1, 2. Tej tkubʼ bʼaj tuʼn tok tkeʼyin Zacarías aju twuqin tilbʼilal, ¿tzeʼntoq ateʼ aj Judiy ateʼtoq toj Jerusalén?

TEJ tkubʼ bʼaj tuʼn tok tqʼoʼn Zacarías twitz tiʼj twuqin tilbʼilal, attoq nim tuʼn t-ximen tiʼj. Nimlo onin tiʼj aju ttziybʼil Jehová tuʼn tkubʼ tqʼoʼn kykastiw qeju in kubʼ kybʼinchaʼn nya bʼaʼn. Noqtzun tuʼnj, mintiʼtoq jun tiʼ otoq chʼexpaj. Nim xjal kukxtoq in che sbʼun ex in kubʼtoq kybʼinchaʼn nya bʼaʼn. Axpe ikx, naʼmxtoq tkubʼ bʼaj aju tja Jehová kyuʼn aj Judiy. ¿Tiquʼn jun rat kyaj kytzaqpiʼn aqʼuntl otoq txi tqʼoʼn Dios kye? ¿E meltzʼaj toj kytxʼotxʼ noq tuʼn kyximen tuʼn tten jun tbʼanel kyanqʼibʼil?

² Ojtzqiʼntoq tuʼn Zacarías qa aʼyeju aj Judiy e meltzʼaj toj Jerusalén attoq qʼuqbʼil kykʼuʼj tiʼj Jehová. In tzaj tqʼamaʼn Xjan Uʼj qa «otoq tzaj tmaʼn Dios tuj kyanmi» qe aj Judiy lu tuʼn tkyaj kyqʼoʼn kyja ex kykʼaʼẍ (Esd. 1:2, 3, 5). Otoq kyaj kytzaqpiʼn txʼotxʼ aju ojtzqiʼntoq kyuʼn wen, noq tuʼn kyxiʼ anqʼil toj jun lugar jatumel naʼmxtoq tok kyojtzqiʼn kykyaqil. Tuʼnju nimtoq toklen tuʼn tjaw bʼinchet juntl maj tja Dios toj kywitz, kubʼ kyximen tuʼn kybʼet  1,600 kilómetros toj jun bʼe jatumel in tzaj nim nya bʼaʼn.

3, 4. ¿Alkyeqe nya bʼaʼn e ok weʼ aj Judiy twitz tej kymeltzʼaj toj Jerusalén?

³ Tej kybʼet aj Judiy nim ambʼil, kubʼlo kyimen tzeʼn kyanqʼibʼil ktel toj Jerusalén aju akʼaj kytnam. Otoq tzʼok kybʼiʼn qa otoq tzʼok te jun tbʼanelxix tnam. Ex qeju tij xjal ok kykeʼyin jun tbʼanelxix tja Dios (Esd. 3:12). Noqwit junx o bʼet kyukʼil, ¿tiʼwtlo kubʼ qnaʼn tej tok qkeʼyin Jerusalén tnejel maj? ¿Tzajwitlo qbʼis tej tok qkeʼyin qa otoq che kubʼ xitj ja ex nojni tuʼn kʼul? ¿Kubʼwitlo qmojbʼaʼn qe nimaq tmuro Babilonia tukʼilju te Jerusalén, aʼyeju otoq che kubʼ xitj ex attoq jul kyoj? Mintiʼ tzaj kybʼis aj Judiy, tuʼnju otoq che ok xqʼuqin tuʼn Jehová ex otoq tzʼonin kyiʼj toj kybʼe. Tej kypon Jerusalén, kubʼ kybʼinchaʼn tnejel jun patbʼil oyaj jatumel attoq tja Dios. Atz e ok ten qʼol chojbʼil te Jehová tkyaqil qʼij (Esd. 3:1, 2). Nimtoq in che tzalaj ex mintiʼtoq jun tiʼ jaku tzaj kybʼis tuʼn.

