TOJ ambʼil jaʼlo, at nim nya bʼaʼn ex kwest tuʼn qanqʼin toj mujbʼabʼil. Ex maske at chʼin mujbʼabʼil qxol, at maj kwest tuʼn kukx tten. ¿Alkyeqe taqikʼ Tyol Dios jaku che onin qiʼj tuʼn tten axix tok mujbʼabʼil ex tuʼn miʼn tnaj? ¿Ex alkye tten jaku qo onin kyiʼj txqantl tuʼn tkanet jlu kyuʼn?

Tuʼn qtzalaj tiʼj axix tok mujbʼabʼil, nim toklen tuʼn tkubʼ qximen qa mlay tzaj jun nya bʼaʼn qiʼj ex qa bʼaʼn atoʼ. Ax ikx, nim toklen tuʼn kyten tbʼanel qamiw. Ex aju mas nim toklen, il tiʼj tuʼn tten jun tbʼanel qamiwbʼil tukʼil Jehová tuʼntzun miʼn tnaj aju mujbʼabʼil. Qo xnaqʼtzan tiʼj alkye tten jaku bʼant quʼn.

Qa ma txi qnimen qeju tbʼanel kawbʼil ex nabʼil in tzaj tqʼoʼn Jehová qe, kbʼel qyekʼin qa qʼuqli qkʼuʼj tiʼj ex qa qaj tuʼn qten toj mujbʼabʼil tukʼil (Jer. 17:7, 8; Sant. 2:22, 23). Iktzun tten tzul laqʼeʼ Jehová qtxlaj ex qo ul tkʼiwlaʼn aj tten mujbʼabʼil toj qanmi. In tzaj tqʼamaʼn Tyol Dios jlu: «Qa ma txi bʼinchet aju tzʼaqlixix, tzul tiʼn mujbʼabʼil. Ex aj tbʼinchet aju jiqun tiʼj, tzul tqʼoʼn txubʼtxaj te jumajx ex mlay xobʼ jun xjal» (Isaías 32:17, TNM). Qa ma txi qnimen Jehová tuʼn tkyaqil qanmi, tuʼn jlu kbʼel qnaʼn tbʼanel (Is. 48:18, 19).

Tuʼn qtzalaj tiʼj mujbʼabʼil te jumajx, ax ikx in tzaj tqʼoʼn Jehová jun tbʼanelxix oyaj qe: aju xewbʼaj xjan (Hech. 9:31).

Tej tyolin Pablo tiʼjju in «tqʼoʼn Xewbʼaj Xjan», ok tqʼoʼn mujbʼabʼil te toxin kyxol qeju txqantl (Gál. 5:22, 23). Qa ax tok qaj tuʼn tten axix tok mujbʼabʼil qxol, il tiʼj tuʼn t-xi qqʼoʼn ambʼil te xewbʼaj xjan tuʼn taqʼunan toj qanqʼibʼil. Qo xnaqʼtzan tiʼj kabʼe tiʼ jaku bʼant quʼn tuʼn tonin xewbʼaj xjan qiʼj.

 Tnejel, il tiʼj tuʼn qnaqʼet tuʼn quʼjin tiʼj Tyol Dios (Sal. 1:2, 3). Aj qximen tiʼjju in tzaj tqʼamaʼn Tyol Dios, in nonin xewbʼaj xjan qiʼj tuʼn tel qnikʼ tiʼj tiʼ t-ximbʼetz Jehová at kyiʼj tiʼchaq. Jun techel, in nel qnikʼ tiʼj tiʼ in bʼant tuʼn tuʼntzun kukx tten mujbʼabʼil ex tiquʼn nim toklen toj twitz. Qa ma kubʼ qqʼoʼn toj xnaqʼtzbʼil aju in nel qnikʼ tiʼj toj Xjan Uʼj, ktel mas mujbʼabʼil qxol (Prov. 3:1, 2).

Tkabʼ, il tiʼj tuʼn qnaʼn Dios te Jehová ex tuʼn t-xi qqanin te tuʼn ttzaj tqʼoʼn xewbʼaj xjan qe (Luc. 11:13). In tzaj ttziyen Jehová jlu kye qeju in che jyon onbʼil tukʼil: «Kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze, tuʼnju at kymojbʼabʼl kyibʼe tukʼil Jesucrist» (Filip. 4:6, 7). Qa kukx ma txi qqanin xewbʼaj xjan, knojel qanmi tuʼn tzalajbʼil ex txubʼtxaj tuʼn Jehová ex oʼkx tzul tqʼoʼn jlu kye tbʼanel tamiw (Rom. 15:13).

