QKYAQILX in xi qqʼoʼn chjonte kye txqantl aj kyximen ex aj tel kynikʼ qiʼj. Qa ikju, ¿tiʼ jaku bʼant quʼn tuʼn tkubʼ qyekʼin qmod lu kyukʼil txqantl?

Aj tajbʼen yol tuʼn qbʼinchante xtalbʼil moqa tuʼn tkubʼ qyekʼin tbʼanel qmod tuʼn Tyol Dios, atz in yolin tiʼj tuʼn qximen tiʼjju at tajbʼen kye txqantl ex in nel jlu toj qʼanchaʼl kyuʼn tbʼanel qyol ex qbʼinchbʼen. Aju tuʼn qbʼinchante xtalbʼil, nya oʼkx in yolin tiʼj tuʼn qok te tbʼanel xjal ex tuʼn tten tbʼanel qmod. Ax ikx in yolin tiʼj qa in kubʼ qyekʼin tbʼanel qmod tuʼnju at qkʼujlabʼil ex in nel qnikʼ kyiʼj txqantl. Ex aju mod lu, atzun jun kyxol qeju in tzaj tqʼoʼn xewbʼaj xjan ex il tiʼj tuʼn tkubʼ kyyekʼin tmajen Jehová (Gál. 5:22, 23). Tuʼntzunju, qo qxnaqʼtzan tiʼj tzeʼn o kubʼ tyekʼin Jehová ex Jesús aju mod lu ex tzeʼn jaku tzʼel qkanoʼn techel in kubʼ kyqʼoʼn.

Aju tuʼn qbʼinchante xtalbʼil, at toklen tukʼilju tuʼn tten tbʼanel qmod. * In kubʼ tyekʼin Jehová qe mod lu kyukʼil kykyaqil xjal ex kyxol jlu ateʼ «qeju mintiʼ in xi kyqʼoʼn chjonte te ex kye qeju mya bʼaʼn» (Luc. 6:35). Jun techel, tuʼn Jehová «in jaʼwil qʼij kyibʼaj qe xjal mya bʼaʼn ex qe xjal bʼaʼn, ex ax in tzaj qʼonte jbʼal kyibʼaj qe xjal tzʼaqlxix ex qe xjal mya tzʼaqlxix» (Mat. 5:45). Axpe ikx qeju mintiʼ in xi kyqʼamaʼn qa a Jehová Bʼinchal kye, in tzaj tbʼanel kye tuʼn tkyaqilju in najbʼen qe tuʼn qanqʼin ex in kanet chʼin tzalajbʼil kyuʼn.

Bʼaʼn tuʼn qximen tiʼj tbʼanel techel kyaj tqʼoʼn Jehová tej tkubʼ tyekʼin tbʼanel tmod tiʼj Adán ex Eva. Tej otoqxi che bʼinchan il, bʼaj «kyslapun qe t-xaq higo» te kyxbʼalun. Noqtzun tuʼnj, el tnikʼ Jehová tiʼj qa il tiʼj tuʼn tok kyxbʼalun toj tumel tuʼntzun kukx kyanqʼin tiʼjxi tbʼanel najbʼil toj Edén, ¿tiquʼn? Tuʼnju oʼkx tzaj «tpoqʼsaʼn txʼotxʼ chʼiʼx kʼul ex txqantl kʼul». Tuʼntzunju, ximen Jehová tiʼjju at tajbʼen kye ex tuʼn «kytzʼumal alumaj kubʼ tbʼinchaʼn [...] t-xbʼalun Adán tukʼix te t-xuʼjil» (Gén. 3:7, 17, 18, 21).

In kubʼ tyekʼin Jehová tbʼanel tmod kyukʼil xjal bʼaʼn ex qe nya bʼaʼn, pero tajxix tuʼn tkubʼ tyekʼin tbʼanel tmod kyiʼj tmajen. Jun techel, toj ambʼil tej tten Zacarías, tzaj bʼaj tkʼuʼj jun anjel tuʼnju otoq weʼ aqʼuntl tiʼj tja Dios toj tnam Jerusalén. Tzaj bʼiʼn tuʼn Dios ex tzaj tzaqʼweʼn kyuʼn tbʼanel yol te qʼuqbʼil tkʼuʼj (Zac. 1:12, 13). Chʼixmi ax jlu bʼaj tiʼj Elías. Toj jun ambʼil, tzaj bʼaj tkʼuʼj ex xi tqanin te Jehová tuʼn tkyim. Ximen Jehová tiʼjju kubʼ tnaʼn, tuʼntzunju tzaj tsamaʼn jun anjel qʼuqbʼal tkʼuʼj. Nya oʼkxju, ax ikx tqʼama te qa nya tjunalxtoq at. Noq kyuʼn qeju tbʼanel mod lu ex onbʼil xi qʼoʼn te Elías, kukx ajbʼen te Jehová (1 Rey. 19:1-18). Pero ¿alkye tmajen Jehová kyaj qʼonte mas tbʼanel techel qwitz qkyaqilx tuʼn kybʼinchan xtalbʼil?

