1. ¿Tiʼ taj Jehová tuʼn tbʼant quʼn?

 IN KUBʼ kynaʼn mejebʼleʼn nimxix tzalajbʼil aj tul itzʼj jun kykʼwal. Maske kʼujlaʼn kykʼwal kyuʼn, nya kyaj tuʼn tkyaj neʼẍ te jumajx. Noqtzun tuʼnj, jaku tzaj bʼajxix kykʼuʼj qa mintiʼ in chʼiy. Chʼixmi ax jlu in kubʼ tnaʼn Jehová, in tzalaj aj tok tkeʼyin aj t-xi tzyet qxnaqʼtzan tiʼj, pero nya taj tuʼn qok ik tzeʼn qe tal kʼwal (1 Cor. 3:1). Sino taj tuʼn tten qnabʼil «ik tzaʼn tnabʼl jun tij xjal» (1 Cor. 14:20).

2. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

² Toj xnaqʼtzbʼil lu kxel qqʼoʼn tzaqʼwebʼil kyiʼj xjel lu: ¿Tzeʼn tmod ex tbʼinchbʼen jun okslal o chʼiy toj tokslabʼil? ¿Tiʼ il tiʼj tuʼn tbʼant quʼn tuʼn qchʼiy toj qokslabʼil? ¿Tzeʼn in nonin qiʼj tuʼn tchʼiy qamiwbʼil tukʼil Jehová aj qxnaqʼtzan kyiʼj mas xnaqʼtzbʼil? ¿Ex tiquʼn mintiʼ tuʼn tok qeʼ qkʼuʼj qiʼjx qa ya o qo chʼiy toj qokslabʼil?

¿TZEʼN TMOD EX TBʼINCHBʼEN JUN OKSLAL O CHʼIY TOJ TOKSLABʼIL?

3. ¿Tiʼ t-xilen tuʼn tchʼiy jun okslal toj tokslabʼil?

³ Aju yol griego ajbʼen toj Biblia tiʼj txol yol «ik tzaʼn tnabʼl jun tij xjal», ax ikx a t-xilen «tuʼn tokxix qnabʼil» moqa tuʼn qok te «tzʼaqli» (1 Cor. 2:6). a Ik tzeʼn jun neʼẍ  in chʼiy tuʼn tok te jun tij xjal, ax ikx qe nim toklen tuʼn tok tilil quʼn tuʼn tchʼiy qamiwbʼil tukʼil Jehová. Iktzun tten in kubʼ qyekʼin qa otoq qo chʼiy toj qokslabʼil. ¿Ape t-xilen jlu qa aj tchʼiy jun xjal toj tokslabʼil ya nya il tiʼj tuʼn t-xi tbʼinchaʼn jun tiʼ? Miʼn. Sino il tiʼj tuʼn kukx tok tilil tuʼn (1 Tim. 4:15). Pero, ¿tzeʼn jaku tzʼel qnikʼ tiʼj qa o chʼiy jun kuʼxun moqa jun xjal toj tokslabʼil?

4. ¿Tiʼ in bʼant kyuʼn okslal o che chʼiy toj kyokslabʼil?

⁴ Aʼye okslal o che chʼiy toj kyokslabʼil, in xi kynimen kykyaqil tkawbʼil Jehová ex nya oʼkx qeju bʼaʼn in nela toj kywitz. Ax tok, maske aj il qe ex in che el txalpaj, in ok tilil kyuʼn tuʼn kyximen ex tuʼn t-xi kybʼinchaʼn qe tiʼchaq ik tzeʼn taj Jehová tuʼn tbʼant kyuʼn tmajen. In nok tilil kyuʼn tuʼn tten tbʼanel kymod ex tuʼn kyximen ik tzeʼn te Dios (Efes. 4:​22-24). In jaw kyjyoʼn aju mas tbʼanel toj kyanqʼibʼil tuʼnju in che ok lepeʼ kyiʼj ley ex qe nabʼil in tzaj tqʼoʼn Jehová. Tuʼntzunju, nya il tiʼj tuʼn ttzaj qʼoʼn jun lista kye kyiʼj tiʼchaq kbʼantel kyuʼn. Ax ikx, aj tkubʼ kyximen tuʼn tbʼant jun tiʼ kyuʼn, in xi kybʼinchaʼn (1 Cor. 9:​26, 27).

5. ¿Tiʼ jaku bʼaj kyiʼj okslal naʼmx kychʼiy toj kyokslabʼil? (Efesios 4:​14, 15).

