1. ¿Tiʼ chʼixpubʼil o bʼant kyuʼn nim erman ex tiquʼn?

O BʼANT junjun chʼixpubʼil kyuʼn nim millón erman noq tuʼn kyajbʼen mas te Jehová. Nim kye o kubʼ kyximen tuʼn miʼn kykubʼ mojeʼ ex ateʼ junjun mejebʼleʼn o kubʼ kyximen tuʼn miʼn ttzaj kykʼwal. Ax ikx ateʼ nim erman in che anqʼin tukʼil nya nim tiʼchaq kye. Kykyaqil erman lu in che tzalaj ex in nok qeʼ kykʼuʼj tiʼj qa ktzajel tqʼoʼn Jehová tkyaqilju at tajbʼen kye, ex mlay che kyaj tkolin. ¿Tiquʼn in xi qqʼamaʼn jlu? Tuʼnju o xqʼuqin Jehová kyiʼj tmajen toj ambʼil ojtxe. Jun techel, xi tkʼiwlaʼn Abrahán, aju «mambʼaj kye kykyaqil okslal» (Rom. 4:11).

2. a) Ik tzeʼn in tzaj tqʼamaʼn Hebreos 11:8 a 10 ex 16, ¿tiquʼn kubʼ t-ximen Abrahán tuʼn tetz toj tnam Ur? b) ¿Tiʼ kʼelel qnikʼ tiʼj toj xnaqʼtzbʼil lu?

² Kyaj tqʼoʼn Abrahán nimku tbʼanel tiʼchaq jakutoq ten te toj tnam Ur. ¿Tiquʼn? Tuʼnju «in ayontoq Abraham tiʼj ju tnam at qe t-simyentil» (kjawil uʼjit Hebreos 11:8-10, 16). ¿Alkye tnam lu? ¿Alkyeqe nya bʼaʼn ok weʼ Abrahán twitz akux in nayontoq tuʼn tjaw bʼinchaʼn tnam lu? Ex ¿tzeʼn jaku tzʼel qkanoʼn tiʼj Abrahán ex kyiʼj erman o bʼant axju kyuʼn ik tzeʼn te? Kʼelel qnikʼ kyiʼj tzaqʼwebʼil toj xnaqʼtzbʼil lu.

3. ¿Alkye tnam ayon Abrahán tiʼj?

³ Aju tnam ayon Abrahán tiʼj, atzun Tkawbʼil Dios, jatumel kkawil Jesús junx kyukʼil 144,000 okslal skʼoʼn maj. Ok tqʼoʼn Pablo tbʼi Kawbʼil lu te «tnam Jerusalén»,  aju «at tuj kyaʼj, jatum taʼ aju Dios itzʼ» (Heb. 12:22; Apoc. 5:8-10; 14:1). Xi t-xnaqʼtzaʼn Jesús kye t-xnaqʼtzbʼen tuʼn t-xi kyqanin tuʼn tul Tkawbʼil Dios ex tuʼn tbʼant tajbʼil «twitz txʼotxʼ ik tzaʼn in bʼant tuj kyaʼj» (Mat. 6:10).

4. Ik tzeʼn in tzaj tqʼamaʼn Génesis 17:1, 2 ex 6, ¿tiʼ ojtzqiʼntoq tuʼn Abrahán tiʼjju tnam moqa Kawbʼil otoq tzaj ttziyen Dios?

