¿QAJPE tuʼn ttzaj qʼoʼn jun qoklen toj kʼloj okslal aju mlay tzaj qʼoʼn qe toj ambʼil jaʼlo? Bʼalo o txi qʼoʼn oklenj lu te juntl erman moqa tzaj qʼoʼn qe toj ambʼil ojtxe. Pero mlaylo bʼant tuʼn tjapun quʼn tuʼnju o qo tijen, o tzaj jun yabʼil qiʼj, mintiʼxix qpwaq moqa tuʼnju in qo qxqʼuqin kyiʼj toj qja. Ax ikx, olo ten jun qoklen toj nimku ambʼil ex kyaj qtzaqpiʼn tej kybʼant chʼixpubʼil tuʼn ttnam Jehová. Noq tiʼxku o bʼaj, in kubʼlo qximen qa mintiʼ in xi qqʼoʼn tkyaqil te Jehová. Qa ikju, tuʼn jlu jaku tzaj bʼaj qkʼuʼj. Noqtzun tuʼnj, ¿tiʼ jaku bʼant quʼn tuʼn miʼn tkubʼ qiʼj tuʼn bʼis, tuʼn qʼoj moqa tuʼn nya bʼaʼn qximbʼetz? ¿Tiʼ kʼonil qiʼj tuʼn kukx qtzalaj?

Jaku tzʼel qiʼn jun tbʼanel xnaqʼtzbʼil tiʼjju bʼaj tiʼj Juan el Bautista. Xi qʼoʼn junjun tbʼanel toklen tmajen Dios lu. Noqtzun tuʼnj, mintiʼlo kubʼ t-ximen qa kteltoq mas ambʼil toj cárcel ik tzeʼn ambʼil tuʼn tpakbʼan. Maske ikju, kukx tzalaj toj tanqʼibʼil. ¿Tiʼ onin tiʼj? ¿Ex tiʼ jaku bʼant quʼn tuʼn kukx qtzalaj aj tchʼexpaj qoklen?

Toj abril te abʼqʼi 29 tiʼj ambʼil qʼiʼn jaʼlo, xi tzyet tuʼn t-xi tqʼamaʼn Juan tqanil tiʼj Mesías kye xjal tuʼn tel kynikʼ tiʼj aj tul, ik tzeʼn otoq tqʼama Jehová. Tqʼama jlu: «Tajtz tiʼj kyanmiye, porke ma tzul laqʼeʼ ju kawbʼil in tzaj tuj kyaʼj» (Mat. 3:2; Luc. 1:12-17). Ateʼ nim xjal xi kynimen tqanil lu. Axpe ikx, e tzaj nimku xjal najchaq tuʼn tok kybʼiʼn tqanil xi tqʼamaʼn, ex nimku xjal ajtz tiʼj kyanmi ex jaw aʼ kywiʼ. Ax ikx, mintiʼ tzaj xobʼ Juan tuʼn t-xi tqʼamaʼn kye nya bʼaʼn nejenel kye okslabʼil alkyetoq kykastiw kbʼel qʼoʼn qa mintiʼ ma kubʼ kychʼexpuʼn kymod (Mat. 3:5-12). Aju mas tbʼanel toklen Juan ten, aju tej tjaw aʼ twiʼ Jesús tuʼn toj octubre te abʼqʼi 29. Toj ambʼil aju, xi tzyet tuʼn t-xi tqʼamaʼn Juan kye xjal tuʼn kyok lepeʼ tiʼj Jesús, aju Mesías tziyen maj (Juan 1:32-37).

Tuʼnju bʼant jun tbʼanel aqʼuntl tuʼn Juan, tqʼama Jesús jlu tiʼj: «Kyxol kykyaqil xjal mintiʼ jun mas maʼ toklen ik tzaʼn te Juan aju in che bʼyan xjal tuʼn» (Mat. 11:11). Jaku  txi qqʼamaʼn qa ok tqʼoʼn Juan toklen aqʼuntl bʼant tuʼn toj tajbʼebʼil te Jehová ex qa tzalaj tiʼj kʼiwlabʼil xi tkʼamoʼn. Ik tzeʼn te Juan, aʼyeju tmajen Jehová o che ajbʼen toj tkyaqil ambʼil, kukx in che tzalaj kyiʼj kʼiwlabʼil o tzaj kykʼamoʼn. Qo ximen tiʼjju bʼaj tiʼj ermano Terry, o tzʼajbʼen mas te 50 abʼqʼi toj tkyaqil ambʼil junx tukʼil Sandra aju t-xuʼjil. Tqʼama jlu: «O chin ajbʼene toj nimku oklenj, ik tzeʼn te precursor regular, betelita, precursor especial, te ansyan in bʼet kyojele Ja te Chmabʼil, te superintendente de distrito, ex jaʼlo in chin ajbʼene juntl maj te precursor especial». In qo tzalaj aj ttzaj qʼoʼn junjun qoklen toj ttnam Jehová. Pero il tiʼj tuʼn tok tilil quʼn tuʼn kukx qtzalaj, ik tzeʼn kʼelel qnikʼ tiʼj techel kyaj tqʼoʼn Juan.

