1, 2. ¿Alkyeqe tiʼchaq tzaj bʼaj tkʼuʼj Jesús tiʼj?

TZAJ bʼaj tkʼuʼj Jesús toj bʼajsbʼil qʼij tanqʼibʼil tzalu twitz Txʼotxʼ. Ojtzqiʼntoq tuʼn qa chʼixtoq tok bʼinchaʼn nim nya bʼaʼn tiʼj kyuʼn aj qʼoj ajxi tkyim. Noqtzun tuʼnj, ax ikx tzaj bʼaj tkʼuʼj tuʼnju tajtoq tuʼn ttzalaj Ttat tuʼn. Ex kʼoniltoq tuʼn tok tbʼi Dios te saq qa ma tentoq tzʼaqli toj ambʼil aju. Ax ikx tuʼnju kʼujlaʼntoq qe xjal tuʼn ex ojtzqiʼntoq tuʼn qa jaku tzaj qʼoʼn ambʼil qe tuʼn qanqʼin te jumajx qa ma ten tzʼaqli ajxi tkyim.

² Maske tzaj bʼaj tkʼuʼj Jesús tuʼn tkyaqil jlu, ok tilil tuʼn tuʼn tten toj txubʼtxaj. Otoqxi txi tqʼamaʼn jlu kye t-xnaqʼtzbʼen: «Kyjel nqʼuqbʼaʼne kykʼuʼje» (Juan 14:27). Otoq qeʼ tkʼuʼj Jesús «tuʼn Dios», toj juntl yol, mintiʼ tzaj xobʼ twitz jun tiʼ tuʼnju attoq jun tbʼanel tamiwbʼil tukʼil Jehová. Tuʼn jlu, kubʼ tnaʼn bʼaʼn toj t-ximbʼetz ex toj tanmi (Filip. 4:6, 7).

3. ¿Tiʼ kʼelel qnikʼ tiʼj toj xnaqʼtzbʼil lu?

³ Ni jun qe jaku tzʼok weʼ twitz nya bʼaʼn ik tzeʼn ok weʼ Jesús twitz. Noqtzun tuʼnj, qkyaqilx jaku tzaj jun nya bʼaʼn qiʼj (Mat. 16:24, 25; Juan 15:20). Ik tzeʼn bʼaj tiʼj Jesús, ax ikx qe jakulo tzaj bʼaj qkʼuʼj aj qikʼ toj nya bʼaʼn. ¿Tiʼ jaku bʼant quʼn tuʼn miʼn ttzaj bʼaj qkʼuʼj ex tuʼn tkubʼ qnaʼn bʼaʼn? Qo xnaqʼtzan tiʼj oxe tiʼ bʼant tuʼn Jesús tej tajbʼen te Jehová tzalu twitz Txʼotxʼ ex tzeʼn jaku tzʼel qkanoʼn tiʼj aj kytzaj nya bʼaʼn qiʼj.

4. Aj qximen tiʼjju in tzaj tqʼamaʼn 1 Tesalonicenses 5:17, qʼamantza junjun techel jatumel in tzaj tyekʼin qa ok tilil tuʼn Jesús tuʼn tnaʼn Dios toj mankbʼil qʼij tanqʼibʼil tzalu twitz Txʼotxʼ.

⁴ (Kjawil uʼjit 1 Tesalonicenses 5:17). Toj mankbʼil qʼij tej tten Jesús, nimku maj naʼn Dios. Tej t-xi tqʼamaʼn kye t-xnaqʼtzbʼen tuʼn tkubʼ kyikʼsaʼn tkyimlen, ok tqʼoʼn jun naʼj Dios tej naʼmxtoq tikʼx tqʼoʼn pan ex juntl tej naʼmxtoq tikʼx tqʼoʼn vino (1 Cor. 11:23-25). Ax ikx, tej otoqxi bʼaj kyikʼsaʼn Xjan Qʼij, ok tqʼoʼn Jesús jun naj Dios kyukʼil t-xnaqʼtzbʼen tej naʼmxtoq kyikʼ bʼet (Juan 17:1-26). Tej kypon twi witz Olivo, nimku maj naʼn Dios (Mat. 26:36-39, 42, 44). Axpe ikx naʼn Dios te Tman tej chʼixtoq tkyim (Luc. 23:46). Ik tzeʼn in nel qnikʼ tiʼj, ajbʼen naʼj Dios tuʼn Jesús tuʼn t-xi tqanin onbʼil te Jehová tiʼj tkyaqilju tuʼn tbʼaj toj qʼij aju.

