1. Tej otoqxi kubʼ kybʼinchaʼn Adán ex Eva il, ¿tiʼ tqanil tzaj tqʼoʼn Jehová tiʼjju aj qʼoj qiʼj?

OJTZQIʼNTOQ tuʼn Adán qa mlaytoq bʼant kyyolin kan. Tej tyolin jun kan tukʼil Eva, bʼalo kubʼ t-ximen Adán qa jun xewbʼaj yolin tukʼil t-xuʼjil (Gén. 3:1-6). Mintiʼtoq chʼin ojtzqiʼn kyuʼn tiʼjju xewbʼaj lu. Maske ikju, kubʼ t-ximen Adán tuʼn t-xi tbʼiʼn xewbʼaj lu ex tuʼn ya miʼn t-xi tbʼiʼn Ttat at toj kyaʼj (1 Tim. 2:14). Jun rat naj tzaj tqʼoʼn Jehová tqanil tiʼj aj qʼoj lu aju otoq tzʼel tzpet Adán ex Eva tuʼn, ex tzaj ttziyen qa kbʼel tnajsaʼn. Pero ax ikx tzaj tqʼamaʼn qa toj jun ambʼil kʼokel tbʼinchaʼn aj qʼoj lu nya bʼaʼn kyiʼj qeju kʼujlaʼn Jehová kyuʼn (Gén. 3:15).

2, 3. ¿Tiquʼn nya nim tqanil tzaj tqʼoʼn Jehová tiʼj Satanás tej naʼmxtoq tul Mesías?

² At nim tnabʼil Jehová, mintiʼ o tzaj tqʼamaʼn qe alkye tbʼi anjel ok te aj qʼoj. * Ex yon 2,500 abʼqʼi tuʼn ttzaj tqʼamaʼn qe alkye yol kʼajbʼel tuʼn tuʼn tyolin tiʼj aj qʼoj: Satanás, a t-xilen yol lu, «aj qʼoj tiʼj Dios» (Job 1:6). Aju yol lu, oʼkx in kanet kyoj oxe uʼj toj Tyol Dios e kubʼ tzʼibʼin toj yol hebreo: toj  1 Crónicas, Job ex Zacarías. ¿Tiquʼn nya nim tqanil tzaj tqʼoʼn Jehová tiʼj aj qʼoj lu tej naʼmxtoq tul Mesías?

³ Mintiʼ ajbʼen Xjan Uʼj kubʼ tzʼibʼin toj yol hebreo tuʼn ttzaj tqʼamaʼn Jehová tkyaqil tqanil tiʼj Satanás. Bʼalo bʼant jlu tuʼn tuʼnju nya tajtoq tuʼn tok tqʼoʼn nim toklen Satanás. Kubʼ tzʼibʼin Tyol Dios toj yol hebreo tuʼnju tajtoq Jehová tuʼn tonin kyiʼj xjal tuʼn tel kynikʼ tiʼj Mesías ex tuʼn kyok lepeʼ tiʼj (Luc. 24:44; Gál. 3:24). Ajbʼen Mesías ex qe t-xnaqʼtzbʼen tuʼn Jehová tuʼntzun ttzaj kyqʼamaʼn qe tqanil ojtzqiʼn quʼn jaʼlo tiʼj Satanás ex kyiʼj qeju e ok lepeʼ tiʼj. * Ex tbʼanel bʼant jlu tuʼn Jehová tuʼnju a Jesús ex qe skʼoʼn maj che ajbʼel tuʼn tuʼntzun tkubʼ kyxiten Satanás ex qeju lepcheqeʼk tiʼj (Rom. 16:20; Apoc. 17:14; 20:10).

4. ¿Tiquʼn mintiʼ tuʼn ttzaj nim qxobʼil twitz Satanás?

