1. Tuʼnju in kubʼ tin tibʼ Jehová, ¿tiʼ tbʼanel yol tqʼama David tiʼj?

¿JAKUPE txi qqʼamaʼn qa in kubʼ tin tibʼ Jehová? Jaku. Tqʼama rey David jlu tiʼj: «In tzaj tqʼoʼna tmaqbʼila te kolbʼil weye, [...] ex tuʼnju mintiʼ in jaw tnimsan tibʼa in chin oke te matij» (Sal. 18:35, TNM). Tej tkubʼ ttzʼibʼin David qe yol lu, bʼalo ximen tiʼj qʼij tej tpon profeta Samuel tja ttat tuʼn tjaw tskʼoʼn juntl aj kawil toj tnam Israel. Maske atoq David mankbʼil kʼwal kyxol wajxaq tkʼwal Jesé, jaw skʼoʼn tuʼn Jehová tuʼn tok te aj kawil te t-xel Saúl (1 Sam. 16:1, 10-13).

2. ¿Tiʼ qo xnaqʼtzal tiʼj toj xnaqʼtzbʼil lu?

² Axlo t-xim David ten tiʼj Jehová ik tzeʼn tqʼama jun salmista: «In tzaj mokʼeʼ tuʼn tkuʼtz tkeʼyin kyaʼj ex txʼotxʼ. In jaw twabʼan Qman aju mebʼa tkubʼ twitz txʼotxʼ, ex aju xjal mintiʼ at te nneʼtz tiʼn tuj yajbʼil te, tuʼntzun tkubʼ tqʼuqbʼaʼn kyxol qe xjal maʼ kyoklen» (Sal. 113:6-8). Toj xnaqʼtzbʼil lu kʼelel qnikʼ tiʼj tzeʼn kubʼ tin tibʼ Jehová ex tiʼ xnaqʼtzbʼil jaku tzʼel qiʼn tiʼj. Ax ikx kʼelel qnikʼ tiʼj tiʼ xnaqʼtzbʼil jaku tzʼel qiʼn tiʼj aj kawil Saúl, tiʼj profeta Daniel ex tiʼj Jesús tej tkubʼ kyin kyibʼ.

3. ¿Tzeʼn tmod Jehová in kubʼ tyekʼin qukʼil ex tiʼ in tzaj tyekʼin jlu?

³ Tuʼnju tmod Jehová in kubʼ tyekʼin kyukʼil tmajen aj il, in nel qnikʼ tiʼj qa in kubʼ tin tibʼ. Nya oʼkx in tzaj tqʼoʼn ambʼil tuʼn qkʼulin te, sino in qo ok tqʼoʼn te tamiw (Sal. 25:14). In qo ok te tamiw noq tuʼnju tzaj tqʼoʼn Tkʼwal  tuʼn tchjet qil. ¡Jun tbʼanel yekʼbʼil tiʼj qʼaqʼbʼil tkʼuʼj!

4. ¿Tiʼ o tzaj tqʼoʼn Jehová qe ex tiquʼn?

⁴ Qo xnaqʼtzan tiʼj juntl techel jatumel in tzaj tyekʼin qa in kubʼ tin tibʼ Jehová. Tej qkubʼ tbʼinchaʼn, nya iltoq tiʼj tuʼn ttzaj tqʼoʼn ambʼil qe tuʼn tkubʼ qximen tiʼ kbʼantel quʼn tukʼil qanqʼibʼil. Noqtzun tuʼnj, o qo kubʼ tbʼinchaʼn ik tzeʼnx te tilbʼilal ex o tzaj tqʼoʼn ambʼil qe tuʼn tkubʼ qximen tiʼ kbʼantel quʼn. Maske mas nim toklen Jehová qwitz, taj tuʼn qajbʼen te tuʼn tkyaqil qkʼuʼj ex ojtzqiʼn quʼn qa in tzaj tiʼn tbʼanel qe aj qnimen te (Deut. 10:12; Is. 48:17, 18). In xi qqʼoʼn chjonte te Jehová tuʼnju in kubʼ tin tibʼ.

5. ¿Tzeʼn in qo tzaj t-xnaqʼtzaʼn Jehová tuʼn tkubʼ qin qibʼ? (Qʼonka twitza tiʼj tilbʼilal tok tiʼj t-xkʼomil).

