IN CHE anqʼintoq qe toj tja John toj tal tnam Gujarat (India). Ma tzikʼ junlo 60 abʼqʼi tjawlen aʼ twiʼ ttat John tuʼn tok te testigo de Jehová. Atzunte John tukʼil ttxuʼ, junx tukʼil jun ttzik ex qeju kyaje titzʼin, ateʼkxtoq toj okslabʼil católico ex tuʼntzunju el kyikʼen tokslabʼil kytat.

Jun qʼij, xi tqanin ttat John te tuʼn t-xi qʼolte jun uʼj te jun tamiw jatumel in noktoq tchmon tibʼ. Te prim aju, kʼixbʼi jun twiʼ tqʼabʼ John tej tjaw tjaqoʼn jun tonel. Maske ikju, tuʼnju tajtoq John tuʼn tnimen te ttat, ok tbʼalqʼiʼn jun bʼuʼẍ tiʼj twiʼ tqʼabʼ ex xiʼ tja tamiw ttat tuʼntzun t-xi tqʼoʼn uʼj te.

Tej tpon John atz, a t-xuʼjil tamiw tman xi tzyunte uʼj, ax ikx te testigo de Jehová. Tej tok tqʼoʼn ermana twitz tiʼj qa otoq kʼixbʼi twiʼ tqʼabʼ John, xi tqʼamaʼn te tuʼn tonin tiʼj. Etz tiʼn ermana tkubʼil qʼanbʼil ex bʼaj tsuʼn jatumel otoq kʼixbʼi, ex bʼaj tkʼaloʼn tuʼn jun bʼuʼẍ. Yajxitl, bʼaj tbʼinchaʼn jun vas tté. Toj tkyaqil ambʼil lu yolin ermana tukʼil tiʼj Tyol Dios.

Aju ikʼbʼil in kubʼtoq tnaʼn John kyiʼj erman, xi tzyet tuʼn tkubʼ naj. Tuʼntzunju, kubʼ t-ximen tuʼn t-xi tqanin kabʼe xjel te ermana. Nimentoq tuʼn John qa a Jesús in nok te Dios ex qa il tiʼj tuʼn kykʼulin te María, atzun te ttat nya iktoq t-ximbʼetz. Otoq bʼant yol gujarati tuʼn ermana, etz tiʼn Tyol Dios te John ex xi tyekʼin te toj tex tyol aju in tzaj tqʼamaʼn kyiʼj kabʼe xnaqʼtzbʼil lu. Yajxitl xi tqʼoʼn aju uʼj te, «Estas buenas nuevas del reino».

Tej tjaw tuʼjin John uʼj, el tnikʼ tiʼj qa ax tok jlu. Xi keʼyil pal toj t-iglesia ex ax qeju kabʼe xjel lu xi tqanin John te, ik tzeʼn xi tqanin te ermana. Noqtzun tuʼnj, tzaj tqʼoj pal tiʼj John ex xi t-xoʼn Tyol Dios tiʼj ex tukʼil tkyaqil tqʼajqʼajel twiʼ xi tqʼamaʼn jlu te: «¡Mapetzun tzʼoka te Satanás! ¿Jatumel in tzaj tqʼamaʼn Xjan Uʼj qa nya a Jesús Dios? ¿Jatumel in tzaj tqʼamaʼn Xjan Uʼj qa mintiʼ tuʼn qnaʼn Dios te María? ¿¡Jatumel!?». Jaw labʼin John tiʼj alkye tten xi ttzaqʼweʼn pal te ex xi tqʼamaʼn jlu te: «Mi juntl maj kbʼel nqʼoʼne nqane ttzi jun iglesia católica». Ex atzun jlu o bʼaj.

Xi tzyet tuʼn t-xnaqʼtzan John tiʼj Tyol Dios kyukʼil testigos de Jehová, el tnikʼ tiʼj axix tok ex tzyet tajbʼen te Jehová. Ax ikx e ok lepeʼ junjuntl toj tja tiʼjju techel kubʼ tqʼoʼn. Atx techel jatumel kʼixbʼi John tiʼj jun tal twiʼ tqʼabʼ toj bʼanqʼabʼaj, ex aj in nok tkeʼyin, in tzaj tnaʼn tukʼil kʼujlabʼil aju tbʼanel mod kubʼ yekʼin tiʼj, aju ma tzikʼ 60 abʼqʼi tbʼajlen ex tuʼn jlu el tnikʼ tiʼj axix tok (2 Cor. 6:4, 6).