1. ¿Tiquʼn in xi qqʼoʼn qyol kyoj chmabʼil?

 ¿TIQUʼN in qoʼx kyoj chmabʼil? In qoʼx kyoj chmabʼil tuʼnju qaj tuʼn tjaw qnimsaʼn Jehová ex atzun jlu mas nim toklen (Sal. 26:12; 111:1). Ax ikx in bʼaj qonin qibʼ kyoj chmabʼil tuʼnju in qo anqʼin kyoj ambʼil kwest (1 Tes. 5:11). Tuʼntzunju, aj t-xi qqʼoʼn jun qyol kyoj chmabʼil, in che bʼant kabʼe tiʼchaq lu quʼn.

2. ¿Toj alkye ambʼil jaku txi qqʼoʼn jun qcomentario kyoj chmabʼil?

² Kykyaqil seman jaku txi qqʼoʼn jun qyol kyoj chmabʼil. Jun techel, jaku txi qqʼoʼn jun qcomentario aj tok Xnaqʼtzbʼil tiʼj uʼj Aju Xqʼuqil. Ex kyoj chmabʼil in che ok txolekxi qʼij, jaku jaw qiʼn qqʼabʼ aj tex qʼet chmabʼil «Qe qʼinumabʼil ewin ateʼ», aj tok chmabʼil «Xnaqʼtzbʼil tiʼj Tyol Dios te congregación» ex kyoj junjuntl chmabʼil jatumel jaku txi qqʼoʼn jun qyol.

3. a) ¿Tiʼ nya bʼaʼn jaku qo ok weʼ twitz aj t-xi qqʼoʼn jun qyol? b) ¿Tzeʼn in nonin Hebreos 10:24 ex 25 qiʼj?

³ Qkyaqilx qaj tuʼn tjaw qnimsaʼn Jehová ex qaj tuʼn qonin kyiʼj erman aj t-xi qqʼoʼn qcomentario. Pero jaku qo ok weʼ twitz junjun nya bʼaʼn. ¿Alkyeqe? Tnejel, bʼalo jaku qo tzaj xobʼ tuʼn tjaw qiʼn qqʼabʼ tuʼn qcomentarin ex tkabʼin, in jaw qiʼn qqʼabʼ nim maj ex mintiʼ in tzaj qqʼoʼn jun qyol ik tzeʼn ximen quʼn. Toj carta xi ttzʼibʼin apóstol Pablo kye okslal hebreo, in kanet jun nabʼil quʼn ex jaku tzʼonin qiʼj. Aj t-xi qqʼamaʼn qa nim kyoklen chmabʼil, tqʼama apóstol Pablo tiʼ bʼaʼn tuʼn tok qqʼoʼn qwiʼ tiʼj. Tqʼama jlu: «Qo ximan tiʼj tuʼn qkyuwsante qibʼ qxolx» (kjawil uʼjit Hebreos 10:24, 25). Qa ma qo ximen tiʼj qa jaku qo onin kyiʼj txqantl aj t-xi qqʼoʼn jun  qcomentario kyukʼil nya nim yol, kʼonil jlu qiʼj tuʼn miʼn qtzaj xobʼ aj tjaw qiʼn qqʼabʼ. Qatzun mintiʼ saj qʼoʼn ambʼil qe tuʼn t-xi qqʼoʼn jun qcomentario ik tzeʼn in kubʼ qximen, jaku qo tzalaj kyiʼj txqantl tuʼnju in tzaj qʼoʼn ambʼil kye tuʼn t-xi kyqʼamaʼn jun kyyol (1 Ped. 3:8).

4. ¿Tiʼ oxe tiʼ kʼelel qnikʼ tiʼj toj xnaqʼtzbʼil lu?

⁴ Toj xnaqʼtzbʼil lu, tnejel qo yolil tiʼj tzeʼn jaku bʼaj qonin qibʼ toj jun congregación jatumel nya nim kybʼet erman at ex jatumel in tzaj qʼoʼn ambʼil qe tuʼn t-xi qqʼoʼn nim qyol. Yajxitl, kʼelel qnikʼ tiʼj tzeʼn jaku bʼant quʼn aj qten toj jun congregación jatumel at nim kybʼet erman ex kykyaqilx kyaj tuʼn t-xi kyqʼoʼn jun kyyol. Ex te mankbʼil, kʼelel qnikʼ tiʼj tzeʼn qe qyol kxel qqʼoʼn tuʼntzun kyonin kyiʼj erman.

5. ¿Tiʼ jaku bʼant quʼn tuʼn tbʼaj qonin qibʼ qa nya nim qbʼet at toj jun congregación?