⁵ Tuʼnju tmod Jehová in kubʼ tyekʼin qukʼil, in qo tzaj t-xnaqʼtzaʼn tzeʼn tuʼn tkubʼ qin qibʼ. Maske mintiʼ juntl xjal at mas tnabʼil ik tzeʼn te Jehová, in nok tqʼoʼn twiʼ tiʼjju in xi qqʼamaʼn te. Jun techel, xi tqʼoʼn ambʼil te Tkʼwal tuʼn tonin tiʼj tuʼn kybʼant tiʼchaq (Prov. 8:27-30; Col. 1:15, 16). Maske oʼkx Jehová at nimxix tipumal, in xi tqʼoʼn kyoklen txqantl. Jun techel, xi tqʼoʼn toklen Jesús te aj Kawil toj Tkawbʼil ex kxel tqʼoʼn kyoklen 144,000 xjal tuʼn kykawin tukʼil Tkʼwal (Luc. 12:32). Xi t-xnaqʼtzaʼn Jehová Jesús tuʼn tok te aj Kawil ex te Tnejel Pal (Heb. 5:8, 9). Ax ikx, in xi tqʼoʼn xnaqʼtzbʼil kye qeju che kawil tukʼil Tkʼwal. Noqtzun tuʼnj, mlay tzʼok tqʼoʼn twitz tiʼj tkyaqilju kbʼantel kyuʼn, sino qʼuqli tkʼuʼj tiʼj qa kbʼantel tajbʼil kyuʼn (Apoc. 5:10).

6, 7. ¿Tzeʼn jaku tzʼel kykanoʼn qeju at jun kyoklen tiʼj Jehová?

 ⁶ Maske nya il tiʼj tuʼn kyonin txqantl tiʼj Jehová, in xi tqʼoʼn kyoklen. Yajtzun qe, ¿ilpe tiʼj tuʼn t-xi qqʼoʼn kyoklen txqantl? Jun techel, ¿tzeʼn jaku tzʼel kykanoʼn mambʼaj ex qe ansyan tiʼj Jehová? Jaku bʼant kyuʼn aj t-xi kyqʼoʼn junjun oklenj kye txqantl ex tuʼn miʼn tok kyqʼoʼn kywitz tiʼj tkyaqilju in bʼant kyuʼn. Qa ma bʼant jlu kyuʼn, nya oʼkx kbʼantel aqʼuntl, sino ax ikx kxel kyqʼoʼn xnaqʼtzbʼil kye txqantl ex che onil kyiʼj tuʼn miʼn kytzaj xobʼ (Is. 41:10). ¿Alkye junjuntl xnaqʼtzbʼil jaku tzʼel kyiʼn qeju at jun kyoklen tiʼj Jehová?

⁷ In tzaj tyekʼin Tyol Dios qa in nok tqʼoʼn Jehová toklen aju in xi kyqʼamaʼn anjel te (1 Rey. 22:19-22). ¿Tzeʼn jaku tzʼel kykanoʼn mambʼaj tiʼj? Jun tumel, jaku txi kyqanin kye kykʼwal tzeʼn jaku bʼant jun aqʼuntl, ex qa jaku bʼant, jaku txi kybʼinchaʼn ik tzeʼn tzul kyqʼamaʼn.

8. ¿Tzeʼn kubʼ tyekʼin Jehová tpasens tiʼj Abrahán ex Sara?

⁸ Ax ikx in kubʼ tin tibʼ Jehová aj tten tpasens. Jun techel, in kubʼ tyekʼin tpasens kyiʼj tmajen aj t-xi kyqanin te tiquʼn in bʼant jun tiʼ tuʼn. Ok tqʼoʼn twiʼ tiʼj Abrahán tej t-xi tqanin te tiquʼn kbʼeltoq tnajsaʼn tnam Sodoma ex Gomorra (Gén. 18:22-33). Ex bʼaʼn tuʼn ttzaj qnaʼn tiʼ tmod kubʼ tyekʼin tej tjaw tzeʼn Sara tej tok tbʼiʼn qa tzul jun tal ex otoq tijen. Mintiʼ tzaj tqʼoj Jehová tiʼj, sino ok tqʼoʼn toklen (Gén. 18:10-14).

