1. ¿Tiʼ in kubʼ kynaʼn junjun aj kyex pakbʼal? (Ax ikx qʼonka twitza tiʼj foto).

 IN CHE pakbʼan tmajen Jehová tuʼnju kʼujlaʼn kyuʼn ex kyaj tuʼn tok kyojtzqiʼn xjal. Ateʼ erman kygan tuʼn kypakbʼan, atzun junjuntl mintiʼ in che tzalaj aj tbʼant kyuʼn. ¿Tiquʼn? Tuʼnju ateʼ junjun in che tzaj xobʼ ex in kubʼ kyximen qa mlay bʼant kypakbʼan. Atzun junjuntl, mintiʼ in kubʼ kynaʼn bʼaʼn tuʼn kyxiʼ visitaril kye xjal qa mintiʼ otoq tzaj qʼoʼn txokbʼil kyiʼj. Ateʼ txqantl in che tzaj xobʼ tuʼnju mlay che ok bʼiʼn. Moqa ateʼ junjuntl o txi xnaqʼtzaʼn kye tuʼn miʼn kyqʼojin. Kykyaqil erman lu, kʼujlaʼn Jehová kyuʼn, pero kwest in nela kye tuʼn kyyolin kyukʼil xjal tiʼj tbʼanel tqanil. Maske ikju, in nok tilil kyuʼn tuʼn kypakbʼan tuʼnju in nel kynikʼ tiʼj qa nim toklen tuʼn tbʼant kyuʼn. Nimxix in tzalaj Jehová kyiʼj.

2. ¿Tiquʼn mintiʼ tuʼn ttzaj bʼaj tkʼuʼja qa mintiʼ in tzalaja aj tpakbʼana?

² ¿Yajtzun teya? ¿Kwestpe in nela teya tuʼn tpakbʼana? Qa in bʼaj jlu tiʼja, miʼn tzaj bʼaj tkʼuʼja. Qa mintiʼxix in nok  qeʼ tkʼuʼja tiʼjxa, in tzaj tyekʼin jlu qa mintiʼ in jaw tnimsaʼn tibʼa. Tuʼnju nyalo taja tuʼn tok bʼaj kywitz xjal tiʼja ex nya taja tuʼn tqʼojina kyukʼil. Ax ikx, mintiʼ in kubʼ qnaʼn bʼaʼn qa mintiʼ in qo ok bʼiʼn kyuʼn xjal aj qonin kyiʼj. In nel tnikʼ Jehová tiʼj tkyaqilju in nok weʼya twitz ex taj tuʼn tonin tiʼja (Is. 41:13). Toj xnaqʼtzbʼil lu, qo yolil tiʼj jweʼ tiʼ jaku bʼant quʼn ex jaku tzʼonin qiʼj tuʼn qtzalaj mas toj pakbʼabʼil.

KTEL TIPUMALA TUʼN TYOL DIOS

3. ¿Tiʼ onin tiʼj Jeremías tuʼn kukx tpakbʼan?

³ Kukx o tzʼonin Tyol Jehová kyiʼj tmajen tej t-xi qʼoʼn jun kyoklen kwest. Qo ximen tiʼjju bʼaj tiʼj profeta Jeremías. Tej t-xi samaʼn tuʼn Jehová tuʼn t-xiʼ pakbʼal, tzaj xobʼ ex tqʼama: «Ma kʼwaʼlx qine ex mlay bʼant nyoline» (Jer. 1:6). ¿Tiʼ onin tiʼj Jeremías tuʼn miʼn ttzaj xobʼ? Onin Tyol Jehová tiʼj tuʼn tten tipumal. Tqʼama: «Nnoʼk tyola tuj wanmiye ik tzaʼn jun qʼaqʼ in naj nim tuʼn ex in julin max tuj nbʼaqile. Maske ma tzʼok tilil wuʼne tuʼn tweʼ nyoline, pero mintiʼx in weʼ nyoline» (Jer. 20:​8, 9). Nya fácil tuʼn tyolin Jeremías kyukʼil xjal, pero onin tqanil yolin tiʼj tuʼn tten tipumal tuʼn tjapun toklen.