⁴ Mintiʼtoq ojtzqiʼn tuʼn Abrahán alkyeqe tuʼn kyten toj Tkawbʼil Dios. Toj nimku ambʼil «ewantoq» taʼ (Efes. 1:8-10; Col. 1:26, 27). Noqtzun tuʼnj, ojtzqiʼntoq tuʼn qa che okel junjun tyajil te aj kawil, ik tzeʼn otoq txi ttziyen Jehová te (kjawil uʼjit Génesis 17:1, 2, 6). Ten nim qʼuqbʼil tkʼuʼj kyiʼj ttziybʼil Dios, ok jlu ik tzeʼn ok tkeʼyin aju Skʼoʼn maj moqa Mesías, aju kkawil toj Tkawbʼil Dios. Tuʼntzunju, tqʼama Jesús jlu kye aj Judiy: «O tzalaj kyxeʼchele Abraham tuʼnju attoq tuʼn tlonte tqʼijlalil tuʼn wule; ex o til ex o tzalajxix tiʼj» (Juan 8:56). Ojtzqiʼntoq tuʼn Abrahán qa ktel kyoklen tyajil tiʼj Kawbʼil kubʼ tbʼinchaʼn Jehová ex ayon tuʼn tjapun twi yol xi ttziyen te.

5. ¿Tiquʼn in xi qqʼamaʼn qa ayon Abrahán tiʼj Kawbʼil kubʼ tbʼinchaʼn Dios?

⁵ ¿Tzeʼn kubʼ tyekʼin Abrahán qa ayon tiʼj tnam moqa Kawbʼil kubʼ tbʼinchaʼn Jehová? Tnejel, mintiʼ ten tjaqʼ tkawbʼil ni jun tnam. Mintiʼ kyaj ten anqʼil toj junx lugar ex mintiʼ onin tiʼj jun xjal tuʼn tok te aj kawil. Ax ikx, mintiʼ ok tilil tuʼn tten tex tkawbʼil, sino kukx nimen te Jehová ex ayon tuʼn tjapun twi tyol. Iktzun tten kubʼ tyekʼin qa qʼuqlixix tkʼuʼj tiʼj Dios. Qo xnaqʼtzan tiʼj junjun nya bʼaʼn ok weʼ twitz ex tiʼ jaku tzʼel qkanoʼn tiʼj.

6. ¿Tzeʼntoq tnam Ur?

⁶ Tbʼanel tnam Ur jatumel anqʼin Abrahán, mlaytoq tzʼok bʼinchaʼn nya bʼaʼn kyiʼj ex attoq tkyaqil toj. Tok jun muro tiʼj tnam ex attoq jun jul in xqʼuqin tiʼj toj oxe plaj. Tbʼaneltoq che tzʼibʼin xjal ex attoq kyojtzqibʼil tiʼj matemática. Bʼalo ten nim kʼaybʼil toj tnam Ur tuʼnju o che kanet junjun uʼj kyiʼj kʼaẍjel kyuʼn qeju in che xnaqʼtzan tiʼjju bʼaj kyiʼj xjal toj ambʼil  ojtxe. Te ladrillo qe ja, liso ex saq kykolor pared. Attoq 13 moqa 14 kwart tiʼjele jun patio bʼinchaʼn maj tuʼn abʼj.

7. ¿Tiquʼn iltoq tiʼj tuʼn tok qeʼ tkʼuʼj Abrahán tiʼj Jehová qa kxqʼuqil tiʼj ex kyiʼj toj tja?

⁷ Iltoq tiʼj tuʼn tok qeʼ tkʼuʼj Abrahán tiʼj Jehová qa kxqʼuqil tiʼj ex kyiʼj toj tja. ¿Tiquʼn? Bʼaʼn tuʼn ttzaj qnaʼn qa kyaj tqʼoʼn Abrahán ex Sara tbʼanel kyja atz Ur tuʼn tanqʼin kyoj ja xbʼalun atz Canaán. Ya mintiʼ jun muro xqʼuqin tiʼj nix jun jul maʼ t-xeʼ. Jakutoq tzʼok bʼinchaʼn nya bʼaʼn tiʼj kyuʼn aj qʼoj.

8. ¿Alkye junjun nya bʼaʼn ok weʼ Abrahán twitz toj jun ambʼil?

