1. ¿Tiʼ aju paraíso espiritual ex tiʼ nya qaj tuʼn tbʼant quʼn?

 TOJ ambʼil jaʼlo, at jun paraíso twitz Txʼotxʼ, jatumel at tzalajbʼil ex in bʼant nim tiʼchaq toj. Toj paraíso lu, in che anqʼin nim millón xjal toj mujbʼabʼil moqa nakʼbʼil ex nya kyaj tuʼn tkyaj kykolin. Ax ikx, kyaj tuʼn kyten mas xjal kyukʼil. ¿Alqiʼj in qo yolin? Atz in qo yolin tiʼj paraíso espiritual. a

2. ¿Tiquʼn in qo jaw labʼin tiʼj tuʼnju at paraíso espiritual toj ambʼil jaʼlo?

² In qo jaw labʼin tiʼj tzeʼn in nonin Jehová tuʼn tten mujbʼabʼil kyxol tmajen maske at nim nya bʼaʼn, ikʼbʼil ex junjuntl tiʼchaq twitz Txʼotxʼ (1 Juan 5:19; Apoc. 12:12). Ojtzqiʼn tuʼn Jehová tkyaqil nya bʼaʼn jaku tzaj qiʼj tuʼn tkawbʼil Satanás ex in nonin kyiʼj tmajen tuʼn kyten segur tuʼntzun kukx kyajbʼen te tukʼil tzalajbʼil. In tzaj qʼamaʼn toj Tyol Dios qa in nok paraíso espiritual ik tzeʼn jun lugar te kolbʼil qibʼ ex ik tzeʼn jun jardín «aʼlin wen» (Is. 4:6; 58:11). Noq tuʼn t-xtalbʼil Jehová in che tzalaj ex xqʼuqin ateʼ qe tmajen toj paraíso lu toj mankbʼil tqʼijlalil (Is. 54:14; 2 Tim. 3:1).

3. ¿Toj alkye ambʼil japun tnejel maj kywi yol tkuʼx toj Isaías capítulo 65?

³ Toj capítulo 65 toj uʼj Isaías, tzaj tqʼamaʼn Jehová  tzeʼn qanqʼibʼil ktel toj paraíso espiritual. Japun kywi yol lu tnejel maj toj abʼqʼi 537 tjaqʼxi ambʼil qʼiʼn quʼn jaʼlo. Toj ambʼil aju, i etz tzaqpiʼn judiy otoq tzʼajtz tiʼj kyanmi toj tnam Babilonia ex e meltzʼaj toj kytxʼotxʼ. Tzaj tkʼiwlaʼn Jehová ttnam ex onin tiʼj tuʼn tbʼaj tbʼinchaʼn juntl maj tnam Jerusalén, aju otoq bʼaj xitj ex ok te jun tbʼanel tnam. Ax ikx, jaw kybʼinchaʼn templo juntl maj jatumel e kʼulin israelita te Jehová (Is. 51:11; Zac. 8:3).

4. ¿Tzeʼn in japun kywi yol tkuʼx toj Isaías capítulo 65 toj ambʼil jaʼlo?

⁴ Toj ambʼil jaʼlo, in japun tkabʼin maj kywi yol tkuʼx toj Isaías. Xi tzyet toj abʼqʼi 1919 tej kyetz tzaqpaj tmajen Jehová tjaqʼ tkawbʼil Nintz tnam Babilonia. Atxix toj ambʼil aju, xi tzyet tuʼn tten paraíso espiritual twitz tkyaqil Txʼotxʼ. Tukʼil nim tzalajbʼil e onin pakbʼal tuʼn kyten akʼaj congregación. Ateʼ nim xinaq ex xuʼj in che qʼojin tnejel ex in che yaẍintoq, pero o tzʼok kyqʼoʼn akʼaj kyten, porke o che bʼinchanjtz «tuʼn kyoke ik tzaʼn tilbʼilal Dios» (Efes. 4:24). Ax tok kjapunel kywi yol tqʼama Isaías toj akʼaj twitz Txʼotxʼ. Pero in tzaj qkʼamoʼn junjun kʼiwlabʼil toj ambʼil jaʼlo toj paraíso espiritual. Qo xnaqʼtzan kyiʼj kʼiwlabʼil in tzaj qkʼamoʼn jaʼlo ex tiquʼn mintiʼ tuʼn tkyaj qkolin paraíso espiritual.