⁵ Atzun kye okslal naʼmx kychʼiy toj kyokslabʼil, jaku kubʼ kyiʼj kyuʼn xjal «in che sbʼun ex in kymaʼn yol xmletzʼ». Tuʼn jlu, jaku txi kynimen qe nya ax tok tqanil ex aju in kyqʼamaʼn apóstata (kjawil uʼjit Efesios 4:​14, 15). b Bʼalo in tzaj loʼchj moqa in tzaj txʼaʼl kykʼuʼj kyiʼj txqantl, jun rat in tzaj kyqʼoj ex jun rat in kubʼ kyiʼj tuʼn jun nya bʼaʼn (1 Cor. 3:3).

6. ¿Alkye techel jaku tzʼonin qiʼj tuʼn tel qnikʼ tiʼj tiʼ il tiʼj tuʼn tbʼant quʼn tuʼn qchʼiy toj qokslabʼil? (Ax ikx qʼonka twitza kyiʼj tilbʼilal).

⁶ Ik tzeʼn ma tzʼel qnikʼ tiʼj, in nok tmojbʼaʼn Biblia jun xjal in chʼiy toj tokslabʼil ik tzeʼn aj tchʼiy jun xjal. Tuʼnju at nim tiʼchaq naʼmx tel tnikʼ jun kʼwal tiʼj, il tiʼj tuʼn tok xqʼuqit tuʼn jun xjal o chʼiy. Qo ximen tiʼj jun techel, in xi tqʼamaʼn jun txubʼaj te tal tuʼn miʼn tel ttzaqpiʼn tqʼabʼ aj  tikʼx toj jun kay. Pero akux in chʼiy kʼwal, jakulo txi tqʼoʼn txubʼaj ambʼil te tuʼn tikʼx tjunalx toj kay. Noqtzun tuʼnj, in xi tnaʼn te tuʼn t-xi tkeʼyin kyoj kabʼe lado naʼmxtoq tikʼx. Ex aj tchʼiy, jaku tzikʼx tjunalx. Chʼixmi ax jlu in bʼaj kyiʼj okslal naʼmx kychʼiy toj kyokslabʼil, il tiʼj tuʼn kyonin txqantl kyiʼj tuʼn tjaw kyjyoʼn aju mas bʼaʼn ex tuʼn tel kyikʼun nya bʼaʼn. Atzun kye erman o che chʼiy toj kyokslabʼil, in che ximen kyiʼj nabʼil tkuʼx toj Biblia tuʼn tel kynikʼ tiʼj alkye t-ximbʼetz Jehová tuʼntzun tjaw kyjyoʼn aju mas bʼaʼn.

7. ¿Ilpe tiʼj tuʼn t-xi qʼoʼn onbʼil kye erman o che chʼiy toj kyokslabʼil?

⁷ ¿Ape t-xilen jlu qa nya il tiʼj tuʼn t-xi qʼoʼn onbʼil kye erman o che chʼiy toj kyokslabʼil? Miʼn, at maj il tiʼj tuʼn t-xi kyqanin onbʼil. Aju xjal naʼmx tchʼiy toj tokslabʼil, in nayon tuʼn t-xi kyqʼamaʼn txqantl te tiʼ tuʼn tbʼant tuʼn. Atzun kye erman o tzʼok kynabʼil, in nok kyqʼoʼn toklen consej in xi qʼoʼn kye kyuʼn txqantl, pero ojtzqiʼn kyuʼn qa «teyle junjun tuʼn t-xi tiqan tex tiqatz» (Gál. 6:5).

8. ¿Tiquʼn in xi qqʼamaʼn qa junxitl kymod okslal o che chʼiy toj kyokslabʼil?

⁸ Nya junx che keʼyin kykyaqil xjal. Ax ikx kye okslal o che chʼiy toj kyokslabʼil, junxitl tmod teyele junjun kye. Jun techel, ateʼ junjun mas at kynabʼil, kyipumal, kykʼujlabʼil ex junjuntl mas in nel kynikʼ tiʼjju in kubʼ kynaʼn txqantl. Ax ikx, jaku ten junxitl kyximbʼetz kabʼe okslal tiʼj jun tiʼ, pero kykabʼil mintiʼ in che ikʼ kyibʼaj tkawbʼil Jehová. Tuʼntzunju, mlay tzʼel tiʼn jun toklen aju otoq jaw tskʼoʼn juntl, sino kykabʼil kʼokel tilil kyuʼn tuʼn tten mujbʼabʼil (Rom. 14:10; 1 Cor. 1:10).

¿TIʼ IL TIʼJ TUʼN TBʼANT QUʼN TUʼN QCHʼIY TOJ QOKSLABʼIL?

