Bʼisbʼajil tuʼnju chewix nkʼujlabʼile tiʼj Jehová tej nchʼiye. Kubʼ nximane qa attoq tzaqpibʼil kye wukʼile toj tja xnaqʼtzbʼil, atzun weye mintiʼ, tuʼntzunju wajtoqe tuʼn woke ik tzeʼn kye. Kubʼ nximane qa kwest tuʼn kyjapun tkawbʼil Jehová wuʼne, qe tkawbʼil nmane ex e ok nqʼoʼne te jun iqtz. Ojtzqiʼntoq wuʼne qa at Dios, pero mintiʼ kubʼ nnaʼne qa nqayin atine ttxlaj.

Kukx in pakbʼane, pero nya nim ambʼil ok nqʼoʼne tiʼj. Mintiʼtoq in kubʼ nbʼinchaʼne ntene tiʼj pakbʼabʼil, tuʼntzunju kwesttoq tuʼn nyoline kyukʼil xjal. Ax ikx, mintiʼtoq in chin meltzʼaje kyukʼil ex mintiʼ xi nqʼoʼne xnaqʼtzbʼil kye. Tuʼntzunju, mintiʼ in tzalaje tej npakbʼane ex tuʼn jlu ten nximbʼetze nya toj tumel. Kubʼ nxjeline jlu: «¿Tzeʼn in bʼant jlu tuʼn jun xjal tkyaqil seman ex tkyaqil xjaw?».

Tej njapune twi 17 abʼqʼi, wajtoqe tuʼn miʼn ntene tjaqʼ kykawbʼil nmane. Tuʼntzunju, in xiʼye anqʼil Australia. Tzaj kybʼis nmane tuʼn jlu, pero qʼuqlitoq kykʼuʼj tiʼj qa kukx chin ajbʼele te Jehová.

 Tej npone Australia, mas mintiʼ ok tilil wuʼne. Noq junjun maj in xiʼye kyoj chmabʼil ex ok wamiwen wibʼe kyukʼil junjun kuʼxun. Jun qonikʼen in qoʼxe kyoj chmabʼil ex toj juntl in qo exe bʼixil ex kʼal qʼeʼn. Aj nximane tiʼj ambʼil aju, in nel nnikʼe tiʼj qa in chin ajbʼentoqe te Jehová, pero ax ikx e bʼant qe tiʼchaq te twitz txʼotxʼ wuʼne. Ex mintiʼtoq in chin tzalaje tiʼj ni jun.

Tej tikʼ kabʼe abʼqʼi, ok wojtzqiʼne jun ermana aju onin wiʼje tuʼn nximane tiʼjju in bʼanttoq wuʼne ex mintiʼ ojtzqiʼntoq tuʼn. In chin anqʼintoqe kyukʼil jweʼ ermana naʼmxtoq kykubʼ mojeʼ. Tej tpon ansyan in bʼet kyojele Ja te Chmabʼil visitaril kʼloj okslal, xi qqʼamaʼne te tuʼn tkyaj ten qjaye tukʼil t-xuʼjil, aju Tamara tbʼi. Akux in bʼanttoq junjun aqʼuntl tuʼn ermano, in yolintoq t-xuʼjil qukʼile ex o tzalaje tej qtene tukʼil. Tbʼanel ela jlu toj nwitze. Mintiʼ kubʼ nximane qa jaku ten jun ermana o chʼiy toj tokslabʼil kyukʼil txqantl, qa jaku tzeʼn kyukʼil ex qa jaku qo ok tbʼiʼn.

Kʼujlaʼntoq axix tok tuʼn Tamara ex in tzalaj tej tpakbʼan, ax ikx qeye o qo tzalaje tuʼn. In tzalajtoq Tamara tuʼnju in xitoq tqʼoʼn aju mas tbʼanel te Jehová, atzun weye mintiʼtoq in chin tzalaje tuʼnju mintiʼ ok tilil wuʼne. Nimxix onin tmod wiʼje. Ax ikx, tuʼnju kubʼ tqʼoʼn jun tbʼanel techel nwitze, tzaj nnaʼne qa taj Jehová tuʼn qajbʼen te «tukʼil tzalajbʼil» (Sal. 100:2).

