1, 2. a) ¿Alkye tzalajbʼil jaku ten qe toj ambʼil jaʼlo? b) ¿Tiquʼn mlay qo tzalaj tiʼj tkyaqil toj ambʼil jaʼlo? (Qʼonka twitza tiʼj tnejel tilbʼilal).

QKYAQILX qaj tuʼn qanqʼin toj tzalajbʼil ex tuʼn miʼn ttzaj bʼaj qkʼuʼj. Tuʼntzunju, in xi qqʼoʼn chjonte te Jehová tuʼnju o tzaj tqʼoʼn qʼuqbʼil qkʼuʼj. In yolin jlu tiʼjju tbʼanel in kubʼ qnaʼn ex jaku tzʼok t-xqʼuqin qximbʼetz kyiʼj tiʼchaq in bʼaj qkʼuʼj kyiʼj (Filip. 4:6, 7). Ex tuʼnju o txi qqʼamaʼn te Jehová tuʼn qajbʼen te, ax ikx «at qmujbʼil qibʼ tukʼa», moqa at tbʼanel qamiwbʼil tukʼil (Rom. 5:1, Akʼaj Tuʼjil Tyol Qman).

² Naʼmx tpon ambʼil tuʼn ttzaj tiʼn Jehová tkyaqil tzalajbʼil. In qo anqʼin kyoj bʼajsbʼil tqʼijlalil ex tuʼntzunju at nim nya bʼaʼn ex ateʼ xjal in che jyoʼn tiʼj qʼoj (2 Tim. 3:1-4). Ax ikx in nok tilil quʼn tuʼn tkubʼ tiʼj Satanás ex kyiʼj qe nya ax tok xnaqʼtzbʼil in nel tsputin (2 Cor. 10:4, 5). Noqtzun tuʼnj, aju mas jaku tzʼel qʼinte tzalajbʼil qe, aqeju toj qja nya testigos de Jehová qe. Atlo junjun jaku che ok ten xmayil qiʼj ex jaku tzaj kyqʼamaʼn qe qa tuʼn qpaj mintiʼ mujbʼabʼil at kyukʼil toj qja. Axpe ikx jaku tzaj kyqʼamaʼn qa ya mlay tzʼok qʼoʼn  qoklen kyxol. ¿Tiʼ qximbʼetz ktel tiʼj ikʼbʼil at kyuʼn toj qja? ¿Tiʼ jaku bʼant quʼn qa a jlu in bʼaj qiʼj?

3, 4. a) ¿Tiʼ tuʼn ttzaj tiʼn t-xnaqʼtzbʼil Jesús? b) ¿Toj alkye ambʼil mas kwest tuʼn qok lepeʼ tiʼj Jesús?

³ Ojtzqiʼntoq tuʼn Jesús qa tzul qʼoj kyxol xjal tuʼn t-xnaqʼtzbʼil ex qa iltoq tiʼj tuʼn tten kyipumal t-xnaqʼtzbʼen tuʼnju che elel ikʼun. Tuʼn jlu jaku tzaj nya bʼaʼn tiʼj mujbʼabʼil at toj jun ja. Tqʼamaʼn Jesús jlu: «Miʼn kubʼ kyximane qa ma chin ule tuʼn kyten xjal tuj tzalajbʼil; mintiʼ ma chin ule tuʼn kyten xjal tuj tzalajbʼil, noq oʼkx ma chin ule qʼol qʼoj kyxol xjal. Porque ma chin ule qʼol pabʼl tibʼ kyxol xjal, tuʼn tel tpaʼn tibʼ qʼa tiʼj tman, ex tuʼn tel tpaʼn tibʼ txin tiʼj ttxuʼ, ex tuʼn tel tpaʼn tibʼ txin alibʼaj tiʼj tlibʼ; kyjaʼtzun qe aj qʼoj tiʼj xjal, ax qeju ateʼ tuj tja» (Mat. 10:34-36).

