1. ¿Tiʼ ojtzqiʼn tuʼna tiʼj Bʼinchal qe?

¿ATZPE jaw chʼiy teya toj jun ja xjal in najbʼen te Jehová? Qa ikju, bʼalo ok tojtzqiʼna Jehová tej tzmatoq kʼwalxa. El tnikʼa tiʼj qa a Jehová kubʼ bʼinchante tkyaqil tiʼchaq, qa ateʼqe tbʼanel tmod ex qa taj tuʼn kyanqʼin xjal twitz Txʼotxʼ aj tok te jun tbʼanel najbʼil (Gén. 1:1; Hech. 17:24-27).

2. ¿Tiʼ in kubʼ kyximen junjun xjal kyiʼj qeju in nok qeʼ kykʼuʼj tiʼj qa at jun Bʼinchal qe?

² Ateʼ nim xjal mintiʼ in xi kynimen qa at Dios ex qa nya tuʼn bʼant tkyaqil tiʼchaq. In kubʼ kyximen qa kyjunalx qe tiʼchaq e bʼant ex qa chebʼe chebʼe e chʼexpaj junjun tiʼchaq at kychwinqlal ex qa yajxitl e ok te mas tbʼanel. Kyxol qe xjal lu, ateʼ junjun o tzʼetz nim kyxnaqʼtzbʼil. Bʼalo in tzaj kyqʼamaʼn qa in tzaj tyekʼin ciencia qa nya ax tok aju in tzaj tqʼamaʼn Biblia ex qa oʼkx qeju mintiʼ kyojtzqibʼil nix kynabʼil in nok qeʼ kykʼuʼj tiʼj qa at jun Bʼinchal qe.

3. ¿Tiquʼn nim toklen tuʼn tchʼiy qʼuqbʼil tkʼuʼj teyele junjun qe?

³ ¿Tiʼ jaku bʼaj qiʼj tuʼnju in tzaj kyqʼamaʼn xjal? ¿Kxelpe qqʼoʼn ambʼil tuʼn tjawje qkʼuʼj tiʼj qa at jun Bʼinchal tkyaqil? Toj qqʼabʼ taʼ jlu tuʼnju il tiʼj tuʼn tel qnikʼ tiʼj tiquʼn in xi qnimen qa at jun Bʼinchal tkyaqil. ¿In xipe qnimen qa at Dios noq tuʼnju a jlu o tzaj qʼamaʼn qe? ¿Moqa tuʼnju o tzʼel qpaʼn ambʼil tuʼn qxnaqʼtzan kyiʼj junjun xnaqʼtzbʼil jatumel in tzaj tyekʼin qa ax tok at Dios? (1 Cor. 3:12-15). Noq jteʼxku  ambʼil qʼiʼn quʼn toj qajbʼebʼil te Jehová, qkyaqilx bʼaʼn tuʼn tok tilil quʼn tuʼn tchʼiy qʼuqbʼil qkʼuʼj. Qa ma bʼant jlu quʼn, mlay txi qqʼoʼn ambʼil tuʼn qkubʼ sbʼuʼn «tuʼn kyxnaqʼtzbʼil xjal» (Col. 2:8; Heb. 11:6). Tuʼn miʼn qkubʼ sbʼuʼn kyuʼn xjal, qo xnaqʼtzan tiʼj tiquʼn ateʼ junjun mintiʼ in xi kyokslaʼn qa at jun Bʼinchal tkyaqil, tzeʼn jaku chʼiy qʼuqbʼil qkʼuʼj tiʼj Jehová ex tiʼ jaku bʼant quʼn tuʼn miʼn tnaj.

4. Ik tzeʼn in tzaj tqʼamaʼn Hebreos 11:1, ¿tiquʼn at qʼuqbʼil qkʼuʼj?

⁴ Ateʼ junjun xjal in kubʼ kyximen qa aj tten qʼuqbʼil kykʼuʼj, atz in yolin jlu tiʼjju tuʼn t-xi qnimen jun tiʼ maske mintiʼ jun yekʼbʼil tiʼj. Pero nya a jlu in tzaj tyekʼin Tyol Dios (kjawil uʼjit Hebreos 11:1). In tzaj tchikʼbʼaʼn Tyol Dios qa at yekʼbʼil tiʼj qokslabʼil moqa qʼuqbʼil qkʼuʼj ex nya noq kukx in xi qnimen qa at Jehová, Jesús ex aju Tkawbʼil (Heb. 11:3). O tzʼok jun bioquímico te testigo de Jehová ex tqʼama jlu: «Nya noq kukx at qʼuqbʼil qkʼuʼj tuʼnju ateʼ yekʼbʼil tiʼj ex in nel qnikʼ tiʼjju in tzaj tqʼamaʼn ciencia».