O tzʼonin Tyol Dios kyiʼj nim xjal tuʼn tbʼant junjun chʼixpubʼil kyuʼn toj kyanqʼibʼil ex tuʼn kytzalaj tiʼj mujbʼabʼil te jumajx tukʼil Jehová, kyukʼilx ex kyukʼil txqantl. Qo xnaqʼtzan tiʼj kabʼe techel.

Kyoj kʼloj okslal toj ambʼil jaʼlo, ateʼ junjun erman jun rat in tzajtoq kyqʼoj, atzun jaʼlo in che ximen kyiʼj txqantl, at tbʼanel kymod, at kypasens ex mans qe (Prov. 29:22). * Qo yolin kyiʼj kabʼe testigo de Jehová xi kykʼamoʼn onbʼil tuʼntzun tok kyxqʼuqin kymod ex xi kyxnaqʼtzan kyibʼ tuʼn miʼn ttzaj kyqʼoj kyiʼj txqantl.

Tuʼnju nyatoq bʼaʼn tmod David, mintiʼ onin tiʼj tuʼn tyolin toj tumel. Tej naʼmxtoq t-xi tqʼamaʼn te Jehová tuʼn tajbʼen te, naqʼlitoq tuʼn tyolin nya bʼaʼn kyiʼj txqantl ex mintiʼtoq in nok tqʼoʼn kyoklen qe toj tja. Jun qʼij, el tnikʼ tiʼj qa iltoq tiʼj tuʼn tkubʼ tchʼixpuʼn tmod. ¿Tiʼ onin tiʼj tuʼn tok te mans? In tzaj tqʼamaʼn jlu: «Xi tzyet tuʼn tkubʼ nqʼoʼne toj xnaqʼtzbʼil qeju nabʼil in tzaj tqʼoʼn Tyol Dios. Aju tzaj tuʼn jlu, ten tbʼanel kymod qe toj njaye ex xi tzyet tuʼn tok qqʼoʼne qoklene».

Tuʼnju alkye tten jaw chʼiysaʼn Rachel, ax  tmod kubʼ tyekʼin. In tzaj tqʼamaʼn jlu: «Kukx in nok tilil wuʼne jaʼlo tuʼn miʼn tkubʼ nnaʼne qʼoj tuʼnju in jaw chʼiye toj jun ja jatumel tkyaqil qʼij in che qʼojin kykyaqilx». ¿Alkye tten o tzʼok te mans? In tzaj tqʼamaʼntl jlu: «Kukx in xi nqanine onbʼil te Jehová».

Aju ikʼ tiʼj David ex Rachel, noq oʼkx kabʼe techel tiʼjju tbʼanel in tzaj qa ma kubʼ qqʼoʼn toj xnaqʼtzbʼil qe nabʼil in tzaj tqʼoʼn Tyol Dios ex qa ma txi qqanin tonbʼil xewbʼaj xjan. Maske at nim nya bʼaʼn, jaku qo tzalaj tiʼj mujbʼabʼil in kubʼ qnaʼn ex tuʼn tten mujbʼabʼil qxol kyukʼil toj qja, ex kyxol erman. Pero ax ikx in tzaj tqʼamaʼn Jehová tuʼn tok ‹tililx quʼn tuʼn qten bʼaʼn, moqa toj mujbʼabʼil, kyukʼil kykyaqil xjal› (Rom. 12:18). ¿Tzeʼn jaku bʼant quʼn? ¿Ex tiʼ tbʼanel in tzaj qa ma tzʼok tilil quʼn tuʼn qten toj mujbʼabʼil?

Aj qpakbʼan, in xi qqʼoʼn txokbʼil kyiʼj xjal tuʼn tok kybʼiʼn tqanil tiʼj Tkawbʼil Dios (Is. 9:6, 7; Mat. 24:14). Ex nim in qo tzalaj qa ma tzʼok kybʼiʼn nim xjal aju tbʼanel tqanil tiʼj mujbʼabʼil. Noq tuʼn jlu, ya mintiʼxix in tzaj bʼaj kykʼuʼj moqa ya mintiʼ in che qʼojin aj ttzaj nya bʼaʼn. Atzun jaʼlo, at axix tok qʼuqbʼil kykʼuʼj tiʼj ambʼil tzul ex in xi kybʼiʼn nabʼil in tzaj tqʼoʼn Tyol Dios ‹tuʼn tok tilil kyuʼn tuʼn kyten bʼaʼn›, moqa toj mujbʼabʼil ex tuʼn kyok lepeʼ tiʼj (Sal. 34:14).