⁴ Nya oʼkx oktoq kjawil kybʼinchaʼn aj Judiy juntl maj tja Dios, ax ikx iltoq tiʼj tuʼn tjaw kybʼinchaʼn juntl maj tnam. Iltoq tiʼj tuʼn tjaw kybʼinchaʼn juntl maj kyja ex tuʼn tkuʼx kyawaʼn kyawal tuʼn kywaʼn qe toj kyja (Esd. 2:70). Attoq nim aqʼuntl tuʼn tbʼant. Noqtzun tuʼnj, jun rat ok tilil kyuʼn aj qʼoj tuʼn tweʼ aqʼuntl. Ex bʼant jlu kyuʼn toj 15 abʼqʼi, atzun kye aj Judiy chebʼe chebʼe tzaj bʼaj kykʼuʼj (Esd. 4:1-4). Ex toj abʼqʼi 522 tjaqʼ ambʼil qʼiʼn quʼn jaʼlo e ok weʼ twitz juntl nya bʼaʼn, tzaj tqʼamaʼn aj kawil te tnam Persia tuʼn tweʼ tkyaqil aqʼuntl toj Jerusalén. ¿Tzajpe tyekʼin jlu qa mlaytoq jaw bʼinchet juntl maj tnam? (Esd. 4:21-24).

5. ¿Tiʼ bʼant tuʼn Jehová tuʼn tonin tiʼj ttnam?

⁵ Ojtzqiʼntoq tuʼn Jehová tiʼ kyajtoq aj Judiy. Tuʼntzunju, xi tyekʼin te Zacarías aju mankbʼil tilbʼilal tuʼn t-xi tnaʼn kye xjal qa kʼujlaʼn qe tuʼn Jehová ex qa nim toklen toj twitz aju otoq bʼant kyuʼn. Ax ikx, tajtoq Jehová tuʼn tok kybʼiʼn xjal qa ma txi tzyet juntl maj aqʼuntl kyuʼn oktoq che okel t-xqʼuqin. Xi ttziyen Jehová jlu tiʼj tja kjawil bʼinchet juntl maj: «Kbʼantel jlu qa ma txi kynimane tyol Qman aju Kydiose» (Zac. 6:15).

6. a) ¿Alkye tten in xi tzyet aju twajxaqin tilbʼilal ok tkeʼyin Zacarías? (Qʼonka twitza tiʼj tnejel tilbʼilal). b) ¿Tiquʼn at junxichaq kykoloril qe chej?

⁶ Aju twajxaqin ex mankbʼil tilbʼilal ok tqʼoʼn twitz Zacarías tiʼj, bʼalo a jlu kʼonil qiʼj tuʼn tchʼiy mas qʼuqbʼil qkʼuʼj (kjawil uʼjit Zacarías 6:1-3). Qo ximen tiʼjju ok tkeʼyin aj sanjel: kyaje kar ya bʼantni kyten toj qʼoj in che etz ojqelan wen kyxol kabʼe witz qʼan kʼuxbʼil kytxʼotxʼil. Aʼyeju chej in che jukʼuʼn kyiʼj kar junxichaq kykoloril, a jlu in nonin qiʼj tuʼn tel qnikʼ kyiʼj kar. In xi tqanin Zacarías jlu: «Tat, ¿ti t-xilen jlu?» (Zac. 6:4). Tuʼnju at toklen tilbʼilal ok tkeʼyin Zacarías qukʼil, ax ikx qe in kubʼ qxjelin tiʼ t-xilen.

7, 8. a) ¿Tiʼ in kubʼ kyechlaʼn kabʼe witz? b) ¿Tiquʼn bʼinchan qe witz tukʼil qʼan kʼuxbʼil?