5. ¿Tiquʼn in xi kynimen junjun xjal qa nya tuʼn Dios bʼant tkyaqil?

⁵ Qa at yekʼbʼil tiʼj qa at jun Bʼinchal tkyaqil, ¿tiquʼntzun ateʼ junjun xjal mintiʼ in nok qeʼ kykʼuʼj tiʼj qa a Dios kubʼ bʼinchante tkyaqil? Tuʼnju mintiʼ in nel kypaʼn ambʼil tuʼn kyxnaqʼtzan kyiʼj yekʼbʼil ateʼ. In tzaj tqʼamaʼn Robert jlu, aju o tzʼok te testigo de Jehová: «Tuʼnju mintiʼ ok nbʼiʼne xnaqʼtzbʼil toj skwel tiʼj tzeʼn e bʼant qe tiʼchaq, kubʼ nximane qa ax tok ni jun bʼinchal qe tiʼchaq. Tzmaxi el nnikʼe tiʼj jlu tej kyyolin testigos de Jehová wukʼile ex otoq chin japune twi 22 abʼqʼi. Tzaj kyyekʼin  weʼye tiquʼn jaku tzʼok qeʼ qkʼuʼj tiʼjju in tzaj tqʼamaʼn Tyol Dios qa ax tok at jun bʼinchal tkyaqil». * (Qʼonka twitza tiʼj recuadro « Jun tqanil nim toklen kye mambʼaj»).

6. ¿Tiquʼn in tzaj kyqʼamaʼn junjun xjal qa nya ax tok at Dios?

⁶ Ateʼ junjun xjal in tzaj kyqʼamaʼn qa in xi kyokslaʼn junjun tiʼchaq tzmaxi aj tok kykeʼyin. Noqtzun tuʼnj, in xi kyokslaʼn junjun tiʼchaq maske mintiʼ qʼanchaʼl. Jun techel, nimen xnaqʼtzbʼil tiʼj gravedad kyuʼn tuʼnju o tzʼel kynikʼ tiʼj qa ax tok at. Ax ikx, aju qʼuqbʼil qkʼuʼj in yolin Tyol Dios tiʼj, at yekʼbʼil tiʼj «qa axix tok aju mintiʼ qʼanchaʼl» (Heb. 11:1). Tuʼn tel qnikʼ kyiʼj yekʼbʼil lu, il tiʼj tuʼn tel qpaʼn ambʼil tuʼn qxnaqʼtzan kyiʼj ex il tiʼj tuʼn tok tilil quʼn, pero ateʼ xjal nya kyaj tuʼn tbʼant jlu kyuʼn. Tuʼntzunju, in kubʼ kyximen qa nya ax tok at Dios.

7. ¿Tzeʼn in nel qnikʼ tiʼj qa nya kykyaqil científico in xi kyokslaʼn qa mintiʼ Dios?

 ⁷ Tej otoqxi che xnaqʼtzan junjun científico kyiʼj junjun yekʼbʼil, ok qeʼ kykʼuʼj tiʼj qa a Dios kubʼ bʼinchante tkyaqilju at. * Ik tzeʼn bʼaj tiʼj Robert, aju ma qo yolin tiʼj toj taqikʼ jweʼ, ateʼ junjun xjal in kubʼ kyximen qa mintiʼ jun bʼinchal tkyaqil tuʼnju mintiʼ in che yolin aj xnaqʼtzal tiʼj jlu toj universidad. Maske ikju, ateʼ nim científico o tzʼel kynikʼ tiʼj Jehová ex o tzʼok kykʼujlaʼn. Ik tzeʼn bʼant kyuʼn, nim toklen tuʼn tchʼiy qʼuqbʼil qkʼuʼj tiʼj Jehová ex noq jniʼxku qxnaqʼtzbʼil o tzʼetz. Ex mlay bʼant jlu tuʼn juntl te qxel.