⁵ Qa atz atoʼ toj jun grupo, nya nim kybʼet erman at tuʼn kycomentarin kyoj chmabʼil. Tuʼntzunju, at maj il tiʼj tuʼn tyon ermano in nex qʼonte chmabʼil alkye jun jaku jaw qʼinte tqʼabʼ tuʼntzun t-xi tqʼoʼn jun tyol. Ex tuʼn jlu, at maj yaj jaku kubʼaj chmabʼil. Qa ma bʼaj jlu, mlay tzʼonin kyiʼj erman. ¿Tiʼ jaku bʼant quʼn kyoj ambʼil lu? Bʼaʼn tuʼn qximen tiʼj tuʼn t-xi qqʼoʼn nim qcomentario. Iktzun tten qo onil kyiʼj txqantl tuʼn t-xi kyqʼoʼn jun kyyol.

6, 7. ¿Tiʼ jaku bʼant quʼn tuʼn miʼn qtzaj xobʼ aj t-xi qqʼoʼn jun qcomentario?

⁶ Ateʼ nim erman in che tzaj xobʼ aj kyximen tiʼj qa il tiʼj tuʼn t-xi kyqʼoʼn jun kycomentario kyoj chmabʼil. Qa a jlu in bʼaj tiʼja, ¿tiʼ jaku bʼant tuʼna? Tbʼanel qa ma txi tjyoʼna junjun tqanil jaku che onin tiʼja tuʼntzun miʼn ttzaj xobʼa aj t-xi tqʼoʼna jun tyola.

⁷ Jun tiʼ jaku tzʼonin qiʼj, aju qa ma txi qjyoʼn junjun nabʼil o che etz kyoj uʼj Aju Xqʼuqil. b Jun kyxol qeju nabʼil o che etz qʼamaʼn, aju tuʼn tbʼaj qbʼinchaʼnxix qten (Prov. 21:5). Qa ma tzʼelxix qnikʼ tiʼj xnaqʼtzbʼil, mas fácil jaku jaw qiʼn qqʼabʼ tuʼn qcomentarin. Ax ikx o tzʼetz qʼamaʼn qa mas bʼaʼn tuʼn t-xi qqʼoʼn jun qcomentario tukʼil nya nim yol (Prov. 15:23; 17:27). Mlayxix qo tzaj xobʼ qa nya nim yol ma txi qqʼamaʼn. Nya oʼkxju, ax ikx mas nya kwest jaku tzʼel kynikʼ erman tiʼj jun comentario nya nim tqan twitzju qa ma txi qqʼamaʼn jun comentario kyukʼil nim yol. Qa ma txi qqʼamaʼn jun qcomentario toj qex qyol, kʼelel kynikʼ erman tiʼj qa otoq bʼaj qbʼinchaʼn qten ex qa otoq tzʼel qnikʼ tiʼj xnaqʼtzbʼil.

8. ¿Tiʼ in kubʼ tnaʼn Jehová aj tok tqʼoʼn twitz tiʼj qa in xi qbʼinchaʼn tkyaqil jaku bʼant quʼn?

⁸ ¿Yajtzun qa kukx in tzaj xobʼa maske otoq tzʼok tqʼoʼn twitza kyiʼj nabʼil ex tuʼn jlu oʼkx in xi tqʼoʼna jun moqa kabʼe tyola? Bʼaʼn tuʼn ttzaj tnaʼna qa in nok tqʼoʼn Jehová toklen tkyaqilju in bʼant tuʼna tuʼn t-xi tqʼoʼna jun tyola (Luc. 21:1-4). Pero mintiʼ in nayon Jehová tuʼn t-xi tbʼinchaʼna mas twitzju jaku bʼant tuʼna (Filip. 4:5). Tuʼntzunju, ximana tiʼj jniʼ jaku bʼant tuʼna ex tzʼok tilil tuʼna tuʼn t-xi tbʼinchaʼna. Ax ikx, qaninxa onbʼil te Jehová tuʼn miʼn ttzaj bʼaj tkʼuʼja. Tnejel, bʼaʼn tuʼn tok tilil tuʼna tuʼn t-xi tqʼoʼna jun tyola kyukʼil nya nim yol.

9. ¿Tiʼ jaku bʼaj qa atz in qo ajbʼen toj jun congregación jatumel ateʼ nim erman?