⁴ ¿Tiquʼn tqʼama Jesús: «Miʼn kubʼ kyximane qa ma chin ule tuʼn kyten xjal tuj tzalajbʼil»? Tuʼnju tajtoq tuʼn kyximen xjal tiʼj tiʼ jaku tzaj qa ma che ok lepeʼ tiʼj. Kubʼ t-ximen Jesús tuʼn t-xi tchikʼbʼaʼn «ju yol axix tok», ex nya tuʼn tten ikʼbʼil kyxol xjal (Juan 18:37). Noqtzun tuʼnj, jaku bʼaj jlu. Tuʼntzunju, tajbʼiltoq Jesús tuʼn t-xi t-xnaqʼtzaʼn kye t-xnaqʼtzbʼen qa kwest tuʼn kyok lepeʼ tiʼj, ex mas kwest qa mintiʼ in xi kybʼiʼn kyamiw axix tok ex qe toj kyja.

5. ¿Tiʼ o tzikʼx kyuʼn t-xnaqʼtzbʼen Jesús?

⁵ Tqʼama Jesús qa iltoq tiʼj tuʼn tikʼx ikʼbʼil kyuʼn t-xnaqʼtzbʼen ex kyxol jlu aju ikʼbʼil kyuʼn toj kyja (Mat. 10:38). Tuʼn kukx kyok lepeʼ tiʼj Jesús, ateʼ junjun o tzikʼx xmaybʼil kyuʼn, axpe ikx o che el ikʼun kyuʼn toj kyja. Noqtzun tuʼnj, o che kambʼan kyiʼj mas tiʼchaq twitzju o kyaj kytzaqpiʼn (kjawil uʼjit Marcos 10:29, 30).

6. ¿Tiʼ bʼaʼn tuʼn ttzaj qnaʼn qa nya kyaj qe toj qja tuʼn qajbʼen te Jehová?

⁶ Qa nya kyaj toj qja tuʼn qajbʼen te Jehová, nya tuʼn jlu ya mlay che ok qkʼujlaʼn. Noqtzun tuʼnj, bʼaʼn tuʼn ttzaj qnaʼn qa tnejel kʼokel qkʼujlaʼn Jehová ex Jesús twitz alkyexku juntl xjal (Mat. 10:37). Ax ikx, bʼaʼn tuʼn ttzaj qnaʼn qa in najbʼen kʼujlabʼil in kubʼ qnaʼn kyiʼj toj qja tuʼn Satanás tuʼntzun ya miʼn qajbʼen te Jehová. Qo xnaqʼtzan tiʼj jatumel jaku bʼaj jlu ex alkye tten jaku qo ex twitz.

7. ¿Alkye kyximbʼetz mejebʼleʼn ktel qa at jun kye nya testigo de Jehová?

⁷ In tzaj tqʼamaʼn Tyol Dios qa aqeju in che kubʼ mojeʼ, «tzul yajbʼil kye tuj kychwinqlal» (1 Cor. 7:28). Qa nya testigo de Jehová qukʼil, jakulo tzaj mas nya bʼaʼn toj qmejebʼleʼn. Maske ikju, il tiʼj tuʼn tten qximbʼetz ik tzeʼn te Jehová tiʼjju in bʼaj qiʼj. Qa nya taj qchmil moqa qxuʼjil tuʼn tajbʼen te Jehová, nya tuʼn jlu jaku txi qqʼamaʼn qa kʼelel qpan qibʼ, moqa kbʼel qnajsaʼn qmejebʼleʼn (1 Cor. 7:12-16). Aju xuʼjilbʼaj okslal il tiʼj tuʼn t-xi tnimen toklen tchmil te wibʼaj toj ja, maske mintiʼ in kubʼ nej tuʼn t-xi tyekʼin Tyol Dios kye. Ax ikx te chmilbʼaj okslal, il tiʼj tuʼn tok tkʼujlaʼn t-xuʼjil ex tuʼn tok tkwentin tukʼil kʼujlabʼil maske mintiʼ in najbʼen te Jehová (Efes. 5:22, 23, 28, 29).

8. ¿Tiʼ bʼaʼn tuʼn tkubʼ qxjelin qa ma tzaj tqʼamaʼn qchmil qe tiʼ kbʼantel quʼn toj qajbʼebʼil te Jehová?

⁸ ¿Tiʼ jaku bʼant quʼn qa ma tzaj tqʼamaʼn qchmil qe tiʼ kbʼantel quʼn toj qajbʼebʼil te Jehová? Jun techel, xi tqʼamaʼn tchmil jun ermana te alkye qʼij tuʼn tpakbʼan toj jun seman. Qa a jlu in bʼaj qiʼj, bʼaʼn tuʼn tkubʼ qxjelin jlu: «¿In tzajpe tqʼamaʼn nchmile weye tuʼn miʼn wajbʼene te Jehová? Qa nya ikju, ¿jakupe txi nbʼiʼne ex jakupe kubʼ nbʼinchaʼne aju in tzaj tqʼamaʼn?». Qa ma ten  qnabʼil jaku tzʼonin tuʼn miʼn ttzajxix qʼoj qxol (Filip. 4:5).