4. ¿Tzeʼn in nonin qiʼj aj quʼjin ex aj qximen tiʼj Tyol Dios? (Colosenses 1:​9, 10).

⁴ Ax ikx in tzaj qʼuqbʼaʼn qkʼuʼj tuʼn Tyol Jehová. Tej t-xi ttzʼibʼin apóstol Pablo kye okslal te Colosas, xi tqʼamaʼn kye qa kʼonil kyojtzqibʼil tiʼj axix tok tuʼn «kybʼete bʼaʼnxix ik tzaʼn tajbʼil Qajaw [ . . . ] ex tuʼn kybʼinchanteye bʼaʼn tuj tkyaqil» (kjawil uʼjit Colosenses 1:​9, 10). Ex in xi qbʼinchaʼn bʼaʼn aj qpakbʼan. Ik tzeʼn ma tzʼel qnikʼ tiʼj, in chʼiy qʼuqbʼil qkʼuʼj tiʼj Jehová ex mas in nel qnikʼ tiʼj tiquʼn nim toklen tuʼn qpakbʼan tiʼj Tkawbʼil aj quʼjin tiʼj Tyol ex aj qximen tiʼj.

5. ¿Tiʼ jaku bʼant quʼn tuʼn tonin Tyol Dios qiʼj?

⁵ Tuʼn tonin Tyol Dios qiʼj, bʼaʼn tuʼn tel qpaʼn ambʼil tuʼn qxnaqʼtzan tiʼj, tuʼn tjaw quʼjin ex tuʼn qximen tiʼj. ¿Tiʼ jaku bʼant tuʼna qa mintiʼ in nel tnikʼa tiʼj jun texto? Tbʼanel qa ma txi tjyoʼna tqanil tiʼj texto toj Índice de las publicaciones Watch Tower ex aju uʼj Onbʼil tuʼn kyxnaqʼtzan testigos de Jehová. Qa kukx ma tzʼel tpaʼna ambʼil tuʼn t-xnaqʼtzana tjunalxa, kchʼiyel qʼuqbʼil tkʼuʼja tiʼj Tyol Dios (1 Tes. 5:21).  Ex qa ma tzʼok qeʼ mas tkʼuʼj tiʼj Biblia, mas ktzalajela aj tyolina kyukʼil txqantl tiʼjju o tzʼel tnikʼa tiʼj.

BʼINCHANKU TTENA TIʼJ PAKBʼABʼIL

6. ¿Tiquʼn il tiʼj tuʼn tbʼaj qbʼinchaʼn qten naʼmxtoq qxiʼ pakbʼal?

⁶ Mas ktzalajela aj tyolina kyukʼil xjal qa ma bʼaj tbʼinchaʼna ttena. Atzun jlu bʼant tuʼn Jesús, bʼaj tbʼinchaʼn kyten t-xnaqʼtzbʼen tej naʼmxtoq kyxi tsamaʼn pakbʼal (Luc. 10:​1-11). Tuʼnju xi kybʼinchaʼn aju xi tqʼamaʼn Jesús kye, kubʼ kynaʼn nim tzalajbʼil tiʼj aqʼuntl bʼant kyuʼn (Luc. 10:17).

7. ¿Tzeʼn jaku bʼaj qbʼinchaʼn qten tiʼj pakbʼabʼil? (Ax ikx qʼonka twitza tiʼj foto).

⁷ ¿Tzeʼn jaku bʼaj qbʼinchaʼn qten tiʼj pakbʼabʼil? Jaku qo ximen tiʼj tzeʼn jaku txi qqʼamaʼn tbʼanel tqanil toj qex qyol. Ax ikx, jaku qo ximen tiʼj kabʼe moqa oxe tiʼ jaku tzaj kyqʼamaʼn xjal qe toj pakbʼabʼil ex tiʼ tzaqʼwebʼil jaku txi qqʼoʼn. Iktzun tten, aj qyolin kyukʼil xjal, mlay qo tzaj xobʼ, jaku qo tzeʼn ex jaku kubʼ qyekʼin tbʼanel qmod.

