1. ¿Tiʼ in nonin qiʼj tuʼn qtzalaj?

 TAJ Jehová tuʼn qtzalaj. Ojtzqiʼn jlu quʼn tuʼnju atzun jun kyxol qe mod in tqʼoʼn xewbʼaj xjan (Gál. 5:22). Mas in qo tzalaj aj t-xi qqʼoʼn chʼin kye txqantl twitzju tuʼn ttzaj qkʼamoʼn, tuʼntzunju, in kubʼ qnaʼn bʼaʼn aj tok tilil quʼn tuʼn qpakbʼan ex aj qonin kyiʼj erman (Hech. 20:35).

2, 3. a) Ik tzeʼn in tzaj tqʼamaʼn Gálatas 6:4, ¿tiʼ kʼonil qiʼj tuʼn kukx qtzalaj? b) ¿Tiʼ kʼelel qnikʼ tiʼj toj xnaqʼtzbʼil lu?

² ¿Tiʼ kʼonil qiʼj tuʼn kukx qtzalaj? Yolin apóstol Pablo tiʼj kabʼe tiʼ jaku tzʼonin qiʼj ex in che kanet quʼn toj Gálatas 6:4 (uʼjinktza). Tnejel, qo tzalajel toj qajbʼebʼil te Jehová qa ma txi qqʼoʼn aju mas tbʼanel te. Ex nim toklen tuʼn tbʼant jlu quʼn qkyaqilx (Mat. 22:36-38). Tkabʼin, mintiʼ tuʼn tok qmojbʼaʼn qaqʼun kyukʼil txqantl. Qa mintiʼ yabʼil qiʼj, qa o tzaj qkʼamoʼn xnaqʼtzbʼil tiʼj jun aqʼuntl moqa tbʼanel qo aqʼunan tiʼj jun tiʼ, qqʼonx chjonte te Jehová tiʼj tkyaqil jlu tuʼnju noq tuʼn tonbʼil in bʼant tkyaqil. Qatzun ateʼ junjuntl erman in bʼant mas aqʼuntl kyuʼn qwitz toj kyajbʼebʼil te Jehová, bʼaʼn tuʼn qtzalaj kyiʼj tuʼnju in najbʼen kyojtzqibʼil kyuʼn tuʼn tjaw kynimsaʼn Jehová ex nya tuʼn tjaw kynimsan kyibʼ. Mintiʼ tuʼn qcompetirin kyukʼil, sino bʼaʼn tuʼn tel qkanoʼn kyiʼj.

³ Toj xnaqʼtzbʼil lu, kʼelel qnikʼ tiʼj tiʼ jaku tzʼonin qiʼj tuʼn miʼn ttzaj qbʼis qa mlay bʼant tuʼn t-xi qbʼinchaʼn tkyaqilju in kubʼ qximen toj qajbʼebʼil te Jehová. Ax ikx, kʼelel qnikʼ tiʼj tzeʼn jaku tzʼajbʼen qojtzqibʼil quʼn toj tumel ex tzeʼn jaku tzʼel qkanoʼn techel kyiʼj txqantl.

4. ¿Tiquʼn jaku tzaj qbʼis? Yolina tiʼjju bʼaj tiʼj Carol.

⁴ In tzaj kybʼis junjun erman tuʼnju yabʼ ateʼ, tuʼnju ma che tijen ex tuʼnju mlay bʼant tuʼn t-xi kybʼinchaʼn tkyaqilju in kubʼ kyximen toj kyajbʼebʼil te Jehová. Atzun jlu bʼaj tiʼj ermana  Carol, aju ajbʼen toj jun ambʼil toj jun lugar jatumel kyajtoq erman onbʼil toj pakbʼabʼil. Xi tqʼoʼn xnaqʼtzbʼil tiʼj Tyol Dios kye 35 xjal ex onin kyiʼj nimku tuʼn t-xi kyqʼamaʼn te Jehová tuʼn kyajbʼen te ex tuʼn kybautisarin. ¡Tbʼanelxix aqʼuntl bʼant tuʼn! Noqtzun tuʼnj, tzaj yabʼil tiʼj ex oʼkx junjun maj jakutoq tzʼetz toj tja. In tzaj tqʼamaʼn ermana jlu: «Mlay bʼant ax aqʼuntl wuʼne ik tzeʼn kye txqantl tuʼnju yabʼ atine. Maske ikju, in kubʼ nximane qa mintiʼ in chin ajbʼene te Jehová ik tzeʼn taj. Mlay bʼant tuʼn t-xi nbʼinchaʼne tkyaqilju waje tuʼn tbʼant wuʼne ex in tzaj nbʼise tuʼn jlu». In nok tilil tuʼn Carol tuʼn t-xi tbʼinchaʼn aju jaku bʼant tuʼn toj tajbʼebʼil te Jehová. Jaku tzʼok qeʼ qkʼuʼj tiʼj qa in nel tnikʼ Jehová tiʼj aqʼuntl in bʼant tuʼn ermana ex qa in nok tqʼoʼn toklen.