8, 9. a) ¿Alkye xjel kxel qqʼoʼn tzaqʼwebʼil tiʼj kyoj junjuntl taqikʼ? b) ¿Tzeʼn jaku tzʼonin qiʼj qa ma qo xnaqʼtzan tiʼj tkyaqilju o bʼant?

⁸ ¿Tzeʼn jaku chʼiy qʼuqbʼil qkʼuʼj tiʼj Bʼinchal qe? Qo xnaqʼtzan tiʼj kyaje tumel.

⁹ Qo xnaqʼtzan tiʼj tkyaqilju o bʼant. Qa ma tzʼok qqʼoʼn qwitz kyiʼj txkup, kyiʼj tzeʼ ex kyiʼj cheʼw, jaku chʼiy qʼuqbʼil qkʼuʼj tiʼj Dios (Sal. 19:1; Is. 40:26). Qa mas ma tzʼel qpaʼn ambʼil tuʼn qxnaqʼtzan kyiʼj tiʼchaq lu, mas kʼokel qeʼ qkʼuʼj tiʼj qa a Jehová Bʼinchal qe. Kyoj uʼj in che etz tuʼn ttnam Jehová, nim maj in che etz xnaqʼtzbʼil in che yolin tiʼj tkyaqil tiʼchaq o bʼant tuʼn. Maske kwest tuʼn tel qnikʼ tiʼj, qpaʼmil ambʼil tuʼn tjaw quʼjin ex qqʼonk qwiʼ tiʼjju in nel qnikʼ tiʼj. Kyoj nimaq chmabʼil te oxe qʼij, i etz yekʼin junjun video in che yolin tiʼj tbʼinchbʼen Jehová. Bʼaʼn tuʼn ttzaj qnaʼn qa jaku che ok qkeʼyin juntl maj qe video lu toj jw.org.

10. Qʼamantza jun techel jaku tzʼonin qiʼj tuʼn tok qeʼ qkʼuʼj tiʼj qa at jun Bʼinchalte tkyaqil (Romanos 1:20).

¹⁰ Aj qxnaqʼtzan tiʼj tkyaqilju o bʼant, qqʼonk qwiʼ tiʼj tiʼ xnaqʼtzbʼil in tzaj tyekʼin jlu qe tiʼj Jehová (kjawil uʼjit Romanos 1:20). Jun techel, nya oʼkx in tzaj tqʼoʼn Qʼij spikʼun ex kyaq tuʼntzun tten anqʼibʼil twitz Txʼotxʼ, sino ax ikx ateʼ junjun tqan Qʼij jaku qo tzʼeʼy tuʼn ex jaku tzaj tiʼn nya bʼaʼn qiʼj. ¿Tiʼ in nonin qiʼj tuʼn miʼn qtzʼeʼy tuʼn tqan Qʼij lu? At jun capa te gas ozono tbʼi tok tiʼjele Txʼotxʼ ex in nonin tuʼn miʼn qtzʼeʼy tuʼn tqan Qʼij lu. Qa at nim tqan Qʼij jaku qo tzʼeʼy tuʼn, ax ikx in chʼiy gas tok tiʼjele Txʼotxʼ. Aj qximen tiʼj jlu, ¿mintiʼpe in nonin qiʼj tuʼn t-xi qokslaʼn qa at jun Bʼinchalte tkyaqil ex qa kʼujlaʼn qoʼ tuʼn?

11. ¿Jatumel jaku kanet tqanil quʼn tiʼj tbʼinchbʼen Jehová ex tzeʼn jaku che onin tiʼj qʼuqbʼil qkʼuʼj? (Qʼonka twitza tiʼj recuadro « Qe onbʼil tuʼn tchʼiy qʼuqbʼil qkʼuʼj»).