Ax tok, nya kykyaqil xjal in qo ok kybʼiʼn toj pakbʼabʼil, mas aj qyolin tnejel maj kyukʼil (Juan 3:19). Maske ikju, in nonin Tyol Dios qiʼj tuʼn qyolin kyukʼil toj tumel ex tuʼn tok qqʼoʼn kyoklen. Iktzun tten in xi qbʼiʼn qeju nabʼil tqʼama Jesús tiʼj pakbʼabʼil: «Oktzun kyokxe tuj tja xjal lu, nej kyqʼonxe jun qʼolbʼebʼl: Che tenwt xjal tuj tzalajbʼil [moqa toj mujbʼabʼil, TNM] tuj ja lu, che chikuye. Qatzun bʼaʼn ma che kʼmete kyuʼn, che teltzun qe xjal lu tuj tzalajbʼil ik tzaʼn otoq txi kymaʼne. Qatzun mya bʼaʼn ma che kʼmete kyuʼn, entons mlay che ten xjal tuj tzalajbʼil» (Mat. 10:11-13). Qa ma bʼant quʼn ik tzeʼn tqʼama Jesús, in nonin qiʼj tuʼn qetz ttzi tja xjal toj mujbʼabʼil ex aj tel ambʼil, bʼalo jaku qo onin tiʼj.

Ax ikx in qo onin tiʼj mujbʼabʼil qa ma qo yolin toj tumel kyukʼil qeju at kyoklen toj jun kawbʼil, axpe ikx qa in che qʼojin tiʼj aqʼuntl in bʼant quʼn. Qo xnaqʼtzan tiʼj jun techel. Ikʼentoq qwitz tuʼn jun xjal in kawin toj jun tnam te África ex mintiʼtoq in tzaj tqʼoʼn ambʼil tuʼn kyjaw bʼinchet Ja te Chmabʼil. Tuʼn tkyaj nya bʼaʼn toj ttxolil, xi samaʼn jun erman otoq tzʼajbʼen te misionero toj lugar aju tuʼntzun t-xi tchikʼbʼaʼn toj tumel aju aqʼuntl in bʼant kyuʼn testigo de Jehová atz África. Atz yolin erman tukʼilju xjal nim toklen toj kawbʼil te África toj tnam Londres te Inglaterra. ¿Tiʼ bʼaj?

In tzaj tqʼamaʼn ermano jlu: «Tej npone, ok nqʼoʼne nwitze tiʼj xuʼj tkubʼ ttzi ja ex el nnikʼe tiʼj qa tzajni tiʼj jun kʼloj xjal aju in yolin toj jun yol otoq bʼant wuʼne. Tuʼntzunju, xi nqʼolbʼene toj tex tyol. Jaw labʼin tiʼj jlu ex tzaj tqanin weye tiquʼn otoq chin pone. Toj tumelxix xi nqʼamaʼne te qa wajtoqe tuʼn nyoline tukʼilju xjal nim toklen toj kawbʼil. Xi yolin tiʼj toj teléfono ex etz xjal nim toklen ex in ok tqʼolbʼene toj tyol. Yajxitl, ok tqʼoʼn twiʼ tiʼj tej t-xi nchikʼbʼaʼne te tiʼjju aqʼuntl in bʼant kyuʼn testigo de Jehová».

Tuʼnju toj tumel xi tqʼamaʼn ermano te xjal at toklen toj kawbʼil, onin jlu tuʼn ya miʼn kubʼ tnaʼn ikʼbʼil. Tej tikʼ chʼintl ambʼil, tzaj tqʼoʼn aj kawil ambʼil tuʼn kyjaw bʼinchet Ja te Chmabʼil atz África. ¡Nim e jaw tzalaj erman! Jaku txi qqʼamaʼn qa in tzaj tiʼn tbʼanel aj tok qqʼoʼn kyoklen txqantl ex in nonin tuʼn tten mujbʼabʼil qxol.

Toj ambʼil jaʼlo, in che anqʼin tmajen Dios toj mujbʼabʼil in tzaj tqʼoʼn Jehová te ttnam, jatumel at nim tzalajbʼil kyxol. Ex kukx kchʼiyil qa ma tzʼok tilil quʼn tuʼn tten mujbʼabʼil qxol, aju in tzaj tqʼoʼn xewbʼaj xjan. Ex aju mas nim toklen, tzul tkʼiwlaʼn Jehová qoʼ ex qo tzalajel tiʼj nim mujbʼabʼil te jumajx toj akʼaj twitz Txʼotxʼ (2 Ped. 3:13, 14).