1. ¿Tiʼ mas jaku bʼant quʼn aj qajbʼen te Jehová?

 KʼUJLAʼN Jehová quʼn ex qaj tuʼn t-xi qqʼoʼn aju mas tbʼanel te. Tuʼn tbʼant jlu quʼn, nim toklen tuʼn qximen tiʼj tiʼ mas jaku bʼant quʼn aj qajbʼen te. Jun techel, jaku tzʼok tilil quʼn tuʼn kyten tbʼanel qmod, tuʼn kybʼant junjuntl aqʼuntl quʼn moqa tuʼn qjyon tumel tuʼn qonin kyiʼj erman. b

2. ¿Tiquʼn bʼaʼn tuʼn qximen tiʼj tuʼn qaqʼunan mas toj ttnam Jehová ex tuʼn tok tilil quʼn tuʼn tjapun twi qximbʼetz?

² ¿Tiquʼn bʼaʼn tuʼn qximen tiʼj tuʼn qaqʼunan mas toj ttnam Jehová ex tuʼn tok tilil quʼn tuʼn tjapun twi qximbʼetz? Tnejel, tuʼnju qaj tuʼn ttzalaj Jehová quʼn. In tzalaj Jehová aj tajbʼen qojtzqibʼil quʼn tuʼn qajbʼen mas te. Ax ikx, qaj tuʼn tok tilil quʼn tuʼn qok te tbʼanel okslal tuʼntzun qonin kyiʼj erman (1 Tes. 4:9, 10). Maske ma tzikʼ nim ambʼil in qo ajbʼen te Jehová, qkyaqilx il tiʼj tuʼn tok tilil quʼn tuʼn qchʼiy toj qokslabʼil. Qo xnaqʼtzan tiʼj tzeʼn jaku bʼant quʼn.

3. ¿Alkyeqe consej xi tqʼoʼn Pablo te Timoteo? (1 Timoteo 4:12-16).

³ Tzmatoq kuʼxun Timoteo tej t-xi ttzʼibʼin Pablo tnejel tcarta te, pero ya attoq tojtzqibʼil tuʼnju otoq tzʼok te ansyan. Maske ikju, xi tqʼamaʼn Pablo te tuʼn kukx tok tilil tuʼn tuʼn tok te jun tbʼanel tmajen Jehová (kjawil uʼjit 1 Timoteo 4:12-16). Qa ma tzʼok qqʼoʼn qwiʼ kyiʼj tyol Pablo, kʼelel qnikʼ tiʼj qa tajtoq tuʼn taqʼunan Timoteo tiʼj kabʼe tiʼ. Tnejel, tajtoq tuʼn kyten tbʼanel tmod ik tzeʼn kʼujlabʼil, qʼuqbʼil tkʼuʼj ex tuʼn miʼn tten tpaltil. Tkabʼin, tajtoq tuʼn tok tilil tuʼn tuʼn tuʼjin toj tumel kywitz txqantl, tuʼn t-xi tqʼoʼn tbʼanel consej kye ex tuʼn tbʼant-xix tqʼon xnaqʼtzbʼil. Toj xnaqʼtzbʼil  lu, qo yolil tiʼj techel kyaj tqʼoʼn Timoteo qwitz ex kʼelel qnikʼ tiʼj qa jaku qo chʼiy toj qokslabʼil aj tkubʼ qximen tuʼn qajbʼen mas te Jehová. Ax ikx, qo xnaqʼtzal tiʼj tiʼ mas jaku bʼant quʼn toj qajbʼebʼil te Jehová.

4. Ik tzeʼn in tzaj tqʼamaʼn Filipenses 2:19 a 22, ¿tiquʼn ajbʼen Timoteo tuʼn Jehová?

⁴ ¿Tiquʼn ajbʼen Timoteo tuʼn Jehová? Tuʼnju e ten tbʼanel tmod (kjawil uʼjit Filipenses 2:19-22). Aju tqʼama Pablo tiʼj Timoteo, in tzaj tyekʼin qe qa kubʼ tin tibʼ, qa ten tzʼaqli twitz Jehová, qa aqʼunal xjal ex qa jakutoq tzʼok qeʼ kykʼuʼj txqantl tiʼj. Kubʼ tyekʼin tkʼujlabʼil kyiʼj erman ex ax tok ximen kyiʼj. Tuʼntzunju, ok tkʼujlaʼn Pablo te Timoteo ex ok qeʼ tkʼuʼj tiʼj tej t-xi tqʼoʼn junjun aqʼuntl kwest te (1 Cor. 4:17). Qa ma tzʼok tilil quʼn tuʼn kyten tbʼanel qmod, qo okel kʼujlaʼn tuʼn Jehová ex qo ajbʼel tuʼn toj kʼloj okslal (Sal. 25:9; 138:6).

