XNAQʼTZBʼIL 15
¿Tiʼ xnaqʼtzbʼil jaku tzʼel qiʼn kyiʼj milagro bʼant tuʼn Jesús?
«Bʼaʼn kyuʼne tzaʼn tten o bʼet Jesús in tbʼinchaʼn bʼaʼn» (HECH. 10:38).
BʼITZ 13 A Jesús techel qwitz
AJU KʼELEL QNIKʼ TIʼJ a
1. ¿Toj alkye ambʼil bʼant tnejel milagro tuʼn Jesús?
QO XIMEN chʼin tiʼjju bʼaj toj abʼqʼi 29. Toj ambʼil aju xi tzyet tuʼn tpakbʼan Jesús. Ax ikx, i eʼx tukʼil ttxuʼ ex junjuntl t-xnaqʼtzbʼen toj jun mejebʼleʼn atz Caná, jun tnam tok jawni tiʼj tnam Nazaret jatumel jaw chʼiy. Tamiw María qe kyfamilia novio ex parece que in nonintoq kyiʼj xjal otoq che pon toj mejebʼleʼn. Pero kubʼaj vino ex mintiʼtoq ayon lu kyuʼn. b Tuʼn jlu, jakutoq kubʼ kychʼixwi qeju otoq che kubʼ mojeʼ ex qe kyfamilia. Bʼalo mas nim xjal e pon twitzju in che ayontoq tiʼj. Tuʼntzunju, jun rat xiʼ María tukʼil tal ex xi tqʼamaʼn jlu te: «Mintiʼtl kyvin xjal» (Juan 2:1-3). ¿Tiʼtzun bʼant tuʼn Jesús? Bʼant jun tiʼ tbʼanel tuʼn, ok tqʼoʼn aʼ te tbʼanel vino (Juan 2:9, 10).
2, 3. a) ¿Tzeʼn ajbʼen tipumal Jesús tuʼn? b) ¿Tiquʼn tbʼanel tuʼn qxnaqʼtzan kyiʼj milagro bʼant tuʼn Jesús?
2 E bʼant mas milagro tuʼn Jesús tej tpakbʼan. c Ajbʼen tipumal tuʼn tuʼn tonin kyiʼj nim xjal. Jun techel, jun maj xi tqʼoʼn kywa 5,000 xinaq moqa ichin. Atzun toj juntl maj, xi tqʼoʼn kywa 4,000. Tej kybʼant kabʼe milagro lu tuʼn Jesús, bʼalo xi tqʼoʼn kywa junlo 27,000 xjal tuʼnju ax ikx e ten xuʼj ex qe kʼwal toj ambʼil aju (Mat. 14:15-21; 15:32-38). Kyojx ambʼil lu, ax ikx kubʼ tqʼanin Jesús qe xjal yabʼ (Mat. 14:14; 15:30, 31). Jaku txi qqʼamaʼn qa e jaw labʼin xjal tej t-xi tqʼoʼn Jesús kywa nim xjal ex tej tkubʼ tqʼanin qe yabʼ.
3 Jaku tzʼel qiʼn nim xnaqʼtzbʼil kyiʼj milagro bʼant tuʼn Jesús. Toj xnaqʼtzbʼil lu, kʼelel qnikʼ kyiʼj junjun xnaqʼtzbʼil jaku che onin qiʼj tuʼn tchʼiy qʼuqbʼil qkʼuʼj. Ax ikx, kʼelel qnikʼ tiʼj tzeʼn jaku tzʼel qkanoʼn tiʼj Jesús tej tkubʼ tin tibʼ ex tej ttzaj qʼaqʼin tkʼuʼj kyiʼj xjal tej kybʼant milagro tuʼn.
AJU XNAQʼTZBʼIL IN TZAJ TQʼOʼN QE TIʼJ JEHOVÁ EX TIʼJ JESÚS
4. ¿Alqiʼj jaku tzʼel qiʼn xnaqʼtzbʼil aj qxnaqʼtzan kyiʼj milagro bʼant tuʼn Jesús?