9. ¿Tjunalxpe qokslabʼil in chʼiy?

⁹ Chebʼe in nok jun kʼwal te matij xjal. Atzunte qokslabʼil nya tjunalx in chʼiy. Jun techel, xi kykʼamoʼn okslal te Corinto tbʼanel tqanil, e bautisarin, tzaj kykʼamoʼn xewbʼaj xjan ex el kyiʼn tbʼanel xnaqʼtzbʼil tiʼj apóstol Pablo (Hech. 18:​8-11). Maske otoq tzikʼ junjun abʼqʼi kybautisarin, nim kye naʼmxtoq kychʼiy toj kyokslabʼil (1 Cor. 3:2). ¿Tiʼ jaku bʼant quʼn tuʼn miʼn tbʼaj jlu qiʼj?

10. ¿Tiʼ il tiʼj tuʼn tbʼant quʼn tuʼn qchʼiy toj qokslabʼil? (Judas 20).

¹⁰ Il tiʼj tuʼn ttzaj anqʼin toj qanmi tuʼn kukx tkubʼ qximen tuʼn qchʼiy toj qokslabʼil. Qa mintiʼ ma bʼant jlu quʼn, mlayx tzʼok qnabʼil (Prov. 1:22). Nya qaj tuʼn qok ik tzeʼn qe xjal nya kyaj tuʼn tten kyresponsabilidad ex in che ayon tuʼn t-xi tqʼamaʼn kyman kye tiʼ tuʼn t-xi kybʼinchaʼn. Sino qaj tuʼn qok te responsable tiʼj qamiwbʼil tukʼil Jehová (kjawil uʼjit Judas 20). Qa in kubʼ tnaʼna qa naʼmx tchʼiya toj tokslabʼila, qaninxa te Jehová tuʼn tten tajbʼila ex tipumala tuʼn tok tilil tuʼna (Filip. 2:13).

11. ¿Tiʼ onbʼil o tzaj tqʼoʼn Jehová qe tuʼn qchʼiy toj qokslabʼil? (Efesios 4:​11-13).

¹¹ Mintiʼ in nayon Jehová tuʼn qchʼiy qjunalx toj qokslabʼil. Tuʼntzunju, o che tzaj tqʼoʼn ansyan ex qe erman tuʼn kyonin qiʼj «tuʼn ttzʼaqet-xix qnabʼl, [ . . . ] ik tzaʼn te Crist tzʼaqlxix» (kjawil uʼjit Efesios 4:​11-13). Ax ikx, in tzaj tqʼoʼn xewbʼaj xjan qe tuʼn tonin qiʼj tuʼn tten qnabʼil ik tzeʼn te Jesús (1 Cor. 2:​14-16). Ex tzaj tqʼoʼn Jehová ambʼil tuʼn kykubʼ tzʼibʼit kyaje Evangelio. In che onin qiʼj tuʼn tok qojtzqiʼn tiʼ bʼant tuʼn Jesús tej tten tzalu  twitz Txʼotxʼ. Qa ma tzʼel qkanoʼn tiʼj t-ximbʼetz Jesús, tiʼj tzeʼn yolin ex tmod, jaku qo chʼiy toj qokslabʼil.

NIM TOKLEN TUʼN QXNAQʼTZAN KYIʼJ XNAQʼTZBʼIL KWEST

12. ¿Alkyeqe xnaqʼtzbʼil ya ojtzqiʼn quʼn?

¹² Tuʼn qchʼiy toj qokslabʼil, il tiʼj tuʼn tel qnikʼ kyiʼj mas xnaqʼtzbʼil ex nya oʼkx aju ya ojtzqiʼn quʼn tiʼj Jesús. Kyxol qe xnaqʼtzbʼil ya ojtzqiʼn quʼn, at aju tuʼn tajtz tiʼj qanmi, tuʼn tten qʼuqbʼil qkʼuʼj, tuʼn qbautisarin ex aju tuʼn kyjaw anqʼin kyimni (Heb. 6:​1, 2). Kykyaqil okslal axix tok, il tiʼj tuʼn tel kynikʼ tiʼj jlu. Tuʼntzunju, yolin apóstol Pedro kyiʼj xnaqʼtzbʼil lu kye xjal tej tpakbʼan toj Pentecostés (Hech. 2:​32-35, 38). Nim toklen tuʼn t-xi qnimen qe xnaqʼtzbʼil lu tuʼn qok te t-xnaqʼtzbʼen Jesús. Ex ax jlu tqʼama Pablo qa mintiʼ in nok qeʼ qkʼuʼj tiʼj qa che kjawil anqʼin kyimni (1 Cor. 15:​12-14). Tuʼntzunju, nim toklen tuʼn tel qnikʼ kyiʼj mas xnaqʼtzbʼil.

