1. ¿Alkyeqe e onin tuʼn tten kʼloj okslal te Filipos?

TEJ tpon apóstol Pablo, Silas, Lucas ex Timoteo toj tnam Filipos, e kanet nim xjal kyuʼn aqeju kyajtoq tuʼn tok kybʼiʼn tbʼanel tqanil tiʼj Tkawbʼil Dios. Aʼyeju kyaje okslal lu in noktoq tilil kyuʼn ex e onin tuʼn tten jun kʼloj okslal toj tnam aju. Kykyaqil qe akʼaj t-xnaqʼtzbʼen Jesús lu ok kychmon kyibʼ, bʼalo toj tja Lidia jun xuʼj okslal bʼaʼn bʼinchan xtalbʼil (Hech. 16:40).

2. ¿Alkyeqe nya bʼaʼn e ok weʼ kʼloj okslal te Filipos twitz?

² Aju akʼaj kʼloj okslal lu ok weʼ naj twitz nya bʼaʼn. E ajbʼen aj qʼoj tiʼj axix tok tuʼn Satanás tuʼn tel kyiʼn ambʼil kye kyaje okslal lu tuʼn kypakbʼan. Tzyet Pablo ex Silas kyuʼn aj kawil, e ok jubʼin tuʼn tzeʼ ex e okx qʼoʼn toj cárcel. Tej tikʼ juntl qʼij, i etz tzaqpiʼn. ¿Tiʼ bʼant kyuʼn tej kyetz tzaqpiʼn? E xiʼ visitaril kye akʼaj okslal ex xi kyqʼuqbʼaʼn kykʼuʼj. Yajxitl, ikʼ bʼet Pablo ex Silas junx tukʼil Timoteo toj tnam, atzunte Lucas kyajlo ten toj tnam. ¿Tiʼ kymod akʼaj okslal kubʼ kyyekʼin? Ax ikx kye kukx e ajbʼen te Jehová noq tuʼn tonbʼil xewbʼaj xjan (Filip. 2:12). Attoq nim tiquʼn tuʼn ttzalaj Pablo kyiʼj.

3. Ik tzeʼn in tzaj tqʼamaʼn Filipenses 1:9 a 11, ¿tiʼ xi tqanin Pablo toj tnaʼj Dios?

³ Tej tikʼ juntl lajaj abʼqʼi, xi ttzʼibʼin Pablo jun carta te kʼloj okslal lu. Aj tjaw quʼjin, jun rat in nel qnikʼ tiʼj qa attoq tkʼujlabʼil Pablo kyiʼj okslal te Filipos. Xi tqʼamaʼn kye qa kukxtoq in che tzaj tnaʼn ex qa ten nimxix tkʼujlabʼil kyiʼj kykyaqil, ik tzeʼn tkʼujlabʼil Cristo  kubʼ tyekʼin (Filip. 1:8). Ax ikx xi tqʼamaʼn kye qa naʼn Dios kyiʼj. Xi tqanin Pablo te Jehová tuʼn kukx tchʼiy mas kykʼujlabʼil kyxolx, tuʼn tel kynikʼ tiʼj alkye mas nim toklen, tuʼn tten saq toj kyanmi, tuʼn miʼn tten kypaltil ex tuʼn kukx tten tbʼanel kybʼinchbʼen. Ax ikx toj ambʼil jaʼlo jaku che onin tyol Pablo qiʼj (kjawil uʼjit Filipenses 1:9-11). Toj xnaqʼtzbʼil lu, qo xnaqʼtzal kyiʼj qeju tiʼchaq tqʼama Pablo ex kʼelel qnikʼ tiʼj tzeʼn jaku kubʼ qbʼinchaʼn.

4. a) Ik tzeʼn in tzaj tqʼamaʼn 1 Juan 4:9 ex 10, ¿tzeʼn o kubʼ tyekʼin Jehová tkʼujlabʼil qiʼj? b) ¿Jniʼ qkʼujlabʼil ktel tiʼj Jehová?

