1. ¿Tiʼ in bʼant kyuʼn nim erman tuʼn kyajbʼen mas te Jehová?

 YA CHʼIX tul xitbʼil tiʼj tkyaqil nya bʼaʼn ex at nim aqʼuntl tuʼn tbʼant quʼn (Mat. 24:14; Luc. 10:2; 1 Ped. 5:2). Qkyaqilx qaj tuʼn tok tilil quʼn toj qajbʼebʼil te Jehová. Ateʼ junjun in nel kypaʼn mas ambʼil tuʼn kyajbʼen te Jehová ik tzeʼn tuʼn kyok te precursor, tuʼn kyxiʼ ajbʼel toj Betel moqa tuʼn kyonin tuʼn kyjaw bʼinchet ja jatumel in qo kʼulin te Jehová. Ex ateʼ nim erman in nok tilil kyuʼn tuʼn kyok te onil kye ansyan moqa te ansyan (1 Tim. 3:1, 8). Qʼuqli qkʼuʼj tiʼj qa in tzalaj Jehová kyiʼj tmajen tuʼnju in nok tilil kyuʼn tuʼn kyajbʼen te (Sal. 110:3; Is. 6:8).

2. ¿Tiʼ jaku kubʼ qnaʼn qa mintiʼ in japun twi jun qximbʼetz?

² Qa o tzikʼ ambʼil ex naʼmx tjapun twi jun qximbʼetz, jakulo tzaj qbʼis tuʼn jlu. Ax ikx, jaku tzaj qbʼis qa mintiʼ in bʼant nim aqʼuntl quʼn toj ttnam Jehová noq tuʼnju o qo tijen moqa kyuʼn junjuntl tiʼchaq in che ikʼ toj qanqʼibʼil (Prov. 13:12). Atzun jlu in bʼaj tiʼj Melissa. * Taj tuʼn t-xiʼ ajbʼel toj Betel moqa tuʼn t-xiʼ toj Xnaqʼtzbʼil kye Pakbʼal tiʼj Tkawbʼil Dios. In tzaj tqʼamaʼn jlu: «Ya mlay bʼant tuʼn nxiʼye tuʼnju ya o tzikʼ wabʼqʼiye. Noq in che ok jlu ik tzeʼn jun witzikʼ te weye. At maj in tzaj nbʼise».

3. ¿Tiʼlo il tiʼj tuʼn tbʼant kyuʼn junjun erman tuʼntzun ttzaj qʼoʼn jun kyoklen?

³ Ateʼ junjuntl erman tzma kuʼxun qe ex mintiʼ yabʼil kyiʼj. Noqtzun tuʼnj, il tiʼj tuʼn tchʼiy mas kyamiwbʼil tukʼil Jehová ex tuʼn tten junjuntl tbʼanel kymod tuʼntzun t-xi qʼoʼn junjun kyoklen. Bʼalo at kynabʼil, mintiʼ in jawje kykʼuʼj ex in nok tilil kyuʼn, pero il-lo tiʼj tuʼn tten mas kypasens, tuʼn kyrespetarin ex tuʼn t-xi kybʼinchaʼn kyaqʼun toj tumel. Qa  ma tzʼok tilil kyuʼn tuʼn tten tbʼanel kymod, jakulo tzaj qʼoʼn junjun kyoklen aju mintiʼ ximen kyuʼn. Qo xnaqʼtzan tiʼjju bʼaj tiʼj Nick. Tej tjapun twi 20 abʼqʼi, tzaj bʼaj tkʼuʼj tuʼnju mintiʼ xi qʼoʼn toklen te onil kye ansyan. In tzaj tqʼamaʼn jlu: «Kubʼ nximane qa mintiʼtoq in chin aqʼunane toj tumel». Noqtzun tuʼnj, kukx ok tilil tuʼn Nick tuʼn taqʼunan. Ok tqʼoʼn twiʼ tiʼjju jakutoq bʼant tuʼn toj kʼloj okslal ex toj pakbʼabʼil. Toj ambʼil jaʼlo, in najbʼen toj Kʼloj ansyan toj Ninja qʼil twitz aqʼuntl.

4. ¿Tiʼ kʼelel qnikʼ tiʼj toj xnaqʼtzbʼil lu?

