1, 2. Aj qchʼiy toj qokslabʼil, ¿tiʼ in nel qnikʼ tiʼj? Qʼamantza jun techel.

AJ T-XI qʼoʼn jun oyaj te jun kʼwaʼl, in xi kyqanin tman te: «¿Tiʼ in xi qqʼamaʼn?», in xi ttzaqʼweʼn kʼwaʼl, «chjonte». In bʼant jlu tuʼn kʼwaʼl tuʼnju in xi qʼamaʼn te kyuʼn tman. Aj tchʼiy kʼwaʼl, in nel tnikʼ tiʼj tiquʼn xi kyqʼamaʼn tman te qa il tiʼj tuʼn tbʼant jlu tuʼn. Mi jun kxel qʼamante te tuʼn t-xi tqʼoʼn chjonte, tuʼnju atz in jatz toj tanmi. ¿Tiquʼn in bʼant jlu tuʼn? Tuʼnju o bʼant t-ximen ik tzeʼn kye tman ex tuʼn tqʼon chjonte.

² Axju in bʼaj aj tok qojtzqiʼn axix tok, in nel qnikʼ tiʼj tiquʼn nim toklen tuʼn kyjapun junjun tkawbʼil Jehová quʼn aʼyeju in che tzaj tqanin qe. Pero aj qchʼiy toj qokslabʼil, in nel mas qnikʼ kyiʼj t-ximbʼetz Jehová: tiʼjju bʼaʼn ex tiʼjju nya bʼaʼn in nela toj twitz ex tiʼ t-ximbʼetz at kyiʼj junjun tiʼchaq. Aj in nel qnikʼ kyiʼj junjun tiʼchaq ik tzeʼn te Jehová ex in xi qqʼoʼn ambʼil te tuʼn tonin qiʼj aj tkubʼ qximen ex aj tkubʼ qbʼinchaʼn jun tiʼ, tuʼn jlu in kubʼ qyekʼin qa in nok qximbʼetz ik tzeʼn te.

3. ¿Tiquʼn at maj kwest tuʼn tten qximbʼetz ik tzeʼn te Jehová?

³ In qo tzalaj aj in nok tilil quʼn tuʼn tten qximbʼetz ik tzeʼn te Jehová, noqtzun tuʼnj at maj kwest tuʼn tbʼant quʼn tuʼnju aj il qoʼ. Jun techel, at maj mintiʼxix in nel qnikʼ tiʼj tiʼ t-ximbʼetz Jehová at kyiʼj junjun tiʼchaq ik tzeʼn tuʼn tten qximbʼetz saq, tiʼj qʼinumabʼil, tiʼj pakbʼabʼil ex tiʼjju tuʼn tajbʼen chikʼ  kyuʼn xjal. ¿Tiʼ kʼonil qiʼj tuʼn tten qximbʼetz ik tzeʼn te Jehová? Ex ¿alkye tten kʼonil jlu qiʼj toj ambʼil jaʼlo ex toj ambʼil tzul aj tkubʼ qximen jun tiʼ?

4. ¿Tiʼ t-xilen tuʼn tok qximbʼetz te akʼaj?

⁴ (Kjawil uʼjit Romanos 12:2). Tzalu in tzaj tqʼamaʼn apóstol Pablo tiʼ il tiʼj tuʼn tbʼant quʼn tuʼntzun tten qximbʼetz ik tzeʼn te Jehová. Ik tzeʼn tzaj tyekʼin xnaqʼtzbʼil ma kyaj, tuʼn miʼn tchʼexpaj qnabʼil kyuʼn «xjal mya bʼaʼn», il tiʼj tuʼn tel qikʼun kyximbʼetz ex kymod. Ax ikx tqʼama Pablo qa nim toklen tuʼn tok qximbʼetz te akʼaj. Tuʼn tbʼant jlu, nim toklen tuʼn qxnaqʼtzan tiʼj Tyol Dios ex tuʼn qximen tiʼj tuʼntzun tel qnikʼ tiʼj t-ximbʼetz Jehová ex iktzun tten jaku tzʼok qximbʼetz ik tzeʼn te.

