¿O tzʼok tbʼiʼna?
¿Tiquʼn e ten xjal te juntl tnam kyxol tsoldad David?
KYXOL tsoldad David, e ten xinaq te juntl tnam. Jun techel, ten Zélec aju ammonita, Urías aju hitita ex Itmá aju moabita (1 Crón. 11:39, 41, 46). a Ax ikx e ten «qe aj Cereteo ex qe aj peleteo ex qe Geteo» (2 Sam. 15:18). Parece que ax kyyajil xjal keretita ex qe peletita kyukʼil filisteo (Ezeq. 25:16). Atzun kye guitita, atz e anqʼin toj kytnam filisteo, aju Gat (Jos. 13:2, 3; 1 Sam. 6:17, 18).
¿Tiquʼn xi tqʼoʼn David ambʼil tuʼn kyten xjal te juntl tnam kyxol qe tsoldad? Tuʼnju ok qeʼ tkʼuʼj tiʼj qa che ktel tzʼaqli twitz ex aju mas nim toklen, twitz Jehová. Jun techel, in tzaj tqʼamaʼn uʼj The New Interpreterʼs Dictionary of the Bible jlu kyiʼj keretita ex peletita: «E ten tzʼaqli twitz David kyoj ambʼil mas kwest tej tkawin». ¿Tiquʼn in xi qqʼamaʼn jlu? Tuʼnju tej tkyaj kolin rey David kyuʼn «xinaq aj Israel» noq tuʼn kyok lepeʼ tiʼj «jun xinaq puro mya bʼaʼn, tiyjil Benjamín, Seba tbʼi», e onin keretita ex qe peletita tiʼj David tuʼn tkubʼ kyiʼj xjal te Seba tuʼn (2 Sam. 20:1, 2, 7). Toj juntl ambʼil, tajbʼil Adonías, jun tkʼwal rey David tuʼn tel tiʼn toklen te aj kawil. Pero e ten keretita ex qe peletita tzʼaqli twitz David ex e onin tiʼj Salomón tuʼn tok te rey tuʼnju ojtzqiʼntoq kyuʼn qa a Jehová otoq jaw skʼonte (1 Rey. 1:24-27, 38, 39).
Ax ikx te Ittái, aju guitita, ten tzʼaqli twitz David. Onin Ittái ex qe 600 tsoldad tiʼj rey David tej tok meltzʼaj Absalón, aju juntl tkʼwal David tiʼj. Ok tilil tuʼn Absalón tuʼn tkubʼ tiʼj kyanmi Israel tuʼn tuʼntzun tok kyqʼoʼn te rey. Xi tqʼamaʼn David te Ittái qa nya il tiʼj tuʼn tqʼojin tukʼil tuʼnju te juntl tnam. Pero xi tqʼamaʼn Ittái jlu te: «Aqine ajbʼel teya kxel nmaʼne jun yol axix tok twitz Qman ex twitza, aya Tat Rey, noq jaʼx jatum ktela, ax ikx weye axtzun chin tele, qa tuʼn qanqʼin ex qa tuʼn qkyim» (2 Sam. 15:6, 18-21).
Ten Ittái tzʼaqli twitz David, aju rey otoq jaw tskʼoʼn Jehová.
Maske te juntl tnam qe keretita, qe peletita ex qe guitita, ojtzqiʼntoq kyuʼn qa a Jehová aju Dios axix tok ex ok kyqʼoʼn toklen David tuʼnju a jaw tskʼoʼn Jehová. Tuʼn jlu, jaku txi qqʼamaʼn qa xi tqʼoʼn David nim chjonte tej kyonin xinaq lu tiʼj.
a Toj ley tzaj tqʼoʼn Dios toj Deuteronomio 23:3 a 6, tzaj qʼamaʼn qa mintiʼ kyoklen ammonita ex moabita kyxol Israel. Bʼalo a t-xilen jlu qa mlaytoq tzaj qʼoʼn kyoklen tiʼj tkyaqil ex mlay che ten te jumajx kyxol Israel. Pero xi qʼoʼn ambʼil kye tuʼn kyyolin ex tuʼn kyanqʼin kyxol Israel. Jaku tzʼok tkeʼyina uʼj Perspicacia para comprender las Escrituras, jaku tzʼokxa jatumel in tqʼamaʼn «Ammonitas» ex yajxitl toj subtítulo «Se casan con israelitas».
