1. ¿Tiquʼn xi tqʼoʼn Jehová kychwinqlal txqantl?

TEN Jehová toj jun ambʼil tjunalx, pero mintiʼ kubʼ tnaʼn qa tjunalxtoq at. ¿Tiquʼn? Tuʼnju attoq tkyaqil te. Pero tajtoq tuʼn tten kychwinqlal txqantl. Tuʼntzunju, onin tkʼujlabʼil tiʼj tuʼn tkubʼ tbʼinchaʼn tkyaqilju at (Sal. 36:9; 1 Juan 4:19).

2. ¿Tiʼ kubʼ tnaʼn Jesús ex qe anjel tej kybʼant junjuntl tiʼchaq tuʼn Jehová?

² Tnejel, kubʼ tbʼinchaʼn Jehová Jesús, aju Tkʼwal. Yajxitl, ajbʼen Jesús tuʼn tuʼntzun tbʼant tkyaqilju at, kyxol jlu e bʼant nim millón anjel (Col. 1:16). Tzalaj Jesús tej taqʼunan tukʼil Ttat (Prov. 8:30). Attoq nim tiquʼn tuʼn kytzalaj anjel tuʼnju ok kyqʼoʼn kywitz tiʼj tzeʼn kubʼ tbʼinchaʼn Jehová ex Jesús kyaʼj ex Txʼotxʼ. ¿Tiʼ bʼant kyuʼn anjel? In tzaj tqʼamaʼn Tyol Dios qa e bʼitzan tukʼil tzalajbʼil, ex kukxlo jaw kynimsaʼn Jehová tiʼj tkyaqilju bʼant tuʼn tzmaxi tej kybʼant xjal, aju mas tbʼanelxix tbʼinchbʼen (Job 38:7; Prov. 8:31). Qʼanchaʼl tkʼujlabʼil Jehová ex tnabʼil tiʼj tkyaqilju bʼant tuʼn (Sal. 104:24; Rom. 1:20).

3. Ik tzeʼn in tzaj tyekʼin 1 Corintios 15:21 ex 22, ¿tiʼ in tzaj kykʼamoʼn xjal tuʼn chojbʼil bʼant tuʼn Jesús?

³ Tajtoq Jehová tuʼn kyanqʼin xjal te jumajx twitz Txʼotxʼ. Pero tej tel tpan tibʼ Adán ex Eva tiʼj Jehová, noj twitz Txʼotxʼ tuʼn il ex kamik (Rom. 5:12). ¿Tiʼ bʼant tuʼn Jehová? Jun rat naj tzaj tqʼamaʼn qa che kletel nim xjal tuʼn (Gén. 3:15). Kubʼ t-ximen tuʼn ttzaj tqʼoʼn tchwinqlal Tkʼwal tuʼntzun  kyklet tyajil Adán ex Eva tiʼj il ex kyimen. Iktzun tten tzaj tqʼoʼn Jehová ambʼil te teyele junjun xjal tuʼn tkubʼ t-ximen qa kʼajbʼel te ex tuʼn t-xi tkʼamoʼn tchwinqlal te jumajx (Juan 3:16; Rom. 6:23; kjawil uʼjit 1 Corintios 15:21, 22).

4. ¿Tiʼ qo xnaqʼtzal tiʼj toj xnaqʼtzbʼil lu?

⁴ Aj qximen tiʼj qa ok che jawil anqʼin kyimni tuʼn Jehová, in che ul junjun xjel toj qwiʼ ik tzeʼn qe jlu: ¿Tzeʼn che jawil anqʼin kyimni? ¿Kʼelelpe qnikʼ kyiʼj toj qja aj kyjaw anqʼin? ¿Tiquʼn kbʼel qnaʼn nim tzalajbʼil aj kyjaw anqʼin kyimni? Ex ¿tzeʼn in nonin jlu qiʼj tuʼn tok qqʼoʼn toklen tkʼujlabʼil Jehová, tnabʼil ex tpasens? Qo xnaqʼtzan tiʼj.

5. ¿Tiquʼn jaku kubʼ qximen qa nya toj ax ambʼil che jawil anqʼin kykyaqil xjal?