⁴ Tqʼama apóstol Pedro qa ik tten Tajaw il ik tzeʼn «jun bʼalun» in tzanun, atzunte apóstol Juan ok tqʼoʼn tbʼi te «lobʼaj» ex «dragón» (1 Ped. 5:8; Apoc. 12:9). ¿Ape t-xilen jlu qa tzul nim qxobʼil twitz Satanás? Miʼn, tuʼnju at bʼajsbʼil te tipumal (kjawil uʼjit Santiago 4:7). At Jehová, Jesús ex qeju tbʼanel anjel te onil qe. Tukʼil onbʼil in tzaj kyqʼoʼn, jaku kubʼ kyiʼj nya bʼaʼn quʼn. Pero naʼmx t-xi qqʼoʼn tzaqʼwebʼil kyiʼj oxe xjel nim kyoklen: ¿Jniʼ tipumal Satanás at kyibʼaj xjal? ¿Tiʼ in bʼant tuʼn Satanás tuʼn tten tipumal kyibʼaj xjal? ex ¿jatumel in pon bʼaj tipumal? Qo xnaqʼtzan kyiʼj xjel lu ex qo ximen tiʼj alkye xnaqʼtzbʼil jaku tzʼel qiʼn tiʼj.

5, 6. ¿Tiquʼn mlay tzaj kyiʼn aj kawil te twitz txʼotxʼ aju chʼixpubʼil at tajbʼen kye xjal?

⁵ Nim kyajlal anjel e ok lepeʼ tiʼj Satanás. Tej naʼmxtoq ttzaj Nim Jbʼal, kubʼ kykʼuʼj junjun anjel tuʼn Satanás tuʼn kyyaẍin kyukʼil xuʼj. Aj tyolin Tyol Dios tiʼj jlu, in nok qʼoʼn jun dragón te techel aju tzaj tjakʼuʼn toxin plaj tiʼj cheʼw ateʼ toj kyaʼj (Gén. 6:1-4; Jud. 6; Apoc. 12:3, 4). Tej tkyaj kytzaqpiʼn nya bʼaʼn anjel qe toj tja Jehová at toj kyaj, okx kyqʼon kyibʼ tjaqʼ tkawbʼil Satanás. Pero miʼn kubʼ qximen qa noq jun kʼloj xjal nya bʼaʼn qe ex qa noq sputin kyten. O kubʼ tbʼinchaʼn Satanás jun tten tuʼn tkawin ik tzeʼn Tkawbʼil Dios, ex in nok tqʼon tibʼ te aj kawil. Ax ikx o bʼaj tnukʼuʼn qe juʼẍ tuʼn tten kykawbʼil, o txi tqʼoʼn kyoklen ex o che ok tqʼoʼn te aj kawil twitz tkyaqil Txʼotxʼ (Efes. 6:12).   

⁶ In najbʼen nim tiʼchaq tuʼn Satanás tuʼn tten tipumal kyibʼaj aj kawil te twitz txʼotxʼ. In nel qnikʼ tiʼj jlu tuʼnju «xi tyekʼun tkyaqil tnam twitz txʼotxʼ te» Jesús ex xi tqʼamaʼn jlu te: «Teya kxel nqʼoʼne tkyaqil kyipumal tnam lu tukʼix kyoklen; porke weye o tzaj qʼoʼn, ex kxel nqʼoʼne noq al e wajbʼile» (Luc. 4:5, 6). Maske in ten nya bʼaʼn tipumal Tajaw il kyibʼaj aj kawil, at nim kye in xi kybʼinchaʼn bʼaʼn kyiʼj xjal ateʼ tjaqʼ kykawbʼil. Ateʼ junjuntl aj kawil at tbʼanel kyximbʼetz. Noqtzun tuʼnj, mintiʼ jun kawbʼil nix jun aj kawil jaku tzaj tiʼn chʼixpubʼil at tajbʼen kye xjal (Sal. 146:3, 4; Apoc. 12:12).

7. ¿Alkye tten in najbʼen okslabʼil nya ax tok tuʼn Satanás ex qeju nimaq kʼaẍjel? (Qʼonka twitza tiʼj tnejel tilbʼilal).

