1, 2. ¿Alkye techel in nonin qiʼj tuʼn tel qnikʼ kyiʼj yol tkuʼx toj 1 Pedro 2:21?

QO XIMEN tiʼj qa ma qoʼx ojtzqilte jun witz xobʼajil kyukʼil junjuntl xjal ex mintiʼ ojtzqiʼn bʼe quʼn. Pero at jun xjal qukʼil aju ojtzqiʼn tuʼn ex in kubʼ nej qwitz. Noq minabʼen in kubʼ naj xjal nejni qwitz, pero mintiʼ in qo tzaj xobʼ tuʼnju otoq kyaj tqʼoʼn techel tuʼn qok lepeʼ tiʼj.

² Chʼixme axju in bʼaj kyiʼj okslal axix tok, in che bʼet toj jun bʼe xobʼajil tuʼnju at nim nya bʼaʼn. Pero in najbʼen Jesús tuʼn Jehová tuʼn tkubʼ nej qwitz ex o kyaj tqʼoʼn jun tbʼanel techel tuʼn qok lepeʼ tiʼj (1 Ped. 2:21). Ik tzeʼn in tzaj tyekʼin jun tqanil tiʼj Tyol Dios, ok tmojbʼaʼn apóstol Pedro Jesús tukʼil jun xjal in kubʼ nej kywitz txqantl tuʼntzun t-xi tyekʼin kybʼe. Ik tzeʼn aj qok lepeʼ tiʼj jun xjal aj qxiʼ ojtzqilte jun lugar, ax jlu jaku bʼant quʼn aj qok lepeʼ tiʼj techel kyaj tqʼoʼn Jesús. Noqtzun tuʼnj, ¿alkye techel kyaj tqʼoʼn qwitz? ¿Tiquʼn qo okel lepeʼ tiʼj? Ex ¿tzeʼn jaku bʼant jlu quʼn?

3. ¿Tiʼ t-xilen tuʼn qok lepeʼ tiʼj jun xjal?

³ ¿Tiʼ t-xilen tuʼn qok lepeʼ tiʼj jun xjal? Toj Tyol Dios, aju yol tuʼn qok lepeʼ ex qambʼaj, at maj in yolin tiʼjju o bʼant tuʼn jun xjal toj tkyaqil tanqʼibʼil (Gén. 6:9; Prov. 4:26). Aju in bʼant tuʼn jun xjal, jaku tzʼok mojbʼet tukʼil techel in kyaj tqʼoʼn kywitz txqantl aj in bʼet. Tuʼntzunju, aj qok lepeʼ tiʼj juntl, a t-xilen jlu tuʼn tel qkanoʼn tiʼj moqa tuʼn qok lepeʼ tiʼj techel kyaj tqʼoʼn qwitz.

4. ¿Tiʼ t-xilen tuʼn qok lepeʼ tiʼj techel kyaj tqʼoʼn Jesús?

⁴ ¿Tiʼ t-xilen tuʼn qok lepeʼ tiʼj techel kyaj tqʼoʼn Jesús?  Toj chʼin yol, atz in yolin jlu tiʼj tuʼn tel qkanoʼn tiʼj. Toj taqikʼ Tyol Dios jatumel ma jatz xnaqʼtzbʼil lu, yolin apóstol Pedro tiʼj techel kyaj tqʼoʼn Jesús qwitz tej tikʼx yajbʼil tuʼn. Noqtzun tuʼnj, at junjuntl tiʼchaq jaku tzʼel qkanoʼn tiʼj Jesús (1 Ped. 2:18-25). Tkyaqilju bʼant tuʼn ex tkyaqilju tqʼama tej tten tzalu twitz Txʼotxʼ, in nok te jun tbʼanel techel qwitz.