⁸ Maske bʼant tajbʼil Dios tuʼn Abrahán, pero at maj mintiʼ kanet nim tiʼchaq tuʼn tuʼn kykʼaʼchit toj tja. Tzaj nim weʼyaj toj tnam jatumel xi samaʼn tuʼn Jehová. Tuʼntzunju, xiʼ Abrahán kyukʼil toj tja anqʼil toj tnam Egipto toj chʼin ambʼil. Noqtzun tuʼnj, tej tanqʼin toj tnam Egipto, el qʼiʼn t-xuʼjil tuʼn faraón, aju aj kawil toj tnam. Tzaj bʼajxix tkʼuʼj Abrahán tuʼn jlu, pero xi tqʼamaʼn Jehová te faraón tuʼn taj tqʼoʼn juntl maj t-xuʼjil Abrahán (Gén. 12:10-19).

9. ¿Alkyeqe nya bʼaʼn tzaj kyiʼj toj tja Abrahán?

⁹ Ok weʼ Abrahán kyukʼil toj tja twitz junjuntl nya bʼaʼn. Mintiʼ ok ten tal Sara ex toj nimku ambʼil tzaj bʼaj kykʼuʼj tuʼn jlu. Tej tikʼ ambʼil, xi tqʼoʼn Sara Agar, aju tmajen, tuʼn tok te t-xuʼjil Abrahán. Iktzun tten jakutoq tzul kykʼwal Abrahán ex Sara tiʼj Agar. Pero tej tok ten tal Agar, ok ten xmayil tiʼj Sara. Tzaj nim nya bʼaʼn kyxol, tuʼntzunju ex lajoʼn Agar tuʼn Sara (Gén. 16:1-6).

10. ¿Tiquʼn ok qʼuqbʼil tkʼuʼj Abrahán toj malbʼil kyuʼn tiʼchaq bʼaj tiʼj Ismael ex Isaac?

¹⁰ Pon ambʼil tuʼn tok ten tal Sara ex tej tul itzʼj, Isaac tbʼi ok tqʼoʼn Abrahán. Ok tkʼujlaʼn Abrahán qe kabʼe tkʼwal: Ismael ex Isaac. Ex tlajoʼn Abrahán Ismael ex Agar tuʼnju mintiʼ kubʼ tyekʼin Ismael tbʼanel tmod tukʼil Isaac (Gén. 21:9-14). Tej tikʼ ambʼil, xi tqʼamaʼn Jehová te Abrahán tuʼn t-xi tqʼoʼn Isaac te chojbʼil (Gén. 22:1, 2; Heb. 11:17-19). Tej kybʼaj tiʼchaq lu, iltoq tiʼj tuʼn tok qeʼ tkʼuʼj Abrahán tiʼj Jehová qa kjapunel twi tyol kyiʼj tkʼwal.

11. ¿Tiquʼn ayon Abrahán tukʼil pasens tiʼj Jehová tuʼn tbʼant jun tiʼ tuʼn?

¹¹ Toj tkyaqil ambʼil aju, ten tpasens Abrahán tuʼn tayon tiʼj Jehová tuʼn tbʼant jun tiʼ tuʼn. Bʼalo qʼiʼntoq mas te 70 abʼqʼi tuʼn tej tetz toj tnam Ur kyukʼil toj tja (Gén. 11:31–12:4). Ex toj junlo 100 abʼqʼi anqʼin kyoj ja xbʼalun ex najan toj nim lugar toj txʼotxʼ te Canaán. Qʼiʼntoq 175 abʼqʼi tuʼn tej tkyim (Gén. 25:7). Noqtzun tuʼnj, mintiʼ ok tqʼoʼn twitz tiʼj tzeʼn japun twi tyol Jehová tej t-xi tqʼoʼn txʼotxʼ Canaán kye tyajil. Ax ikx, mintiʼ ok tqʼoʼn twitz tiʼjju tnam ayon tiʼj, toj juntl yol, aju Tkawbʼil Dios. Maske ikju, in tzaj tqʼamaʼn Tyol Dios qa kyim tej otoqxi «ten nim abʼqʼi twitz txʼotxʼ» (Gén. 25:8). Maske ok weʼ twitz nim nya bʼaʼn, ten nim qʼuqbʼil tkʼuʼj ex ayon tuʼn tbʼant jun tiʼ tuʼn Jehová. ¿Tiʼ onin tiʼj tuʼn tikʼx tuʼn? Ikʼx tuʼn tuʼnju xqʼuqin Jehová tiʼj toj tkyaqil tanqʼibʼil ex tuʼnju ten jun tbʼanel tamiwbʼil tukʼil (Gén. 15:1; Is. 41:8; Sant. 2:22, 23).

