XNAQʼTZBʼIL 19
¿Tzeʼn jaku chʼiy qʼuqbʼil qkʼuʼj tiʼj akʼaj twitz Txʼotxʼ?
«Qa ma tma [Jehová] jun tiʼxti tuʼn tbʼant tuʼn, in bʼant tuʼn» (NÚM. 23:19).
Bʼitz 142 Qeʼk qkʼuʼj tiʼj oyaj
AJU KʼELEL QNIKʼ TIʼJ a
1, 2. Akux in qo ayon tuʼn tul akʼaj twitz Txʼotxʼ, ¿tiʼ il tiʼj tuʼn tbʼant quʼn?
IN KUBʼ qnaʼn nimxix tzalajbʼil tuʼnju o tzaj ttziyen Jehová qa kbʼel tchʼexpuʼn twitz Txʼotxʼ lu tukʼil jun akʼaj (2 Ped. 3:13). Mintiʼ ojtzqiʼn quʼn jtoj tzul akʼaj twitz Txʼotxʼ, pero aju in bʼaj qtxlaj in tzaj tyekʼin qe qa chʼix tjapun twi tziybʼil lu (Mat. 24:32-34, 36; Hech. 1:7).
2 Noq jteʼxku ambʼil qʼiʼn quʼn toj qajbʼebʼil te Jehová, qkyaqilx bʼaʼn tuʼn tok tilil quʼn tuʼn tchʼiy qʼuqbʼil qkʼuʼj tiʼj akʼaj twitz Txʼotxʼ. ¿Tiquʼn? Tuʼnju jaku naj qʼuqbʼil qkʼuʼj. Qa mintiʼ qʼuqbʼil qkʼuʼj, tqʼama apóstol Pablo qa in nok jlu ik tzeʼn «il tok qiʼjele» (Heb. 12:1). Tuʼn miʼn tbʼaj jlu qiʼj, tbʼanel qa kukx ma qo xnaqʼtzan kyiʼj yekʼbʼil in tzaj tqʼoʼn Jehová qa tzul tiʼn akʼaj twitz Txʼotxʼ toj chʼintl ambʼil (Heb. 11:1).
3. ¿Tiʼ kʼelel qnikʼ tiʼj toj xnaqʼtzbʼil lu?
3 Toj xnaqʼtzbʼil lu, kʼelel qnikʼ tiʼj oxe tiʼ jaku tzʼonin qiʼj tuʼn tchʼiy qʼuqbʼil qkʼuʼj tiʼj akʼaj twitz Txʼotxʼ. Tnejel, tuʼn qximen tiʼj chojbʼil, tkabʼin, tuʼn qximen tiʼj tipumal Jehová ex toxin, tuʼn tok qqʼoʼn qwiʼ tiʼj qajbʼebʼil te. Yajxitl, qo xnaqʼtzal kyiʼj qe yol tzaj tqʼamaʼn Jehová te Habacuc aqeju jaku che onin qiʼj tuʼn tchʼiy qʼuqbʼil qkʼuʼj. Pero tnejel qo xnaqʼtzan tiʼj tiquʼn il tiʼj tuʼn tchʼiy qʼuqbʼil qkʼuʼj tiʼjju tziybʼil te akʼaj twitz Txʼotxʼ.
¿TIQUʼN IL TIʼJ TUʼN TTEN JUN TBʼANEL QʼUQBʼIL QKʼUʼJ?
4. ¿Toj alkye ambʼil il tiʼj tuʼn tten jun tbʼanel qʼuqbʼil qkʼuʼj tuʼntzun tjaw qskʼoʼn aju mas tbʼanel?
