1. ¿Tzeʼn xi kybʼinchaʼn erman aqʼuntl xi qʼoʼn kye toj tnejel syent abʼqʼi?

 AJ T-XI tqʼoʼn Jehová jun aqʼuntl kye tmajen, taj tuʼn t-xi kybʼinchaʼn toj tumel (1 Cor. 14:33). Jun techel, taj tuʼn t-xi pakbʼet tbʼanel tqanil twitz tkyaqil Txʼotxʼ (Mat. 24:14). Ex o txi tqʼoʼn Jehová toklen Jesús tuʼn tkubʼ nej twitz aqʼuntl lu. Tuʼntzunju, o tzʼok tilil tuʼn Jesús tuʼn tbʼant aqʼuntl lu toj tumel ex toj ttxolil. Toj tnejel syent abʼqʼi, xi qʼoʼn kyoklen junjun apóstol ex qe ansyan te Jerusalén tuʼn tkubʼ kyximen alkyeqe tiʼchaq tuʼn kyxi bʼinchet ex tuʼn t-xi kyqʼoʼn tqanil kye congregación (Hech. 15:2; 16:4). Atzun kyoj congregación, xi qʼoʼn kyoklen junjun erman te ansyan tuʼn kykubʼ nej twitz aqʼuntl ex tuʼn t-xi kyqʼoʼn tqanil lu kye erman (Hech. 14:23). Tuʼnju xi kynimen erman tqanil xi qʼoʼn kye, e chʼiy «tuj kyokslabʼl [ . . . ] ex in chmet-xi kybʼet» (Hech. 16:5).

2. ¿Alkye tten in xi tqʼoʼn Jehová xnaqʼtzbʼil kye tmajen ex tzeʼn o kubʼ nej kywitz atxix toj 1919?

² Toj ambʼil jaʼlo, kukx in nonin Jehová kyiʼj tmajen tuʼn tbʼant aqʼuntl kyuʼn toj ttxolil. Atxix toj 1919, in che ajbʼen junjun erman skʼoʼn maj tuʼn Jesús tuʼn tbʼaj kynukʼun aqʼuntl tiʼj pakbʼabʼil ex tuʼn t-xi kyqʼoʼn xnaqʼtzbʼil kye tiʼj Tyol Dios toj ambʼil mas tbʼanel (Luc. 12:42). a Ex qʼanchaʼlxix qa in tzaj tkʼiwlaʼn Jehová kyaqʼun (Is. 60:22; 65:​13, 14).

3, 4. a) Qʼamantza tukʼil jun techel alkyeqe kʼiwlabʼil in che tzaj qkʼamoʼn tuʼnju nukʼuʼn tten aqʼuntl tiʼj pakbʼabʼil. b) ¿Tiʼ kʼelel qnikʼ tiʼj toj xnaqʼtzbʼil lu?

³ ¿Jakupe bʼant aqʼuntl tzaj toqxenin Jesús qe noqwit nya nukʼun tten? Mlay (Mat. 28:​19, 20). Jun techel, jakulo qoʼx pakbʼal noq jaxku tumel noqwit mintiʼ in tzaj qʼamaʼn  qe jatumel tuʼn qxiʼ. Ex jakulo qo pakbʼan mas toj jun lugar, atzun kyoj junjuntl mintiʼwtlo in qoʼx. ¿Jakupe ximana kyiʼj junjuntl kʼiwlabʼil in tzaj qkʼamoʼn tuʼnju nukʼun tten aqʼuntl tiʼj pakbʼabʼil?

⁴ In bʼaj tnukʼuʼn Jesús ttnam Jehová toj ambʼil jaʼlo ik tzeʼn bʼaj tnukʼuʼn aqʼuntl kyukʼil t-xnaqʼtzbʼen tej tten tzalu twitz Txʼotxʼ. Toj xnaqʼtzbʼil lu, qo yolil tiʼj techel kyaj tqʼoʼn Jesús qwitz ex tzeʼn in nel tkanoʼn ttnam Jehová tiʼj. Ex qo yolil tiʼj tzeʼn jaku kubʼ qyekʼin qa in nok qeʼ qkʼuʼj tiʼj ttnam Jehová.

IN NOK LEPEʼ TTNAM JEHOVÁ TIʼJ TECHEL KYAJ TQʼOʼN JESÚS

5. ¿Tzeʼn in nel tkanoʼn ttnam Jehová tiʼj techel kyaj tqʼoʼn Jesús? (Juan 8:28).