⁴ ¿In tzajpe bʼaj qkʼuʼj tuʼnju mintiʼ in japun twi jun qximbʼetz toj qajbʼebʼil te Jehová? Qa ikju, qqʼamanx te Jehová tiʼ in kubʼ qnaʼn (Sal. 37:5-7). Ax ikx, qqaninx qnabʼil kye erman o tzikʼ ambʼil in che ajbʼen te Jehová tuʼntzun ttzaj kyqʼamaʼn qe tiʼ mastl tuʼn tbʼant quʼn. Ex qbʼincham aju in tzaj kyqʼamaʼn qe. Qa ma bʼant jlu quʼn, bʼalo jaku japun twi qximbʼetz. ¿Yajtzun qa mlayx japun twi qximbʼetz toj ambʼil jaʼlo ik tzeʼn bʼaj tiʼj Melissa? ¿Tiʼ jaku tzʼonin qiʼj tuʼn kukx qtzalaj? Tuʼn t-xi tzaqʼwet xjel lu, qo xnaqʼtzan kyiʼj oxe nabʼil toj xnaqʼtzbʼil lu. Tnejel, ¿tiʼ jaku tzʼonin qiʼj tuʼn kukx qtzalaj? Tkabʼin, ¿tiʼ jaku bʼant quʼn tuʼn tkubʼ qnaʼn mas tzalajbʼil? Ex toxin, ¿tiʼ mas jaku bʼant quʼn toj qajbʼebʼil te Jehová tuʼn kukx qtzalaj?

5. ¿Alqiʼj bʼaʼn tuʼn tok qqʼoʼn qwiʼ qa qaj tuʼn qtzalaj? (Eclesiastés 6:9).

⁵ Qa qaj tuʼn qtzalaj, bʼaʼn tuʼn t-xi qbʼiʼn aju in tzaj tqʼamaʼn Eclesiastés 6:9 (uʼjinktza). Qa in qo tzalaj tiʼjju «nnoʼk qkeʼyin», ax ikx in qo tzalaj tiʼjju at qe ik tzeʼn aju in bʼant quʼn jaʼlo. Pero qa noq in pon qkʼuʼj tiʼj jun tiʼ, kukx in qo jyon tumel tuʼn ttzaj qʼoʼn qe maske mlay tzaj qʼoʼn. ¿Tiʼ xnaqʼtzbʼil jaku tzʼel qiʼn tiʼj jlu? Qa qaj tuʼn qtzalaj, bʼaʼn tuʼn tok qqʼoʼn qwiʼ tiʼjju at qe ex nya kyiʼj tiʼchaq mlayx che kanet quʼn.

6. ¿Alkye txʼolbʼabʼil qo xnaqʼtzal tiʼj ex tiʼ kʼelel qnikʼ tiʼj?

⁶ Chʼixmi qkyaqilx qaj tuʼn t-xi qbʼinchaʼn junjuntl tiʼchaq. Qa ikju, ¿jakupe qo tzalaj tiʼjju ya at qe? Jaku. ¿Tzeʼn? Tuʼn tel qnikʼ tiʼj, qo xnaqʼtzan tiʼj txʼolbʼabʼil kyiʼj talento yolin Jesús tiʼj, aju tkuʼx toj Mateo 25:14 a 30. * Toj txʼolbʼabʼil lu, kʼelel qnikʼ tiʼj tzeʼn jaku kubʼ qnaʼn mas tzalajbʼil tiʼjju in bʼant quʼn jaʼlo.

7. Toj chʼin yol, qʼamantza txʼolbʼabʼil kyiʼj talento yolin Jesús tiʼj.

⁷ Toj txʼolbʼabʼil yolin Jesús tiʼj, yolin tiʼj jun xjal xiʼ toj jun tbʼe. Tej naʼmxtoq tikʼ bʼet, kyaj tqʼoʼn junjun talento kye tmajen tuʼntzun kyaqʼunan tiʼj. * El tnikʼ patrón tiʼj jniʼ jakutoq bʼant tuʼn teyele junjun tmajen, tuʼntzunju, xi tqʼoʼn jweʼ talento te jun, atzunte juntl, xi tqʼoʼn kabʼe, atzunte mankbʼil, xi tqʼoʼn jun talento te. Ten kynabʼil kabʼe majen ex ok tilil kyuʼn tuʼn kyaqʼunan tuʼntzun tkanet mas pwaq kyuʼn. Atzunte toxin majen, mintiʼ ok tilil tuʼn tuʼn taqʼunan, tuʼntzunju, ex lajoʼn tuʼn tpatrón.

