1. ¿Tiʼ ojtzqiʼn kyuʼn tmajen Jehová?

 OJTZQIʼN kyuʼn tmajen Jehová qa kʼujlaʼn qe tuʼn ex qa taj tuʼn kytzalaj (Rom. 8:35-39). Ax ikx, ojtzqiʼn quʼn qa kʼonil qiʼj qa ma tzʼok tilil quʼn tuʼn t-xi qnimen qe tkawbʼil (Is. 48:17, 18). ¿Yajtzun qa ma qo ok weʼ twitz jun problem mintiʼ ximen quʼn?

2. ¿Alkyeqe nya bʼaʼn jaku qo ok weʼ twitz ex tiʼ jaku kubʼ qxjelin?

² Kykyaqilx tmajen Jehová in che ok weʼ twitz problem. Jun techel, jakulo tzaj qbʼis tuʼn jun toj qja aj tbʼant jun tiʼ tuʼn moqa aj ttzaj tqʼamaʼn jun tiʼ qe. Moqa at jun yabʼil qiʼj ex mlay bʼant tuʼn qajbʼen mas te Jehová. Ax ikx, jaku tzaj nya bʼaʼn qiʼj aj ttzaj xitbʼil tuʼnx twitz txʼotxʼ. Ex jakulo qo el ikʼun tuʼnju in qo ajbʼen te Jehová. Aj qok weʼ kywitz problem ik tzeʼn jlu, jakulo kubʼ qxjelin: «¿Tiquʼn in chin ok weʼye twitz nya bʼaʼn lu? ¿Atpe jun tiʼ nya bʼaʼn o bʼant wuʼne? ¿Ape t-xilen jlu qa mintiʼ in tzalaj Jehová wiʼje?». Qa o kubʼ t-ximana jlu jun maj, miʼn tzaj bʼaj tkʼuʼja. ¿Tiquʼn? Tuʼnju ax jlu o bʼaj kyiʼj nim tmajen Jehová (Sal. 22:1, 2; Hab. 1:2, 3).

3. ¿Tiʼ xnaqʼtzbʼil in tzaj tqʼoʼn Salmo 34:19 qe?

³ (Kjawil uʼjit Salmo 34:19). In yolin versículo lu tiʼj kabʼe tiʼ nim toklen. Tnejel, in tzaj nim yajbʼil kyiʼj xjal tzʼaqlixix. Ex tkabʼin, in kolin Jehová kyiʼj. Jun tiʼ in bʼant tuʼn Jehová tuʼn tkolin qiʼj, in nonin qiʼj tuʼn tten qximbʼetz  toj tumel kyiʼj tiʼchaq in che tzaj qiʼj. In tzaj ttziyen Jehová qa qo tzalajel qa ma qo ajbʼen te, pero nya a t-xilen jlu qa mlayx qo ok weʼ twitz jun problem (Is. 66:14). Taj Jehová tuʼn qximen tiʼj qanqʼibʼil tzul tqʼoʼn toj ambʼil tzul ex atzun jlu taj tuʼn tbʼant tuʼn (2 Cor. 4:16-18). Akux in pon ambʼil lu, in nonin qiʼj tkyaqil qʼij (Lam. 3:22-24).

4. ¿Tiʼ kʼelel qnikʼ tiʼj toj xnaqʼtzbʼil lu?

⁴ Toj xnaqʼtzbʼil lu, qo yolil kyiʼj junjun tmajen Jehová kukx e ajbʼen te toj ambʼil ojtxe ex kyiʼj junjun kukx in che ajbʼen te toj ambʼil jaʼlo. Kʼelel qnikʼ tiʼj qa jaku qo ok weʼ kywitz junjun problem mintiʼ ximen quʼn, pero qa kukx ma tzʼok qeʼ qkʼuʼj tiʼj Jehová, mlayx qo kyaj ttzaqpiʼn (Sal. 55:22). Aj qyolin kyiʼj junjun techel lu, bʼaʼn tuʼn tkubʼ qxjelin: «¿Tiʼwtlo bʼant wuʼne noqwit aʼyine ok weʼ twitz nya bʼaʼn lu? ¿Tzeʼn in nonin techel lu wiʼje tuʼn tok qeʼ mas nkʼuʼje tiʼj Jehová? ¿Tiʼ xnaqʼtzbʼil jaku tzʼel wiʼne tiʼj?».

