1, 2. a) ¿Tiʼ xi ttzaqʼweʼn Jesús te Pedro tej t-xi tqʼamaʼn ku chiwt miʼn bʼaj jlu tiʼja? (Qʼonka twitza tiʼj tnejel tilbʼilal). b) ¿Tiquʼn xi ttzaqʼweʼn Jesús ikju?

MINTIʼ xi kynimen t-xnaqʼtzbʼen Jesús aju tzmatoq in xi tqʼamaʼn kye. Qʼuqli kykʼuʼj tiʼj qa atoq Jesús kbʼel bʼinchante juntl maj tkawbʼil Israel, pero xi tqʼamaʼn kye qa tzultoq nim yajbʼil tiʼj ex qa kkyimeltoq. Tuʼntzunju xi tqʼamaʼn Pedro jlu te: «Tat, Miwt tzaj tqʼoʼn Dios ambʼil tuʼn tbʼant jlu. Ku chiwt tuʼn miʼn ttzaj jlu tiʼja». Atzunte Jesús xi ttzaqʼweʼn: «Tela nwitze Satanás. Ma kubʼ tena nwitze te jun tolsabʼl, porke myatzun tok t-ximbʼetza tiʼj tajbʼil Dios, noq oʼkx tok t-ximbʼetza tiʼj kyajbʼil xjal» (Mat. 16:21-23; Hech. 1:6).

² Iktzun tten kubʼ tyekʼin Jesús qa junxitl t-ximbʼetz Jehová twitzju kyximbʼetz xjal ateʼ tjaqʼ tkawbʼil Satanás (1 Juan 5:19). Aju xi tqʼamaʼn Pedro te Jesús in tzaj tyekʼin kyximbʼetz xjal oʼkx in che ximen kyiʼjx. Pero ojtzqiʼntoq tuʼn Jesús qa junxitl te Jehová t-ximbʼetz. Tuʼnju bʼiʼntoq tuʼn qa tajtoq Tman tuʼn tbʼaj tbʼinchaʼn tten aj tok bʼinchaʼn  nya bʼaʼn tiʼj ex aj tkyim. Kyuʼn tyol Jesús in nel qnikʼ tiʼj qa ax ikx te el tikʼun aju kyximbʼetz xjal tuʼnju ax t-ximbʼetz ten ik tzeʼn te Ttat.

3. ¿Tiquʼn kwest tuʼn tel qikʼen kyximbʼetz xjal ex tuʼn tten qximbʼetz ik tzeʼn te Jehová?

³ ¿Ikpe qximbʼetz ik tzeʼn te Jehová moqa ik tzeʼn kye xjal mintiʼ in che ajbʼen te? Qʼuqli qkʼuʼj tiʼj qa ya in che japun tkawbʼil Jehová quʼn toj qanqʼibʼil. Noqtzun tuʼnj, ¿axpe qximbʼetz at kyiʼj tiʼchaq ik tzeʼn te? Tuʼn tbʼant jlu il tiʼj tuʼn tok tilil quʼn. Pero tuʼn tten qximbʼetz ik tzeʼn kye xjal, nya il tiʼj tuʼn tok tilil quʼn tuʼnju noq jaxku tumel at nya bʼaʼn (Efes. 2:2). Ax ikx jaku kubʼ qiʼj tuʼn kyximbʼetz xjal mintiʼ in che ajbʼen te Jehová, tuʼnju in nok tilil kyuʼn tuʼn qximen oʼkx qiʼj. Tuʼn jlu in nel qnikʼ tiʼj qa kwest tuʼn tten qximbʼetz ik tzeʼn te Jehová, pero nya kwest tuʼn tten qximbʼetz ik tzeʼn kye xjal.

4. a) ¿Tiʼ kbʼajel qa ma txi qqʼoʼn ambʼil tuʼn tchʼexpaj qximbʼetz kyuʼn xjal? b) ¿Tzeʼn kʼonil xnaqʼtzbʼil lu qiʼj?

