¿Tiʼ xnaqʼtzbʼil jaku tzʼel qiʼn tiʼjju ok tkeʼyin Zacarías?
«Kyajtz meltzʼaje wukʼile ex jaku chin aj meltzʼaje kyukʼile» (ZAC. 1:3).
BʼITZ: 6 EX 20
1-3. a) ¿Tiʼtoq in bʼaj kyiʼj tmajen Jehová tej tok ten aj sanjel Zacarías qʼamal tqanil? b) ¿Tiquʼn xi tqʼamaʼn Jehová kye tmajen tuʼn kymeltzʼaj tukʼil?
JUN uʼj bʼalqʼiʼn tiʼj in lipen twitz kyaʼj, jun xuʼj japun tkuʼx toj jun kaj ex qa toj jun chiʼl, ex kabʼe xuʼj tok kyxikʼ ik tzeʼn jun matij pájaro in che lipen twitz kyaʼj. In qo jaw labʼin kyiʼj qe tilbʼilal lu in che kanet quʼn toj tuʼj aj sanjel Zacarías (Zac. 5:1, 7-9). ¿Tiquʼn xi tqʼoʼn Jehová ambʼil te tsanjel tuʼn tok tqʼoʼn twitz kyiʼj tilbʼilal lu, aju in qo jaw labʼin kyiʼj? ¿Tiʼtoq in bʼaj kyiʼj aj Judiy toj ambʼil aju? ¿Alkye tten in nonin qiʼj jaʼlo aju ok tqʼoʼn Zacarías twitz tiʼj?
2 Toj abʼqʼi 537 tjaqʼxi ambʼil iqʼin quʼn jaʼlo, ok te tzalajbʼil kye tmajen Jehová. Otoq che ten toj tnam Babilonia kyoj 70 abʼqʼi, atzun jaʼlo ya tzaqpiʼntoq qe. Tnejel, in che tzalajtoq aj Judiy tej kymeltzʼaj toj tnam Jerusalén tuʼntzun tjaw kybʼinchaʼn tja Dios juntl maj ex tuʼn kykʼulin te. Tej tikʼtl juntl abʼqʼi, toj 536, xi tzyet tuʼn kyaqʼunan kyiʼj tsimyentil tja Dios. In tzaj tqʼamaʼn Tyol Dios Esd. 3:10-13). Noqtzun tuʼnj, mas ok tilil kyuʼn aj qʼoj tiʼj kʼulbʼil axix tok tuʼn miʼn tjaw bʼinchet tja Dios. Tzaj bʼaj kykʼuʼj tmajen Dios tuʼn nim nya bʼaʼn ex ya mintiʼtl e aqʼunan tiʼj tuʼn tjaw bʼinchet tja Jehová. Ok kyqʼoʼn kywiʼ tiʼj tuʼn tjaw kybʼinchaʼn kyex kyja ex tuʼn tbʼaj kyaqʼunan kytxʼotxʼ. Tej otoq tzikʼ 16 abʼqʼi kykubʼlen qʼoʼn tsimyent tja Dios, kyaj weʼ tkyaqil aqʼuntl tiʼj. Xi tnaʼn Jehová kye tmajen tuʼn miʼn tok kyqʼoʼn kyex kyaqʼun te tnejel ex tuʼn kymeltzʼaj tukʼil tuʼntzun tten kyipumal tuʼn kykʼulin te tukʼil tzalajbʼil.