Tej tpakbʼan Jesús tzalu twitz Txʼotxʼ, ok ojtzqiʼn twitz tuʼnju el tnikʼ kyiʼj xjal ex ten tbʼanel tmod. Mintiʼ tqʼama jun yol nya toj tumel ex mintiʼ jaw tnimsan tibʼ. El tnikʼ tiʼjju kubʼ kynaʼn xjal ex tqʼama jlu: «Kytzaje wukʼile kykyaqile aqeye ma che sikte tuʼn aqʼuntl ex ma che sikte tjaqʼ iqtz, oktzun che ojlale wuʼne». Ex tqʼamatl: «Porke aju nyuwiye mya yajkux tiqanjtz» (Mat. 11:28-30). Tuʼntzunju, e ok lepeʼ xjal tiʼj noq jaxku tumel. Ex tuʼnju tzaj qʼaqʼin tkʼuʼj kyiʼj, xi tqʼoʼn kywa, e kubʼ tqʼanin qe yabʼ ex ok ten «qʼol nimku xnaqʼtzbʼil kye» tiʼj Ttat (Mar. 6:34; Mat. 14:14; 15:32-38).

Ten qʼaqʼbʼil tkʼuʼj Jesús ex ten tnabʼil tej tyolin kyukʼil txqantl. Kubʼ tyekʼin tbʼanel tmod kyukʼil qeju e pon jyol te maske at maj nya toj jun ambʼil mas bʼaʼn (Luc. 9:10, 11). Jun maj, pon laqʼeʼ jun xuʼj otoq tzikʼ 12 abʼqʼi ttzajlen kyyabʼil xuʼj tiʼj ex ok tmakoʼn ttxaʼn t-xbʼalun Jesús tuʼnju ok qeʼ tkʼuʼj tiʼj qa jakutoq bʼant. Mlaytoq tbʼant jlu tuʼn xuʼj tuʼnju nyatoq saq taʼ ik tzeʼn tqʼama Ley (Lev. 15:25-28). Pero mintiʼ tzaj tqʼoj Jesús tiʼj, sino tukʼil qʼaqʼbʼil tkʼuʼj xi tqʼamaʼn jlu te: «Nmeʼjel, tuʼn tokslabʼla ma bʼanta; txiʼya, txubʼtxaj taʼya jaʼlo, bʼiʼx ma kyaj bʼanixa, ma tzʼel tyabʼila» (Mar. 5:25-34). Tuʼn jlu in nel qnikʼ tiʼj qa ximen Jesús kyiʼj txqantl.

In tzaj kyyekʼin techel ma tzʼel qnikʼ tiʼj qa aju tuʼn qbʼinchante xtalbʼil, in kubʼ qyekʼin jlu tukʼil qbʼinchbʼen. Tuʼn ttzaj tqʼamaʼn Jesús qa nim toklen tuʼn tkubʼ qbʼinchan xtalbʼil, yolin tiʼj jun tbʼanel xjal te Samaria. Maske mintiʼtoq mujbʼabʼil kyxol xjal te Samaria kyukʼil aj Judiy, tzaj qʼaqʼin tkʼuʼj xjal te Samaria tiʼj aj Judiy otoq tzʼel elqʼaʼn qe tiʼchaq te toj bʼe, otoq bʼaj kʼixbʼisaʼn ex chʼixmi kyim. Kubʼ t-ximen xjal te Samaria tuʼn tok tqʼanin aj Judiy, xi tiʼn toj jun tposad ex xi tchjoʼn teju tajaw ja tuʼn tok t-xqʼuqin. Axpe xi tqʼamaʼn te xjal tuʼn t-xi tchjoʼn alkyexku juntl tiʼ kʼajbʼel (Luc. 10:29-37).