⁴ Qa ma txi qqʼoʼn ambʼil tuʼn tchʼexpaj qnabʼil kyuʼn xjal, tuʼn jlu jaku qo ximen tiʼj qex qajbʼil ex mi aʼl jun jaku tzaj qʼamante alkye bʼaʼn ex nya bʼaʼn (Mar. 7:21, 22). Tuʼntzunju, il tiʼj tuʼn qximen ik tzeʼn te Jehová ex nya ik tzeʼn kye xjal. Kʼonil xnaqʼtzbʼil qiʼj tuʼn tbʼant jlu quʼn. Ax ikx kʼelel qnikʼ tiʼj tiquʼn qʼuqli qkʼuʼj tiʼj qa tzul tbʼanel qe qa ma ten qximbʼetz ik tzeʼn te Jehová ex mintiʼ in nel tiʼn jlu tkyaqil tzaqpibʼil qe. Ax ikx qo xnaqʼtzal tiʼj tzeʼn tuʼn miʼn txi qqʼoʼn ambʼil tuʼn tchʼexpaj qximbʼetz tuʼn kynabʼil xjal. Toj juntl xnaqʼtzbʼil kʼelel qnikʼ tiʼj tzeʼn jaku tzʼok qximbʼetz ik tzeʼn te Jehová kyiʼj junjun tiʼchaq.

5. ¿Tiquʼn mintiʼ in xi kyqʼoʼn junjun xjal ambʼil tuʼn tchʼexpaj kyximbʼetz kyuʼn txqantl?

⁵ At junjun mintiʼ in xi kyqʼoʼn ambʼil tuʼn tbʼaj chʼexpuʼn kyximbʼetz kyuʼn txqantl. In tzaj kyqʼamaʼn jlu: «Nya waje tuʼn t-ximen juntl wiʼje». Bʼalo kyaj tuʼn ttzaj kyqʼamaʼn qa aʼyex che kbʼel ximente tiʼ kbʼantel kyuʼn ex ax tok jlu. Nya kyaj tuʼn tkawin juntl kyibʼaj ex kyaj tuʼn kyok te junxitl kywitz txqantl xjal. *

6. a) ¿Alkye tzaqpibʼil in tzaj tqʼoʼn Jehová qe? b) ¿Atpe tkyaqil tzaqpibʼil qe?

⁶ Qa ma ten qximbʼetz ik tzeʼn te Jehová, jaku tzʼok qeʼ qkʼuʼj tiʼj qa nya a t-xilen jlu qa ya mlay kubʼ qximen junjun tiʼchaq. Ex in tzaj tqʼamaʼn Xjan Uʼj qa «jatumel taʼ t-xew Jehová, atztzun taʼ tzaqpibʼil» (2 Corintios 3:17, TNM). Tzaqpiʼn qoʼ tuʼn tkubʼ qximen tzeʼn qmod ktel, aju qaj ex aju mas qgan. Iktzun tten o qo kubʼ tbʼinchaʼn Dios. Pero nya tuʼn jlu kbʼel qximen qa tzaqpiʼn qoʼ tiʼj tkyaqil (kjawil uʼjit 1 Pedro 2:16). Taj Jehová tuʼn qjyon onbʼil toj Tyol tuʼntzun tel qnikʼ tiʼj qa bʼaʼn moqa nya bʼaʼn jun tiʼ. ¿In nelpe tiʼn jlu tkyaqil ambʼil qe moqa in tzaj tiʼn tbʼanel?

7, 8. Qa ma ten qximbʼetz ik tzeʼn te Jehová, ¿tiquʼn in xi qqʼamaʼn qa mintiʼ in nel tiʼn tkyaqil ambʼil qe? Qʼamantza jun techel.

⁷ Qo yolin tiʼj jun techel. In nok tilil kyuʼn mambʼaj tuʼn t-xi kyqʼoʼn tbʼanel nabʼil kye kykʼwaʼl, ik tzeʼn tuʼn kyok te tbʼanel xjal, tuʼn tbʼant kyaqʼunan ex tuʼn kyximen kyiʼj txqantl. ¿In nelpe  kyiʼn mambʼaj tkyaqil ambʼil kye? Mintiʼ, noq oʼkx in chex kykawin tuʼntzun kytzalaj toj kyanqʼibʼil. Ajtzun kychʼiy kʼwaʼl ex aj kyex toj ja, kjawel kyjyoʼn tiʼ kbʼantel kyuʼn. Qa ma kubʼ kyximen tuʼn kyok lepeʼ tiʼj nabʼil xi qʼoʼn kye tuʼn kytat, tuʼn jlu mlaylo tzajxix kybʼis, mlay tzaj nya bʼaʼn kyiʼj ex mlay tzaj bʼajxix kykʼuʼj tuʼnju otoq jaw kyjyoʼn.