qa in che tzalajtoq xjal ex qa mintiʼ el nikʼbʼaj «tiʼj tqʼajqʼajel kywi xjal alkye te tzalajbʼil ex alkye te oqʼel, porque najchaq qʼajqʼaj kywiʼ wen» (3 Tuʼntzunju, toj abʼqʼi 520 xi tsamaʼn Jehová aj sanjel Zacarías tuʼn t-xi tnaʼn kye tmajen tiquʼn otoq che etz tiʼn toj tnam Babilonia. Tbʼanel aju t-xilen tbʼi Zacarías, «Ma tzaj tnaʼn Jehová». Bʼalo onin jlu kyiʼj aj Judiy tuʼn ttzaj kynaʼn jun axix tok nim toklen: maske otoq tzikʼ tnaʼl kyuʼn aju otoq tbʼincha Jehová kyiʼj, atzunte Jehová mintiʼ otoq che el naʼj tiʼj tkʼuʼj (kjawil uʼjit Zacarías 1:3, 4). Xi tnaʼn Jehová kye tukʼil kʼujlabʼil qa kʼoniltoq kyiʼj tuʼn tten juntl maj kʼulbʼil axix tok kyuʼn. Noqtzun tuʼnj, ax ikx xi tqʼamaʼn Jehová kye qa oʼkx che xel tkʼamoʼn qa ma che kʼulintoq te tuʼn tkyaqil kykʼuʼj. Qo xnaqʼtzan tiʼj alkye tten ajbʼen tqaqin ex twuqin tilbʼilal ok tqʼoʼn Zacarías twitz tiʼj tuʼntzun tonin kyiʼj ex tiʼ xnaqʼtzbʼil jaku tzʼel qiʼn kyiʼj.
IN KUBʼ TQʼOʼN JEHOVÁ KYKASTIW QEJU IN CHE ELQʼAN
4. a) ¿Alkye tqaqin tilbʼilal ok tqʼoʼn Zacarías twitz tiʼj? b) Tuʼnju tzʼibʼintoq tqanil tiʼj kykabʼil twitz uʼj, ¿tiʼ t-xilen jlu? (Qʼonka twitza tiʼj tilbʼilal 1).
4 Toj capítulo 5 in nok tqʼoʼn Zacarías twitz tiʼj junxitl tilbʼilal (kjawil uʼjit Zacarías 5:1, 2). In nok tqʼoʼn twitz aj sanjel tiʼj jun uʼj bʼalqʼiʼn tiʼj in lipen twitz kyaʼj ex bʼalo jun 9 metro tqan ex junlo 4.5 metro twitz. Jqontoq taʼ, moqa ya bʼantni tten tuʼn tjaw uʼjit. Tzʼibʼintoq tqanil tiʼj kykabʼil twitz uʼj bʼalqʼiʼn tiʼj (Zac. 5:3). Naqʼli qetoq xjal tuʼn tkubʼ kytzʼibʼin jun tqanil oʼkx toj jun plaj twitz uʼj. Tuʼntzunju, tej tzʼibʼintoq tqanil tiʼj kykabʼil twitz uʼj, a t-xilen jlu qa nim toklen tqanil tkuʼx toj. Aju tqanil lu in yolin tiʼj jun kastiw.
In nel kyikʼen okslal alkyexku tten elqʼabʼil. (Qʼonka twitza kyiʼj taqikʼ 5 a 7).
5, 6. ¿Tiʼ t-ximbʼetz Jehová at tiʼj alkyexku tten elqʼabʼil?
5 (Kjawil uʼjit Zacarías 5:3, 4). Qkyaqilx il tiʼj tuʼn t-xi qqʼoʼn kwent te Dios tiʼjju in kubʼ qbʼinchaʼn. Ex mas qeju tok tbʼi Jehová kyiʼj. Aqeju kʼujlaʼn Jehová kyuʼn, ojtzqiʼn kyuʼn qa in kubʼ ttzʼilsaʼn tbʼi Dios alkyexku tten elqʼabʼil (Prov. 30:8, 9). At junjun xjal in kubʼ kyximen qa bʼaʼn tuʼn kyelqʼan qa at jun tiquʼn tuʼn tbʼant kyuʼn. Noqtzun tuʼnj, aj telqʼan jun xjal in kubʼ tyekʼin qa mas nim kyoklen qe tiʼchaq toj twitz ik tzeʼn Jehová, aju tbʼi ex qe tkawbʼil.
