1, 2. a) ¿Tzeʼn o sbʼun Satanás kyiʼj xjal? b) ¿Tiʼ qo xnaqʼtzal tiʼj toj xnaqʼtzbʼil lu?

ATXIX toj tqʼijlalil Adán ex Eva, tzaj tzyet tuʼn tsbʼun Satanás kyiʼj xjal kyukʼil nya ax tok yol (Juan 8:44). Kyxol jlu, at aju nya ax tok xnaqʼtzbʼil kyiʼj kyimni ex qa in xiʼ kyanmi xjal anqʼil toj juntl plaj. Kyuʼn xnaqʼtzbʼil lu at nim kykostumbr xjal ex tkyaqilju nya ax tok xnaqʼtzbʼil kyiʼj kyimni. Tuʼntzunju, aj tkyim jun toj tja jun erman moqa jun xjal toj jun aldea, at junjun erman in nok tilil kyuʼn tuʼn kukx kyajbʼen te Jehová tuʼntzun miʼn tnaj kyokslabʼil (Jud. 3).

² Qa ma tzaj tqʼamaʼn jun xjal tuʼn tkubʼ qbʼinchaʼn jun kostumbr nya bʼaʼn toj twitz Jehová, ¿tiʼ kʼonil qiʼj tuʼn qkolin tiʼjju in tzaj t-xnaqʼtzaʼn Tyol Dios kyiʼj kyimni? (Efes. 6:11). ¿Tzeʼn jaku qo onin ex tzeʼn jaku txi qqʼuqbʼaʼn tkʼuʼj jun erman in nok weʼ twitz jun nya bʼaʼn ik tzeʼn jlu? Toj xnaqʼtzbʼil lu kʼelel qnikʼ tiʼj onbʼil in tzaj tqʼoʼn Jehová qe. Noqtzun tuʼnj, tnejel qo xnaqʼtzal tiʼjju in tzaj t-xnaqʼtzaʼn Tyol Dios tiʼj kamik.

3. ¿Tiʼ nya bʼaʼn tzaj tuʼn tnejel nya ax tok yol?

³ Mintiʼ kubʼ t-ximen Dios tuʼn kykyim xjal, sino tuʼn kyanqʼin te jumajx. Tuʼn tbʼant jlu, iltoq tiʼj tuʼn t-xi tbʼiʼn Adán ex Eva tyol Jehová, tuʼntzunju xi tqʼoʼn kawbʼil lu kye: «Atzunju twitz tzeʼ tuʼn tel nikʼbʼaj tiʼj bʼaʼn ex tiʼj mya bʼaʼn, miʼn txi tloʼna; qatzun ma txi tloʼna, ax tok kymela» (Gén. 2:16, 17). Noqtzun tuʼnj, ajbʼen jun kan tuʼn Satanás tuʼn t-xi tqʼamaʼn jlu te Eva: «Mlay che kyime». Bʼisbʼajil tuʼnju xi tbʼiʼn Eva nya ax tok yol lu ex xi tloʼn twitz tzeʼ, ex axju bʼant  tuʼn tchmil (Gén. 3:4, 6). Iktzun tten e ok kykyaqil xjal te aj il ex e kyaj tjaqʼ kamik (Rom. 5:12).

4, 5. ¿Tiʼ in bʼant tuʼn Satanás tuʼn kukx tsbʼun kyiʼj xjal?

⁴ Ik tzeʼn otoq tqʼama Jehová, kyim Adán ex Eva. Pero mintiʼ xi tkolin Satanás tuʼn t-xi tqʼamaʼn nya ax tok yol tiʼj kamik. Tej tbʼet ambʼil xi tzyet tuʼn tyolin kyiʼj junjuntl nya ax tok yol. Jun techel, tqʼama qa kukx in kyaj anqʼin tanmi jun xjal aj tkyim ex bʼalo in xiʼ tanmi toj juntl lugar. O che kubʼ sbʼuʼn nim xjal tuʼn junxichaq nya ax tok xnaqʼtzbʼil tiʼj kamik ex axju in bʼaj toj ambʼil jaʼlo (1 Tim. 4:1).