⁸ A Jehová jun tbʼanel mambʼaj ex taj tuʼn kytzalaj tkʼwaʼl (Is. 48:17, 18). Tuʼntzunju, in tzaj tqʼoʼn junjun kawbʼil qe tiʼj tzeʼn qmod ktel kyukʼil txqantl xjal. Aj tyolin kyiʼj jlu, in tzaj tqʼoʼn txokbʼil qe tuʼn tten ax qximbʼetz ik tzeʼn te ex tuʼn tok qqʼoʼn toklen aju in tzaj tqʼamaʼn. ¿In nelpe tiʼn jlu ambʼil qe tuʼn tkubʼ qximen junjun tiʼ? Mintiʼ. Sino mas in nel qnikʼ kyiʼj junjun tiʼchaq (Sal. 92:5; Prov. 2:1-5; Is. 55:9). Ax ikx, in nonin qiʼj tuʼn tjaw qjyoʼn qe tiʼchaq jaku qo tzalaj tuʼn ex in tzaj tqʼoʼn ambʼil tuʼn tjaw qskʼoʼn aju qgan (Sal. 1:2, 3). Qa ma ten qximbʼetz ik tzeʼn te Jehová tzul tiʼn tbʼanel qe.

9, 10. ¿Tiquʼn in xi qqʼamaʼn qa mas tbʼanel t-ximbʼetz Jehová twitzju kye xjal?

⁹ Qaj tuʼn tten qximbʼetz ik tzeʼn te Jehová tuʼnju mas tbʼanel t-ximbʼetz at kyiʼj tiʼchaq twitzju kye xjal. In tzaj kyqʼoʼn xjal junjun nabʼil tiʼj tzeʼn qmod jaku ten, tzeʼn che okel qyolin toj qja ex tzeʼn jaku qo tzalaj tiʼj aqʼuntl. Nim kyxol jlu junxitl kywitz t-ximbʼetz Jehová. Jun techel, in nok tilil kyuʼn tuʼn kyximen tiʼjju kyex kyajbʼil ex bʼaʼn in nela toj kywitz aju yaẍbʼil. At maj in xi kyqʼamaʼn kye mejebʼleʼn qa jaku bʼant tuʼn tkubʼ kypan kyibʼ noq tuʼn alkyexku tiʼ ex qa atzun jun tten tuʼn kytzalaj. ¿Maspe nim toklen aju in tzaj kyqʼamaʼn xjal toj ambʼil jaʼlo twitzju in tzaj tqʼamaʼn Tyol Dios?

¹⁰ Tqʼama Jesús jlu: «Kʼelel qnikʼ tiʼj jun xjal qa at tnabʼl, tuʼn tbʼinchbʼen» (Mat. 11:19). Maske o che etz akʼaj tiʼchaq kyuʼn xjal, pero mintiʼ o kanet tumel kyuʼn tuʼn tel kyiʼn tiʼchaq mintiʼ in qo tzalaj kyuʼn, ik tzeʼn qʼoj, aju ikʼbʼil tiʼj kyyajil xjal ex aju elqʼabʼil. Ax ikx in xi kyqʼoʼn ambʼil tuʼn kyyaẍin xjal. ¿Ope tzʼonin jlu tuʼn miʼn ttzaj nya bʼaʼn kyxol ja xjal, tuʼn miʼn ttzaj yabʼil kyiʼj ex tuʼn miʼn ttzaj junjuntl nya bʼaʼn? Mintiʼ. Ik tzeʼn o tzʼel kynikʼ nim xjal tiʼj, mas o tzaj nya bʼaʼn tuʼn. Atzun qeju okslal ik kyximbʼetz ik tzeʼn te Jehová, at mujbʼabʼil kyxol kyukʼil toj kyja, in che tzalaj tiʼj kyamiwbʼil kyukʼil erman twitz tkyaqil Txʼotxʼ ex mintiʼ in tzaj yabʼil kyiʼj tuʼnju in nel kypan kyibʼ tiʼj yaẍbʼil (Is. 2:4; Hech. 10:34, 35; 1 Cor. 6:9-11). Tuʼn jlu in nel qnikʼ tiʼj qa mas tbʼanel t-ximbʼetz Jehová twitzju kye xjal.