⁵ Ok lepeʼ Jesús tiʼj techel kubʼ tqʼoʼn Jehová tuʼn tel tnikʼ tiʼj tiʼ tuʼn tbʼant tuʼn ex tiʼ tuʼn t-xi tqʼamaʼn. Chʼixme ax jlu in bʼant tuʼn ttnam Jehová, in nok lepeʼ tiʼj techel kyaj tqʼoʼn Jesús ex in najbʼen Tyol Dios tuʼn tuʼn tel qnikʼ tiʼj bʼaʼn ex tiʼj nya bʼaʼn ex tuʼn ttzaj tyekʼin qe tiʼ tuʼn tbʼant quʼn (kjawil uʼjit Juan 8:28; 2 Tim. 3:​16, 17). Nya oʼkxju, ax ikx in tzaj tnaʼn qe tuʼn tjaw quʼjin Tyol Dios ex tuʼn tkubʼ qqʼoʼn toj xnaqʼtzbʼil aju in nel qnikʼ tiʼj. ¿Alkyeqe kʼiwlabʼil in che tzaj qkʼamoʼn aj t-xi qbʼiʼn consej lu?

6. ¿Alkye jun kyxol kʼiwlabʼil in tzaj qkʼamoʼn tuʼnju in qo xnaqʼtzan tiʼj Tyol Dios?

⁶ In tzaj qkʼamoʼn nim kʼiwlabʼil aj qxnaqʼtzan tiʼj Tyol Dios kyukʼil uʼj in che etz tuʼn ttnam Jehová. Jun techel, in tzaj tqʼoʼn ambʼil qe tuʼn tok qmojbʼaʼn aju in tzaj tqʼamaʼn Biblia kyukʼil tqanil in tzaj tqʼoʼn ttnam Jehová. Aj tel qnikʼ tiʼj qa in che ok lepeʼ erman tiʼj Tyol Dios aj ttzaj kyqʼoʼn tqanil lu qe, mas in chʼiy qʼuqbʼil qkʼuʼj tiʼj ttnam Jehová (Rom. 12:2).

7. ¿Alkye tqanil pakbʼan Jesús tiʼj ex tzeʼn in nel tkanoʼn ttnam Jehová tiʼj techel kyaj tqʼoʼn?

⁷ Pakbʼan Jesús tiʼj «tqanil bʼaʼn tiʼj tkawbʼil Dios» (Luc. 4:​43, 44). Ex xi tqʼamaʼn kye t-xnaqʼtzbʼen tuʼn tbʼant ax aqʼuntl lu kyuʼn (Luc. 9:​1, 2; 10:​8, 9). Toj ambʼil jaʼlo, kykyaqilx tmajen Jehová in che pakbʼan tiʼj tbʼanel tqanil noq jaxku tumel in che anqʼin moqa noq alkyexku kyoklen at.

8. ¿Alkye qoklen o tzaj qʼoʼn?

⁸ Jun tbʼanelxix oklenj o tzaj qʼoʼn qe tuʼn t-xi qqʼamaʼn tbʼanel tqanil tiʼj Tkawbʼil Dios kye txqantl. Ex nya kye kykyaqil xjal o txi qʼoʼn oklenj jlu. Jun techel, mintiʼ xi tqʼoʼn Jesús ambʼil kye demonio tuʼn kyyolin tiʼj tej tten tzalu twitz Txʼotxʼ (Luc. 4:41). Toj ambʼil jaʼlo, il tiʼj tuʼn kyjapun junjun requisito tuʼn jun xjal qa taj tuʼn tpakbʼan junx kyukʼil testigo de Jehová. ¿Tzeʼn in kubʼ qyekʼin qa nimxix toklen pakbʼabʼil toj qwitz? In kubʼ qyekʼin aj tok tilil quʼn tuʼn qpakbʼan toj alkyexku ambʼil. Tbʼanel tuʼn tel qkanoʼn tiʼj Jesús aj tok tilil quʼn toj pakbʼabʼil ex aj t-xi qqʼoʼn xnaqʼtzbʼil kye xjal tiʼj axix tok (Mat. 13:​3, 23; 1 Cor. 3:6).

9. ¿Tiʼ o bʼant tuʼn ttnam Jehová tuʼn tel kynikʼ xjal tiʼj tbʼi?

