Junjun galleta kye ntxʼyane
KUBʼ ttzʼibʼin Nick jlu, jun xjal in nanqʼin atz Oregón Estados Unidos: «Tej t-xi tzyet abʼqʼi 2014, in nexe bʼetel toj tnam kyukʼil kabʼe ntxʼyane. Kukx ok nkeʼyine qe testigo de Jehová in che pakbʼan kyukʼil yekʼbʼil uʼj. Bʼinchaʼn kyten ex in che qʼolbʼen kye xjal in che ikʼ kytxlaj».
«Nya oʼkx kubʼ kyyekʼin tbʼanel kymod kyiʼj xjal, sino ax ikx kyiʼj tal ntxʼyane. Jun maj, in pakbʼantoq jun xuʼj Elaine tbʼi ex tzaj tqʼoʼn kygalleta ntxʼyane. Yajxitl, tej kyex wiʼne bʼetel juntl maj, kyajtoq tuʼn kyxiʼ toj esquina jatumel ateʼqe erman tuʼntzun ttzaj qʼoʼn kygalleta».
«Ikʼ junjun xjaw. In che tzalajtoq txʼyan tiʼj kygalleta, atzun weye, in tzalaje tej nyoline kyukʼil testigo de Jehová. Pero kubʼ nximane tuʼn miʼn nyoline nim ambʼil kyukʼil. Qʼiʼntoq mas te 70 abʼqʼi wuʼne ex naʼmxtoq tok wojtzqiʼne aju nimen kyuʼn testigo de Jehová. Tuʼnju otoq tzaj bʼaj nkʼuʼje kyuʼn iglesia protestante, kubʼ nximane qa mas bʼaʼn tuʼn tjaw wuʼjine Tyol Dios njunalxe».
«Tojx ambʼil aju, ok nkeʼyine junjuntl testigo de Jehová in che pakbʼan toj junjuntl lugar toj tnam. Ax ikx kye kubʼ kyyekʼin tbʼanel kymod wukʼile. Kukx tzaj kyqʼoʼn tzaqʼwebʼil kyiʼj nxjele tukʼil Tyol Dios, tuʼntzunju, ok qeʼ nkʼuʼje kyiʼj».
«Jun qʼij, tzaj tqanin Elaine jlu weye: ‹¿In kubʼpe t-ximana qa jun oyaj qe txkup tuʼn Dios?›. Xi nqʼamaʼne te qa ikju. Yajxitl, jaw tuʼjin Isaías 11:6 a 9 weye. Chʼexpaj qe tiʼchaq toj ambʼil lu, maske ikju, mintiʼ xi wiʼne jun kyuʼj testigo de Jehová».
«Tej tikʼ junjuntl qʼij, in yoline kyiʼj junjun xnaqʼtzbʼil nim kyoklen tukʼil Elaine ex Brent, aju tchmil. Tzaj kyqʼamaʼn weye tuʼn tjaw wuʼjine uʼj te Mateo tuʼn tpon toj Hechos tuʼntzun tel nnikʼe tiʼj tiʼ t-xilen tuʼn qok lepeʼ tiʼj techel kyaj tqʼoʼn Jesús. Ex atzunju bʼant wuʼne. Tej tikʼ chʼin ambʼil, xi tzyet tuʼn nxnaqʼtzane tiʼj Tyol Dios tukʼil Brent ex Elaine. Bʼaj jlu toj abʼqʼi 2016».
«Wajtoqe tuʼn nxnaqʼtzane tiʼj Tyol Dios tkyaqil seman ex tuʼn ntene kyoj chmabʼil. Kubʼ nnaʼne nim tzalajbʼil ex xi nqʼoʼne chjonte tuʼnju el nnikʼe tiʼjju in tzaj t-xnaqʼtzaʼn Tyol Dios. Tej tikʼ mas te jun abʼqʼi, in bautisarine. Atzun jaʼlo qʼiʼn 79 abʼqʼi wuʼne ex qʼuqli nkʼuʼje tiʼj qa o kanet axix tok okslabʼil wuʼne. O chin tzaj kʼiwlaʼne tuʼn Jehová tuʼnju o tzaj tqʼoʼn ambʼil weye tuʼn ntene kyxol qe tmajen ateʼ twitz tkyaqil Txʼotxʼ».
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