11. ¿Alqukʼil xi tqanin Moisés onbʼil ex tiʼ tzaj tuʼn jlu?

¹¹ El kynikʼ tmajen Dios tiʼj qa mas tbʼanel te Jehová tnabʼil twitzju kye xjal. Qo xnaqʼtzan tiʼjju bʼaj tiʼj Moisés. Xi tqanin te Jehová tuʼn tten jun tbʼanel tanmi maske otoq tzʼok tnabʼil «tuj tkyaqil ik tzaʼn kye aj Ejipt» (Hech. 7:22; Sal. 90:12). Ax ikx xi tqanin te tuʼn tel tnikʼ kyiʼj tbʼe (Éx. 33:13). Noq tuʼnju xi tqʼoʼn ambʼil te Jehová, bʼant tuʼn tonin Moisés tuʼn kyjapun twi t-ximbʼetz Dios. Ax ikx in tzaj tqʼamaʼn Xjan Uʼj qa ten nim qʼuqbʼil tkʼuʼj (Heb. 11:24-27).

12. ¿Jatumel jyon apóstol Pablo onbʼil tej tkubʼ t-ximen junjun tiʼ?

¹² Ax ikx te apóstol Pablo otoq tzʼetz nim t-xnaqʼtzbʼil, attoq nim tnabʼil ex bʼalo yolin toj kabʼe yol (Hech. 5:34; 21: 37, 39; 22:2, 3). Pero nya tuʼn jlu kubʼ tbʼinchaʼn qe tiʼchaq ik tzeʼn kye xjal kyximbʼetz, sino jyon onbʼil toj Tyol Dios (kjawil uʼjit Hechos 17:2; 1 Corintios 2:6, 7, 13). Noq tuʼnju bʼant jlu tuʼn, tzalaj tej tpakbʼan ex in nayontoq tuʼn ttzaj tkʼamoʼn tchwinqlal te jumajx (2 Tim. 4:8).

13. ¿Alkye at toklen tuʼn tkubʼ t-ximen qa ax t-ximbʼetz ktel ik tzeʼn te Jehová?

¹³ Qʼuqli qkʼuʼj tiʼj qa mas tbʼanel t-ximbʼetz Jehová twitzju kye xjal. Qa ma kubʼ qbʼinchaʼn aju in tzaj tqʼamaʼn Dios ok qo tzalajel ex tkyaqil kʼelel bʼaʼn toj qanqʼibʼil. Pero mintiʼ in qo ok tchqʼoʼn Jehová tuʼn qximen ik tzeʼn te. Mintiʼ in xqʼuqin «majen in bʼant taqʼun [...] ex at tnabʼl» tiʼjju in kubʼ qximen nix qe ansyan (Mat. 24:45; 2 Cor. 1:24). Teyele te junjun at toklen tuʼn tkubʼ t-ximen qa ik t-ximbʼetz ktel ik tzeʼn te Jehová. ¿Tzeʼn jaku bʼant quʼn?

14, 15. a) Tuʼn tten qximbʼetz ik tzeʼn te Jehová, ¿alqiʼj kʼokel qqʼoʼn qwiʼ? b) Ik tzeʼn in tzaj tqʼamaʼn Romanos 12:2, ¿tiquʼn mintiʼ tuʼn qok lepeʼ tiʼj kynabʼil xjal? Qʼamantza jun techel.

¹⁴ In tzaj tqʼamaʼn Jehová jlu qe toj Romanos 12:2: «Miʼn che ok lpeʼye tiʼj kynabʼl xjal mya bʼaʼn, noq oʼkx kychʼexpum kynabʼle tuʼn kyoke te akʼaj, tuʼntzun kyojtzqinteye alkye tajbʼil Dios, tuʼn tel kynikʼe tiʼj alkye bʼaʼn, ex alkye in tzalaj Dios tiʼj ex alkye ju tzʼaqlxix». In tzaj tyekʼin jlu qa jaku bʼant tuʼn tten qximbʼetz ik tzeʼn te Jehová, maske alkyexku tiʼ bʼaj chʼexpunte qximbʼetz tej naʼmxtoq tok qojtzqiʼn axix tok. Ax tok, atlo maj kwest tuʼn tchʼexpaj qximbʼetz tuʼnju tzeʼn qoʼ ex aju o tzikʼ toj qanqʼibʼil. Pero aju qnabʼil kukx jaku chʼexpaj. Jaku bʼant jlu noq tuʼnju alkye tiʼchaq in nokx qqʼoʼn toj qwiʼ. Qa atz in nok qqʼoʼn qwiʼ tiʼjju taj Jehová, kʼelel qnikʼ tiʼj qa toj tumel te t-ximbʼetz kyiʼj tiʼchaq. Aju tzul tuʼn jlu, ktel qajbʼil tuʼn qximen ik tzeʼn te Jehová.