⁷ Tuʼn tsbʼun Satanás ex qe juʼẍ «kyiʼj  kykyaqil xjal twitz txʼotxʼ», nya oʼkx in che ajbʼen aj kawil kyuʼn, sino ax ikx in najbʼen okslabʼil nya ax tok kyuʼn ex qeju nimaq kʼaẍjel (Apoc. 12:9). In najbʼen okslabʼil nya ax tok tuʼn Satanás tuʼn t-xi tqʼamaʼn nya ax tok yol tiʼj Jehová. Axpe ikx taj tuʼn tikʼ tnaʼl tbʼi Jehová kyuʼn nim xjal (Jer. 23:26, 27, TNM). Aju in tzaj tuʼn jlu, at nim xjal in kubʼ kyximen qa in che kʼulin te Jehová, noqtzun tuʼnj, in che kʼulin kye juʼẍ (1 Cor. 10:20; 2 Cor. 11:13-15). In che ajbʼen nimaq kʼaẍjel tuʼn Satanás tuʼn t-xi tqʼamaʼn junjuntl tiʼchaq nya ax tok. Jun techel, in nokx tqʼoʼn toj kyximbʼetz xjal qa oʼkx jaku che tzalaj qa at nim kypwaq ex qa at nim tiʼchaq kye (Prov. 18:11). Aʼyeju xjal in nok kyqʼoʼn kywiʼ tiʼj jlu, in najbʼen kyanqʼibʼil kyuʼn tiʼj «qʼinumabʼl» ex nya tuʼn kyajbʼen te Jehová (Mat. 6:24). Aj tten kykʼujlabʼil kyiʼj tiʼchaq te twitz txʼotxʼ, in naj kykʼujlabʼil tiʼj Jehová (Mat. 13:22; 1 Juan 2:15, 16).

8, 9. a) ¿Alkye kabʼe xnaqʼtzbʼil in nel qiʼn tiʼjju bʼant tuʼn Adán tukʼil Eva ex qe anjel e ok te aj qʼoj? b) ¿Alkye tten in nonin qiʼj aj tel qnikʼ tiʼj jniʼ tipumal Satanás at?

⁸ Aju bʼant tuʼn Adán tukʼil Eva ex qeju anjel e ok te aj qʼoj, in tzaj kyqʼoʼn kabʼe xnaqʼtzbʼil qe. Aju tnejel, in nel qnikʼ tiʼj qa oʼkx at kabʼe xjal jaku qo onin kyiʼj ex il tiʼj tuʼn tjaw qskʼoʼn jun, qa tiʼj Jehová, ex qa tiʼj Satanás (Mat. 7:13). Aju tkabʼ, noq jun rat jaku qo tzalaj qa ma qo onin tiʼj Satanás. Kubʼ kyximen Adán tukʼil Eva tuʼn tkubʼ kyqʼoʼn kyex kykawbʼil tiʼj alkye bʼaʼn ex alkye nya bʼaʼn, ax ikx qe juʼẍ kanet chʼin kyoklen tuʼn tten kyipumal kyibʼaj aj kawil te twitz txʼotxʼ (Gén. 3:22). Mlayx tzaj tbʼanel toj qanqʼibʼil qa ma qo onin tiʼj Satanás (Job 21:6-17; Gál. 6:7, 8).

⁹ ¿Alkye tten in nonin qiʼj aj tel qnikʼ tiʼj jniʼ tipumal Satanás at? In nonin qiʼj tuʼn tel qnikʼ tiʼj qa taj Jehová tuʼn kyxi qbʼiʼn qeju at kyoklen toj jun kawbʼil ex qeju aj kawil (1 Ped. 2:17). Taj Jehová tuʼn t-xi qbʼiʼn qe ley in kubʼ kyqʼoʼn xjal qa mintiʼ in che ikʼ kyibʼaj qe tkawbʼil (Rom. 13:1-4). Ax ikx ojtzqiʼn quʼn qa mintiʼ tuʼn tokx qqʼon qibʼ kyxol aj kawil nix tuʼn qonin kyiʼj (Juan 17:15, 16; 18:36). Nya oʼkxju, aj tel qnikʼ tiʼjju tipumal Satanás at, in nonin qiʼj tuʼn qpakbʼan. Tuʼnju in nel qnikʼ tiʼj tiʼ taj tuʼn tbʼant kyuʼn xjal ex tiʼjju nya ax tok yol in tqʼamaʼn tiʼj Jehová, tuʼn jlu in kubʼ qnaʼn qa qaj tuʼn t-xi qxnaqʼtzaʼn axix tok tiʼj Qdios. Tok tbʼi qiʼj ex in qo tzalaj tuʼn jlu. Ojtzqiʼn quʼn qa ma tzʼok qkʼujlaʼn Jehová, tzul tiʼn mas kʼiwlabʼil qe twitzju tzalajbʼil jaku tzaj tiʼn pwaq ex qeju tiʼchaq qe (Is. 43:10; 1 Tim. 6:6-10).