⁵ Kʼajbʼel Jesús tuʼn Jehová tuʼntzun kyjaw anqʼin nimxix millón xjal. Noqtzun tuʼnj, nyalo toj ax ambʼil che jawil anqʼin kykyaqil. ¿Tiquʼn? Tuʼnju qa noq ma che jaw tilj xjal aj kyjaw anqʼin, mlay ten nukʼbʼil twitz Txʼotxʼ. Ex nya tgan Jehová jlu tuʼnju toj ttxolil in che bʼant qe tiʼchaq tuʼn tuʼntzun tten mujbʼabʼil (1 Cor. 14:33). Tuʼnju chebʼe chebʼe bʼant Txʼotxʼ tuʼn Jehová ex Jesús tuʼn kyanqʼin xjal twitz, tuʼn jlu kubʼ tyekʼin tnabʼil ex tpasens. Ex aʼyex mod lu kbʼel tyekʼin Jesús aj Tkawin toj Mil Abʼqʼi aj tonin kyiʼj qeju che kjel anqʼin toj Armagedón tuʼntzun tbʼaj kybʼinchaʼn ja, xbʼalun, wabʼj, ex junjuntl tiʼchaq kye qeju che jawil anqʼin.

6. Ik tzeʼn in tzaj tqʼamaʼn Hechos 24:15, ¿alkyeqe che tel kyxol qeju che jawil anqʼin?

⁶ ¿Alkye aqʼuntl kbʼantel kyuʼn qeju che kjel anqʼin toj Armagedón? Kxel kyqʼoʼn xnaqʼtzbʼil tiʼj Tkawbʼil Dios ex kyiʼj  tley kye qeju che jawil anqʼin. ¿Tiquʼn nim toklen jlu? Tuʼnju chʼixmi kykyaqil qeju che jawil anqʼin, che tel «qeju mya tzʼaqlxix» (kjawil uʼjit Hechos 24:15). Il tiʼj tuʼn tbʼant nim chʼixpubʼil kyuʼn tuʼntzun tonin chojbʼil kyiʼj. Jaku txi qqʼamaʼn qa kxel tiʼn nim aqʼuntl tuʼn t-xi xnaqʼtzet axix tok tiʼj Dios kye xjal mintiʼ ojtzqiʼn kyuʼn. ¿Kxelpe qqʼoʼn xnaqʼtzbʼil te teyele junjun xjal ik tzeʼn in bʼant quʼn toj ambʼil jaʼlo? ¿Che telpe toj jun kʼloj okslal tuʼntzun kybʼaj xnaqʼtzet tuʼn t-xi kyqʼoʼn xnaqʼtzbʼil kye junjuntl aj kyjaw anqʼin? Il tiʼj tuʼn qyon tuʼntzun tok qbʼiʼn. Oʼkx ojtzqiʼn quʼn qa aj tkubʼaj Mil Abʼqʼi tuʼn Tkawin Jesús, «kykyaqil xjal twitz txʼotxʼ kʼelel kynikʼ tiʼj Qman» (Is. 11:9). ¡Ktel tbʼanelxix qaqʼun toj mil abʼqʼi!

7. ¿Tiquʼn ktel kypasens tmajen Jehová aj t-xi kyqʼoʼn xnaqʼtzbʼil kye qeju che jawil anqʼin?

⁷ Kyoj qeju mil abʼqʼi, kykyaqil tmajen Jehová kbʼantel chʼixpubʼil kyuʼn toj kyanqʼibʼil tuʼntzun ttzalaj kyiʼj. Tuʼntzunju, ktel kypasens aj kyonin kyiʼj qeju che jawil anqʼin tuʼn tkubʼ tiʼj nya bʼaʼn kyajbʼil ex tuʼn kyanqʼin ik tzeʼn taj Jehová (1 Ped. 3:8). Aj tok kykeʼyin qeju che jawil anqʼin qa in kubʼ kyin kyibʼ erman ex qa in nok tilil kyuʼn tuʼn tbʼant chʼixpubʼil kyuʼn ik tzeʼn kye tuʼn ttzalaj Jehová kyiʼj, kʼonil jlu kyiʼj ex kbʼel kyximen tuʼn kykʼulin te (Filip. 2:12).