5. ¿Tiʼ nya bʼaʼn ok tbʼinchaʼn Labán tiʼj Jacob? (Qʼonka twitza tiʼj dibujo tok tiʼj revista).

⁵ Ateʼ junjun tmajen Jehová te ambʼil ojtxe e ok weʼ twitz problem ex mintiʼ ximen kyuʼn. Qo ximen tiʼjju bʼaj tiʼj Jacob. Xi tqʼamaʼn tman te tuʼn tkubʼ mojeʼ tukʼil jun tmeʼjel Labán, jun kyfamiliar in kʼulintoq te Jehová. Ex xi tqʼamaʼn te qa ktzajel kʼiwlaʼn tuʼn Jehová (Gén. 28:1-4). Xi tbʼiʼn Jacob aju xi qʼamaʼn te tuʼn tman. Tuʼntzunju, etz toj tnam Canaán ex pon jatumel in nanqʼin Labán, aju attoq kabʼe tmeʼjel, Lea ex Raquel. Xiʼ tanmi Jacob tiʼj Raquel, aju mas kʼwalx. Tuʼn tkubʼ mojeʼ Jacob tukʼil Raquel, bʼaʼn ela toj twitz tuʼn taqʼunan wuq abʼqʼi tukʼil Labán (Gén. 29:18). Pero mintiʼ e bʼaj qe tiʼchaq ik tzeʼn otoq kubʼ t-ximen Jacob. Kubʼ sbʼuʼn tuʼn Labán ex xi tqʼoʼn Lea te t-xuʼjil, aju ttzik Raquel. Tej tikʼ juntl seman, xi tqʼoʼn Labán Raquel te t-xuʼjil Jacob, pero ax ikx xi tqʼamaʼn te tuʼn taqʼunan juntl wuq abʼqʼi tukʼil (Gén. 29:25-27). Nya oʼkx jlu bʼaj tiʼj Jacob, ax ikx sbʼun Labán tiʼj kyoj kʼaẍjel ex bʼant jlu tuʼn toj 20 abʼqʼi (Gén. 31:41, 42).

6. ¿Alkye mas nya bʼaʼn ok weʼ Jacob twitz?

⁶ Ax ikx ok weʼ Jacob kywitz mas nya bʼaʼn. Ten nim tkʼwal, pero mintiʼ ten mujbʼabʼil kyxol. Jun kyxol nya bʼaʼn bʼant kyuʼn, xi kykʼayin José te majen. Ax ikx, kubʼ tqʼoʼn Simeón ex Leví kychʼixwi tfamilia Jacob ex bʼaj kytzʼilsaʼn tbʼi Jehová. Nya oʼkxju, ax ikx kyim Raquel, aju t-xuʼjil Jacob tej tul itzʼj tkabʼin tal. Ex tuʼnju tzaj nim weʼyaj toj nim ambʼil, xiʼ Jacob anqʼil toj tnam Egipto tej otoq tijen (Gén. 34:30; 35:16-19; 37:28; 45:9-11, 28).

7. ¿Tzeʼn kubʼ tyekʼin Jehová te Jacob qa in tzalajtoq tiʼj?