5. ¿Tiquʼn junxitl aju tuʼn qxnaqʼtzan twitzju tuʼn tjaw quʼjin jun tiʼ?

⁵ Tuʼn qxnaqʼtzan nya oʼkx tuʼn tkubʼ quʼjin jun tiʼ ex qa tuʼn tok qqʼoʼn techel junjun tzaqʼwebʼil. Aj qxnaqʼtzan, in qo ximen tiʼj tiʼ in tzaj tqʼamaʼn qe tiʼj Jehová, tiʼj t-ximbʼetz ex tiʼj tzeʼn in che bʼant junjun tiʼchaq tuʼn. In nok tilil quʼn tuʼn tel qnikʼ tiʼj tiquʼn in tzaj tqʼamaʼn qa tbʼanel junjun tiʼchaq ex junjuntl nya bʼaʼn. Ax ikx nim toklen tuʼn qximen kyiʼj chʼixpubʼil kbʼantel quʼn toj qanqʼibʼil ex tiʼj qximbʼetz. Atlo maj mlay bʼant tuʼn qximen tiʼj tkyaqil jlu aj qxnaqʼtzan. Tuʼntzunju, tbʼanel qa ma qo ximen jun rat tiʼjju in jaw quʼjin, bʼalo mij tiʼjju ambʼil in nok qqʼoʼn aj qxnaqʼtzan (Sal. 119:97; 1 Tim. 4:15).

6. ¿Tiʼ in bʼaj aj qximen kyiʼj t-ximbʼetz Jehová?

⁶ Qa naqʼli qoʼ tuʼn qximen tiʼjju in jaw quʼjin toj Tyol Dios, in bʼaj jun tiʼ tbʼanel qiʼj. In nel qnikʼ tiʼj moqa in nok qeʼ qkʼuʼj tiʼj qa tzʼaqli qe t-ximbʼetz Jehová. Tuʼn jlu in nel qnikʼ tiʼj tiʼ t-ximbʼetz at kyiʼj junjun tiʼchaq ex in ten qximbʼetz ik tzeʼn te. Aj tok qnabʼil te akʼaj ax ikx in chʼexpaj qximbʼetz. Chebʼe chebʼe in bʼant qximen ik tzeʼn te Jehová.

7, 8. a) ¿Tiʼ t-ximbʼetz Jehová at tiʼj qʼinumabʼil? (Qʼonka twitza kyiʼj tnejel tilbʼilal). b) Qa ma ten qximbʼetz ik tzeʼn te, ¿tiʼ kbʼel qqʼoʼn tnejel toj qanqʼibʼil?

⁷ At toklen aju in kubʼ qximen tukʼilju in bʼant quʼn, nya oʼkx tukʼilju in qnaʼn (Mar. 7:21-23; Sant. 2:17). Qqʼonku junjun techel tuʼntzun tel qnikʼ tiʼj. Tnejel, aju t-ximbʼetz Jehová at tiʼj qʼinumabʼil. In tzaj kyyekʼin uʼj in che yolin tiʼj tanqʼibʼil Jesús tiʼ t-ximbʼetz at tiʼj jlu. Ximen Jehová tiʼj alkye tuʼn kyok te tman Jesús, jaw tjyoʼn jun mejebʼleʼn mintiʼxix tiʼchaq at kye (Lev. 12:8; Luc. 2:24). In tzaj tqʼamaʼn Xjan Uʼj tiʼ bʼant tuʼn María tej tul itzʼj Jesús, «kubʼ tkoẍbʼaʼn tuj twabʼl chej, porke mintiʼ knet kyposad tuj mesón» (Luc. 2:7). Jakutoq bʼant tuʼn t-xi tjyoʼn Jehová jatumel tuʼn tul itzʼj Tkʼwaʼl. Pero nya a jlu mas nim toklen toj twitz, sino aju tuʼn tchʼiy Tkʼwaʼl toj jun ja xjal in kubʼ kyqʼoʼn tajbʼil Jehová tnejel.

