▪ Qa ma bʼaj jlu, kbʼel kyximen erman qa kubʼ tnajsaʼn xjal tnejel tmejebʼleʼn tej tkubʼ mojeʼ juntl maj ex qa legal tkabʼin tmejebʼleʼn. Tuʼn tel qnikʼ tiʼj tiquʼn in kubʼ qximen jlu, qo xnaqʼtzan tiʼjju tqʼama Jesús tiʼj divorcio ex tiʼjju tuʼn tkubʼ mojeʼ jun xjal juntl maj.

Tqʼama Jesús toj Mateo 19:9 tiquʼn jaku kubʼ tnajsaʼn jun xjal tmejebʼleʼn. Tqʼama jlu: «Qa at jun xjal ma kubʼ tpaʼn tibʼ tukʼil t-xuʼjil ex qa mintiʼ in tbʼinchaʼn xuʼj aj pajil, [...] in tbʼinchaʼn xinaq aj pajil». Kyuʼn qe tyol Jesús lu, in nel qnikʼ tiʼj kabʼe tiʼ. Tnejel, oʼkx jaku kubʼ tnajsaʼn jun xjal tmejebʼleʼn qa at jun kye ma yaẍin, ex tkabʼin, qa ma tzʼel tdivorciarin tibʼ jun xjal tiʼj tukʼil ex in kubʼ mojeʼ juntl maj maske mintiʼ in tzaj qʼoʼn ambʼil te tuʼn Tyol Dios, in bʼinchan il. a

¿Kyajpe tqʼamaʼn Jesús qa jaku kubʼ mojeʼ jun xinaq juntl maj qa ma yaẍin ex qa ma tzʼel tdivorciarin tibʼ tiʼj t-xuʼjil? Miʼn. Qa ma yaẍin jun xinaq moqa jun xuʼj, a tukʼil kbʼel ximente qa kbʼel tnajsaʼn til moqa miʼn. Qa ma kubʼ t-ximen xjal tuʼn miʼn tkubʼ tnajsaʼn til tchmil moqa t-xuʼjil ex qa ma tzʼel kydivorciarin kyibʼ, kykabʼil jaku che kubʼ mojeʼ juntl maj aj tkubʼaj trámite tiʼj divorcio.

Ax ikx, jakulo kubʼ t-ximen xuʼjilbʼaj tuʼn tkubʼ tnajsaʼn til tchmil ex tuʼn miʼn tel tdivorciarin tibʼ. Pero ¿tiʼ jaku bʼaj qa nya taj chmilbʼaj tuʼn tkubʼ najsaʼn til tuʼn t-xuʼjil ex in nok tilil tuʼn tuʼn tel tdivorciarin tibʼ? Tuʼnju taj t-xuʼjil tuʼn tkubʼ tnajsaʼn til tuʼn kukx tten kymejebʼleʼn, mintiʼ in tzaj tqʼoʼn Tyol Dios ambʼil te tuʼn tkubʼ mojeʼ juntl maj. Qatzun ma tzʼok tilil tuʼn tuʼn tkubʼ mojeʼ maske mintiʼ in tzaj tqʼoʼn Tyol Dios ambʼil te, in yaẍin juntl maj. Qa ma bʼaj jlu, kʼokel kychmon kyibʼ ansyan tuʼn kyyolen tukʼil ex tuʼn t-xi kykawin te (1 Cor. 5:1, 2; 6:9, 10).

Qa ma kubʼ mojeʼ jun xjal juntl maj maske mintiʼ in tzaj tqʼoʼn Tyol Dios ambʼil te, ¿tiʼ kyximbʼetz okslal ktel tiʼj ojtxe tmejebʼleʼn ex tiʼj akʼaj? ¿Kukxpe at toklen ojtxe tmejebʼleʼn? ¿Jakupe kubʼ t-ximen xuʼjilbʼaj tuʼn tkubʼ tnajsaʼn til tchmil moqa miʼn? ¿Jakupe kubʼ kyximen okslal qa in yaẍin xjal toj akʼaj tmejebʼleʼn?

Tnejel, in kubʼtoq kyximen okslal qa in yaẍin xjal otoq kubʼ mojeʼ juntl maj qa itzʼx tnejel t-xuʼjil, qa mintiʼ ma kubʼ mojeʼ ex qa mintiʼ ma yaẍin. Noqtzun tuʼnj, tej tyolin Jesús tiʼj divorcio ex tiʼjju tuʼn tkubʼ mojeʼ jun xjal juntl maj, mintiʼ yolin tiʼj xjal in nok bʼinchaʼn nya bʼaʼn tiʼj. Oʼkx tqʼama qa in yaẍin jun xjal qa ma tzʼok tilil tuʼn tuʼn tel tdivorciarin tibʼ tiʼj t-xuʼjil ex qa ma kubʼ mojeʼ tukʼil juntl xuʼj maske mintiʼ in tzaj qʼoʼn ambʼil te tuʼn Tyol Dios. Qa ma bʼaj jlu, aj tel tdivorciarin tibʼ chmilbʼaj tiʼj t-xuʼjil ex aj tkubʼ mojeʼ tukʼil juntl xuʼj, tuʼn jlu in naj tnejel tmejebʼleʼn ex in yaẍin ik tzeʼn tqʼama Jesús.