5. ¿Tiquʼn mintiʼ ten kyipumal apóstol tej kyok weʼ twitz nya bʼaʼn?

⁵ Ex Jesús kywitz nya bʼaʼn tuʼnju kukx naʼn Dios te Ttat. Atzun kye apóstol mintiʼ e nan Dios toj qonikʼen aju, ex tuʼn jlu mintiʼ ten kyipun tej kyok weʼ twitz nya bʼaʼn (Mat. 26:40, 41, 43, 45, 56). ¿Tiʼ xnaqʼtzbʼil in tzaj tqʼoʼn jlu qe? Qa oʼkx jaku qo ajbʼen te Jehová qa kukx ma qo naʼn Dios ik tzeʼn bʼant tuʼn Jesús. Noqtzun tuʼnj, ¿tiʼ jaku txi qqanin?

6. ¿Tiquʼn jaku tzʼonin qʼuqbʼil qkʼuʼj qiʼj tuʼn miʼn qtzaj xobʼ?

⁶ Jaku txi qqanin te Jehová tuʼn ttzaj tqʼoʼn mas qʼuqbʼil qkʼuʼj (Luc. 17:5; Juan 14:1). Nim toklen tuʼn tten qʼuqbʼil qkʼuʼj tuʼnju qo okel toj joybʼil tuʼn Satanás (Luc. 22:31). Kʼonil qʼuqbʼil qkʼuʼj tuʼn  qten toj txubʼtxaj, axpe ikx aj qok weʼ twitz nim nya bʼaʼn. ¿Tiquʼn? Tuʼnju kʼonil qiʼj tuʼn tkyaj qqʼoʼn toj tqabʼ Jehová aju in bʼaj qiʼj qa otoq tzʼok tilil quʼn tuʼn t-xi qbʼinchaʼn aju jaku bʼant quʼn. Jaku chewix qanmi ex qximbʼetz aj tok qeʼ qkʼuʼj tiʼj qa ojtzqiʼn tuʼn Jehová tzeʼn kxel tbʼinchaʼn tiʼj tkyaqil (1 Ped. 5:6, 7).

7. ¿Tiʼ in tzaj t-xnaqʼtzaʼn qe aju in tzaj tqʼamaʼn Robert?

⁷ Noq tiʼxku jaku bʼaj qiʼj, kʼonil naʼj Dios tuʼn miʼn ttzaj bʼaj qkʼuʼj. Qo yolin tiʼjju bʼaj tiʼj jun ansyan te 80 abʼqʼi aju Robert tbʼi. In tzaj tchikʼbʼaʼn tiʼ in bʼant tuʼn tuʼn miʼn ttzaj bʼaj tkʼuʼj: «Toj tkyaqil wanqʼibʼile o tzʼonin Filipenses 4:6 ex 7 wiʼje tuʼn wexe kywitz nya bʼaʼn. At maj mintiʼtoq npwaqe, toj jun ambʼil mintiʼ in ajbʼene te ansyan». Tqʼamatl jlu: «In chin naʼne Dios te Jehová aj in tzaj bʼaj nkʼuʼje. Qa kukx in chin naʼne Dios ex in xi nqʼamaʼne te Jehová aju tkuʼx toj wanmiye, tuʼn jlu mintiʼxix in tzaj bʼaj nkʼuʼje».

8. Ik tzeʼn in tzaj tqʼamaʼn Juan 8:29, ¿tiquʼn mintiʼ tzaj bʼaj tkʼuʼj Jesús?

⁸ (Kjawil uʼjit Juan 8:29). Mintiʼ tzaj bʼaj tkʼuʼj Jesús tej tel ikʼun kyuʼn xjal. ¿Tiquʼn? Tuʼnju ojtzqiʼntoq tuʼn qa in tzalaj Jehová tuʼn. Kukx bʼin te Jehová, axpe ikx kyoj ambʼil kwest. Kubʼ t-ximen Jesús tuʼn tajbʼen te Jehová tuʼnju kʼujlaʼntoq tuʼn. Tej naʼmxtoq tul tzalu twitz Txʼotxʼ, ok te tbʼanel aqʼunal tuʼnju onin tiʼj Jehová tuʼn kybʼinchet tiʼchaq (Prov. 8:30). Ex tej tul, xi t-xnaqʼtzaʼn tukʼil tzalajbʼil  aju axix tok tiʼj Tman (Mat. 6:9; Juan 5:17). Tzalaj tej tbʼant jlu tuʼn (Juan 4:34-36).