8. ¿Tiquʼn in che ok mojbʼaʼn tmajen Jehová ik tzeʼn jun kʼil?

⁸ Ajbʼen jun techel tuʼn apóstol Pablo tuʼn ttzaj tyekʼin alkye qoklen toj pakbʼabʼil. Tqʼama jlu: «Aju qʼinumabʼl lu atzun taʼ qujxi, aqoʼ ik qten ik tzaʼn kʼil, txʼotxʼ» (2 Cor. 4:7). Aju qʼinumabʼil, atz in yolin tiʼj tbʼanel tqanil tiʼj Tkawbʼil Dios ex in nonin tuʼn kyklet xjal (2 Cor. 4:1). ¿Yajtzun kʼil? Atz in yolin kyiʼj tmajen Jehová in che pakbʼan. Toj ambʼil tej tanqʼin Pablo, in che ajbʼentoq kʼil kyuʼn comersyant tuʼn t-xi kyiʼn tiʼchaq nim kyoklen ik tzeʼn wabʼj, vino moqa pwaq. Toj ambʼil jaʼlo, o tzaj tqʼoʼn Jehová jun tbʼanel qoklen tuʼn t-xi qpakbʼan tbʼanel tqanil. Tuʼn tonbʼil, jaku ten qipumal tuʼn kukx tjapun qoklen tuʼn qpakbʼan.

QANINXA TIPUMALA TE JEHOVÁ

9. ¿Tiʼ jaku tzʼonin qiʼj tuʼn miʼn qtzaj xobʼ qa mintiʼ in qo ok bʼiʼn kyuʼn xjal? (Ax ikx qʼonka twitza tiʼj foto).

⁹ Atlo maj jaku qo tzaj xobʼ tuʼnju mlay qo ok bʼiʼn kyuʼn xjal. ¿Tiʼ jaku tzʼonin qiʼj? Qo ximen tiʼj kynaʼj Dios apóstol bʼant tej t-xi qʼamaʼn kye tuʼn ya miʼn  kypakbʼan. Mintiʼ xi kyqʼoʼn ambʼil tuʼn kytzaj xobʼ, sino xi kyqanin te Jehová tuʼn tonin kyiʼj tuʼn kyyolin tiʼj tyol tukʼil kyipumal. Jun rat e tzaj tzaqʼweʼn tuʼn Jehová (Hech. 4:​18, 29, 31). Ax ikx qe, jaku txi qqanin onbʼil te Jehová aj qtzaj xobʼ. Qqaninx te tuʼn tonin qiʼj tuʼn tkubʼ qyekʼin qkʼujlabʼil kyiʼj xjal ex nya tuʼn qtzaj xobʼ.

10. ¿Alkyeqe kyaje onbʼil o tzaj tqʼoʼn Jehová tuʼntzun tjapun qoklen te testigo de Jehová? (Isaías 43:​10-12).

¹⁰ O tzaj tqʼoʼn Jehová ambʼil qe tuʼn qok te Ttestiw (kjawil uʼjit Isaías 43:​10-12). Ex o tzaj ttziyen tuʼn tonin qiʼj tuʼn miʼn qtzaj xobʼ. Qo xnaqʼtzan tiʼj kyaje tumel tzeʼn in nonin qiʼj. Tnejel, at Jesús qukʼil aj qpakbʼan (Mat. 28:​18-20). Tkabʼin, o txi tqʼoʼn Jehová kyoklen anjel tuʼn kyonin qiʼj (Apoc. 14:6). Toxin, o tzaj tqʼoʼn Jehová xewbʼaj xjan tuʼn tonin qiʼj tuʼn ttzaj qnaʼn aju o tzʼel qnikʼ tiʼj (Juan 14:​25, 26). Ex tkyajin, ateʼ erman tuʼn kyxiʼ qukʼil. Noq tuʼn tonbʼil Jehová ex qe erman, jaku ten qipumal tuʼn kukx qpakbʼan.

TEN TBʼANEL T-XIMBʼETZA EX TMODA

11. ¿Tiʼ jaku bʼant tuʼna tuʼn tyolina kyukʼil mas xjal? (Ax ikx qʼonka twitza tiʼj foto).