⁸ Tuʼn jlu in nel qnikʼ tiʼj tiʼ t-ximbʼetz Jehová at tiʼj qʼinumabʼil. At junjun tatbʼaj in nok tilil kyuʼn tuʼn t-xi kyqʼoʼn aju mas tbʼanel te kykʼwaʼl, maske in tzaj nya bʼaʼn tiʼj kyamiwbʼil kykʼwaʼl tukʼil Jehová. Noqtzun tuʼnj, in nel qnikʼ tiʼj qa aju mas nim toklen te Jehová aju qamiwbʼil tukʼil. ¿Yajtzun qe? ¿Ope tzʼok qximbʼetz ik tzeʼn te? ¿Tzeʼn qe qbʼinchbʼen? (Kjawil uʼjit Hebreos 13:5).

9, 10. ¿Tzeʼn in kubʼ qyekʼin qa ik qximbʼetz ik tzeʼn te Jehová tiʼjju tuʼn tkubʼ qqʼoʼn jun tolsabʼil kywitz txqantl?

 ⁹ Aju tkabʼ techel, aju tuʼn tkubʼ qqʼoʼn tolsabʼil kywitz txqantl. ¿Tiʼ t-ximbʼetz Jehová tiʼj jlu? Tqʼama Jesús jlu: «Qa at jun xjal ma kubʼ tzʼaq jun tal chʼin tuʼn tuj il, aju kyxol qeju okslal wiʼje, mas bʼaʼn tuʼn tok kʼalet jun ma tij kyaʼ tiʼj tqul xjal ex tuʼn tkuʼx xoʼt tuj mar» (Mar. 9:42). In tzaj tyekʼin jlu qa jun il toj twitz Jesús. Tuʼnju kubʼ tyekʼin tmod Tman toj jun tten tzʼaqli, jaku tzʼok qeʼ qkʼuʼj tiʼj qa ax ikx jun il toj twitz Jehová qa at jun xjal ma kubʼ tqʼoʼn jun tolsabʼil twitz jun t-xnaqʼtzbʼen Jesús (Juan 14:9).

¹⁰ ¿Ikpe qximbʼetz ik tzeʼn te Jehová ex Jesús? ¿Tiʼ in kubʼ kyyekʼin qbʼinchbʼen? Qo ximen tiʼj qa qgan tuʼn tbʼaj qxbʼalumin qibʼ toj jun tten nya bʼaʼn in nela toj kywitz junjun erman ex qa in ten nya bʼaʼn kyximbʼetz tuʼn. ¿Tiʼ kbʼantel quʼn? ¿Okpe kʼonil qkʼujlabʼil at kyiʼj erman tuʼn miʼn qximen oʼkx qiʼjx? (1 Tim. 2:9, 10).

11, 12. Qa ma qjakʼunte qibʼ ex qa ma ten qximbʼetz ik tzeʼn te Jehová tiʼjju nya bʼaʼn, ¿tzeʼn in nonin jlu tuʼn miʼn qbʼinchan il?

¹¹ Aju toxin techel, in nel tikʼun Jehová aju nya tzʼaqli ex aju nya bʼaʼn (Is. 61:8). Ojtzqiʼn tuʼn Jehová qa at nya bʼaʼn qximbʼetz tuʼnju aj il qoʼ, pero in tzaj tqʼamaʼn qe tuʼn tel qikʼun nya bʼaʼn ik tzeʼn te in bʼant tuʼn (kjawil uʼjit Salmo 97:10). Aj qkubʼ ten ximel tiʼj tiquʼn in nel tikʼun Jehová aju nya bʼaʼn, kʼonil jlu qiʼj tuʼn tten qximbʼetz ik tzeʼn te ex tuʼn ttzaj tqʼoʼn mas qipumal tuʼn tel qikʼun.

¹² Qa ma ten qximbʼetz ik tzeʼn te Jehová tiʼj nya bʼaʼn, kʼonil jlu qiʼj tuʼn tel qnikʼ tiʼj qa at junjun bʼinchbʼen nya bʼaʼn maske mintiʼ in tzaj tqʼamaʼn Tyol Dios. Jun techel, at jun bʼixbʼil nya bʼaʼn kyaj xjal tuʼn tok ojtzqiʼn aju lap dance tbʼi. In tzaj kyqʼamaʼn junjun xjal qa bʼaʼn bʼixbʼil lu porke nya ax ik tzeʼn tuʼn tyaẍin jun xjal. * Noqtzun tuʼnj, ¿axpe t-ximbʼetz Jehová tiʼj jlu? Bʼaʼn tuʼn ttzaj qnaʼn qa in nel tikʼun alkyexku nya bʼaʼn. Tuʼntzunju, il tiʼj tuʼn qel laqʼeʼ tiʼj il ex jaku bʼant jlu quʼn aj qjakʼunte qibʼ ex aj tel qikʼun aju ikʼun tuʼn Jehová (Rom. 12:9).