⁵ ¿Tiquʼn nim xjal in xi kynimen nya ax tok tyol Satanás? Tuʼnju ojtzqiʼn tuʼn qa in tzaj qbʼis aj tkyim jun xjal ex in najbʼen jlu tuʼn tuʼn tsbʼun qiʼj. Tuʼnju o qo kubʼ tbʼinchaʼn Jehová tuʼn qanqʼin te jumajx, nya qaj tuʼn qkyim (Ecl. 3:11). Tuʼntzunju in nok qqʼoʼn kamik te jun aj qʼoj qiʼj (1 Cor. 15:26).

6, 7. a) ¿Ope kubʼ tewin Satanás aju axix tok xnaqʼtzbʼil kyiʼj kyimni? Chikʼbʼantza. b) ¿Tzeʼn in nonin axix tok xnaqʼtzbʼil kyiʼj kyimni tuʼn miʼn qtzaj xobʼ?

⁶ O tzʼok tilil tuʼn Satanás tuʼn tkubʼ tewin axix tok tiʼj kamik, pero mintiʼ o bʼant tuʼn. Axpe ikx, toj ambʼil jaʼlo o tzʼel kynikʼ nim xjal tiʼj jlu ex in xi kyqʼamaʼn aju in tzaj t-xnaqʼtzaʼn Tyol Dios tiʼj kamik ex tiʼjju qʼuqbʼil kykʼuʼj xjal o che kyim (Ecl. 9:5, 10; Hech. 24:15). In tzaj kyqʼuqbʼaʼn axix tok xnaqʼtzbʼil qkʼuʼj ex tuʼn jlu ya mintiʼ in qo xobʼ. Jun techel, mintiʼ in qo xobʼ tuʼnju ojtzqiʼn quʼn qa mlay tzʼok kybʼinchaʼn kyimni nya bʼaʼn qiʼj nix tiʼj jun xjal, ex mintiʼ in che ikʼ toj yajbʼil. Ik tten kamik ik tzeʼn aj ttzaj nim twatl jun xjal (Juan 11:11-14). Ax ikx, in nel qnikʼ tiʼj qa mintiʼ ojtzqiʼn kyuʼn tzeʼn in nex ambʼil. Tuʼntzunju, aj kyjaw anqʼin kyimni, axpe ikx qeju ma tzʼel nim ambʼil kykyimlen, kbʼel kynaʼn qa noq jun rat otoq che jtan.

⁷ Tuʼn jlu in nel qnikʼ tiʼj qa chikʼlixix taʼ aju axix tok xnaqʼtzbʼil kyiʼj kyimni ex nya kwest tuʼn tel qnikʼ tiʼj. Junxitl te Satanás tyol. Nya oʼkx in sbʼun kyiʼj xjal, ax ikx in yolin nya ax tok yol tiʼj Jehová. Tuʼn tel qnikʼ tiʼjju nya bʼaʼn o bʼant tuʼn Satanás, qo xnaqʼtzal tiʼj oxe tiʼ o tzaj kyuʼn nya ax tok tyol. Tnejel, o tzʼilix tbʼi Jehová tuʼn. Tkabʼin, o tzʼel tiʼn nya ax tok tyol Satanás toklen chojbʼil bʼant tuʼn Jesús. Ex toxin, tuʼn jlu mas o tzaj kʼixkʼoj ex yajbʼil kyiʼj xjal.

8. Ik tzeʼn in tzaj tyekʼin Jeremías 19:5, ¿tiquʼn in tzʼilix tbʼi Jehová kyuʼn nya ax tok t-xnaqʼtzbʼil Satanás kyiʼj kyimni?

⁸ In tzʼilix tbʼi Jehová kyuʼn nya ax tok xnaqʼtzbʼil kyiʼj kyimni. Kyxol nya ax tok xnaqʼtzbʼil lu, at aju qa in cheʼx xjal toj qʼaqʼ aj kykyim. Noqtzun tuʼnj, ¿tiquʼn in che ok yol lu te jun sbʼubʼil? Tuʼnju in kubʼ kyximen xjal qa ik tmod Jehová ik tzeʼn te Satanás (1 Juan 4:8). ¿Tiʼ in qnaʼn tuʼn jlu? Ex aju mas nim toklen, ¿tiʼ in tnaʼn Jehová tuʼn jlu? Bʼaʼn tuʼn ttzaj qnaʼn qa in nel tikʼun Jehová tkyaqil nya bʼaʼn in nok bʼinchaʼn kyiʼj txqantl (kjawil uʼjit Jeremías 19:5).