⁹ Bʼalo junxitl tiʼ in nok weʼya twitz qa atz taʼya toj jun congregación jatumel at nim  kybʼaj erman. Bʼalo at maj mintiʼ in bʼant tuʼn t-xi tqʼoʼna jun tyola tuʼnju ateʼ nim erman in che comentarin. Qo ximen tiʼj ermana Danielle, tgan tuʼn t-xi tqʼoʼn nim tyol kyoj chmabʼil. c Nim toklen toj twitz ermana tuʼn tcomentarin tuʼnju in kubʼ t-ximen qa atzun tten in kʼulin te Jehová, in nonin kyiʼj txqantl ex in nonin tiʼj tuʼn kykyaj mas xnaqʼtzbʼil tiʼj Tyol Dios toj twiʼ. Tejtzun tpon ajbʼel toj jun congregación jatumel at nim kybʼet erman, ya mintiʼ tzaj qʼoʼn ambʼil te tuʼn t-xi tqʼoʼn nim tyol, axpe ikx, at maj mintiʼ tzaj qʼoʼn ambʼil te tuʼn t-xi tqʼoʼn jun tyol. Tqʼama ermana jlu: «Kubʼ nximane qa mintiʼtoq jun tiʼ in bʼant wuʼne. Kubʼ nnaʼne qa otoq tzʼel qʼiʼn jun woklene. Qa mintiʼ ma tzaj qʼoʼn ambʼil tuʼn t-xi qqʼoʼn jun qyol, in kubʼ qximen qa nya taj erman tuʼn ttzaj tqʼoʼn jun qcomentario».

10. ¿Tiʼ jaku bʼant tuʼna tuʼn t-xi tqʼoʼna jun comentario kyoj chmabʼil?

¹⁰ ¿Ope kubʼ tnaʼn teya jun maj ik tzeʼn te Danielle? Qa a jlu in bʼaj tiʼja, olo kubʼ t-ximana tuʼn miʼn tjaw tiʼna tqʼabʼa ex qa oʼkx tuʼn tbʼina tiʼj kycomentario txqantl. Pero miʼn tzaj bʼaj tkʼuʼja. ¿Tiʼ jaku bʼant tuʼna tuʼn ttzaj qʼoʼn mas ambʼil teya tuʼn t-xi tqʼoʼna jun comentario? Bʼinchama ttena tiʼj tkyaqil xnaqʼtzbʼil tuʼntzun t-xi tqʼoʼna jun tyola. Qa ma bʼant jlu tuʼna, jaku comentarina kyoj junjuntl párrafo qa mintiʼ saj qʼoʼn jun tyola tnejel maj. Aj t-xnaqʼtzana tiʼj uʼj Xqʼuqil, ximana tiʼj tiʼ toklen junjun párrafo tukʼil tbʼi xnaqʼtzbʼil. Iktzun tten jaku txi tqʼoʼna jun tyola toj alkyexku ambʼil. Juntl tiʼ jaku bʼant tuʼna, bʼaʼn tuʼn t-xnaqʼtzana kyiʼj párrafo in yolin kyiʼj junjun xnaqʼtzbʼil mas kwest tuʼn tel qnikʼ kyiʼj (1 Cor. 2:10). Tuʼnju kwest tuʼn tel qnikʼ kyiʼj xnaqʼtzbʼil lu, mintiʼxix in jaw kyiʼn erman kyqʼabʼ tuʼn kycomentarin. ¿Yajtzun qa mintiʼ in tzaj qʼoʼn ambʼil teya tuʼn tcomentarina maske otoq tzʼok tilil tuʼna? ¿Tiʼ jaku bʼant tuʼna toj ambʼil lu? Bʼaʼn tuʼn tyolina tukʼil ermano in nex qʼonte xnaqʼtzbʼil naʼmxtoq tok chmabʼil ex qʼamanxa te alkye párrafo taja tuʼn tcomentarina toj.

11. Ik tzeʼn in tzaj tqʼamaʼn Filipenses 2:4, ¿tiʼ jaku bʼant quʼn?

¹¹ (Kjawil uʼjit Filipenses 2:4). Onin Jehová tiʼj apóstol Pablo tuʼn t-xi tqʼamaʼn  kye okslal tuʼn kyximen tnejel kyiʼj txqantl. ¿Tzeʼn jaku tzʼajbʼen consej lu quʼn kyoj chmabʼil? Bʼaʼn tuʼn ttzaj qnaʼn qa ax ikx kye erman kyaj tuʼn t-xi kyqʼoʼn jun kycomentario.

12. ¿Tiʼ mas jaku bʼant quʼn tuʼn kytzalaj txqantl kyoj chmabʼil? (Ax ikx qʼonka twitza tiʼj foto).