Ax tok, in kubʼ qyekʼin qa bʼaʼn qo bʼinchan xtalbʼil tukʼil qbʼinchbʼen, noqtzun tuʼnj, ax ikx in kubʼ qyekʼin tukʼil tbʼanel qyol aju in nonin kyiʼj txqantl. In tzaj tqʼamaʼn Tyol Dios qa «tuʼn tlaj bʼis, bʼiʼx in tzaj bʼaj tkʼuʼj xjal; pero tuʼnju yol bʼaʼnxix, in jaw tzalaj» (Prov. 12:25). Qa bʼaʼn qo bʼinchan xtalbʼil ex at tbʼanel qmod, kʼonil jlu qiʼj tuʼn t-xi qqʼuqbʼaʼn kykʼuʼj txqantl tukʼil tbʼanel yol tuʼntzun kytzalaj ex tuʼn tel kynikʼ tiʼj qa in qo ximen kyiʼj. A jlu kʼonil kyiʼj tuʼn tten kyipumal aj kyok weʼ kywitz nya bʼaʼn (Prov. 16:24).

Tuʼnju bʼinchaʼn qoʼ «ik tzaʼnx tilbʼilal Dios», qkyaqilx jaku ten qmod lu (Gén. 1:27). Qo xnaqʼtzan kyiʼj junjun techel toj Tyol Dios. Xi qʼiʼn apóstol Pablo toj Roma ex ok xqʼuqin tuʼn jun nejenel kye soldad Julio tbʼi te tnam aju. Kubʼ tyekʼin soldad lu tbʼanel tmod tukʼil Pablo ex «xi tqʼoʼn permis te [...] tuʼn t-xiʼ keʼyil kye qe tamiw ex tuʼn toninjtz chʼin kyuʼn» toj tnam Sidón (Hech. 27:3). Tej tikʼ chʼintl ambʼil, ax ikx tzaj qʼaqʼin kykʼuʼj xjal ateʼ toj isla te Malta tiʼj Pablo ex junjuntl xjal tej kyetz toj aʼ tuʼnju kux mulqʼaj bark. Kubʼ kykʼachoʼn xjal qʼaqʼ tuʼntzun kymeqʼt moqa kymaqʼt ex ok tilil kyuʼn tuʼn kyonin tiʼj Pablo ex qe xjal (Hech. 28:1, 2). Tuʼn tkubʼ qyekʼin qa bʼaʼn qo bʼinchaʼn xtalbʼil, nya oʼkx kbʼel qyekʼin jlu aj tkubʼ qbʼinchaʼn jun tbʼanel aqʼuntl noq junjun maj.

Qa qaj tuʼn ttzalaj Jehová, kʼokel tilil quʼn tuʼn tten qmod lu toj tkyaqil qanqʼibʼil ex nya noq te kabʼe qʼij. At maj kwest jaku tzʼela toj qwitz tuʼn qbʼinchan xtalbʼil kyiʼj txqantl. ¿Tiquʼn? Bʼalo tuʼnju in tzaj kyqʼoj xjal qiʼj aj  qpakbʼan, bʼalo tuʼnju nya naqʼli qoʼ tuʼn qyolin moqa tuʼnju kukx in nok tilil quʼn tuʼn miʼn qximen oʼkx qiʼjx. Noqtzun tuʼnj, jaku kubʼ kyiʼj nya bʼaʼn lu quʼn qa ma txi qqanin xewbʼaj xjan te Jehová tuʼn tonin qiʼj ex qa ma tzeʼl qkanoʼn tbʼanel techel in kubʼ tqʼoʼn (1 Cor. 2:12).

¿Tiʼ kʼonil qiʼj tuʼn tel qnikʼ tiʼj jatumel il tiʼj tuʼn qaqʼunan mas aj t-xi qbʼinchaʼn xtalbʼil kyiʼj txqantl? Bʼaʼn tuʼn tkubʼ qxjelin jlu: «¿In che okpe nbʼiʼne txqantl ex in nelpe nnikʼe kyiʼj? ¿In chin ximene tiʼjju at tajbʼen kye? ¿Alkye qʼij xi nbʼinchaʼne jun xtalbʼil tiʼj juntl, aju nya jun toj njaye ex nya jun tbʼanel wamiwe?». Nya oʼkxju, ax ikx jaku tzʼok tilil quʼn tuʼn tok qojtzqiʼn kywitz txqantl erman jatumel in nok qchmon qibʼ. Iktzun tten kʼelel qnikʼ tiʼj tiʼ onbʼil kyaj ex tiʼ in bʼaj kyiʼj. Ax ikx, bʼaʼn tuʼn t-xi qbʼinchaʼn tbʼanel kye txqantl ik tzeʼn qaj tuʼn tok bʼinchaʼn qiʼj (Mat. 7:12). Tbʼanel qa ma txi qanin te Jehová tuʼn tonin qiʼj ex tzul tkʼiwlaʼn qoʼ aj tok tilil quʼn (Luc. 11:13).

