Aju yol ikxwitju toj qyol a t-xilen «iktzun tten» moqa «axix tok». Atz tzajni tiʼj jun yol hebreo aju a t-xilen «tuʼn tten tzʼaqli», «jaku tzʼok qeʼ qkʼuʼj tiʼj». At maj ajbʼen yol lu kyuʼn xjal kywitz jwes. Jun techel, xi kyqʼamaʼn xjal «ikxwitju» tej otoqxi txi kyqʼamaʼn jun tziybʼil tuʼntzun tkubʼ kyyekʼin qa axix tok kyuʼn ex qa el kynikʼ tiʼjju jakutoq tzaj kyiʼj qa mintiʼ ma japun twiʼ kyyol (Núm. 5:22). Qa xi kytziyen tuʼn tbʼant jun tiʼ kyuʼn, tej t-xi kyqʼamaʼn «ikxwitju» kywitz xjal, kubʼ kyyekʼin qa iltoq tiʼj tuʼn tbʼant kyuʼn (Neh. 5:13).

Toj capítulo 27 te uʼj te Deuteronomio in kanet jun techel nim toklen quʼn tiʼjju tuʼn tajbʼen yol ikxwitju. Tej otoqxi che okx aj Israel toj Txʼotxʼ tzaj Tziyen kye, ok kychmon kyibʼ kyxol witz Ebal ex witz Guerizim tuʼntzun tok kybʼiʼn aj tjaw uʼjit Ley ex tuʼn t-xi kytziyen tuʼn tjapun kyuʼn. Xi kyqʼamaʼn «ikxwitju» tej tel kynikʼ tiʼj tiʼ jakutoq tzaj kyiʼj qa mintiʼ ma japun kyuʼn (Deut. 27:15-26). ¿Jaku qo ximen tiʼj tqʼajqʼajel kywiʼ xinaq, qe xuʼj ex qe kʼwaʼl tej t-xi kyqʼamaʼn yol lu tukʼil nim tqʼajqʼajel kywiʼ? (Jos. 8:30-35). Mintiʼlo ikʼ tnaʼl kyuʼn aju xi kytziyen toj qʼij aju. Ex ojtzqiʼn quʼn qa japun kyuʼn, tuʼnju in tzaj tqʼamaʼn Tyol Dios jlu: «Qe aj Israel e ajbʼen te Qman tej itzʼxtoq Josué, ax ikx te tibʼajxi, tej itzʼxtoq qe kytijil xjal, aqeju ax e kyaj ten tkyimlenxi Josué ex o kyil tkyaqilju bʼaʼn o tbʼincha Qman kye aj Israel» (Jos. 24:31).

Ax ikx ajbʼen aju yol «ikxwitju» tuʼn Jesús tuʼn tkubʼ tyekʼin qa ax tok jun tiʼ xi qʼamaʼn, pero bʼant tuʼn toj junxitl tten. Mintiʼ ajbʼen tuʼn tej otoqxi txi tqʼamaʼn jun txol yol, sino ajbʼen tuʼn tej naʼmxtoq t-xi tqʼamaʼn jun tiʼ tuʼntzun  tkubʼ tyekʼin qa ax tok aju xi tqʼamaʼn. Tzalu in kubʼ traducirit yol ikxwitju, ik tzeʼn «ax tok». At maj xi tqʼamaʼn kabʼe maj, «ikxwitju ikxwitju» (Mat. 5:18; Juan 1:51). Iktzun tten kubʼ tyekʼin qa axix tok qe tyol. Jakutoq txi tqʼamaʼn qe yol axix tok, tuʼnju oʼkx te at toklen tuʼn kyjapun twi ttziybʼil Dios (2 Cor. 1:20; Apoc. 3:14).

Ax ikx xi kyqʼamaʼn aj Israel «ikxwitju» tej kybʼitzin te Jehová ex tej kynaʼn Dios (Neh. 8:6; Sal. 41:13). Tej tajbʼen yol lu kyuʼn tej kybʼaj naʼn Dios, aqeju in che bʼin kyiʼj ok kyqʼoʼn ik tzeʼn aʼye in che naʼn Dios. Tej tbʼant jlu kyuʼn, ok kyqʼoʼn toklen ambʼil tej kykʼulin te Jehová. Atzun jlu bʼaj tej t-xi tiʼn aj kawil David aju Kajon tkʼubʼil Ley toj Jerusalén. Toj ikʼsabʼil ok kyuʼn te tibʼajxi, xi bʼitzin jun bʼitz otoq kubʼ tbʼinchaʼn David aju ik tten ik tzeʼn jun naʼj Dios (1 Crón. 16:8-36). Tbʼanel ok qe yol xi qʼamaʼn tuʼnju «kykyaqiltzun tnam xjal xi kytzaqʼweʼn: Ikxwitju, ex e oktzun ten nimsal tbʼi Qman». E tzalaj mas tuʼnju xi kytzaqʼweʼn junx.