¹² Qo ximen tiʼj jun techel tuʼntzun tel qnikʼ tiʼj tiquʼn bʼaʼn tuʼn qtzalaj kyiʼj txqantl aj kycomentarin. Aj qyolin tukʼil jun qamiw, nya oʼkx qe in qo yolin toj tkyaqil ambʼil, sino ax ikx in xi qqʼoʼn ambʼil te qamiw tuʼn tyolin. Ax jlu in bʼaj kyoj chmabʼil, qaj tuʼn kycomentarin nim erman. Qa ma txi qʼet ambʼil kye txqantl tuʼn kyyolin tiʼj qʼuqbʼil kykʼuʼj, atzun juntl tumel jaku bʼaj qonin qibʼ qxolx (1 Cor. 10:24). Qo xnaqʼtzan tiʼj tiʼ jaku bʼant quʼn tuʼn t-xi qqʼoʼn ambʼil kye txqantl tuʼn t-xi kyqʼoʼn jun kycomentario.

13. ¿Tiʼ jaku bʼant quʼn tuʼn t-xi qqʼoʼn ambʼil kye mas erman tuʼn t-xi kyqʼoʼn jun kycomentario?

¹³ Tnejel, bʼaʼn tuʼn t-xi qqʼoʼn jun comentario chʼin tqan. Qa ma bʼant jlu quʼn, kxel qqʼoʼn ambʼil kye txqantl tuʼn t-xi kyqʼoʼn jun kyyol. In nok tilil kyuʼn ansyan ex qe erman qʼiʼn nim ambʼil kyuʼn toj kyajbʼebʼil te Jehová tuʼn tbʼant jlu kyuʼn. Tkabʼin, aj t-xi qqʼoʼn jun comentario, mintiʼ tuʼn qyolin tiʼj tkyaqil xnaqʼtzbʼil at toj jun párrafo. ¿Tiquʼn? Tuʼnju qa ma qo yolin tiʼj tkyaqil xnaqʼtzbʼil, mlay txi qqʼoʼn ambʼil kye txqantl tuʼn kycomentarin. Jun techel, toj párrafo lu at kabʼe xnaqʼtzbʼil. Jun, tuʼn t-xi qqʼoʼn jun comentario chʼin tqan. Tkabʼin, mintiʼ tuʼn qyolin tiʼj nim xnaqʼtzbʼil. Qa ma tzaj qʼoʼn ambʼil qe tuʼn t-xi qqʼoʼn jun comentario toj párrafo lu, bʼaʼn tuʼn qyolin oʼkx tiʼj jun xnaqʼtzbʼil.

14. ¿Tiʼ bʼaʼn tuʼn ttzaj qnaʼn aj qximen tiʼj jteʼ maj kjawil qiʼn qqʼabʼ? (Ax ikx qʼonka twitza kyiʼj foto).

¹⁴ Qo ximen kyiʼj txqantl aj tkubʼ qximen jteʼ maj kjawil qiʼn qqʼabʼ tuʼn t-xi qqʼoʼn jun qcomentario. Qa ma jaw qiʼn qqʼabʼ tkyaqil ambʼil, jakulo kubʼ tnaʼn ermano in netz qʼonte xnaqʼtzbʼil qa il tiʼj tuʼn ttzaj tqʼoʼn qcomentario maske mintiʼ in xi tqʼoʼn ambʼil  kye txqantl. Ax ikx, jakulo kubʼ kynaʼn txqantl erman qa nya il tiʼj tuʼn t-xi kyqʼoʼn jun kycomentario (Ecl. 3:7).

15. a) ¿Tiʼ qmod kbʼel qyekʼin qa mintiʼ saj qʼoʼn jun qcomentario kyoj chmabʼil? b) ¿Tiʼ bʼaʼn tuʼn ttzaj tnaʼn ermano in nex qʼonte xnaqʼtzbʼil aj ttzaj tqanin xjel? (Qʼonka twitza tiʼj recuadro « ¿Tzeʼn jaku tzʼex qʼet jun xnaqʼtzbʼil kyukʼil xjel ex tzaqʼwebʼil?»).

¹⁵ Qa at nim erman kyaj tuʼn t-xi kyqʼoʼn jun kycomentario, mlaylo qo comentarin toj tkyaqil párrafo. Axpe ikx, atlo maj mlay tzaj qʼoʼn ambʼil qe tuʼn t-xi qqʼoʼn jun qyol. Bʼalo jaku tzaj qbʼis, pero mintiʼ tuʼn ttzaj qqʼoj (Ecl. 7:9).

16. ¿Tiʼ jaku bʼant quʼn tuʼn t-xi qqʼuqbʼaʼn kykʼuʼj qeju in xi kyqʼoʼn jun kycomentario?