Wajtoqe tuʼn ntzalaje ik tzeʼn te Tamara, pero iltoq tiʼj tuʼn tbʼant junjun chʼixpubʼil wuʼne. Xi tiʼn ambʼil, pero bʼant wuʼne. Kubʼ nbʼinchane ntene tiʼj pakbʼabʼil ex in noke junjun maj te precursora auxiliar. Onin jlu wiʼje tuʼn miʼn ntzaj xobʼe tej npakbʼane ex ok qeʼ nkʼuʼje tiʼjju xi nqʼamaʼne. Tuʼnju mas ajbʼen Tyol Dios wuʼne, mas in tzalaje. Tej tikʼ chʼin ambʼil, kubʼ nximane tuʼn wajbʼene te precursora auxiliar tkyaqil xjaw.

 Ok wamiwen wibʼe kyukʼil kykyaqil erman in che tzalajtoq tiʼj kyajbʼebʼil te Jehová. Onin techel kubʼ kyqʼoʼn nwitze tuʼn nximane tiʼj alkye mas in nok nqʼoʼne toklen ex tuʼn wuʼjine tiʼj Tyol Dios tkyaqil qʼij. Mas in tzalaje tiʼj pakbʼabʼil ex tej tikʼ ambʼil in noke te precursora regular. Atzun tnejel maj kubʼ nnaʼne tzalajbʼil juntl maj toj kʼloj okslal.

Tej tikʼ jun abʼqʼi, ok wojtzqiʼne jun ermano Alex tbʼi. Kʼujlaʼntoq Jehová tuʼn, tgantoq tuʼn tpakbʼan ex attoq jun tbʼanel tmod. In najbʼentoq te onil kye ansyan ex otoq tzikʼ qaq abʼqʼi in najbʼen te precursor. Ax ikx, otoq pakbʼan junjun xjaw toj tnam Malaui jatumel nya nim kybʼet pakbʼal at. Tej tten Malaui, ten kyukʼil junjun misionero ex kubʼ kyqʼoʼn jun tbʼanel techel twitz, ex xi kyqʼamaʼn te tuʼn kukx tok tilil tuʼn tuʼn tajbʼen te Jehová.

Toj 2003 in kubʼ mojeʼye tukʼil Alex, ex qkabʼile in qo ajbʼene te Jehová toj tkyaqil ambʼil. O tzʼel qnikʼe kyiʼj xnaqʼtzbʼil nim kyoklen ex o qo tzaj kʼiwlaʼne tuʼn Jehová toj nimku tten.

Toj 2009, tzaj qʼoʼn txokbʼil qiʼje tuʼn qajbʼene te misionero atz Timor Oriental, jun tal tnam tok nqayin tiʼj Indonesia. O jaw labʼine ex o jaw tzalaje, pero ax ikx o tzaj xobʼe. Tej tikʼ juntl jweʼ xjaw, o pone atz Dili aju ttxuylal tnam.

Ok tilil quʼne tuʼn qnaqʼete tiʼj kykostumbr xjal, tiʼj kyyol, tiʼj kywa ex tiʼj kyanqʼibʼil. Tej qpakbʼane, e kanet xjal mebʼa quʼne, qe xjal mintiʼ etz kyxnaqʼtzbʼil ex qeju in che bʼaj yajin kyuʼn txqantl. Ax ikx, ok qojtzqiʼne junjun xjal kukx at bʼis ex cicatriz kyiʼj tuʼn tpaj qʼoj ex bʼiybʼil. *