13. ¿Tiʼ il tiʼj tuʼn tbʼant quʼn tuʼn kyonin xnaqʼtzbʼil qiʼj aju in yolin Hebreos 5:14 tiʼj? (Ax ikx qʼonka twitza kyiʼj foto).

¹³ Nim toklen tuʼn qximen kyiʼj xnaqʼtzbʼil kwest tuʼn tel qnikʼ tiʼj toj Biblia. ¿Alqiʼj in qo yolin? Atz in qo yolin kyiʼj tkawbʼil Jehová ex kyiʼj nabʼil in che onin qiʼj tuʼn tel qnikʼ tiʼj t-ximbʼetz. Tuʼn kyonin qiʼj, nim toklen tuʼn qxnaqʼtzan tiʼj Biblia, tuʼn qximen tiʼj ex tuʼn tok tilil quʼn tuʼn tkubʼ qqʼoʼn toj xnaqʼtzbʼil. Qa ma bʼant quʼn, kʼonil qiʼj tuʼn tjaw qjyoʼn aju mas tbʼanel (kjawil uʼjit Hebreos 5:14). c

14. ¿Tzeʼn onin Pablo kyiʼj okslal tuʼn kychʼiy toj kyokslabʼil?

¹⁴ Kwest in nela kye okslal naʼmx kychʼiy toj kyokslabʼil tuʼn tjaw kyjyoʼn aju mas bʼaʼn qa mintiʼ in kanet jun kawbʼil kyuʼn toj Biblia. Aj tbʼaj jlu, jaku kubʼ kyximen junjun qa jaku txi kybʼinchaʼn alkyexku kyaj. Atzun junjuntl, jaku txi kyqanin tuʼn tkubʼ qʼoʼn jun kawbʼil aju nya il tiʼj. Jun techel, xi kyqanin okslal te Corinto te Pablo tuʼn t-xi tqʼamaʼn kye qa jaku txi kywaʼn aju wabʼj otoq kubʼ qʼoʼn kywitz tilbʼilal moqa miʼn. ¿Tiʼ bʼant tuʼn Pablo? Mintiʼ xi tqʼamaʼn kye tiʼ tuʼn  tbʼant kyuʼn, sino xi tqʼamaʼn qa teyele junjun jaku txi tbʼinchaʼn aju otoq tzʼel tnikʼ tiʼj. Ex xi tqʼamaʼn junjun nabʼil toj Tyol Dios kye tuʼn tjaw kyjyoʼn aju mas tbʼanel ex tuʼn miʼn kyok te jun tolsabʼil kye txqantl (1 Cor. 8:​4, 7-9). Iktzun tten, xi tyekʼin Pablo kye okslal te Corinto tuʼn tajbʼen kynabʼil kyuʼn ex nya tuʼn t-xi kyqʼamaʼn txqantl kye tiʼ tuʼn tbʼant kyuʼn moqa tuʼn tkubʼ kyqʼoʼn jun kawbʼil.

15. ¿Tzeʼn onin Pablo kyiʼj okslal hebreo tuʼn kukx kychʼiy toj kyokslabʼil?

¹⁵ In kanet juntl tbʼanel xnaqʼtzbʼil quʼn kyoj qe yol xi ttzʼibʼin Pablo kye okslal hebreo. Ateʼ junjun ya mintiʼ e chʼiy toj kyokslabʼil. Tuʼntzunju, xi tqʼamaʼn jlu kye: «Ma che oke ik tzaʼn tal neʼ kukx tuʼn t-xiʼ kychʼuʼye ex mlay txiʼ wabʼj kyuʼne» (Heb. 5:12). Mintiʼ xi kykʼamoʼn okslal qe akʼaj xnaqʼtzbʼil xi tqʼoʼn Jehová kye (Prov. 4:18). Jun techel, ok tilil kyuʼn nim okslal judiy tuʼn t-xi kyqʼamaʼn kye txqantl qa il tiʼj tuʼn t-xi kyniman Tley Moisés maske otoq tzikʼ junlo 30 abʼqʼi tkubʼlen najsaʼn tuʼn chojbʼil xi tqʼoʼn Jesús (Rom. 10:4; Tito 1:10). Toj ambʼil lu, jakutoq tzʼel kynikʼ tiʼj qa ya nya il tiʼj tuʼn t-xi kynimen Tley Moisés. Tuʼntzunju, xi ttzʼibʼin Pablo jun carta kye tuʼn t-xi kykʼamoʼn qe xnaqʼtzbʼil nim kyoklen. Kyuʼn xnaqʼtzbʼil lu, jakutoq tzʼel kynikʼ okslal tiʼj qa mas tbʼanel akʼaj tten tuʼn kykʼulin te Jehová. Ex jakutoq tzʼonin kyiʼj tuʼn tten kyipumal tuʼn kukx kypakbʼan maske e ok weʼ twitz nya bʼaʼn kyuʼn judiy (Heb. 10:​19-23).