6 Qqʼonk qwiʼ tiʼj Zacarías 5:3, 4 jatumel in tzaj tqʼamaʼn qa kʼokex «mya bʼaʼn tuj tja ju xjal in elqʼan» ex qa ax tuʼn tten, ex kbʼajeltoq t-xiten. A t-xilen jlu qa jaku tzʼel toj qʼanchaʼl ex jaku txi tbʼinchaʼn Jehová alkyexku matij il in bʼant tuʼn jun tmajen. Jakulo kubʼ tewin jun xjal til kywitz aj kawil, twitz tpatrón, kywitz ansyan ex qa kywitz ttat. Noqtzun tuʼnj, mlay kubʼ tewin til twitz Jehová, aju in tzaj ttziyen qa tkyaqil kʼelel toj qʼanchaʼl tuʼn (Heb. 4:13). In che tzalaj tmajen Jehová aj kyten kyukʼil xjal in nok tilil kyuʼn tuʼn kyten «bʼaʼn tuj tkyaqil» (Heb. 13:18).
7. ¿Tiʼ xnaqʼtzbʼil in tzaj tqʼoʼn qe aju uʼj in lipen ok tqʼoʼn Zacarías twitz tiʼj?
7 In kubʼ tnaʼn Jehová nya bʼaʼn tuʼn alkyexku tten elqʼabʼil. Nim toklen toj qwitz
tuʼn tok qojtzqiʼn qe tkawbʼil Jehová tiʼj alkye bʼaʼn ex nya bʼaʼn, ex tuʼn kyjapun quʼn. Ex qa ma qo anqʼin ik tzeʼn in tzaj kyqʼamaʼn tkawbʼil, in jaw qnimsaʼn tbʼi. Iktzun tten mlay kubʼ qʼoʼn qkastiw junx kyukʼil qeju in kubʼ kyximen tuʼn miʼn t-xi kynimen qe tkawbʼil.JAPUNX TWI QYOL QUʼN «TKYAQIL QʼIJ»
8-10. a) ¿Tiʼ aju yol in xi qtziyen toj tbʼi Jehová? b) ¿Alkye yol tqʼama Sedequías toj tbʼi Jehová ex mintiʼ ok tqʼoʼn toklen?
8 Yajxitl, tkuʼx jun kawbʼil toj uʼj bʼalqʼiʼn tiʼj kye qeju in xi kyqʼamaʼn jun kyyol nya ax tok toj tbʼi Jehová (Zac. 5:4). Aj t-xi qqʼamaʼn jun qyol toj tbʼi Jehová, jaku tzʼok ik tzeʼn aj t-xi qqʼamaʼn qa ax tok jun tiʼ, ik tzeʼn aj t-xi qtziyen jun qyol nim toklen qa kbʼantel jun tiʼ quʼn moqa miʼn.
9 Aj t-xi qtziyen jun qyol toj tbʼi Jehová, nya jun saqchbʼil jlu. Qbʼinx aju ikʼ tiʼj Sedequías, aju mankbʼil aj kawil kawin toj tnam Jerusalén. Xi ttziyen toj tbʼi Jehová qa tuʼn tokx tqʼon tibʼ tjaqʼ tkawbʼil aj kawil te tnam Babilonia. Noqtzun tuʼnj, mintiʼ ok tqʼoʼn toklen tyol ex mintiʼ «japun tuʼn aju yol otoq txi ttziyan». Aju tzaj tiʼj tuʼn jlu, tqʼama Jehová qa ax toj tnam Babilonia tuʼn tkyim (Ezeq. 17:16).
10 Tajtoq Jehová tuʼn tok tqʼoʼn Sedequías toklen tyol otoq txi ttziyen toj tbʼi (2 Crón. 36:13). Noqtzun tuʼnj, mintiʼ japun tuʼn ex xi tqanin onbʼil te tnam Egipto tuʼn tetz klet tjaqʼ tkawbʼil tnam Babilonia. Mintiʼ tajbʼen aju bʼant tuʼn (Ezeq. 17:11-15, 17, 18).