4 Tkyaqil qʼij in bʼaj qximen tiʼ il tiʼj tuʼn tbʼant quʼn, tuʼntzunju, il tiʼj tuʼn tten jun tbʼanel qʼuqbʼil qkʼuʼj. Jun techel, in kubʼ qximen alkyeqe qamiw che tel, tiʼ kbʼantel quʼn tuʼn qtzalaj jun rat, tiʼ qo xnaqʼtzal tiʼj, tiʼ kbʼantel quʼn toj qmejebʼleʼn, qe kʼwal ex aju aqʼuntl. Tuʼntzunju, bʼaʼn tuʼn tkubʼ qxjelin jlu: «¿Tiʼ in kubʼ nyekʼine tukʼilju in bʼant wuʼne? ¿In kubʼpe nyekʼine tukʼil nbʼinchbʼene qa qʼuqli nkʼuʼje tiʼj qa chʼix tkubʼ najsaʼn tkyaqilju nya bʼaʼn at twitz Txʼotxʼ ex qa chʼix tul Tbʼanel Najbʼil? ¿Moqa in kubʼ nximane qa oʼkx qanqʼibʼil jlu at ik tzeʼn in bʼant kyuʼn xjal?» (Mat. 6:19, 20; Luc. 12:16-21). Qa ma tzʼok tilil quʼn tuʼn qximen tiʼj qa chʼix tul akʼaj twitz Txʼotxʼ, kjawil qjyoʼn aju mas bʼaʼn.
5, 6. ¿Tiquʼn il tiʼj tuʼn tten jun tbʼanel qʼuqbʼil qkʼuʼj aj qok weʼ twitz jun nya bʼaʼn? Qʼonkuya jun techel.
5 Ax ikx, il tiʼj tuʼn tten jun tbʼanel qʼuqbʼil qkʼuʼj aj qok weʼ kywitz junjuntl nya bʼaʼn. Jun techel, jaku qo ok weʼ twitz ikʼbʼil, twitz yabʼil moqa kywitz tiʼchaq jaku chewix qʼuqbʼil qkʼuʼj kyuʼn. Tnejel, jakulo ten nim qipumal, pero qa ma txi tiʼn nim ambʼil, il tiʼj tuʼn tten jun tbʼanel qʼuqbʼil qkʼuʼj tuʼn kukx tikʼx quʼn ex tuʼn kukx qajbʼen te Jehová tukʼil tzalajbʼil (Rom. 12:12; 1 Ped. 1:6, 7).
6 Aj qok weʼ twitz jun nya bʼaʼn, jakulo kubʼ qnaʼn qa mlayx tzaj tiʼn Jehová akʼaj twitz Txʼotxʼ. Qa ma bʼaj jlu qiʼj, ¿ape t-xilen jlu qa noq chʼin qʼuqbʼil qkʼuʼj at? Nya. Qo ximen tiʼj jun techel. Qa otoq tzikʼ nim ambʼil jatumel at nim kyaq, jakulo kubʼ qximen qa mlayx tzʼetz jbʼal. Pero in pon jun ambʼil jatumel in netz. Chʼixme ax jlu jaku kubʼ qximen aj ttzaj bʼaj qkʼuʼj. Jakulo kubʼ qximen qa mlayx tzul akʼaj twitz Txʼotxʼ. Pero qa kyuw taʼ qokslabʼil, kʼokel qeʼ qkʼuʼj tiʼj qa che kjapunel twi tyol Jehová (Sal. 94:3, 14, 15; Heb. 6:17-19). Kʼonil jlu qiʼj tuʼn kukx tkubʼ qqʼoʼn qajbʼebʼil te Jehová tnejel toj qanqʼibʼil.
7. ¿Tiʼ kyximbʼetz xjal il tiʼj tuʼn tok qxqʼuqin qibʼ tiʼj?
7 Ax ikx, il tiʼj tuʼn tten jun tbʼanel qʼuqbʼil qkʼuʼj tuʼn qpakbʼan. Aj qyolin tiʼj Tbʼanel Najbʼil chʼix tul tiʼn Dios, nim xjal in kubʼ kyximen qa tbʼanel tqanil lu. Pero mintiʼ in nok qeʼ kykʼuʼj tiʼj qa kjapunel twiʼ (Mat. 24:14; Ezeq. 33:32). Tuʼn miʼn tten qximbʼetz ik tzeʼn kye, il tiʼj tuʼn tok tilil quʼn tuʼn kukx tchʼiy qʼuqbʼil qkʼuʼj. Qo xnaqʼtzan tiʼj oxe tiʼ jaku bʼant quʼn.
QO XIMEN TIʼJ CHOJBʼIL
8, 9. ¿Tzeʼn jaku chʼiy qʼuqbʼil qkʼuʼj aj qximen tiʼj chojbʼil?