⁷ Maske ok weʼ Jacob twitz nim nya bʼaʼn, kukx ok qeʼ tkʼuʼj tiʼj Jehová ex kyiʼj ttziybʼil. Ex kubʼ tyekʼin Jehová qa in tzalajtoq tiʼj. Jun techel, maske sbʼun Labán tiʼj Jacob, ten nim tqʼinumabʼil noq tuʼnju onin Jehová tiʼj. Ex jaku txi qqʼamaʼn qa xi tqʼoʼn Jacob nim chjonte te Jehová tej tok tkeʼyin twitz José juntl maj, maske kubʼ t-ximen qa otoq kyim. Ikʼx tkyaqil nya bʼaʼn lu tuʼn Jacob tuʼnju attoq jun tbʼanel tamiwbʼil tukʼil Jehová (Gén. 30:43; 32:9, 10; 46:28-30). Ax ikx qe, jaku qo ex twitz alkyexku nya bʼaʼn in qo ok weʼ twitz qa at jun tbʼanel qamiwbʼil tukʼil Jehová.

8. ¿Tiʼ tajtoq rey David tuʼn tbʼant tuʼn?

 ⁸ Mintiʼ bʼant tuʼn t-xi tbʼinchaʼn rey David tkyaqilju tajtoq tuʼn tbʼant tuʼn toj tajbʼebʼil te Jehová. Jun techel, tuʼn tkyaqil tkʼuʼj tajtoq tuʼn tjaw tbʼinchaʼn jun templo. Tej t-xi tqʼamaʼn rey David aju kubʼ t-ximen te profeta Natán, xi tqʼamaʼn profeta jlu te: «Bʼinchama tkyaqil ik tzaʼnx ma kubʼ t-ximana, porke [at] Dios tukʼila» (1 Crón. 17:1, 2). ¿Jakupe kubʼ qximen jniʼ tzalajbʼil kubʼ tnaʼn David tej tok tbʼiʼn qe yol lu? Bʼalo jun rat ok ten ximel tiʼj tiʼ tuʼn tbʼant tuʼn tuʼntzun tjaw tbʼinchaʼn templo.

9. ¿Tiʼ tmod rey David kubʼ tyekʼin tej mintiʼ xi tbʼinchaʼn aju kubʼ t-ximen?

⁹ Mintiʼ ikʼ nim ambʼil tej tpon profeta Natán qʼamalte nya bʼaʼn tqanil te rey David. Tojx qonikʼen tej tyolin David tukʼil Natán, xi tqʼamaʼn Jehová te profeta qa nya a rey David tuʼn tjaw bʼinchante templo, sino jun kyxol qe tkʼwal (1 Crón. 17:3, 4, 11, 12). ¿Tiʼ tmod rey David kubʼ tyekʼin tej tok tbʼiʼn tqanil lu? Bʼant junjun chʼixpubʼil tuʼn. Kubʼ t-ximen tuʼn tjaw tchmoʼn pwaq ex qe material tuʼn tajbʼen tuʼn Salomón tuʼntzun tjaw tbʼinchaʼn templo te Jehová (1 Crón. 29:1-5).

10. ¿Tzeʼn tzaj tkʼiwlaʼn Jehová rey David?

¹⁰ Tej otoq txi qʼamaʼn te rey David qa nya a tuʼn tjaw bʼinchante templo, kyaj bʼant tiʼj jun tyol Jehová tukʼil. Xi ttziyen te qa kukx kkawil jun tyajil te jumajx (2 Sam. 7:16). Aj tkawin Jesús toj Tkawbʼil Dios toj mil abʼqʼi, kbʼel tnaʼn rey David nim tzalajbʼil aj tok tbʼiʼn qa atz tzajni rey tiʼj t-xeʼchel. In tzaj tyekʼin txʼolbʼabʼil lu qe qa jaku qo tzaj tkʼiwlaʼn Jehová toj jun tbʼanel tten, maske mintiʼ in bʼant quʼn tkyaqilju qaj tuʼn tbʼant toj qajbʼebʼil te.

11. ¿Tiʼ kʼiwlabʼil tzaj kykʼamoʼn okslal toj tnejel syent abʼqʼi maske mintiʼ xi tzyet tuʼn tkawin Tkawbʼil Dios toj ambʼil in che ayontoq tiʼj? (Hechos 6:7).