⁷ Toj Tyol Dios in che ajbʼen witz tuʼn kykubʼ techlaʼn kawbʼil. Aʼyeju witz in tzaj yekʼin kyoj tilbʼilal ok tkeʼyin Zacarías chʼixme ik qe tzeʼn witz in che kanet quʼn toj uʼj te Daniel. Jun kyxol qe jlu in kubʼ techlaʼn toklen Jehová tuʼn tkawin tibʼaj tkyaqil, aju ktel te jumajx. A juntl in kubʼ techlaʼn Tkawbʼil Mesías, aju at toj tqʼobʼ Jesús (Dan. 2:35, 45). Toj 1914 tej tok qʼoʼn toklen Jesús te aj  kawil, aʼyeju kabʼe witz lu ateʼ junx ex at kyoklen tuʼn tbʼant tajbʼil Dios tzalu twitz Txʼotxʼ.

⁸ ¿Tiquʼn bʼinchan qe tukʼil qʼan kʼuxbʼil? Ik tzeʼn qʼan pwaq, ax ikx aju qʼan kʼuxbʼil nim toklen. Xi tqʼamaʼn Jehová tuʼn tajbʼen qʼan kʼuxbʼil tuʼn tjaw bʼinchet ja xbʼalun ex tiʼj tja toj Jerusalén (Éx. 27:1-3; 1 Rey. 7:13-16). Tuʼntzunju, in tzaj kyyekʼin kabʼe witz lu bʼinchan tukʼil qʼan kʼuxbʼil aju nimxix toklen tkawbʼil Jehová tibʼaj tkyaqil ex aju Tkawbʼil Mesías, aqeju kbʼantel kyuʼn tuʼn kyten xjal toj txubʼtxaj ex tuʼn ttzaj kykʼamoʼn nim kʼiwlabʼil.

9. ¿Alkyeqe ateʼkx kyoj kar, ex tiʼ in bʼant kyuʼn?

⁹ ¿Tiʼ in kubʼ kyechlaʼn kar ex qeju ateʼkx kyoj? Aʼyeju ateʼkx kyoj kar anjel qe, bʼalo nukʼun kyten toj kʼlojin (kjawil uʼjit Zacarías 6:5-8). «In che etz twitz Qman aju Tajaw Tkyaqil twitz txʼotxʼ» tuʼn tbʼant jun tiʼ nim toklen kyuʼn. ¿Alkye? In chex samaʼn kyoj lugar tuʼn kyxqʼuqin tiʼj ttnam Jehová kyiʼj aj qʼoj, mas tiʼj tnam Babilonia, aju «txʼotxʼ tuj tbʼanqʼabʼ qʼij». Miʼn txi tqʼoʼntl Jehová ambʼil tuʼn kyten tmajen pres toj tnam Babilonia. Ax tok, xi tqʼuqbʼaʼn jlu kykʼuʼj qeju xjal in che aqʼunantoq tiʼj tja Dios toj tqʼijlalil Zacarías. Qʼuqlitoq kykʼuʼj tiʼj qa mlay weʼ aqʼuntl kyuʼn aj qʼoj.

10. ¿Tiʼ in tzaj ttziyen qe aju yol kyaj tqʼamaʼn Zacarías kyiʼj kar ex qeju ateʼkx kyoj?

¹⁰ Ik tzeʼn bʼaj toj tqʼijlalil Zacarías, kukx in che ajbʼen qe anjel tuʼn Jehová tuʼn kyxqʼuqin ex tuʼn kyonin kyiʼj tmajen (Mal. 3:6; Heb. 1:7, 14). Atxix toj 1919 ya mintiʼtl i ten okslal skʼoʼn maj tuʼn xewbʼaj xjan tjaqʼ tipumal Nintz tnam Babilonia. Aju okslabʼil ax tok kukx in chʼiy, maske in che el ikʼun kyuʼn aj qʼoj (Apoc. 18:4). Tuʼnju in che xqʼuqin anjel qiʼj, mintiʼ tuʼn qtzaj xobʼ qa ktel juntl maj aju ttnam Dios tjaqʼ tipumal okslabʼil nya ax tok (Sal. 34:7). Sino qʼuqlixix qkʼuʼj tiʼj qa aʼyeqe tmajen Jehová twitz tkyaqil Txʼotxʼ kukx qo ajbʼel te tukʼil nim tzalajbʼil. Aj qkubʼ ten ximel tiʼj tilbʼilal ok tkeʼyin Zacarías, in kubʼ qnaʼn qa xqʼuqin qoʼ tjaqʼ kyxlekun qeju kabʼe witz.