8 Jun tten tuʼn tchʼiy qʼuqbʼil qkʼuʼj, aju qa ma qo ximen tiʼj chojbʼil. O tzaj tqʼoʼn Jehová chojbʼil tuʼn tel qnikʼ tiʼj qa kjapunel twi tkyaqil ttziybʼil. Tuʼntzunju, nim toklen tuʼn tel qpaʼn ambʼil tuʼn qximen tiʼjju bʼant tuʼn Jehová tuʼn ttzaj tqʼoʼn chojbʼil ex tiquʼn bʼant jlu tuʼn. Iktzun tten kchʼiyil qʼuqbʼil qkʼuʼj qa chʼix tul tiʼn Jehová jun tbʼanel najbʼil jatumel qo anqʼil te jumajx. ¿Tiquʼn in xi qqʼamaʼn jlu?
9 Qo ximen tiʼjju bʼant tuʼn Jehová tej ttzaj tqʼoʼn chojbʼil. Mintiʼ kubʼ t-xkʼayin tnejel Tkʼwal ex tbʼanel tamiw tuʼn ttzaj tsamaʼn tuʼn tul itzʼj tzalu twitz Txʼotxʼ ex tuʼn tok te jun xjal tzʼaqli. Tej tten Jesús tzalu twitz Txʼotxʼ, ikʼx nim nya bʼaʼn tuʼn ex kubʼ bʼyoʼn. Tuʼn jlu in nel qnikʼ tiʼj qa tzaj tqʼoʼn Jehová Tkʼwal tuʼn chjet qil tuʼntzun tonin qiʼj. Noqwit nya kʼujlaʼn qoʼ tuʼn Jehová, mintiʼwtlo xi tqʼoʼn ambʼil tuʼn tikʼx nya bʼaʼn tuʼn Tkʼwal noq tuʼn tten jun tbʼanel qanqʼibʼil toj chʼin ambʼil (Juan 3:16; 1 Ped. 1:18, 19). Tuʼnju tzaj tqʼoʼn Jehová Tkʼwal tuʼn chjet qil, kʼokel tilil tuʼn tuʼn qanqʼin te jumajx toj jun tbʼanel najbʼil.
QO XIMEN TIʼJ TIPUMAL JEHOVÁ
10. Ik tzeʼn in tzaj tqʼamaʼn Efesios 3:20, ¿tiʼ jaku bʼant tuʼn Jehová?
10 Juntl tten tuʼn tchʼiy qʼuqbʼil qkʼuʼj, aju tuʼn qximen tiʼj tpoder Jehová. At tpoder tuʼn tkubʼ tbʼinchaʼn tkyaqilju in tzaj ttziyen. Toj kywitz xjal, mlaylo japun twi tyol Jehová tuʼn qanqʼin te jumajx toj akʼaj twitz Txʼotxʼ toj ambʼil tzul. Pero chʼixme tkyaqil maj, in tzaj ttziyen Jehová junjun tiʼchaq ex jakulo kubʼ qximen qa mlayxlo japun kywiʼ. Oʼkx Jehová at tipumal tuʼn tbʼant tkyaqil tiʼchaq tuʼn (Job 42:2; Mar. 10:27). Tuʼntzunju, mintiʼ in qo jaw labʼin aj ttzaj ttziyen tiʼchaq tbʼanelxix qe (kjawil uʼjit Efesios 3:20).
11. Yolina kyiʼj junjun tbʼanel ttziybʼil Jehová. (Qʼonka twitza tiʼj recuadro « E japun kywi junjun promesa nim kyoklen tuʼn Jehová»).
11 Qo ximen kyiʼj junjun yol xi ttziyen Jehová kye tmajen toj ambʼil ojtxe ex jakutoq kubʼ kyximen qa mlay japun twiʼ. Jun techel, xi tqʼamaʼn Jehová te Abrahán ex te Sara qa tzul itzʼj jun kykʼwal maske otoq che tijen (Gén. 17:15-17). Ax ikx, xi ttziyen te Abrahán qa kxeltoq tqʼoʼn txʼotxʼ te Canaán kye tkʼwal. Tuʼnju e ten xjal te Israel nim ambʼil te majen toj tnam Egipto, kubʼlo kyximen qa mlay japun twi tyol Jehová. Pero mintiʼ bʼaj jlu. Nya oʼkxju, ax ikx xi ttziyen Jehová te Elisabet qa tzul itzʼj jun tal maske otoq tijen. Ex xi ttziyen te María qa tzul itzʼ jun tal maske naʼmxtoq tkubʼ ten tukʼil jun xjal. Iktzun tten, japun twi tyol Jehová ttzaj ttziyen toj jardín te Edén maske otoq tzikʼ nim mil abʼqʼi (Gén. 3:15).