¿TIQUʼN MINTIʼ TUʼN TOK QEʼ QKʼUʼJ QIʼJX?

16. Qa ya o qo chʼiy toj qokslabʼil, ¿tiʼ mas jaku bʼant quʼn?

¹⁶ Nya oʼkx tuʼn tok tilil quʼn tuʼn qchʼiy toj qokslabʼil, sino il tiʼj tuʼn kukx tten. Tuʼntzunju, miʼn tzʼok qeʼ qkʼuʼj qiʼjx (1 Cor. 10:12). Nim toklen tuʼn qximen tiʼj qa kukx in qo chʼiy toj qokslabʼil (2 Cor. 13:5).

17. ¿Tiʼ xnaqʼtzbʼil jaku tzʼel qiʼn tiʼj carta xi ttzʼibʼin Pablo kye okslal te Colosas?

¹⁷ Toj carta xi ttzʼibʼin Pablo kye okslal te Colosas, tqʼama qa nim toklen  tuʼn kukx kychʼiy toj kyokslabʼil ex tuʼn miʼn txi kynajsaʼn. Maske otoq che chʼiy toj kyokslabʼil, xi tqʼamaʼn Pablo kye tuʼn miʼn kykubʼ sbʼuʼn tuʼn kyxnaqʼtzbʼil xjal (Col. 2:​6-10). Ojtzqiʼntoq qe erman tuʼn Epafras ex naʼn Dios kyiʼj tuʼntzun kyweʼxix ex tuʼn ttzʼaqet-xix kynabʼl (Col. 4:12). In tzaj tyekʼin jlu qe qa el tnikʼ Pablo ex Epafras tiʼj qa nim toklen tuʼn tok tilil quʼn tuʼn qchʼiy toj qokslabʼil ex qa oʼkx jaku bʼant jlu quʼn tuʼn tonbʼil Jehová. Ex kyajtoq tuʼn kukx kychʼiy okslal te Colosas toj kyokslabʼil maske e ok weʼ kywitz nya bʼaʼn.

18. ¿Tiʼ jaku bʼaj tiʼj jun okslal o chʼiy toj tokslabʼil? (Ax ikx qʼonka twitza tiʼj foto).

¹⁸ Xi tqʼamaʼn Pablo kye okslal hebreo qa jaku naj tamiwbʼil jun okslal te jumajx tukʼil Jehová. Qa ma tzʼok tanmi te kyuw, jaku tzʼel laqʼeʼ tiʼj Jehová, ya mlay tzʼajtz tiʼj tanmi ex mlay kubʼ najsaʼn til. Noqtzun tuʼnj, tbʼanel tuʼnju mintiʼ bʼaj jlu kyiʼj okslal hebreo (Heb. 6:​4-9). Yajtzun jaʼlo, ¿tiʼ in bʼaj kyiʼj inactivo ex qeju in che ex expulsarin qa ma tzʼajtz tiʼj kyanmi? Qa ma kubʼ kyin kyibʼ ex qa ma tzʼajtz tiʼj kyanmi, kbʼel kyyekʼin qa mintiʼ in che ok ik tzeʼn qe xjal yolin Pablo tiʼj. Pero il tiʼj tuʼn t-xi qʼet onbʼil kye aj kymeltzʼaj tukʼil Jehová (Ezeq. 34:​15, 16). Tuʼntzunju, jaku txi tqʼamaʼn jun ansyan te jun erman o chʼiy toj tokslabʼil tuʼn tonin kyiʼj tuʼn tten juntl maj kyamiwbʼil tukʼil Jehová.

19. ¿Tiʼ kukx kxel qbʼinchaʼn?

¹⁹ Qa in nok tilil tuʼna tuʼn tchʼiya toj tokslabʼila, kukx bʼinchama. Kukx xnaqʼtzana kyiʼj xnaqʼtzbʼil kwest tuʼn tel qnikʼ tiʼj ex tzʼok tilil tuʼna tuʼn tten t-ximbʼetza ik tzeʼn te Jehová. Qatzun ya o chʼiya toj tokslabʼila, tzʼok tilil tuʼna tuʼn miʼn t-xi tnajsaʼna.