¹¹ ¿In tzaj bʼaj tkʼuʼja tuʼnju mintiʼ in che kanet xjal tuʼna kyja? Qa ikju, jaku kubʼ t-xjelina jlu: «¿Jatumel ateʼ? ¿In che aqʼunan moqa in che loqʼen?» (Hech. 16:13). Tibʼajxi jlu, jaku kubʼ t-ximana tuʼn tpakbʼana kyoj kay. In tzaj tqʼamaʼn jun ermano Joshua tbʼi jlu: «Mas o tzaj qʼoʼn ambʼil weye tuʼn npakbʼane akux in bʼet nxiʼye toj merkad, kyoj centro comercial ex jatumel in che weʼ kar». Ax ikx, junx tukʼil Bridget, aju t-xuʼjil, in che ex pakbʼal aj tkux bʼaj Qʼij ex te qale kyoj qʼij domingo. O tzʼonin jlu kyiʼj tuʼn kykanet mas xjal kyuʼn kyja (Efes. 5:​15, 16).

12. ¿Tzeʼn jaku tzʼel qnikʼ tiʼj tiʼ nimen kyuʼn xjal ex tiʼ in tzaj bʼaj kykʼuʼj tiʼj?

¹² Qa mintiʼ in nok kyqʼoʼn xjal kywiʼ qiʼj aj qpakbʼan, jaku qo ximen tiʼj tiʼ nimen kyuʼn ex tiʼ in tzaj bʼaj kykʼuʼj tiʼj. Tuʼn t-xi tzyet tyolin Joshua ex Bridget kyukʼil xjal, in najbʼen xjel tok kyiʼj tratado kyuʼn. Jun techel, aj tajbʼen tratado ¿Tiʼ teya t-xim tiʼj Xjan Uʼj? kyuʼn, in xi  kyqʼamaʼn jlu kye xjal: «Ateʼ junjun xjal in nok qeʼ kykʼuʼj tiʼj qa tukʼil Dios tzajni Biblia, atzun txqantl mintiʼ in xi kynimen. Yajtzun teya, ¿tiʼ t-ximbʼetza tiʼj?». Aj tbʼant jlu kyuʼn, nim maj in xi tzyet kyyolin kyukʼil xjal.

13. ¿Tiquʼn jaku qo tzalaj aj qpakbʼan maske mintiʼ in qo yolin tukʼil jun xjal moqa mintiʼ in qo ok bʼiʼn? (Proverbios 27:11).

¹³ Maske mintiʼ in qo ok bʼiʼn kyuʼn xjal aj qpakbʼan, ya otoq japun twi qoklen. ¿Tiquʼn? Tuʼnju ya otoq qo pakbʼan ik tzeʼn in tzaj tqʼamaʼn Jehová ex Jesús (Hech. 10:42). Tuʼntzunju, miʼn tzaj qbʼis qa mintiʼ otoq qo yolin tukʼil jun xjal moqa mintiʼ otoq qo ok bʼiʼn, sino jaku qo tzalaj tuʼnju in xi qbʼinchaʼn aju in tzaj tqanin Jehová qe (kjawil uʼjit Proverbios 27:11).

14. ¿Tiʼ in kubʼ qnaʼn aj tkanet jun xjal at tbʼanel tanmi kyuʼn txqantl erman toj pakbʼabʼil ex tiquʼn?

¹⁴ Ax ik in kubʼ qnaʼn tzalajbʼil aj tkanet jun xjal at tbʼanel tanmi kyuʼn txqantl erman toj pakbʼabʼil. In noq tmojbʼaʼn revista Xqʼuqʼil pakbʼabʼil ik tzeʼn aj qjyon tiʼj jun kʼwal otoq txi spet. Nim xjal in che jyon tiʼj toj nim lugar. Pero aj tkanet kʼwal, in che tzalaj kykyaqilx ex nya oʼkx aju xjal otoq kanet kʼwal tuʼn. Ax ikx qe, junx in qo aqʼunan tuʼn kykanet xjal at jun tbʼanel kyanmi. Qkyaqilx jaku qo onin tuʼn t-xi pakbʼet kye xjal toj tembʼil te pakbʼabʼil. Ex qkyaqilx, in kubʼ qnaʼn tzalajbʼil aj t-xi tzyet tuʼn tpon jun xjal toj chmabʼil.