9. ¿Tiʼ nya bʼaʼn o tzaj kyiʼn nya ax tok tyol Satanás tiʼj chojbʼil bʼant tuʼn Jesús aju in yolin Juan 3:16 ex 15:13?

⁹ O tzʼel tiʼn nya ax tok tyol Satanás toklen chojbʼil bʼant tuʼn Jesús (Mat. 20:28). In tzaj tqʼamaʼn Tajaw il qa mintiʼ in kyim qanmi aj qkyim, noqwit ax tok jlu, a t-xilen qa at qchwinqlal te jumajx. Qa ikju, ya mintiʼtoq tiquʼn tuʼn tkyim Jesús tuʼn tkanet qchwinqlal te jumajx. Bʼaʼn tuʼn ttzaj qnaʼn qa kubʼ tyekʼin Jehová tkʼujlabʼil kyiʼj xjal tej ttzaj tqʼoʼn chojbʼil (kjawil uʼjit Juan 3:16; 15:13). ¿Tiʼ in tnaʼn Jehová ex Jesús aj in nel kyiʼn nya ax tok tyol Satanás toklen chojbʼil?

10. ¿Alkye tten in tzaj mas kʼixkʼoj ex yajbʼil kyiʼj xjal kyuʼn nya ax tok tyol Satanás kyiʼj kyimni?

¹⁰ O tzaj mas kʼixkʼoj ex yajbʼil kyiʼj xjal kyuʼn nya ax tok tyol Satanás. Jun techel, bʼalo in xi qʼamaʼn te jun mambʼaj o kyim tkʼwaʼl qa o txi tiʼn Dios tkʼwaʼl tuʼnju tajtoq juntl t-angel. Mintiʼ in tzaj qʼuqbʼaʼn kykʼuʼj xjal tuʼn nya ax tok tyol Satanás, noq oʼkx in tzaj mas kybʼis tuʼn. Ax ikx, o tzʼajbʼen nya ax tok xnaqʼtzbʼil tiʼj infierno kyuʼn xjal tuʼn tkubʼ kyximen qa toj tumel tuʼn kykubʼ patit qe xjal tuʼnju mintiʼ xi kynimen t-xnaqʼtzbʼil Iglesia. Ik tzeʼn in tzaj tqʼamaʼn jun uʼj aju tok tbʼi Inquisición española, qa bʼant nya bʼaʼn lu kyuʼn xjal tuʼnju kubʼ kyximen qa noq kubʼ kyqʼoʼn jun techel kywitz xjal aj il tuʼntzun tel kynikʼ tiʼj tzeʼn kʼokel kyanqʼibʼil aj kypon toj infierno ex tuʼn tonin kyiʼj tuʼn tajtz tiʼj kyanmi. Ex ateʼ junjun lugar jatumel in kubʼ kyximen xjal qa il tiʼj tuʼn kykʼulin kye toj kyja o che kyim, tuʼn kynimen kye moqa in xi kyjyoʼn tumel tzeʼn tuʼn kytzaj kʼiwlaʼn kyuʼn. Atzun junjuntl xjal in xi kyqʼoʼn junjun tiʼchaq kye kyimni tuʼntzun miʼn tok kybʼinchaʼn nya bʼaʼn kyiʼj xjal. Bʼisbʼajil tuʼnju mintiʼ in tzaj qʼuqbʼaʼn kykʼuʼj xjal kyuʼn nya ax toj yol tzajni tukʼil Tajaw il, tuʼnju oʼkx in tzaj tiʼn bʼis ex xobʼajil.

11. ¿Tzeʼn jaku qo ok obligarin kyuʼn toj qja ex qe qamiw tuʼn tkubʼ qbʼinchaʼn jun tiʼ mintiʼ in tzaj tqʼamaʼn Tyol Dios?

¹¹ In nonin qkʼujlabʼil at tiʼj Dios ex tiʼj Tyol tuʼn tten qipumal tuʼn qnimen te Jehová, axpe ikx aj kyok ten qe toj qja ex qe qamiw qʼamalte qe tuʼn tkubʼ qbʼinchaʼn junjun kostumbr at kyoklen kyukʼil kyimni. Bʼalo kyaj tuʼn ttzaj qbʼis ex tuʼntzunju in tzaj kyqʼamaʼn qa mintiʼ qkʼujlabʼil tiʼj xjal ma kyim ex qa mintiʼ in nok qqʼoʼn toklen. Moqa in tzaj kyqʼamaʼn qa tuʼn qpaj kʼokel tbʼinchaʼn nya bʼaʼn kyiʼj xjal. ¿Tzeʼn jaku qo kolin tiʼjju axix tok tkuʼx toj Tyol Dios? Qo xnaqʼtzan tiʼj junjun nabʼil tkuʼx toj Tyol Dios ex qo ximen tiʼj tzeʼn jaku kubʼ qqʼoʼn toj xnaqʼtzbʼil.