13. ¿Tiquʼn il tiʼj tuʼn qximen jaʼlo tiʼj tiʼ t-ximbʼetz Jehová at tiʼj junjun tiʼ?

¹³ Aj qxnaqʼtzan, bʼaʼn tuʼn qximen tiʼj jaʼlo tzeʼn jaku che onin t-ximbʼetz Jehová qiʼj aj tkubʼ qximen jun tiʼ toj ambʼil tzul. Iktzun tten, aj qok weʼ twitz jun nya bʼaʼn jatumel il tiʼj tuʼn tkubʼ qximen naj jun tiʼ, jaku kanet jun tumel quʼn tuʼn qex twitz nya bʼaʼn (Prov. 22:3). Qo xnaqʼtzan tiʼj junjun techel toj Tyol Dios.

14. ¿Tiʼ xnaqʼtzbʼil jaku tzʼel qiʼn tiʼj tmod José kubʼ tyekʼin tej tajtoq t-xuʼjil Potifar tuʼn tkubʼ ten tukʼil?

¹⁴ Qo ximen tiʼjju bʼaj tiʼj José. Tajtoq t-xuʼjil Potifar tuʼn tkubʼ ten tukʼil, pero el oq naj tiʼj. Iktzun tten kubʼ tyekʼin José qa otoq tzʼel tnikʼ tiʼj tiʼ t-ximbʼetz Jehová at tiʼjju tuʼn kyten mejebʼleʼn tzʼaqli (kjawil uʼjit Génesis 39:8, 9). Xi ttzaqʼweʼn jlu te t-xuʼjil Potifar: «¿Tzaʼntzun tten tuʼn nbʼinchanteye  matij il lu ex tuʼn nbʼinchanteye il twitz Dios?». Tuʼn jlu in nel qnikʼ tiʼj qa ten t-ximbʼetz ik tzeʼn te Jehová. Atzun jaʼlo qo ximen qiʼj. Qa at jun qukʼil toj aqʼuntl in kubʼ tyekʼin tgan qiʼj, ex in tzaj tsamaʼn jun tqanil moqa jun tilbʼilal toj qyolbʼil aju at toklen tukʼil yaẍbʼil. * Tuʼn qten tzʼaqli twitz Jehová kyoj ambʼil aju, il tiʼj tuʼn qximen jaʼlo tiʼj tzeʼn in che ela tiʼchaq lu toj twitz. Ax ikx in ten qnabʼil ik tzeʼn te ex tuʼn jlu jaku kubʼ qximen tiʼ kbʼantel quʼn toj ambʼil tzul.

15. Ik tzeʼn bʼant kyuʼn oxe kuʼxun lu, ¿tiʼ jaku bʼant quʼn tuʼntzun kukx qten tzʼaqli twitz Jehová?

¹⁵ Atzun jaʼlo qo yolin kyiʼj oxe kuʼxun hebreo aju ok qʼoʼn kybʼi te Sadrac, Mesac ex Abednego. Jaw tbʼinchaʼn aj kawil Nabucodonosor jun tilbʼilal qʼan kʼuxbʼil ex tqʼama tuʼn kykʼulin xjal twitz. Pero mintiʼ e kubʼ ten kuʼxun lu kʼulil twitz. Tuʼn tzaqʼwebʼil xi kyqʼoʼn te aj kawil in nel qnikʼ tiʼj qa otoq che ximen tiʼj t-ximbʼetz Jehová at tiʼjju tuʼn qten tzʼaqli twitz (Éx. 20:4, 5; Dan. 3:4-6, 12, 16-18). Qo ximen tiʼj qa ma tzaj tqanin nejenel toj aqʼuntl qe tuʼn t-xi qqʼoʼn pwaq tiʼj jun ninqʼij at toklen tukʼil okslabʼil nya ax tok. ¿Tiʼ kbʼantel quʼn? Mintiʼ tuʼn qayon tuʼn tbʼaj jlu, sino nim toklen tuʼn qximen jaʼlo tiʼj tiʼ t-ximbʼetz Jehová at kyiʼj tiʼchaq lu. Qa ma bʼant jlu quʼn, kʼonil qiʼj tuʼn t-xi qtzaqʼweʼn toj tumel ex tuʼn tkubʼ qbʼinchaʼn aju bʼaʼn ik tzeʼn bʼant kyuʼn oxe kuʼxun hebreo.