12. a) ¿Tiʼ in che ayon tmajen Jehová tiʼj? b) ¿Tiʼ qo xnaqʼtzal tiʼj kyoj taqikʼ che ul?

¹² Ik tzeʼn bʼant tuʼn Abrahán, ax ikx qe in qo ayon tiʼj «tnam at qe t-simyentil». Mintiʼ in qo ayon tuʼn tjaw bʼinchaʼn, tuʼnju toj 1914 tzaj tzyet tuʼn tkawin Tkawbʼil  Dios toj kyaʼj (Apoc. 12:7-10). Noqtzun tuʼnj, in qo ayon tuʼn t-xi tzyet tuʼn tkawin tibʼaj tkyaqil twitz Txʼotxʼ. Akux in pon ambʼil lu, qo okel weʼ twitz junjun nya bʼaʼn ik tzeʼn te Abrahán ex Sara. Ateʼ junjun erman o tzʼel kykanoʼn tiʼj techel kyaj tqʼoʼn Abrahán. Toj uʼj Aju Xqʼuqil, o tzʼetz txʼolbʼabʼil tiʼjju in nikʼ toj kyanqʼibʼil nimku erman in ten qʼuqbʼil kykʼuʼj ex kypasens ik tzeʼn te Abrahán ex Sara. Qo xnaqʼtzan tiʼjju o tzikʼ kyiʼj junjun erman ex qo ximen tiʼj tzeʼn jaku tzʼel qkanoʼn kyiʼj.

13. ¿Tiʼ xnaqʼtzbʼil jaku tzʼel tiʼna tiʼjju bʼant tuʼn ermano Walden?

¹³ Qbʼinchanku junjun chʼixpubʼil. Qa qaj tuʼn tkubʼ qqʼoʼn Tkawbʼil Dios tnejel toj qanqʼibʼil, bʼaʼn tuʼn tel qkanoʼn tiʼj Abrahán ex tuʼn tbʼant junjun chʼixpubʼil quʼn tuʼntzun ttzalaj Dios qiʼj (Mat. 6:33; Mar. 10:28-30). Qo xnaqʼtzan tiʼjju bʼant tuʼn ermano Bill Walden. * Xi tzyet tuʼn t-xnaqʼtzan kyukʼil testigos de Jehová toj abʼqʼi 1942, tej chʼixtoq tok te ingeniero toj tnam Estados Unidos. Ex tej chʼixtoq tetz bʼaj t-xnaqʼtzbʼil Bill toj universidad, tqʼama jun aj xnaqʼtzal te qa otoq kanet jun taqʼun tuʼn, pero mintiʼ xi tkʼamoʼn. Xi tchikʼbʼaʼn qa nyatoq taj aqʼuntl tuʼnju tajtoq tuʼn tajbʼen mas te Dios. Tej tikʼ chʼintl ambʼil, xi qʼamaʼn te tuʼn t-xiʼ kyxol soldad. Toj tumel xi tqʼamaʼn qa mlaytoq txiʼ, tuʼntzunju el qʼiʼn 10 mil dólar tmult ex okx qʼoʼn jweʼ abʼqʼi toj cárcel. Tej tikʼ oxe abʼqʼi, etz tzaqpiʼn. Yajxitl, tzaj qʼoʼn txokbʼil tiʼj tuʼn t-xiʼ toj Xnaqʼtzbʼil te Galaad ex xi samaʼn te misionero atz África. Kubʼ mojeʼ Bill tukʼil Eva ex junx e ajbʼen te Jehová atz África, ax ikx bʼant junjun chʼixpubʼil kyuʼn. Tej tikʼ junjun abʼqʼi, e meltzʼaj atz Estados Unidos tuʼn kyxqʼuqin tiʼj ttxuʼ Bill. Ximen Bill tiʼjju o bʼant tuʼn ex tqʼama  jlu: «Chʼixme in chin jaw oqʼe aj nximane tiʼj woklene tzaj tqʼoʼn Jehová tej wajbʼene mas te 70 abʼqʼi te. Nimku maj in xi nqʼoʼne chjonte te tuʼnju tzaj tqʼoʼn ambʼil weye tuʼn tkubʼ nqʼoʼne Tkawbʼil tnejel toj wanqʼibʼile». Yajtzun teya, ¿jakupe jyona tnejel tiʼj Tkawbʼil Dios twitz alkyexku juntl tiʼ?

