AT NIM tipumal qokslabʼil moqa qʼuqbʼil qkʼuʼj. Jun techel, taj Satanás tuʼn ya miʼn qajbʼen te Jehová, pero in nonin qokslabʼil qiʼj tuʼn tkubʼ «tyupit tkyaqil plech in kʼant» aj ttzaj t-xoʼn qiʼj (Efes. 6:16). Ax ikx, jaku tzʼonin qokslabʼil tuʼn kyikʼx nim nya bʼaʼn quʼn ik tzeʼn jun witz. Tqʼama Jesús jlu kye t-xnaqʼtzbʼen: «Noqwit at kyokslabʼle, maske noq chʼin ik tzaʼn jun tal twitz mostaza, jakulo txi kymaʼne teju witz lu: Tikʼa tzalu, txiʼya ma chixin. Kʼikʼeltzun» (Mat. 17:20). Tuʼnju jaku tzʼonin qokslabʼil qiʼj tuʼn tchʼiy qamiwbʼil tukʼil Jehová, tbʼanel qa ma qo xnaqʼtzan kyiʼj xjel lu: ¿Tiʼ aju qokslabʼil? ¿Tzeʼn kbʼel qyekʼin qa at qokslabʼil? ¿Tiʼ jaku bʼant quʼn tuʼn kukx tchʼiy? ¿Ex alqiʼj ktel qokslabʼil moqa qʼuqbʼil qkʼuʼj? (Rom. 4:3).

Tuʼn tten qokslabʼil, nya oʼkx tuʼn t-xi qnimen ex tuʼn tel qnikʼ tiʼj qa ax tok aju in tzaj tqʼamaʼn Tyol Dios, tuʼnju in tzaj tqʼamaʼn qa ax ikx in xi kyimen nya bʼaʼn anjel qa at Dios ex qa in che tzaj xobʼ (Sant. 2:19). Qa ikju, ¿tiʼtzun aju qokslabʼil?

Aj tyolin Tyol Dios tiʼj qokslabʼil, in tzaj tyekʼin kabʼe tiʼ. Tnejel, in tzaj tqʼamaʼn qa «tuʼn qokslabʼl in qeʼxix qkʼuʼj tiʼj tuʼn qkʼmonte aju in qo ayon tiʼj» (Heb. 11:1a). Qa at qokslabʼil, in nok qeʼ qkʼuʼj tiʼj qa ax tok tkyaqilju in tzaj tqʼamaʼn Jehová ex qa kjapunel twiʼ. Jun techel, tqʼama Jehová jlu kye aj Israel: «Mintiʼ jun maj miʼnwit jawil qʼij ex mintiʼ jun maj miʼnwit tzʼok qonikʼan. Ax ikx mlayx bʼant tuʼn miʼn tjapun nyole kyaj bʼant tiʼj tukʼil nmajene David» (Jer. 33:20, 21). ¿Ope kubʼ qximen jun maj qa mlay tzʼetz Qʼij tuʼntzun miʼn tten qonikʼen nix spikʼun? Qa qʼuqli qkʼuʼj tiʼj qa toj tumel in naqʼunan tkyaqil jlu ex qa in qʼoʼn Txʼotxʼ welt tiʼj Qʼij ik tzeʼn bʼantni tiʼj tuʼn Jehová, ¿jakupe kubʼ qximen qa mlay japun kywiʼ tyol o tzaj ttziyen? Mlayx kubʼ qximen jlu (Is. 55:10, 11; Mat. 5:18).

Tkabʼin, «tuʼn qokslabʼl in qeʼxix qkʼuʼj tiʼj qa axix tok aju mintiʼ qʼanchaʼl» (Heb. 11:1b). Qo yolin tiʼj jun techel. Qo ximen tiʼj qa in tzaj tqanin jun tal kʼwaʼl qe tiquʼn ojtzqiʼn quʼn qa ax tok at kyqʼiqʼ. Maske naʼmx tok qqʼoʼn qwitz tiʼj kyqʼiqʼ, nya kwest tuʼn t-xi qchikʼbʼaʼn te kʼwaʼl alkyeqe yekʼbʼil at tiʼj kyqʼiqʼ. In xi qqʼamaʼn te qa in qo xewin tuʼn kyqʼiqʼ, qa in che yukch tzeʼ tuʼn ex junjuntl tiʼ. Aj tok qeʼ tkʼuʼj tal kʼwaʼl tiʼj qa ax tok at kyqʼiqʼ noq kyuʼn qe yekʼbʼil ateʼ, in xi tnimen jun tiʼ naʼmx tok tkeʼyin. Chʼixmi axju in bʼaj tiʼj qokslabʼil, in ten aj tel qnikʼ kyiʼj junjun yekʼbʼil (Rom. 1:20).