QE KʼIWLABʼIL IN TZAJ QKʼAMOʼN TOJ PARAÍSO ESPIRITUAL

5. Ik tzeʼn in tzaj tqʼamaʼn Isaías 65:​13, ¿alkyeqe kʼiwlabʼil in tzaj kykʼamoʼn tmajen Jehová tuʼnju ateʼ toj paraíso espiritual?

⁵ In kubʼ qnaʼn qa bʼaʼn atoʼ. Yolin Isaías tiʼj tzeʼn kyanqʼibʼil qeju ateʼ toj paraíso espiritual ex qeju mintiʼ ateʼ toj (kjawil uʼjit Isaías 65:13). In tzaj tqʼoʼn Jehová tkyaqilju at tajbʼen kye tmajen tuʼn kukx kyten ttxlaj, ik tzeʼn xewbʼaj xjan, aju Tyol ex nim xnaqʼtzbʼil. In nok jlu ik tzeʼn tuʼn qwan, tuʼn qkʼaʼn ex tuʼn qtzalaj (mojbʼankuya tukʼil Apocalipsis 22:17). Atzun kye qeju nya ateʼ toj paraíso espiritual, mintiʼ in tzaj kykʼamoʼn jlu. Sino at «weʼyaj» kyiʼj, «txqetleʼn» moqa kʼaj ex in kubʼ kychʼixwi. Toj juntl yol, mintiʼ ojtzqiʼn Jehová kyuʼn (Amós 8:11).

6. ¿Alkyeqe wabʼj in yolin Joel 2:21 a 24 tiʼj, tiʼ kyxilen ex tzeʼn jaku che onin qiʼj?

⁶ Toj jun kyxol profecía yolin Joel tiʼj, tqʼama qa ktzajel tqʼoʼn Jehová aju at tajbʼen kye tmajen, ik tzeʼn triw, vino ex aseyt (Joel 2:​21-24). Ax ikx, a kyxilen yol lu qa ktzajel tqʼoʼn Jehová aju at tajbʼen kye tmajen tuʼn tten jun tbʼanel kyamiwbʼil tukʼil. ¿Tzeʼn in bʼant tuʼn toj ambʼil jaʼlo? In bʼant tuʼn aj ttzaj tqʼoʼn Tyol, qe uʼj, aju tembʼil te internet, qe chmabʼil ex qe asamblea. In che onin jlu tuʼn tkubʼ qnaʼn bʼaʼn ex tuʼn tten qipumal.

7. ¿Tiquʼn at «nimxix tzalajbʼil tuj kyanmi» tmajen Jehová? (Isaías 65:14).

⁷ In qo tzalaj. Tuʼn tkyaqil kyanmi tmajen Jehová in xi kyqʼoʼn chjonte te ex tuʼn jlu in kubʼ kynaʼn tzalajbʼil (kjawil uʼjit Isaías 65:14). ¿Tiquʼn at «nimxix tzalajbʼil tuj kyanmi»? Tuʼnju in xi qʼuqbʼaʼn kykʼuʼj kyuʼn promesa ex tuʼn axix tok tkuʼx toj Biblia. Ax ikx, noq tuʼn chojbʼil bʼant tuʼn Jesús at jun qʼuqbʼil kykʼuʼj. In kubʼ kynaʼn tzalajbʼil aj kyyolin tiʼj jlu kyukʼil txqantl (Sal. 34:8; 133:​1-3).

8. ¿Alkye kabʼe tiquʼn in che tzalaj tmajen Jehová toj paraíso espiritual?

⁸ In che tzalaj tmajen Jehová toj  paraíso espiritual tuʼnju at mujbʼabʼil kyxol ex kʼujlabʼil. In nok kʼujlabʼil ik tzeʼn «qtzuylaj qibʼ qkyaqil» ex in nonin qiʼj tuʼn qximen tiʼj tzeʼn qanqʼibʼil ktel toj akʼaj twitz Txʼotxʼ. Aj tpon ambʼil lu, mas kʼokel qqʼoʼn qwitz tiʼj kʼujlabʼil ex mujbʼabʼil qxol ik tzeʼn toj ambʼil jaʼlo (Col. 3:14). Tzaj tqʼamaʼn jun ermana jlu aju kubʼ tnaʼn tej tok tojtzqiʼn qe testigo de Jehová: «Mintiʼ ojtzqiʼn wuʼne tzeʼn tuʼn ntzalaje, axpe ikx kyukʼil toj njaye. Atz kyxol testigo de Jehová ok nqʼoʼn nwitze tnejel maj tiʼj kʼujlabʼil at kyxol». Kykyaqil qeju kyaj tuʼn kytzalaj, tbʼanel tuʼn kyokx toj paraíso espiritual. Noq tiʼxku jaku tzaj kyqʼamaʼn xjal qiʼj, toj twitz Jehová ex toj kywitz tmajen, at jun tbʼanel qbʼi tuʼnju in che yolin bʼaʼn qiʼj (Is. 65:15).

