IK TZEʼN in tzaj tqʼamaʼn Tley Moisés, at maj bʼaʼn tuʼn t-xi qʼamet jun yol toj tbʼi Dios. Noqtzun tuʼnj, tej tul Jesús nim aj Judiy otoq che naqʼet tuʼn t-xi kyqʼamaʼn tbʼi Dios tiʼj tkyaqil kyyol tuʼntzun kyxi nimen. Tuʼn jlu kyajtoq tuʼn tkubʼ kyyekʼin qa ax tok kyyol. Toj kabʼe maj el tikʼun Jesús nya bʼaʼn kostumbr lu ex tqʼama: «Noq oʼkx tuʼn t-xi kymaʼne ok ex qa miʼn» (Mat. 5:33-37; 23:16-22).

In tzaj tqʼamaʼn jun uʼj in yolin kyiʼj okslabʼil qa at junjun xnaqʼtzbʼil tkuʼx toj uʼj Talmud, aju in tzaj kyyekʼin qa otoq che naqʼet aj Judiy tuʼn t-xi kyqʼamaʼn tbʼi Dios tiʼj tkyaqilju in xi kyqʼamaʼn. In tzaj tqʼoʼn Talmud tkyaqil tqanil tiʼj yol in xi qʼamet toj tbʼi Dios, alkyeqe tuʼn tjapun kywiʼ ex alkyeqe jaku txi qʼet ambʼil tuʼn miʼn tjapun kywiʼ.

Nya oʼkx Jesús el ikʼunte kostumbr lu. Jun techel, in tzaj tqʼamaʼn jun xjal in xnaqʼtzan tiʼjju o tzikʼ, aju Flavio Josefo tbʼi, tiʼj jun kʼloj okslabʼil aj Judiy qa in nok tilil kyuʼn tuʼn miʼn txi kyqʼamaʼn tbʼi Dios tiʼj kyyol, tuʼnju in kubʼ kyximen qa mas nya bʼaʼn jlu twitzju tuʼn t-xi kyqʼamaʼn nya ax tok yol. In kyqʼamaʼn qa at jun xjal in xi tqʼamaʼn jun tyol toj tbʼi Dios tuʼn t-xi nimen kyuʼn txqantl, in nok qʼoʼn xjal lu te nikʼal yol. Chʼixme axju in tzaj tqʼamaʼn jun uʼj kye aj Judiy aju Eclesiástico tbʼi, moqa Ojtzqibʼil, te Jesús Ben Sirá: «Aju xjal in xi tqʼamaʼn nim yol toj tbʼi Dios, in tzaj tiʼn nya bʼaʼn tiʼj» (23:11). Tuʼntzunju, aju el tikʼun Jesús, aju tuʼn t-xi qʼamet naj jun yol toj tbʼi Dios. Qa tkyaqil maj in xi qqʼamaʼn aju axix tok, nya il tiʼj tuʼn t-xi qqʼamaʼn tbʼi Dios tiʼj jun qyol tuʼntzun qxi nimen.