12. ¿Tiʼ in tzaj tqʼamaʼn Josué 23:14 ex Isaías 55:10 ex 11 tiʼj tipumal Jehová?
12 Aj qximen tiʼj tkyaqil ttziybʼil Jehová ex alkye tten o japun twiʼ, in nel qnikʼ tiʼj qa at nimxix tipumal. Ex in nonin qiʼj tuʼn tok qeʼ qkʼuʼj tiʼj qa tzul tiʼn akʼaj twitz Txʼotxʼ (kjawil uʼjit Josué 23:14; Isaías 55:10, 11). Aj tbʼant jlu quʼn, mas jaku qo onin kyiʼj xjal tuʼn tel kynikʼ tiʼj qa nya jun witzikʼ akʼaj twitz Txʼotxʼ. Ex tzaj tqʼamaʼn Jehová jlu tiʼj akʼaj kyaʼj ex akʼaj txʼotxʼ: «Aqeju yol lu axix tok ex bʼaʼn tuʼn tqeʼ kykʼuʼje kyiʼj» (Apoc. 21:1, 5).
QQʼONK QWIʼ TIʼJ QAJBʼEBʼIL TE JEHOVÁ
QE CHMABʼIL
¿Tzeʼn in nonin jlu qiʼj tuʼn tchʼiy qʼuqbʼil qkʼuʼj? (Qʼonka twitza tiʼj párrafo 13).
13. ¿Tzeʼn in che onin chmabʼil qiʼj tuʼn tchʼiy qʼuqbʼil qkʼuʼj?
13 Aju toxin tumel tuʼn tchʼiy qʼuqbʼil qkʼuʼj, aju tuʼn tok qqʼoʼn qwiʼ tiʼj qajbʼebʼil te Jehová. Jun techel, qo ximen tiʼj alkye tten in che onin chmabʼil qiʼj. In tzaj tqʼamaʼn Anna jlu, jun ermana o tzʼajbʼen toj tkyaqil ambʼil te Jehová ex toj nimku abʼqʼi: b «In che ok chmabʼil ik tzeʼn jun tzyubʼil bark tuʼnju in nonin wiʼje tuʼn tchʼiy qʼuqbʼil nkʼuʼje. In nok tilil wuʼne tuʼn tel nnikʼe tiʼj jun xnaqʼtzbʼil maske nya jun tbʼanel aj xnaqʼtzal ermano in netz qʼonte chikʼbʼabʼil moqa mintiʼ in tzaj tqʼamaʼn jun akʼaj xnaqʼtzbʼil. Iktzun tten in nonin wiʼje tuʼn tchʼiy qʼuqbʼil nkʼuʼje». Ax ikx, in che ok qbʼiʼn tbʼanel comentario kyoj chmabʼil ex in che onin qiʼj tuʼn tchʼiy qʼuqbʼil qkʼuʼj (Rom. 1:11, 12; 10:17).
AJU PAKBʼABʼIL
¿Tzeʼn in nonin jlu qiʼj tuʼn tchʼiy qʼuqbʼil qkʼuʼj? (Qʼonka twitza tiʼj párrafo 14).
14. ¿Tzeʼn in nonin pakbʼabʼil qiʼj tuʼn tchʼiy qʼuqbʼil qkʼuʼj?
14 Ax ikx, in chʼiy qʼuqbʼil qkʼuʼj aj tok tilil quʼn tuʼn qxiʼ pakbʼal (Heb. 10:23). In tzaj tqʼamaʼn Barbara jlu, jun ermana o tzikʼ mas te 70 abʼqʼi in najbʼen te Jehová: «O tzʼonin pakbʼabʼil wiʼje tuʼn tchʼiy qʼuqbʼil nkʼuʼje. Qa mas in chin yoline tiʼj Jehová ex tiʼjju o tzaj ttziyen, mas in chʼiy qʼuqbʼil nkʼuʼje».