5. a) ¿Tzeʼn jaku tzʼel qnikʼ tiʼj qa kukx qo aqʼunal tuʼn kyten tbʼanel qmod? b) ¿Tiʼ in bʼant tuʼn ermana in tzaj yekʼin toj foto tuʼn tkubʼ tyekʼin qa in ximen kyiʼj txqantl?

⁵ Qo ximen tiʼj tiʼxix jaku bʼant quʼn. Jaku txi qqanin onbʼil te Jehová tuʼn tel qnikʼ tiʼj tiʼ mas jaku bʼant quʼn tuʼntzun kyten tbʼanel qmod. Jaku jaw qjyoʼn jun mod ex jaku tzʼok tilil quʼn tuʼn qaqʼunan tiʼj. ¿Ilpe tiʼj tuʼn tkubʼ qyekʼin qa in nel qnikʼ kyiʼj txqantl ex tuʼn qonin kyiʼj? ¿Ilpe tiʼj tuʼn tok tilil quʼn tuʼn tten mujbʼabʼil qxol ex tuʼn tkubʼ qnajsaʼn kyil txqantl? Qa mintiʼ ojtzqiʼn tzaqʼwebʼil quʼn, jaku txi qqanin te jun qamiw tuʼn ttzaj tqʼamaʼn qe tzeʼn qmod (Prov. 27:6).

6. ¿Tiʼ jaku bʼant quʼn tuʼn tten jun tbʼanel qmod?

⁶ Qqʼonk tilil tuʼn tjapun twi qximbʼetz. ¿Tzeʼn jaku bʼant quʼn? Jaku qo jyon tqanil tiʼj mod qaj tuʼn qaqʼunan tiʼj. Qo ximen tiʼj qa qaj tuʼn tok tilil quʼn tuʼn tkubʼ qnajsaʼn kyil txqantl. Tbʼanel qa ma jaw quʼjin ex qa ma qo ximen kyiʼj xnaqʼtzbʼil in yolin kyiʼj xjal kubʼ kynajsaʼn kyil txqantl ex kyiʼj qeju mintiʼ bʼant jlu kyuʼn. Kyaj tqʼoʼn Jesús jun tbʼanel techel qwitz tuʼnju kubʼ tnajsaʼn kyil txqantl (Luc. 7:47, 48). Mintiʼ ok tqʼoʼn twitz tiʼj kypaltil txqantl, sino ok tqʼoʼn twiʼ tiʼjju jakutoq bʼant kyuʼn. Atzun kye fariseo, kubʼ kyximen qa mintiʼ kyoklen txqantl (Luc. 18:9). Aj tbʼant jlu quʼn, bʼaʼn tuʼn tkubʼ qxjelin jlu: «¿Tiʼ nximbʼetze  at kyiʼj txqantl? ¿Alkyeqe kymod in nok nqʼoʼne nwitze tiʼj?». Qa kwest tuʼn tkubʼ qnajsaʼn til jun erman, jaku kubʼ qtzʼibʼin jun lista kyiʼj tbʼanel tmod ex jaku kubʼ qxjelin jlu: «¿Tiʼ t-ximbʼetz Jesús at tiʼj? ¿Jakupe kubʼ tnajsaʼn til?». Qa ma bʼant jlu quʼn, jaku chʼexpaj qximbʼetz. Tnejel, bʼalo kwest jaku tzʼela toj qwitz tuʼn tkubʼ qnajsaʼn til jun xjal otoq tzʼok tbʼinchaʼn nya bʼaʼn qiʼj, pero qa ma tzʼok tilil quʼn, jaku chʼexpaj qmod.

7. ¿Alkye tten in che ajbʼen erman tuʼn Jehová? (Proverbios 22:29).

