1. ¿Tzeʼn kubʼ tyekʼin jun kʼwal qa ok qeʼ tkʼuʼj tiʼj qa che kjawil anqʼin kyimni?

 TUʼNJU o tzaj nim yabʼil tiʼj jun kuʼxun Matthew tbʼi, o kux operarin nimku maj. Tej qʼiʼntoq 7 abʼqʼi tuʼn bʼaj jun tiʼ tbʼanelxix. Jun qʼij, in keʼyin tukʼil tfamilia tiʼj jun programa te JW Broadcasting^®. Tej chʼixtoq tkubʼaj programa, ok kyqʼoʼn kywitz tiʼj jun video musical jatumel in che etz yekʼin qe erman in che tzalaj junx kyukʼil kyfamiliar otoq che jaw anqʼin. b Tej tbʼaj programa, ok laqʼeʼ Matthew kytxlaj tman, xi ttzyuʼn kyqʼabʼ ex xi tqʼamaʼn jlu kye: «Mamá, papá ¿mape tzʼok kyqʼoʼne kywitze tiʼj qa jaku chin jaw anqʼine juntl maj qa ma chin kyime? Jaku che ayone wiʼje, bʼaʼn kʼelel tkyaqil». Noqpe qo ximen tiʼj tiʼ kubʼ kynaʼn mambʼaj tej tok kybʼiʼn qa at qʼuqbʼil tkʼuʼj kykʼwal. Qʼuqlitoq tkʼuʼj Matthew tiʼj qa ax tok che kjawil anqʼin kyimni.

2, 3. ¿Tiquʼn bʼaʼn tuʼn qximen tiʼj qa che kjawil anqʼin kyimni?

² Tbʼanel qa kukx ma qo ximen tiʼj tziybʼil tuʼn kyjaw anqʼin kyimni (Juan 5:28, 29). ¿Tiquʼn? Tuʼnju mintiʼ bʼin quʼn tiʼ jaku bʼaj qiʼj. Jakulo tzaj jun yabʼil qiʼj moqa jaku kyim jun toj qja ex mintiʼ in qo ayon tiʼj (Ecl. 9:11; Sant. 4:13, 14). Pero aj tok qbʼiʼn qa che kjawil anqʼin kyimni, jaku tzʼonin qiʼj tuʼn kyikʼx nya bʼaʼn lu quʼn (1 Tes. 4:13). In tzaj tqʼamaʼn Tyol Dios qa ojtzqiʼnxix qoʼ tuʼn Jehová ex qa at nim tkʼujlabʼil qiʼj (Luc. 12:7). Ikju, il tiʼj tuʼn tbʼant jlu tuʼn tuʼntzun ttzaj tnaʼn tzeʼnxix qmod ex aju o tzikʼ qiʼj. Ex tuʼnju kʼujlaʼn qoʼ tuʼn, ktzajel tqʼoʼn ambʼil qe tuʼn qanqʼin te jumajx. Axpe ikx, jaku qo jaw anqʼin tuʼn qa ma qo kyim.

³ Toj xnaqʼtzbʼil lu, kʼelel qnikʼ tiʼj tiquʼn jaku tzʼok qeʼ qkʼuʼj tiʼj qa che kjawil anqʼin kyimni. Ax ikx, jaku chʼiy mas qʼuqbʼil  qkʼuʼj qa ma qo xnaqʼtzan kyiʼj yol tkuʼx toj texto jatumel ma jatz xnaqʼtzbʼil lu. In tzaj tqʼamaʼn jlu: «Kjawil anqʼin t-xibʼana» (Juan 11:23). Te mankbʼil, qo xnaqʼtzal tiʼj tiʼ mas jaku bʼant quʼn tuʼn tchʼiy qʼuqbʼil qkʼuʼj tiʼj qa ax tok che kjawil anqʼin kyimni.

4. ¿Tiʼ jaku qo ximen tiʼj naʼmxtoq tok qeʼ qkʼuʼj tiʼj jun tziybʼil? Qʼamantza jun techel.