11. ¿Tiquʼn mintiʼ tuʼn qtzaj xobʼ aj kyok tzoqpaj aj qʼoj tij ttnam Dios toj ambʼil tzul?

¹¹ Toj chʼintl ambʼil, aʼyeju aj kawil ateʼkx tjaqʼ tipumal Satanás kʼokel kychmon kyibʼ tuʼn kyok te jun kʼloj tnam, aju kʼokel tilil tuʼn tuʼn tkubʼ tnajsaʼn ttnam Dios (Ezeq. 38:2, 10-12; Dan. 11:40, 44, 45; Apoc. 19:19). In tzaj tqʼamaʼn yol kyaj tqʼamaʼn Ezequiel qa aju kʼloj tnam lu kbʼel noj twitz Txʼotxʼ tuʼn ik tzeʼn muj. Ax ikx in tzaj tqʼamaʼn qa qʼuqli qe tibʼaj kychej ex che okel tzoqpaj tiʼj ttnam Dios tukʼil nim kyqʼoj (Ezeq. 38:15, 16). * ¿Okpe qo tzajel xobʼ? Miʼn. Aju kʼloj tsoldad Jehová ktel qtxlaj. Toj ambʼil te nimxix yajbʼil, che okel xqʼuqin tmajen Dios kyuʼn nimxix kyajlal anjel, aju kbʼel kynajsaʼn kykyaqil qeju in nel kyikʼen tkawbʼil Jehová (2 Tes. 1:7, 8).  ¡Tbʼanelxix qʼij aju! Noqtzun tuʼnj, ¿alkye nejni kywitz nimxix kyajlal t-anjel Jehová?

12, 13. a) ¿Tiʼ in xi tqʼamaʼn Jehová tuʼn tbʼant tuʼn Zacarías? b) ¿Tiquʼn ojtzqiʼn quʼn qa aju xjal tok tbʼi te «T-xul» in nok te techel Jesucristo?

¹² Oʼkx Zacarías ok qʼonte twitz kyiʼj qeju wajxaq tilbʼilal tkuʼx toj tuʼj. In bʼant jun tiʼ tuʼn jaʼlo aju kʼokel kykeʼyin txqantl ex kʼonil kyiʼj qeju in jaw kybʼinchaʼn tja Dios juntl maj (kjawil uʼjit Zacarías 6:9-12). In xi tqʼamaʼn Jehová te Zacarías tuʼn tyolin tukʼil Heldai, Tobiya ex Jedayá, aʼyeju tzma ẍe ul toj Babilonia, tuʼn t-xi tqanin saq pwaq ex qʼan pwaq kye. Kyukʼil kʼuxbʼil lu, aju aj sanjel kbʼantel jun tbʼanel «coron» tuʼn (Zac. 6:11). ¿Alqe kʼajbʼel coron? ¿Kʼajbʼelpe tuʼn aj kawil Zorobabel, aju tzajni tiʼj tyajil Judá ex t-xeʼchel David? Miʼn. In xi tqʼamaʼn Jehová te Zacarías tuʼn tjax tqʼoʼn coron toj twiʼ tnejel pal Josué. Ok che jawil labʼin xjal aj tok kykeʼyin jlu.