⁷ Ax ikx, bʼaʼn tuʼn qximen tiʼj tuʼn tbʼant juntl aqʼuntl quʼn. Qo ximen kyiʼj kykyaqil erman in che onin tuʼn kyjaw bʼinchet ninja qʼil twitz aqʼuntl, qe Ja te Nimaq Chmabʼil ex qe Ja te Chmabʼil. Bʼant kyaqʼunan erman lu tuʼnju e aqʼunan kyukʼil junjuntl erman at mas kyojtzqibʼil. Ik tzeʼn in nok qkeʼyin kyoj foto, in che xnaqʼtzan ermano ex ermana tzeʼn tuʼn kybʼaj bʼinchet chʼintl Ja te Nimaq Chmabʼil ex qe Ja te Chmabʼil. In che ajbʼen erman lu tuʼn Jehová aju «Rey tuj tkyaqil tabʼqʼiyil» ex tuʼn Jesús, aju in Kawin kyibʼaj txqantl rey tuʼntzun tbʼant aqʼuntl (1 Tim. 1:17; 6:15, TNM; kjawil uʼjit Proverbios 22:29). Qaj tuʼn tok tilil quʼn tuʼn qaqʼunan ex tuʼn tajbʼen qojtzqibʼil quʼn tuʼntzun tjaw qnimsaʼn Jehová ex nya aqoʼ tuʼn qjaw nimsaʼn (Juan 8:54).

8. ¿Tiʼ jaku tzʼonin qiʼj tuʼn tel qnikʼ tiʼj jatumel il tiʼj tuʼn qaqʼunan?

⁸ Qo ximen tiʼj tiʼxix jaku bʼant quʼn. ¿Alkye jun aqʼuntl jaku tzʼok qqʼoʼn qwiʼ tiʼj? Jaku qo yolin kyukʼil ansyan moqa tukʼil ansyan in bʼet kyojele Ja te Chmabʼil tuʼntzun ttzaj kyqʼamaʼn qe tiʼ jaku qo aqʼunan tiʼj. Jun techel, qa ma tzaj kyqʼamaʼn qe tuʼn tok tilil quʼn tuʼn tbʼant-xix qqʼon chikʼbʼabʼil moqa xnaqʼtzbʼil, jaku txi qqanin kye jatumel il tiʼj tuʼn qaqʼunan. Yajxitl, qbʼincham aju in tzaj kyqʼamaʼn. ¿Tzeʼn jaku bʼant quʼn?

9. ¿Tiʼ jaku bʼant quʼn qa qaj tuʼn t-xi qbʼinchaʼn jun tbʼanel aqʼuntl?

⁹ Qqʼonk tilil tuʼn tjapun twi qximbʼetz. Qo ximen tiʼj qa qaj tuʼn qok te tbʼanel aj xnaqʼtzal. Tuʼn tbʼant jlu quʼn, jaku qo qxnaqʼtzan tiʼj uʼj Tzʼok tilil quʼn tuʼn tbʼant-xix quʼjin ex tuʼn qqʼon xnaqʼtzbʼil. Ex naʼmxtoq tpon ambʼil tuʼn tex qqʼoʼn jun qoklen kyoj chmabʼil in che ok txolekxi qʼij, jaku txi qqʼamaʼn te jun erman at tojtzqibʼil tuʼn qok tbʼiʼn ex tuʼn ttzaj tqʼamaʼn qe tiʼ atx taj tuʼn tbʼant quʼn. Qa ma tzʼok tilil quʼn tuʼn tbʼaj qbʼinchaʼn qten tiʼj qoklen, qo okel te tbʼanel aj xnaqʼtzal, kʼelel kynikʼ txqantl tiʼj qa aqʼunal xjal qoʼ ex qa jaku tzʼok qeʼ kykʼuʼj qiʼj (Prov. 21:5; 2 Cor. 8:22).