4 Nya oʼkx in nel qiʼn nim xnaqʼtzbʼil tiʼj Jesús tej kybʼant milagro tuʼn, sino ax ikx in nel qiʼn xnaqʼtzbʼil tiʼj Jehová. ¿Tiquʼn? Tuʼnju a Jehová tzaj qʼonte tipumal tuʼn kybʼant milagro tuʼn. In tzaj tqʼamaʼn Hechos 10:38 jlu tiʼj Jesús: «Bʼaʼn kyuʼne tzaʼn tten tzaj tqʼoʼn Dios tipumal Jesús aj Nazaret, ex o noj tuʼn Xewbʼaj Xjan tuʼn tkʼmonte toklen, ex bʼaʼn kyuʼne tzaʼn tten o bʼet Jesús in tbʼinchaʼn bʼaʼn, ex kykyaqil qeju in che yajlanjtz tuʼn tajaw il e bʼanix tuʼn Jesús, porke attoq Dios tukʼil». Ik tzeʼn ojtzqiʼn quʼn, el tkanoʼn Jesús toj jun tten tzʼaqli qe t-ximbʼetz Jehová ex aju kubʼ tnaʼn. El nikʼbʼaj tiʼj jlu tuʼn tkyaqilju tqʼama ex bʼant tuʼn ik tzeʼn qe milagro (Juan 14:9). Qo yolin kyiʼj oxe xnaqʼtzbʼil jaku tzʼel qiʼn kyiʼj milagro bʼant tuʼn Jesús ex che onil qiʼj tuʼn tchʼiy qʼuqbʼil qkʼuʼj.
5. ¿Tiʼ onin tiʼj Jesús tuʼn kybʼant milagro tuʼn? (Mateo 20:30-34).
5 Tnejel, kʼujlaʼnxix qoʼ tuʼn Jesús ex tuʼn Jehová. Tej tten Jesús tzalu twitz Txʼotxʼ, kubʼ tyekʼin qa kʼujlaʼn qe xjal tuʼn tej kybʼant milagro tuʼn tuʼntzun ya miʼn kybʼisun. Jun maj, xi kyqanin kabʼe moẍ onbʼil te Jesús tuʼn tkyaqil tqʼajqʼajel kywiʼ (kjawil uʼjit Mateo 20:30-34). In tzaj tyekʼin txʼolbʼabʼil lu qa tzaj «qʼaqʼan tkʼuʼj Jesús kyiʼj» ex yajxitl, kubʼ tqʼanin kywitz. Aju yol griego ajbʼen tuʼn t-xi qʼamet tzaj «qʼaqʼan tkʼuʼj kyiʼj», atz in yolin tiʼj bʼis jaku kubʼ tnaʼn jun xjal toj tanmi. Tej ttzaj qʼaqʼin tkʼuʼj Jesús kyiʼj xjal, kubʼ tyekʼin qa kʼujlaʼn qe tuʼn ex onin jlu tiʼj tuʼn t-xi tqʼoʼn kywa ex kubʼ tqʼanin jun xjal attoq lepra tiʼj (Mat. 15:32; Mar. 1:41). Tuʼntzunju, qʼuqli qkʼuʼj tiʼj qa kʼujlaʼn qoʼ tuʼn Jehová tuʼnju «in qʼaqʼan tkʼuʼj qiʼj». Ax ikx, kʼujlaʼn qo tuʼn Jesús ex in tzaj kybʼis aj qikʼ toj nya bʼaʼn (Luc. 1:78; 1 Ped. 5:7). Kyaj tuʼn tpon ambʼil tuʼn tkubʼ kynajsaʼn tkyaqil nya bʼaʼn in qo ok weʼ twitz.
6. ¿Tiʼ o txi tqʼoʼn Jehová te Jesús?
6 Tkabʼin, o txi tqʼoʼn Jehová tipumal Jesús tuʼn tel tiʼn tkyaqil nya bʼaʼn in tzaj kyiʼj xjal. Ateʼ junjun nya bʼaʼn mlayx bʼant jun tiʼ quʼn kyiʼj. Pero tej kybʼant milagro tuʼn Jesús, kubʼ tyekʼin qa jaku tzʼel tiʼn tkyaqil nya bʼaʼn. Jun techel, at tipumal tuʼn tel tiʼn il o tzʼel qiqen ex tkyaqilju in tzaj tuʼn ik tzeʼn qe yabʼil ex kyimen (Mat. 9:1-6; Rom. 5:12, 18, 19). Tuʼnju e bʼant qe milagro tuʼn Jesús, kubʼ tyekʼin qa jaku tzʼel tiʼn alkyexku yabʼil kyiʼj xjal, axpe ikx jaku che jaw anqʼin kyimni tuʼn (Mat. 4:23; Juan 11:43, 44). Ax ikx, at tipumal tuʼn tweʼ kyqʼiqʼ jbʼal tuʼn ex tuʼn tkubʼ kyiʼj demonio (Mar. 4:37-39; Luc. 8:2). In chewix qanmi tuʼnju o txi tqʼoʼn Jehová tipumal Tkʼwal tuʼn tel tiʼn tkyaqil nya bʼaʼn.