5. a) ¿Tiʼ bʼaʼn tuʼn ttzaj qnaʼn qa in tzaj qbʼis tuʼnju mintiʼ in bʼant tkyaqilju in kubʼ qximen? b) Ik tzeʼn in nok qkeʼyin kyoj tilbʼilal toj xnaqʼtzbʼil lu, ¿alkye tten o txi tqʼoʼn ermano aju mas tbʼanel te Jehová?

⁵ Qa in tzaj qbʼis junjun maj tuʼnju mintiʼ in bʼant tkyaqilju in kubʼ qximen, bʼaʼn tuʼn tkubʼ qxjelin jlu: «¿Tiʼ taj Jehová tuʼn tbʼant wuʼne?». Taj tuʼn t-xi qqʼoʼn aju mas tbʼanel te, toj juntl yol, taj tuʼn t-xi qbʼinchaʼn tkyaqilju jaku bʼant quʼn. Qo ximen tiʼj jun techel. In tzaj tbʼis jun ermana te 80 abʼqʼi tuʼnju ya mintiʼ in bʼant ax aqʼuntl tuʼn toj pakbʼabʼil ik tzeʼn tej qʼiʼntoq 40 abʼqʼi tuʼn. In kubʼ t-ximen ermana qa mintiʼ in tzalaj Jehová tiʼj tkyaqilju in bʼant tuʼn. Pero, ¿axpe tok jlu? Qo yolin tiʼj. Qa ok tilil tuʼn ermana tuʼn t-xi tqʼoʼn te Jehová aju mas tbʼanel tej qʼiʼntoq 40 abʼqʼi tuʼn ex kukx in nok tilil tuʼn jaʼlo maske ma japun twi 80 abʼqʼi, jaku txi qqʼamaʼn qa kukx in xi tqʼoʼn aju mas tbʼanel te Jehová. Qa in kubʼ qximen qa mintiʼ in nok tqʼoʼn Jehová toklen aju in bʼant quʼn, bʼaʼn tuʼn ttzaj qnaʼn qa a Jehová in kubʼ ximente tiʼ jaku tzalaj tuʼn ex tiʼ mlay tzalaj tuʼn. Qa ma txi qqʼoʼn aju mas tbʼanel te, tzul tqʼamaʼn jlu qe: «Aya majen bʼaʼn ex ma japunxix tuʼna» (jaku tzʼok tmojbʼaʼna tukʼil Mateo 25:20-23).

6. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj María?

⁶ Jun tiʼ jaku tzʼonin qiʼj tuʼn kukx qtzalaj aju qa ma tzʼok qqʼoʼn qwiʼ tiʼjju jaku bʼant quʼn ex nya tiʼjju mlay bʼant quʼn. Qo yolin tiʼjju bʼaj tiʼj ermana María. Mintiʼtoq in pakbʼan nim ambʼil tuʼnju yabʼtoq taʼ. Tnejel, tzaj bʼaj tkʼuʼj ex kubʼ t-ximen qa mintiʼtoq tajbʼen. Pero el tnikʼ María tiʼj qa ax ikx attoq jun ermana toj kʼloj okslal yabʼ taʼ ex mintiʼ in bʼant tuʼn tjaw weʼ. Tuʼntzunju, jyon tumel tzeʼn tuʼn tonin tiʼj ermana. In tzaj tqʼamaʼn María jlu: «Kubʼ nximane tuʼn nxiʼye tja ermana tuʼntzun npakbʼane tukʼil toj teléfono ex toj carta. In chin tzalajtoqe aj nmeltzʼaje njaye, tuʼnju otoq chin onine tiʼj ermana». Ax ikx qe jaku qo tzalaj aj tok qqʼoʼn qwiʼ tiʼjju jaku bʼant quʼn ex nya tiʼjju mlay bʼant quʼn. ¿Yajtzun qa jaku bʼant mas quʼn toj qajbʼebʼil te Jehová moqa tbʼanel in che bʼant junjun aqʼuntl quʼn?

7. ¿Tiʼ tbʼanel consej xi tqʼoʼn apóstol Pedro kye okslal?