12. ¿Alkyeqe xnaqʼtzbʼil ex qe kostumbr at toklen kyukʼil kyimni aju nya bʼaʼn in che ela toj twitz Jehová?

¹² Il tiʼj tuʼn tel qikʼun qe kostumbr nya bʼaʼn in che ela toj twitz Jehová (2 Cor. 6:17). Toj jun tnam te Caribe, in kubʼ kyximen  xjal qa mintiʼ in kyim tanmi jun xjal aj tkyim, tuʼnju in tzaj kyqʼamaʼn qa il tiʼj tuʼn taj tqʼoʼn t-xel nya bʼaʼn otoq tzʼok bʼinchaʼn tiʼj. In tzaj tqʼamaʼn jun tqanil qa in kubʼ kyximen xjal qa «jaku tzaj nim nya bʼaʼn tiʼj jun tnam tuʼn xjal otoq kyim». Atzun toj junjun tnam te África, in nok qʼoʼn jun xbʼalun twitz espej at toj tja xjal o kyim ex in naj meltzʼuʼn qe tfoto twitz ja. ¿Tiquʼn? Tuʼnju in tzaj kyqʼamaʼn junjun xjal qa nya bʼaʼn tuʼn tok kykeʼyin kyimni kyilbʼilal. Atzun qe, il tiʼj tuʼn kyel qikʼun qe kostumbr lu ex qeju xnaqʼtzbʼil tuʼnju at kyoklen kyukʼil nya ax tok tyol Satanás (1 Cor. 10:21, 22).

13. Ik tzeʼn in tzaj tyekʼin Santiago 1:5, ¿tiʼ jaku bʼant quʼn qa mintiʼxix in nel qnikʼ tiʼj qa bʼaʼn moqa nya bʼaʼn in nela jun kostumbr toj twitz Jehová?

¹³ Qa mintiʼxix in nel qnikʼ tiʼj qa bʼaʼn ex qa nya bʼaʼn in nela jun kostumbr toj twitz Jehová, qqaninx qnabʼil te (kjawil uʼjit Santiago 1:5). Yajxitl, qo jyon tiʼj tqanil kyoj quʼj ex qa il tiʼj, bʼaʼn tuʼn t-xi qqanin onbʼil kye ansyan. Ax tok, mlay tzaj kyqʼamaʼn qe tiʼ tuʼn tbʼant quʼn, pero jaku tzaj kyyekʼin junjun nabʼil toj Tyol Dios qe ik tzeʼn qeju in yolin xnaqʼtzbʼil lu tiʼj. Qa ma bʼant jlu quʼn, kʼonil qiʼj tuʼn tok qnabʼil ex kʼelel qnikʼ tiʼj alkye «bʼaʼn ex alkyeju mya bʼaʼn» (Heb. 5:14).

14. ¿Tiʼ jaku bʼant quʼn tuʼn miʼn tkubʼ qqʼoʼn jun tolsabʼil kywitz txqantl?

¹⁴ «Kybʼinchame tkyaqil tuʼntzun tjaw nimsaʼn tbʼi Dios. Miʼn che oke te jun tolsabʼl» (1 Cor. 10:31, 32). Aj tkubʼ qximen qa qo tel toj jun kostumbr moqa miʼn, il tiʼj tuʼn qximen tiʼj tzeʼn in nela toj kywitz xjal, pero mas qo ximel tiʼjju kbʼel kynaʼn erman. Nya qaj tuʼn tkubʼ qqʼoʼn jun tolsabʼil toj kybʼe txqantl (Mar. 9:42). Ax ikx, nya qaj tuʼn ttzaj tqʼoj jun xjal mintiʼ in najbʼen te Jehová. Kʼonil kʼujlabʼil qiʼj tuʼn qyolin kyukʼil toj tumel ex kʼonil jlu tuʼn tjaw nimset Jehová. Noqtzun tuʼnj, mintiʼ tuʼn qjaw wulin kyukʼil ex mintiʼ tuʼn qok ten xmayil tiʼjju in bʼant kyuʼn. Bʼaʼn tuʼn ttzaj qnaʼn qa nim jaku tzʼonin kʼujlabʼil. Qa ma qo ximen kyiʼj xjal ex qa ma tzʼok qqʼoʼn kyoklen, jaku chʼexpaj kyximbʼetz.