7, 8. a) ¿Tiʼ jaku tzʼok qeʼ qkʼuʼj tiʼj noq kyuʼn milagro bʼant tuʼn Jesús? b) ¿Alkye milagro taja tuʼn tbʼant tuʼn Jesús?
7 Toxin, qʼuqli qkʼuʼj tiʼj qa ax tok tzul qkʼamoʼn qe kʼiwlabʼil tjaqʼ Tkawbʼil Dios. Tej kybʼant milagro tuʼn Jesús, noq jun yekʼbʼil jlu tiʼj tkyaqilju kbʼantel tuʼn twitz tkyaqil Txʼotxʼ toj ambʼil tzul aj tkawin toj Tkawbʼil Dios. Noqpe qo ximen tiʼj tzeʼn kʼokel qanqʼibʼil toj ambʼil aju. Qkyaqilx ktel jun tbʼanel qanqʼibʼil tuʼnju kʼelel tiʼn Jesús tkyaqil nya bʼaʼn in tzaj qiʼj ik tzeʼn qe yabʼil (Is. 33:24; 35:5, 6; Apoc. 21:3, 4). Ya miʼn ten waʼyij ex mlay tzaj nya bʼaʼn qiʼj tuʼn jun xitbʼil tuʼnx twitz txʼotxʼ (Is. 25:6; Mar. 4:41). Kbʼel qnaʼn nim tzalajbʼil aj kyjaw anqʼin qe toj qja o che kyim (Juan 5:28, 29). Aj t-ximen teya tiʼj qanqʼibʼil ktel toj akʼaj twitz Txʼotxʼ, ¿alkye milagro taja tuʼn tbʼant tuʼn Jesús?
8 Tej kybʼant milagro tuʼn Jesús, kubʼ tyekʼin kabʼe qmod il tiʼj tuʼn tten. ¿Alkyeqe? Aju tuʼn tkubʼ qin qibʼ ex tuʼn ttzaj qʼaqʼin qkʼuʼj. Qo xnaqʼtzan kyiʼj kabʼe txʼolbʼabʼil jatumel in tzaj tyekʼin jlu. Qo yolin tnejel tiʼj mejebʼleʼn bʼaj Caná.
IN TZAJ T-XNAQʼTZAʼN QE QA BʼAʼN TUʼN TKUBʼ QIN QIBʼ
9. ¿Tiquʼn bʼant jun milagro tuʼn Jesús toj mejebʼleʼn atz Caná? (Juan 2:6-10).
9 (Kjawil uʼjit Juan 2:6-10). Tej tkubʼaj vino toj mejebʼleʼn, ¿ilpe tiʼj tuʼn tbʼant jun tiʼ tuʼn Jesús? Nya. Mintiʼtoq in tzaj tqʼamaʼn jun profecía qa iltoq tiʼj tuʼn tbʼant vino tuʼn jun milagro tuʼn Mesías. Pero ximana tiʼj tiʼ jaku kubʼ tnaʼna noqwit bʼaj jlu toj tmejebʼleʼna. Bʼalo ximen Jesús tiʼj kychʼixwi familia jakutoq kubʼ, mas qeju novio. Tuʼntzunju, tzaj qʼaqʼin tkʼuʼj kyiʼj, onin kyiʼj ex bʼant jun milagro tuʼn ik tzeʼn ma txi qqʼamaʼn toj tnejel párrafo. Ok junlo 390 litro moqa 103 galón aʼ tuʼn te tbʼanel vino. ¿Tiquʼn bʼant nim vino tuʼn? Bʼalo ximen tiʼj qa jaku tzʼajbʼen toj juntl maj aju kyaj sobrarin moqa jaku txi kʼayit tuʼntzun tonin kyiʼj qeju tzmatoq in che kubʼ mojeʼ. ¡Xilo kyqʼoʼn novio nim chjonte tej tbʼant jlu tuʼn Jesús!