⁴ Tuʼn tok qeʼ qkʼuʼj tiʼj jun promesa, il tiʼj tuʼn tok qeʼ qkʼuʼj tiʼj qa ax tok taj xjal in tzaj tziyente tuʼn t-xi tbʼinchaʼn ex qa at tpoder tuʼn tbʼant tuʼn. Qo ximen tiʼj qa ma kubʼ xitj qja tuʼn jun kyqʼiqʼ jbʼal. Aj tok tbʼiʼn jun qamiw aju otoq bʼaj qiʼj, in tzaj ttziyen jlu qe: «Chin onile tiʼja tuʼn tjaw bʼinchet juntl maj tjaya». Ojtzqiʼn quʼn qa in japun twi tyol ex qa ax tok taj tuʼn tonin qiʼj. Ax ikx, ojtzqiʼn quʼn qa o tzʼaqʼunan tuʼn kyjaw bʼinchet ja ex qa at tkyaqil t-erramienta. Tuʼntzunju, in nok qeʼ qkʼuʼj tiʼj tyol. ¿Yajtzun ttziybʼil Dios qa che kjawil anqʼin kyimni? ¿Tajpe tuʼn tjapun twi tyol ex atpe tpoder tuʼn tbʼant tuʼn?

5, 6. ¿Tiquʼn qʼuqli qkʼuʼj tiʼj qa taj Jehová tuʼn kyjaw anqʼin kyimni?

⁵ ¿Tajpe Jehová tuʼn kyjaw anqʼin kyimni? Taj. Tuʼn tonbʼil xewbʼaj xjan, kubʼ kytzʼibʼin junjun xjal toj Biblia qa oktoq che kjawil anqʼin kyimni (Is. 26:19; Os. 13:14; Apoc. 20:11-13). Ex aj ttzaj ttziyen Jehová jun tyol, in japun tuʼn (Jos. 23:14). Axpe ikx, tuʼn tkyaqil tkʼuʼj taj tuʼn t-xi tqʼoʼn juntl maj kychwinqlal qeju o che kyim. ¿Tiquʼn in xi qqʼamaʼn jlu?

⁶ Qo ximen tiʼjju tqʼama Job. Qʼuqlitoq tkʼuʼj tiʼj qa tajtoq Jehová tuʼn tok tkeʼyin juntl maj qa ma kyim (Job 14:14, 15). Ax jlu in kubʼ tnaʼn Jehová kyiʼj tmajen o che kyim. Taj tuʼn kyjaw anqʼin tuʼn tten jun tbʼanel kychwinqlal ex tuʼn kytzalaj. Yajtzun qe xjal mintiʼ el kynikʼ tiʼj Jehová, ¿tiʼ t-ximbʼetz at kyiʼj? Ax ikx taj tuʼn t-xi tqʼoʼn kychwinqlal te jumajx (Hech. 24:15). Taj Jehová tuʼn kyok te tamiw ex tuʼn kyanqʼin te jumajx tzalu twitz Txʼotxʼ (Juan 3:16). A jlu in tzaj tyekʼin qe qa taj Jehová tuʼn kyjaw anqʼin kyimni.

7, 8. ¿Tiquʼn qʼuqli qkʼuʼj tiʼj qa at tpoder Jehová tuʼn kyjaw anqʼin kyimni?

⁷ ¿Atpe tpoder Jehová tuʼn kyjaw anqʼin kyimni tuʼn? At. «Ex at tipumal tuʼn tbʼant tkyaqil tuʼn» (Apoc. 1:8). Jaku kubʼ tiʼj alkyexku aj qʼoj tuʼn, axpe ikx aju kyimen (1 Cor. 15:26). Aj tok qbʼiʼn jlu, in nonin qiʼj tuʼn tikʼx tkyaqil nya bʼaʼn quʼn ex in tzaj tqʼuqbʼaʼn qkʼuʼj. Qo yolin tiʼjju bʼaj tiʼj ermana Emma Arnold. Ok weʼ ermana tukʼil tfamilia twitz nim prueba tej tok Tkabʼ Nimaq Qʼoj twitz Tkyaqil Txʼotxʼ. Tuʼn t-xi tqʼuqbʼaʼn tkʼuʼj tal tuʼnju otoq che kyim nim tfamiliar toj campo de concentración nazi, xi tqʼamaʼn jlu te: «Noqwit mlay che jaw anqʼin kyimni, jaku txi qqʼamaʼn qa mas nim tipumal kamik at twitz Dios, pero nya ik ttenju». A Jehová in tzaj qʼonte qchwinqlal, tuʼntzunju, at tpoder tuʼn t-xi tqʼoʼn kychwinqlal qeju o che kyim.

