Aju bʼaʼn qʼon oyaj ktzajel tkʼamoʼn kʼiwlabʼil
NIM kyoklen oyaj in xi qʼet tiʼj kʼulbʼil axix tok. In xi kyqʼoʼntoq aj Israel qe txkup te oyaj, ax ikx qe ojtzqiʼn qwitz kyuʼn txqantl tuʼnju in xi qqʼoʼn oyaj te nimsabʼil Jehová. Noqtzun tuʼnj, at junjuntl tten tuʼn t-xi qqʼoʼn oyaj aju tbʼanel in nela toj twitz Dios (Heb. 13:15, 16). In che tzalaj qeju in xi kyqʼoʼn oyaj ex in tzaj kykʼamoʼn kʼiwlabʼil, ik tzeʼn tzul kyyekʼin junjun techel qo xnaqʼtzal tiʼj.
Ana, jun xuʼj kukx ajbʼen te Jehová, tajbʼiltoq tuʼn tul jun tal, noqtzun tuʼnj, mlay tzʼok ten tal. Toj jun naʼj Dios xi ttziyen te Jehová qa ma tzul jun tal, oktoq kxel tqʼoʼn te «tuʼn tajbʼen [...] tuj tkyaqil tanqʼibʼl» (1 Sam. 1:10, 11). Tej tbʼet ambʼil ok ten tal Ana, ul itzʼj kʼwaʼl ex Samuel tbʼi ok tqʼoʼn. Tej tel tiʼj tchʼuʼ, xi tiʼn toj ja xbʼalun tuʼn tajbʼen te Jehová ik tzeʼn otoq txi ttziyen te. Tuʼnju xi tqʼoʼn Ana oyaj lu, tzaj kʼiwlaʼn tuʼn Jehová. Tzaj juntl jweʼ tal, atzunte Samuel ok te aj sanjel ex ok te jun kyxol qe aj tzʼibʼil tiʼj Tyol Dios (1 Sam. 2:21).
Ik tzeʼn bʼant tuʼn Ana ex Samuel, ax ikx qe jaku tzʼajbʼen qchwinqlal quʼn tuʼn qajbʼen teju Bʼinchal qe. Kyaj tqʼamaʼn Jesús qa tzul qkʼamoʼn nim kʼiwlabʼil qa ma txi qqʼoʼn oyaj aj qajbʼen te Jehová (Mar. 10:28-30).
Toj tnejel syent abʼqʼi, at jun okslal Dorcas tbʼi aju ok ojtzqiʼnxix twitz tuʼnju «nimku tbʼinchbʼen bʼaʼn, ex nimku kykotz xjal in xi tqʼoʼn», toj juntl yol, nim aqʼunan kye txqantl. Bʼisbʼajil tuʼnju tzaj yabʼil tiʼj Dorcas «ex kyim», nimxix e bʼisun qe erman tiʼj. Tej tok kybʼiʼn qa attoq Pedro nqayin, e kubʼsan twitz tuʼn tpon naj. Ximana tiʼj tzalajbʼil kubʼ kynaʼn tej tpon ex tej tjaw anqʼin Dorcas tuʼn. Atzun tnejel maj in yolin Tyol Dios tiʼj jun apóstol in jaw anqʼin jun xjal tuʼn (Hech. 9:36-41). Mintiʼ ikʼ tnaʼl tuʼn Dios aʼyeju oyaj xi tqʼoʼn Dorcas (Heb. 6:10). Tkuʼx txʼolbʼabʼil lu toj Tyol Dios ex jaku tzʼel qkanoʼn tbʼanel techel tiʼj.
Ax ikx kubʼ tqʼoʼn apóstol Pablo jun tbʼanel techel qwitz tuʼnju el tpan ambʼil ex onin kyiʼj txqantl. Xi ttzʼibʼin jlu kye okslal te Corinto: «Tuʼn tkyaqil nkʼuʼje kbʼajel nnajsaʼne aju at weye ex kbʼajel nsiksan wibʼe tuʼntzun kychʼiye tuj kyokslabʼle» (2 Cor. 12:15). El tnikʼ Pablo tiʼj qa in kubʼ qnaʼn tzalajbʼil qa ma tzʼel qpaʼn ambʼil kye txqantl ex in tzaj tqʼoʼn aju mas tbʼanel qe: aju kʼiwlabʼil tuʼn Jehová ex aju tamiwbʼil (Hech. 20:24, 35).
Ax tok, tgan Jehová qa in najbʼen ambʼil quʼn ex qipumal tiʼj Tkawbʼil ex kyiʼj erman. Noqtzun tuʼnj, ¿atpe juntl tiʼ jaku txi qqʼoʼn? At. Nya oʼkx tuʼn qbʼinchan xtalbʼil kye txqantl, ax ikx jaku jaw qnimsaʼn Jehová aj t-xi qqʼoʼn oyaj. In najbʼen oyaj in xi qqʼoʼn tuʼn t-xi pakbʼet Tyol Dios twitz tkyaqil Txʼotxʼ. Jun techel, tuʼn jlu in xi qʼet te onbʼil kye qeju in chex samaʼn pakbʼal toj juntl tnam ex junjuntl erman in che ajbʼen toj tkyaqil ambʼil. Ax ikx in najbʼen oyaj tuʼn kyetz ex tuʼn kykubʼ traducirit uʼj ex qe video kyoj txqantl yol, tuʼn kybʼant junjun aqʼuntl aj ttzaj junjun nya bʼaʼn ex tuʼn kyjaw bʼinchet Ja te Chmabʼil. Qʼuqli qkʼuʼj qa in qo tzaj kʼiwlaʼn aj t-xi qqʼoʼn tiʼchaq kye txqantl. Nya oʼkxju, ax ikx kjawil qnimsaʼn Jehová kyukʼil tiʼchaq at qe (Prov. 3:9; 22:9).