Kyxjel qeju in che uʼjin
Tej chʼixtoq tkyim Jesús, ¿tiquʼn tqʼama qe tyol David tkuʼx toj Salmo 22:1?
Tej chʼixtoq tkyim Jesús, tqʼama qe yol tkuʼx toj Mateo 27:46. Tqʼama jlu: «Nman Dios, Nman Dios, ¿tiquʼn ma chin kyaj tkolina?». Iktzun tten japun kywi yol tuʼn, aqeju otoq kyaj tqʼamaʼn aj kawil David toj Salmo 22:1 (Mar. 15:34). Mintiʼ tqʼama Jesús qe yol tuʼnju otoq tzaj tbʼis moqa tuʼnju mintiʼ ten qʼuqbʼil tkʼuʼj. Ojtzqiʼnxixtoq tuʼn tiquʼn tuʼn tkyim ex kubʼ t-ximen tuʼn tbʼant tuʼn (Mat. 16:21; 20:28). Ax ikx, ojtzqiʼntoq tuʼn qa mlay kolin Jehová tiʼj aj tpon ambʼil tuʼn tkyim (Job 1:10). Tuʼntzunju, xi tqʼoʼn Jehová ambʼil te Jesús tuʼn tkubʼ tyekʼin qa kukx ktel tzʼaqli twitz maske ok weʼ twitz jun kamik kwest (Mar. 14:35, 36).
Qa ikju, ¿tiquʼntzun tqʼama qe yol tkuʼx toj Salmo 22:1? Mlay txi qqʼoʼn jun tzaqʼwebʼil segurxix tiʼj, pero qo xnaqʼtzan tiʼj junjun tqanil. *
Kyukʼil yol lu, bʼalo tajtoq Jesús tuʼn t-xi tnaʼn kye txqantl qa mlay tzʼel tiʼn Jehová ambʼil tuʼn tkyim. Iltoq tiʼj tuʼn t-xi tqʼoʼn chojbʼil ex mlaytoq tzʼonin Jehová tiʼj. Otoq tzʼok te jun xjal ex iltoq tiʼj tuʼn tikʼx kamik tuʼn tuʼntzun tchjet kyil kykyaqil xjal (Heb. 2:9).
Bʼalo tqʼama Jesús junjun yol tkuʼx toj Salmo 22 tuʼntzun ttzaj kynaʼn xjal tkyaqil Salmo lu. Toj ambʼil aju, naqʼli qe aj Judiy tuʼn kykyaj nim Salmo toj kywiʼ. Iktzun tten jaku tzaj kynaʼn jun Salmo aj t-xi naʼn jun versículo kye. Qa tuʼn jlu xi tqʼamaʼn Jesús jun texto tkuʼx toj Salmo lu, jaku txi qqʼamaʼn qa tajtoq tuʼn ttzaj kynaʼn qe t-xnaqʼtzbʼen qe profecía e kyaj qʼamaʼn tiʼj tkyimlen (Sal. 22:7, 8, 15, 16, 18, 24). Nya oʼkxku, aj tkubʼaj Salmo in tzaj tchikʼbʼaʼn qa kukx ktel Tkawbʼil Jehová ex qa kpol bʼaj «ttxaʼnpun txʼotxʼ» (Sal. 22:27-31).
Tej tqʼama Jesús qe tyol David, bʼalo ajbʼen jlu tuʼn tuʼn tkubʼ tyekʼin qa mintiʼ til. Tej naʼmxtoq tkubʼ bʼyoʼn Jesús, xi qʼamaʼn qa otoq yolin nya bʼaʼn tiʼj Dios ex qa otoq xmayin tiʼj (Mat. 26:65, 66). Jun rat naj xiʼ toj juicio, mintiʼ xi kybʼinchaʼn tiʼj toj tumel ex mintiʼ e ok lepeʼ tiʼjju tzaj tqʼamaʼn ley (Mat. 26:59; Mar. 14:56-59). Tej t-xi tqʼamaʼn Jesús qe yol tkuʼx toj Salmo 22:1, bʼalo tuʼn jlu kubʼ tyekʼin qa mintiʼ tiquʼn tuʼn tkubʼ qʼoʼn tkastiw.