KUKX TEN TKʼUJLALILA

15. ¿Tiʼ jaku tzʼonin qiʼj tuʼn qtzalaj mas toj pakbʼabʼil? (Mateo 22:​37-39; ax ikx qʼonka twitza tiʼj foto).

¹⁵ Qa kukx ma ten qkʼujlalil tiʼj Jehová ex kyiʼj xjal, mas qo ktzalajel toj pakbʼabʼil (kjawil uʼjit Mateo 22:​37-39). Ximana tiʼj tzalajbʼil in kubʼ tnaʼn Jehová aj qpakbʼan ex aju tzalajbʼil kbʼel kynaʼn xjal aj t-xi tzyet kyxnaqʼtzan. Ex miʼn tzikʼ tnaʼl tuʼna qa jaku che klet xjal in xi kybʼiʼn tbʼanel tqanil (Juan 6:40; 1 Tim. 4:16).

16. ¿Tiʼ jaku bʼant quʼn tuʼn qtzalaj toj pakbʼabʼil maske mintiʼ in qo etz qja? Yolina tiʼj jun techel.

¹⁶ ¿Yajtzun qa mintiʼ in netza tjaya? Qa ikju, ximana tiʼj tkyaqilju jaku bʼant tuʼna  tuʼn tkubʼ tyekʼina tkʼujlabʼila tiʼj Jehová ex kyiʼj xjal. Tej ttzaj pandemia te COVID-19, mintiʼ etz Samuel ex Dania kyja. Kwest ok ambʼil lu, pero e pakbʼan toj teléfono, kubʼ kytzʼibʼin carta ex xi kyqʼoʼn xnaqʼtzbʼil tiʼj Biblia toj Zoom. Ax ikx pakbʼan Samuel toj clínica jatumel ok qʼanin tiʼj cáncer. Tqʼama jlu: «Aj qikʼ kyoj ambʼil kwest, jaku tzaj qbʼis, jaku qo sikt ex jaku tzʼok qʼuqbʼil qkʼuʼj toj prueba. Tuʼntzunju, nim toklen aju tzalajbʼil in kubʼ qnaʼn aj qajbʼen te Jehová». Toj ax ambʼil lu, jaw tzʼaq Dania ex ten twitz watbʼil oxe xjaw. Ex ajbʼen jun silla de ruedas tuʼn toj qaq xjaw. In tzaj tqʼamaʼn Dania jlu: «Xi nbʼinchaʼne tkyaqilju jaku bʼant wuʼne. In pakbʼane te jun enfermera pon visitaril weye ex kye xjal pon kyiʼn qe tiʼchaq qjaye. Ax ikx, in yoline toj teléfono tukʼil jun xuʼj in naqʼunan toj jun empresa médica». Ax tok, mlaytoq bʼant nim tiʼchaq tuʼn Samuel ex Dania, pero xi kybʼinchaʼn aju jakutoq bʼant kyuʼn. Tuʼn jlu, kubʼ kynaʼn nim tzalajbʼil.

17. ¿Tiʼ jaku bʼant quʼn tuʼn kyonin qiʼj kykyaqil nabʼil ma qo yolin tiʼj?

¹⁷ Jaku tzʼonin qiʼj qe nabʼil ma qo yolin tiʼj toj xnaqʼtzbʼil lu qa ma txi qbʼinchaʼn kykyaqilx. Jaku che ok qmojbʼan ik tzeʼn qe ingrediente te jun receta. Tbʼanel wabʼj kbʼantel quʼn qa ma che ajbʼen kykyaqil ingrediente. Ax ik, qa ma txi qbʼinchaʼn kykyaqil nabʼil ma qo yolin tiʼj, kʼonil qiʼj tuʼn miʼn ttzaj qbʼis ex jaku qo tzalaj mas toj pakbʼabʼil.