⁷ Toj tnejel carta kubʼ ttzʼibʼin apóstol Pedro tuʼn tonbʼil xewbʼaj xjan, xi tqʼamaʼn kye erman tuʼn tajbʼen kyojtzqibʼil kyuʼn tuʼn kyonin kyiʼj erman toj kʼloj okslal. Kubʼ ttzʼibʼin jlu: «Aju toklen teyle junjun ma tkʼam tzʼajbʼenxwit tuʼn kye txqantl, tuʼn kyok te jun bʼaʼn mayordom tiʼj ju kyoklen junxilchaq tten ma kykʼam tuʼn Dios» (1 Ped. 4:10). Miʼn kubʼ qximen tuʼn miʼn tkubʼ qbʼinchaʼn aju jaku bʼant quʼn noq tuʼnju jaku tzaj loʼchj tiʼj kykʼuʼj txqantl qiʼj  moqa tuʼnju jaku tzaj kybʼis. Qa ma kubʼ qximen jlu, mlay tzʼonin qiʼj tuʼn t-xi qqʼoʼn aju mas tbʼanel te Jehová.

8. Ik tzeʼn in tzaj tqʼamaʼn 1 Corintios 4:6 ex 7, ¿tiquʼn mintiʼ tuʼn tjaw qnimsan qibʼ tiʼjju in bʼant quʼn?

⁸ Qa at qojtzqibʼil tiʼj jun tiʼ, nim toklen tuʼn tajbʼen quʼn tuʼn tbʼant jun tbʼanel aqʼuntl. Pero bʼaʼn tuʼn tok qxqʼuqin qibʼ tuʼn miʼn tjaw qnimsan qibʼ (kjawil uʼjit 1 Corintios 4:6, 7). Jun techel, bʼalo tbʼanel tzeʼn in xi tzyet tuʼn qqʼon xnaqʼtzbʼil tiʼj Tyol Dios ex tbʼanel tuʼn kukx tbʼant jlu quʼn. Pero junxitl qa tbʼanel in che bʼant junjun tiʼchaq quʼn twitzju tuʼn tjaw qnimsan qibʼ. Qo ximen tiʼj qa bʼaj jun tiʼ tbʼanel qiʼj toj pakbʼabʼil ex xi tzyet tuʼn qqʼon xnaqʼtzbʼil tiʼj Tyol Dios. Bʼalo qaj tuʼn t-xi qqʼamaʼn tkyaqil tqanil kye erman toj pakbʼabʼil. Pero aj qpon kyukʼil, in nok qbʼiʼn qa in xi tqʼamaʼn jun ermana qa otoq kyaj tqʼoʼn jun uʼj te jun xjal. Kyaj tqʼoʼn ermana jun uʼj, atzun qe xi tzyet jun xnaqʼtzbʼil quʼn tiʼj Tyol Dios tukʼil jun xjal. ¿Tiʼ kbʼantel quʼn? Ojtzqiʼn quʼn qa che tzalajel erman aj tok kybʼiʼn aju kxel qqʼamaʼn kye, pero in kubʼ qximen qa mas bʼaʼn tuʼn t-xi qqʼamaʼn toj juntl ambʼil tuʼnju nya qaj tuʼn ttzaj tbʼis ermana. Qa ma bʼant jlu quʼn, in kubʼ qyekʼin tbʼanel qmod. Noqtzun tuʼnj, tbʼanel tuʼn kukx qqʼon xnaqʼtzbʼil tiʼj Tyol Dios tuʼnju nya kwest in nela toj qwitz.

9. ¿Tzeʼn jaku tzʼajbʼen quʼn aju qojtzqibʼil at tiʼj jun tiʼ?

⁹ Bʼaʼn tuʼn ttzaj qnaʼn qa a Jehová o tzaj qʼonte qojtzqibʼil tiʼj alkyexku tiʼ jaku bʼant quʼn. Tuʼntzunju, bʼaʼn tuʼn tajbʼen quʼn tuʼn qonin kyiʼj erman toj kʼloj okslal ex nya tuʼn tjaw qnimsan qibʼ (Filip. 2:3). Qa ma tzʼajbʼen qipumal ex qojtzqibʼil tuʼn qonin tuʼn tbʼant tajbʼil Jehová, jaku qo tzalaj. ¿Tiquʼn? Tuʼnju in najbʼen quʼn tuʼn tjaw qnimsaʼn Jehová ex nya tuʼn tjaw qnimsan qibʼ kywitz txqantl nix tuʼn tkubʼ kynaʼn qa mas nim qoklen kywitz.