Ax ikx, tej t-xi tqʼamaʼn Jesús qe yol kubʼ ttzʼibʼin David toj Salmo, bʼalo tajtoq tuʼn t-xi tnaʼn kye txqantl qa mintiʼ kyaj kolin David tuʼn Jehová tej tikʼ toj nya bʼaʼn. Kukx ok qeʼ tkʼuʼj David tiʼj Jehová tej otoqxi txi tqanin tiquʼn otoq kyaj kolin. ¿Tiquʼn in xi qqʼamaʼn jlu? Tuʼnju tqʼama David qa in kolin Jehová kyiʼj tmajen ex kukx tzaj kʼiwlaʼn tuʼn (Sal. 22:23, 24, 27). Ax jlu bʼaj tiʼj Jesús, aju «Tkʼwaʼl rey David», tej tjaw qʼoʼn twitz tzeʼ, nya a t-xilen jlu qa ya mintiʼtoq in tzalaj Jehová tiʼj (Mat. 21:9).
Ax ikx, bʼalo tqʼama Jesús qe yol lu tuʼntzun tel kynikʼ txqantl tiʼj qa kux choʼn toj tanmi tej tkyaj kolin tuʼn Jehová tuʼntzun tkubʼ tyekʼin qa kukx ktel tzʼaqli twitz. Tuʼnju el tpan tibʼ Adán ex Eva tiʼj Jehová, iltoq tiʼj tuʼn tikʼ Jesús toj yajbʼil ex tuʼn tkyim. Pero mintiʼ toklen jlu tukʼilju otoq kubʼ t-ximen Jehová. Mintiʼ jun il otoq bʼant tuʼn Jesús, pero iltoq tiʼj tuʼn tikʼ toj kʼixkʼoj ex tuʼn tkyim tuʼntzun tkubʼ tyekʼin qa nya ax tok aju otoq tqʼama Satanás. Ax ikx, iltoq tiʼj tuʼn t-xi tqʼoʼn chojbʼil tuʼntzun t-xi qʼoʼn ambʼil kye xjal tuʼn kyanqʼin te jumajx (Mar. 8:31; 1 Ped. 2:21-24). Oʼkx jakutoq bʼant jlu qa ma kyaj kolin Jesús tuʼn Jehová toj chʼin ambʼil ex atzun tnejel maj kyaj kolin toj tkyaqil tanqʼibʼil.
Ex bʼalo tqʼama Jesús qe yol tkuʼx toj Salmo tuʼntzun tonin kyiʼj t-xnaqʼtzbʼen tuʼn tok kyqʼoʼn kywiʼ tiʼj tiquʼn otoq tzaj tqʼoʼn Jehová ambʼil tuʼn tkyim. * Ojtzqiʼntoq tuʼn Jesús qa kʼokeltoq tkyimlen te jun tolsabʼil kywitz txqantl, tuʼnju kyim ik tzeʼn jun eleqʼ (1 Cor. 1:23). Atzun kye t-xnaqʼtzbʼen, jakutoq tzʼonin jlu kyiʼj qa ma tzʼok kyqʼoʼn kywiʼ tiʼj tiquʼn otoq kyim (Gál. 3:13, 14). Iktzun tten mlay kubʼ kyximen qa otoq tzʼok Jesús te eleqʼ, sino otoq tzʼok te Kolil kyiʼj.
Noq alkyexku tiquʼn tqʼama Jesús qe yol tkuʼx toj Salmo, ojtzqiʼntoq tuʼn qa bʼant tajbʼil Jehová tuʼn tej tjaw qʼoʼn twitz tzeʼ. Tej tqʼama qe yol tkuʼx toj Salmo, tqʼama jlu: «Ma japun tkyaqil» (Juan 19:30; Luc. 22:37). Ikju, kyaj tkolin Jehová Jesús jun rat tuʼntzun tbʼant tkyaqilju otoq tzul bʼinchalte tzalu twitz Txʼotxʼ. Ax ikx, tuʼn jlu japun tkyaqilju kyaj qʼamaʼn tiʼj Jesús «tuj tley Moisés ex tuj kyuʼjil t-sanjel Dios ex kyuj salmo» (Luc. 24:44).
^ taqik' 2 Ax ikx qʼonka twitza kyiʼj taqikʼ 9 ex 10 toj xnaqʼtzbʼil «¿Tiʼ xnaqʼtzbʼil jaku tzʼel qiʼn kyiʼj mankbʼil yol tqʼama Jesús?», aju tkuʼx toj uʼj lu.
^ taqik' 4 Tej tpakbʼan Jesús, at maj xi tqanin junjun xjel, pero mintiʼ bʼant jlu tuʼn tuʼn tkubʼ tyekʼin tiʼ kubʼ tnaʼn. ¿Tiquʼntzun xi tqanin junjun xjel? Tuʼnju tajtoq tuʼn t-xi kyqʼamaʼn t-xnaqʼtzbʼen tiʼtoq in kubʼ kyximen (Mar. 7:24-27; Juan 6:1-5; qʼonka twitza tiʼj uʼj La Atalaya te 15 te octubre te 2010, t-xaq 4 ex 5).