Tuʼnju kukx xi tqʼoʼn Juan chjonte te Jehová kyiʼj toklen, onin jlu tiʼj tuʼn kukx ttzalaj. Jun techel, tej otoqxi jaw aʼ twiʼ Jesús, ya nya nim t-xnaqʼtzbʼen Juan ten, atzunte Jesús kukx chʼiy kybʼet t-xnaqʼtzbʼen. Tzaj kybʼis t-xnaqʼtzbʼen Juan tej tbʼaj jlu, ex xi kyqʼamaʼn te qa in che bʼyantoq xjal tuʼn Jesús ex qa kykyaqil xjal in cheʼxtoq tukʼil (Juan 3:26). Xi ttzaqʼweʼn Juan jlu kye: «Aju xinaq tkubʼ xuʼj ttxlaj, atzunte chmilbʼajju; atzunju tamiw chmilbʼaj tkubʼ ttxlaj ex in bʼin tiʼj tyol chmilbʼaj, nimxix in tzalaj tiʼj tyol chmilbʼaj; kyjaʼtzun tten nimxix in chin tzalaje tiʼj jlu» (Juan 3:29). Mintiʼ ok tmojbʼaʼn Juan tibʼ tukʼil Jesús ex mintiʼ kubʼ t-ximen qa mintiʼtoq toklen aqʼuntl otoq bʼant tuʼn noq tuʼnju mas tbʼanel aqʼuntl in bʼanttoq tuʼn Jesús. Sino kukx tzalaj tuʼnju ok te «tamiw chmilbʼaj».

Tuʼnju ten jun tbʼanel t-ximbʼetz Juan, onin tiʼj tuʼn kukx ttzalaj maske kwesttoq toklen at. Jun techel, tuʼnju ok te nazareo atxix tej tul itzʼj, mintiʼ kʼan tiʼj vin (Luc. 1:15). Tqʼama Jesús jlu tiʼj tanqʼibʼil: «Mintiʼ o waʼn ex mintiʼ o kʼan tiʼj nintz waʼn nnoʼk kyuʼne». Atzunte Jesús ex qe t-xnaqʼtzbʼen mintiʼtoq tuʼn kyanqʼin ik tzeʼn qe nazareo ex jakutoq che anqʼin ik tzeʼn qe txqantl xjal (Mat. 11:18, 19). Ax ikx, mintiʼ bʼant jun milagr tuʼn Juan, pero bʼiʼntoq tuʼn qa jakutoq che bʼant milagr kyuʼn t-xnaqʼtzbʼen Jesús, axpe ikx kyuʼn qeju otoq che ok lepeʼ tiʼj (Mat. 10:1; Juan 10:41). Pero mintiʼ ok tqʼoʼn Juan twiʼ tiʼj jlu, sino tiʼjju toklen otoq txi tqʼoʼn Jehová.

Ax ikx qe, qa ma tzʼok qqʼoʼn toklen aju in bʼant quʼn jaʼlo toj qajbʼebʼil te Jehová, kukx qo tzalajel. In tzaj tqʼamaʼn Terry jlu, aju ma qo yolin tiʼj: «Atz in ximane kyiʼj oklenj tzaj qʼoʼn weye». Aj t-ximen tiʼj tajbʼebʼil toj tkyaqil ambʼil, tqʼamatl jlu: «Mintiʼ in tzaj nbʼise tiʼjju o bʼant wuʼne. Oʼkx in che tzaj nnaʼne tbʼanel ambʼil».

Qa ma tzʼel qnikʼ tiʼj qa in qo aqʼunan tukʼil Jehová, atzun jlu kʼonil qiʼj tuʼn tok qqʼoʼn toklen aqʼuntl in bʼant quʼn ex mas qo tzalajel tuʼn (1 Cor. 3:9). Qo ximen tiʼj jun techel, qa kukx ma tzʼel qsuʼn quq tiʼj jun tbʼanel xar, kukx kqoptzʼajel tuʼnju kʼokel qxqʼuqin. Ax ikx, qa ma qo ximen tiʼj tbʼanel qoklen tuʼn qajbʼen te Jehová, mlay txi qqʼoʼn ambʼil kye nya bʼaʼn qximbʼetz tuʼn tel kyiʼn tzalajbʼil in qnaʼn. Miʼn tzʼok qmojbʼaʼn aqʼuntl in bʼant quʼn tukʼilju in bʼant kyuʼn txqantl ex miʼn kubʼ qximen qa mas tbʼanel oklenj o txi qʼoʼn kye txqantl ik tzeʼn qe (Gál. 6:4).