10-12. a) ¿Alkyelo tten ajbʼen jun sbʼubʼil tuʼn Satanás tuʼn kykubʼ tzʼaq nim anjel? b) ¿Tiʼ xnaqʼtzbʼil jaku tzʼel qiʼn tiʼjju bʼaj kyiʼj anjel?

¹⁰ Tuʼn tkubʼ kybʼinchaʼn xjal aju taj Satanás, in che ajbʼen junjun sbʼubʼil tuʼn. Ik tzeʼn kʼelel qnikʼ tiʼj, at maj in che ajbʼen sbʼubʼil nyaxix qʼanchaʼl qe tuʼn ex junjuntl maj in che ajbʼen sbʼubʼil qʼanchaʼl qe tuʼn.

¹¹ Tnejel, kʼelel qnikʼ tiʼj alkye tten ajbʼen sbʼubʼil tuʼn Satanás tuʼn kykubʼ tzʼaq nim anjel. Jaku txi qqʼamaʼn qa el tpaʼn ambʼil tuʼn tkubʼ ten ximel tiʼj tzeʼn jaku che kubʼ tzʼaq tuʼn ex tuʼn kyok lepeʼ tiʼj. At junjun kye e kubʼ tzʼaq toj tramp lu ex e yaẍin kyukʼil xuʼj. E ok kykʼwaʼl te nimaq xjal, te bʼiyel ex ten nya bʼaʼn kymod (Gén. 6:1-4). Bʼalo nya oʼkx ajbʼen yaẍbʼil tuʼn Satanás, sino ax ikx xi tqʼamaʼn kye anjel lu qa che kawiltoq kyibʼaj xjal. Bʼalo tajtoq tuʼn miʼn tul aju «tiyjil xuʼj», aju otoq tzaj ttziyen Jehová (Gén. 3:15). Noqtzun tuʼnj, tzaj tiʼn Jehová Nim Jbʼal ex tuʼn jlu ya mintiʼ bʼant aju kubʼ t-ximen Satanás ex qe juʼẍ.

¹² ¿Tiʼ xnaqʼtzbʼil jaku tzʼel qiʼn tiʼj jlu? Mintiʼ tuʼn tkubʼ qximen qa mlay qo kubʼ tzʼaq toj yaẍbʼil ex qa oʼkx tuʼn qximen qiʼjx. Aʼyeju anjel e ok lepeʼ tiʼj Satanás otoq che ajbʼen te Jehová kyoj nim abʼqʼi. Maske ateʼtoq toj jun tbʼanel lugar toj kyaʼj, nim anjel xi kyqʼoʼn ambʼil tuʼn tchʼiy nya bʼaʼn achbʼil toj kyanmi. Ax jlu jaku bʼaj qiʼj, bʼalo o tzikʼ nim abʼqʼi in qo ajbʼen toj ttnam Jehová, ex atoʼ toj jun tbʼanel lugar, pero jaku che chʼiy nya bʼaʼn achbʼil toj qanmi (1 Cor. 10:12). Nim toklen tuʼn tel qnikʼ tiʼj tzeʼn taʼ qanmi, tuʼntzun miʼn tkubʼ qximen qa mas nim qoklen kywitz txqantl ex tuʼn tel qikʼen nya bʼaʼn ximbʼetz (Gál. 5:26; kjawil uʼjit Colosenses 3:5).

13. a) ¿Tiʼ juntl sbʼubʼil in najbʼen tuʼn Satanás tuʼn kykubʼ tzʼaq xjal tuʼn? b) ¿Tiʼ jaku bʼant quʼn tuʼn miʼn qkubʼ tzʼaq toj sbʼubʼil lu?