Chʼixme axju bʼant kyuʼn okslal toj tnejel syent abʼqʼi, tuʼnju xi kyqʼamaʼn «ikxwitju» toj kykʼulbʼil te Jehová. Axpe ikx ajbʼen yol lu kyuʼn junjun aj tzʼibʼil kyoj uʼj xi kysamaʼn kye kʼloj okslal (Rom. 1:25; 16:27; 1 Ped. 4:11). In yolin uʼj te Apocalipsis kyiʼj junjun anjel in jaw kynimsaʼn Jehová toj kyaʼj kyukʼil yol lu: «Ikxwitju. Nimanxwit tbʼi Dios» (Apoc. 19:1, 4). Xi kyqʼamaʼn tnejel okslal «ikxwitju» tej kybʼaj naʼn Dios tej kykubʼ bʼaj chmabʼil (1 Cor. 14:16). Noqtzun tuʼnj, nya noq elex moqa noq kukx xi kyqʼamaʼn yol lu.

Ik tzeʼn ma tzʼel qnikʼ tiʼj, nim toklen tuʼn t-xi qqʼamaʼn «ikxwitju». Aj tajbʼen yol lu quʼn aj qbʼaj naʼn Dios, in kubʼ qyekʼin qa ax tok aju in xi qqʼamaʼn. Ex aj tkubʼ qximen tuʼn t-xi qqʼamaʼn, tukʼil tqʼajqʼajel qwiʼ moqa toj qximbʼetz,  aj tkubʼ bʼaj jun naʼj Dios jatumel in nok jun chmabʼil, in kubʼ qyekʼin qa bʼaʼn in nela toj qwitz aju ma txi qʼamaʼn. Qo xnaqʼtzan kyiʼj junjuntl tiquʼn tuʼn t-xi qqʼamaʼn «ikxwitju».

Iktzun tten in kubʼ qyekʼin qa tok qwiʼ tiʼj qkʼulbʼil. In qo kʼulin te Jehová nya noq tuʼnju tzaqʼwebʼil in xi qqʼoʼn tiʼj naʼj Dios, sino tuʼnju qmod in kubʼ qyekʼin aj tok. Aj tkubʼ qximen tuʼn t-xi qqʼamaʼn «ikxwitju» tuʼn tkyaqil qkʼuʼj, jaku tzʼonin qiʼj tuʼn tten tbʼanel qmod ex tuʼn tok qqʼoʼn qwiʼ tiʼj.

Iktzun tten in kubʼ qyekʼin qa at mujbʼabʼil qxol kyukʼil erman. Aj kyok naʼj Dios kyoj chmabʼil, qkyaqilx in nok qqʼoʼn qwiʼ tiʼjju in xi qʼamaʼn (Hech. 1:14; 12:5). In chʼiy mujbʼabʼil qxol aj tkubʼ qximen tuʼn t-xi qtzaqʼweʼn junx. Qa ma txi qqʼamaʼn «ikxwitju» tukʼil tqʼajqʼajel qwiʼ moqa toj qximbʼetz, in kubʼ qyekʼin qa qaj tuʼn ttzaj tqʼoʼn Jehová aju ma txi qqanin qkyaqilx.

Iktzun tten in jaw qnimsaʼn Jehová. In nok tqʼoʼn twitz tiʼj tkyaqilju in bʼant quʼn tuʼn qkʼulin te, maske nya nim toklen toj qwitz (Luc. 21:2, 3). In nel tnikʼ Dios tiʼj tiquʼn in bʼant quʼn ex tiʼjju tkuʼx toj qanmi. Axpe ikx qa toj yolbʼil ma tzʼok qbʼiʼn chmabʼil, jaku tzʼok qeʼ qkʼuʼj tiʼj qa in qo tzaj tbʼiʼn aj t-xi qqʼamaʼn «ikxwitju», in nok jlu ik tzeʼn junx atoʼ kyukʼil qeju in che kʼulin te Jehová toj chmabʼil.

Ik tzeʼn ma tzʼel qnikʼ tiʼj, nim toklen tuʼn t-xi qqʼamaʼn «ikxwitju». In tzaj tchikʼbʼaʼn uʼj Perspicacia para comprender las Escrituras qa aju yol lu in tzaj tyekʼin «qʼuqbʼil qkʼuʼj, qa bʼaʼn toj qwitz ex qa axix tok kbʼantel». Tuʼntzunju, aj t-xi qqʼamaʼn «ikxwitju», in tzalaj Jehová quʼn (Sal. 19:14).