16. Qa ma tzʼel qnikʼ tiʼj t-ximbʼetz Jehová jaʼlo, ¿tzeʼn kʼonil jlu qiʼj aj ttzaj jun yabʼil qiʼj aju mintiʼ ximen quʼn?

¹⁶ Qa ma qo ximen jaʼlo tiʼjju tuʼn qten tzʼaqli twitz Jehová, kʼonil qiʼj aj ttzaj jun yabʼil qiʼj aju mintiʼ ximen quʼn. O kubʼ qximen tuʼn miʼn tok chikʼ qiʼj nix qeju kyaje tiʼ nim kyoklen in che jatz toj (Hech. 15:28, 29). Pero at junjuntl tiʼchaq at toklen tukʼil chikʼ aju teyele te junjun kbʼel t-ximen tiʼ kbʼantel tuʼn. Tuʼn tel qnikʼ tiʼj, nim toklen tuʼn qxnaqʼtzan tiʼj junjun nabʼil tkuʼx toj Xjan Uʼj tuʼntzun toj qojtzqiʼn t-ximbʼetz Jehová. Pero nya tzmaxi toj spital kbʼel qximen jlu, qa atoʼ toj kʼixkʼoj ex il tiʼj tuʼn tkubʼ qximen naj tiʼj kbʼantel quʼn.  Il tiʼj tuʼn qjyon tqanil naʼmxtoq ttzaj nya bʼaʼn qiʼj, bʼaʼn tuʼn tkubʼ qtzʼibʼin toj jun uʼj aju qaj tuʼn tok bʼinchaʼn qiʼj ex tuʼn qyolin kyukʼil aj qʼanil. *

17-19. ¿Tiquʼn nim toklen tuʼn tel qnikʼ kyiʼj t-ximbʼetz Jehová jaʼlo? Qʼamantza jun techel tiʼjju jatumel il tiʼj tuʼn tbʼaj qbʼinchaʼn qten.

¹⁷ Te bʼajsbʼil, qo ximen tiʼj tzaqʼwebʼil xi tqʼoʼn Jesús tej t-xi tqʼoʼn Pedro nya bʼaʼn nabʼil lu te: «Tat, [...] ku chiwt tuʼn miʼn ttzaj jlu tiʼja». Tuʼn jlu in nel qnikʼ tiʼj qa otoq ximen Jesús tiʼjju tajtoq Jehová tuʼn tbʼant tuʼn, ax ikx ximen kyiʼj yol e kyaj qʼamaʼn tiʼj ex tiʼjju tuʼn tkyim tzalu twitz Txʼotxʼ. Onin jlu tiʼj Jesús tuʼn kukx tajbʼen te Jehová ex tuʼn t-xi tqʼoʼn tchwinqlal kyiʼj xjal (kjawil uʼjit Mateo 16:21-23).