⁴ Kubʼ tyekʼin Jehová qa at nimxix tkʼujlabʼil qiʼj tej ttzaj tsamaʼn Tkʼwaʼl tzalu twitz Txʼotxʼ tuʼn tkyim tuʼn tchjet qil (kjawil uʼjit 1 Juan 4:9, 10). Tuʼnju kubʼ tyekʼin tkʼujlabʼil lu, in nonin qiʼj tuʼn tok qkʼujlaʼn (Rom. 5:8). ¿Jniʼ qkʼujlabʼil ktel tiʼj Jehová? Tzaqʼwet xjel lu tuʼn Jesús tej t-xi tqʼamaʼn jlu te jun fariseo: «Kʼuʼjlama Qman Dyos tuʼn tkyaqil tanmiya, tuʼn tkyaqil tkʼuʼja ex tuʼn tkyaqil tnabʼla» (Mat. 22:36, 37, XT). Nya qaj tuʼn tten oʼkx chʼin qkʼujlabʼil tiʼj Jehová, sino qaj tuʼn kukx tchʼiy junjun qʼij. Xi tqʼamaʼn Pablo kye okslal te Filipos tuʼn kukx tchʼiy kykʼujlabʼil. ¿Tiʼ jaku bʼant quʼn tuʼn kukx tchʼiy qkʼujlabʼil tiʼj Jehová?

5. ¿Tiʼ kbʼantel quʼn tuʼn kukx tchʼiy qkʼujlabʼil tiʼj Jehová?

⁵ Tuʼn tok qkʼujlaʼn Dios, nim toklen tuʼn tok qojtzqiʼn. In tzaj tqʼamaʼn Xjan Uʼj jlu: «Alkye mintiʼ tkʼujlalil, naʼnx tel tnikʼ tiʼj Dios, porke ate Dios at tkʼujlalil» (1 Juan 4:8). Tqʼama apóstol Pablo qa jaku chʼiy qkʼujlabʼil qa ma tzʼel qnikʼ tiʼj Jehová ex qa ma ten qximbʼetz kyiʼj tiʼchaq ik tzeʼn te (Filip. 1:9). Tej t-xi tzyet tuʼn qxnaqʼtzan tiʼj Xjan Uʼj, el qnikʼ kyiʼj junjun xnaqʼtzbʼil tiʼj Jehová ex onin jlu qiʼj tuʼn tok qkʼujlaʼn. Noqtzun tuʼnj, kukx chʼiy qkʼujlabʼil tiʼj Jehová tej tel mas qnikʼ tiʼj ex kyiʼj tbʼanel tmod. Tuʼn jlu in nel qnikʼ tiʼj qa nim toklen tuʼn kukx qxnaqʼtzan tiʼj Tyol Dios ex tuʼn qximen tiʼj (Heb. 4:12).

6. Ik tzeʼn in tzaj tqʼamaʼn 1 Juan 4:11, 20 ex 21, ¿tiʼ juntl tiʼ kbʼantel quʼn tuʼn tchʼiy qkʼujlabʼil?

⁶ Aju tkʼujlabʼil Jehová at qiʼj, in nonin qiʼj tuʼn kyok qkʼujlaʼn erman (kjawil uʼjit 1 Juan 4:11, 20, 21). Tuʼnju in qo ajbʼen te Jehová ex in nok tilil quʼn tuʼn tel qkanoʼn qe tmod, jaku kubʼ qximen qa nya kwest tuʼn tchʼiy qkʼujlabʼil kyiʼj erman. Ax ikx jaku kubʼ qximen qa nya kwest tuʼnju in nel qkanoʼn tiʼj Jesús tej tkubʼ tyekʼin nim tkʼujlabʼil qiʼj ex tej tkyim tuʼn tchjet qil. Noqtzun tuʼnj, at maj kwest tuʼn t-xi qbʼiʼn kawbʼil tuʼn tok qkʼujlan qibʼ qxolx. Qo xnaqʼtzan tiʼjju bʼaj toj kʼloj okslal te Filipos.

7. ¿Tiʼ xnaqʼtzbʼil in nel qiʼn tiʼj consej xi tqʼoʼn Pablo te Evodia ex te Síntique?