AJ QXNAQʼTZAN QJUNALX
¿Tzeʼn in nonin jlu qiʼj tuʼn tchʼiy qʼuqbʼil qkʼuʼj? (Qʼonka twitza tiʼj párrafo 15).
15. ¿Tzeʼn in chʼiy qʼuqbʼil qkʼuʼj aj tel qpaʼn ambʼil tuʼn qxnaqʼtzan qjunalx? (Ax ikx qʼonka twitza kyiʼj foto).
15 Qo yolin tiʼj juntl tiʼ in chʼiy qʼuqbʼil qkʼuʼj tuʼn, aju qa ma tzʼel qpaʼn ambʼil tuʼn qxnaqʼtzan qjunalx. In tzaj tqʼamaʼn Susan qa nim in nonin jun orario tiʼj. Tqʼama jlu: «Tkyaqil domingo in chin xnaqʼtzane tiʼjju kbʼel xnaqʼtzet toj juntl seman tiʼj uʼj Aju Xqʼuqil. Atzun toj lunes ex toj martes, in chin xnaqʼtzane tiʼj chmabʼil in nok t-xol seman. Ex kyoj junjuntl qʼij, in chin xnaqʼtzane kyiʼj junjuntl xnaqʼtzbʼil tiʼj Tyol Dios». Tuʼnju kukx in nok lepeʼ Susan tiʼj jun orario, in nonin tiʼj tuʼn kukx tchʼiy qʼuqbʼil tkʼuʼj. Atzunte Irene, ya ma tzikʼ nim abʼqʼi in najbʼen toj kytxuylal ninja qʼil twitz aqʼuntl ex o chʼiy qʼuqbʼil tkʼuʼj tuʼnju in xnaqʼtzan kyiʼj profecía tkuʼx toj Tyol Dios. Tqʼama jlu: «In chin jaw labʼine aj tok nkeʼyine tzeʼn in che japun kywi profecía in tzaj tqʼamaʼn Jehová». c
«KPOL TQʼIJLALIL TUʼN TJAPUN»
16. ¿Tiquʼn ojtzqiʼn quʼn qa jaku tzʼonin qiʼj qeju yol xi tqʼamaʼn Jehová te Habacuc? (Hebreos 10:36, 37).
16 Ateʼ nim tmajen Jehová o tzikʼ nim ambʼil in che ayon tiʼj xitbʼil. Ex jakulo kubʼ qximen qa kxel tiʼn nim ambʼil tuʼn tul. In nel tnikʼ Jehová tiʼjju in kubʼ kynaʼn tmajen. Tuʼntzunju, xi ttziyen jlu te Habacuc: «Maske atx taj tuʼn tjapun ju witzikʼ pero il tiʼj tuʼn tjapun. Maske yaj kjapunel pero ayona tiʼj, porke kpol tqʼijlalil tuʼn tjapun ex mlay tzikʼx tiʼj» (Hab. 2:3). ¿Oʼkxpe xi qʼamaʼn qe yol lu te Habacuc moqa jaku che onin qiʼj toj ambʼil jaʼlo? Onin Jehová tiʼj apóstol Pablo tuʼn ttzaj tqʼamaʼn chʼixme aʼyex yol lu kye qeju in che ayon tiʼj akʼaj twitz Txʼotxʼ (kjawil uʼjit Hebreos 10:36, 37). Qa in kubʼ qximen qa yaj kjapunel twi tyol Jehová, miʼn tzikʼ tnaʼl quʼn qa «kpol tqʼijlalil tuʼn tjapun ex mlay tzikʼx tiʼj».
17. ¿Tzeʼn ok lepeʼ jun ermana tiʼj consej xi tqʼoʼn Jehová te Habacuc?