Kyaj tqʼoʼn Pablo jun tbʼanel techel tuʼnju bʼinchan xtalbʼil kyiʼj txqantl. In tzaj tqʼamaʼn Tyol Dios qa «kykyaqil qeju in che ul tukʼil in che kʼmonjtz tuʼn» (Hech. 28:30, 31). Ximen kyiʼj xjal ex kubʼ tyekʼin jlu kyuʼn tyol ex tbʼinchbʼen. Tuʼntzunju, kyajtoq xjal tuʼn kyok laqʼeʼ ttxlaj. Chʼixmi ax jlu jaku bʼaj qiʼj, tuʼn tbʼanel qmod jaku che oktz txqantl toj ttnam Jehová. Qa ma kubʼ qyekʼin tbʼanel qmod kyukʼil kykyaqil xjal, axpe ikx kyukʼil qeju in nel kyikʼun aju nimen quʼn, tuʼn jlu jaku chewix kyanmi ex jaku chʼexpaj kymod (Rom. 12:20). Aj tbʼet ambʼil, ax ikx kye jaku tzaj kyajbʼil tuʼn tok kybʼiʼn tbʼanel tqanil.

Toj Tbʼanel Najbʼil tzul qʼoʼn qe, che jawil anqʼin nim xjal ex che tzalajel aj tok kyqʼoʼn kywitz tiʼj tnejel maj aj tkubʼ qyekʼin tbʼanel qmod kyukʼil. A jlu kʼonil kyiʼj tuʼn tkubʼ kyyekʼin ax kymod kyukʼil txqantl. Aqeju kbʼel kyyekʼin kykʼujlabʼil ex kʼelel kynikʼ kyiʼj txqantl, tzul tqʼoʼn Jehová kychwinqlal te jumajx. Atzun qeju miʼn ma bʼant kyuʼn, mlay che anqʼin toj Tbʼanel Najbʼil (Sal. 37:9-11). Jaku tzʼok qeʼ qkʼuʼj tiʼj qa ktel nim tzalajbʼil ex mujbʼabʼil tjaqʼ Tkawbʼil Dios. Akux in pon qʼij lu, ¿tiʼ tbʼanel jaku tzaj qe qa ma qo bʼinchan xtalbʼil toj ambʼil jaʼlo?

In tzaj tqʼamaʼn Tyol Dios qa te qex in tzaj tbʼanel aj t-xi qbʼinchaʼn xtalbʼil kyiʼj txqantl ex aj tel qnikʼ kyiʼj (Prov. 11:17). In che ok laqʼeʼ mas xjal qtxlaj ex in nel kykanoʼn qiʼj. Tqʼama Jesús jlu: «Porke ax ju malbʼil kʼajbʼel tuʼn Dios kyeye jatum in xi kymaloʼne te juntl» (Luc. 6:38). Chʼixmi toj tkyaqil ambʼil, jun rat in nok qamiwen qibʼ kyukʼil txqantl qa bʼaʼn qo bʼinchan xtalbʼil.

Xi tqʼoʼn Pablo nabʼil lu kye okslal te tnam Éfeso: «Atwit kykʼuʼje kyiʼje kyxolxe, qʼaqʼanx kykʼuʼje tiʼj juntl, kynajsame kyile kyxolxe» (Efes. 4:32). In tzaj tiʼn nim tbʼanel kye kʼloj okslal aj tel kynikʼ erman kyiʼj txqantl ex aj in nok tilil kyuʼn tuʼn tbʼaj kyonin kyibʼ. Mintiʼ in najbʼen nya bʼaʼn yol kyuʼn, mintiʼ in kux chyoʼn tiʼj tanmi juntl tuʼn kyyol ex mintiʼ in che ok ten yolil kyiʼj. Ex nya oʼkx in nok kyxqʼuqin kyyol, sino in nok tilil kyuʼn tuʼn kyyolin kyiʼj tiʼchaq in che onin kyiʼj txqantl (Prov. 12:18). Aju in tzaj tuʼn jlu, kukx in chʼiy kyamiwbʼil erman tukʼil Jehová.

Ma tzʼel qnikʼ tiʼj qa in kubʼ qyekʼin tukʼil qmod ex qbʼinchbʼen qa bʼaʼn qo bʼinchan xtalbʼil. Aj t-xi qbʼinchaʼn tbʼanel aqʼuntl kye txqantl, in kubʼ qyekʼin tkʼujlabʼil ex tbʼanel tmod Jehová (Efes. 5:1). Ax ikx in qo onin tuʼn tchʼiy kyamiwbʼil erman tukʼil Jehová ex in qo onin kyiʼj xjal tuʼn kyoktz toj ttnam. Tuʼntzunju, tzʼok tilil quʼn tuʼn tkubʼ qyekʼin tbʼanel mod lu.