⁹ Onin Jesús kyiʼj xjal tuʼn tel kynikʼ tiʼj tbʼi Dios. Xi tqʼamaʼn Jesús qe yol lu te Tman toj jun naʼj Dios: «O txi nyekʼune aju tbʼiya kye» (Juan 17:​26, TNM). In nel tkanoʼn ttnam Jehová tiʼj Jesús aj tok tilil tuʼn tuʼn t-xi tyekʼin tbʼi Dios kye xjal. Tuʼn tbʼant jlu tuʼn, in najbʼen Traducción del Nuevo Mundo. O kubʼ qʼoʼn tbʼi Jehová toj traducción lu ik tzeʼn kubʼ tzʼibʼin kyoj ojtxe uʼj tiʼj Tyol Dios. Ex o kubʼ traducirin junjun plaj moqa tkyaqil toj mas te 270 yol. In tzaj tqʼamaʼn apéndice A4 ex A5 mas tqanil tiʼj tzeʼn kux qʼoʼn tbʼi Dios  juntl maj kyoj lugar jatumel otoq tzʼel qʼiʼn. Atzun toj apéndice C toj Biblia de estudio, in tzaj tqʼamaʼn alkyeqe tqanil in tzaj kyyekʼin qa il tiʼj tuʼn tkanet 237 maj tbʼi Dios kyoj libro tiʼj Biblia e kubʼ tzʼibʼin toj griego.

10. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj jun xuʼj te Myanmar?

¹⁰ Ik tzeʼn bʼant tuʼn Jesús, qaj tuʼn tok kyojtzqiʼn nim xjal tbʼi Dios. Tej t-xi tyekʼin jun ermana tbʼi Dios te jun xuʼj te 67 abʼqʼi toj tnam Myanmar, jaw oqʼ ex tqʼama jlu: «Atzun tnejel maj in nok nbʼiʼne qa Jehová tbʼi Dios. [ . . . ] Ma tzaj tyekʼina weye jun tiʼ nim toklen tuʼn tel nnikʼe tiʼj». In tzaj tyekʼin experiencia lu qa jaku chʼexpaj kyanqʼibʼil xjal aj tel kynikʼ tiʼj tbʼi Dios.

KUKX QYEKʼINX QA IN NOK QEʼ QKʼUʼJ TIʼJ TTNAM JEHOVÁ

11. ¿Tzeʼn jaku kubʼ kyyekʼin ansyan qa in nok qeʼ kykʼuʼj tiʼj ttnam Jehová? (Ax ikx qʼonka twitza kyiʼj foto).

¹¹ ¿Tzeʼn jaku kubʼ kyyekʼin ansyan qa in nok qeʼ kykʼuʼj tiʼj ttnam Jehová? Jaku bʼant kyuʼn aj tjaw kyuʼjin qe tqanil in tzaj tqʼoʼn ex aj tok tilil kyuʼn tuʼn t-xi kybʼinchaʼn. Jun techel, o tzaj qʼoʼn tqanil kye ansyan tzeʼn tuʼn tex qʼet junjun oklenj kyoj chmabʼil, tzeʼn tuʼn kynaʼn erman Dios kywitz txqantl ex tzeʼn tuʼn kyxqʼuqin kyiʼj. Aj tok tilil kyuʼn ansyan tuʼn t-xi kybʼiʼn tkyaqil tqanil, in kubʼ kynaʼn erman qa kʼujlaʼn qe tuʼn Jehová ex qa in xqʼuqin kyiʼj.

12. a) ¿Tiquʼn il tiʼj tuʼn t-xi qbʼiʼn tqanil in tzaj kyqʼoʼn qeju in che kubʼ nej twitz aqʼuntl? (Hebreos 13:​7, 17). b) ¿Tiquʼn mas tbʼanel tuʼn tok qqʼoʼn qwitz tiʼj tbʼanel kymod qeju in che kubʼ nej twitz aqʼuntl?

¹² Tbʼanel tuʼn t-xi qbʼiʼn tuʼn tkyaqil qkʼuʼj qe tqanil in tzaj kyqʼoʼn ansyan qe. Qa ma bʼant jlu quʼn, mas nya kwest kʼelel toj kywitz tuʼn tjapun twi kyoklen. In tzaj tqʼoʼn Biblia txokbʼil qiʼj tuʼn qnimen kye qeju in che kubʼ nej twitz aqʼuntl (kjawil uʼjit Hebreos 13:​7, 17). Pero at maj kwest tuʼn tbʼant jlu quʼn tuʼnju nya tzʼaqli qe ansyan. Qa ma tzʼok qqʼoʼn qwiʼ kyiʼj kypaltil ex nya kyiʼj tbʼanel kymod, jaku txi qbʼinchaʼn aju kyaj aj qʼoj qiʼj. ¿Tiquʼn in xi qqʼamaʼn jlu? Tuʼnju qa ma ten nya bʼaʼn qximbʼetz kyiʼj ansyan, ya mlay tzʼok qeʼ qkʼuʼj tiʼj ttnam Jehová ex atzun jlu kyaj aj qʼoj. ¿Pero alkyeqe tiʼchaq jaku bʼant quʼn tuʼn tel qnikʼ kyiʼj nya ax tok tqanil in tzaj kyqʼamaʼn aj qʼoj qiʼj ex tuʼn tel qikʼun?