¹¹ Qa ma txi qjyoʼn tqanil tiʼj tbʼinchbʼen Jehová toj Índice de las publicaciones Watch Tower ex toj jw.org, jaku tzʼonin qiʼj tuʼn tchʼiy qʼuqbʼil qkʼuʼj. Bʼalo jaku txi tzyet tuʼn quʼjin kyiʼj xnaqʼtzbʼil ex qe video jatumel in tzaj qʼamaʼn «¿Atpe jun Bʼinchal kye moqa mintiʼ?». Chʼin kyqan xnaqʼtzbʼil lu ex in tzaj kyqʼoʼn tqanil kyiʼj junjun txkup ex kyiʼj junjun tzeʼ. Ax ikx in tzaj tyekʼin junjun techel tiʼj tzeʼn o tzʼel kykanoʼn científico kyiʼj tbʼinchbʼen Dios.

12. ¿Alqiʼj bʼaʼn tuʼn tok qqʼoʼn qwiʼ aj qxnaqʼtzan tiʼj Tyol Dios?

¹² Qo xnaqʼtzan tiʼj Tyol Dios. Mintiʼtoq in nok qeʼ tkʼuʼj bioquímico tiʼj Dios aju ma qo yolin tiʼj toj taqikʼ kyaje, pero chʼexpaj t-ximbʼetz. Tqʼama jlu: «Nya tuʼnju o chin xnaqʼtzane tiʼj ciencia in xi wokslaʼne qa at jun Bʼinchalte tkyaqil, sino ax ikx tuʼnju o chin xnaqʼtzane tiʼjju in tzaj tqʼamaʼn Tyol Dios». Bʼalo ya ojtzqiʼnxix quʼn tiʼ in  tzaj tyekʼin Tyol Dios, pero bʼaʼn tuʼn tok tilil quʼn tuʼn kukx qxnaqʼtzan tiʼj tuʼntzun tchʼiy qʼuqbʼil qkʼuʼj tiʼj Jehová (Jos. 1:8; Sal. 119:97). Qqʼonk qwiʼ tiʼj qa tzʼaqli tqanil in tzaj tqʼamaʼn Tyol Dios tiʼjju bʼaj ojtxe, kyiʼj profecía ex kyiʼj junjuntl xnaqʼtzbʼil. Kʼonil jlu tuʼn tok qeʼ qkʼuʼj tiʼj qa at tnabʼil ex tkʼujlabʼil Jehová tej qkubʼ tbʼinchaʼn, ex qa te t-ximbʼetz tkuʼx toj Xjan Uʼj (2 Tim. 3:14; 2 Ped. 1:21). *

13. Qʼamantza jun techel jatumel in tzaj tyekʼin qa in che onin nabʼil tkuʼx toj Tyol Dios qiʼj.

¹³ Aj qxnaqʼtzan tiʼj Tyol Dios, bʼaʼn tuʼn tok qqʼoʼn qwiʼ tiʼj qa tbʼanel qe nabʼil tkuʼx toj ex qa jaku che onin qiʼj. Jun techel, atxix ojtxe o tzaj tqʼamaʼn Tyol Dios qa «nim o che kʼixbʼisanjtz [xjal] tuʼnju o pon kykʼuʼj tiʼj pwaq» (1 Tim. 6:9, 10; Prov. 28:20; Mat. 6:24). ¿Atxpe tajbʼen consej lu? Atx. In tzaj tqʼamaʼn jun uʼj jlu: «Chʼixme tkyaqil maj, mintiʼ in che tzalaj xjal ex in tzaj bʼaj kykʼuʼj tuʼnju in kubʼ kyximen qa mas nim toklen tuʼn tten kypwaq. Ax ikx, aqeju xjal oʼkx in che ximen tuʼn tten kyqʼinumabʼil, mas in tzaj kybʼis ex in tzaj yabʼil kyiʼj». Tuʼn jlu in nel qnikʼ tiʼj qa ax tok aju in tzaj tqʼamaʼn Tyol Dios. ¿In nulpe junjuntl taqikʼ Tyol Dios toj qwiʼ aqeju o che onin qiʼj? Qa kukx ma tzʼok qqʼoʼn kyoklen nabʼil tkuʼx toj Tyol Dios, mas kʼokel qeʼ qkʼuʼj tiʼjju in tzaj tqʼamaʼn Jehová qe (Sant. 1:5). Ex qa ma bʼant jlu quʼn, mas qo tzalajel (Is. 48:17, 18).