11, 12. a) ¿Alkye yol mas nim toklen jaku txi qtziyen? b) ¿Tzeʼn jaku tzʼonin qyol o txi qtziyen te Jehová tiʼj qanqʼibʼil tkyaqil qʼij?
11 Ax ikx in che ok tbʼiʼn Jehová qe yol in xi qtziyen te. Mintiʼ in nok tqʼoʼn te jun saqchbʼil, ex il tiʼj tuʼn tok qqʼoʼn kyoklen tuʼn qokx tkʼamoʼn (Sal. 76:11). Aju tziybʼil mas nim toklen xi qtziyen te Jehová, aju tej t-xi qqʼamaʼn qa tuʼn qajbʼen te ex noq tiʼxku tuʼn tbʼaj toj qanqʼibʼil.
12 ¿Alkye tten in japun qyol xi qtziyen te Jehová tuʼn qajbʼen te? Tukʼilju qmod in kubʼ qyekʼin aj qok weʼ kywitz joybʼil, qa chʼin ex qa matij qe. Kyuʼn jlu kbʼel qyekʼin qa in nok qqʼoʼn toklen qyol xi qqʼamaʼn te Jehová tuʼn qajbʼen te «tkyaqil qʼij» (Sal. 61:8). Jun techel, qa at jun xjal toj aqʼuntl ex qa toj tja xnaqʼtzbʼil in kubʼ tyekʼin tajbʼil qiʼj, ¿jun ratpe in qo el oq tiʼj ex in kubʼpe qyekʼin qa qaj tuʼn qnimen te Jehová? (Prov. 23:26). Qatzun qjunalx in qo ajbʼen te Jehová kyxol qe toj qja, ¿in xipe qqanin te tuʼn qtzaj tonin tuʼn tkubʼ qyekʼin qmod ik tzeʼn jun okslal? Noq tiʼxku in bʼaj qiʼj, ¿in qo naʼnpe Dios tkyaqil qiʼj tuʼntzun t-xi qqʼoʼn chjonte te Jehová tiʼj tkʼujlabʼil ex tuʼnju in tzaj tyekʼin qbʼe? ¿In nelpe qpaʼn ambʼil tuʼn quʼjin tiʼj Tyol tkyaqil qiʼj? Ax tok, xi qtziyen te Jehová qa kbʼantel tkyaqil jlu quʼn tej t-xi qqʼamaʼn tuʼn qajbʼen te. Tuʼn tjapun twi qyol xi qtziyen te Jehová, a t-xilen tuʼn qnimen. Qa ma txi qqʼoʼn aju mas tbʼanel toj qajbʼebʼil te, kbʼel qyekʼin qa kʼujlaʼn quʼn ex qa ax tok o txi qqʼoʼn qchwinqlal te. Aju qkʼulbʼil in xi qqʼoʼn te Jehová, at toklen tukʼilju alkye tten in qo anqʼin tkyaqil qʼij. Qa ma japun twi qyol, tzul tiʼn tbʼanel qe, tuʼnju in tzaj ttziyen Dios qa tzul tqʼoʼn jun tbʼanel ambʼil kye qeju kukx in che ajbʼen te (Deut. 10:12, 13).
13. ¿Tiʼ xnaqʼtzbʼil in nel qiʼn tiʼj tqaqin tilbʼilal ok tqʼoʼn Zacarías twitz tiʼj?