⁸ Juntl tiquʼn jaku tzʼok qeʼ qkʼuʼj tiʼj qa che kjawil anqʼin kyimni tuʼn Jehová, aju qa mintiʼ in nel naj jun tiʼ toj t-ximbʼetz. In tzaj tqʼamaʼn Biblia qa teyele junjun cheʼw tok tbʼi tuʼn (Is. 40:26). Tuʼntzunju, kukx in che tzaj tnaʼn Jehová kykyaqil xjal o che kyim (Job 14:13; Luc. 20:37, 38). Jaku tzaj tnaʼn Jehová tkyaqil tqanil tiʼj jun xjal aj tjaw anqʼin ik tzeʼn qe tmod, tzeʼn keʼyin, tzeʼn tanqʼibʼil ex tiʼ o bʼant tuʼn.

9. ¿Tiquʼn qʼuqli tkʼuʼja tiʼj qa che kjawil anqʼin kyimni?

⁹ Ik tzeʼn ma tzʼel qnikʼ tiʼj, jaku tzʼok  qeʼ qkʼuʼj tiʼj qa che kjawil anqʼin kyimni. ¿Tiquʼn? Tuʼnju ojtzqiʼn quʼn qa taj Jehová tuʼn tbʼant jlu tuʼn ex at tipumal tuʼn t-xi tbʼinchaʼn. Ax ikx, jaku tzʼok qeʼ qkʼuʼj tiʼj qa kbʼantel jlu tuʼn tuʼnju o che jaw anqʼin junjun xjal. Toj ambʼil ojtxe, xi tqʼoʼn Jehová kyoklen junjun xjal tuʼn kyjaw anqʼin kyimni kyuʼn ik tzeʼn bʼant tuʼn Jesús. Qo yolin tiʼj jun ambʼil tej tjaw anqʼin jun xjal tuʼn Jesús. Jaku kanet quʼn toj capítulo 11 te Juan.

10. ¿Tiʼ bʼaj tej in pakbʼantoq Jesús ttxlaj Betania ex tiʼ kubʼ t-ximen tuʼn tbʼant tuʼn? (Juan 11:1-3).

¹⁰ (Kjawil uʼjit Juan 11:1-3). Ok tamiwen tibʼ Jesús tukʼil Lázaro, María ex Marta. Kyitzʼintoq kyibʼ ex atztoq in che anqʼin toj tnam Betania (Luc. 10:38-42). Tej chʼixtoq tkubʼaj abʼqʼi 32, tzaj yabʼil tiʼj Lázaro. Tzaj bʼaj kykʼuʼj tanabʼ Lázaro, tuʼntzunju xi kysamaʼn jun tqanil te Jesús. Pero atztoq taʼ Jesús toj juntl plaj te río Jordán ex jakutoq txi tiʼn kabʼe qʼij tuʼn tpon (Juan 10:40). Bʼisbʼajil tuʼnju kyim Lázaro tej tpon tqanil tukʼil Jesús. Tej tok tbʼiʼn Jesús qa otoq kyim tamiw, kubʼ t-ximen tuʼn tkyaj ten kabʼe qʼij mas toj lugar jatumel taʼ naʼmxtoq t-xiʼ toj Betania. Tej tpon, ya otoq tzikʼ kyaje qʼij tkyimlen Lázaro. Tajtoq Jesús tuʼn tonin kyiʼj tamiw ex tuʼn tjaw tnimsaʼn tbʼi Dios (Juan 11:4, 6, 11, 17).

11. ¿Tiʼ xnaqʼtzbʼil jaku tzʼel qiʼn tiʼj tamiwbʼil Jesús ten tukʼil Lázaro ex qe tanabʼ?

¹¹ ¿Tiʼ xnaqʼtzbʼil jaku tzʼel qiʼn tiʼj tamiwbʼil Jesús ten tukʼil Lázaro ex qe tanabʼ? Tej t-xi tqʼamaʼn María ex Marta tqanil te Jesús, mintiʼ xi kyqʼamaʼn te tuʼn tpon Betania. Oʼkx xi kyqʼamaʼn te qa yabʼtoq taʼ tamiw (Juan 11:3). Tej tkyim Lázaro, jakutoq jaw anqʼin tuʼn Jesús maske nya nqayin taʼ tiʼj. Pero kubʼ t-ximen tuʼn t-xiʼ Betania tuʼn tten tukʼil María ex Marta. ¿Atpe jun teya tamiw jaku tzʼonin tiʼja ex nya il tiʼj tuʼn t-xi tqanina onbʼil te? Qa ikju, jaku tzʼonin tiʼja aj ttzaj jun nya bʼaʼn (Prov. 17:17). Qa ma tzʼel qkanoʼn tiʼj Jesús, jaku qo ok te jun tbʼanel amiw. Qo xnaqʼtzan tiʼj tiʼ bʼaj yajxitl.