¹⁸ Toj ambʼil jaʼlo taj Jehová tuʼn qok te tamiw ex tuʼn tok tilil quʼn toj qajbʼebʼil te (Mat. 6:33; 28:19, 20; Sant. 4:8). Pero jakulo tzikʼ qiʼj aju bʼaj tiʼj Jesús, bʼalo jaku tzaj tqʼamaʼn jun xjal jun tiʼ qe ex tuʼn jlu ya mlay tzʼok qqʼoʼn qwiʼ tiʼj qajbʼebʼil te Jehová. Jun techel, qo ximen tiʼj qa ma tzaj tqʼoʼn nejenel toj aqʼuntl juntl qoklen ex mas twi qkʼuʼj tzul qʼoʼn. Noqtzun tuʼnj, tuʼnju jlu ya miʼn tentl ambʼil qe tuʼn qajbʼen te Jehová. Qa tzma kuʼxun teya, ximana tiʼj qa ma tzaj qʼoʼn ambʼil teya tuʼn t-xnaqʼtzana mas ex tuʼn jlu kxela toj juntl lugar. ¿Ape ambʼil lu tuʼn t-xi tqanina onbʼil te Jehová, tuʼn tjyona onbʼil kyoj quʼj, tuʼn tyolina kyukʼil toj tjaya, kyukʼil ansyan ex tuʼn tkubʼ t-ximana jun tiʼ? Nya a ambʼil lu. Mas bʼaʼn qa ma jyona tiʼj tqanil jaʼlo tuʼntzun tel tnikʼa tiʼj tiʼ t-ximbʼetz Jehová at ex tuʼn tok tilil tuʼna tuʼn t-ximana ik tzeʼn te. Qa ma qo ok weʼ kywitz nya bʼaʼn ik tzeʼn jlu toj ambʼil tzul, mlay tzʼok jlu te jun joybʼil qiʼj. Kʼelel qnikʼ tiʼj tiʼ qaj tuʼn tbʼant quʼn toj qajbʼebʼil te Jehová ex kʼokel tilil quʼn tbʼant. Okx kbʼel qbʼinchaʼn aju ojtzqiʼn quʼn qa bʼaʼn.

¹⁹ Bʼalo in nul juntl tiʼ toj qwiʼ aju jaku bʼaj qiʼj. Noqtzun tuʼnj, mlay bʼaj qbʼinchaʼn qten kyiʼj kykyaqil nya bʼaʼn in che kubʼ qximen. Pero qa ma qo ximen kyiʼj t-ximbʼetz Jehová aj qxnaqʼtzan, jakulo tzʼonin qiʼj tuʼn ttzaj qnaʼn aju o kubʼ qxnaqʼtzaʼn ex tuʼn tajbʼen quʼn aj qok weʼ twitz nya bʼaʼn. Tuʼntzunju, tzʼok tilil quʼn tuʼn tok qojtzqiʼn t-ximbʼetz Jehová, tuʼn tten ax qximbʼetz ik tzeʼn te, tuʼn tel qnikʼ tiʼj tzeʼn kʼonil qiʼj toj ambʼil jaʼlo ex toj ambʼil tzul aj tjaw qjyoʼn jun tiʼ.

20, 21. a) ¿Tiquʼn mlay ten tkyaqil tzaqpibʼil qe toj akʼaj twitz Txʼotxʼ? b) Maske mintiʼ tkyaqil tzaqpibʼil qe jaʼlo, ¿tzeʼn jaku qo tzalaj?

²⁰ Qaj tuʼn tul akʼaj twitz Txʼotxʼ. Chʼixme qkyaqilx in qo ayon tuʼn qanqʼin te jumajx toj Tbʼanel Najbʼil tzalu twitz Txʼotxʼ. Kʼelel tiʼn Tkawbʼil Dios tkyaqil nya bʼaʼn in tzaj qiʼj jaʼlo ex tkyaqilju tokx tjaqʼ tkawbʼil Satanás. Axpe ikx tzul qʼoʼn ambʼil qe toj akʼaj twitz Txʼotxʼ tuʼn tkubʼ qximen junjun tiʼ ex tuʼn tjaw qjyoʼn aju qaj ex aju mas qgan.

²¹ Miʼn ten tkyaqil tzaqpibʼil qe toj Tbʼanel Najbʼil. Aʼyeju tbʼanel xjal che anqʼil toj ambʼil aju, che ajbʼel tkawbʼil Jehová kyuʼn ex qeju t-ximbʼetz tuʼn tel kynikʼ tiʼj alkye bʼaʼn ex nya bʼaʼn. Nim tzalajbʼil ex mujbʼabʼil ktel toj ambʼil aju (Sal. 37:11). Mintiʼ tkyaqil tzaqpibʼil qe jaʼlo pero jaku qo tzalaj qa ma ten qximbʼetz ik tzeʼn te Jehová.