10. ¿Tiquʼn nya toj tumel tuʼn tok qmojbʼaʼn aju in bʼant quʼn kyukʼil txqantl?

¹⁰ Qa mintiʼ ma tzʼok qxqʼuqin qibʼ, jaku tzʼok qmojbʼaʼn aju in bʼant quʼn tukʼilju mintiʼ in bʼant kyuʼn txqantl. Qo yolin tiʼj jun techel. Tbʼanel qʼon jun erman chikʼbʼabʼil ex at nim tojtzqibʼil tiʼj jlu. Tuʼn jlu, jakulo kubʼ t-ximen qa mas nim toklen twitz juntl ermano kwest in nela toj twitz tuʼn tex tqʼoʼn jun chikʼbʼabʼil. Noqtzun tuʼnj, atlo junjuntl tiʼchaq mas tbʼanel in bʼant tuʼn ermano kwest tuʼn tex tqʼoʼn jun chikʼbʼabʼil. Bʼalo bʼaʼn bʼinchan xtalbʼil,  in che jawlo tchʼiysaʼn tkʼwal toj tumel moqa in pakbʼan tukʼil nim tzalajbʼil. Nimxix in qo tzalaj tuʼnju ateʼ nim erman in najbʼen kyojtzqibʼil kyuʼn tuʼn kyajbʼen te Jehová ex tuʼn kyonin kyiʼj txqantl.

11. ¿Tiquʼn tbʼanel tuʼn tok tilil quʼn tuʼn tel qkanoʼn tiʼj techel kyaj tqʼoʼn Jesús?

¹¹ Nya bʼaʼn tuʼn tok qmojbʼaʼn qaqʼun kyukʼil txqantl, pero qa ma tzʼok qqʼoʼn qwitz tiʼj tbʼanel techel in kubʼ kyqʼoʼn tmajen Jehová, jaku tzʼel qkanoʼn nim tiʼchaq kyiʼj. Qo ximen tiʼj tbʼanel techel kyaj tqʼoʼn Jesús. Maske aj il qoʼ, jaku tzʼel qkanoʼn qe tbʼanel tmod ex aju bʼant tuʼn (1 Ped. 2:21). Qa ma tzʼok tilil quʼn tuʼn qok lepeʼ tiʼj techel kyaj tqʼoʼn, qo okel te mas tbʼanel tmajen Jehová ex mas tbʼanel kʼokel qajbʼebʼil te.

12, 13. ¿Tiʼ xnaqʼtzbʼil jaku tzʼel qkanoʼn tiʼj rey David?

¹² In yolin Biblia kyiʼj nim xinaq ex xuʼj kyaj kyqʼoʼn jun tbʼanel techel qwitz maske nya tzʼaqli qe (Heb. 6:12). Jun kyxol qe jlu a rey David. Tqʼama Jehová jlu tiʼj: «Ma tzʼel nnikʼe tiʼj [...], ate jlu jun xinaq ik tzaʼnx wajbʼile» (Hech. 13:22). Pero nyatoq tzʼaqli te David. Axpe ikx, kubʼ tbʼinchaʼn junjun matij il. Maske ikju, kyaj tqʼoʼn jun tbʼanel techel qwitz. ¿Tiquʼn? Tuʼnju mintiʼ jyon tumel tuʼn tkubʼ tewin til tej t-xi kawin. Sino xi tkʼamoʼn kawbʼil xi qʼoʼn te ex ajtz tiʼj tanmi tiʼjju otoq kubʼ tbʼinchaʼn. Tuʼntzunju, kubʼ najsaʼn til tuʼn Jehová (Sal. 51:3, 4, 10-12).

¹³ Jaku tzʼonin techel kyaj tqʼoʼn David qiʼj qa ma qo ximen kyiʼj xjel ik tzeʼn jlu: «¿Tiʼ in bʼant wuʼne aj ttzaj qʼoʼn jun consej weye? ¿In nelpe nnikʼe tiʼj qa otoq kubʼ nbʼinchaʼne jun nya bʼaʼn moqa in xi njyoʼne tumel tuʼn tkubʼ wewine? ¿Jun ratpe in xi nqʼamaʼne qa a juntl at tpaj tiʼjju otoq bʼaj wiʼje? ¿In nokpe tilil wuʼne tuʼn miʼn tkubʼ nbʼinchaʼne juntl maj aju otoq chin el txalpaje tiʼj?». Qo ximen kyiʼj xjel ik tzeʼn jlu aj qxnaqʼtzan tiʼj kyanqʼibʼil tmajen Jehová e ten toj ambʼil ojtxe. ¿Axpe nya bʼaʼn e ok weʼ twitz ik tzeʼn qe? ¿Tiʼ kymod kubʼ kyyekʼin? Aj qxnaqʼtzan tiʼj teyele junjun kye, bʼaʼn tuʼn tkubʼ qxjelin jlu: «¿Tiʼ jaku bʼant wuʼne tuʼn tkubʼ nyekʼine qe tbʼanel tmod tmajen Jehová lu?».