9. ¿Tiʼ xnaqʼtzbʼil jaku tzʼel kyiʼn mambʼaj ex ansyan tiʼj Jehová?

⁹ Qa mambʼaj moqa ansyan teya, ¿tiʼ xnaqʼtzbʼil jaku tzʼel tiʼna tiʼj Jehová? Ximana tiʼj jlu, ¿tiʼ tmoda in kubʼ tyekʼina aj ttzaj tqanin jun xjal tokx tjaqʼ tkawbʼila tiquʼn in bʼant jun tiʼ tuʼna? ¿Jun ratpe in xi tkawina, moqa in xi tbʼiʼna aju in tzaj tqʼamaʼn? In tzaj nim tbʼanel kye ja xjal ex kye kʼloj okslal aj tel kykanoʼn qeju at jun kyoklen tmod Dios. Ma tzʼel qnikʼ tiʼj tzeʼn jaku tzʼel qkanoʼn tiʼj Jehová tuʼnju in kubʼ tin tibʼ. Atzun jaʼlo, qo xnaqʼtzaʼn tiʼj junjun techel toj Tyol Dios kyiʼj xjal kubʼ kyin kyibʼ.

10. ¿Alkye tten in qo tzaj t-xnaqʼtzaʼn Jehová?

¹⁰ Tuʼnju a Jehová xnaqʼtzal qe, o kyaj tqʼoʼn qe techel toj Tyol tuʼntzun tel qiʼn xnaqʼtzbʼil kyiʼj (Is. 30:20, 21). Jaku qo ximen kyiʼj junjun xjal in yolin Tyol Dios tiʼj aʼyeju kubʼ kyyekʼin tbʼanel kymod, ik tzeʼn tej tkubʼ kyin kyibʼ. Ax ikx jaku tzʼel qiʼn xnaqʼtzbʼil kyiʼj qeju mintiʼ kubʼ kyin kyibʼ (Sal. 37:37; 1 Cor. 10:11).

11. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn Saúl?

¹¹ Qo ximen tiʼjju bʼaj tiʼj aj kawil Saúl. Tej tzmatoq kuʼxun, kubʼ t-ximen qa mlay bʼant tkyaqil tuʼn ex kubʼ tnaʼn qa nya nim toklen, axpe ikx kwest xi tkʼamoʼn junjun toklen (1 Sam. 9:21; 10:20-22). Pero tej tikʼ chʼin ambʼil t-xilen qʼoʼn toklen te aj kawil, jaw tnimsan tibʼ ex bʼant junjun tiʼ tuʼn aju mintiʼ toklen tiʼj. Jun maj, bʼaj tpasens tuʼn tayon tiʼj profeta Samuel. Mintiʼ kubʼ tin tibʼ ex mintiʼ ok qeʼ tkʼuʼj tiʼj qa kʼonil Jehová tiʼj ttnam, xi tqʼoʼn jun chojbʼil maske mintiʼtoq toklen tuʼn tbʼant tuʼn. Tuʼntzunju, ya mintiʼ tzaj kʼiwlaʼn tuʼn Jehová ex tej tikʼ ambʼil el qʼiʼn toklen te aj kawil (1 Sam. 13:8-14). In nel qnikʼ tiʼj qa tbʼanel  tuʼn tkubʼ qin qibʼ ex tuʼn miʼn tkubʼ qbʼinchaʼn jun tiʼ mintiʼ qoklen tiʼj.

12. ¿Tiʼ tbʼanel techel kyaj tqʼoʼn Daniel qwitz?