15, 16. a) ¿Tiquʼn tbʼanel qa ma qo yolin kyukʼil txqantl tiʼjju nimen quʼn? Qʼamantza jun techel. b) ¿Tiʼ in tzaj t-xnaqʼtzaʼn tyol Pablo qe aju tkuʼx toj Romanos 1:16?

¹⁵ Qqʼamanx kye toj qja ex kye qvecin qa testigo de Jehová qoʼ (Is. 43:10). Qa ma bʼant jlu quʼn naʼmxtoq qok weʼ twitz jun  nya bʼaʼn, mas nya kwest jaku txi bʼinchet tiʼj. Kubʼ ttzʼibʼin Francisco jlu, aju in nanqʼin Mozambique: «Tej tel qnikʼe tiʼj axix tok tukʼil nxuʼjile Carolina, xi qqʼamaʼne kye toj qjaye qa ya mlay qo kʼulune kywitz kyimni. Ok toj malbʼil aju otoq bʼaj qximane tej tkyim jun terman Carolina. Naqʼli qe xjal jatumel in qo anqʼine tuʼn kykubʼ txʼajet kyimni. Noqtzun tuʼnj, aju toj tja kyimni mas kʼujlaʼn tuʼn, il tiʼj tuʼn tkyaj ten jtal oxe qonikʼen toj lugar jatumel otoq bʼaj txʼajoʼn kyimni. In kubʼ kyximen xjal qa tuʼn jlu mlay tzaj tqʼoj tanmi kyimni. Kubʼ kyximen toj tja Carolina qa a il tiʼj tuʼn tkyaj ten jtal jatumel otoq kubʼ txʼajet kyimni».

¹⁶ ¿Tiʼ bʼant tuʼn Francisco ex t-xuʼjil? In tzaj tqʼamaʼntl: «Tuʼnju at qkʼujlabʼile tiʼj Jehová ex qaje tuʼn ttzalaj quʼne, mintiʼ kubʼ qbʼinchaʼne kostumbr lu. Tzaj nim kyqʼoj toj tja Carolina. Tzaj kyqʼamaʼn qa mintiʼ ok qqʼoʼne toklen kyimni ex qa ya mlaytoq bʼant tuʼn kypon qʼolbʼel qeye nix tuʼn kyonin qiʼje. Tuʼnju otoq qo yoline kyukʼil tiʼjju nimen quʼne, ya mintiʼ o yoline tiʼj jlu kyukʼil tej ttzaj kyqʼoj. Ateʼ junjun toj qjaye e kolin qiʼje ex kyqʼama qa otoq qo yoline tiʼj jlu. Tej tbʼet ambʼil, ya mintiʼ e qʼojin toj tja Carolina qiʼje ex ya mintiʼ ten nya bʼaʼn qxole. Axpe ikx, ateʼ junjun in che ul visitaril qeye tuʼn ttzaj kyqanin jun kyuʼj in yolin tiʼj Tyol Dios». Tuʼntzunju, miʼn qo tzaj xobʼ tuʼn qkolin tiʼjju axix tok in tzaj t-xnaqʼtzaʼn Tyol Dios kyiʼj kyimni (kjawil uʼjit Romanos 1:16).

17. Qa ma kyim jun toj tja jun erman, ¿alkye tten jaku qo ok te tbʼanel tamiw?

¹⁷ Qa ma kyim jun toj tja jun erman, bʼaʼn tuʼn tok tilil quʼn tuʼn qok te tbʼanel tamiw, ik tzeʼn in tzaj tqʼamaʼn Proverbios 17:17: «Ok ttzaj jun mya bʼaʼn tiʼj [jun xjal], nnoʼk tamiw ik tzaʼn jun terman». Qa in nok obligarin jun erman tuʼn tkubʼ tbʼinchaʼn jun kostumbr nya bʼaʼn toj twitz Jehová, ¿alkye tten jaku qo ok te tbʼanel tamiw? Qo xnaqʼtzan tiʼj kabʼe nabʼil ateʼkux toj Tyol Dios.