9. ¿Alkye tten in nonin qiʼj tuʼn miʼn ttzaj bʼaj qkʼuʼj aj tok tilil quʼn tuʼn qpakbʼan?

⁹ In nel qkanoʼn tiʼj Jesús qa in qo bʼin te Jehová ex qa in qo aqʼunan toj «taqʼun Qajaw» (1 Cor. 15:58). Junxitl t-ximbʼetz jun xjal at kyiʼj nya bʼaʼn in nok weʼ twitz qa in nok tilil tuʼn «tuʼn tpakbʼan tiʼj tyol Dios» (Hech. 18:5). In qo pakbʼan kye xjal tuʼnju in tzaj nim nya bʼaʼn kyiʼj. Noqtzun tuʼnj, aj tok kykʼujlaʼn Jehová ex aj tkubʼ kybʼinchaʼn aju in tzaj tqʼamaʼn, in ten ttxolil kyanqʼibʼil ex mas in che tzalaj. Aj tok qkeʼyin jlu, in nok qeʼ qkʼuʼj tiʼj qa kxqʼuqil Jehová qiʼj. Ex in nonin tuʼn miʼn ttzaj bʼaj qkʼuʼj. Atzun jlu in bʼaj tiʼj jun ermana at depresión tiʼj ex in kubʼ t-ximen qa mintiʼ jun tiʼ tbʼanel in bʼant tuʼn. In tzaj tqʼamaʼn jlu: «Tuʼnju tok nwiʼye tiʼj pakbʼabʼil in ten tbʼanel nximbʼetze ex in nonin wiʼje tuʼn ntzalaje. Tuʼn jlu in kubʼ nximane qa mas nqayin atine ttxlaj Jehová».

10. ¿Tiʼ in tzaj t-xnaqʼtzaʼn qe aju in tzaj tqʼamaʼn Brenda?

¹⁰ Qo ximen tiʼjju in bʼaj tiʼj jun ermana Brenda tbʼi. At jun yabʼil tok tiʼj aju mintiʼ in tzaj tqʼoʼn ambʼil te tuʼn tbʼet ex ax yabʼil lu tok tiʼj tal. In najbʼen jun silla de rueda tuʼn ermana Brenda ex ya mintiʼxix tipumal. Qa jaku bʼant tuʼn, in pakbʼan ttziyele ja, pero chʼixme tkyaqil maj in pakbʼan kyuʼn carta. Tqʼama jlu: «Tej tel nnikʼe tiʼj qa mlay chin bʼanixe toj ambʼil jaʼlo, onin jlu wiʼje tuʼn nximane tiʼj pakbʼabʼil. Ax ikx in nonin pakbʼabʼil wiʼje tuʼn tel naj tiʼj nkʼuʼje aju nya bʼaʼn in chin ok weʼye twitz. In nok tilil wuʼne tuʼn wonine kyiʼj xjal ateʼ toj tembʼil te pakbʼabʼil te kʼloj okslal. Ex tuʼn jlu, kukx in tzaj nnaʼne qʼuqbʼil nkʼuʼje at tiʼj ambʼil tzul».

11-13. a) ¿Tzeʼn kubʼ kyyekʼin t-apóstol Jesús ex junjuntl t-xnaqʼtzbʼen qa e ok te tbʼanel tamiw? b) ¿Tzeʼn e onin tamiw Jesús tiʼj?

¹¹ Tzaj nim nya bʼaʼn tiʼj Jesús tej tpakbʼan. Noqtzun tuʼnj, e ok apóstol te tbʼanel tamiw, ik tzeʼn amiw in yolin Proverbios 18:24 tiʼj, aju in tzaj tqʼamaʼn: «At junjun tamiw xjal mas mojl kykʼujlalil tukʼil twitz tkʼujlalil jun terman». Ok tqʼoʼn Jesús kyoklen t-apóstol. Bʼaʼn tuʼn ttzaj qnaʼn qa toj ambʼil aju, ni jun terman ok lepeʼ tiʼj (Juan 7:3-5). Ax ikx kyqʼama toj tja qa otoq tzʼok te loc (Mar. 3:21). Atzun kye t-xnaqʼtzbʼen kubʼ kyyekʼin tbʼanel kymod tukʼil. Toj qonikʼen tej naʼmxtoq tkyim Jesús, xi tqʼamaʼn jlu kye: «Atzun kyeye kukx ma che tene wukʼile tuj yajbʼil weye» (Luc. 22:28).