9. ¿Tiʼ kbʼajel kyiʼj tiʼchaq in tzaj kyiʼn kʼixkʼoj qiʼj? (Isaías 65:​16, 17).

⁹ Mintiʼ in tzaj qbʼis. In tzaj tqʼamaʼn Isaías 65:14 jlu kyiʼj qeju nya kyaj tuʼn kyten toj paraíso espiritual: «Che schʼile ex che oqʼele tuʼn kybʼise ex tuʼn taʼw kʼixkʼoj tok kyiʼje». Yajtzun kye tmajen Jehová, ¿tiʼ kbʼajel kyiʼj? ¿Tiʼ kbʼajel kyiʼj tiʼchaq in tzaj tiʼn kʼixkʼoj kyiʼj? In tzaj ttziyen Jehová jlu: «Aju kʼixbʼisabʼl kye ojtxi ma tzikʼ tnaʼl wuʼne ex mlay tzʼok nkeʼyine juntl maj; ma che kubʼ naj nwitze» (kjawil uʼjit Isaías 65:​16, 17). Kʼelel tiʼn Jehová tkyaqil nya bʼaʼn ex aj tikʼ ambʼil ya mlay che tzaj qnaʼn.

10. ¿Tiquʼn jun kʼiwlabʼil tuʼnju atoʼ toj ttnam Jehová? (Ax ikx qʼonka twitza tiʼj foto).

¹⁰ Axpe ikx toj ambʼil jaʼlo, mintiʼ in tzaj qbʼis aj qten kyoj chmabʼil. ¿Tiquʼn? Tuʼnju aj qten kyoj, mintiʼ in qo ximen kyiʼj nya bʼaʼn in tzaj bʼaj qkʼuʼj kyuʼn. ¿Tiʼtzun jaku bʼant quʼn tuʼn miʼn ttzaj qbʼis toj paraíso espiritual? Jaku tzʼok tilil quʼn tuʼn tkubʼ qyekʼin qe mod in tqʼoʼn xewbʼaj xjan. Ik tzeʼn kʼujlabʼil, tzalajbʼil, mujbʼabʼil, tuʼn qbʼinchante xtalbʼil ex tuʼn qok te mans (Gál. 5:​22, 23). ¡Jun kʼiwlabʼil tuʼnju atoʼ toj ttnam Jehová! Qa kukx ma qo ten toj paraíso espiritual, jaku tzʼok qkeʼyin tzeʼn kjapunel twi tpromesa Jehová tuʼn tten «jun akʼaj kyaʼj ex jun akʼaj txʼotxʼ».

11. ¿Tiʼ in kubʼ qnaʼn tuʼnju atoʼ toj paraíso espiritual? (Isaías 65:​18, 19).

¹¹ In xi qqʼoʼn chjonte. Ax ikx tqʼama Isaías qa at nim tiquʼn in qo tzalaj. A Jehová kubʼ bʼinchante paraíso espiritual  (kjawil uʼjit Isaías 65:​18, 19). Tuʼntzunju, in qo ajbʼen tuʼn tuʼn qonin kyiʼj xjal tuʼn kyetz kyoj organización ateʼ twitz Txʼotxʼ tuʼnju mintiʼ in xi kyyekʼin axix tok tiʼj Jehová ex in qo onin kyiʼj tuʼn kyoktz toj ttnam. Nim in qo tzalaj tuʼnju atoʼ toj axix tok. Tuʼntzunju, qaj tuʼn qyolin kyukʼil txqantl kyiʼj kʼiwlabʼil lu (Jer. 31:12).

12. ¿Tiʼ in kubʼ tnaʼna aj t-ximana tiʼjju o tzaj ttziyen Jehová toj Isaías 65:20 a 24 ex tiquʼn?