¹² Junxitl tmod profeta Daniel ten twitz Saúl ex kyaj tqʼoʼn jun tbʼanel techel qwitz. Toj tkyaqil ambʼil kubʼ tin tibʼ ex jyon onbʼil tukʼil Jehová. Jun techel, tej tajbʼen tuʼn Jehová tuʼn t-xi tqʼamaʼn tiʼ t-xilen twitzikʼ Nabucodonosor, mintiʼ jaw tnimsan tibʼ, sino tqʼama qa tuʼn Jehová otoq bʼant (Dan. 2:26-28). Tuʼntzunju, il tiʼj tuʼn tjaw qnimsaʼn Jehová tkyaqil maj aj ttzaj kyqʼamaʼn erman qa tbʼanel qo qʼon chikʼbʼabʼil ex qa tbʼanel qo pakbʼan. Bʼaʼn tuʼn tkubʼ qin qibʼ ex bʼaʼn tuʼn ttzaj qnaʼn qa mlayx bʼant tkyaqil jlu qa mintiʼ ma tzʼonin Jehová qiʼj (Filip. 4:13). Iktzun tten kʼelel qkanoʼn tiʼj tbʼanel techel kyaj tqʼoʼn Jesús. Qo xnaqʼtzan tiʼj tiquʼn in xi qqʼamaʼn jlu.

13. ¿Tiʼ xnaqʼtzbʼil jaku tzʼel qiʼn kyiʼj tyol Jesús in che kanet toj Juan 5:19 ex 30?

¹³ Maske tzʼaqli te Jesús, kukx jyon onbʼil tukʼil Jehová (kjawil uʼjit Juan 5:19, 30). Mintiʼ kubʼ t-ximen Jesús tuʼn tel tiʼn toklen Tman. Ex in tzaj tqʼamaʼn Tyol Dios jlu: «Mintiʼ kubʼ t-ximen tuʼn tel tiʼn toklen Dios ex tuʼn tok tqʼon tibʼ ik tzeʼn te» (Filip. 2:6, TNM). El tnikʼ tiʼj jniʼ toklen, ok tqʼoʼn toklen Ttat ex okx tqʼon tibʼ tjaqʼ tkawbʼil.

14. ¿Tiʼ tmod Jesús kubʼ tyekʼin tej t-xi qʼamaʼn te tuʼn tbʼant jun tiʼ tuʼn aju mintiʼ toklen tiʼj?

¹⁴ Qo ximen tiʼj tiʼ tmod Jesús kubʼ tyekʼin tej t-xi tqʼamaʼn ttxuʼ Santiago ex Juan te tuʼn kykubʼ qeʼ tal ttxlaj aj tkawin. Jun rat naj xi ttzaqʼweʼn ex xi tqʼamaʼn qa oʼkx Ttat at toklen tiʼj jlu (Mat. 20:20-23). Iktzun tten kubʼ tyekʼin qa mintiʼ toklen tiʼj tkyaqil. El tnikʼ Jesús tiʼj tiʼ jaku bʼant tuʼn ex mintiʼ ikʼ tibʼaj toklen otoq tzaj tqʼoʼn Jehová (Juan 12:49). ¿Tzeʼn jaku tzʼel qkanoʼn tiʼj?

15, 16. ¿Tzeʼn jaku kubʼ qbʼinchaʼn aju in tzaj tqʼamaʼn 1 Corintios 4:6?

¹⁵ In nel qkanoʼn tiʼj Jesús aj t-xi qbʼiʼn kawbʼil in kanet quʼn toj 1 Corintios 4:6: «Tuʼntzun tjapun kyuʼne aju tzʼibʼan tuj Tuʼjil». Tuʼntzunju, aj ttzaj tqanin jun xjal jun consej qe, miʼn txi qqʼamaʼn aju qe qximbʼetz moqa aju tnejel in  nul toj qwiʼ. Mas bʼaʼn qa ma txi qyekʼin qe consej te, aʼyeju in che kanet quʼn toj Tyol Dios ex kyoj quʼj. Iktzun tten kbʼel qyekʼin qa in kubʼ qin qibʼ ex qa in nel qnikʼ tiʼj qa mas nim kyoklen nabʼil in tzaj tqʼoʼn Jehová twitzju qe qnabʼil (Apoc. 15:3, 4).

¹⁶ Ma tzʼel qnikʼ tiʼj qa in jaw qnimsaʼn Jehová aj tkubʼ qin qibʼ ex aj tel qnikʼ tiʼj qa mlay bʼant tkyaqil quʼn. Ax ikx kʼelel qnikʼ tiʼj qa jaku qo tzalaj ex jaku ten mujbʼabʼil qxol kyukʼil txqantl kyuʼn mod lu.