 Aj tok tilil tuʼn jun chmilbʼaj tuʼn tel tdivorciarin tibʼ ex aj tkubʼ mojeʼ tukʼil juntl xuʼj, ya mlay kubʼ t-ximen tnejel t-xuʼjil qa kbʼel tnajsaʼn til moqa miʼn. Ex mlay kubʼ kyximen erman qa in yaẍin akʼaj mejebʼleʼn moqa mintiʼ til noq tuʼnju itzʼx tnejel t-xuʼjil xjal, qa naʼmx tkubʼ mojeʼ juntl maj moqa ax ikx te in yaẍin. b

Toj techel ma qo yolin tiʼj, yaẍin chmilbʼaj ex tuʼn jlu el tdivorciarin tibʼ tiʼj t-xuʼjil. ¿Yajtzun qa ma tzʼel tdivorciarin tibʼ chmilbʼaj tiʼj t-xuʼjil ex in kubʼ mojeʼ juntl maj maske mintiʼ otoq yaẍin? ¿Ex tiʼ jaku bʼaj qa tnejel in nel tdivorciarin tibʼ jun xjal ex tibʼajxi jlu in yaẍin ex in kubʼ mojeʼ juntl maj maske jakutoq kubʼ najsaʼn til tuʼn t-xuʼjil? Toj ambʼil lu, in naj tnejel tmejebʼleʼn tuʼn divorcio ex tuʼn akʼaj tmejebʼleʼn. Jaku txi qqʼamaʼn qa legal tkabʼin mejebʼleʼn. Toj Atalaya te 15 te febrero te 1980, t-xaq 30 tzaj chikʼbʼaʼn qa aj tkubʼ mojeʼ jun xjal juntl maj, «mlay kubʼ t-ximen tuʼn tkubʼ tnajsaʼn naj akʼaj tmejebʼleʼn ex tuʼn tmeltzʼaj tukʼil tnejel t-xuʼjil. ¿Tiquʼn? Tuʼnju otoq naj tnejel tmejebʼleʼn tuʼn divorcio, tuʼn yaẍbʼil ex tuʼnju otoq kubʼ mojeʼ juntl maj».

Ma chʼexpaj alkye tten in xi qchikʼbʼaʼn xnaqʼtzbʼil lu, pero nya tuʼn jlu kʼelel qiʼn toklen mejebʼleʼn moqa tuʼn tkubʼ qximen qa nya jun matij il aju aj pajil. Qa ma tzʼel tdivorciarin tibʼ jun xjal tiʼj t-xuʼjil ex mintiʼ in tzaj tqʼoʼn Tyol Dios ambʼil te, ex qa ma kubʼ mojeʼ tukʼil juntl xuʼj, kʼokel kychmon kyibʼ ansyan tuʼn t-xi kybʼinchaʼn tiʼj il tuʼnju otoq yaẍin. (Qatzun okslal juntl t-xuʼjil otoq kanet, ax ikx kʼokel tchmon tibʼ juntl kʼloj ansyan tuʼnju ax ikx te otoq yaẍin). Maske mlay txi qqʼamaʼn qa in yaẍin akʼaj mejebʼleʼn, mlay txi qʼoʼn toklen xjal toj kʼloj okslal toj nim abʼqʼi tuʼnju mlay che japun requisito tuʼn. Il tiʼj tuʼn t-xi qʼet ambʼil tuʼn tikʼ tnaʼl kyuʼn xjal aju nya bʼaʼn otoq bʼant tuʼn. Ax ikx, il tiʼj tuʼn tel nikʼbʼaj tiʼj tzeʼn taʼ tnejel t-xuʼjil ex qe tkʼwal naʼmxtoq kyok te mayor de edad tej kykyaj kolin tuʼn kyman (Mal. 2:14-16).

Aj qximen tiʼj nya bʼaʼn in tzaj aj tel tdivorciarin tibʼ jun xjal tiʼj t-xuʼjil ex tuʼn tkubʼ mojeʼ juntl maj ex mintiʼ in tzaj tqʼoʼn Tyol Dios ambʼil tuʼn tbʼant jlu tuʼn, bʼaʼn tuʼn tok qqʼoʼn mejebʼleʼn te xjan ik tzeʼn t-ximbʼetz Jehová at tiʼj (Ecl. 5:4, 5; Heb. 13:4).