5. Chikʼbʼantza tiquʼn qkyaqilx jaku qo ok lepeʼ tiʼj techel kyaj tqʼoʼn Jesús maske aj il qoʼ.

⁵ ¿Jakupe tzʼel qkanoʼn tiʼj techel kyaj tqʼoʼn Jesús maske aj il qoʼ? Jaku. Tej tqʼama apóstol Pedro tuʼn tok lepeʼ jun xjal tiʼj techel kyaj tqʼoʼn Jesús, mintiʼ tqʼama tuʼn tok lepeʼ tiʼj toj jun tten tzʼaqlixix, sino tqʼama qa «il tiʼj tuʼn tbʼet bʼaʼn» moqa toj tumel. Qa ma tzʼok tilil quʼn tuʼn qok lepeʼ tiʼj techel kyaj tqʼoʼn Jesús ex qa ma tzʼok tilil quʼn tuʼn t-xi qbʼinchaʼn aju jaku bʼant quʼn, tuʼn jlu in qo ok lepeʼ tiʼj consej tqʼama apóstol Juan tuʼn qbʼet «ik tzaʼn o bʼet Crist» (1 Juan 2:6).

6, 7. ¿Tiquʼn mas in qo ok laqʼeʼ ttxlaj Jehová aj tel qkanoʼn tiʼj techel kyaj tqʼoʼn Jesús?

⁶ Qa ma qo ok lepeʼ tiʼj techel kyaj tqʼoʼn Jesús, mas qo okel laqʼeʼ ttxlaj Jehová. ¿Tiquʼn? Tnejel, tuʼnju anqʼin Jesús ik tzeʼn tajbʼil Jehová ex tuʼn jlu kyaj tqʼoʼn jun tbʼanel techel qwitz (Juan 8:29). Tuʼntzunju, qa ma tzʼel qkanoʼn tiʼj Jesús, ktzalajel tanmi Jehová quʼn. Ex jaku tzʼok qeʼ qkʼuʼj tiʼj qa tzul laqʼeʼ Jehová kytxlaj qeju in nok tilil kyuʼn tuʼn kyok te tamiw (Sant. 4:8).

⁷ Tkabʼin, el tkanoʼn Jesús tiʼj Ttat toj jun tten tzʼaqli. Tuʼntzunju, tqʼama jlu: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). In nel qkanoʼn tiʼj Jehová aj tok tilil quʼn tuʼn tel qkanoʼn  tmod Jesús kubʼ tyekʼin kyiʼj txqantl. Jun techel, kubʼ tyekʼin qʼaqʼbʼil tkʼuʼj tiʼj jun xjal at lepra tiʼj, kubʼ tyekʼin tbʼanel tmod tiʼj jun xuʼj attoq jun yabʼil tiʼj ex tzaj qʼaqʼin tkʼuʼj kyiʼj qeju otoq kyim jun toj kyja (Mar. 1:40, 41; 5:25-34; Juan 11:33-35). Qa mas in nok tilil quʼn tuʼn tel qkanoʼn qe tbʼanel tmod Jehová, mas qo okel laqʼeʼ ttxlaj.

8. Chikʼbʼantza tiquʼn in kubʼ tiʼj twitz txʼotxʼ quʼn qa ma qo ok lepeʼ tiʼj techel kyaj tqʼoʼn Jesús.

⁸ Qa ma qo ok lepeʼ tiʼj techel kyaj tqʼoʼn Jesús, mlay tzʼok qqʼoʼn qwiʼ kyiʼj tiʼchaq te twitz txʼotxʼ. Toj mankbʼil qonikʼen tej tten Jesús tzalu twitz Txʼotxʼ, tqʼama jlu: «Ma kubʼ tiʼj tkyaqil mya bʼaʼn at twitz txʼotxʼ wuʼne» (Juan 16:33). ¿Tiʼ tajtoq Jesús tuʼn ttzaj tqʼamaʼn? Tajtoq tuʼn ttzaj tqʼamaʼn qa mintiʼ ok lepeʼ tiʼj kyximbʼetz xjal ex tiʼjju in bʼanttoq kyuʼn. Kukx tzaj tnaʼn qa ul tzalu twitz Txʼotxʼ tuʼn tjaw tnimsaʼn tbʼi Jehová. Yajtzun qe, ¿tiʼ kbʼantel quʼn? At nim tiʼchaq jaku tzʼok qqʼoʼn qwiʼ tiʼj. Pero qa ma tzʼok qqʼoʼn qwiʼ tiʼj qajbʼebʼil te Jehová ik tzeʼn bʼant tuʼn Jesús, ax ikx qe kbʼel tiʼj twitz txʼotxʼ quʼn (1 Juan 5:5).