8. ¿Tiquʼn jaku txi qqʼamaʼn qa kʼelel kynikʼ xjal kyiʼj toj kyja aj kyjaw anqʼin?

⁸ At nim tiquʼn tuʼn t-xi qqʼamaʼn qa kʼelel kynikʼ xjal kyiʼj toj kyja aj kyjaw anqʼin. Jun techel, ik tzeʼn bʼaj kyiʼj xjal in yolin Tyol Dios kyiʼj tej kyjaw anqʼin, axlo che keʼyin xjal aj kyjaw anqʼin, axlo tten che yolin ex che ximel ik tzeʼn tej chʼixtoq kykyim. Ex bʼaʼn tuʼn ttzaj qnaʼn qa tqʼama Jesús qa aj tkyim jun xjal, in nok jlu ik tzeʼn aj t-xiʼ jtal, ex aj tjaw anqʼin in nok ik tzeʼn aj tjaw kʼasin (Mat. 9:18, 24; Juan 11:11-13). Aj tel twatl jun xjal, ax keʼyin, ax tqʼajqʼajel twiʼ ex ax qe tiʼchaq in che tzaj tnaʼn ik tzeʼn tej naʼmxtoq t-xiʼ jtal. Qo ximen tiʼjju bʼaj tiʼj Lázaro. Tej tjaw anqʼin tuʼn Jesús, otoq tzikʼ kyaje qʼij tkyimlen. Tuʼntzunju, bʼalo otoq txi tzyet tuʼn tqʼayj t-xmilal. Pero jun rat el kynikʼ tanabʼ tiʼj tej tjaw anqʼin, ax ikx te, el tnikʼ kyiʼj (Juan 11:38-44; 12:1, 2).

9. ¿Tiquʼn jaku txi qqʼamaʼn qa nya tzʼaqli kyxmilal ex kyximbʼetz xjal ktel aj kyjaw anqʼin?

⁹ In tzaj ttziyen Jehová qa ni jun xjal tzul tqʼamaʼn jlu aj tkawin Jesús: «Yabʼ qine» (Is. 33:24; Rom. 6:7). Tuʼntzunju, aj tkubʼ tbʼinchaʼn Jehová juntl maj kyxmilal xjal o che kyim, ya mlay tzaj yabʼil kyiʼj. Maske ikju, mlay che ok naj te tzʼaqli. ¿Tiquʼn? Tuʼnju mlaylo tzʼel kynikʼ toj kyja kyiʼj. Tuʼn jlu jaku txi qqʼamaʼn qa bʼalo chebʼe chebʼe che okel xjal te tzʼaqli aj Tkawin Jesús toj Mil Abʼqʼi. Aj tjapun bʼaj ambʼil lu, kʼajel tqʼoʼn Jesús juntl maj Kawbʼil te Ttat. Iktzun tten, otoq bʼant tkyaqil aqʼuntl tuʼn Kawbʼil lu, ik tzeʼn tuʼn kyok xjal te tzʼaqli (1 Cor. 15:24-28; Apoc. 20:1-3).

10. ¿Tiʼ kbʼel qnaʼn aj kyjaw anqʼin kyimni?

¹⁰ Qo ximen tiʼj tzeʼn kʼokel ambʼil aj kyok qkeʼyin juntl maj qe toj qja. ¿Okpe qo jawil tzeʼn? ¿Okpe qo oqʼel tuʼn tzalajbʼil? ¿Okpe qo tzalajel ex qo bʼitzil te Jehová? Oʼkx ojtzqiʼn quʼn qa ktel  nim qkʼujlabʼil tiʼj Qtat at toj kyaʼj ex tiʼj Tkʼwal tuʼnju otoq che jaw anqʼin kyimni kyuʼn.

11. Ik tzeʼn tqʼama Jesús toj Juan 5:28 ex 29 kyiʼj qeju che jawil anqʼin, ¿tiʼ tzul kykʼamoʼn qa ma che nimen te Jehová?