¹⁵ Tuʼn tchʼexpaj qnabʼil tuʼn Jehová mintiʼ tuʼn t-xi qqʼoʼn ambʼil kye xjal tuʼn tbʼaj kychʼexpuʼn. Toj juntl yol, miʼn txi qqʼoʼn qwiʼ tiʼj kyyol xjal ex tiʼj kyximbʼetz aju ikʼun tuʼn Jehová. Atzun tnejelju tuʼn tbʼant quʼn. Tuʼn tel qnikʼ tiʼj, qo yolin tiʼj jun techel. Qo ximen tiʼj jun xjal in xi tzyet tuʼn twaʼn tiʼj tbʼanel wabʼj, in bʼant jlu tuʼn tuʼnju nya taj tuʼn ttzaj jun yabʼil tiʼj. ¿Jakupe tzʼonin tiʼj t-ximlal qa kukx ma waʼn tiʼj nya bʼaʼn wabʼj? Mlay. Ax jlu jaku bʼaj qiʼj, qa in nok tilil quʼn tuʼn tten qximbʼetz ik tzeʼn te Jehová pero qa kukx in nok qqʼoʼn qwiʼ tiʼj kyximbʼetz xjal, mlay tzʼonin qiʼj.

16. ¿Alqiʼj il tiʼj tuʼn tok qxqʼuqin qibʼ?

¹⁶ Tuʼnju in qo anqʼin kyxol xjal ateʼ tjaqʼ tkawbʼil Tajaw il kwest tuʼn miʼn t-xi qbʼiʼn kyyol (1 Cor. 5:9, 10). Aj in qo ex pakbʼal in nok qbʼiʼn aju nya ax tok nimen kyuʼn. Aj tok qbʼiʼn kyximbʼetz xjal ex mintiʼ tumel tuʼn qel oq tiʼj, noqtzun tuʼnj, mintiʼ tuʼn qximen kyiʼj jlu ex mintiʼ tuʼn ttzaj qnaʼn. Ik tzeʼn bʼant tuʼn Jesús, ax ikx qe il tiʼj tuʼn tel qikʼun naj qe ximbʼetz taj Satanás tuʼn tokx qqʼoʼn toj qwiʼ. Ax ikx jaku bʼant tuʼn tok qxqʼuqin qibʼ tiʼjju kyximbʼetz xjal. Qo xnaqʼtzan tiʼj tzeʼn jaku bʼant quʼn (kjawil uʼjit Proverbios 4:23).

17. ¿Tiʼ il tiʼj tuʼn tbʼant quʼn tuʼn tok qxqʼuqin qibʼ tiʼjju kyximbʼetz xjal?

¹⁷ Jun techel, il tiʼj tuʼn tten qnabʼil aj tjaw qjyoʼn qe qamiw. In tzaj tqʼamaʼn Tyol Dios, qa ma tzʼok qamiwin qibʼ kyukʼil xjal mintiʼ in che ajbʼen te Jehová, qo okel ik tzeʼn kye (Prov. 13:20;  1 Cor. 15:12, 32, 33). Ax ikx nim toklen tuʼn tel qnikʼ tiʼj alkye qsaqchbʼil kjawil qjyoʼn. Qa ma tzʼel qikʼen aju xnaqʼtzbʼil qa atz tzajni qoʼ kyiʼj maẍ, aju bʼiybʼil ex aju yaẍbʼil, kʼonil jlu tuʼn miʼn tbʼaj qtzʼilsaʼn qnabʼil tukʼil kyximbʼetz xjal «in che qʼojl tiʼj tyol Dios» (2 Cor. 10:5).

18, 19. a) ¿Tiquʼn il tiʼj tuʼn tok qxqʼuqin qibʼ tiʼj kyximbʼetz xjal? b) ¿Alkyeqe xjel il tiʼj tuʼn tkubʼ qxjelin ex tiquʼn?

