aju in kynaʼn tmajen?

⁴ In tzaj tqʼamaʼn Xjan Uʼj qa in nok tqʼoʼn Jehová toklen aju in kynaʼn tmajen. Jun techel, qo ximen tiʼjju kubʼ tnaʼn tej kyikʼ aj Israel toj kʼixkʼoj. In tzaj tqʼamaʼn Tyol Dios jlu: «Tuj tkyaqil yajbʼil tzaj kyiʼj, ax ikx te o yajlanjtz» (kjawil uʼjit Isaías 63:7-9). Tej tikʼ ambʼil, ajbʼen profeta Zacarías tuʼn Jehová tuʼn ttzaj tqʼamaʼn qa tej tok bʼinchaʼn nya bʼaʼn tiʼj ttnam, ik tten ik tzeʼn tiʼj ok bʼinchaʼn nya bʼaʼn. Tqʼama jlu kye tmajen: «Alkye ma tzʼok tbʼinchaʼn mya bʼaʼn tiʼj tnam etzan wuʼne junx taʼ ik tzaʼn tiʼj t-santil tbʼaqʼ nwitze nnoʼk tbʼinchaʼn jlu» (Zac. 2:8). In nel qnikʼ tiʼj qa in ximenxix Jehová tiʼj ttnam.

5. Qʼamantza jun techel aju in tzaj tyekʼin tiʼ o bʼant tuʼn Jehová tuʼn tonin kyiʼj tmajen in che ok kʼixbʼisaʼn.

⁵ Aj ttzaj nya bʼaʼn kyiʼj tmajen Jehová, nya oʼkx in tzaj qʼaqʼin tkʼuʼj kyiʼj, sino in bʼant jun tiʼ tuʼn tuʼn tonin kyiʼj. Qo xnaqʼtzan tiʼj jun techel. Tej kyten aj Israel te majen toj Egipto, kubʼ tnaʼn Jehová nim kʼixkʼoj tzaj kyiʼj ex tuʼntzunju onin kyiʼj. Tqʼama te Moisés: «Ma wile yajbʼil kye xjal etzan wuʼne [...]. Ma nbʼiye tqʼajqʼajel kywiʼ in che ayayan [...] ex bʼaʼn wuʼne nikʼpun in che kʼixbʼisanjtz, ex tuʼntzun jlu ma chin kuʼtze tuʼn kyklet wuʼne tuj kyqʼabʼ aj Ejipt» (Éx. 3:7, 8). Tuʼnju ten qʼaqʼbʼil tkʼuʼj kyiʼj, i etz tiʼn tjaqʼ tipumal tkawbʼil Egipto. Tej tikʼ junjuntl syent abʼqʼi, tej kyten toj Txʼotxʼ Tziyen maj, e ok lipen aj qʼoj kyiʼj. ¿Tiʼ tmod Jehová kubʼ tyekʼin? In tzaj tqʼamaʼn Tyol Dios qa «tzaj qʼaqʼan tkʼuʼj Qman kyiʼj tej kyjaw ayayan» tuʼnju bʼaj yajin ttnam ex ok kʼixbʼisaʼn. Ximen kyiʼj toj ambʼil lu  ex e ajbʼen jwes tuʼn tuʼn tkolin kyiʼj aj Israel (Juec. 2:16, 18).

6. Qʼamantza jun techel jatumel ximen Jehová tiʼjju kubʼ tnaʼn jun tmajen maske el txalpaj.

⁶ In nel tnikʼ Jehová tiʼjju in kynaʼn tmajen axpe ikx aj in che el txalpaj. Qo xnaqʼtzan tiʼjju bʼaj tiʼj profeta Jonás. Xi tsamaʼn Jehová toj tnam Nínive tuʼn t-xi tqʼamaʼn qa kbʼeltoq qʼoʼn kykastiw xjal te tnam aju. Noqtzun tuʼnj, ajtz tiʼj kyanmi xjal te tnam Nínive ex kubʼ tnajsaʼn Jehová kyil. Tuʼntzunju «tzaj nimxix tqʼoj» Jonás tuʼnju mintiʼ otoq japun twiʼ yol xi tqʼamaʼn. Toj ambʼil lu, ten tpasens Jehová tiʼj ex onin tiʼj tuʼn tchʼexpaj t-ximbʼetz (Jon. 3:10–4:11). Tej tikʼ ambʼil, el tnikʼ Jonás tiʼjju bʼaj ex ok tilil tuʼn Jehová tuʼn tkyaj tzʼibʼin toj Xjan Uʼj aju bʼaj tiʼj Jonás, tuʼntzun tel qiʼn xnaqʼtzbʼil tiʼj (Rom. 15:4). *

7. ¿Tiʼ qʼuqbʼil qkʼuʼj in tzaj tqʼoʼn aju o bʼant tuʼn Jehová kyiʼj tmajen?