9. ¿Tiʼ il tiʼj tuʼn tbʼant quʼn tuʼn kukx qbʼet toj bʼe te chwinqlal?

⁹ Qa ma qo ok lepeʼ tiʼj techel kyaj tqʼoʼn Jesús, tzul qʼoʼn qchwinqlal te jumajx. Tej t-xi tqanin jun kuʼxun qʼinun te Jesús tiʼ tuʼn tbʼant tuʼn tuʼn ttzaj qʼoʼn tchwinqlal te jumajx, xi ttzaqʼweʼn jlu te: «Tzaja, ex lpeʼka wiʼje» (Mat. 19:16-21). Ex xi tqʼamaʼn jlu kye junjun aj Judiy mintiʼ xi kyokslaʼn qa a otoq tzʼok te Cristo: «Qe nẍneʼle in kybʼiʼn tqʼajqʼajel nwiʼye, [...] ex in che ok lpeʼ wiʼje. In xi nqʼoʼne kychwinqlal te jumajx» (Juan 10:24-29). Atzunte Nicodemo, jun xjal tajtoq tuʼn tel tnikʼ kyiʼj t-xnaqʼtzbʼil Jesús ex in najbʼentoq toj Sanedrín, xi tqʼamaʼn Jesús te qa oʼkx qeju in nok qeʼ kykʼuʼj tiʼj kxel qʼoʼn kychwinqlal te jumajx (Juan 3:16). In nok qeʼ qkʼuʼj tiʼj Jesús aj t-xi qbʼinchaʼn tkyaqilju kyaj t-xnaqʼtzaʼn tukʼil tyol ex tukʼilju bʼant tuʼn. Qa ma bʼant jlu quʼn, kukx qo bʼetel toj bʼe te chwinqlal (Mat. 7:14).

10. ¿Tiʼ kbʼantel quʼn tuʼn tok qojtzqiʼnxix Jesús? (Juan 17:3).

¹⁰ Tuʼn qok lepeʼ tiʼj techel kyaj tqʼoʼn Jesús, nim toklen tuʼn tok qojtzqiʼn (kjawil uʼjit Juan 17:3). Tuʼn tok qojtzqiʼnxix Jesús, nim toklen tuʼn kukx qxnaqʼtzan kyiʼj tmod, tiʼj t-ximbʼetz ex tiʼjju kyaj tqʼamaʼn. Qa o tzikʼ nim ambʼil toklen qojtzqiʼn axix tok moqa miʼn, qkyaqilx il tiʼj tuʼn tok tilil quʼn tuʼn tok qojtzqiʼn Jehová ex Jesús.

11. ¿Alqiʼj in che yolin uʼj te Mateo, Marcos, Lucas ex Juan?

¹¹ Kʼujlaʼnxix qoʼ tuʼn Jehová, tuʼntzunju,  tzaj tqʼoʼn ambʼil tuʼn tkyaj tzʼibʼin uʼj te Mateo, Marcos, Lucas ex Juan tuʼntzun tel qnikʼ tiʼj Jesús. In che yolin uʼj lu tiʼj tkyaqilju bʼant tuʼn Jesús ex tiʼj tpakbʼabʼil. Ax ikx, in che yolin tiʼjju tqʼama ex tiʼjju kubʼ tnaʼn. Ex in che onin kyaje uʼj lu qiʼj tuʼn qximen tiʼj techel o kyaj tqʼoʼn Jesús qwitz (Heb. 12:3). Toj juntl yol, in che onin qiʼj tuʼn tel qnikʼ tiʼj tzeʼn tuʼn qok lepeʼ tiʼj Jesús. Qa ma qo xnaqʼtzan kyiʼj kyaje uʼj in che yolin tiʼj tanqʼibʼil Jesús, jaku tzʼok qojtzqiʼn ex jaku qo ok lepeʼ tiʼj techel kyaj tqʼoʼn qwitz.