18. a) ¿Tiquʼn jaw oqʼ Jesús? b) ¿Tiʼ xnaqʼtzbʼil in nel qiʼn tiʼj techel kyaj tqʼoʼn Jesús?

¹⁸ «Che oqʼe kyukʼil qeju in che oqʼ» (Rom. 12:15). Atlo maj mintiʼ ojtzqiʼn quʼn tiʼ jaku  txi qqʼamaʼn te jun xjal at toj bʼis. Noqtzun tuʼnj, bʼaʼn tuʼn ttzaj qnaʼn qa at maj mas jaku qo onin qa ma qo oqʼ junx tukʼil twitzju tuʼn t-xi qqʼamaʼn nim yol. Tej tkyim Lázaro, jaw oqʼ María ex Marta tiʼj, ax ikx e jaw oqʼ txqantl xjal tiʼj Lázaro. Tej tikʼ kyaje qʼij, pon Jesús ex ax ikx te jaw oqʼ maske kjawil anqʼintoq Lázaro tuʼn (Juan 11:17, 33-35). Kyuʼn taʼl twitz Jesús kubʼ tyekʼin tiʼ kubʼ tnaʼn Jehová tej tkyim Lázaro. Ax ikx, tuʼn jlu kubʼ tyekʼin Jesús qa ten tkʼujlabʼil tiʼj ja xjal lu ex tuʼn jlu xi qʼuqbʼaʼn tkʼuʼj María ex Marta. Axju in bʼaj aj tkubʼ qyekʼin qkʼujlabʼil kyiʼj erman ex aj qximen kyiʼj, tuʼnju ojtzqiʼn kyuʼn qa nya kyjunalx ateʼ ex qa che onil txqantl kyiʼj tukʼil kʼujlabʼil.

19. ¿Tzeʼn in nonin Eclesiastés 3:7 qiʼj tuʼn t-xi qqʼuqbʼaʼn tkʼuʼj jun erman?

¹⁹ «At tqʼijlalil tuʼn mi kyyolin xjal, ex at tqʼijlalil tuʼn kyyolin» (Ecl. 3:7). Qa ma tzʼok qbʼiʼn jun erman, atzun juntl tten tzeʼn jaku txi qqʼuqbʼaʼn tkʼuʼj. Qqʼonx ambʼil te tuʼn ttzaj tqʼamaʼn aju tkuʼx toj tanmi ex miʼn tzaj qbʼis qa nya toj tumel in tzaj tqʼamaʼn qe tyol (Job 6:2, 3). Bʼalo mas in tzaj bʼaj tkʼuʼj tuʼnju in xi kyqʼamaʼn toj tja te tuʼn tten kyukʼil toj kykostumbr. Tuʼntzunju, qo naʼn Dios junx tukʼil ex qo kubʼsan twitz Jehová tuʼn ttzaj tqʼoʼn tipumal ex tnabʼil (Sal. 65:2). Qa jaku bʼant, bʼaʼn tuʼn tjaw quʼjin Tyol Dios tukʼil moqa jun xnaqʼtzbʼil at kyoj quʼj, ik tzeʼn jun tbʼanel xnaqʼtzbʼil in yolin tiʼjju in nikʼ toj kyanqʼibʼil erman.

20. ¿Tiʼ qo xnaqʼtzal tiʼj toj juntl xnaqʼtzbʼil?

²⁰ In xi qqʼoʼn chjonte tuʼnju o tzʼel qnikʼ tiʼjju axix tok kyiʼj kyimni ex tiʼjju tbʼanel ambʼil in nayon kyiʼj qeju o che kux «maquʼn tuj kamposant» (Juan 5:28, 29). Qa at tumel qo kolin tiʼj axix tok in tzaj t-xnaqʼtzaʼn Tyol Dios kyukʼil qyol ex qbʼinchbʼen. Toj juntl xnaqʼtzbʼil kʼelel qnikʼ tiʼj juntl tiʼ in najbʼen tuʼn Satanás tuʼntzun miʼn tel kynikʼ xjal tiʼj Jehová: aju at toklen tukʼilju in bʼant kyuʼn nya bʼaʼn anjel ik tzeʼn aju kyaqʼun chman. Kʼelel qnikʼ tiʼj tiquʼn il tiʼj tuʼn tel qikʼen tkyaqilju at toklen tukʼil tsbʼubʼil Satanás.