⁷ Aju bʼant tuʼn Jehová kyoj ambʼil lu ex kyoj junjuntl, in tzaj tyekʼin qa in tnaʼn aju in nikʼ kyiʼj tmajen. In nel tnikʼ tiʼj kʼixkʼoj in tzaj tiʼj teyele junjun qe. Tuʼnju oʼkx te «ojtzqilte kyximbʼetz xjal ex kyanmi» (2 Crón. 6:30). Tuʼntzunju, in nel tnikʼ tiʼj qximbʼetz, tiʼjju tkuʼx toj qanmi ex tiʼjju mlay bʼant quʼn. Ex in tzaj ttziyen qe qa mlay txi tqʼoʼn ambʼil tuʼn qikʼ toj joybʼil, aju mlay tzikʼx quʼn (1 Cor. 10:13). Nimxix in tzaj qʼuqbʼaʼn qkʼuʼj tuʼn jlu.

8-10. ¿Alkyelo junjun tiʼ onin tiʼj Jesús tuʼn t-ximen kyiʼj xjal?

⁸ Tej tten Jesús tzalu twitz Txʼotxʼ, kubʼ tyekʼin qʼaqʼbʼil tkʼuʼj kyiʼj xjal. Tuʼn tkubʼ tyekʼin jlu, bʼalo onin oxe tiʼ tiʼj. Tnejel, ik tzeʼn ma tzʼel qnikʼ tiʼj, kubʼ tyekʼin Jesús qe tmod Ttat. Ten tkʼujlabʼil kyiʼj xjal ik tzeʼnx te Jehová in bʼant tuʼn. Maske tzalaj tiʼj tkyaqil tiʼchaq bʼant tuʼn tukʼil Ttat, pero ten mas tkʼujlabʼil kyiʼj xjal (Prov. 8:31). Onin kʼujlabʼil tiʼj Jesús tuʼn tel tnikʼ tiʼjju kynaʼn xjal.

⁹ Tkabʼin, ik tzeʼn te Jehová, ax ikx te Jesús el tnikʼ tiʼjju tkuʼx toj kyanmi xjal, toj juntl yol, el tnikʼ tiʼj kyximbʼetz ex tiʼjju kynaʼn (Mat. 9:4; Juan 13:10, 11). Tuʼntzunju, tej ttzaj kybʼis xjal ex tej ttzaj bʼaj kykʼuʼj, el tnikʼ kyiʼj ex xi tqʼuqbʼaʼn kykʼuʼj (Is. 61:1, 2; Luc. 4:17-21).

¹⁰ Toxin, ikʼ Jesús kyoj junjun nya bʼaʼn, aju in tzaj kyiʼj xjal. Jun techel, bʼalo jaw chʼiy toj jun ja xjal mebʼa moqa prow. Tuʼnju aqʼunan tukʼil José, aju ok te ttat, bʼant junjun aqʼuntl tuʼn jatumel ajbʼen tipumal (Mat. 13:55; Mar. 6:3). Bʼalo kyim José tej naʼmxtoq t-xi tzyet tuʼn tpakbʼan Jesús, tuʼn jlu bʼalo tnaʼn aju kʼixkʼoj in tzaj aj tkyim jun toj qja. Ax ikx, el tnikʼ tiʼj tiʼ in tnaʼn jun xjal qa nya ax kyokslabʼil toj tja ik tzeʼn te (Juan 7:5). Aqeju tiʼchaq lu ex junjuntl onin tiʼj tuʼn tel tnikʼ tiʼjju nya bʼaʼn tzaj kyiʼj xjal ex tiʼjju kubʼ kynaʼn.

11. ¿Alkye tten kubʼ tyekʼin Jesús qa el tnikʼ tiʼjju bʼaj kyiʼj xjal? (Qʼonka twitza tiʼj tilbʼilal tok tiʼj t-xkʼomil).

¹¹ Kubʼ tyekʼin Jesús qa el tnikʼ tiʼjju bʼaj kyiʼj xjal tej kybʼant milagr tuʼn. Bʼant qe milagr tuʼn tuʼnju tzaj qʼaqʼin tkʼuʼj kyiʼj xjal e ikʼ toj kʼixkʼoj ex nya tuʼnju ok obligarin (Mat. 20:29-34; Mar. 1:40-42). Jun techel, qo ximen tiʼj tiʼ tnaʼn tej t-xi tiʼn jun xjal chkint twiʼ najchaq kyiʼj txqantl tuʼntzun tbʼanix tuʼn,  moqa tej tjaw anqʼin tal jun xuʼj viud tuʼn (Mar. 7:32-35; Luc. 7:12-15). Kubʼ tnaʼn Jesús aju bʼaj kyiʼj xjal lu ex tuʼn jlu onin kyiʼj.