¹² In xi qqʼoʼn nim chjonte tuʼnju atoʼ toj paraíso espiritual ex in qo tzalaj tiʼj qʼuqbʼil qkʼuʼj in qo ayon tiʼj. Ximana tiʼj tkyaqilju jaku bʼant tuʼna ex jaku tzʼok tqʼoʼn twitza tiʼj toj akʼaj twitz Txʼotxʼ. In tzaj tqʼamaʼn Tyol Dios jlu: «Mi jun kʼwaʼl kymel kʼitzqetoq tul-len itzʼj ex mi jun tij xjal kymel naʼnxtoq tjapun bʼaj tanqʼibʼl». Ax ikx, in tzaj tqʼamaʼn qa «kjawil kybʼinchaʼn xjal kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz». Ex «mya noqx gan che aqʼnal» tuʼnju che ktzajel kʼiwlaʼn tuʼn Jehová. Nya oʼkxju, ax ikx in tzaj ttziyen Jehová qa ktel ttxolil qanqʼibʼil, qo ktel segur ex qo ktzalajel. Ex naʼmxtoq txi qqanin jun tiʼ te Jehová, ya ojtzqiʼn tuʼn tiʼ at tajbʼen qe ex «in che noj kykyaqil qe» tbʼinchbʼen tuʼn (Is. 65:​20-24; Sal. 145:16).

13. Ik tzeʼn in tzaj tqʼamaʼn Isaías 65:​25, ¿alqukʼil in nok mojbʼaʼn qe chʼixpubʼil in bʼant tuʼn jun xjal?

¹³ Atoʼ toj mujbʼabʼil. Ateʼ nim xjal tnejel in che bʼiyen ex in che qʼojin, pero chʼexpaj kymod noq tuʼn tonbʼil xewbʼaj xjan (kjawil uʼjit Isaías 65:25). Toj juntl yol, o bʼant kyjakʼunte kyibʼ (Rom. 12:2; Efes. 4:​22-24). Noqtzun tuʼnj, at maj jaku qo el txalpaj tuʼnju aj il qoʼ. Maske ikju, o bʼant jun milagro tuʼn Jehová tuʼnju «kykyaqil xjal» jaku che ten junx, toj mujbʼabʼil ex at kʼujlabʼil kyxol (Tito 2:11). Oʼkx jaku bʼant jlu tuʼn Jehová.

14. ¿Tzeʼn japun kywi yol tkuʼx toj Isaías 65:25 tiʼj jun ermano?

¹⁴ ¿Jakupe chʼexpaj qmod? Jaku. Atzun jlu kʼelel qnikʼ tiʼj toj jun techel. In yaẍintoq jun kuʼxun te 20 abʼqʼi ex in bʼiyen. Nim maj okx qʼoʼn toj cárcel tuʼnju xi telqʼan qe kar ex junjuntl tiʼchaq. Ex kukx tajtoq tuʼn tqʼojin kyukʼil txqantl. Tej tok tbʼiʼn tnejel maj qe xnaqʼtzbʼil ateʼ toj Biblia ex tej t-xiʼ kyoj chmabʼil, el tnikʼ tiʼj qa kanet ttxolil tanqʼibʼil, toj juntl yol, jaku kʼulin te Jehová. Tej otoqxi bautisarin, nim maj ximen tiʼj tzeʼn japun kywi yol tkuʼx toj Isaías 65:25 tiʼj. Tnejel, ik tmod ik tzeʼn jun xoʼj, yajxitl ok ik tzeʼn jun ẍneʼl moqa rit.

15. ¿Tiquʼn qaj tuʼn qonin kyiʼj xjal tuʼn kyoktz toj ttnam Jehová ex tzeʼn in bʼant quʼn?

¹⁵ Toj contexto tiʼj capítulo 65 te Isaías, in tzaj tyekʼin qa a Jehová in yolin. Ex in japun tkyaqilju in tzaj ttziyen (Is. 55:​10, 11). Ax tok paraíso espiritual tuʼnju o japun bʼaj twi aju tqʼama Jehová tiʼj. A o kubʼ bʼinchante jun ttnam jatumel segur atoʼ ex in qo anqʼin toj mujbʼabʼil maske at nim nya bʼaʼn (Sal. 72:7). Tuʼntzunju, qaj tuʼn qonin kyiʼj xjal tuʼn kyoktz toj ttnam Jehová. In bʼant jlu quʼn aj qonin kyiʼj tuʼn kyok te t-xnaqʼtzbʼen Jesús (Mat. 28:​19, 20).

¿TZEʼN JAKU QO ONIN KYIʼJ XJAL TUʼN KYOKTZ TOJ PARAÍSO ESPIRITUAL?