12. Aj qxnaqʼtzan kyiʼj kyaje uʼj in che yolin tiʼj tanqʼibʼil Jesús, ¿tiʼ jaku bʼant quʼn tuʼn kyonin qiʼj?

¹² Tuʼn kyonin kyaje uʼj in che yolin tiʼj tanqʼibʼil Jesús qiʼj, nya oʼkx tuʼn tjaw quʼjin. Il tiʼj tuʼn tel qpaʼn ambʼil tuʼn qxnaqʼtzan tiʼj ex tuʼn qximen tiʼjju in jaw quʼjin (mojbʼankuya tukʼil Josué 1:8). Qo xnaqʼtzan kyiʼj kabʼe nabʼil jaku che onin qiʼj tuʼn qximen ex tuʼn t-xi qbʼinchaʼn aju in nel qnikʼ tiʼj kyoj uʼj in che yolin tiʼj tanqʼibʼil Jesús.

13. ¿Tiʼ jaku bʼant quʼn tuʼn tel qnikʼ tiʼj jun txʼolbʼabʼil tkuʼx kyoj uʼj in che yolin tiʼj tanqʼibʼil Jesús?

¹³ Tnejel, qo ximen tiʼjju bʼaj. Bʼaʼn tuʼn tajbʼen qximbʼetz quʼn tuʼn tel qnikʼ, tuʼn tok qbʼiʼn ex tuʼn tkubʼ qnaʼn aju bʼaj toj ambʼil aju. Tuʼn tbʼant jlu quʼn, bʼaʼn tuʼn qjyon tqanil kyoj uʼj in che etz tuʼn ttnam Jehová. Ex qo xnaqʼtzan tiʼj contexto tok tiʼj txʼolbʼabʼil in qo xnaqʼtzan tiʼj. Qo jyon tqanil tiʼjju otoq bʼaj, tiʼjju bʼaj yajxitl, kyiʼj xjal ex kyiʼj lugar tiʼj txʼolbʼabʼil in qo uʼjin tiʼj. Qa in jaw quʼjin jun txʼolbʼabʼil ex in kanet ax txʼolbʼabʼil lu quʼn toj juntl uʼj in yolin tiʼj tanqʼibʼil Jesús, bʼaʼn tuʼn tok qmojbʼaʼn. ¿Tiquʼn? Tuʼnju jaku che kanet junjuntl tqanil quʼn.

14, 15. Aj tjaw quʼjin jun txʼolbʼabʼil kyoj uʼj in che yolin tiʼj tanqʼibʼil Jesús, ¿tiʼ kbʼantel quʼn tuʼn tkubʼ qbʼinchaʼn?

¹⁴ Tkabʼin, tuʼn t-xi qbʼinchaʼn aju in nel qnikʼ tiʼj kyoj txʼolbʼabʼil (Juan 13:17).  Otoqxi qo bʼaj xnaqʼtzan tiʼj jun txʼolbʼabʼil tkuʼx kyoj uʼj in che yolin tiʼj tanqʼibʼil Jesús, bʼaʼn tuʼn tkubʼ qxjelin jlu: «¿Tiʼ xnaqʼtzbʼil jaku tzʼel wiʼne tiʼj txʼolbʼabʼil lu? ¿Tzeʼn jaku tzʼajbʼen wuʼne tuʼn wonine kyiʼj txqantl?». Qo ximen tiʼj jun erman jaku tzʼonin xnaqʼtzbʼil tiʼj ex aj tkanet jun tbʼanel ambʼil quʼn, qqʼamanx te tukʼil kʼujlabʼil aju otoq tzʼel qnikʼ tiʼj.

¹⁵ Qo xnaqʼtzan tiʼj jun techel tzeʼn jaku txi qbʼinchaʼn qe kabʼe nabʼil lu. Qo xnaqʼtzan tiʼj txʼolbʼabʼil in yolin tiʼj jun xuʼj viud aju ok tkeʼyin Jesús toj tja Dios.