¹³ ¿Ape t-xilen jlu qa kʼokel tnejel pal Josué te aj kawil? Miʼn. Mlay bʼant tuʼn tok te aj kawil tuʼnju nya atz tzajni kyiʼj toj tja David. Kubʼ techlaʼn toklen aju tuʼn tbʼaj tiʼjju xjal kʼokel te aj kawil ex pal te jumajx, aju in nok qʼoʼn tbʼi te «T-xul». ¿Alkye xjal lu? In tzaj tyekʼin Tyol Dios qa a jlu a Jesucristo (Is. 11:1; Mat. 2:23). *

14. ¿Tiʼ aqʼuntl in bʼant tuʼn Jesús ik tzeʼn jun aj kawil ex tnejel pal?

¹⁴ A Jesús aj kawil ex tnejel pal, ex a nejni kywitz nimxix kyajlal t-anjel Jehová. In nok tililxix tuʼn tuʼn taqʼunan tuʼntzun kyten tmajen Dios toj txubʼtxaj tzalu twitz Txʼotxʼ, jatumel at nim nya bʼaʼn (Jer. 23:5, 6). Toj chʼintl ambʼil, kbʼel kyiʼj tnam tuʼn ex iktzun tten kʼonil tiʼj toklen Jehová tuʼn tkawin ex kkolil kyiʼj tmajen (Apoc. 17:12-14; 19:11, 14, 15). Noqtzun tuʼnj, naʼmxtoq tpon qʼij lu, at jun matij aqʼuntl tuʼn tbʼant tuʼn Jesús moqa «T-xul».

15, 16. a) ¿Alquʼn o ten juntl maj kʼulbʼil axix tok ex tuʼn tten saq toj ambʼil jaʼlo, ex tzeʼn o bʼant tuʼn? b) ¿Tzeʼn kʼokel twitz Txʼotxʼ aj tkubʼ bʼaj Tkawbʼil Jesús toj Mil Abʼqʼi?

¹⁵ Nya oʼkx ok qʼoʼn toklen Jesús te aj kawil ex tnejel pal, ax ikx xi qʼoʼn toklen tuʼn tjaw «tbʼinchaʼn juntl maj tja Qman» (kjawil uʼjit Zacarías 6:13). Bʼant aqʼuntl lu tuʼn toj abʼqʼi 1919 tej kyetz tiʼn tmajen Dios tjaqʼ tipumal Nintz tnam Babilonia ex tuʼn tten kʼulbʼil axix tok juntl maj. Ax ikx ok tqʼoʼn toklen «aju majen in bʼant taqʼun [...] ex at tnabʼl» tuʼntzun tkubʼ nej twitz kʼulbʼil axix tok tzalu twitz Txʼotxʼ (Mat. 24:45). Ax ikx o tzʼok tilil tuʼn Jesús tuʼn kyten tmajen Jehová saq, tuʼntzun tonin kyiʼj tuʼn kykʼulin te Kydios toj jun tten saq (Mal. 3:1-3).

¹⁶ Toj Tkawbʼil te Mil Abʼqʼi, kʼonil Jesús kyukʼil qeju 144,000 aj kawil ex pal tuʼn kyok xjal te tzʼaqli. Aj tbʼant jlu, oʼkx qe tmajen Dios che tel twitz Txʼotxʼ. Iktzun tten ktel kʼulbʼil axix tok.

17. a) ¿Tiʼ xi ttziyen Jehová kye aj Judiy? b) ¿Tzeʼn onin tziybʼil lu kyiʼj?