9. ¿Alkye tten jaku txi tyekʼin jun ermana te tal tuʼn tnimen te ttat nya testigo de Jehová?

⁹ Qa mintiʼ in najbʼen qchmil te Jehová, kwestlo tuʼn kyxi xnaqʼtzet kʼwaʼl. Jun techel, il tiʼj tuʼn kyxi xnaqʼtzet tuʼn tjapun kawbʼil in tzaj tqʼamaʼn Tyol Dios kyuʼn, aju tuʼn kynimen te kyman ex te kytxuʼ (Efes. 6:1-3). ¿Yajtzun qa mintiʼ in xi tbʼiʼn qchmil qe kawbʼil in tzaj tqʼamaʼn Tyol Dios? Bʼaʼn tuʼn tkubʼ qqʼoʼn jun tbʼanel techel kywitz kʼwaʼl aj qnimen te qchmil. Qqʼonk qwiʼ kyiʼj tbʼanel tmod ex qqʼamanx qe tbʼanel tiʼchaq in bʼant tuʼn. Miʼn qo yolin nya bʼaʼn tiʼj kywitz kʼwaʼl. Aju kbʼantel quʼn, kxel qchikʼbʼaʼn qa teyele junjun kjawil tjyoʼn qa kʼajbʼel te Dios moqa miʼn. Aju tbʼanel kymod kʼwaʼl jaku tzʼonin tiʼj qchmil tuʼn ttzaj tajbʼil tuʼn tok tojtzqiʼn Jehová.

10. ¿Alkye tten jaku txi tqʼoʼn jun ermana xnaqʼtzbʼil tiʼj Jehová kye tal maske nya testigo de Jehová tchmil?

¹⁰ Atlo maj jaku tqʼama chmilbʼaj nya testigo de Jehová qa taj tuʼn tkubʼ kyikʼsaʼn tkʼwaʼl junjun kyninqʼij xjal moqa taj tuʼn t-xi kynimen junjun kyxnaqʼtzbʼil okslabʼil nya ax tok. Atlo junjun chmilbʼaj jaku txi tqʼamaʼn te jun ermana tuʼn miʼn t-xi t-xnaqʼtzaʼn Tyol Dios kye tkʼwaʼl. Maske ikju, in nok tilil tuʼn ermana tuʼn t-xi tyekʼin axix tok tiʼj Tyol Dios kye tal (Hech. 16:1; 2 Tim. 3:14, 15). Jun techel, bʼalo nya taj chmilbʼaj tuʼn kyxnaqʼtzan tkʼwaʼl tiʼj Tyol Dios moqa tuʼn kyxiʼ kyoj chmabʼil tuʼnju tzma chʼin qe. Maske kxel tniman ermana t-ximbʼetz tchmil, noqtzun tuʼnj, jaku yolin tiʼj qʼuqbʼil tkʼuʼj kyukʼil tal toj ambʼil jaku bʼant tuʼn. Iktzun tten kxel tqʼoʼn xnaqʼtzbʼil kye tiʼj Jehová ex kyiʼj tkawbʼil  (Hech. 4:19, 20). Aj tbʼet ambʼil, aʼyex kʼwaʼl che kbʼel ximente qa che ajbʼel te Jehová moqa miʼn (Deut. 30:19, 20). *

11. ¿Tiquʼn jaku tzaj nya bʼaʼn qxol kyukʼil qeju at qxilen kyukʼil, aqeju nya testigo de Jehová?

¹¹ Tej t-xi tzyet tuʼn qxnaqʼtzan tiʼj Tyol Dios kyukʼil testigos de Jehová, bʼalo mintiʼ xi qqʼamaʼn kye qeju at qxilen kyukʼil. Noqtzun tuʼnj, tej tchʼiy qʼuqbʼil qkʼuʼj el qnikʼ tiʼj qa mintiʼ tuʼn qtzaj xobʼ ex qa bʼaʼn tuʼn qyolin kyukʼil tiʼjju nimen quʼn (Mar. 8:38). Qa tuʼnju kukx in qo ajbʼen te Jehová o tzaj nya bʼaʼn qxol, ¿tiʼ jaku bʼant quʼn tuʼn kukx tten mujbʼabʼil qxol ex tuʼn kukx qajbʼen te Jehová? Qo xnaqʼtzan kyiʼj junjun nabʼil.