14. ¿Tiʼ kʼelel qnikʼ tiʼj Jehová akux in qo xnaqʼtzan tiʼj Tyol?

¹⁴ Qo xnaqʼtzan tuʼn tel mas qnikʼ tiʼj Jehová (Juan 17:3). Aj qxnaqʼtzan tiʼj Tyol Dios, kʼelel qnikʼ kyiʼj tbʼanel tmod Jehová ex ax jlu jaku tzʼok qkeʼyin kyiʼj tiʼchaq o bʼant tuʼn. Qa ma tzʼelxix qnikʼ kyiʼj tbʼanel tmod Jehová, che onil qiʼj tuʼn tok qeʼ qkʼuʼj tiʼj qa ax tok at (Éx. 34:6, 7; Sal. 145:8, 9). Qa mas ma tzʼok qojtzqiʼn Jehová, mas kʼokel qeʼ qkʼuʼj tiʼj, mas kʼokel qkʼujlaʼn ex mas kʼokel qamiwen qibʼ tukʼil.

15. Aj qyolin tiʼj qojtzqibʼil at tiʼj Jehová, ¿tzeʼn jaku tzʼonin tiʼj qʼuqbʼil qkʼuʼj?

¹⁵ Bʼaʼn tuʼn qyolin tiʼj qojtzqibʼil at tiʼj Jehová kyukʼil junjuntl xjal. Kʼonil jlu qiʼj tuʼn tchʼiy qʼuqbʼil qkʼuʼj. ¿Yajtzun qa ma tzaj tqanin jun xjal qe toj pakbʼabʼil qa ax tok at Dios ex mintiʼ ojtzqiʼn tzaqʼwebʼil quʼn? Bʼaʼn tuʼn t-xi qjyoʼn tqanil kyoj uʼj in che etz tuʼn ttnam Jehová ex jaku tzʼajbʼen quʼn tuʼn t-xi qtzaqʼweʼn te xjal (1 Ped. 3:15). Ax ikx, jaku txi qqanin onbʼil te jun erman at tojtzqibʼil. Qa ma txi qjyoʼn tqanil, kʼonil qiʼj tuʼn tchʼiy qʼuqbʼil qkʼuʼj maske mintiʼ in xi tbʼiʼn xjal aju in tzaj tqʼamaʼn Tyol Dios. Ex kʼonil jlu qiʼj tuʼn miʼn t-xi qqʼoʼn ambʼil tuʼn qkubʼ sbʼuʼn tuʼn kyxnaqʼtzbʼil xjal aj ttzaj kyqʼamaʼn qa mintiʼ Dios.

16. ¿Tiʼ jaku bʼaj qiʼj qa mintiʼ ma chʼiy qʼuqbʼil qkʼuʼj ex qa mintiʼ ma tzʼok qxqʼuqin?

¹⁶ Noq jteʼxku ambʼil toklen qojtzqiʼn Jehová, il tiʼj tuʼn tok tilil quʼn tuʼn tchʼiy qʼuqbʼil qkʼuʼj ex tuʼn tok qxqʼuqin. ¿Tiquʼn? Tuʼnju jaku qo kubʼ numj toj qokslabʼil qa mintiʼ ma bʼant quʼn. Bʼaʼn tuʼn ttzaj qnaʼn qa in chʼiy qʼuqbʼil qkʼuʼj aj qximen kyiʼj tiʼchaq mintiʼ qʼanchaʼl. Ex aju mintiʼ qʼanchaʼl, jun rat jaku tzikʼ tnaʼl quʼn. Tuʼntzunju, tqʼama apóstol Pablo qa in nok te jun il qa mintiʼ qokslabʼil ex qa «jurat jaku qo kubʼ tzʼaq tuʼn» (Heb. 12:1, TNM). Qa ikju, ¿tiʼ jaku bʼant quʼn tuʼn miʼn tnaj qʼuqbʼil qkʼuʼj? (2 Tes. 1:3).

17. ¿Tiʼ jaku tzʼonin qiʼj tuʼn tchʼiy qʼuqbʼil qkʼuʼj?