10. Qʼamantza jun techel tiʼjju jaku bʼant quʼn qa kwest in nela jun tiʼ toj qwitz.

¹⁰ ¿Tiʼ jaku bʼant quʼn qa mintiʼxix in bʼant jun aqʼuntl quʼn? ¡Miʼn qo sikt! Qo ximen tiʼjju bʼaj tiʼj jun ermano Garry tbʼi. Kwesttoq tuʼn tbʼant tuʼjin. Naʼnx tuʼn erman qa tzaj nim tchʼixwi tej in xi qʼoʼntoq toklen tuʼn tjaw tuʼjin jun xnaqʼtzbʼil kyoj chmabʼil, pero mintiʼ sikt. Ok tilil tuʼn tuʼn tbʼant-xix tuʼjin. Noq tuʼnju e onin erman tiʼj ex qe uʼj, toj ambʼil jaʼlo ya in nex tqʼoʼn qe chikʼbʼabʼil kyoj chmabʼil, kyoj nimaq chmabʼil te jun qʼij ex te oxe qʼij.

11. Ik tzeʼn bʼant tuʼn Timoteo, ¿tiʼ jaku tzʼonin qiʼj tuʼn kytzaj qʼoʼn mas oklenj qe?

¹¹ ¿Okpe Timoteo te jun tbʼanel qʼol chikʼbʼabʼil ex te tbʼanel aj xnaqʼtzal? Mintiʼ in tzaj tqʼamaʼn Tyol Dios jlu, pero ojtzqiʼn quʼn qa xi tbʼiʼn qe consej xi tqʼoʼn Pablo te.  Tuʼntzunju, jaku txi qqʼamaʼn qa ok te tbʼanel aqʼunal ex xi tbʼinchaʼn qe oklenj xi qʼoʼn te (2 Tim. 3:10). Qa ma tzʼok tilil quʼn tuʼn kybʼant tbʼanel aqʼuntl quʼn toj ttnam Jehová ik tzeʼn bʼant tuʼn Timoteo, jaku che tzaj qʼoʼn mas oklenj qe.

12. ¿Tzeʼn o che onin txqantl tiʼja?

¹² ¡In kubʼ qnaʼn nim tzalajbʼil aj kyonin txqantl qiʼj! Jun techel, qa atoʼ toj spital, in qeʼ qkʼuʼj aj in che pon ansyan ateʼ toj Kʼloj Yolil kyukʼil Qʼanil visitaril qe moqa aj kypon erman ateʼ kyxol qeju in che pon visitaril kye yabʼ toj spital. Ex in chewix qanmi aj tel tpaʼn jun ansyan ambʼil tuʼn qok tbʼiʼn ex tuʼn ttzaj tqʼuqbʼaʼn qkʼuʼj aj qok weʼ twitz jun nya bʼaʼn. Ex qa qaj onbʼil tuʼn t-xi qʼet xnaqʼtzbʼil te jun xjal, in xi qqʼoʼn chjonte te jun precursor at nim tojtzqibʼil aj t-xiʼ qukʼil ex aj tonin qiʼj tuʼn tbʼant-xix qqʼon xnaqʼtzbʼil. Tqʼama Jesús jlu: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hech. 20:35). In che tzalaj erman lu aj kyonin kyiʼj txqantl. Ax ikx qe, jaku qo tzalaj qa ma bʼant jlu quʼn. Qa in kubʼ qximen tuʼn qajbʼen mas te Jehová ik tzeʼn jlu moqa toj junjuntl tten, ¿tzeʼn jaku japun twi qximbʼetz?

13. Aj tkubʼ qximen tuʼn tbʼant jun tiʼ quʼn, ¿tiʼ bʼaʼn tuʼn ttzaj qnaʼn?

¹³ Bʼaʼn tuʼn tel qnikʼ tiʼj tiʼ aqʼuntl qaj tuʼn t-xi qbʼinchaʼn ex nya oʼkx tuʼn tkubʼ qximen jlu: «Waje tuʼn waqʼunane mas toj kʼloj okslal». Pero kwestlo jaku tzʼela toj qwitz tuʼn tel qnikʼ tiʼj tiʼ kxel qbʼinchaʼn tnejel ex atlo maj mlay tzʼel qnikʼ tiʼj qa otoq bʼant quʼn. Tuʼntzunju, mas tbʼanel qa ma qo ximen tiʼj jun tiʼ qaj tuʼn tbʼant quʼn. Bʼalo jaku kubʼ qtzʼibʼin tiʼ kbʼantel quʼn ex tzeʼn jaku japun twi qximbʼetz.