Qkanoʼmil tiʼj Jesús ex miʼn jaw qnimsan qibʼ tiʼjju in bʼant quʼn. (Qʼonka twitza tiʼj párrafo 10 ex 11). e
10. Qʼamantza junjun tqanil tiʼj milagro bʼant tuʼn Jesús, aju in tzaj qʼamaʼn toj capítulo 2 te Juan. (Ax ikx qʼonka twitza tiʼj dibujo).
10 Qo xnaqʼtzan kyiʼj junjun tqanil nim kyoklen tiʼj txʼolbʼabʼil in kanet quʼn toj Juan capítulo 2. ¿Mape tzʼok tbʼiʼna alkye kux nojsante qe tkubʼil vino? Nya a Jesús. Nyatoq taj tuʼn tok bʼaj kywitz xjal tiʼj, tuʼntzunju, xi tqʼamaʼn kye majen tuʼn tkux kynojsaʼn (versículo 6 ex 7). Ex tej tbʼant milagro tuʼn, ¿alkye xi qʼonte te xjal encargado tiʼj mejebʼleʼn tuʼntzun t-xi tprobarin? Ax ikx, nya a Jesús. Xi tqʼamaʼn kye majen tuʼntzun t-xi kyiʼn chʼin vino te encargado (versículo 8). Ex mintiʼ jaw tiʼn Jesús jun copa vino kywitz xjal otoq che pon toj mejebʼleʼn tuʼntzun t-xi tqʼamaʼn jlu: «¡Kyprobarinxe vino lu, puro tbʼanel ma bʼant wuʼne!».
11. ¿Tiʼ xnaqʼtzbʼil jaku tzʼel qiʼn tiʼj milagro bʼant tuʼn Jesús?
11 ¿Tiʼ xnaqʼtzbʼil jaku tzʼel qiʼn tiʼj milagro bʼant tuʼn Jesús? In tzaj tyekʼin qe qa nim toklen tuʼn tkubʼ qin qibʼ. Mintiʼ jaw tnimsan tibʼ Jesús tej tok aʼ te vino tuʼn. Mlayxtoq jaw tnimsan tibʼ tiʼjju in bʼanttoq tuʼn, sino kubʼ tin tibʼ toj tkyaqil ambʼil ex jaw tnimsaʼn Jehová tiʼj tkyaqilju xi tbʼinchaʼn (Juan 5:19, 30; 8:28). Qa ma tzʼel qkanoʼn tiʼj Jesús, kbʼel qin qibʼ ex mlay jaw qnimsan qibʼ tiʼj alkyexku aqʼuntl in bʼant quʼn toj ttnam Jehová. Sino kʼokel tilil quʼn tuʼn tjaw qnimsaʼn Jehová tuʼnju in tzaj tqʼoʼn qoklen tuʼn qajbʼen te (Jer. 9:23, 24). Ikju, qnimsanktz Jehová tiʼj tkyaqilju in bʼant quʼn tuʼnju oʼkx te in nonin qiʼj tuʼn tbʼant jun tiʼ quʼn (1 Cor. 1:26-31).
12. ¿Alkye juntl tumel jaku tzʼel qkanoʼn tiʼj Jesús tej tkubʼ tin tibʼ? Qʼamantza jun techel.
12 Qo ximen tiʼj alkye juntl tten jaku tzʼel qkanoʼn tiʼj Jesús tej tkubʼ tin tibʼ. Jun techel, in nel tpaʼn jun ansyan nim ambʼil tuʼn tonin tiʼj jun siervo ministerial tuʼn tbʼaj tbʼinchaʼn tten tiʼj tnejel tchikʼbʼabʼil. Tuʼn jlu, in nex tqʼoʼn erman jun tbʼanel chikʼbʼabʼil ex in che tzalaj erman tiʼj. Ajtzun tbʼaj chmabʼil, in xi tqʼamaʼn jun erman te ansyan: «¿Verdad que puro tbʼanel chikʼbʼabʼil ma tzʼex tqʼoʼn erman?». ¿Jakupe kubʼ t-ximana qa kxel tqʼamaʼn ansyan jlu?: «Ikju, es que aʼyine ma chin onin tiʼj». Moqa kbʼel tin tibʼ ansyan ex oʼkx kxel tqʼamaʼn jlu: «Ikju, puro tbʼanel ma tzʼok tuʼn». Qa in kubʼ tin tibʼ jun xjal, mlay tzʼok tilil tuʼn tuʼn tjaw nimsaʼn kyuʼn txqantl aj tonin kyiʼj. Sino kʼelel tnikʼ tiʼj qa a Jehová in keʼyin tiʼjju in bʼant tuʼn ex in nok tqʼoʼn toklen taqʼun (mojbʼankuya tukʼil Mateo 6:2-4; Heb. 13:16). Nimxix in tzalaj Jehová qiʼj aj tok tkeʼyin qa qaj tuʼn tkubʼ qin qibʼ ik tzeʼn bʼant tuʼn Jesús (1 Ped. 5:6).