17. ¿Tiquʼn in che tzalaj xjal in kubʼ kyin kyibʼ?

¹⁷ Mas jaku qo tzalaj qa ma kubʼ qin qibʼ. ¿Tiquʼn? Tuʼnju qa ma tzʼel qnikʼ tiʼj qa mlay bʼant tkyaqil quʼn, tzul qkʼamoʼn alkyexku onbʼil jaku tzaj qʼoʼn qe. Qnaʼntz aju bʼaj tej tkubʼ tqʼanin Jesús 10 xjal at lepra kyiʼj. Oʼkx jun meltzʼaj qʼol chjonte te tuʼnju otoq bʼanix tuʼn. El tnikʼ xjal lu tiʼj qa mlaytoq bʼanix tuʼnx tibʼ, tuʼntzunju meltzʼaj qʼol chjonte ex jaw tnimsaʼn Dios (Luc. 17:11-19).

18. Aj tkubʼ qin qibʼ ik tzeʼn in tzaj tqʼamaʼn Romanos 12:10, ¿tzeʼn in nonin qiʼj tuʼn tten mujbʼabʼil qxol kyukʼil txqantl?

¹⁸ Aʼyeju xjal mintiʼ in jaw kynimsan kyibʼ, chʼixme tkyaqil maj in ten mujbʼabʼil kyxol kyukʼil txqantl ex in ten tbʼanel kyamiw. ¿Tiquʼn? Tuʼnju in nel kynikʼ tiʼj qa at tbʼanel kymod txqantl ex in nok qeʼ kykʼuʼj kyiʼj. Ax ikx, in che tzalaj kyiʼj txqantl aj tbʼant tbʼanel tiʼchaq kyuʼn toj kyajbʼebʼil te Jehová, ex tuʼn tkyaqil kykʼuʼj in xi kyqʼamaʼn tbʼanel yol kye ex in nok kyqʼoʼn kyoklen (kjawil uʼjit Romanos 12:10).

19. ¿Tiquʼn nim toklen tuʼn tkubʼ qin qibʼ?

 ¹⁹ Atzun kye xjal in jaw kynimsan kyibʼ, kwest in nela te kye tuʼn t-xi kyqʼamaʼn tbʼanel yol kye txqantl tuʼnju mas kygan tuʼn t-xi qʼamaʼn tbʼanel yol kye. Ex kygan tuʼn kycompetirin kyukʼil txqantl. Mintiʼ in xi kyqʼoʼn jun kyoklen txqantl ex mintiʼ in xi kyqʼoʼn xnaqʼtzbʼil kye, tuʼnju in kubʼ kyximen qa oʼkx kye jaku bʼant aqʼuntl kyuʼn toj tumel. In kubʼ kyximen qa mas nim kyoklen kywitz txqantl ex in tzaj loʼchj kykʼuʼj kyiʼj txqantl aj tbʼant tbʼanel kyaqʼun (Gál. 5:26). Ex mintiʼ in ten kyamiwbʼil kyukʼil txqantl toj nim ambʼil. Tuʼntzunju, qa ma tzʼel qnikʼ tiʼj qa in jaw qnimsan qibʼ, qqaninx onbʼil te Jehová tuʼn tchʼexpaj qximbʼetz ex tuʼn miʼn tchʼiy nya bʼaʼn lu toj qanmi (Rom. 12:2).

20. ¿Tiquʼn kbʼel qin qibʼ?

²⁰ In xi qqʼoʼn chjonte te Jehová tuʼnju in kubʼ tqʼoʼn tbʼanel techel qwitz tuʼn tkubʼ qin qibʼ. In nel qnikʼ tiʼj jlu tuʼnju tmod in kubʼ tyekʼin kyukʼil tmajen ex qaj tuʼn tel qkanoʼn tiʼj. Ax ikx qaj tuʼn tel qkanoʼn kyiʼj xjal mintiʼ jaw kynimsan kyibʼ ex e bʼet tukʼil Dios. Kukx qnimsanktz Jehová ex qqʼonk toklen (Apoc. 4:11). Iktzun tten qo bʼetel tukʼil Dios, aju kʼujlaʼn qe xjal in kubʼ kyin kyibʼ tuʼn.