14, 15. ¿Tiʼ xnaqʼtzbʼil in nel tiʼna tiʼjju bʼaj tiʼj ermano Aristotelis ex t-xuʼjil?

¹⁴ Miʼn kubʼ qximen qa mlay tzaj nya bʼaʼn qiʼj. Ax ikx qeju in che ajbʼen te Jehová in che ok weʼ kywitz nya bʼaʼn ik tzeʼn bʼaj tiʼj Abrahán (Sant. 1:2; 1 Ped. 5:9). Atzun jlu bʼaj tiʼj jun ermano Aristotelis Apostolidis tbʼi. * Jaw aʼ twiʼ toj tnam Grecia toj abʼqʼi 1946, ex toj abʼqʼi 1952 kyaj bʼant tiʼj tuʼn tuʼn tmojeʼ tukʼil Eleni, ex kykabʼil kyajtoq tuʼn kyajbʼen te Jehová. Noqtzun tuʼnj, tzaj yabʼil tiʼj Eleni ex el kynikʼ doctor tiʼj qa attoq jun tumor toj twiʼ. Jatz qʼiʼn tumor toj twiʼ, pero tej tzmatoq in nikʼ junjun abʼqʼi kykubʼlen mojeʼ, ax yabʼil tzaj tiʼj. Ok operarin juntl maj, pero mintiʼxix yukch t-xmilal ex kwest bʼant tyolin. Kukx pakbʼan Eleni tukʼil tzalajbʼil maske yabʼtoq ex i el ikʼun testigos de Jehová kyuʼn aj kawil toj ambʼil aju.

¹⁵ Xqʼuqin Aristotelis tiʼj t-xuʼjil toj 30 abʼqʼi. Toj tkyaqil ambʼil aju, ajbʼen te ansyan, onin kyiʼj Kʼloj ansyan nukʼul Nimaq chmabʼil ex onin tuʼn tjaw bʼinchet jun Ja te Nimaq Chmabʼil. Toj abʼqʼi 1987, kʼixbʼi Eleni tuʼn jun pwert akux in pakbʼan. Mintiʼ ul tnabʼil toj oxe abʼqʼi ex yajxitl kyim. In tzaj tqʼamaʼn Aristotelis toj chʼin yol aju o tzikʼ toj tanqʼibʼil: «O tzaj nim nya bʼaʼn toj wanqʼibʼile, o tzaj bʼaj nkʼuʼje, ex o che ikʼ junjun tiʼchaq nya ximen maj quʼne, pero o tzʼonin jlu wiʼje tuʼn kukx tok tilil wuʼne ex tuʼn nayone tukʼil pasens. O tzaj tqʼoʼn Jehová wipumale tuʼn wexe twitz tkyaqil nya bʼaʼn» (Sal. 94:18, 19). In nel qnikʼ tiʼj qa in che ok tkʼujlaʼnxix Jehová qeju in nok tilil kyuʼn tuʼn kukx kyajbʼen te maske in che ok weʼ twitz nya bʼaʼn.