¹⁸ Nim toklen tuʼn tel qikʼen ex tuʼn tel qnikʼ tiʼj kyximbʼetz xjal mas qa nyaxix qʼanchaʼlqe. Jun techel, bʼalo in tzaj qʼamaʼn jun tqanil kyiʼj aj kawil ex jakulo tzʼok kyqʼoʼn txqantl te tbʼanel. Ax ikx jaku tzʼetz qʼamaʼn tqanil tiʼjju otoq bʼant tuʼn jun xjal ex in tzaj kyqʼamaʼn qa bʼaʼn tuʼn tok tilil kyuʼn txqantl tuʼn tbʼant ax jlu kyuʼn. In tzaj qʼamaʼn kyoj junjun película ex kyoj junjun uʼj qa tbʼanel tuʼn tkubʼ qximen qa mas nim qoklen ex qe toj qja. Pero junxitl ximbʼetz lu tukʼilju in tzaj t-xnaqʼtzaʼn Tyol Dios, tuʼnju in tzaj tqʼamaʼn qa jaku qo tzalaj ex jaku che tzalaj toj qja qa ma tzʼok qkʼujlaʼn Jehová tnejel twitz alkyexku juntl tiʼ (Mat. 22:36-39). Ex ateʼ junjun txʼolbʼabʼil kye kʼwaʼl, at maj mintiʼ jun nya bʼaʼn tqanil qʼiʼn tuʼn, pero chebʼe chebʼe in nokx tqʼoʼn nya bʼaʼn toj kywiʼ kʼwaʼl aju jaku kubʼ kybʼinchaʼn nya bʼaʼn tuʼn.

¹⁹ Nya a t-xilen jlu qa mlay qo tzalaj kyiʼj tbʼanel saqchbʼil. Pero bʼaʼn tuʼn tkubʼ qxjelin jlu: «¿In nelpe nnikʼe tiʼj nya bʼaʼn kyximbʼetz xjal maske nya qʼanchaʼlqe? ¿In xi nqʼamaʼne tiʼ jaku tzʼok kykeʼyin ex tiʼ jaku jaw kyuʼjin nkʼwaʼle? ¿In bʼantpe weye wuʼn? ¿In xi nxnaqʼtzaʼne kye nkʼwaʼle alkye bʼaʼn toj twitz Jehová tuʼntzun tel kyikʼun kyximbʼetz xjal?». Qa ma tzʼel qnikʼ tiʼj qa junxitl qe t-ximbʼetz Jehová twitzju kye xjal, tuʼn jlu mlay chʼexpaj qximbʼetz tuʼn «kynabʼl xjal mya bʼaʼn».

20. ¿Tzeʼn kʼelel qnikʼ tiʼj qa a Jehová in bʼaj chʼexpunte qximbʼetz moqa aʼye xjal?

²⁰ Bʼaʼn tuʼn ttzaj qnaʼn qa jaku chʼexpaj qximbʼetz tuʼn Jehová moqa tuʼnju tokx tjaqʼ tkawbʼil Satanás. Noq alqe kxel qqʼoʼn ambʼil, atzun kbʼajel chʼexpunte qximbʼetz. Qa ma txi qqʼoʼn ambʼil te kyximbʼetz xjal, ax qximbʼetz ktel ik tzeʼn kye. Tuʼntzunju nim toklen tuʼn tok qxqʼuqin qibʼ tiʼjju in nok qkeʼyin, tiʼjju in jaw quʼjin, tiʼjju in nok qbʼiʼn ex tiʼjju in kubʼ qximen.

21. ¿Alkye juntl tiʼ nim toklen qo yolil tiʼj toj juntl xnaqʼtzbʼil?

²¹ Ik tzeʼn ma qo xnaqʼtzan tiʼj, qa ma qo ximen ik tzeʼn te Jehová nya oʼkx kʼelel qikʼun qe tiʼchaq in bʼaj tzʼilsante qnabʼil. Nim toklen tuʼn tokx qqʼoʼn qe t-ximbʼetz Jehová toj qwiʼ, iktzun tten jaku tzʼok qnabʼil ik tzeʼn te. Toj juntl xnaqʼtzbʼil kʼelel qnikʼ tiʼj tzeʼn jaku bʼant quʼn.