¹¹ Ax ikx e ok weʼ okslal toj tnejel syent abʼqʼi twitz junjun nya bʼaʼn mintiʼtoq ximen kyuʼn. Jun techel, kyajtoq tuʼn tpon ambʼil tuʼn tkawin Tkawbʼil Dios, pero mintiʼtoq bʼiʼn kyuʼn toj alkye ambʼil kxel tzyet tuʼn tkawin (Hech. 1:6, 7). ¿Tiʼtzun bʼant kyuʼn? Kukx e pakbʼan. Tej tok kykeʼyin qa in xi pakbʼet tbʼanel tqanil kyoj mas lugar, tuʼn jlu el kynikʼ tiʼj qa in tzalaj Jehová tiʼj kyaqʼun (kjawil uʼjit Hechos 6:7).

12. ¿Tiʼ bʼant kyuʼn okslal toj tnejel syent abʼqʼi tej ttzaj weʼyaj?

¹² Toj tnejel syent abʼqʼi, ax ikx e ok weʼ okslal twitz «weʼyaj tuj tkyaqil twitz txʼotxʼ» (Hech. 11:28). Tuʼn jlu tzaj nya bʼaʼn kyiʼj kykyaqil okslal. Ex tzajlo bʼaj kykʼuʼj mambʼaj tej kyximen tiʼj jatumel tuʼn ttzaj kypwaq tuʼn kykʼaʼchit toj kyja. Atzun kye kuʼxun kyajtoq tuʼn kyajbʼen mas ambʼil te Jehová, kubʼlo kyximen qa iltoq tiʼj tuʼn kyyon chʼintl ambʼil. Noq tiʼxku bʼaj, ok tilil kyuʼn okslal tuʼn kynaqʼet kyiʼj chʼixpubʼil. Kukx ok tilil kyuʼn tuʼn kypakbʼan ex xi kyqʼoʼn chʼin tiʼjju kanet kyuʼn kye erman te Judea (Hech. 11:29, 30).

13. ¿Tiʼ kʼiwlabʼil tzaj kykʼamoʼn okslal toj ambʼil tej ttzaj weʼyaj?

¹³ ¿Tiʼ kʼiwlabʼil tzaj kykʼamoʼn okslal toj ambʼil tej kyok weʼ twitz nya bʼaʼn? Tej t-xi qʼoʼn onbʼil kye, el kynikʼ tiʼj qa in xqʼuqintoq Jehová kyiʼj (Mat. 6:31-33). Jaku txi qqʼamaʼn qa ten mas mujbʼabʼil kyxol kyukʼil erman e onin kyiʼj. Nya oʼkxju, ax ikx kubʼlo kynaʼn erman nim tzalajbʼil tej kyonin tukʼil pwaq moqa tej kyonin tukʼil junjuntl aqʼuntl (Hech. 20:35). Kykyaqilx  e tzaj kʼiwlaʼn tuʼn Jehová tuʼnju e naqʼet kyiʼj chʼixpubʼil.

14. ¿Tiʼ bʼaj tiʼj Bernabé ex tiʼj apóstol Pablo ex tiʼ tbʼanel tzaj tuʼn jlu? (Hechos 14:21, 22).

¹⁴ Ax ikx e ok weʼ okslal te tnejel syent abʼqʼi twitz ikʼbʼil ex at maj mintiʼtoq ximen kyuʼn. Qo yolin tiʼjju bʼaj tiʼj Bernabé ex apóstol Pablo akux in che pakbʼan toj tnam Listra. Tnejel, e okx kʼamoʼn kyuʼn xjal ex e ok bʼiʼn kyuʼn. Tejtzun tikʼ chʼintl ambʼil, e jaw meltzʼaj xjal kyiʼj ex ateʼ junjun e ok ten xol abʼj tiʼj Pablo ex kubʼ kyximen qa otoq kyim (Hech. 14:19). Pero xiʼ Bernabé ex Pablo toj juntl lugar, ex kukx e pakbʼan. ¿Tiʼ tzaj tuʼn jlu? «Nim xjal e okslan» kyuʼn ex xi kyqʼuqbʼaʼn kykʼuʼj erman tuʼn kyyol ex tukʼil techel kubʼ kyqʼoʼn kywitz (kjawil uʼjit Hechos 14:21, 22). Mintiʼ e kubʼ numj Bernabé ex Pablo, maske e ok weʼ twitz ikʼbʼil ex onin jlu kyiʼj nim xjal. Ax ikx qe, qa mintiʼ ma qo kubʼ numj ex qa kukx ma tzʼok tilil quʼn tuʼn qpakbʼan, tzul qkʼamoʼn nim kʼiwlabʼil.