¹³ Juntl sbʼubʼil in najbʼen tuʼn Satanás, aju kyajbʼil xjal tuʼn tel kynikʼ tiʼjju in bʼant kyuʼn juʼẍ, tiʼj kyaqʼun chman ex junjuntl tiʼchaq. Nya oʼkx in najbʼen okslabʼil nya ax tok tuʼn Satanás tuʼn tsbʼun kyiʼj xjal. Ax ikx in che ajbʼen película, juegos electrónicos, ex txqantl saqchbʼil tuʼn tuʼntzun ttzaj kygan xjal tiʼjju in bʼant kyuʼn juʼẍ. ¿Tiʼ jaku bʼant quʼn tuʼn miʼn qkubʼ tzʼaq toj sbʼubʼil lu? Mintiʼ tuʼn qyon tuʼn ttzaj tqʼamaʼn ttnam Jehová alkyeqe saqchbʼil bʼaʼn ex alkyeqe nya bʼaʼn. Teyele junjun qe il tiʼj tuʼn t-xi t-xnaqʼtzaʼn tnabʼil tukʼil Tyol Dios (Heb. 5:14). Kjawil qskʼoʼn tbʼanel qa ax tok ma tzʼok qkʼujlaʼn Jehová ik tzeʼn tqʼama apóstol Pablo (Rom. 12:9). Qxjelinku jlu: «Qa ma tzʼok tkeʼyin jun xjal in xnaqʼtzan wukʼile tiʼj Tyol Dios  qeju tiʼchaq in bʼant wuʼne, ¿kbʼelpe t-ximen qa in kubʼ nqʼoʼne toj xnaqʼtzbʼil aju in chin pakbʼane tiʼj moqa xmeletzʼ qine?». Qa ma kubʼ qbʼinchaʼn aju in qo pakbʼan tiʼj, kʼonil qiʼj tuʼn miʼn qkubʼ tzʼaq kyoj tsbʼubʼil Satanás (1 Juan 3:18).

14. a) ¿Tiʼ jaku bʼant tuʼn Satanás tuʼn tok tbʼinchaʼn nya bʼaʼn qiʼj? b) ¿Alkye tten jaku kubʼ kyiʼj nya bʼaʼn lu quʼn?

¹⁴ Atzun jaʼlo qo xnaqʼtzan tiʼj alkye nya bʼaʼn in nok tbʼinchaʼn Satanás qiʼj tuʼn ya miʼn qajbʼen te Jehová. Jun techel, jaku ten tipumal kyibʼaj aj kawil tuʼn ttzaj kyqʼamaʼn tuʼn ya miʼn qpakbʼan. Ax ikx jaku che xmayin qe qukʼil toj aqʼuntl moqa toj tja xnaqʼtzbʼil qiʼj tuʼnju in kubʼ qbʼinchaʼn tajbʼil Jehová (1 Ped. 4:4). Ex jaku che ajbʼen toj qja tuʼn tuʼntzun ttzaj kyqʼamaʼn qe tuʼn miʼn qxiʼ kyoj chmabʼil, maske at jun tbʼanel kyximbʼetz (Mat. 10:36). ¿Alkye tten jaku kubʼ kyiʼj nya bʼaʼn lu quʼn? Tnejel, bʼaʼn tuʼn tel qnikʼ tiʼj qa kbʼajel jlu tuʼnju in qʼojin Satanás qiʼj (Apoc. 2:10; 12:17). Tkabʼ, mintiʼ tuʼn t-xi qqʼoʼn ambʼil kye nya bʼaʼn lu tuʼn tel naj tiʼj qkʼuʼj aju mas nim toklen: aju tqʼama Satanás qa oʼkx qo ajbʼel te Jehová qa bʼaʼn atoʼ ex qa kyjel qkolin qa ma tzʼok bʼinchaʼn nya bʼaʼn qiʼj (Job 1:9-11; 2:4, 5). Ex toxin, qqaninx te Jehová tuʼn ttzaj tqʼoʼn qipumal tuʼn kyikʼx nya bʼaʼn quʼn. Qnaʼntz, mlayx qo kyaj tqʼoʼn Jehová qjunalx (Heb. 13:5).