⁷ Ok tilil tuʼn Evodia ex Síntique tuʼn kyajbʼen junx tukʼil apóstol Pablo. Pero el-lo kypan kyibʼ tuʼnju tzaj nya bʼaʼn kyxol. Tojju carta xi ttzʼibʼin Pablo kye okslal te Filipos, xi tqʼamaʼn kybʼi kabʼe xuʼj lu ex xi tqʼoʼn kyconsej. Tqʼamaʼn jlu: «Chin kubʼsale kywitze tuʼn kytene junx kynabʼle» (Filip. 4:2, 3). Ax ikx kubʼ t-ximen Pablo qa nimtoq toklen tuʼn t-xi tqʼamaʼn jlu te kʼloj okslal: «Miʼn txiʼ jun kyyole tiʼj juntl ex miʼn tzaj jun yol kyxole» (Filip. 2:14). Qʼuqli qkʼuʼj tiʼj qa onin consej lu kyiʼj qeju kabʼe ermana lu ex tiʼj kʼloj okslal tuʼn kukx tchʼiy kykʼujlabʼil.

8. ¿Tiquʼn kwest jaku tzʼela toj qwitz tuʼn kyok qkʼujlaʼn erman, ex tzeʼn jaku kubʼ tiʼj jlu quʼn?

 ⁸ Ik tzeʼn bʼaj tiʼj Evodia ex Síntique, kwest jaku tzʼela toj qwitz tuʼn kyok qkʼujlaʼn erman qa oʼkx ma tzʼok qqʼoʼn qwiʼ tiʼj kypaltil. Qkyaqilx in qo el txalpaj, tuʼntzunju qa oʼkx ma tzʼok qqʼoʼn qwiʼ tiʼj kypaltil erman, jaku chewix qkʼujlabʼil kyiʼj. Qo ximen tiʼj jun techel. In nel naj tiʼj tkʼuʼj jun erman tuʼn tonin tuʼn tsaqset Ja te Chmabʼil ex tuʼn jlu in kubʼ qnaʼn nya bʼaʼn tukʼil. Ex qa ma che tzaj qnaʼn tpaltil erman, tuʼn jlu ktzajel mas toj qwitz tiʼj ex knajel qkʼujlabʼil tiʼj. ¿Ape jlu in bʼaj qiʼj? Qa ikju, bʼaʼn tuʼn ttzaj qnaʼn qa maske in nok tqʼoʼn Jehová twitz tiʼj qpaltil ex tiʼj kypaltil erman, kukx kʼujlaʼn qoʼ tuʼn. Kyjuʼtzun, nim toklen tuʼn tel qkanoʼn tkʼujlabʼil Jehová ex tuʼn tok qqʼoʼn qwitz tiʼjju tbʼanel in bʼant kyuʼn txqantl. Aj tok tilil quʼn tuʼn kyok qkʼujlaʼn erman, in kubʼ qnaʼn qa mas nqayin atoʼ kytxlaj (Filip. 2:1, 2).

9. Ik tzeʼn tqʼama Pablo kye okslal te Filipos, ¿alkye junjun tiʼchaq mas nim toklen tuʼn tok qqʼoʼn qwiʼ tiʼj?

⁹ Tuʼn tonbʼil Jehová xi tqʼamaʼn Pablo kye okslal te Filipos ex kye kykyaqil okslal tuʼn tjaw kyskʼoʼn «alkyeju mas bʼaʼn» (Filip. 1:10). Kyxol jlu at aju tuʼn qonin tuʼn tok tbʼi Dios te xjan, tuʼn kyjapun twi t-ximbʼetz ex tuʼn tten mujbʼabʼil toj kʼloj okslal (Mat. 6:9, 10; Juan 13:35). Qa atz tok qwiʼ kyiʼj tiʼchaq lu, in kubʼ qyekʼin qa kʼujlaʼn Jehová quʼn.

10. ¿Tiʼ kbʼantel quʼn tuʼn miʼn tok tqʼoʼn Jehová twitz kyiʼj qpaltil?