16. ¿Tiʼ tbʼanel nabʼil xi tqʼoʼn ermano Knorr te t-xuʼjil?

 ¹⁶ Qo ximen tiʼj ambʼil tzul. Ikʼx tkyaqil nya bʼaʼn tuʼn Abrahán tuʼnju atz ok tqʼoʼn twiʼ kyiʼj kʼiwlabʼil xi ttziyen Jehová te. Ax ikx te ermana Audrey Hyde, ximen tiʼj qʼuqbʼil tkʼuʼj at toj ambʼil tzul, maske kyim Nathan Knorr tuʼn cáncer, aju tnejel tchmil, atzun tkabʼin tchmil, aju Glenn Hyde tbʼi, tzaj yabʼil Alzheimer tiʼj. * In tzaj tqʼamaʼn qa xi qʼuqbʼaʼn tkʼuʼj kyuʼn yol xi tqʼamaʼn ermano Knorr te tej atxtoq junjun seman tuʼn tkyim. Xi tqʼamaʼn jlu te: «Aj qkyim, in qo kambʼan ex ya mlay tzaj yajbʼil qiʼj». Ex xi tqʼoʼn nabʼil lu te: «Qʼonk twiʼya tiʼj ambʼil tzul tuʼnju atz taʼ chojbʼil teya». Ex tqʼamatl: «Tzʼok tilil tuʼna ex paʼmila ambʼil tuʼn tonina kyiʼj txqantl. Kʼonil jlu tiʼja tuʼn ttzalaja». Jun tbʼanel nabʼil aju tuʼn tok tilil quʼn tuʼn qonin kyiʼj txqantl ex tuʼn qtzalaj tiʼj qʼuqbʼil qkʼuʼj (Rom. 12:12).

17. a) ¿Tiquʼn il tiʼj tuʼn tok qqʼoʼn qwiʼ tiʼj ambʼil tzul? b) ¿Tzeʼn jaku tzʼonin Miqueas 7:7 qiʼj tuʼn qtzalaj kyiʼj kʼiwlabʼil tzul qkʼamoʼn toj ambʼil tzul?

¹⁷ Toj ambʼil jaʼlo, at nim tiquʼn tuʼn tok qqʼoʼn qwiʼ tiʼj ambʼil tzul. Aju in bʼaj twitz tkyaqil Txʼotxʼ in tzaj tyekʼin qe qa in qo anqʼin toj bʼajsbʼil tqʼijlalil. Noq chʼintl ambʼil tuʼn qayon tuʼn t-xi tzyet tuʼn tkawin Tkawbʼil Dios twitz tkyaqil Txʼotxʼ. Jun kyxol nim kʼiwlabʼil tzul qkʼamoʼn, aju aj kyjaw anqʼin kyimni. Kjawil anqʼin Abrahán kyukʼil toj tja tzalu twitz Txʼotxʼ, iktzun tten kxel tqʼoʼn Jehová chojbʼil te tuʼnju ten qʼuqbʼil tkʼuʼj ex tpasens. ¿Okpe ktela atz tuʼn tayona kyiʼj? Jaku tena qa ma tzʼok tilil tuʼna tuʼn tbʼant junjun chʼixpubʼil tuʼna tuʼn tajbʼena mas te Jehová ik tzeʼn bʼant tuʼn Abrahán, ex qa ma ten qʼuqbʼil tkʼuʼja maske in nok weʼya twitz nya bʼaʼn, ex qa ma tzʼayona tukʼil pasens tuʼn t-xi tbʼinchaʼn Jehová kyiʼj tiʼchaq (kjawil uʼjit Miqueas 7:7).