QXQʼUQINK QIBʼ KYIʼJ QEJU NYA KYAJ TUʼN TOK QEʼ QKʼUʼJ TIʼJ TTNAM JEHOVÁ

13. ¿Tiʼ in tzaj kyqʼamaʼn aj qʼoj tiʼj ttnam Jehová?

¹³ In nok tilil kyuʼn aj qʼoj tuʼn ttzaj kyqʼamaʼn qa nya bʼaʼn tkyaqil tbʼanel tiʼchaq in bʼant tuʼn ttnam Jehová. Jun techel, in tzaj t-xnaqʼtzaʼn Biblia qa taj Jehová tuʼn tbʼaj qsaqin qibʼ, tuʼn kyten tbʼanel qmod ex tuʼn qkʼulin te ik tzeʼn taj. Nya oʼkxju, ax ikx in tzaj tqʼamaʼn qa il tiʼj tuʼn tex expulsarin jun xjal qa kukx in kubʼ tbʼinchaʼn nya bʼaʼn (1 Cor. 5:​11-13; 6:​9, 10). Tuʼnju in xi qbʼiʼn kawbʼil lu, in tzaj kyqʼamaʼn aj qʼoj qiʼj qa nya kʼujlaʼn qe xjal quʼn, qa nya bʼaʼn qmod ex qa in kubʼ qximen qa mas nim qoklen kywitz txqantl.

14. ¿Alqukʼil in che tzaj nya ax tok tqanil in tzaj qʼamaʼn tiʼj ttnam Jehová?

¹⁴ Bʼaʼn tuʼn tel qnikʼ tiʼj alkye in qʼojin tiʼj ttnam Jehová. Tuʼn Satanás in tzaj qʼamaʼn nya ax tok tqanil tiʼj ttnam Jehová. In tzaj tqʼamaʼn Biblia jlu tiʼj: «Atzun in tzaj nikʼaj yol tukʼil» (Juan 8:44; Gén. 3:​1-5). Mintiʼ in qo jaw labʼin aj kyajbʼen  junjun xjal tuʼn Satanás tuʼn ttzaj tqʼamaʼn nya ax tok tqanil. ¿Tiquʼn? Tuʼnju ax ikx bʼant jlu tuʼn toj tnejel syent abʼqʼi.

15. ¿Tiʼ ok kybʼinchaʼn nejenel kye okslabʼil tiʼj Jesús ex kyiʼj t-xnaqʼtzbʼen?

¹⁵ Maske tzʼaqlitoq Jesús ex e bʼant milagro tuʼn, e ajbʼen junjun xjal tuʼn Satanás tuʼn ttzaj kyqʼamaʼn nya ax tok yol tiʼj. Jun techel, xi kyqʼamaʼn nejenel kye okslabʼil kye txqantl qa ten tipumal Jesús tuʼn kyetz demonio toj kyxmilal xjal noq tuʼn «nejenel kye juʼẍ» moqa demonio (Mar. 3:22). Ex tej tok Jesús toj juicio, xi kyqʼamaʼn nejenel kye okslabʼil qa yolin nya bʼaʼn tiʼj Dios ex kubʼ kykʼuʼj xjal kyuʼn tuʼn tkubʼ bʼyoʼn (Mat. 27:20). Ex tej t-xi tzyet tuʼn kypakbʼan t-xnaqʼtzbʼen Jesús, «bʼaj kytzpet-saʼn [aj qʼoj] kynabʼl txqantl xjal mya judiy qe tuʼn kyqʼojin kyiʼj» (Hech. 14:​2, 19). In tzaj tqʼamaʼn uʼj Aju Xqʼuqil te 1 te diciembre te 1998 qe yol lu tiʼj Hechos 14:2: «Nya oʼkx el kyikʼun aj qʼoj judiy tbʼanel tqanil, sino ax ikx ok tilil kyuʼn tuʼn tkubʼ kykʼuʼj xjal te junjuntl tnam tuʼntzun kyyolin nya bʼaʼn kyiʼj okslal».