¹¹ Ax ikx, qo ximen tiʼj tzalajbʼil kbʼel kynaʼn qeju che jawil anqʼin aj tok kyqʼoʼn akʼaj kyten ex aj kyanqʼin ik tzeʼn in tzaj kyqʼamaʼn tley Jehová. Aqeju kbʼantel chʼixpubʼil lu kyuʼn, «ok che jawil anqʼin tuʼn tten kychwinqlal». Atzun qeju che okel meltzʼaj tiʼj Dios, che kbʼel najsaʼn ex mlay txi qʼoʼn ambʼil kye tuʼn tel kyiʼn mujbʼabʼil toj Tbʼanel Najbʼil (kjawil uʼjit Juan 5:28, 29; Is. 65:20).

12. ¿Tzeʼn che tzajel tkʼiwlaʼn Jehová kykyaqil xjal che anqʼil twitz Txʼotxʼ?

¹² Aj kyanqʼin tmajen Dios tjaqʼ Tkawbʼil, kʼelel kynikʼ tiʼj qa ax tok qeju yol tkuʼx toj Proverbios 10:22: «Aju kyʼiwbʼil tuʼn Qman, atzun in qʼonte qʼinumabʼl ex mintiʼ in tzaj tiʼn jun bʼis junx tukʼil». Tuʼn tonbʼil xewbʼaj xjan, che okel tmajen Jehová te qʼinun, toj juntl yol, mas ktel kymod ik tzeʼn te Jesús ex chebʼe chebʼe che okel te tzʼaqli (Juan 13:15-17; Efes. 4:23, 24). Aj tikʼ junjun qʼij, mas che okel te tbʼanel xjal ex ktel mas kyipumal. ¡Kbʼel kynaʼn nimxix tzalajbʼil! (Job 33:25). Noqtzun tuʼnj, qa ma qo ximen tiʼjju ambʼil aj kyjaw anqʼin kyimni, ¿tzeʼn jaku tzʼonin jlu qiʼj?

13. Tuʼnju che jawil anqʼin kyimni, ¿alkye tten in tzaj tyekʼin jlu qe qa ojtzqiʼnxix qoʼ tuʼn Jehová ik tzeʼn in tzaj tqʼamaʼn Salmo 139:1 a 4?

¹³ Ik tzeʼn ma tzʼel qnikʼ tiʼj, aj kyjaw anqʼin kyimni tuʼn Jehová, ktzajel kynaʼn aʼyex tiʼchaq ex ax kymod ktel ik tzeʼn tej naʼmxtoq kykyim. Qo ximen tiʼj tiʼ t-xilen jlu. Kʼujlaʼn teyele junjun qe tuʼn Jehová ex in nel tnikʼ tiʼjju in qo ximen tiʼj, tiʼjju in kubʼ qnaʼn, tiʼjju in xi qqʼamaʼn ex tiʼjju in bʼant quʼn. Tuʼntzunju, qa ma qo kyim, jaku tzaj tqʼoʼn Jehová ax qmod ex qximbʼetz aj qjaw anqʼin. Bʼiʼntoq tuʼn aj kawil David qa ojtzqiʼnxix teyele junjun qe tuʼn Jehová (kjawil uʼjit Salmo 139:1-4). ¿Tiʼ in kubʼ qnaʼn aj tel qnikʼ tiʼj qa nim qoklen toj twitz Jehová?

14. ¿Tiʼ in kubʼ qnaʼn aj qximen tiʼj qa ojtzqiʼnxix qoʼ tuʼn Jehová?

¹⁴ Aj tel qnikʼ tiʼj qa ojtzqiʼnxix qoʼ tuʼn Jehová, mlayx tzaj bʼaj qkʼuʼj tiʼj jun tiʼ. ¿Tiquʼn? Tuʼnju kʼujlaʼnxix qoʼ tuʼn ex tuʼnju nim toklen teyele junjun qe toj twitz. Ax ikx, ojtzqiʼn tuʼn tiʼxix o bʼaj toj qanqʼibʼil. ¿Mintiʼpe in chewix qkʼuʼj tuʼn jlu? Mintiʼ jun tiquʼn tuʼn tkubʼ qnaʼn qa qjunalx atoʼ. Tuʼnju at Jehová qukʼil toj tkyaqil ambʼil ex in ximen tiʼj tzeʼn jaku tzʼonin qiʼj (2 Crón. 16:9).