12. ¿Tiquʼn jaku tzaj kyqʼoj qeju at qxilen kyukʼil tuʼn qok te testigo de Jehová, ex tiʼ jaku bʼant quʼn?

¹² Tzʼelx qnikʼ tiʼj kyximbʼetz qeju at qxilen kyukʼil. Kubʼlo qnaʼn tzalajbʼil tej tel qnikʼ tiʼj axix tok. Noqtzun tuʼnj, jaku kubʼ kyximen junjun at qxilen kyukʼil qa o qo kubʼ sbʼuʼn ex qa o tzʼokx qqʼon qibʼ toj jun okslabʼil nya ax tok. Jaku kubʼ kyximen qa ya mintiʼ qkʼujlabʼil kyiʼj tuʼnju mintiʼ in kubʼ qikʼsaʼn qe ninqʼij kyukʼil. Axpe ikx, jaku che tzaj xobʼ tuʼnju in kubʼ kyximen qa jaku kubʼ tqʼoʼn Dios qkastiw aj qkyim. Bʼaʼn tuʼn tel qnikʼ tiʼj kyximbʼetz ex bʼaʼn tuʼn tok qqʼoʼn qwiʼ tiʼjju in tzaj kyqʼamaʼn, tuʼntzun tel qnikʼ tiʼj tiquʼn in bʼaj kykʼuʼj (Prov. 20:5). Jaku tzʼel qkanoʼn techel kyaj tqʼoʼn apóstol Pablo tej tok tilil tuʼn tuʼn tel tnikʼ kyiʼj «kykyaqil xjal», onin jlu tiʼj tuʼn t-xi tpakbʼaʼn Tyol Dios kye. Qa ax jlu ma bʼant quʼn, kʼonil qiʼj aj qyolin tiʼjju nimen quʼn kyukʼil qeju at qxilen kyukʼil (1 Cor. 9:19-23).

13. ¿Alkye tten qo yolil kyukʼil qeju at qxilen kyukʼil?

¹³ Qo yolin toj tumel. «Chebʼa che yoline tkyaqil maj», chi Tyol Dios (Col. 4:6). Bʼaʼn tuʼn t-xi qqanin xewbʼaj xjan te Jehová tuʼntzun qyolin toj tumel ex tukʼil kʼujlabʼil kyukʼil qeju at qxilen kyukʼil. Mintiʼ tuʼn qok ten qʼamal kye tkyaqil nya ax tok xnaqʼtzbʼil nimen kyuʼn. Qa ma tzaj kyqʼamaʼn moqa in kubʼ kybʼinchaʼn jun tiʼ in kubʼ qnaʼn nya bʼaʼn tuʼn, qkanoʼmil kyiʼj apóstol. Kubʼ ttzʼibʼin Pablo jlu: «Ok in qo ok yasoʼne, in qo yoline bʼaʼn kyiʼj xjal. Ok in qo yajlanjtze, nnikʼx quʼne. Ok in che siʼmin xjal yol qiʼje, in cheʼx qtzaqʼweʼne tuj mansbʼajil» (1 Cor. 4:12, 13).

14. ¿Tiʼ tbʼanel jaku tzaj qa ma che ten tbʼanel qbʼinchbʼen?

¹⁴ Qyekʼinx tbʼanel qbʼinchbʼen. Ax tok, jaku tzʼonin tbʼanel qyol tuʼn tten mujbʼabʼil qxol kyukʼil qe at qxilen kyukʼil, noqtzun tuʼnj, mas jaku tzʼonin tbʼanel qbʼinchbʼen kyiʼj (kjawil uʼjit 1 Pedro 3:1, 2, 16). Qa ma kubʼ qqʼoʼn jun tbʼanel techel, jaku tzʼok kyqʼoʼn kywitz tiʼj qa in che tzalaj testigos de Jehová toj kymejebʼleʼn, in che xqʼuqin kyiʼj kykʼwaʼl ex in che anqʼin saq ex in che tzalaj tiʼj kyanqʼibʼil. Maske mintiʼ ma che ok qeju at qxilen kyukʼil te testigo de Jehová, jaku kubʼ qnaʼn tzalajbʼil tuʼnju ojtzqiʼn quʼn qa in tzalaj Jehová qiʼj tuʼnju kukx in qo ajbʼen te.