¹⁷ Tnejel, kukx qqaninx te Jehová tuʼn tonin qiʼj tuʼn xewbʼaj xjan. ¿Tiquʼn? Tuʼnju ax  ikx at qʼuqbʼil qkʼuʼj moqa qokslabʼil kyxol mod in tzaj tqʼoʼn xewbʼaj xjan (Gál. 5:22, 23). Qa mintiʼ ma tzʼonin xewbʼaj xjan qiʼj, mlayx chʼiy qʼuqbʼil qkʼuʼj tiʼj Jehová. Tuʼntzunju, kukx qqaninx xewbʼaj xjan te Jehová ex tzul tqʼoʼn qe (Luc. 11:13). Jaku txi qqanin jlu te: «Qʼontza mastl qokslabʼle» (Luc. 17:5).

18. Ik tzeʼn in tzaj tqʼamaʼn Salmo 1:2 ex 3, ¿alkye qoklen o tzaj tqʼoʼn Jehová?

¹⁸ Tkabʼin, kukx qo xnaqʼtzan tiʼj Tyol Dios (kjawil uʼjit Salmo 1:2, 3). Tej tkubʼ tzʼibʼin Salmo lu, noq junjun aj Israel attoq kycopia tiʼj tkyaqil Tley Dios. Noqtzun tuʼnj, jakutoq kanet copia kyuʼn aj kawil ex kyuʼn pal. Ex ajtoq tikʼ junjun wuq abʼqʼi, xi tqʼamaʼn Jehová tuʼn tok kychmon kyibʼ «qe xinaq ikx qe xuʼj, qe kʼwaʼl ex qe stranjer xjal ax najl» kyxol, tuʼntzun tok kybʼiʼn aj tjaw uʼjit Ley (Deut. 31:10-12). Toj tqʼijlalil Jesús, chʼixme kykyaqil copia tiʼj Ley atztoq ateʼ kyoj ja te kʼulbʼil ex nya nim xjal ten jun kycopia. Atzun toj ambʼil jaʼlo, chʼixme kykyaqil xjal at kybiblia. ¿Tzeʼn in kubʼ qyekʼin qa in nok qqʼoʼn toklen oyaj lu?

19. ¿Tiʼ il tiʼj tuʼn tbʼant quʼn tuʼn tchʼiy qʼuqbʼil qkʼuʼj?

¹⁹ In kubʼ qyekʼin qa in qo tzalaj tiʼj qoklen o tzaj tqʼoʼn Jehová aj tok tilil quʼn tuʼn tjaw quʼjin Tyol tkyaqil qʼij. Mintiʼ tuʼn tkubʼ qximen qa oʼkx qo xnaqʼtzal tiʼj Tyol Dios qa at ambʼil qiʼj. Qa ma tzʼel qpaʼn ambʼil tuʼn qxnaqʼtzan tkyaqil qʼij, kʼonil qiʼj tuʼn tchʼiy qʼuqbʼil qkʼuʼj.

20. ¿Tiʼ bʼaʼn tuʼn tok tilil quʼn tuʼn tbʼant quʼn?

²⁰ Junxitl qoʼ kywitz xjal in kubʼ kyximen qa at kyojtzqibʼil. ¿Tiquʼn? Tuʼnju atz in nok qeʼ qkʼuʼj tiʼjju in tzaj tqʼamaʼn Tyol Dios (Mat. 11:25, 26). Tuʼnju in qo xnaqʼtzan tiʼj Tyol Dios, ojtzqiʼn quʼn tiquʼn at nim nya bʼaʼn ex tiʼ kbʼantel tuʼn Jehová tiʼj. Tuʼntzunju, bʼaʼn tuʼn tok tilil quʼn tuʼn kukx tchʼiy qʼuqbʼil qkʼuʼj ex tuʼn qonin kyiʼj xjal tuʼn tel kynikʼ tiʼj Jehová (1 Tim. 2:3, 4). Ex kukx qo ayon tuʼn tpon ambʼil jatumel kxel kyqʼamaʼn kykyaqil xjal qe yol lu aj tjaw kynimsaʼn Jehová: «Aya Qman Dios, bʼaʼn tuʼn tjaw nimset tbʼiya, ex tuʼn tnimanjtza [...]; porke aya bʼinchante tkyaqil» (Apoc. 4:11).