15. ¿Tiʼ xnaqʼtzbʼil jaku tzʼel tiʼna tiʼj techel kyaj tqʼoʼn ermano Alexander Macmillan?

¹⁵ Tej naʼmxtoq tjapun abʼqʼi 1914, in che ayontoq tmajen Jehová tuʼn kybʼaj tbʼanel tiʼchaq. Jun kyxol qe jlu, ten ermano Alexander Macmillan. Kubʼ t-ximen kyukʼil txqantl erman qa chʼinxtoq tpon ambʼil tuʼn kyxiʼ toj kyaʼj. Tqʼama jlu toj jun chikʼbʼabʼil ex tqʼoʼn toj septiembre te 1914: «Bʼalo atzun mankbʼil chikʼbʼabʼil lu kʼelex nqʼoʼne». Pero mintiʼ bʼaj jlu. Ex yajxitl kubʼ ttzʼibʼin jlu: «Ateʼ junjun qeye jun rat kubʼ t-ximen qa ya otoq pon ambʼil tuʼn qxiʼye toj kyaʼj». Ex tqʼamatl jlu: «Aju tuʼn tbʼant quʼne, iltoq tiʼj tuʼn tok qqʼoʼne qwiʼye tiʼj qajbʼebʼile te Qajaw». Ex atzun jlu bʼant tuʼn. Ok tilil tuʼn tuʼn tpakbʼan ex xi tqʼuqbʼaʼn kykʼuʼj erman e ten toj cárcel tuʼnju in che ajbʼentoq te Jehová, ex kukx bʼet kyoj chmabʼil maske otoq tijen. Ajbʼen ambʼil toj tumel tuʼn akux in ayon tiʼj oyaj tuʼn ttzaj tqʼoʼn Jehová te. ¿Tzeʼn onin jlu tiʼj? Kubʼ ttzʼibʼin jlu toj 1966 tej chʼixtoq tkyim: «Kukx at nim qʼuqbʼil nkʼuʼje ik tzeʼn ojtxe». Kyaj tqʼoʼn ermano Alexander jun tbʼanel techel qwitz qkyaqilx, mas kye qeju o tzikʼ nim ambʼil in che ayon tiʼj xitbʼil (Heb. 13:7).

16. ¿Alkye nya bʼaʼn o weʼ ermano Jennings twitz tukʼil t-xuʼjil? (Santiago 4:14).

¹⁶ Ateʼ nim tmajen Jehová noq minabʼen in tzaj jun yabʼil kyiʼj. Jun techel, tqʼama ermano Herbert Jennings toj tbiografía qa in tzalajtoq tukʼil t-xuʼjil tej kyajbʼen te misionero atz Ghana. b Pero tej tikʼ ambʼil, el nikʼbʼaj tiʼj qa attoq jun yabʼil tiʼj t-ximbʼetz. Tqʼama ermano Jennings qa mintiʼtoq in che ayon tiʼj qʼij aju ex atztoq in yolin kyiʼj yol tkuʼx toj Santiago 4:14 (uʼjinktza). Kyaj ttzʼibʼin jlu: «El qnikʼe tiʼjju in bʼajtoq qiʼje ex bʼaj qbʼinchaʼne qtene tuʼn qikʼ bʼete toj tnam Ghana ex tuʼn tkyaj qqʼoʼne qe tbʼanel qamiwe, ex tuʼn qmeltzʼaje toj tnam Canadá [tuʼntzun ttzaj qkʼamoʼne qe qʼanbʼil]». Onin Jehová tiʼj ermano Jennings tukʼil t-xuʼjil tuʼn kukx kyajbʼen te.