17 Ateʼ nim tmajen Jehová o che ok lepeʼ tiʼj consej tuʼn kyyon maske o tzikʼ nim ambʼil. Qo xnaqʼtzan tiʼjju o bʼaj tiʼj ermana Louise, aju tzaj tzyet tuʼn tajbʼen te Jehová toj 1939. Tqʼama jlu: «Mintiʼ kubʼ nximane tuʼn njapune twi 18 abʼqʼi tuʼnju kubʼ nximane qa tnejel tuʼn tul Armagedón. Pero mintiʼ bʼaj jlu. Tej nxnaqʼtzane tiʼj kyanqʼibʼil xjal ten nim kypasens ik tzeʼn te Noé, Abrahán, José ex junjuntl tmajen Jehová e ayon tuʼn tok kykeʼyin tuʼn tjapun kywi tyol, onin jlu wiʼje. Ex tuʼnju kukx in chin ayone, in nonin wiʼje ex kyiʼj txqantl tuʼn tok qqʼoʼn qwiʼye tiʼj akʼaj twitz Txʼotxʼ chʼix tul». Axlo jlu in kubʼ kyximen erman o tzikʼ ambʼil in che ajbʼen te Jehová.
18. ¿Tzeʼn in nonin tbʼinchbʼen Jehová qiʼj tuʼn tok qeʼ qkʼuʼj tiʼj qa tzul tiʼn akʼaj twitz Txʼotxʼ?
18 Naʼmx tul akʼaj twitz Txʼotxʼ, pero bʼaʼn tuʼn tok qqʼoʼn qwitz kyiʼj junjuntl tbʼanel tiʼchaq ateʼ ik tzeʼn qe cheʼw, qe tzeʼ, qe txkup ex qe xjal. Mintiʼ e kubʼ bʼinchaʼn tiʼchaq lu tnejel, pero tej kybʼant, ni jun jaku tzaj qʼamante qa nya ax tok ateʼ. ¿Tiquʼn? Tuʼnju ya o che kubʼ tbʼinchaʼn Jehová ex qkyaqilx in nok qqʼoʼn qwitz kyiʼj (Gén. 1:1, 26, 27). O tzaj ttziyen Jehová qa kʼokel Txʼotxʼ te jun tbʼanel najbʼil tuʼn ex kjapunel twi tyol. Qo anqʼil te jumajx ex ya mlay tzaj yabʼil qiʼj. Aj tok Txʼotxʼ te jun tbʼanel najbʼil ik tzeʼn o kubʼ t-ximen Jehová, kʼokel qqʼoʼn qwitz tiʼj ik tzeʼn qe tiʼchaq in che ok qkeʼyin jaʼlo (Is. 65:17; Apoc. 21:3, 4).
19. ¿Tiʼ jaku bʼant quʼn tuʼn tchʼiy qʼuqbʼil qkʼuʼj?
19 Akux in nul akʼaj twitz Txʼotxʼ, qqʼonk tilil tuʼn tchʼiy qʼuqbʼil qkʼuʼj. Qo ximen tiʼj chojbʼil, tiʼj tipumal Jehová ex qqʼonk qwiʼ tiʼj qajbʼebʼil te. Qa ma bʼant tkyaqil jlu quʼn, qo tel kyxol qeju at qʼuqbʼil kykʼuʼj ex at kypasens tuʼn ttzaj kykʼamoʼn aju o tzaj ttziyen Jehová (Heb. 6:11, 12; Rom. 5:5).
BʼITZ 139 Ximana tiʼj tanqʼibʼila toj akʼaj twitz Txʼotxʼ
a Nim xjal toj ambʼil jaʼlo mintiʼ in nok qeʼ kykʼuʼj tiʼj ttziybʼil Jehová tiʼj akʼaj twitz Txʼotxʼ. Tuʼnju tbʼanelxix tziybʼil lu, kwest tuʼn t-xi kynimen. Atzun qe, qʼuqlixix qkʼuʼj tiʼj qa kjapunel twi tkyaqilju o tzaj ttziyen Jehová qe. Noqtzun tuʼnj, nim toklen tuʼn tbʼant junjun tiʼchaq quʼn tuʼn miʼn tnaj qʼuqbʼil qkʼuʼj. Toj xnaqʼtzbʼil lu, kʼelel qnikʼ tiʼj tiʼ jaku bʼant quʼn.
b Ma che kubʼ chʼixpet junjun bʼibʼaj.
c Jaku che kanet nim xnaqʼtzbʼil tuʼna kyiʼj profecía jatumel in tzaj qʼamaʼn «Profecía» toj Índice de las publicaciones Watch Tower. Jun techel, qʼonka twitza tiʼj xnaqʼtzbʼil «Lo que Jehová predice se cumple sin falta» toj La Atalaya te 1 te enero te 2008.