15. Tuʼnju che jawil anqʼin kyimni, ¿tzeʼn in tzaj tyekʼin jlu qe qa at nim tnabʼil Jehová?

¹⁵ Qa in che xobʼ xjal tuʼn kykyim, jaku tzʼajbʼen jlu kyuʼn aj qʼoj. Ex in najbʼen jlu kyuʼn xjal ateʼ tjaqʼ tkawbʼil Satanás. ¿Tzeʼn in bʼant kyuʼn? In bʼant kyuʼn aj tok kychqʼoʼn xjal tuʼn tkyaj kytzaqpiʼn kyokslabʼil ex tuʼn kysbʼun kyiʼj kyamiw. Atzun qe mintiʼ in qo xobʼ tuʼn jlu. ¿Tiquʼn? Tuʼnju ojtzqiʼn quʼn qa ma qo kubʼ bʼyoʼn kyuʼn aj qʼoj, tzul tqʼoʼn Jehová qchwinqlal juntl maj (Apoc. 2:10). Bʼiʼn quʼn qa noq tiʼxku bʼant kyuʼn aj qʼoj, mlay qo el kypaʼn tiʼj tkʼujlabʼil Jehová (Rom. 8:35-39). In kubʼ tyekʼin Jehová  nim tnabʼil tuʼnju in tzaj tqʼoʼn qʼuqbʼil qkʼuʼj tuʼn qjaw anqʼin juntl maj. Tuʼn jlu in nel tiʼn Jehová ambʼil te Satanás tuʼn tsbʼun qiʼj ex in nonin qiʼj tuʼn miʼn qtzaj xobʼ.

16. ¿Tiʼ bʼaʼn tuʼn tkubʼ qxjelin ex tiʼ tzul tyekʼin jlu qe?

¹⁶ Qa ma tzaj kyqʼamaʼn aj qʼoj jlu qe, «kbʼel qbʼyoʼna», ¿qʼuqlipe qkʼuʼj tiʼj qa qo jawil anqʼin tuʼn Jehová? Tuʼn tel qnikʼ tiʼj, qxjelinku jlu: «¿In kubʼpe nyekʼine qa qʼuqli nkʼuʼje tiʼj Jehová aj kybʼant junjun tiʼchaq nyaxix nim kyoklen wuʼne junjun qʼij?» (Luc. 16:10). «¿In kubʼpe nyekʼine tukʼilju alkye tten in chin anqʼine qa tzul tqʼoʼn Jehová aju at tajbʼen weye aj tkubʼ nqʼoʼne tkawbʼil tnejel toj wanqʼibʼile?» (Mat. 6:31-33). Qa ikju, jaku tzʼonin jlu qiʼj tuʼn qex twitz alkyexku nya bʼaʼn qo okel weʼ twitz (Prov. 3:5, 6).

17. a) Tuʼnju o kubʼ t-ximen Jehová alkye qʼij che jawil anqʼin kyimni, ¿tiquʼn jun yekʼbʼil jlu tiʼj tpasens? b) ¿Tzeʼn jaku tzʼok qqʼoʼn toklen tpasens Jehová?