14. ¿Tzeʼn jaku tzʼonin qiʼj qa ma tzʼok qqʼoʼn qwitz tiʼj techel in kubʼ kyqʼoʼn erman?

¹⁴ Ax ikx, at nim tiʼ jaku tzʼel qkanoʼn kyiʼj erman toj ambʼil jaʼlo, qa kuʼxun qe moqa ma che tijen. Jun techel, bʼalo at jun  erman in nel ikʼun kyuʼn toj tja, at jun yabʼil tiʼj moqa in nok tilil tuʼn jun kuʼxun tuʼn miʼn tkubʼ tbʼinchaʼn nya bʼaʼn in tzaj qʼamaʼn te kyuʼn txqantl. ¿Atpe jun tbʼanel kymod erman lu jaku tzʼel qkanoʼn? Qa in nok qqʼoʼn qwitz tiʼj kymod in kubʼ kyyekʼin, jaku tzʼel qkanoʼn ex jaku tzʼonin qiʼj aj qok weʼ twitz jun nya bʼaʼn. Nimxix kyoklen erman lu toj qwitz tuʼnju in kubʼ kyyekʼin qʼuqbʼil kykʼuʼj ex nimxix in qo tzalaj kyiʼj (Heb. 13:7; Sant. 1:2, 3).

15. ¿Alkye consej tqʼama apóstol Pablo jaku tzʼonin qiʼj tuʼn kukx qajbʼen te Jehová tukʼil tzalajbʼil?

¹⁵ Qa qkyaqilx ma txi qqʼoʼn aju mas tbʼanel te Jehová, qo onil tuʼn tten mujbʼabʼil qxol kyukʼil erman. Atzun jlu bʼant kyuʼn okslal toj tnejel syent abʼqʼi. Teyele junjun kye tzaj qʼoʼn jun kyoklen ex kyaqʼun (1 Cor. 12:4, 7-11). Pero nya tuʼn jlu jakutoq che competirin moqa tuʼn miʼn tten mujbʼabʼil kyxolx. Sino xi tqʼamaʼn Pablo toj uʼj xi ttzʼibʼin kye okslal te Éfeso tuʼn tok tilil tuʼn teyele junjun kye «tuʼn tchʼiyjuʼ t-xmilal Krist kyuʼn». Ex tqʼamatl jlu: «Kykyaqil ateʼk tiʼj Crist in kyonin kyibʼ kyxolx noq alkyex kyaqʼun, ex in che chʼiy tuʼnju in kykʼujlan kyibʼ» (Efes. 4:1-3, 11, 12, XT, 16). Tej tbʼant jlu kyuʼn, e onin tuʼn tten mujbʼabʼil kyxolx. Ax ikx in nok qqʼoʼn qwitz tiʼj jlu kyxol erman toj ambʼil jaʼlo.

16. ¿Tiʼ bʼaʼn tuʼn tkubʼ qximen tuʼn tbʼant quʼn? (Hebreos 6:10).

¹⁶ Bʼaʼn tuʼn tok tilil quʼn tuʼn miʼn tok qmojbʼaʼn qaqʼun tukʼil kyaqʼun txqantl. Sino qqʼonk tilil tuʼn tok qqʼoʼn qwitz tiʼj techel kyaj tqʼoʼn Jesús ex qkanoʼmil qe tbʼanel tmod. Ax ikx, qkanoʼmil tiʼj tbʼanel techel kyaj kyqʼoʼn tmajen Jehová toj ambʼil ojtxe ex toj ambʼil jaʼlo. Qʼonxa aju mas tbʼanel te Jehová, ex bʼaʼn tuʼn ttzaj tnaʼna qa «mlay tzikʼ tnaʼl tuʼn» aju in bʼant tuʼna toj tajbʼebʼila te (kjawil uʼjit Hebreos 6:10). Kukx tzʼajbʼena te Jehová tukʼil tzalajbʼil, ex qeʼk tkʼuʼja tiʼj qa in nok tqʼoʼn toklen tkyaqilju in bʼant tuʼna tuʼntzun ttzalaj.