15. ¿Jakupe qo ok tchqʼoʼn Satanás tuʼn tbʼant quʼn aju nya qaj? Chikʼbʼantza.

¹⁵ Mlay qo ok tchqʼoʼn Satanás tuʼn tbʼant quʼn aju nya qaj tuʼn tkubʼ qbʼinchaʼn (Sant. 1:14). Nim xjal in kubʼ kybʼinchaʼn aju taj Satanás ex mintiʼ in nel kynikʼ tiʼj. Ajtzun tel kynikʼ tiʼj axix tok, il tiʼj tuʼn tkubʼ kyximen alqe che ajbʼel (Hech. 3:17; 17:30). Qa ma kubʼ qximen tuʼn qnimen te Jehová, mlayx bʼant jun tiʼ tuʼn Satanás tuʼn tkyaj qkolin tuʼn qajbʼen te Jehová (Job 2:3; 27:5).

16, 17. a) ¿Alkye junjuntl tiʼchaq mlay bʼant tuʼn Satanás? b) ¿Tiquʼn mintiʼ tuʼn qtzaj xobʼ aj qnaʼn Dios tukʼil tqʼajqʼajel qwiʼ?

¹⁶ At junjuntl tiʼchaq mlay bʼant tuʼn Satanás ex qe juʼẍ. Jun techel, mintiʼ in tzaj tqʼamaʼn Tyol Dios qa jaku tzʼel kynikʼ tiʼjju in kubʼ qximen ex tiʼjju tkuʼx toj qanmi. Oʼkx Jehová ex Jesús jaku bʼant jlu kyuʼn (1 Sam. 16:7; Mar. 2:8). Pero, ¿tiʼ jaku bʼaj qa ma qo naʼn Dios tukʼil tqʼajqʼajel qwiʼ? ¿Bʼaʼnpe tuʼn qtzaj xobʼ te Tajaw il ex qe taqʼunal tuʼnju in nok kybʼiʼn qyol ex qa jaku tzʼajbʼen jlu kyuʼn tuʼn tok kybʼinchaʼn nya bʼaʼn qiʼj? Miʼn. Ojtzqiʼn quʼn qa in keʼyin Satanás qiʼj aj qajbʼen te Jehová, pero nya tuʼn jlu in qo xobʼ twitz. Ax ikx mintiʼ tuʼn qtzaj xobʼ tuʼn qnaʼn Dios tukʼil tqʼajqʼajel qwiʼ noq tuʼnju in qo ok kybʼiʼn. In tzaj qʼamaʼn toj Xjan Uʼj qa nim tmajen Jehová e naʼn Dios tukʼil tqʼajqʼajel kywiʼ, ex mintiʼ e tzaj xobʼ twitz Satanás tuʼnju in bʼin kyiʼj (1 Rey. 8:22, 23; Juan 11:41, 42; Hech. 4:23, 24). Qa ma tzʼok tilil quʼn tuʼn qyolin ex tuʼn qanqʼin ik tzeʼn tajbʼil Jehová, jaku tzʼok qeʼ qkʼuʼj tiʼj qa mlay txi tqʼoʼn ambʼil te Tajaw il tuʼn tok tbʼinchaʼn nya bʼaʼn qiʼj te jumajx (kjawil uʼjit Salmo 34:7).

¹⁷ Il tiʼj tuʼn tok qojtzqiʼn aj qʼoj qiʼj, pero mintiʼ tuʼn ttzaj nim qxobʼil twitz. Maske aj il qoʼ, jaku kubʼ tiʼj Satanás quʼn tuʼn tonbʼil Jehová (1 Juan 2:14). Qa ma qo kubʼ weʼ twitz Tajaw il, kʼelel oq qiʼj (Sant. 4:7; 1 Ped. 5:9). Tuʼn jlu jaku txi qqʼamaʼn qa mas tgan Satanás tuʼn tkubʼ kyiʼj kuʼxun. ¿Alkye junjun tiʼchaq jaku bʼant kyuʼn kuʼxun tuʼntzun kykubʼ weʼ twitz Tajaw il? Kxel qqʼoʼn tzaqʼwebʼil tiʼj xjel lu toj juntl xnaqʼtzbʼil.