14. ¿Tiquʼn bʼaʼn tuʼn tten qximbʼetz toj tumel aj tkubʼ qximen tuʼn tbʼant jun tiʼ quʼn?

¹⁴ Tenx qximbʼetz toj tumel aj tkubʼ qximen tuʼn tbʼant jun tiʼ quʼn. ¿Tiquʼn? Tuʼnju mintiʼ ojtzqiʼn quʼn tiʼ jaku bʼaj qiʼj. Jun techel, otoq tzʼonin apóstol Pablo tuʼn tten kʼloj okslal te Tesalónica. Kubʼlo t-ximen tuʼn tkyaj ten toj jun ambʼil atz tuʼntzun tonin kyiʼj qeju tzmatoq in che okslan. Pero ok obligarin kyuʼn aj qʼoj  tuʼn tetz oq (Hech. 17:1-5, 10). Noqwit ax kyaj ten, jakutoq tzaj nya bʼaʼn kyiʼj erman. Pero mintiʼ tzaj bʼaj tkʼuʼj Pablo, sino el tnikʼ tiʼjju in bʼajtoq ex xi tsamaʼn Timoteo tuʼn t-xi tqʼuqbʼaʼn kykʼuʼj erman (1 Tes. 3:1-3). Kubʼlo kynaʼn okslal te Tesalónica nim tzalajbʼil tej tok kykeʼyin qa tajtoq Timoteo tuʼn tonin jatumel kyaj erman onbʼil.

15. Chikʼbʼantza tukʼil jun techel tiʼ jaku bʼaj tiʼjju in kubʼ qximen tuʼn tbʼant quʼn qa ma chʼexpaj jun tiʼ toj qanqʼibʼil.

¹⁵ Jaku tzʼel qiʼn jun xnaqʼtzbʼil tiʼjju bʼaj tiʼj apóstol Pablo toj tnam Tesalónica. Bʼalo in nok tilil quʼn tuʼn tjapun twi jun qximbʼetz toj qajbʼebʼil te Jehová, pero noq minabʼen in chʼexpaj jun tiʼ ex ya mintiʼ in bʼant quʼn (Ecl. 9:11, 12). ¿Tiʼ kbʼantel quʼn toj ambʼil lu? Jaku qo ximen tiʼj juntl tiʼ jaku bʼant quʼn. Atzun jlu bʼant tuʼn jun ermano Ted tbʼi tukʼil Hiedi, aju t-xuʼjil. Kyaj kytzaqpiʼn kyajbʼebʼil toj Betel tuʼnju e ok weʼ twitz jun yabʼil. Tuʼnju kʼujlaʼn Jehová kyuʼn, xi kyjyoʼn juntl tumel tzeʼn tuʼn kyajbʼen te. Tnejel, e ok te precursor regular, yajxitl, tzaj qʼoʼn kyoklen te precursor especial, ex tzaj qʼoʼn xnaqʼtzbʼil te Ted tuʼn tok te onil kye ansyan in che bʼet kyojele Ja te Chmabʼil. Pero chʼexpaj tqanil tiʼj kyabʼqʼi erman jaku che ajbʼen te ansyan in che bʼet kyojele Ja te Chmabʼil. El tnikʼ Ted ex Hiedi tiʼj qa ya mlay tzaj qʼoʼn oklenj jlu kye. Tnejel, tzaj chʼin kybʼis, pero el kynikʼ tiʼj qa jaku che ajbʼen te Jehová toj junxichaq tten. Tqʼama Ted jlu: «O tzʼok tilil quʼne tuʼn qximane tiʼj qa nya oʼkx toj jun tten jaku qo ajbʼene te Jehová».

16. ¿Tiʼ xnaqʼtzbʼil jaku tzʼel qiʼn tiʼjju in tzaj tqʼamaʼn Gálatas 6:4?