17. ¿Tzeʼn o tzʼonin kyiʼj txqantl erman aju techel kubʼ tqʼoʼn ermano Jennings?

¹⁷ Aju tqʼama ermano Jennings toj tbiografía, onin kyiʼj txqantl erman. Kubʼ  ttzʼibʼin jun ermana jlu: «Naʼmxtoq in jaw oqʼe tuʼn jun tbʼanel xnaqʼtzbʼil [...]. Tej tok nbʼiʼne qa kyaj tkolin ermano Jennings toklen tuʼntzun tok t-xqʼuqin tibʼ tiʼj yabʼil, onin jlu wiʼje tuʼn tten nximbʼetze toj tumel kyiʼj tiʼchaq in chin ok weʼye twitz». Ex kubʼ ttzʼibʼin juntl erman jlu: «Tej otoqxi chin ajbʼene te ansyan toj mas te 10 abʼqʼi, iltoq tiʼj tuʼn tkyaj ntzaqpiʼne woklene tuʼnju attoq jun yabʼil toj nwiʼye. Kubʼ nximane qa mintiʼtoq wajbʼene ex in tzajtoq nim nbʼise aj kyjaw wuʼjine biografía [...]. Pero nim onin wiʼje tej tok nbʼiʼne qa kukx ok tilil tuʼn ermano Jennings». A jlu in tzaj tyekʼin qe qa jaku qo onin kyiʼj txqantl qa kukx ma tzikʼx quʼn aj qok weʼ twitz nya bʼaʼn mintiʼ ximen quʼn. Tuʼntzunju, maske mintiʼ jun tbʼanel qanqʼibʼil ik tzeʼn in kubʼ qximen, jaku kubʼ qqʼoʼn jun tbʼanel techel kywitz txqantl qa kukx ma ten qʼuqbʼil qkʼuʼj ex qa kukx ma tzikʼx quʼn (1 Ped. 5:9).

18. ¿Tiʼ in tzaj tyekʼin qe aju bʼaj tiʼj jun ermana viuda te Nigeria? (Qʼonka twitza kyiʼj foto jatumel in tzaj yekʼin aju bʼaj tiʼj ermana).

¹⁸ Ateʼ nim erman tzaj nim nya bʼaʼn kyiʼj tuʼn COVID-19. Jun techel, nyatoq nim twa ex tpwaq jun ermana viuda te Nigeria. Toj jun prim, oʼkxtoq jun tasa arroz at te kywa ex tuʼntzunju xi tqanin tal te tiʼ tuʼn t-xi kywaʼn toj juntl qʼij. Xi tqʼamaʼn ermana te tal qa mintiʼtoq kywa ex kypwaq, pero jakutoq tzʼel kykanoʼn tiʼj viuda te Sarepta. Kbʼeltoq kybʼinchaʼn mankbʼil kywa ex tuʼn tok qeʼ kykʼuʼj tiʼj Jehová (1 Rey. 17:8-16). Tej naʼmxtoq tok ten ermana ximel tiʼj tiʼtoq tuʼn t-xi kywaʼn te tmij qʼij aju, pon kyiʼn erman jun paquete tiʼchaq kye. Toj paquete lu, tkuʼxtoq kywa te mas te kabʼe seman. Toj ambʼil aju, el tnikʼ ermana tiʼj qa otoq tzʼok tqʼoʼn Jehová twiʼ tiʼjju xi tqʼamaʼn te tal. Tuʼn jlu, in nel qnikʼ tiʼj qa mas qo okel laqʼeʼ ttxlaj Jehová qa kukx ma tzʼok  qeʼ qkʼuʼj tiʼj aj qok weʼ twitz nya bʼaʼn (1 Ped. 5:6, 7).