16. ¿Tiquʼn kyaj xjal tuʼn kyokx toj ttnam Jehová?

¹⁶ Qkyaqilx jaku qo onin tuʼn tok paraíso espiritual te jun tbʼanel lugar tuʼntzun  kyoktz mas xjal toj. ¿Tzeʼn jaku qo onin? Aj tel qkanoʼn tiʼj Jehová. Mintiʼ in nok t-obligarin qe xjal tuʼn kyokx toj ttnam, sino tukʼil t-xtalbʼil in che tzaj tiʼn (Jer. 31:3; Juan 6:44). Aʼye xjal in che xnaqʼtzan tiʼj Jehová ex at jun tbʼanel kyanmi, kyaj tuʼn kyten toj ttnam tuʼnju in nok kyqʼoʼn kywitz tiʼj tbʼanel tmod. ¿Alkyeqe tiʼchaq jaku che bʼant quʼn tuʼntzun tten kyajbʼil xjal tuʼn kyoktz toj ttnam Jehová?

17. ¿Tiʼ jaku bʼant quʼn tuʼn kyoktz mas xjal toj paraíso espiritual?

¹⁷ Jaku che oktz mas xjal toj paraíso espiritual qa ma kubʼ qyekʼin tbʼanel qmod ex kʼujlabʼil kyiʼj erman. Ik tzeʼn bʼaj kyiʼj xjal te Corinto tej kyxiʼ toj chmabʼil, ax ikx qaj tuʼn kypon xjal kyoj chmabʼil ex tuʼn t-xi kyqʼamaʼn jlu: «Ax tok at Dios kyxole» (1 Cor. 14:​24, 25; Zac. 8:23). Tuʼntzunju, nim toklen tuʼn t-xi qbʼiʼn consej lu: «Tenx kymojbʼabʼl kyibʼe kyxolxe» (1 Tes. 5:13).

18. ¿Tiʼ jaku tzʼonin kyiʼj xjal tuʼn kyten toj paraíso espiritual?

¹⁸ Ax ikx, bʼaʼn tuʼn tten qximbʼetz kyiʼj erman ik tzeʼn te Jehová. Tuʼntzunju, in nok qqʼoʼn qwitz kyiʼj tbʼanel kymod ex nya tiʼj kypaltil tuʼnju toj chʼintl ambʼil kbʼel naj. Kʼonil kʼujlabʼil qiʼj tuʼn t-xi qbʼinchaʼn tiʼj alkyexku nya bʼaʼn ex qa ma txi qbʼiʼn consej lu: «Atwit kykʼuʼje kyiʼje kyxolxe, qʼaqʼanx kykʼuʼje tiʼj juntl, kynajsame kyile kyxolxe» (Efes. 4:32). Kykyaqil qeju kyaj tuʼn tok kyqʼoʼn kywitz kyiʼj mod lu, ktel kygan tuʼn kyten toj paraíso espiritual. b

 KUKX QO TEN TOJ PARAÍSO ESPIRITUAL

19. a) ¿Tiʼ o kyqʼama junjun o che meltzʼaj toj paraíso espiritual? (Qʼonka twitza tiʼj recuadro « I ex pero o che meltzʼaj»). b) ¿Tiʼ qaj tuʼn kukx tbʼant quʼn? (Ax ikx qʼonka twitza tiʼj dibujo).

¹⁹ Jun tbʼanel qoklen tuʼnju atoʼ toj paraíso espiritual. Mas tbʼanel toj ambʼil jaʼlo ex mas nim erman at toj. Qqʼonx chjonte tiʼj tuʼnju o kubʼ tbʼinchaʼn Jehová tuʼn qten toj. Kykyaqilx qeju kyaj tuʼn kyten bʼaʼn, toj tzalajbʼil, toj txubʼtxaj ex segur, tbʼanel tuʼn kyten toj paraíso espiritual ex tuʼn miʼn tkyaj kykolin. Pero bʼaʼn tuʼn tok qxqʼuqin qibʼ tuʼnju taj Satanás tuʼn qkubʼ tsbʼuʼn tuʼntzun miʼn qten toj ttnam Jehová (1 Ped. 5:8; Apoc. 12:9). Miʼn txi qqʼoʼn ambʼil te tuʼn tkambʼan. Tzʼok tilil quʼn tuʼn tok qxqʼuqin paraíso espiritual tuʼntzun kukx tten saq ex toj mujbʼabʼil.