¹² At maj tzaj tbʼis Jesús kyuʼn t-xnaqʼtzbʼen. Noqtzun tuʼnj, mintiʼ ok tqʼoʼn twiʼ tiʼj jatumel i el txalpaj, sino tiʼjju qʼuqbʼil kykʼuʼj kubʼ kyyekʼin tiʼj (Mat. 26:40; Mar. 10:13, 14; Juan 6:66-69). Toj bʼajsbʼil qonikʼen tej tten Jesús kyukʼil t-apóstol kukx e ok lepeʼ tiʼj, xi tqʼamaʼn jlu kye: «Ma tzʼok nqʼoʼne kybʼiye te wamiwoye, porke tkyaqilju o nbʼiye te Nmane, o txi ntxʼolbʼaʼne kyeye» (Juan 15:15). Jaku txi qqʼamaʼn qa xi qʼuqbʼaʼn tkʼuʼj Jesús kyuʼn tamiw. Tzalaj tiʼj onbʼil xi kyqʼoʼn te tej tpakbʼan (Luc. 10:17, 21).

¹³ Nya oʼkx qe apóstol e ok te tamiw Jesús, ax ikx e ten junjuntl tamiw xinaq ex xuʼj, aqeju e onin tiʼj toj pakbʼabʼil ex toj junjuntl tten. At junjun xi kyqʼoʼn twa  ex kyaj ten Jesús kyukʼil toj kyja (Luc. 10:38-42; Juan 12:1, 2). Atzun junjuntl bʼant tuʼn kyxiʼ tukʼil tej tpakbʼan ex ajbʼen kypwaq tuʼn kyonin tiʼj (Luc. 8:3). ¿Tiquʼn e ten tbʼanel tamiw Jesús? Tuʼnju ax ikx te ok te jun tbʼanel amiw. Onin Jesús kyiʼj ex mintiʼ xi tqanin t-xel kye. Maske tzʼaqlitoq Jesús, atzun kye t-xnaqʼtzbʼen nyatoq tzʼaqliqe, pero ok tqʼoʼn toklen onbʼil xi kyqʼoʼn te. Ex qʼuqli qkʼuʼj tiʼj qa e onin tiʼj Jesús tuʼn miʼn ttzaj bʼaj tkʼuʼj.

14, 15. a) ¿Tzeʼn jaku che kanet tbʼanel qamiw? b) ¿Tzeʼn jaku che onin qiʼj?

¹⁴ In che onin tbʼanel qamiw tuʼn kukx qajbʼen te Jehová. Jaku che kanet tbʼanel qamiw qa tbʼanel amiw qoʼ (Mat. 7:12). Jun techel, in tzaj tqʼamaʼn Tyol Dios tuʼn qonin kyiʼj txqantl ex mas kyiʼj qeju in che ikʼ toj nya bʼaʼn (Efes. 4:28). Bʼaʼn tuʼn qximen kyiʼj erman kyaj onbʼil atz jatumel in nok qchmon qibʼ. ¿Ateʼpe erman mintiʼ in bʼant tuʼn kyetz toj kyja? Bʼalo jaku qoʼx loqʼel te kyxel. Moqa jaku txi qqʼoʼn chʼin kywa jun ja xjal mintiʼxix kypwaq. ¿Ojtzqiʼnpe quʼn tzeʼn tuʼn tajbʼen qtembʼil te Internet jw.org^® moqa aju aplicación JW Library^®? Qa ojtzqiʼn quʼn, jaku qo onin kyiʼj erman tuʼn tel kynikʼ tiʼj tiʼ at toj. Qa ma kubʼ qximen tuʼn qonin kyiʼj txqantl, oklo qo tzalajel mas (Hech. 20:35).