IN TZAJ T-XNAQʼTZAʼN QE QA BʼAʼN TUʼN TTZAJ QʼAQʼIN QKʼUʼJ
13. ¿Tiʼ ok tkeʼyin Jesús tej tpon kanin nqayin tiʼj tnam Naín ex tiʼ bʼant tuʼn? (Lucas 7:11-15).
13 (Kjawil uʼjit Lucas 7:11-15). Tej tpon mij ambʼil tuʼn tpakbʼan Jesús, xiʼ toj tnam Naín. Nya najchaq tok tnam lu tiʼj tnam Sunem jatumel otoq tzikʼ junlo 900 abʼqʼi tjawlen itzʼj tal jun xuʼj tuʼn Eliseo (2 Rey. 4:32-37). Tej chʼixtoq tpon kanin Jesús ttzi tnam aju, in bʼettoq kyxiʼ xjal toj jun muqbʼil. Bʼisbʼajil ambʼil lu tuʼnju in bʼisun jun xuʼj viud otoq kyim oʼkxku jun tal. Pero nyatoq tjunalx xuʼj at tuʼnju in bʼettoq kyxiʼ mas xjal tukʼil. Xitzun tqʼamaʼn Jesús kye xjal tuʼn kyweʼ tuʼntzun tonin tiʼj xuʼj. ¿Tiʼ bʼant tuʼn? Jaw anqʼin tal xuʼj tuʼn. E jaw anqʼin oxe xjal tuʼn Jesús ex atzun jlu tnejel in che yolin Evangelio tiʼj.
Qkanoʼmil tiʼj Jesús ex bʼaʼn tuʼn tkubʼ qyekʼin qʼaqʼbʼil qkʼuʼj kyiʼj qeju o kyim jun toj kyja. (Qʼonka twitza kyiʼj párrafo 14 a 16).
14. Qʼamantza junjun tbʼanel tqanil tiʼj txʼolbʼabʼil tkuʼx toj Lucas capítulo 7. (Ax ikx qʼonka twitza tiʼj dibujo).
14 Qo xnaqʼtzan kyiʼj junjun tbʼanel tqanil in kanet quʼn toj txʼolbʼabʼil te Lucas capítulo 7. ¿Mape tzʼok tbʼiʼna tiʼ bʼant tuʼn Jesús tnejel? Tnejel, ok tqʼoʼn twitz tiʼj xuʼj ex yajxitl «tzaj qʼaqʼan tkʼuʼj tiʼj» (versículo 13). Bʼalo ok tkeʼyin Jesús qa in noqʼ txubʼaj akux nejni twitz tal otoq kyim. Kux choʼn toj tanmi tej tok tkeʼyin qa in bʼisun txubʼaj. Nya oʼkx kubʼ tnaʼn Jesús qa tzaj qʼaqʼin tkʼuʼj tiʼj xuʼj, sino kubʼ tyekʼin tukʼil tbʼinchbʼen. Bʼalo xi tqʼamaʼn jlu t-xe tẍkyin xuʼj: «Ya miʼn tzʼoqʼa». Ex nya oʼkx yolin tukʼil xuʼj, sino jaw anqʼin tal tuʼn ex xi tqʼamaʼn jlu te: «Lu tala lu» (versículo 14 ex 15).
15. ¿Tiʼ xnaqʼtzbʼil in tzaj tqʼoʼn qe aju milagro bʼant tuʼn Jesús?