¹⁷ ¿Tzeʼn onin kyiʼj aj Judiy aju tqanil tqʼama Zacarías? Otoq txi ttziyen Jehová kye qa kʼonil kyiʼj ex qa kxqʼuqil kyiʼj tuʼntzun tkubʼ bʼaj tja. A jlu xi tqʼuqbʼaʼn kykʼuʼj. Pero, ¿tzeʼn kbʼeltoq bʼaj aqʼuntl kyuʼn tuʼnju nya nim kybʼet at? Tukʼilju  tqanil xi tqʼamaʼn Zacarías, onin kyiʼj xjal tuʼn miʼn kyxobʼ ex tuʼn ttzaqʼwet kyxjel. Nya oʼkx qeju tbʼanel xjal Heldai, Tobiya ex Jedayá che oniltoq tiʼj aqʼuntl, ax ikx tqʼama Jehová qa attoq txqantl che oniltoq tuʼn tjaw bʼinchet «tja Qman» (kjawil uʼjit Zacarías 6:15). Qʼuqlitoq kykʼuʼj aj Judiy qa kʼonil Jehová kyiʼj. Tuʼntzunju, jun rat xi tzyet aqʼuntl kyuʼn juntl maj, maske el tiʼn aj kawil te Persia ambʼil tuʼn tbʼant. Otoq tzʼok jlu te kye ik tzeʼn jun matij witz, pero a Jehová xi tbʼinchaʼn tiʼj jlu. Tuʼntzunju, toj abʼqʼi 515 tjaqʼ ambʼil jaʼlo kubʼ bʼaj tja Dios (Esd. 6:22; Zac. 4:6, 7). Noqtzun tuʼnj, aʼyeju tyol Jehová in tzaj kyqʼamaʼn juntl tiʼ nim toklen aju in japun twiʼ toj ambʼil jaʼlo.

18. ¿Alkye tten in japun Zacarías 6:15 toj ambʼil jaʼlo?

¹⁸ Toj ambʼil jaʼlo nim millón xjal in che ajbʼen te Dios. Nim in che tzalaj aj t-xi kyqʼoʼn «jun oyaj» tiʼj kyqʼinumabʼil, ik tzeʼn kypwaq, kyipumal ex ambʼil (Prov. 3:9). Iktzun tten in che onin tiʼj kʼulbʼil axix tok. Jaku tzʼok qeʼ qkʼuʼj tiʼj qa nim toklen toj twitz Jehová tuʼnju kukx in qo ajbʼen te ex aju in bʼant quʼn tiʼj. Bʼaʼn tuʼn ttzaj qnaʼn qa xi kyqʼoʼn Heldai, Tobiya ex Jedayá qe tiʼchaq tuʼn tbʼant coron tuʼn Zacarías. Aju coron lu ajbʼen tuʼn ttzaj naʼn oyaj xi kyqʼoʼn tiʼj kʼulbʼil axix tok (Zac. 6:14). Ax ikx, mlay tzʼel naj tiʼj tkʼuʼj Jehová aju in bʼant quʼn tuʼn qajbʼen te ex aju qkʼujlabʼil in kubʼ qyekʼin tiʼj (Heb. 6:10).

19. ¿Tzeʼn jaku tzʼonin qiʼj aʼyeju tilbʼilal e ok tkeʼyin Zacarías?

¹⁹ Tkyaqilju o bʼant tiʼj kʼulbʼil axix tok toj mankbʼil tqʼijlalil, jun yekʼbʼil jlu tiʼj tkʼiwlabʼil Jehová ex qa a Jesús qʼil twitz aqʼuntl. Aqoʼ tmajen Dios atoʼ toj jun tnam mintiʼ in yukch, kyuwxix taʼ ex ktel te jumajx. Aju t-ximbʼetz Jehová tiʼj kʼulbʼil axix tok ok kjapunel twiʼ, ik tzeʼn kyaj tqʼamaʼn Zacarías. Tuʼntzunju, qkʼujlank qoklen at toj ttnam Jehová ex qbʼinx qe «tyol» Jehová. Qa ma bʼant jlu quʼn, qo okel t-xqʼuqin Jesús aju aj Kawil ex Tnejel Pal, ax ikx kyuʼn anjel ateʼkx kyoj kar. Qqʼonk tilil tuʼn qonin tiʼj kʼulbʼil axix tok. Iktzun tten, jaku tzʼok qeʼ qkʼuʼj tiʼj qa qo kletel tuʼn Jehová toj mankbʼil tqʼijlalil tiʼj tkyaqilju tiʼchaq ex te jumajx.