Jaku ten qokslabʼil aj tel qnikʼ kyiʼj junjun yekʼbʼil, tuʼntzunju nim toklen tuʼn tten qojtzqibʼil «tiʼj ju yol axix tok» (1 Tim. 2:4). Pero nya oʼkx jlu kbʼantel quʼn. Kubʼ ttzʼibʼin apóstol Pablo qa in kubʼ qyekʼin qokslabʼil tuʼn «qanmi» (Rom. 10:10). In nel qnikʼ tiʼj qa nya  oʼkx tuʼn t-xi qnimen aju axix tok, sino il tiʼj tuʼn tok qqʼoʼn toklen. Iktzun tten kbʼel qyekʼin qokslabʼil, toj juntl yol, qo anqʼil ik tzeʼn taj Jehová (Sant. 2:20). Qa at jun xjal mintiʼ in nok tqʼoʼn toklen axix tok, jakulo tzʼel tikʼen qe yekʼbʼil ateʼ noq tuʼn tok lepeʼ tiʼjju nimen tuʼn, moqa noq tuʼn tkubʼ tbʼinchaʼn il (2 Ped. 3:3, 4; Jud. 18). Tuʼn jlu, nya kykyaqil xjal te ambʼil ojtxe ten kyokslabʼil tej tok kykeʼyin junjun milagr (Núm. 14:11; Juan 12:37). Oʼkx in nonin xewbʼaj xjan tuʼn tten tokslabʼil jun xjal qa kʼujlaʼn axix tok tuʼn ex qa in nel tikʼun yol nya ax tok (Gál. 5:22; 2 Tes. 2:10, 11).

Kyxol tmajen Jehová ten nim kyokslabʼil toj ambʼil ojtxe, ten aj kawil David (Heb. 11:32, 33). Pero mlay txi qqʼamaʼn qa kykyaqil toj tja David ten nim kyokslabʼil. Jun techel, mintiʼ kubʼ tyekʼin Eliab, aju ttzik, tokslabʼil tej tok tilin David tuʼnju tajtoq tuʼn tok tbʼiʼn mas tqanil tiʼjju in bʼanttoq tuʼn Goliat (1 Sam. 17:26-28). Mintiʼ in nul itzʼ jun xjal tukʼil tokslabʼil ex mintiʼ in nel tiqen kyiʼj ttat. Tuʼntzunju, ten tokslabʼil David noq tuʼnju ten tbʼanel tamiwbʼil tukʼil Jehová.

Toj Salmo 27:1 tqʼama David alkye tten chʼiy tokslabʼil. Toj versículo 2 ex 3 in tzaj tyekʼin qa ximen tiʼjju otoq tzikʼ toj tanqʼibʼil ex tiʼjju bʼant tuʼn Jehová tuʼn tklet kyiʼj aj qʼoj. Atzun toj versículo 4 in tzaj tyekʼin qa ok tqʼoʼn toklen tja Jehová. Toj versículo 6 in tzaj tyekʼin qa kʼulin te Jehová junx kyukʼil junjuntl aj Israel. Toj versículo 7 ex 8, in nel qnikʼ tiʼj qa jyon onbʼil tukʼil Jehová tej tnaʼn Dios te. Toj versículo 11 tqʼama qa tajtoq tuʼn ttzaj t-xnaqʼtzaʼn Jehová te tuʼntzun tbʼet toj tbʼe. Nimtoq toklen toj twitz David tuʼn tten tokslabʼil, ex tuʼntzunju kubʼ t-xjelin tiʼwtlo bʼaj tiʼj noqwit mintiʼ ten tokslabʼil (versículo 13, TNM).

Jaku ten qokslabʼil ik tzeʼn te David qa ma tzʼel qkanoʼn tiʼj t-ximbʼetz ex qa ma tzʼel qkanoʼn tiʼjju bʼant tuʼn ik tzeʼn in tzaj tyekʼin Salmo 27. In chʼiy qokslabʼil aj tok qojtzqiʼn axix tok, tuʼntzunju qa mas ma qo xnaqʼtzaʼn tiʼj Tyol Dios ex kyiʼj quʼj, mas nya kwest kbʼel qyekʼin qmod lu aju in tzaj tqʼoʼn xewbʼaj xjan (Sal. 1:2, 3). Aj qxnaqʼtzan, qpaʼmil ambʼil tuʼn qximen tiʼj, tuʼnju qa ma qo ximen, kbʼantel qqʼon chjonte. Qa mas qaj tuʼn t-xi qqʼoʼn chjonte te Jehová, mas kbʼel qyekʼin qokslabʼil aj qpon kyoj chmabʼil ex aj qyolin tiʼj qʼuqbʼil qkʼuʼj kyukʼil txqantl (Heb. 10:23-25). Ax ikx, in kubʼ qyekʼin qokslabʼil qa kukx ma qo naʼn Dios ex qa mintiʼ in xi qqʼoʼn ambʼil tuʼn qkubʼ numj (1 Tes. 5:17; 1 Ped. 5:7). Qa at qokslabʼil, in nonin qiʼj tuʼn t-xi qbʼinchaʼn qe  tiʼchaq, atzun qe qbʼinchbʼen in che onin qiʼj tuʼn tchʼiy qokslabʼil (Sant. 2:22).