 ¡Tbʼanelxix ok pakbʼabʼil! Jun techel, kanet jun tal txin te 13 abʼqʼi wuʼne, aju María tbʼi. * In bʼisintoq tuʼnju otoq tzikʼ junjun abʼqʼi tkyimlen ttxuʼ ex noq junjun maj in nok tkeʼyin twitz tman. Ik tzeʼn in bʼajtoq kyiʼj txqantl kʼwal, mintiʼtoq ttxolil tanqʼibʼil María. Naʼnx wuʼne jun maj, in noqʼ tej ttzaj tqʼamaʼn weye tiʼtoq in kubʼ tnaʼn. Pero mintiʼ el nnikʼe tiʼjju tzaj tqʼamaʼn tuʼnju naʼmxtoq tbʼant nyoline toj kyyol. Tuʼntzunju, xi nqanine onbʼil te Jehová tuʼn tonin wiʼje tuʼn t-xi nqʼuqbʼaʼne tkʼuʼj. Yajxitl, xi wuʼjine junjun taqikʼ Tyol Dios te. Tej tikʼ junjun abʼqʼi, ok nkeʼyine tzeʼn chʼexpaj tmod ex tanqʼibʼil María tuʼn Tyol Dios. Jaw aʼ twiʼ, ex jaʼlo ax ikx in qʼon xnaqʼtzbʼil kye xjal tiʼj Xjan Uʼj. O che ok nim erman ik tzeʼn qe toj tja ex in kubʼ tnaʼn qa kʼujlaʼn kyuʼn.

Jaku txi qqʼamaʼn qa in xi tkʼiwlaʼn Jehová pakbʼabʼil atz Timor Oriental. Chʼixme kykyaqil pakbʼal jaw aʼ kywiʼ kyoj qeju lajaj abʼqʼi o che ikʼ, noqtzun tuʼnj, ateʼ nim in che ajbʼen te precursor, te onil kye ansyan moqa te ansyan. Ex ateʼ junjuntl in che onin toj ja jatumel in che kubʼ qʼoʼn Uʼj kyoj txqantl Yol ex in che aqʼunan tuʼn kyetz uʼj toj kyyol. Kubʼ nnaʼne tzalajbʼil tej kyok nbʼiʼne in che bʼitzin kyoj chmabʼil, in che tzalaj ex in chʼiy kyamiwbʼil tukʼil Jehová.

Junxitl anqʼibʼil toj tnam Timor Oriental twitzju anqʼibʼil toj tnam Australia. Pero mintiʼ juntl lugar jakutoq chin tzalaje toj. At maj o jaxe kyoj bus jatumel in che jax nim xjal otoq che meltzʼaj loqʼel pescad ex verdura toj merkad. At maj in qoʼxtoqe qʼol xnaqʼtzbʼil kyoj tal ja jatumel at nim kyaq, mintiʼ piso toj ex in che bʼet ekʼ twitz. Maske o qo ok weʼye twitz junjun nya bʼaʼn, nim maj kubʼ nximane jlu: «¡Tbʼanelxix tuʼnju atoʼye tzalu!».

Aj nximane tiʼjju bʼaj wiʼje, in xi nqʼoʼne chjonte kye nmane tuʼnju tzaj kyxnaqʼtzaʼn axix tok weʼye ex e onin wiʼje, axpe ikx tej nchʼiye. O japun kywi yol tkuʼx toj Proverbios 22:6 wiʼje. In tzalaj nmane ex ntxuʼye wiʼje ex tiʼj Alex. In che tzalaj tuʼnju in nok kykeʼyin tzeʼn in qo ajbʼene tuʼn Jehová. Atxix toj abʼqʼi 2016, in qo ajbʼene toj circuito kyoj lugar tokx tjaqʼ tkawbʼil ninja qʼil twitz aqʼuntl te Australasia.

Mintiʼ in nel nnikʼe tiʼj tiquʼn ok nqʼoʼne pakbʼabʼil te jun iqtz tuʼnju ngane tuʼn npakbʼane toj ambʼil jaʼlo. O tzʼel nnikʼe tiʼj qa in qo tzalaj aj qajbʼen te Jehová tuʼn tkyaqil qanmi, maske in qo ok weʼ kywitz junjun nya bʼaʼn. Mas o chin tzalaje kyoj qeju 18 abʼqʼi ma che ikʼ tuʼnju in chin ajbʼene te Jehová junx tukʼil Alex. Jaʼlo in nel nnikʼe tiʼj qa toj tumel tej t-xi tqʼamaʼn David jlu te Jehová: «Kuchiwt tuʼn kytzalaj kykyaqil qeju nnoʼk qeʼ kykʼuʼj tiʼja ex kukx tuʼn kybʼitzan tukʼil tzalajbʼil [...]. Ex qeju tok kykʼuʼj tiʼja kuchiwt che tzalajx qe tuʼna» (Sal. 5:11).