TOJ ambʼil tej tanqʼin Pablo, nyatoq nim bark iqil xjal e ten. Qa tajtoq jun xjal tuʼn t-xiʼ toj jun tbʼe, iltoq tiʼj tuʼn t-xi tqanin qa attoq jun bark iqil iqtz kyja t-xiʼ jatumel taj xjal tuʼn tpon ex qa jakutoq txi tiʼn xjal toj (Hech. 21:2, 3). Maske nya atz kpol bark jatumel taj xjal tuʼn tpon, pero jakutoq txiʼ toj bark ex jatumel kwebʼel bark, atztzun kbʼeletz xjal tuʼntzun t-xi tjyoʼn juntl bark jatumel taj tuʼn tpon (Hech. 27:1-6).

Oʼkx toj jun ambʼil jakutoq che bʼet bark toj jun abʼqʼi ex mintiʼ jun or bʼantni tiʼj tuʼn kyex. Ax ikx, aʼyeju yukil bark in xi kynimen aju in kyqʼamaʼn xjal, at maj yajxi in che ex. Nya oʼkx qa nya bʼaʼn taʼ ambʼil sino ax ikx qa ma tzʼok kykeʼyin jun tiʼ, moqa in kynaʼn qa tzul jun nya bʼaʼn kyiʼj, jun techel, qa in noqʼ jun joj moqa jun cuervo tibʼaj bark ex qa tibʼaj tbʼuchil jun bark at toj mar. Oʼkx in cheʼx qa at kyqʼiqʼ, tuʼnju il tiʼj kyqʼiqʼ tuʼntzun kybʼet bark. Tuʼntzunju, aj tkanet jun bark tuʼn jun xjal, iltoq tiʼj tuʼn t-xiʼ tukʼil tiqetz toj lugar jatumel ateʼ bark ex tuʼn tayon ajxi ttzaj qʼamaʼn jniʼ or kʼelex bark.

Tzaj tchikʼbʼaʼn Lionel Casson, jun xjal xnaqʼtzal tiʼjju o bʼaj ojtxe, qa bʼant jun tiʼ tuʼn tnam Roma tuʼn tonin kyiʼj xjal tuʼntzun tkanet naj jun bark kyuʼn aj kyxiʼ toj kybʼe. Kanet jun lugar nya kwest tuʼn tkanet kyuʼn xjal ex atztoq tok lugar lu ttzi aʼ Tíber tbʼi. Nqayin ttxlaj tnam Ostia attoq jun lugar jatumel ateʼ oficina. Nim oficina lu in che ajbʼen kye junxichaq empresa attoq kybark: ik tzeʼn empresa te Narbona (aju at toj tnam Francia jaʼlo) ex aju empresa te Cartago (aju at toj tnam Túnez jaʼlo) ex junjuntl. Oʼkx tuʼn t-xiʼ xjal toj oficina qanil alkye bark kʼelex jatumel taj tuʼn tpon.

Mintiʼ xi kynajsaʼn xjal nim ambʼil tej kyxiʼ toj bark, noqtzun tuʼnj, jakutoq tzaj nya bʼaʼn kyiʼj toj mar. Ik tzeʼn te apóstol Pablo tej t-xiʼ toj tbʼe, xi mulqʼaj junjun maj toj mar tej tnaj bark (2 Cor. 11:25).