15. ¿Tiʼ jaku bʼant quʼn tuʼntzun miʼn ttzaj kyqʼoj qeju at qxilen kyukʼil?

¹⁵ Qo ximen kyiʼj ambʼil jatumel jaku qo ok weʼ kywitz nya bʼaʼn. Bʼaʼn tuʼn qximen tiʼj toj alkye ambʼil jaku tzaj kyqʼoj qeju at qxilen kyukʼil ex tiʼ jaku bʼant quʼn (Prov. 12:16, 23). Tqʼama jun ermana te Australia jlu: «Ikʼun axix tok tuʼn nsuegroye. Naʼmxtoq txi qllamarine tuʼn tok qbʼiʼne tzeʼn taʼ, in xi qqanine onbʼil tukʼil nchmile te Jehová tuʼntzun miʼn txi qtzaqʼweʼne tukʼil qʼoj. In bʼajtoq qbʼinchaʼne junjun xnaqʼtzbʼil tuʼn qyoline tiʼj tukʼil nsuegroye, tuʼntzun qtzalaje tiʼj aj qyoline. Ex tuʼn  miʼn txi tzyet qyoline tiʼj jun xnaqʼtzbʼil tiʼj okslabʼil tukʼil qʼoj, in kubʼ qximane tuʼn miʼn qyoline nim ambʼil tukʼil».

16. ¿Tiʼ jaku tzʼonin qiʼj qa in kubʼ qnaʼn qa aqoʼ at qpaj aj ttzaj jun nya bʼaʼn qxol kyukʼil qeju at qxilen kyukʼil?

¹⁶ Ax tok, mlay bʼant tuʼn tkubʼ naj tkyaqil qʼoj quʼn kyukʼil qeju at qxilen kyukʼil qa nya testigo de Jehová qe. Jakulo kubʼ qnaʼn qa aqoʼ at qpaj tiʼj, tuʼnju kʼujlaʼn qe quʼn ex in nok tilil quʼn tuʼn kytzalaj. Qa in bʼaj jlu qiʼj, bʼaʼn tuʼn ttzaj qnaʼn qa tnejel kyxel qnimen Jehová ex nya qeju toj qja. Tuʼn jlu, jakulo qo onin kyiʼj tuʼn tel kynikʼ tiʼj qa ma kubʼ qbʼinchaʼn moqa mintiʼ aju in tzaj tqʼamaʼn Tyol Dios, jaku tzaj tiʼn qchwinqlal ex qa kyimen. Noq tiʼxku jaku bʼaj, bʼaʼn tuʼn ttzaj qnaʼn qa mlay qo ok ten obligaril te jun xjal tuʼn tajbʼen te Jehová. Tuʼnju at tkʼujlabʼil Jehová, in tzaj tqʼoʼn ax ambʼil kye toj qja ik tzeʼn o tzaj tqʼoʼn qe: aju tuʼn tjaw qjyoʼn qa qo ajbʼel te, moqa miʼn (Is. 48:17, 18).

17, 18. ¿Tiʼ jaku bʼant quʼn qa ma tzʼel tpan tibʼ jun toj qja tiʼj Jehová?

¹⁷ In kubʼ qnaʼn nim bʼis aj tex lajoʼn moqa aj ttzaj tqʼamaʼn jun toj qja qa ya nya taj tuʼn tten toj tnam Jehová. In nok jlu ik tzeʼn in nex xyuʼn jun spad toj qanmi. ¿Tiʼ jaku bʼant quʼn toj ambʼil aju?