15 ¿Tiʼ xnaqʼtzbʼil jaku tzʼel qiʼn tiʼj milagro bʼant tuʼn Jesús? In tzaj tyekʼin jlu qe tzeʼn jaku kubʼ qyekʼin qʼaqʼbʼil qkʼuʼj kyiʼj qeju in che ikʼ toj bʼis. Mlay che jaw anqʼin kyimni quʼn ik tzeʼn bʼant tuʼn Jesús tej tjaw anqʼin tal xuʼj viud tuʼn. Pero jaku t-xi qxnaqʼtzan qibʼ tuʼn ttzaj qʼaqʼin qkʼuʼj kyiʼj qeju o kyim jun toj kyja. Tnejel, bʼaʼn tok qqʼoʼn qwitz tiʼjju in bʼaj kyiʼj ex yajxitl, bʼaʼn tuʼn qjyon tumel tzeʼn tuʼn qonin kyiʼj tuʼntzun tchewix kyanmi (Prov. 17:17; 2 Cor. 1:3, 4; 1 Ped. 3:8). d Qa ma txi qqʼamaʼn jun tbʼanel qyol ex qa ma qo onin kyiʼj qeju o kyim jun toj kyja, nim jaku tzʼonin kyiʼj.
16. ¿Tiʼ in tzaj t-xnaqʼtzaʼn qe aju bʼant tuʼn jun ermana tukʼil jun txubʼaj? (Qʼonka twitza tiʼj foto jatumel in tzaj tyekʼin aju bʼant tuʼn ermana tukʼil txubʼaj).
16 Ma tzikʼ nim abʼqʼi tbʼajlen jun tiʼ toj jun chmabʼil. Akux in che bʼitzin kykyaqilx tiʼj bʼitz in yolin tiʼjju tuʼn kyjaw anqʼin kyimni, ok tkeʼyin jun ermana qa in noqʼ juntl ermana. In noqʼtoq tuʼnju tzmatoq in nikʼ chʼin ambʼil tkyimlen jun tal. Tuʼnju ojtzqiʼntoq tuʼn ermana aju in bʼajtoq tiʼj txubʼaj, jun rat xi laqʼeʼ ttxlaj, tzaj tchleʼn ex junx xi kybʼitzin bʼitz. Tuʼn jlu, kubʼ tnaʼn txubʼaj qa kʼujlaʼntoq kyuʼn erman ex jaw tzalaj tuʼnju ten toj chmabʼil aju. Tqʼama txubʼaj jlu: «Ojtzqiʼntoq wuʼne qa tzultoq qʼoʼn onbʼil weye toj Ja te Chmabʼil». Qʼuqli qkʼuʼj tiʼj qa in nok tqʼoʼn Jehová toklen aqʼuntl in bʼant quʼn tuʼn tkubʼ qyekʼin qʼaqʼbʼil qkʼuʼj maske nya nim kyoklen toj qwitz ex aj qonin kyiʼj qeju «mintiʼtl jatum tuʼn tok qeʼ kykʼuʼj» (Sal. 34:18).
TBʼANEL QA MA QO XNAQʼTZAN KYIʼJ MILAGRO
17. ¿Tiʼ ma tzʼel qnikʼ tiʼj toj xnaqʼtzbʼil lu?
17 Aj qxnaqʼtzan kyiʼj milagro bʼant tuʼn Jesús, jaku che onin qiʼj tuʼn tchʼiy qʼuqbʼil qkʼuʼj. Qa ma jaw quʼjin qe txʼolbʼabʼil in che tzaj qʼamaʼn kyoj Evangelio, kʼelel qnikʼ tiʼj qa kʼujlaʼnxix qoʼ tuʼn Jehová ex Jesús. Ax ikx, in tzaj kyyekʼin qe qa at tipumal Jesús tuʼn tel tiʼn tkyaqil nya bʼaʼn in tzaj kyiʼj xjal. Qʼuqli qkʼuʼj tiʼj qa ax tok tzul qkʼamoʼn qe kʼiwlabʼil tjaqʼ Tkawbʼil Jesús toj chʼintl ambʼil. Ex jaku che ajbʼen txʼolbʼabʼil lu quʼn tuʼn qximen tiʼj tzeʼn jaku tzʼel qkanoʼn qe tbʼanel tmod Jesús. Tuʼntzunju, tbʼanel qa ma tzʼel qpaʼn ambʼil tuʼn qxnaqʼtzan kyiʼj junjuntl milagro bʼant tuʼn Jesús aj qkʼulin te Jehová kyukʼil toj qja moqa aj qxnaqʼtzan qjunalx. Qo ximen tiʼj tiʼ xnaqʼtzbʼil jaku tzʼel qiʼn kyiʼj ex qo yolin kyiʼj kyukʼil txqantl. Qa ma bʼant jlu quʼn, jaku qo yolin kyiʼj tbʼanel tiʼchaq kyukʼil erman (Rom. 1:11, 12).