12. ¿Tiʼ xi tqʼamaʼn Jesús te Marta ex tiquʼn jakutoq tzʼok qeʼ tkʼuʼj tiʼj qa kjapunel twiʼ? (Juan 11:23-26).

¹² (Kjawil uʼjit Juan 11:23-26). Tej tok tbʼiʼn Marta qa nqayin taʼ Jesús tiʼj tnam Betania, jun rat xiʼ keʼyilte ex xi tqʼamaʼn jlu te: «Tat noq ata tzalu miwtlo o kyim nxibʼane» (Juan 11:21). Jakutoq kubʼ tqʼanin Jesús Lázaro, pero kubʼ t-ximen tuʼn tkubʼ tbʼinchaʼn jun tiʼ mas nim toklen. Xi ttziyen Jesús jlu te Marta: «Kjawil anqʼin t-xibʼana». Ax ikx xi tqʼuqbʼaʼn tkʼuʼj tej t-xi tqʼamaʼn jlu te: «Aqine qʼolte anqʼibʼil ex aqine qʼolte chwinqlal». Ikju, o txi tqʼoʼn Jehová tpoder Jesús tuʼn kyjaw anqʼin kyimni tuʼn. Toj ambʼil aju, otoq jaw anqʼin jun txin tuʼn Jesús. Ax ikx, otoq jaw anqʼin jun kuʼxun tuʼn ex parece que jaw anqʼin tojx qʼij tej tkyim (Luc. 7:11-15; 8:49-55). Pero ¿jakupe jaw anqʼin jun xjal tuʼn Jesús qa ya otoq tzikʼ kyaje qʼij  tkyimlen ex otoq t-xi tzyet tuʼn tkubʼ tqʼay t-xmilal?

13. Ik tzeʼn in tzaj tqʼamaʼn Juan 11:32 a 35, ¿tiʼ kubʼ tnaʼn Jesús tej tok tkeʼyin qa in noqʼ María ex junjuntl xjal? (Qʼonka twitza tiʼj dibujo).

¹³ (Kjawil uʼjit Juan 11:32-35). Qo ximen tiʼjju bʼaj. Ax ikx pon laqʼeʼ María ttxlaj Jesús ex axju xi tqʼamaʼn te ik tzeʼn te Marta. Tqʼama jlu: «Tat, noqwit ax taʼya tzalu miwtlo o kyim nxibʼane». Otoq tzaj nim tbʼis María ex qe xjal ateʼtoq tukʼil. Tej tok tqʼoʼn Jesús twitz kyiʼj ex tej tok tbʼiʼn qa in che oqʼ, tzaj nimxix tbʼis. Tzaj qʼaqʼin tkʼuʼj Jesús kyiʼj tamiw, tuʼntzunju jaw oqʼ. Aj tkyim jun qfamiliar, in nel tnikʼ Jesús tiʼj bʼis in kubʼ qnaʼn ex taj tuʼn tel tiʼn tkyaqil nya bʼaʼn in tzaj qiʼj tuʼn.

14. ¿Tiʼ xnaqʼtzbʼil in tzaj tqʼoʼn qe tiʼj Jehová tuʼnju tzaj tbʼis Jesús tej tok tkeʼyin qa in noqʼ María?

¹⁴ Tzaj tbʼis Jesús tej tok tkeʼyin qa in noqʼ María. In tzaj tyekʼin jlu qe qa in tzaj qʼaqʼin tkʼuʼj Jehová qiʼj. ¿Tiquʼn in xi qqʼamaʼn jlu? Ik tzeʼn el qnikʼ tiʼj toj xnaqʼtzbʼil ma kyaj, kubʼ tyekʼin Jesús tukʼil tmod tiʼ t-ximbʼetz Jehová at ex tiʼ in kubʼ tnaʼn (Juan 12:45). Tuʼntzunju, aj tjaw quʼjin qa jaw oqʼ Jesús tej ttzaj bʼis kyiʼj tamiw, ojtzqiʼn quʼn qa ax ikx te Jehová in tzaj qʼaqʼin tkʼuʼj qiʼj aj tok tqʼoʼn twitz tiʼj qa in qo oqʼ (Sal. 56:8). Aj tel qnikʼ tiʼj jlu, in nonin qiʼj tuʼn qok laqʼeʼ mas ttxlaj Jehová tuʼnju kʼujlaʼn qoʼ tuʼn.