¹⁶ Maske mintiʼ in xi qqʼoʼn nim qcomentario ik tzeʼn qaj, bʼaʼn tuʼn tok tilil quʼn tuʼn tok qqʼoʼn qwiʼ tiʼj kycomentario txqantl. Ex aj tbʼaj chmabʼil, jaku txi qqʼamaʼn kye qa in qo tzalaj kyiʼj. Jaku tzʼonin jlu kyiʼj erman ik tzeʼn aj t-xi qqʼoʼn jun qcomentario (Prov. 10:21). Aj t-xi qqʼamaʼn kye txqantl qa in qo tzalaj kyiʼj, ax ik kye in che tzalaj.

17. a) ¿Tiʼ jaku bʼant kyuʼn mambʼaj? b) Ik tzeʼn netz yekʼin toj video, ¿alkye kyaje tiʼ kbʼantel quʼn tuʼn tbʼaj qbʼinchaʼn jun qcomentario? (Ax ikx qʼonka twitza tiʼj nota).

¹⁷ ¿Tiʼ mas jaku bʼant quʼn tuʼn tbʼaj qonin qibʼ kyoj chmabʼil? Qa mambʼaj teya, jaku tzʼonina kyiʼj tkʼwala tuʼn tbʼaj kybʼinchaʼn kyten tiʼj jun comentario ex bʼaʼn tuʼn t-ximana tiʼj kyabʼqʼi (Mat. 21:16). Kyoj junjun chmabʼil, in che etz xnaqʼtzbʼil kyiʼj  nya bʼaʼn in che tzaj kyoj mejebʼleʼn moqa at toklen tukʼil yaẍbʼil. Maske ikju, ateʼ junjun párrafo jatumel jaku txi kyqʼoʼn kʼwal jun kycomentario. Ex jaku che onin mambʼaj kyiʼj kykʼwal tuʼn tel kynikʼ tiʼj qa nya tkyaqil maj ktzajel qʼoʼn ambʼil kye tuʼn kycomentarin. Qa ma txi kyqʼamaʼne jlu kye kykʼwale, mlay tzaj kybʼis aj tok kykeʼyin qa in xi qʼoʼn ambʼil kye junjuntl tuʼn t-xi kyqʼoʼn kycomentario (1 Tim. 6:18). d

18. ¿Tiʼ jaku bʼant quʼn tuʼn miʼn tok bʼaj kywiʼ erman qiʼj aj t-xi qqʼoʼn jun qcomentario? (Proverbios 27:2).

¹⁸ Qkyaqilx jaku bʼaj qbʼinchaʼn qten tiʼj jun tbʼanel comentario tuʼntzun tjaw qnimsaʼn Jehová ex tuʼn qonin kyiʼj txqantl erman (Prov. 25:11). At maj jaku qo yolin tiʼj jun experiencia o bʼaj qiʼj, pero mintiʼ tuʼn qyolin oʼkx qiʼjx (kjawil uʼjit Proverbios 27:2; 2 Cor. 10:18). Mas nim toklen tuʼn qyolin tiʼj Jehová, tiʼj Tyol ex tiʼj ttnam (Apoc. 4:11). Pero qa ma tzaj qanin qe toj jun párrafo tuʼn qyolin tiʼj jun experiencia o bʼaj qiʼj, tbʼanel tuʼn qyolin tiʼj. Toj juntl párrafo qo yolil tiʼj jun techel.

19. a) ¿Tiʼ kbʼajel qa ma qo ximen kyiʼj txqantl kyoj chmabʼil? (Romanos 1:11, 12). b) ¿Tiquʼn tgana tuʼn t-xi tqʼoʼna jun comentario kyoj chmabʼil?

¹⁹ Maske mintiʼ in tzaj tqʼamaʼn ttnam Jehová tzeʼnxix tuʼn t-xi qqʼoʼn jun qyol kyoj chmabʼil, bʼaʼn tuʼn tilil quʼn tuʼn t-xi qqʼoʼn jun tbʼanel comentario tuʼntzun qonin kyiʼj txqantl. Tuʼn tbʼant jlu, ateʼ junjun erman kxel kyqʼoʼn mas kycomentario, atzun junjuntl, nya nim kycomentario kxel qʼoʼn. Noqtzun tuʼnj, in che tzalaj kyiʼj txqantl aj t-xi kyqʼoʼn jun kyyol. Qa in qo ximen kyiʼj txqantl kyoj chmabʼil, qkyaqilx jaku qo tzalaj aj tbʼaj qonin qibʼ qxolx (kjawil uʼjit Romanos 1:11, 12).