¹⁰ Ax ikx tqʼama Pablo qa nim toklen tuʼn tten saq toj qanmi moqa tuʼn qanqʼin saq. Nya tuʼn jlu in tzaj tqanin Jehová qe tuʼn qok te tzʼaqli. Mlay qo ok te tzʼaqli ik tzeʼn te Jehová tuʼnju aj il qoʼ. Noqtzun tuʼnj, qa ma tzʼok tilil quʼn tuʼn kukx tchʼiy qkʼujlabʼil ex tuʼn qximen tiʼjju mas nim toklen, mlay tzʼok tqʼoʼn Jehová twitz kyiʼj qpaltil. Jun tten tuʼn tkubʼ qyekʼin qkʼujlabʼil, aju qa ma tzʼok tilil quʼn tuʼn miʼn tkubʼ qqʼoʼn tolsabʼil kywitz txqantl.

11. ¿Tiquʼn mintiʼ tuʼn tkubʼ qqʼoʼn tolsabʼil kywitz txqantl?

¹¹ Nya jun yaqbʼil tej tqʼama Pablo tuʼn miʼn tten qpaltil moqa tuʼn miʼn tkubʼ qqʼoʼn tolsabʼil kywitz txqantl. Jaku che kubʼ tzʼaq txqantl quʼn tuʼn saqchbʼil in jaw qjyoʼn, tuʼn qxbʼalun in nok ex tuʼnju aqʼuntl in jaw qjyoʼn. Bʼalo mintiʼ in kubʼ qbʼinchaʼn nya bʼaʼn, pero bʼisbʼajil qa ma kubʼ tnaʼn juntl nya bʼaʼn tuʼn qbʼinchbʼen ex qa ma kubʼ qqʼoʼn jun tolsabʼil twitz. Tqʼama Jesús qa mas bʼaʼn tuʼn tok kʼalet jun kaʼ moqa jun kyaʼ maʼxix tiʼj tqul jun xjal ex tuʼn tkux xoʼt toj mar, twitzju tuʼn tkubʼ tqʼoʼn tolsabʼil twitz jun t-xnaqʼtzbʼen (Mat. 18:6).

12. ¿Tiʼ xnaqʼtzbʼil in tzaj tqʼoʼn qe aju bʼant tuʼn jun mejebʼleʼn in najbʼen te precursor?

¹² Qo xnaqʼtzan tiʼj tiʼ bʼant tuʼn jun mejebʼleʼn in najbʼen te precursor tuʼn miʼn tkubʼ tqʼoʼn tolsabʼil kywitz txqantl. Toj kʼloj okslal jatumel in nok kychmon kyibʼ, attoq jun mejebʼleʼn tzmatoq in jaw aʼ kywiʼ ex atz e jaw chʼiy jatumel mintiʼtoq in bʼant nim tiʼchaq kyuʼn xjal. Kubʼ t-ximen mejebʼleʼn lu qa nya bʼaʼn tuʼn kyxiʼ tmajen Jehová toj cine nix tuʼn tok kykeʼyin jun tbʼanel película. Tuʼntzunju, nya bʼaʼn ela toj kywitz tej tok kybʼiʼn qa otoq tzʼok kykeʼyin precursor jun película. Tuʼn jlu kubʼ kyximen precursor tuʼn miʼn kyxiʼ toj cine tzmaxi aj  kychʼiy akʼaj mejebʼleʼn toj kyokslabʼil ex tuʼn tten jun tbʼanel kyximbʼetz (Heb. 5:14). Iktzun tten kubʼ kyyekʼin kykʼujlabʼil, nya oʼkx tukʼil kyyol sino tukʼil kybʼinchbʼen (Rom. 14:19-21; 1 Juan 3:18).