16. Chikʼbʼantza tzeʼn bʼaj aju in tzaj qʼamaʼn toj Marcos 12:41.

¹⁶ Qo ximen tiʼjju in tzaj tqʼamaʼn txʼolbʼabʼil (kjawil uʼjit Marcos 12:41). Atzun qʼij 11 te nisán te abʼqʼi 33. Noq juntl seman atx taj tuʼn tkyim Jesús ex toj ambʼil aju, chʼixme enter qʼij in qʼontoq xnaqʼtzbʼil toj tja Dios. Atzun kye nejenel kye okslabʼil in che jyon tumel tzeʼn tuʼn tkubʼ tzʼaq Jesús. Ateʼ junjun kubʼ kyximen qa mintiʼ toklen ex junjuntl xi kyqanin nim xjel te tuʼn tkubʼ tzʼaq toj jun tramp (Mar. 11:27-33; 12:13-34). Yajxitl, xiʼ Jesús toj juntl plaj, bʼalo atz pon jatumel in che kubʼ ten xuʼj kʼulil toj tja Dios. Tej tkubʼ ten atz, jakutoq txi tkeʼyin tkubʼil pwaq jatumel kux kyqʼoʼn xjal kyoyaj. Kubʼ qeʼ ex ok tkeʼyin qa ateʼ nim qʼinun kux kyqʼoʼn pwaq te oyaj. Bʼalo nqayin kubʼ qeʼ, tuʼntzunju ok tbʼiʼn tqʼajqʼajel kywiʼ pwaq tej tkux kyqʼoʼn xjal.

17. ¿Tiʼ bʼant tuʼn mebʼa xuʼj in yolin Marcos 12:42 tiʼj?

¹⁷ (Kjawil uʼjit Marcos 12:42). Tej tbʼaj tkyaqil jlu, ax ikx ok tqʼoʼn Jesús twitz tiʼj jun «mebʼa xuʼj» (Luc. 21:2). Kwesttoq tanqʼibʼil xuʼj lu tuʼnju at maj mintiʼtoq in kanet twi twa. Maske ikju, pon laqʼeʼ ttxlaj jun tkubʼil pwaq ex toj ewaj kux tqʼoʼn kabʼe tal centav toj. Ex mintiʼlo e qʼajt kabʼe tal centav lu tej kykux tzʼaq toj tkubʼil oyaj. Pero ojtzqiʼntoq tuʼn Jesús qa kux tqʼoʼn kabʼe leptón, aju pwaq mas nya nim toklen toj ambʼil aju. Mlaytoq laqʼet jun gorrión tuʼn pwaq lu, aju tal chyuʼj mas nya nim twiʼ in kʼayinjtz te kychiʼ xjal.

18. Ik tzeʼn in tzaj tqʼamaʼn Marcos 12:43 ex 44, ¿tiʼ tqʼama Jesús tiʼj oyaj kux tqʼoʼn mebʼa xuʼj?

¹⁸ (Kjawil uʼjit Marcos 12:43, 44). Jaw labʼin Jesús tiʼjju bʼant tuʼn mebʼa xuʼj. Tuʼntzunju, e tzaj txkoʼn qe t-xnaqʼtzbʼen tuʼn tok kyqʼoʼn kywitz tiʼj ex xi tqʼamaʼn jlu kye: «Ax tok kxel nmaʼne kyeye, aju mebʼa xuʼj lu tal yajxix, mas nim ma kuʼx tqʼoʼn kywitz kykyaqil qeju ma kuʼx kyqʼoʼn kyoyaj». Ex tqʼamatl jlu kye: «Kykyaqil qe jlu [mas qeju qʼinun] ma kuʼx kyqʼoʼn aju in kyaj ten kye; atzunte xuʼj lu maske tal yajxix, pero ma kuʼx tqʼoʼn tkyaqilju at tajbʼenil twi twa». Tej tkux tqʼoʼn xuʼj tkyaqilju at te toj qʼij aju, kubʼ tyekʼin qa qʼuqlitoq tkʼuʼj tiʼj qa kxqʼuqil Jehová tiʼj (Sal. 26:3).

19. ¿Tiʼ xnaqʼtzbʼil jaku tzʼel qiʼn tiʼjju tqʼama Jesús tiʼj mebʼa xuʼj?