¹⁵ Qa ma che kanet tbʼanel qamiw, che onil qiʼj aj qok weʼ kywitz nya bʼaʼn ex che tel qukʼil tuʼn miʼn ttzaj bʼaj qkʼuʼj. Qo okel kybʼiʼn tukʼil pasens aj t-xi qqʼamaʼn kye aju in bʼaj qkʼuʼj tiʼj, ik tzeʼn bʼant tuʼn Elihú  tukʼil Job (Job 32:4). Mintiʼ tuʼn tkubʼ qximen qa aʼye qamiw che tzajel qʼamante qe tiʼ kbʼantel quʼn, noqtzun tuʼnj, ktel qnabʼil aj t-xi qbʼiʼn consej in tzaj kyqʼoʼn qe tukʼil Tyol Dios (Prov. 15:22). Aj qikʼ toj nya bʼaʼn, bʼaʼn tuʼn tel qkanoʼn tiʼj aj kawil David tuʼnju mintiʼ jaw tnimsan tibʼ ex xi tkʼamoʼn onbʼil xi kyqʼoʼn tamiw te (2 Sam. 17:27-29). Tuʼn jlu in nel qnikʼ tiʼj qa aʼyeju qamiw ik tzeʼn jlu, jun oyaj qe tuʼn Jehová (Sant. 1:17).

16. Ik tzeʼn in tzaj tqʼamaʼn Filipenses 4:6 ex 7, ¿tiʼ il tiʼj tuʼn tel qnikʼ tiʼj tuʼntzun miʼn ttzaj bʼaj qkʼuʼj? Chikʼbʼantza.

¹⁶ (Kjawil uʼjit Filipenses 4:6, 7). ¿Tiquʼn in tzaj tqʼamaʼn Jehová qa mlay tzaj bʼaj qkʼuʼj aj tten mujbʼabʼil qxol «tukʼil Jesucrist»? Tuʼnju qa ma ten mujbʼabʼil qxol tukʼil Jesucristo, kʼelel qnikʼ tiʼj tiʼ toklen at tukʼil t-ximbʼetz Dios ex kʼokel qeʼ qkʼuʼj tiʼj. Jun techel, in chewix qanmi tuʼnju ojtzqiʼn quʼn qa in kubʼ tnajsaʼn Jehová qil noq tuʼn chojbʼil bʼant tuʼn Jesús (1 Juan 2:12). Ax ikx in tzaj qʼuqbʼaʼn qkʼuʼj tuʼnju ojtzqiʼn quʼn qa a Jesús aj Kawil toj Tkawbʼil Dios ex qa kxel tbʼinchaʼn tiʼj tkyaqil nya bʼaʼn tokx tjaqʼ tkawbʼil Satanás (Is. 65:17; 1 Juan 3:8; Apoc. 21:3, 4). Nya oʼkxju, ax ikx in ten qipumal aj tel qnikʼ tiʼj qa in nonin Jesús qiʼj toj ambʼil jaʼlo tuʼn tbʼant aqʼuntl kyaj tqʼamaʼn qe (Mat. 28:19, 20). Tuʼn qten toj txubʼtxaj, nim toklen tuʼn tchewix qanmi, tuʼn tten qʼuqbʼil qkʼuʼj ex tuʼn tten qipumal.

17. a) ¿Tiʼ jaku bʼant tuʼn jun tmajen Jehová tuʼn miʼn ttzaj bʼaj tkʼuʼj? b) Ik tzeʼn in tzaj tqʼamaʼn Juan 16:33, ¿tiʼ kbʼel tiʼj quʼn?

¹⁷ Qa ma tzʼel qkanoʼn tiʼj Jesús, kʼonil qiʼj tuʼn miʼn ttzaj bʼaj qkʼuʼj aj qok weʼ kywitz nya bʼaʼn. Tnejel, bʼaʼn tuʼn qnaʼn Dios toj tkyaqil ambʼil. Tkabʼin, nim toklen tuʼn t-xi qbʼiʼn Jehová ex bʼaʼn tuʼn tok tilil quʼn tuʼn qpakbʼan, axpe ikx kyoj ambʼil kwest. Ex toxin, aj ttzaj kyqʼoʼn qamiw onbʼil qe, bʼaʼn tuʼn tok qqʼoʼn toklen. Qa ma che bʼant jlu quʼn, kxqʼuqil Jehová tiʼj qximbʼetz ex tiʼj qanmi tuʼntzun miʼn ttzaj bʼaj qkʼuʼj, ex kbʼel tiʼj alkyexku nya bʼaʼn quʼn ik tzeʼn te Jesús (kjawil uʼjit Juan 16:33).