13 Aju tqaqin tilbʼilal ok tqʼoʼn Zacarías twitz tiʼj, in qo tzaj tonin tuʼn tel qnikʼ tiʼj qa mintiʼ tuʼn qelqʼan ex qa il tiʼj tuʼn tjapun twi qyol. Ex in nel qnikʼ tiʼj qa mintiʼ ik tnaʼl qe aj Judiy tuʼn Jehová, maske i el txalpaj. El tnikʼ Jehová qa ateʼtoq aj qʼoj kyiʼj ex qa tuʼn jlu in tzajtoq nya bʼaʼn kyiʼj. Tkyaqil maj in japun twi tyol Jehová, ex tuʼn jlu in kubʼ tyekʼin techel qwitz tiʼ tuʼn tbʼant quʼn. Nya oʼkxju, ax ikx jaku tzʼok qeʼ qkʼuʼj tiʼj qa tzul tonin qoʼ tuʼn tjapun twi qyol. Jun tten in qo tzaj tonin, aju in tzaj tqʼoʼn qʼuqbʼil qkʼuʼj qa toj chʼintl ambʼil kbʼel t-xiten nya bʼaʼn at twitz Txʼotxʼ. Aju juntl tilbʼilal ok tqʼoʼn Zacarías twitz tiʼj, in tzaj tyekʼin qe qa ax tok kjapunel twi tyol Jehová o tzaj ttziyen.
IN XI QʼIʼN NYA BʼAʼN TOJ «TQʼUQBʼIL»
14, 15. a) ¿Alkye twuqin tilbʼilal ok tqʼoʼn Zacarías twitz tiʼj? (Qʼonka twitza tiʼj tilbʼilal 2). b) ¿Tiʼ in kubʼ techlaʼn aju xuʼj tkuʼx toj kaj? c) ¿Tiquʼn kux tjupuʼn anjel xuʼj toj kaj?
14 Tej otoqxi tzʼok tqʼoʼn Zacarías twitz tiʼjju uʼj bʼalqʼiʼn tiʼj, xi tqʼamaʼn jun anjel jlu te: «Qʼonka kwent tiʼj aju ktzajel yekʼun teya jaʼlo». ¿Alkye twuqin tilbʼilal ok tqʼoʼn twitz tiʼj? Ok tqʼoʼn twitz tiʼj «jun kajón», moqa jun chiʼl (kjawil uʼjit Zacarías 5:5-8). Aju kaj lu tkubʼtoq jun tmaqsil «plom ttxʼotxʼil». Tej tel qʼiʼn tmaqsil, ok tqʼoʼn Zacarías twitz tiʼj qa «attoq jun xuʼj qʼuql tkuʼx tuj». Xi tchikʼbʼaʼn anjel te qa atzun «techal tiʼj ju mya bʼaʼn». Noqpe qo ximen tiʼj xobʼajil kubʼ tnaʼn aj sanjel tej tok tkeʼyin qa tajtoq xuʼj tuʼn tjatz toj kaj. Atzunte anjel jun rat naj kux tqʼoʼn xuʼj toj kaj juntl maj ex kubʼ tmaqsiʼn kaj. ¿Tiʼ t-xilen tkyaqil jlu?
15 A jlu in tzaj tyekʼin qe qa mlay tzikʼx tuʼn Jehová tuʼn tten jun nya bʼaʼn toj ttnam. Aj tok tqʼoʼn twitz tiʼj jun nya bʼaʼn, jun rat kʼelel tiʼn (1 Cor. 5:13). Kubʼ tyekʼin anjel lu tej tkubʼ tmaqsiʼn naj aju kaj.
Ok tilil tuʼn Jehová tuʼn tten saq aju kʼulbʼil in xi qʼet te. (Qʼonka twitza kyiʼj taqikʼ 16 a 18).
16. a) ¿Tiʼ bʼaj tiʼj kaj ok tqʼoʼn Zacarías twitz tiʼj? (Qʼonka twitza tiʼj tilbʼilal 3). b) ¿Jatumel xi qʼiʼn kaj kyuʼn xuʼj tok kyxikʼ?
16 Yajxitl, kubʼ kyyekʼin kyibʼ kabʼe xuʼj toktoq kyxikʼ nim tipumal ik tzeʼn jun matij pájaro (kjawil uʼjit Zacarías 5:9-11). Junxitl qe xuʼj lu tukʼilju xuʼj tok tbʼi te «mya bʼaʼn», aju tkuʼx toj kaj. Ok tqʼoʼn Zacarías twitz tiʼj qa jaw kyiʼn aju kaj ex xi kyiʼn tuʼn kyxikʼ nim kyipun. ¿Jatumel xi qʼiʼn xuʼj tukʼil kaj? Xi qʼiʼn toj Babilonia. ¿Tiquʼn xi qʼiʼn atztzu?