12. Ik tzeʼn in tzaj tqʼamaʼn Juan 11:32 a 35, ¿tzeʼn kubʼ tyekʼin Jesús qa el tnikʼ tiʼjju bʼaj tiʼj Marta ex María?

¹² Tej tkyim Lázaro, kubʼ tyekʼin Jesús qa el tnikʼ tiʼjju kubʼ kynaʼn Marta ex María. Tej tok tkeʼyin aju kʼixkʼoj tzaj kyiʼj, «jawtzun oqʼ» (kjawil uʼjit Juan 11:32-35). Mintiʼ jaw oqʼ tuʼnju mlay tentl tukʼil Lázaro, aju tbʼanel tamiw. Tuʼnju ojtzqiʼntoq tuʼn qa kjawiltoq anqʼin juntl maj. Jaw oqʼ tuʼnju kubʼ tnaʼn aju kʼixkʼoj tzaj tiʼj Marta ex María.

13. ¿Tiquʼn in nonin qiʼj aj tel qnikʼ tiʼj qʼaqʼbʼil tkʼuʼj Jesús kubʼ tyekʼin?

¹³ Nya tzʼaqli qoʼ ik tzeʼn te Jesús. Noqtzun tuʼnj, jaku tzʼel qiʼn tbʼanel xnaqʼtzbʼil tiʼj qʼaqʼbʼil tkʼuʼj kubʼ tyekʼin. Ex in nok qkʼujlaʼn tuʼnju tmod kubʼ tyekʼin kyukʼil xjal (1 Ped. 1:8). In tzaj qʼuqbʼaʼn qkʼuʼj tuʼnju in kawin toj Tkawbʼil Dios ex ya chʼix tel tiʼn tkyaqil kʼixkʼoj in tzaj qiʼj. Tuʼnju anqʼin Jesús ik tzeʼn jun xjal, jaku txi tbʼinchaʼn tiʼj tkyaqil nya bʼaʼn in nok tbʼinchaʼn aju tokx tjaqʼ tkawbʼil Satanás qiʼj. In qo tzalaj tuʼnju a Jesús Qrey ex «bʼaʼn qʼaqʼan tkʼuʼj qiʼj» (Heb. 2:17, 18; 4:15, 16).

14. Ik tzeʼn in tzaj tqʼamaʼn Efesios 5:1, 2, ¿tiʼ qaj tuʼn tbʼant quʼn?

¹⁴ Aj qxnaqʼtzan tiʼjju o bʼant tuʼn Jehová ex Jesús, in nonin qiʼj tuʼn qximen tiʼjju in kynaʼn txqantl (kjawil uʼjit Efesios 5:1, 2). Ax tok, mlay tzʼel qnikʼ tiʼj tiʼ tkuʼx toj kyanmi xjal, noqtzun tuʼnj, nim toklen tuʼn tel qnikʼ tiʼjju in bʼaj kyiʼj (2 Cor. 11:29). Toj ambʼil jaʼlo oʼkx in che ximen xjal kyiʼjx, atzun qe in nok tilil quʼn tuʼn tkubʼ qbʼinchaʼn aju tqʼama Pablo: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye mastl» (Filip. 2:4).

15. ¿Alkyeqe il tiʼj tuʼn tkubʼ kyyekʼin qa in nel kynikʼ kyiʼj erman?

¹⁵ Nim toklen tuʼn tel kynikʼ ansyan kyiʼj erman. Ojtzqiʼn kyuʼn qa kxel kyqʼoʼn tajlal te Jehová tiʼj tzeʼn in che ok kyxqʼuqin t-ẍneʼl (Heb. 13:17). Tuʼn kyonin ansyan kyiʼj erman, nim toklen tuʼn tel kynikʼ tiʼjju in bʼaj kyiʼj. ¿Tzeʼn in bʼant kyuʼn?

16. ¿Tiʼ in bʼant kyuʼn ansyan in nel kynikʼ tiʼjju in bʼaj kyiʼj erman ex tiquʼn nim toklen jlu?