¹⁹ Qbʼincham aju in nel qnikʼ tiʼj toj txʼolbʼabʼil. Bʼaʼn tuʼn tkubʼ qxjelin jlu: «¿Tiʼ xnaqʼtzbʼil jaku tzʼel wiʼne tiʼjju tqʼama Jesús tiʼj mebʼa xuʼj?». Jaku txi qqʼamaʼn qa tajtoq tuʼn t-xi tqʼoʼn mas te Jehová. Maske ikju, xi tqʼoʼn aju jakutoq bʼant tuʼn, aju mas tbʼanel. Ojtzqiʼntoq tuʼn Jesús qa nim toklen toj twitz Jehová aju oyaj kux tqʼoʼn mebʼa xuʼj. A jlu in tzaj tqʼoʼn jun xnaqʼtzbʼil nim toklen qe, in tzalaj Jehová aj t-xi qqʼoʼn aju mas tbʼanel te ex aj qajbʼen te tuʼn tkyaqil qanmi (Mat. 22:37; Col. 3:23). Ax ikx in tzalaj aj t-xi qbʼinchaʼn tkyaqilju jaku bʼant quʼn. Ex at toklen jlu  tukʼilju ambʼil ex qipumal in nel qpaʼn tuʼn qkʼulin te, ik tzeʼn aj qxiʼ kyoj chmabʼil ex aj qex pakbʼal.

20. ¿Tzeʼn jaku txi qbʼinchaʼn aju ma tzʼel qnikʼ tiʼj toj txʼolbʼabʼil in yolin tiʼj mebʼa xuʼj? Qʼamantza jun techel.

²⁰ ¿Tzeʼn jaku txi qbʼinchaʼn aju ma tzʼel qnikʼ tiʼj toj txʼolbʼabʼil in yolin tiʼj mebʼa xuʼj? Kxel qbʼinchaʼn qa ma qo ximen kyiʼj erman ex qa ma txi qnaʼn kye qa in tzalaj Jehová tiʼjju in bʼant kyuʼn. Jun techel, ¿atpe jun ermana ma tijen in kubʼ tnaʼn nya bʼaʼn moqa in kubʼ tnaʼn qa mintiʼ tajbʼen tuʼnju ya mintiʼxix in pakbʼan ik tzeʼn toj ambʼil ojtxe? Moqa, ¿atpe jun erman mintiʼ in bʼant tuʼn tten kyoj kykyaqil chmabʼil tuʼnju at jun yabʼil tiʼj ex tuʼn jlu in tzaj tbʼis? Qa ikju, jaku qo onin kyiʼj qa ma txi qqʼamaʼn junjun tbʼanel yol kye (Efes. 4:29). Qqʼamanx tbʼanel xnaqʼtzbʼil kye, aju ma tzʼel qiʼn tiʼj mebʼa xuʼj. Kʼonil jlu kyiʼj tuʼn ttzaj kynaʼn qa in tzalaj Jehová qiʼj qa ma txi qbʼinchaʼn tkyaqilju jaku bʼant quʼn (Prov. 15:23; 1 Tes. 5:11). Aj t-xi qqʼamaʼn tbʼanel yol kye txqantl tuʼnju in nok tilil kyuʼn tuʼn t-xi kyqʼoʼn aju mas tbʼanel te Jehová maske in kubʼ kyximen qa nya nim toklen, tuʼn jlu in qo ok lepeʼ tiʼj techel kyaj tqʼoʼn Jesús.

21. ¿Tiʼ teya in kubʼ t-ximen tuʼn tbʼant tuʼn?

²¹ In xi qqʼoʼn nim chjonte te Jehová tuʼnju in tzaj kyqʼoʼn uʼj te Mateo, Marcos, Lucas ex Juan nim tqanil tiʼj tanqʼibʼil Jesús. ¿Tiquʼn? Tuʼnju in che onin qiʼj tuʼn qok lepeʼ tiʼj techel kyaj tqʼoʼn Jesús. Tbʼanel qa ma kubʼ qximan tuʼn tel qpaʼn ambʼil tuʼn qxnaqʼtzan qjunalx moqa kyukʼil toj qja kyiʼj kyaje uʼj in che yolin tiʼj tanqʼibʼil Jesús. Tuʼn tonin jlu qiʼj, nim toklen tuʼn qximen tiʼjju bʼaj ex tuʼn t-xi qbʼinchaʼn aju in nel qnikʼ tiʼj. Ex nya oʼkx tuʼn tel qkanoʼn aju bʼant tuʼn Jesús, sino ax ikx nim toklen tuʼn t-xi qbʼiʼn aju tqʼama. Toj juntl xnaqʼtzbʼil, kʼelel qnikʼ tiʼj alkye xnaqʼtzbʼil jaku tzʼel qiʼn tiʼjju tqʼama Jesús tej tjaw qʼoʼn twitz tzeʼ.