Kubʼlo t-ximen Juan qa mlaytoq pakbʼan toj nim ambʼil, pero mintiʼlo kubʼ t-ximen qa jun rat kbʼel bʼaj (Juan 3:30). Tej otoqxi tzikʼ junlo qaq xjaw tjawlen aʼ twiʼ Jesús tuʼn Juan, okx qʼoʼn Juan toj cárcel tuʼn aj kawil Herodes toj abʼqʼi 30. Maske ikju, ok tilil tuʼn tuʼn kukx tpakbʼan (Mar. 6:17-20). ¿Tiʼ onin tiʼj tuʼn kukx ttzalaj maske chʼexpaj junjun tiʼ toj tanqʼibʼil? Tzalaj tuʼnju ok tqʼoʼn twiʼ tiʼjju mas nim toklen toj twitz Jehová.

Tej tokxtoq Juan toj cárcel, ok tbʼiʼn tqanil tiʼjju in bʼanttoq tuʼn Jesús (Mat. 11:2; Luc. 7:18). Qʼuqlitoq tkʼuʼj tiʼj qa a Jesús Mesías, pero kubʼlo t-xjelin qa kjapunel tkyaqilju kyaj qʼamaʼn toj Xjan Uʼj tiʼj Mesías. Jun techel,  tuʼnju kʼokeltoq Mesías te aj kawil, ¿kxelpe tzyet naj tuʼn tkawin? ¿Okpe kʼeletz tiʼn Juan toj cárcel? Tajtoq Juan tuʼn telxix tnikʼ tiʼjju kbʼanteltoq tuʼn Jesús, tuʼntzunju xi tsamaʼn kabʼe t-xnaqʼtzbʼen tuʼn t-xi kyqanin jlu te: «¿Apeya ju Crist aju at tulel, ex qa qo ayole tiʼj juntl?» (Luc. 7:19). Tej kymeltzʼaj, oklo tbʼiʼn Juan kyyol t-xnaqʼtzbʼen tej t-xi kyqʼamaʼn qa in che bʼanttoq milagr tuʼn Jesús ex qa otoq tzaj tqʼamaʼn jlu: «Qe moẍ in bʼant kykeʼyin, qe kox in bʼant kybʼet, qe xjal at txʼaʼk kyiʼj mintiʼ qʼanbʼil tiʼj in che bʼanix, qe chkyin kywiʼ in bʼant kybʼin, qe kyimni in che jaw anqʼin, ex in pakbʼanjtz tqanil kolbʼil kye mebʼa» (Luc. 7:20-22).

Nimlo e onin tqanil lu tiʼj Juan. In che japuntoq yol tuʼn Jesús aʼyeju e kyaj qʼamaʼn tiʼj Mesías. Maske mlaytoq tzʼetz tiʼn Juan toj cárcel, ojtzqintoq tuʼn Juan qa nya noqx gan aqʼuntl otoq bʼant tuʼn. Maske tokxtoq toj cárcel, attoq nim tiquʼn tuʼn ttzalaj.

Qa ma tzʼok qqʼoʼn qwiʼ tiʼj qajbʼebʼil te Jehová ik tzeʼn bʼant tuʼn Juan, kukx kʼikʼex quʼn tukʼil tzalajbʼil ex pasens (Col. 1:9-11). Tuʼn kyten qmod lu, nim toklen tuʼn quʼjin tiʼj Tyol Dios ex tuʼn qximen tiʼj, tuʼnju in tzaj tnaʼn qe qa in nok tqʼoʼn Jehová toklen aqʼuntl in bʼant quʼn (1 Cor. 15:58). Tqʼama Sandra jlu, aju ma qo yolin tiʼj: «O chin ok laqʼeʼye mas ttxlaj Jehová tuʼnju in chin uʼjine tiʼj jun capítulo tiʼj Tyol junjun qʼij, ex in nonin wiʼje tuʼn tok nqʼoʼne nwiʼye tiʼj ex nya tiʼjju in bʼaj wiʼje». Ax ikx jaku tzʼok qkeʼyin tqanil tiʼj pakbʼabʼil twitz tkyaqil Txʼotxʼ. Iktzun tten, mlay tzʼok qqʼoʼn qwiʼ tiʼjju in bʼaj qiʼj sino tiʼjju in bʼant tuʼn Jehová. Tqʼamatl Sandra jlu: «Kyuʼn programa in che etz junjun xjaw toj JW Broadcasting^®, mas nqayin atoʼye tiʼj ttnam Jehová ex kukx in qo tzalaje tiʼj qoklene».

Toj ambʼil tej tpakbʼan Juan, kubʼ tyekʼin tmod ik tzeʼn Elías tuʼnju mintiʼ tzaj xobʼ. Ax ikx ten t-ximbʼetz Elías ik tzeʼn qe (Luc. 1:17; Sant. 5:17). Qa in xi qqʼoʼn chjonte te Jehová ex qa ma tzʼok qqʼoʼn qwiʼ tiʼj qajbʼebʼil ik tzeʼn bʼant tuʼn Juan, kukx qo tzalajel tiʼj qoklen ex noq tiʼxku qo okel weʼ twitz.