13. Maske mintiʼ ximen quʼn, ¿tzeʼn jaku kubʼ qqʼoʼn tolsabʼil twitz jun xjal ex tuʼn jlu jaku kubʼ tzʼaq toj il?

¹³ Ax ikx jaku kubʼ qqʼoʼn tolsabʼil twitz jun xjal aj tkubʼ qbʼinchaʼn jun tiʼ ex tuʼn jlu jaku kubʼ tzʼaq toj il. ¿Tzeʼn jaku bʼaj jlu? Qo ximen tiʼj qa at jun xjal in xnaqʼtzan tiʼj Tyol Dios ex in kyaj ttzaqpiʼn tuʼn tkʼan qʼeʼn, maske kwest o tzʼela toj twitz. In nel tnikʼ tiʼj qa mlayx txi tkʼaʼn chʼin qʼeʼn. Mintiʼ xi tiʼn nim ambʼil tuʼn kybʼant chʼixpubʼil tuʼn ex jaw aʼ twiʼ. Pero jun qʼij, in xi qʼoʼn txokbʼil tiʼj ex kyiʼj junjuntl tuʼn kyxiʼ tja juntl erman. Mintiʼ in ximen erman tiʼj tuʼn tkubʼ tqʼoʼn tolsabʼil toj tbʼe, pero in xi tqʼamaʼn jlu: «Ya o jaw aʼ twiʼya ex at t-xew Jehová tukʼila. Naʼntza qa aju tuʼn qjakʼunte qibʼ atzun jun mod in tzaj tqʼoʼn xewbʼaj xjan. Qa ma bʼant tjakʼunte tibʼa, mlay txi tkʼaʼna nim qʼeʼn». Nya il tiʼj tuʼn t-xi qqʼamaʼn tiʼ jaku tzaj tiʼj akʼaj erman qa ma txi tbʼiʼn nya bʼaʼn consej lu.

14. ¿Alkye tten in che onin chmabʼil qiʼj tuʼn tjapun quʼn aju nabʼil in tzaj tqʼamaʼn Filipenses 1:10?

¹⁴ In che onin chmabʼil qiʼj tuʼn kyjapun nabʼil quʼn aju in tzaj tqʼamaʼn Filipenses 1:10 toj nimku tten. Tnejel, in tzaj tnaʼn qe alkye mas nim toklen toj twitz Jehová. Tkabʼin, in tzaj t-xnaqʼtzaʼn qe tzeʼn tuʼn tkubʼ qbʼinchaʼn aju in el qnikʼ tiʼj ex iktzun tten mlay ten qpaltil. Ex toxin, in nonin qiʼj tuʼn tkubʼ qyekʼin qkʼujlabʼil ex  tuʼn tten tbʼanel qbʼinchbʼen (Heb. 10:24, 25). Qa mas in tzaj qʼuqbʼaʼn qkʼuʼj kyuʼn erman, mas kchʼiyel qkʼujlabʼil kyiʼj ex tiʼj Jehová. Qa in nok qkʼujlaʼn Jehová ex qe erman tuʼn tkyaqil qanmi, kʼokel tilil quʼn tuʼn miʼn tkubʼ qqʼoʼn tolsabʼil twitz jun erman.

15. ¿Tiʼ t-xilen tuʼn tten tbʼanel qbʼinchbʼen?

¹⁵ Kubʼsan Pablo twitz Jehová tuʼn tten tbʼanel kybʼinchbʼen okslal te Filipos (Filip. 1:11). Kyxol qeju tbʼanel kybʼinchbʼen, jaku txi qqʼamaʼn qa ten kykʼujlabʼil tiʼj Jehová ex kyiʼj erman. Ax ikx tej kypakbʼan tiʼj Jesús ex tiʼj qʼuqbʼil kykʼuʼj. Ex xi tqʼamaʼn Pablo kye qa in che qoptzʼaj kyxol xjal (Filip. 2:15). Tbʼanel techel ajbʼen tuʼn Pablo tuʼnju tqʼama Jesús qa che okeltoq t-xnaqʼtzbʼen ik tzeʼn «spikʼun kyxol xjal» (Mat. 5:14-16). Nya oʼkxju, ax ikx xi tqʼamaʼn Jesús kye tuʼn kyok xjal te t-xnaqʼtzbʼen kyuʼn ex tuʼn kyok te testiw tiʼj «tuj tkyaqil twitz txʼotxʼ» (Hech. 1:8; Mat. 28:18-20). In ten tbʼanel qbʼinchbʼen aj in kubʼ qqʼoʼn pakbʼabʼil tnejel toj qanqʼibʼil, tuʼnju nim toklen aqʼuntl lu.