15. Ik tzeʼn in tzaj tqʼamaʼn Juan 11:41 a 44, ¿tiʼ bʼaj jatumel okx maquʼn Lázaro? (Ax ikx qʼonka twitza tiʼj dibujo).

¹⁵ (Kjawil uʼjit Juan 11:41-44). Pon Jesús jatumel kux maquʼn Lázaro ex xi tqʼamaʼn kye tuʼn tel kyiʼn abʼj ttzi jul. Atzunte Marta xi tqʼamaʼn te: «Tat, ma tzuwix» t-xmilal. Xi tqʼamaʼn Jesús jlu: «¿Myapetzun ma txi nmaʼne teya, qa ma tokslaya ok tilaʼya tipumal Dios?» (Juan 11:39, 40). Jaw tkeʼyin Jesús twitz kyaʼj ex ok ten naʼl Dios kywitz kykyaqil. Tajtoq tuʼn tjaw tnimsaʼn Jehová tukʼilju chʼixtoq tbʼant tuʼn. Ex tqʼama jlu tukʼil tkyaqil tqʼajqʼajel twiʼ: «Tetza, Lázaro». Etztzun Lázaro jatumel okx maquʼn. Kubʼlo kyximen xjal qa mlayxtoq bʼant jlu tuʼn Jesús. (Qʼonka twitza tiʼj nota de estudio  tiʼj Juan 11:17 toj Traducción del Nuevo Mundo).

16. ¿Tzeʼn in nonin historia qiʼj aju tkuʼx toj capítulo 11 te Juan tuʼn tok qeʼ mas qkʼuʼj tiʼj qa ax tok che kjawil anqʼin kyimni?

¹⁶ Aju historia tkuʼx toj capítulo 11 te Juan, in nonin qiʼj tuʼn tchʼiy qʼuqbʼil qkʼuʼj tiʼj qa ax tok che kjawil anqʼin kyimni. Qnaʼntz aju xi ttziyen Jesús te Marta: «Kjawil anqʼin t-xibʼana» (Juan 11:23). Taj Jehová ex Jesús tuʼn tpon ambʼil tuʼn kyjaw anqʼin kyimni. Tej tjaw oqʼ Jesús, kubʼ tyekʼin tuʼn tkyaqil tanmi qa taj tuʼn tel tiʼn kyimen ex bʼis. Ex tej tjaw anqʼin Lázaro tuʼn, ax ikx kubʼ tyekʼin qa at tpoder tuʼn kyjaw anqʼin kyimni. Qo ximen kyiʼj yol xi tqʼamaʼn Jesús te Marta: «¿Myapetzun ma txi nmaʼne teya, qa ma tokslaya ok tilaʼya tipumal Dios?» (Juan 11:40). At nim tiquʼn jaku tzʼok qeʼ qkʼuʼj tiʼj qa kjapunel aju o tzaj ttziyen Dios tuʼn kyjaw anqʼin kyimni. Pero ¿tiʼ kbʼantel quʼn tuʼn tchʼiy mas qʼuqbʼil qkʼuʼj tiʼj tziybʼil lu?

17. ¿Tiʼ jaku bʼant quʼn aj tjaw quʼjin qe historia kyiʼj xjal e jaw anqʼin toj ambʼil ojtxe?

¹⁷ Bʼaʼn tuʼn tjaw quʼjin qe historia kyiʼj xjal e jaw anqʼin toj ambʼil ojtxe ex qo ximen kyiʼj. In che kanet 8 historia quʼn toj Biblia kyiʼj xjal e jaw anqʼin tzalu twitz Txʼotxʼ. c Tbʼanel qa ma tzʼok tilil quʼn tuʼn qxnaqʼtzan kyiʼj. Akux in bʼant jlu quʼn, bʼaʼn tuʼn ttzaj qnaʼn qa axix tok e anqʼin qe xjal lu. Kyxol qe jlu e ten xinaq, xuʼj ex qe kʼwal. Qo ximen tiʼj alkye xnaqʼtzbʼil jaku tzʼel qiʼn kyiʼj ex tzeʼn in tzaj tyekʼin jlu qa taj Jehová tuʼn ttzaj tqʼoʼn kychwinqlal qeju o che kyim. Ex aju mas nim toklen, qo ximen tiʼj ambʼil tej tjaw anqʼin Jesús. Nim xjal ok kyqʼoʼn kywitz tiʼj Jesús tej otoqxi jaw anqʼin ex in nonin qiʼj tuʼn tchʼiy qʼuqbʼil qkʼuʼj (1 Cor. 15:3-6, 20-22).