¹⁶ Mintiʼ ojtzqiʼn quʼn tiʼ jaku bʼaj toj qanqʼibʼil. Tuʼntzunju, bʼaʼn tuʼn ttzaj qnaʼn qa nya tuʼnju o tzaj qʼoʼn jun qoklen in qo ok kʼujlaʼn tuʼn Jehová. Ax ikx, nya bʼaʼn tuʼn tok qqʼoʼn qwitz tiʼj qa oʼkx junjun o tzaj qʼoʼn jun oklenj kye, atzun qe mintiʼ. In tzaj tqʼamaʼn Hiedi jlu: «Qa ma tzʼok qmojbʼaʼn aju in bʼaj qiʼj kyukʼil txqantl, mlay qo tzalaj» (kjawil uʼjit Gálatas 6:4). Tuʼntzunju, mas tbʼanel qa ma qo jyon tumel tuʼn qajbʼen mas te Jehová ex tuʼn qonin kyiʼj txqantl. c

17. ¿Tiʼ jaku bʼant quʼn tuʼn ttzaj qʼoʼn mas oklenj qe?

¹⁷ Qa ma qo anqʼin kyukʼil nya nim tiʼchaq ex qa mintiʼ ma tzʼokx qqʼon qibʼ tjaqʼ kʼas, jaku ten ambʼil qiʼj qa ma tzaj qʼoʼn junjuntl oklenj qe. Jaku kubʼ qximen tuʼn tjapun twi jun qximbʼetz toj nya nim ambʼil ex jaku tzʼonin jlu qiʼj tuʼn tjapun twi  juntl qximbʼetz aj tbʼet ambʼil. Jun techel, qa in qo ximen tiʼj tuʼn qok te precursor regular, ¿jakupe qo ajbʼen te precursor auxiliar toj ambʼil jaʼlo? Ex qa taj jun ermano tuʼn tok te onil kye ansyan, tbʼanel qa ma pakbʼan mas ambʼil, qa ma txiʼ visitaril kye erman o che tijen moqa yabʼ ateʼ. Tkyaqilju jaku tzʼel qnikʼ tiʼj toj ambʼil jaʼlo, jaku che onin qiʼj tuʼn ttzaj qʼoʼn junjuntl oklenj qe aj tbʼet ambʼil. Noq tiʼxku in qo ok weʼ twitz, bʼaʼn tuʼn tkubʼ qximen tuʼn t-xi qqʼoʼn aju mas tbʼanel te Jehová (Rom. 12:11).

18. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn ermana Beverley? (Ax ikx qʼonka twitza tiʼj tilbʼilal).

¹⁸ Mintiʼ tuʼn tkubʼ qximen qa ya mlay bʼant juntl tiʼ quʼn noq tuʼnju o qo tijen. Qo ximen tiʼjju bʼaj tiʼj jun ermana ya qʼiʼn 75 abʼqʼi tuʼn, aju Beverley tbʼi. Kwest tuʼn tbʼet tuʼnju at jun yabʼil tiʼj. Pero tajtoq tuʼn tpakbʼan mas ambʼil tej t-xi sipet txokbʼil tiʼj Nabʼitz Tkyimlen Jesucristo. ¿Tiʼ bʼant tuʼn ermana? Ok tilil tuʼn tuʼn t-ximen tiʼjju jakutoq bʼant tuʼn ex tej tjapun twi t-ximbʼetz, kubʼ tnaʼn nim tzalajbʼil. Aju bʼant tuʼn, onin kyiʼj txqantl tuʼn kypakbʼan mas ambʼil. Tuʼn jlu, in nel qnikʼ tiʼj qa in nok tqʼoʼn Jehová toklen tkyaqilju in bʼant kyuʼn erman o che tijen maske in che ok weʼ twitz jun nya bʼaʼn (Sal. 71:17, 18).

19. ¿Tiʼ jaku bʼant quʼn tuʼn qaqʼunan mas toj ttnam Jehová?

¹⁹ Qo ximen kyiʼj aqʼuntl jaku che bʼant quʼn toj ttnam Jehová. Tzʼok tilil quʼn tuʼn kyten tbʼanel qmod tuʼntzun ttzalaj Jehová qiʼj. Ax ikx, tzʼok tilil quʼn tuʼn kybʼant junjuntl aqʼuntl quʼn tuʼntzun qajbʼen tuʼn Jehová ex tuʼn ttnam. Ex qo jyon tumel tzeʼn jaku qo onin kyiʼj erman. d Qa ma bʼant jlu quʼn, tzul tkʼiwlaʼn Jehová qoʼ ex kʼokel kykeʼyin txqantl qa in qo chʼiy toj qokslabʼil ik tzeʼn te Timoteo (1 Tim. 4:15).