16. ¿Alkye tten in tzaj tyekʼin Filipenses 1:12 a 14 qa jaku qoptzʼaj qspikʼumal maske in qo ok weʼ twitz nya bʼaʼn? (Qʼonka twitza tiʼj tilbʼilal tok tiʼj t-xkʼomil).

¹⁶ Noq tiʼxku in nikʼ toj qanqʼibʼil, jaku qoptzʼaj qspikʼumal kyxol xjal. At maj, aj qok weʼ twitz nya bʼaʼn jaku tzaj tqʼoʼn jlu ambʼil qe tuʼn qpakbʼan. Atzun jlu bʼaj tiʼj apóstol Pablo. Tej t-xi ttzʼibʼin tcarta kye okslal te Filipos, attoq pres toj jun ja toj tnam Roma. Maske ikju, kukx pakbʼan tukʼil tzalajbʼil kye soldad ex kye xjal e pon visitarilte. Aju techel kubʼ tqʼoʼn Pablo, onin kyiʼj erman tuʼn tten kyipumal ex  tuʼn tok «tilil kyuʼn tuʼn t-xi kymaʼn tyol Dios» ex mintiʼ e tzaj xobʼ (kjawil uʼjit Filipenses 1:12-14; 4:22).

17. Qʼamantza jun techel tiʼj tzeʼn tuʼn tten tbʼanel qbʼinchbʼen toj ambʼil jaʼlo maske in qo ok weʼ twitz nya bʼaʼn.

¹⁷ Ateʼ nim erman jaku kubʼ kyyekʼin qa mintiʼ in che tzaj xobʼ ik tzeʼn te Pablo. In che anqʼin kyoj tnam jatumel mlay che pakbʼan kyoj bʼe nix ttzi kyja xjal, tuʼntzunju in xi kyjyoʼn junjuntl tumel tzeʼn tuʼn kypakbʼan (Mat. 10:16-20). Toj jun kyxol qe tnam lu, xi tqʼamaʼn jun ansyan in bʼet kyojele Ja te Chmabʼil kye erman tuʼn kypakbʼan kye toj kyja, kye kyvesin, kye kyukʼil toj tja xnaqʼtzbʼil, toj aqʼuntl ex kye xjal ojtzqiʼn kywitz kyuʼn. Tej tikʼ kabʼe abʼqʼi, mas chʼiy kybʼet kʼloj okslal toj circuito aju. Bʼalo mintiʼ in bʼaj jlu qiʼj, maske ikju, jaku tzʼel qiʼn tbʼanel xnaqʼtzbʼil tiʼjju bʼant kyuʼn erman: tzʼok tililxix quʼn tuʼn qpakbʼan mas tiʼj tbʼanel tqanil ex bʼaʼn tuʼn tok qeʼ qkʼuʼj tiʼj qa tzul tqʼoʼn Jehová qipumal tuʼn qex twitz alkyexku nya bʼaʼn (Filip. 2:13).

18. ¿Alkyeqe consej bʼaʼn tuʼn t-xi qnimen toj ambʼil jaʼlo?

¹⁸ Tuʼnju in qo anqʼin kyoj bʼajsbʼil tqʼijlalil, nim toklen tuʼn t-xi qbʼiʼn consej xi tqʼoʼn Pablo kye okslal te Filipos. Tzʼok tilil quʼn tuʼn tel qnikʼ tiʼj alkyeqe tiʼchaq mas nim kyoklen, tuʼn miʼn tten qpaltil, tuʼn miʼn tkubʼ qqʼoʼn tolsabʼil kywitz txqantl ex tuʼn tten tbʼanel qbʼinchbʼen. Qa ma bʼant jlu quʼn, kʼonil qiʼj tuʼn kukx tchʼiy qkʼujlabʼil ex kjawil qnimsaʼn Jehová, aju Qtat at nim tkʼujlabʼil.