16. ¿Tiʼ bʼaʼn tuʼn ttzaj qnaʼn aj tok qbʼiʼn nya ax tok tqanil?

¹⁶ Kukx in nikʼan Satanás yol ik tzeʼn toj ambʼil ojtxe ex «in sbʼun kyiʼj kykyaqil xjal twitz txʼotxʼ» (Apoc. 12:9). Tuʼntzunju, qa ma tzʼok qbʼiʼn nya ax tok tqanil tiʼj ttnam Jehová moqa kyiʼj erman qʼil twitz aqʼuntl, bʼaʼn tuʼn ttzaj qnaʼn aju ok kybʼinchaʼn aj qʼoj tiʼj Jesús ex kyiʼj t-xnaqʼtzbʼen toj tnejel syent abʼqʼi. Tzaj tqʼamaʼn Jesús qa che elel ikʼun tmajen Jehová ex qa tzul kyqʼamaʼn xjal nya ax tok tqanil kyiʼj. Ex atzun jlu in nok qqʼoʼn qwitz tiʼj toj ambʼil jaʼlo (Mat. 5:​11, 12).  Mlay txi qnimen nya ax tok tqanil qa ma tzaj qnaʼn jatumel in che tzaj ex qa ma tzʼok tilil quʼn tuʼn tok qxqʼuqin qibʼ. ¿Pero tzeʼn jaku bʼant jlu quʼn?

17. ¿Tiʼ jaku bʼant quʼn qa ma che ok qbʼiʼn tqanil nya ax tok? (2 Timoteo 1:13; ax ikx qʼonka twitza tiʼj recuadro « ¿Tiʼ jaku bʼant tuʼna qa ma txi qʼamaʼn jun nya ax tok tqanil teya?»).

¹⁷ Miʼn tzʼok qqʼoʼn qwiʼ kyiʼj nya ax tok tqanil. Tzaj tqʼamaʼn apóstol Pablo tiʼ tuʼn tbʼant quʼn qa ma tzaj qʼamaʼn nya ax tok tqanil qe. Tzaj tqʼoʼn consej lu qe toj 1 Timoteo 1:3 ex 4: «Miʼn t-xi kybʼiʼn ju yol laʼjbʼil». Ex xi tqʼoʼn consej lu te Timoteo: «Ikʼun ela aju laʼjbʼil mya bʼaʼn» (1 Tim. 4:7). Qo ximen tiʼj jlu, qa ma kanet jun tiʼ tuʼn jun tal neʼẍ twitz piso, jakulo jaw tiʼn ex jakulo tzʼokx tqʼoʼn toj ttziʼ. Pero mlayx bʼant jlu tuʼn jun xjal tuʼnju ojtzqiʼn tuʼn qa jaku tzaj jun yabʼil tiʼj. Ax ikx qe, in che el qikʼun nya ax tok tqanil tuʼnju ojtzqiʼn quʼn jatumel in che tzaj. Ex oʼkx in cheʼx qbʼiʼn «yol mintiʼ tpaltil» tiʼj axix tok (kjawil uʼjit 2 Timoteo 1:13).

18. ¿Tzeʼn jaku kubʼ qyekʼin qa in nok qeʼ qkʼuʼj tiʼj ttnam Jehová?

¹⁸ Toj xnaqʼtzbʼil lu oʼkx ma tzʼel qnikʼ tiʼj oxe tumel tzeʼn in nel tkanoʼn ttnam Jehová tiʼj Jesús. Pero aj t-xnaqʼtzana tiʼj Tyol Dios, jaku tzʼel tnikʼa tiʼj mas. Tbʼanel qa ma tzʼok tilil tuʼna tuʼn tonina kyiʼj erman tuʼn kukx tok qeʼ kykʼuʼj tiʼj ttnam Jehová. Ax ikx, miʼn txi tqʼoʼna ambʼil te jun tiʼ tuʼn tkyaj ttzaqpiʼna tuʼn tajbʼena te Jehová ex tuʼn tel tpaʼn teya tiʼj ttnam (Sal. 37:28). In kubʼ qnaʼn nimxix tzalajbʼil tuʼnju in qo ajbʼen te Jehová junx kyukʼil tmajen in che ajbʼen tzʼaqli te ex in kubʼ kyyekʼin kʼujlabʼil kyxolx.