18. ¿Tiquʼn tbʼanel tuʼn kyok qbʼiʼn qe bʼitz in che yolin tiʼj qa che kjawil anqʼin kyimni? (Qʼonka twitza tiʼj tqanil).

 ¹⁸ Bʼaʼn tuʼn kyok qbʼiʼn qe bʼitz in che etz tuʼn ttnam Jehová, aqeju in che yolin tiʼj qa che kjawil anqʼin kyimni (Efes. 5:19). d In che onin bʼitz lu qiʼj tuʼn tok qeʼ mas qkʼuʼj tiʼj qa ax tok che kjawil anqʼin kyimni. Tuʼntzunju, bʼaʼn tuʼn kyok qbʼiʼn, tuʼn qbʼitzin kyiʼj ex tuʼn qyolin kyiʼj aj qkʼulin te Jehová kyukʼil toj qja tkyaqil seman. Qqʼonk tilil tuʼn kykyaj bʼitz toj qwiʼ ex tuʼn kykuʼpun qe yol toj qanmi. Qa ma bʼant jlu quʼn, jaku tzʼonin Jehová qiʼj tuʼn kytzaj qnaʼn aj qok weʼ twitz jun nya bʼaʼn moqa aj tkyim jun xjal kʼujlaʼn quʼn. Ex kʼonil jlu qiʼj tuʼn tchewix qanmi ex tuʼn kukx tten qipumal.

19. ¿Tzeʼn jaku tzʼajbʼen qximbʼetz quʼn aj qximen tiʼj ambʼil tuʼn kyjaw anqʼin kyimni? (Qʼonka twitza tiʼj recuadro « ¿Alkyeqe xjel taja tuʼn t-xi tqanina kye?»).

¹⁹ Bʼaʼn tuʼn qximen tiʼjju kbʼajel toj ambʼil tzul. O tzaj tqʼoʼn Jehová ambʼil qe tuʼn qximen tiʼj qa ya atoʼ toj akʼaj twitz Txʼotxʼ. Tqʼama jun ermana jlu: «In nel npaʼne ambʼil tuʼn nximane tiʼj qa ya atine toj akʼaj twitz Txʼotxʼ ex in kubʼ nximane qa ya in chin sqone tkʼokʼjal bʼech toj Paraíso». Qo ximen tiʼj tzeʼn kʼokel ambʼil aj tok qojtzqiʼn qe tmajen Jehová te ambʼil ojtxe. ¿Alkye taja tuʼn tok tojtzqiʼna? ¿Tiʼ jaku txi tqanina te? Ex qo ximen tiʼj tiʼ kbʼel qnaʼn aj tok qkeʼyin qe qfamiliar aj kyjaw anqʼin. Ximana tiʼj tiʼ kxel tqʼamaʼna kye tnejel, tzeʼn che tzajel tchleʼna ex tiʼjju tzalajbʼil kbʼel tnaʼna aj kyok tkeʼyina.

20. ¿Tiʼ il tiʼj tuʼn kukx tbʼant quʼn?

²⁰ In xi qqʼoʼn nim chjonte te Jehová tuʼnju in tzaj ttziyen qa che kjawil anqʼin kyimni. Ex in nok qeʼ qkʼuʼj tiʼj tuʼnju taj tuʼn tjapun twi tyol ex at tpoder tuʼn tbʼant tuʼn. In nok jlu ik tzeʼn in tzaj tqʼamaʼn Jehová qe: «Che kjawil anqʼin qe xjal kʼujlaʼn tuʼna». Tzʼok tilil quʼn tuʼn tchʼiy qʼuqbʼil qkʼuʼj tiʼj qa ax tok che kjawil anqʼin kyimni. Qa ma bʼant jlu quʼn, kʼonil qiʼj tuʼn qok laqʼeʼ mas ttxlaj Jehová aju o tzaj qʼamante tbʼanel promesa lu qe.