17, 18. a) ¿Tiquʼn bʼaʼn tuʼn t-xi qʼiʼntoq nya bʼaʼn toj tnam Babilonia? b) ¿Tiʼ qximbʼetz ktel tiʼj nya bʼaʼn?
17 Toj twitz Zacarías ex qeju txqantl aj Israel, tbʼaneltoq qa ma txi qʼiʼn nya bʼaʼn toj tnam Babilonia. Otoq che anqʼin toj lugar aju, jatumel in che yaẍintoq xjal ex in che kʼulintoq kywitz tilbʼilal. Ex otoq tzʼok tilil kyuʼn tkyaqil qʼij tuʼn tkubʼ tiʼj nya bʼaʼn lu kyuʼn. Jakutoq txi kyqʼamaʼn qa atz taʼtoq nya bʼaʼn. Nimlo onin tilbʼilal lu kyiʼj, tuʼnju xi tyekʼin Jehová kye qa kukx ktel ttnam saq.
18 Aju ok tqʼoʼn Zacarías twitz tiʼj, ax ikx tzaj tnaʼn kye aj Judiy tuʼn miʼn txi kyqʼoʼn ambʼil tuʼn tbʼaj tzʼilset kykʼulbʼil te Dios. Mintiʼ tuʼn t-xi qʼet ambʼil te nya bʼaʼn toj ttnam Jehová ex mlay txi qʼet ambʼil te toj ambʼil tzul. O qo tzaj tiʼn Jehová toj ttnam saq, jatumel in kubʼ qnaʼn tkʼujlabʼil ex qa xqʼuqin qoʼ tuʼn. Noqtzun tuʼnj, ax ikx qe at qoklen tiʼj tuʼn qonin tuʼn kukx tten te saq. ¿Qajpe tuʼn tbʼant quʼn? Mintiʼ tuʼn t-xi qʼet ambʼil te nya bʼaʼn toj mujbʼabʼil in tzaj tqʼoʼn Jehová te ttnam.
IN JAW TNIMSAʼN JUN TNAM SAQ TBʼI JEHOVÁ
19. ¿Tiʼ kyxilen qe aqeju tilbʼilal ok tqʼoʼn Zacarías twitz tiʼj, aju in qo jaw labʼin kyiʼj?
19 Aju tqaqin ex twuqin tilbʼilal ok tqʼoʼn Zacarías twitz tiʼj, in tzaj tqʼoʼn jun kawbʼil kye qeju in che elqʼan. Ax ikx in tzaj tnaʼn qe qa mlay tzikʼx jun nya bʼaʼn tuʼn Jehová. Il tiʼj tuʼn tel qikʼen aju nya bʼaʼn. Kyukʼil qe tilbʼilal ok tqʼoʼn Zacarías twitz tiʼj, in tzaj ttziyen Jehová qe qa mlay kubʼ tqʼoʼn qkastiw qa ma tzʼok tilil quʼn tuʼn ttzalaj. Kkolil qiʼj ex qo tzajel tkʼiwlaʼn. Ax ikx in tzaj ttziyen qe qa kʼonil qiʼj tuʼn kukx tok tilil quʼn tuʼn qten saq tiʼj tkyaqilju kybʼinchbʼen xjal. Noqtzun tuʼnj, ¿tiquʼn jaku tzʼok qeʼ qkʼuʼj tiʼj qa kukx ktel kʼulbʼil axix tok? ¿Alkye yekʼbʼil at tiʼj qa kkolil Jehová tiʼj ttnam toj ambʼil jaʼlo, tuʼnju ya chʼix tul nimxix yajbʼil? Toj juntl xnaqʼtzbʼil kxel qtzaqʼweʼn qe xjel lu.