Toj qonikʼen tej chʼixtoq tkyim Jesús, tqʼama jlu kye t-xnaqʼtzbʼen: «Qeʼk kykʼuʼje tiʼj Dios, ax ikx qeʼk kykʼuʼje wiʼje» (Juan 14:1). Tuʼn jlu in nel qnikʼ tiʼj qa il tiʼj tuʼn tten qokslabʼil tiʼj Jesús ex nya oʼkx tiʼj Jehová. ¿Tzeʼn kbʼantel quʼn? Qo xnaqʼtzan tiʼj oxe tten.

Tnejel, bʼaʼn tuʼn tkubʼ qximen qa tzaj tqʼoʼn Jehová chojbʼil te jun oyaj qe. Tqʼama Pablo jlu: «Tuʼn wanqʼine [...] tuʼn wokslabʼle tiʼj Tkʼwaʼl Dios in kʼujlanjtze tuʼn, ex xi tqʼon tibʼ tuʼn tkyim tuʼntzun nklete» (Gál. 2:20). Aj tten qokslabʼil tiʼj Jesús, in nok qeʼ qkʼuʼj tiʼj qa te qe chojbʼil bʼant tuʼn, qa in najbʼen tuʼn Jehová tuʼn tkubʼ tnajsaʼn qil, qa tuʼn jlu at qʼuqbʼil qkʼuʼj tuʼn qanqʼin te jumajx ex qa atzun matij yekʼbʼil at tiʼj tkʼujlabʼil Jehová at qiʼj (Rom. 8:32, 38, 39; Efes. 1:7). A jlu kʼonil qiʼj tuʼn miʼn qkubʼ numj kyuʼn nya bʼaʼn qximbʼetz (2 Tes. 2:16, 17).

Tkabʼin, qnaʼntz qa jaku qo ok laqʼeʼ ttxlaj Jehová noq tuʼn chojbʼil. Ex tuʼn jlu jaku qo naʼn Dios te Jehová tuʼn tkyaqil qkʼuʼj tuʼnju jaku qo pon laqʼeʼ «twitz tqʼuqbʼil jatum taʼ t-xtalbʼil tuj tqʼijlalil ok tul tajbʼenxix qe» (Heb. 4:15, 16; 10:19-22). Qa ma qo naʼn Dios, kʼonil qiʼj tuʼn ten qipumal tuʼn tel qikʼun jun il (Luc. 22:40).

Toxin, qo nimen te Jesús. Tqʼama apóstol Juan qa ktel qchwinqlal te jumajx qa ma ten qokslabʼil tiʼj Jesús, pero qa ma mintiʼ ma txi qnimen, tqʼama qa kbʼel ten tqʼoj Dios qibʼaj (Juan 3:36, TNM). Bʼaʼn tuʼn tok qqʼoʼn qwiʼ tiʼj tej tqʼama Juan qa junxitl aju tuʼn tten qokslabʼil tukʼilju tuʼn t-xi qnimen Jesús. Tuʼntzunju, in kubʼ qyekʼin qokslabʼil tiʼj Jesús aj t-xi qnimen tyol. In bʼant jlu quʼn aj «tjapun tley» quʼn, toj juntl yol, tuʼn t-xi qnimen tkyaqilju kyaj t-xnaqʼtzaʼn ex kyaj tqʼamaʼn (Gál. 6:2). Ax ikx, in xi qnimen Jesús aj t-xi qbʼiʼn qe tqanil in tzaj tqʼoʼn te «majen in bʼant taqʼun [...] ex at tnabʼl» (Mat. 24:45). Qa ma kubʼ qbʼinchaʼn aju in tzaj tqʼamaʼn Jesús qe, ktel qipumal tuʼn kyikʼx nya bʼaʼn quʼn (Mat. 7:24, 25).

Jun maj, tqʼama jun xjal jlu te Jesús: «Kxel wokslaʼne Tat, chin tonintza tuʼn tten mastl wokslabʼle» (Mar. 9:24). Attoq chʼin tokslabʼil xjal lu, pero el tnikʼ tiʼj qa iltoq tiʼj tuʼn tten mas tokslabʼil. Ik tzeʼn te, qkyaqilx qaj tuʼn tchʼiy qokslabʼil ex qkyaqilx jaku bʼaj qchʼiysaʼn toj ambʼil jaʼlo. Ik tzeʼn ma tzʼel qnikʼ tiʼj, in bʼant jlu quʼn aj quʼjin tiʼj Tyol Dios ex aj qximen tiʼj, ex a jlu in nonin qiʼj tuʼn tchʼiy qkʼujlabʼil tiʼj Jehová. Ax ikx, in chʼiy qokslabʼil aj qkʼulin te Jehová kyukʼil erman, aj qyolin tiʼj qʼuqbʼil qkʼuʼj kyukʼil txqantl ex aj qnaʼn Dios tkyaqil maj. Qa ma tzʼok tilil quʼn tuʼn tchʼiy qokslabʼil aj tkubʼ qbʼinchaʼn qe tiʼchaq lu, kukx qo tel toj tkʼujlabʼil Dios (Jud. 20, 21).