¹⁷ Ya o kyaj bʼant tuʼn Jehová alkye qʼij ex alkye or tuʼn tkubʼ tnajsaʼn tkyaqilju nya bʼaʼn at (Mat. 24:36). Maske taj tuʼn tpon naj ambʼil tuʼn kyjaw anqʼin kyimni, mlayx bʼaj tpasens (Job 14:14, 15). Kukx in nayon tuʼn tpon ambʼil mas bʼaʼn tuʼn kyjaw anqʼin tuʼn (Juan 5:28). At nim tiquʼn tuʼn t-xi qqʼoʼn chjonte tiʼj tpasens Jehová. Jun techel, noq tuʼn jlu o txi tqʼoʼn ambʼil kye xjal tuʼn tajtz tiʼj kyanmi, ex kyxol jlu atoʼ (2 Ped. 3:9). Taj Jehová tuʼn kyanqʼin nimku xjal te jumajx. Tuʼntzunju, kbʼel qyekʼin qa in xi qqʼoʼn chjonte te tiʼj tpasens aj tok tilil quʼn tuʼn kykanet qeju «at jun tbʼanel kyanmi tuʼn tten kychwinqlal te jumajx» ex tuʼn qonin kyiʼj tuʼn tok kykʼujlaʼn Jehová ex tuʼn kyajbʼen te (Hech. 13:48, TNM). Iktzun tten jaku tzʼonin tpasens Jehová kyiʼj.

18. ¿Tiquʼn il tiʼj tuʼn tten qpasens kyukʼil txqantl?

¹⁸ Ktel tpasens Jehová ex kayol aj tkubʼaj mil abʼqʼi tuʼntzun qok te tzʼaqli. Akux in pon ambʼil lu, kukx kbʼel tnajsaʼn qil. Tuʼntzunju, qkanoʼmil tiʼj Jehová aj tok qqʼoʼn qwiʼ tiʼj tbʼanel kymod txqantl ex aj tten qpasens kyiʼj. Qo yolin tiʼjju bʼaj tiʼj jun ermana. Tzaj bʼajxix tkʼuʼj tchmil ex ya mintiʼ xiʼ kyoj chmabʼil. In tzaj tqʼamaʼn ermana jlu: «Kwest-xix ok ambʼil lu te weye. Ya mintiʼ e bʼant qe tiʼchaq  otoq kubʼ qximane». Maske ikju, kukx kubʼ tyekʼin ermana tkʼujlabʼil ex tpasens tiʼj tchmil. Ok qeʼ tkʼuʼj tiʼj Jehová ex mintiʼ kubʼ numj. Ax ikx el tkanoʼn tiʼj Jehová tej mintiʼ ok tqʼoʼn twiʼ tiʼjju bʼaj tiʼj tchmil, sino atz ximen kyiʼj tbʼanel tmod. Tqʼamatl ermana jlu: «Ateʼ tbʼanel tmod nchmile ex in nok tilil tuʼn tuʼn tbʼanix juntl maj». Nim toklen tuʼn tten qpasens kyukʼil toj qja ex kyukʼil erman, aqeju in che ok weʼ twitz nya bʼaʼn.

19. ¿Tiʼ qaj tuʼn tbʼant quʼn?

¹⁹ Nimxix jaw tzalaj Jesús ex qe anjel tej tbʼant Txʼotxʼ. Qo ximen tiʼj tzalajbʼil kbʼel kynaʼn aj tnoj twitz Txʼotxʼ kyuʼn xjal tzʼaqli, aʼyeju kʼujlaʼn Jehová kyuʼn ex in che ajbʼen te. Ex qo ximen tiʼj tzalajbʼil kbʼel kynaʼn qeju che kawil tukʼil Jesús toj kyaʼj aj tok kykeʼyin qa kʼonil kyaqʼun kyiʼj xjal (Apoc. 4:4, 9-11; 5:9, 10). Ax ikx, qo ximen tiʼj tzeʼn kʼokel qanqʼibʼil aj tetz taʼl qwitz tuʼn tzalajbʼil ex nya tuʼn bʼis, jatumel ya mlay ten yabʼil, bʼis ex kyimen (Apoc. 21:4). Tzmaxi aj tpon ambʼil lu, kukx tzʼok tilil quʼn tuʼn tel qkanoʼn tkʼujlabʼil Jehová, tnabʼil ex tpasens. Qa ma bʼant quʼn, qo tzalajel aj qok weʼ twitz alkyexku nya bʼaʼn (Sant. 1:2-4). In xi qqʼoʼn nimxix chjonte te Jehová tuʼnju in tzaj ttziyen «qa ok che jawil anqʼin qe kyimni» (Hech. 24:15).