19. ¿Tiʼ nya bʼaʼn ok weʼ ermano Alexéi twitz?

¹⁹ Ya ma tzikʼ junjun abʼqʼi kyoklen weʼ erman twitz ikʼbʼil ex mintiʼtoq ximen jlu kyuʼn. Qo yolin tiʼjju bʼaj tiʼj jun ermano te Rusia, aju Alexéi Yershov tbʼi. Tej tbautisarin toj 1994, ok tqʼoʼn twitz tiʼj qa in che tzalaj testigo de Jehová tuʼnju qʼoʼn ambʼil kye tuʼn kyajbʼen te Jehová. Pero tej tikʼ ambʼil, chʼexpaj qe tiʼchaq toj tnam Rusia. Toj 2020, e okx junjun polisiy toj tja ermano Alexéi, bʼaj kyxpichʼin tkyaqil ex xi kyiʼn junjun tiʼchaq te. Tej tikʼ junjun xjaw, kyqʼama polisiy qa attoq til Alexéi tuʼnju otoq tzʼok kykeʼyin junjun video kubʼ tgrabarin jun xjal kubʼ tyekʼin qa tajtoq tuʼn tel tnikʼ tiʼj Biblia toj mas te jun abʼqʼi. ¡Bʼisbʼajil aju bʼaj!

20. ¿Tiʼ o bʼant tuʼn ermano Alexéi tuʼn kukx tten jun tbʼanel tamiwbʼil tukʼil Jehová?

²⁰ ¿Atpe jun xnaqʼtzbʼil o tzʼel tiʼn ermano Alexéi tiʼjju nya bʼaʼn ok weʼ twitz? At. Kukx o chʼiy tamiwbʼil tukʼil Jehová. Tqʼama ermano jlu: «Mas in qo naʼne Dios junx tukʼil nxuʼjile. Ojtzqiʼn wuʼne qa mlayx chin exe twitz nya bʼaʼn lu noqwit mintiʼ in nonin Jehová wiʼje». Ex tqʼamatl jlu: «Aj nxnaqʼtzane tiʼj Tyol Dios, in nonin wiʼje tuʼn miʼn ttzaj bʼaj nkʼuʼje. In chin ximane tiʼjju bʼaj kyiʼj tmajen Jehová toj ambʼil ojtxe. Ateʼ nim txʼolbʼabʼil toj Tyol Dios jatumel in tzaj tyekʼin qa nim toklen tuʼn miʼn ttzaj bʼaj qkʼuʼj ex tuʼn kukx tok qeʼ qkʼuʼj tiʼj Jehová».

21. ¿Tiʼ ma tzʼel qnikʼ tiʼj toj xnaqʼtzbʼil lu?

²¹ ¿Tiʼ ma tzʼel qnikʼ tiʼj toj xnaqʼtzbʼil lu? Ma tzʼel qnikʼ tiʼj qa mintiʼ bʼiʼn quʼn tiʼ jaku bʼaj toj qanqʼibʼil, pero qa ma tzʼok qeʼ qkʼuʼj tiʼj Jehová, kukx kʼonil qiʼj. Ik tzeʼn in tzaj tqʼamaʼn texto jatumel ma jatz qʼiʼn xnaqʼtzbʼil lu, «aju xjal tzʼaqlxix nim yajbʼil nnikʼx tuʼn, ex in kolpet tuʼn Qman tuj tkyaqilju in tzaj tiʼj» (Sal. 34:19). Tuʼntzunju, miʼn tzʼok qqʼoʼn qwiʼ kyiʼj nya bʼaʼn in qo ok weʼ twitz, sino tiʼj tipumal Jehová at tuʼn tonin qiʼj. Qa ma bʼant jlu quʼn, jaku txi qqʼamaʼn qe yol ik tzeʼn tqʼama apóstol Pablo: «Tkyaqil tiʼchaq in nikʼx wuʼne noq tuʼn wipumale in tzaj tqʼoʼn aju qʼolte ipumalj» (Filip. 4:13, TNM).