¹⁸ Qqʼonk tilil tuʼn tchʼiy qamiwbʼil tukʼil Jehová. Tuʼn kukx tten nim qʼuqbʼil qkʼuʼj, il tiʼj tuʼn quʼjin tiʼj Tyol Dios tkyaqil maj, tuʼn tbʼaj qbʼinchaʼn qten kyiʼj chmabʼil ex tuʼn qxiʼ kyoj, ax ikx qo elex pakbʼal ex kxel qqanin qipumal te Jehová tuʼntzun tikʼx bʼis quʼn (Jud. 20, 21). Noqtzun tuʼnj, ¿tiʼ jaku bʼant quʼn qa in kubʼ qbʼinchaʼn qe jlu noq tuʼnju in qo naqʼet kyiʼj tuʼn tpaj bʼis? Miʼn qo sikt. Qqʼonk qwiʼ tiʼj qajbʼebʼil te Jehová, tuʼnju kʼonil qiʼj tuʼn tok qxqʼuqin qximbʼetz ex aju in kubʼ qnaʼn. Bʼaʼn tuʼn t-xi qbʼiʼn aju ikʼ tiʼj aj tzʼibʼil te Salmo 73. Xi tzyet tuʼn t-ximen kyiʼj tiʼchaq nya toj tumel ex tzaj bʼaj tkʼuʼj tuʼn jlu. Tejtzun tok tqʼoʼn twiʼ tiʼj tajbʼebʼil te Jehová, onin tiʼj tuʼn t-ximen toj tumel (Sal. 73:16, 17). Ax ikx jaku tzʼonin jlu qiʼj qa ma bʼant jlu quʼn.

19. ¿Alkye tten kbʼel qyekʼin qa in nok qqʼoʼn toklen kawbʼil in kubʼ tqʼoʼn Jehová?

¹⁹ Qqʼonk toklen kawbʼil in kubʼ tqʼoʼn Jehová. Maske in tzaj qbʼis aj ttzaj qʼoʼn kawbʼil, noqtzun tuʼnj, aj tel ambʼil in tzaj tiʼn tbʼanel kye kykyaqil, axpe ikx teju otoq bʼinchan il (kjawil uʼjit Hebreos 12:11). Jun techel, in tzaj tqʼamaʼn Jehová qe tuʼn miʼn qyolin kyukʼil qeju in che bʼinchan il ex mintiʼ in najtz tiʼj kyanmi (1 Cor. 5:11-13). Maske in kubʼ qnaʼn bʼis tuʼn jlu, kʼokel tilil quʼn tuʼn miʼn qyolin tukʼil jun toj qja o tzʼex lajoʼn toj ttnam Jehová, qa toj yolbʼil, toj mensaje, toj jun uʼj, toj correo electrónico moqa toj alkyexku juntl tten.

20. ¿Alkye qʼuqbʼil qkʼuʼj mintiʼ tuʼn tnaj?

²⁰ Miʼn naj qʼuqbʼil qkʼuʼj. In yon kʼujlabʼil tiʼj tkyaqil tiʼchaq ex tuʼntzunju kukx qʼuqli qkʼuʼj tiʼj qa jaku che meltzʼaj qeju o tzʼel kypan kyibʼ tiʼj Jehová (1 Cor. 13:7). Qa ma tzʼok qqʼoʼn qwitz tiʼj qa in nok tilil tuʼn jun toj qja tuʼn tkubʼ tchʼixpuʼn tmod, bʼaʼn tuʼn t-xi qqanin toj naj Dios tuʼn tonin Xjan Uʼj tiʼj tuʼntzun t-xi tkʼamoʼn txokbʼil lu: «Meltzʼaje wukʼile» (Is. 44:22).

21. ¿Tiʼ kbʼantel quʼn qa o tzʼokx jun «qʼoj» toj qja tuʼnju in qo ok lepeʼ tiʼj Jesús?

²¹ Tqʼama Jesús qa mas kʼokel qkʼujlaʼn twitz alkyexku juntl xjal. Ex ok qeʼ tkʼuʼj tiʼj qa ktel kyipumal t-xnaqʼtzbʼen tuʼn tikʼx kyuʼn aj kyel ikʼen kyuʼn toj kyja. Qa o tzʼokx jun «qʼoj» toj qja tuʼnju lepcheqoʼk tiʼj Jesús, qo jyon onbʼil tukʼil Jehová tuʼn qex kywitz nya bʼaʼn (Is. 41:10, 13). Qo ximen tiʼj qa in tzalaj Jehová ex Jesús qiʼj, ex qa tzul kykʼiwlaʼn qoʼ tuʼnju kukx in qo ajbʼen kye. ¿Mintiʼpe in kubʼ qnaʼn tzalajbʼil tuʼn jlu?