18. ¿Tiʼ kʼelel qnikʼ tiʼj toj juntl xnaqʼtzbʼil?
18 Tej chʼixtoq tkubʼaj ambʼil tuʼn tpakbʼan Jesús, jaw anqʼin toxin xjal tuʼn, aqeju in che yolin Evangelio tiʼj. Pero junxitl ok jlu kywitz txqantl. ¿Tiquʼn? Tuʼnju jaw anqʼin jun tamiw tuʼn ex otoq tzikʼ kyaje qʼij tkyimlen. ¿Tiʼ xnaqʼtzbʼil jaku tzʼel qiʼn tiʼj milagro lu? ¿Ex tiʼ jaku bʼant quʼn tuʼn tchʼiy qʼuqbʼil qkʼuʼj tiʼjju tuʼn kyjaw anqʼin kyimni? Atzun jlu kʼelel qnikʼ tiʼj toj juntl xnaqʼtzbʼil.
BʼITZ 20 Tzaj tqʼoʼna oʼkxku jun Tkʼwaʼla
a Weʼ jun kyqʼiqʼ jbʼal tuʼn Jesús, kubʼ tqʼanin qe yabʼ ex jaw anqʼin qe kyimni tuʼn. Jaku txi qqʼamaʼn qa in qo tzalaj aj kyjaw quʼjin qe milagro bʼant tuʼn Jesús. Mintiʼ e kyaj tzʼibʼin toj Biblia noq tuʼn tex qqʼij, sino e kyaj tzʼibʼin tuʼntzun tel qiʼn xnaqʼtzbʼil kyiʼj. Toj xnaqʼtzbʼil lu, qo yolil kyiʼj junjun milagro bʼant tuʼn Jesús. Ex tuʼn jlu kʼelel qnikʼ tiʼj junjun xnaqʼtzbʼil tiʼj Jehová ex tiʼj Jesús, ex jaku tzʼonin qiʼj tuʼn tchʼiy qʼuqbʼil qkʼuʼj. Ax ikx, kʼelel qnikʼ kyiʼj junjun qmod bʼaʼn tuʼn tten.
b Tqʼama jun xjal in jyon tqanil tiʼj Biblia jlu: «Nimtoq toklen toj kywitz xjal te Oriente tuʼn t-xi kyqʼoʼn aju mas tbʼanel kye xjal in che pon visitaril kye ex nya oʼkx tuʼn t-xi kyqʼoʼn junjun tiʼchaq. Qa kyaj tuʼn t-xi kyqʼoʼn aju mas tbʼanel, mas qa toj jun mejebʼleʼn, kyajtoq tuʼn t-xi kyqʼoʼn nim tiʼchaq kye xjal».
c In che yolin Evangelio tiʼj mas te 30 milagro bʼant tuʼn Jesús. Ax ikx, toj junjuntl maj e bʼant nim milagro tuʼn toj junx ambʼil. Jun techel, e pon kykyaqil xjal te jun tnam tukʼil Jesús ex «nimku xjal yabʼ e bʼant tuʼn» (Mar. 1:32-34).
d Kkanetel junjun nabʼil tuʼna tiʼjju jaku txi tqʼamaʼna moqa tiʼjju jaku bʼant tuʼna tuʼn t-xi tqʼuqbʼaʼna kykʼuʼj qeju o kyim jun toj kyja toj xnaqʼtzbʼil tok tbʼi: «Jesús supo consolar a sus amigos», aju etz toj La Atalaya te 1 te noviembre te 2010.
e TQANIL TIʼJ FOTO: Akux in che tzalaj qeju otoq che kubʼ mojeʼ tiʼj vino ex qeju xjal otoq che pon toj mejebʼleʼn, in keʼyin Jesús tiʼj tkyaqil ex mintiʼ in xi tqʼamaʼn qa tuʼn otoq bʼant vino.