¹⁶ Aqeju ansyan in nel kynikʼ tiʼjju in bʼaj kyiʼj erman, in nel kypaʼn ambʼil tuʼn kyonin kyiʼj. In xi kyqanin xjel kye ex in che ok kybʼiʼn tukʼil pasens. Mas nim toklen tuʼn tbʼant jlu kyuʼn qa at jun tmajen Jehová taj tuʼn ttzaj tqʼamaʼn aju tkuʼx toj tanmi, noqtzun tuʼnj, kwest tuʼn kykanet yol tuʼn (Prov. 20:5). Aj in kubʼ kyximen ansyan tuʼn tel kypaʼn mas ambʼil tuʼn kyonin kyiʼj erman, in nonin jlu tuʼn tten mas qʼuqbʼil kykʼuʼj kyxolx, tuʼn tchʼiy kyamiwbʼil ex tuʼn tten mas kykʼujlabʼil (Hech. 20:37).

17. ¿Tiʼ mas in nok kyqʼoʼn erman toklen kyiʼj ansyan? Qʼamantza jun techel.

¹⁷ In tzaj kyqʼamaʼn erman qa mas in nok kyqʼoʼn kyoklen ansyan, qa at kykʼuʼj kyiʼj. ¿Tiquʼn? In tzaj tqʼamaʼn Adelaide jlu: «Mas nya kwest tuʼn tyolina kyukʼil, tuʼnju ojtzqiʼn tuʼna qa kʼelel kynikʼ tiʼja». Tqʼamatl jlu: «Tukʼilju kymod in kubʼ kyyekʼin aj in xi tqʼamaʼna aju in bʼaj tiʼja, in nel tnikʼa tiʼj qa in kynaʼn aju in bʼaj  tiʼja». Ex in tzaj tnaʼn jun ermano jlu: «Akux in xi nqʼamaʼne te jun ansyan aju bʼaj wiʼje, chʼixme jaw oqʼ. Mlayx tzikʼ tnaʼl jlu wuʼne» (Rom. 12:15).

18. ¿Tzeʼn jaku kubʼ qyekʼin qa in nel tnikʼ tiʼjju in bʼaj kyiʼj txqantl?

¹⁸ Qkyaqilx jaku bʼant tuʼn tkubʼ qyekʼin qa in nel qnikʼ tiʼjju in bʼaj kyiʼj txqantl ex nya oʼkx qe ansyan. ¿Alkye tten? Tzʼok tilil quʼn tel qnikʼ tiʼjju in bʼaj kyiʼj toj qja ex kyiʼj erman. Qo ximen kyiʼj kuʼxun, kyiʼj qeju yabʼ ateʼ, kyiʼj qeju ma che tijen ex qeju o kyim jun toj kyja. Bʼaʼn tuʼn t-xi qqanin kye tzeʼn ateʼ ex tuʼn tok qbʼiʼn aju tzul kytzaqʼweʼn. Qyekʼinx qa in nel qnikʼ tiʼjju in bʼaj kyiʼj. Ex tzʼok tilil quʼn tuʼn qonin kyiʼj tukʼilju jaku bʼant quʼn. Aj tbʼant jlu quʼn, in kubʼ qyekʼin axix tok qkʼujlabʼil kyiʼj (1 Juan 3:18).

19. ¿Tiquʼn il tiʼj tuʼn tten qnabʼil aj qonin kyiʼj txqantl?

¹⁹ Aj qonin kyiʼj txqantl, il tiʼj tuʼn tten qnabʼil, tuʼnju nya junx kyximbʼetz xjal in ten kyiʼj nya bʼaʼn in che ok weʼ twitz. Ateʼ junjun kwest tuʼn kyyolin atzun junjuntl nya. Tuʼn jlu, maske qaj tuʼn qonin kyiʼj, mintiʼ tuʼn t-xi qqanin junjun xjel kye aju jaku kubʼ kynaʼn nya bʼaʼn tuʼn (1 Tes. 4:11). Axpe ikx aj ttzaj tqʼamaʼn jun xjal aju tkuʼx toj tanmi, bʼalo nya toj tumel jaku tzʼel toj qwitz. Pero il tiʼj tuʼn tel qnikʼ tiʼj qa atzunju tkuʼx toj tanmi xjal. Tuʼn jlu, nim toklen tuʼn tok qqʼoʼn qwiʼ tiʼjju in tzaj tqʼamaʼn ex tuʼn qximen tiʼjju kxel qtzaqʼweʼn (Mat. 7:1; Sant. 1:19).

20. ¿Tiʼ qo xnaqʼtzal tiʼj toj juntl xnaqʼtzbʼil?

²⁰ Nya oʼkx toj kʼloj okslal kbʼel qyekʼin qa in qo ximen kyiʼj txqantl, ax ikx toj pakbʼabʼil. ¿Tzeʼn jaku kubʼ qyekʼin tbʼanel mod lu toj pakbʼabʼil ex aj qqʼon xnaqʼtzbʼil? Qo xnaqʼtzal tiʼj toj juntl xnaqʼtzbʼil.