8. ¿Tiquʼn jakutoq tzalaj tnejel majen?

⁸ Bʼalo kubʼ tnaʼn tnejel majen qa ok qʼoʼn toklen tej t-xi tqʼoʼn tpatrón jweʼ talento  te. Nimxix tajlal pwaq lu ex kubʼlo t-ximen majen qa otoq tzʼok qeʼ tkʼuʼj tpatrón tiʼj. Yajtzun te tkabʼin majen, ¿tiʼtzulo kubʼ tnaʼn? Jakutoq tzaj tbʼis tuʼnju mas nim pwaq otoq txi qʼoʼn te tnejel majen. Pero ¿ape jlu bʼaj tiʼj?

9. ¿Tiʼ mintiʼ tqʼama Jesús tiʼj tkabʼin majen? (Mateo 25:22, 23).

⁹ (Kjawil uʼjit Mateo 25:22, 23). Mintiʼ tqʼama Jesús qa tzaj tqʼoj moqa tzaj tbʼis tkabʼin majen tuʼnju oʼkx xi qʼoʼn kabʼe talento te tuʼn tpatrón. Ex mintiʼ tqʼama Jesús qa tqʼama majen jlu: «¿Oʼkxpe pwaq lu tzul qʼoʼn weye? Ax ikx weye tbʼanel chin aqʼunane ik tzeʼn te tnejel majen. Qa mintiʼ woklene toj twitz npatrone, maslo bʼaʼn qa ma kux nmaquʼne qe kabʼe talento ex tuʼn tok nqʼoʼne nwiʼye tiʼj wexe waqʼun».

10. ¿Tiʼ bʼant tuʼn tkabʼin majen kyukʼil talento xi qʼoʼn te?

¹⁰ Ik tzeʼn bʼant tuʼn tnejel majen, ax ikx te tkabʼin majen ok tilil tuʼn tuʼn taqʼunan kyiʼj talento xi qʼoʼn te tuʼntzun ttzalaj tpatrón tiʼj. Tuʼnju ok tilil tuʼn tuʼn taqʼunan, kambʼet juntl kabʼe talento tuʼn. Tuʼn jlu jaw tzalaj tpatrón ex tuʼntzunju, xi tqʼoʼn mas aqʼuntl te.

11. ¿Tiʼ jaku bʼant quʼn tuʼn tkubʼ qnaʼn mas tzalajbʼil?

¹¹ Ax ikx qe, jaku kubʼ qnaʼn nim tzalajbʼil qa ma tzʼok tilil quʼn tuʼn qaqʼunan tiʼj alkyexku aqʼuntl in tzaj qʼoʼn qe toj ttnam Jehová. Qqʼonk tilil tuʼn kukx qpakbʼan ex tuʼn qonin kyiʼj aqʼuntl in che bʼant toj kʼloj okslal (Hech. 18:5; Heb. 10:24, 25). Qbʼincham qten kyiʼj chmabʼil tuʼntzun  kyonin tbʼanel qyol kyiʼj erman. Qqʼonk qwiʼ tiʼj alkyexku oklenj in tzaj qʼoʼn qe kyoj chmabʼil in che ok txolekxi qʼij. Qa ma tzaj qanin qe tuʼn t-xi qbʼinchaʼn jun aqʼuntl toj kʼloj okslal, qbʼincham toj tumel ex miʼn qo pon yaj. Miʼn kubʼ qximen qa nyaxix nim kyoklen junjun aqʼuntl ex qa nya il tiʼj tuʼn tel qpaʼn ambʼil tuʼn t-xi qbʼinchaʼn. Qqʼonk tilil tuʼn t-xi qbʼinchaʼn jun tbʼanel aqʼuntl (Prov. 22:29). Qa mas ma tzʼok qqʼoʼn qwiʼ kyiʼj aqʼuntl in bʼant quʼn toj ttnam Jehová, mas kchʼiyel qamiwbʼil tukʼil ex mas qo tzalajel (Gál. 6:4). Ex kʼonil jlu qiʼj tuʼn qtzalaj kyiʼj txqantl aj t-xi qʼoʼn jun kyoklen aju qajtoq tuʼn ttzaj qʼoʼn qe (Rom. 12:15; Gál. 5:26).

12. ¿Tiʼ bʼant tuʼn Melissa ex Nick tuʼn tkubʼ kynaʼn mas tzalajbʼil?

¹² ¿Naʼnxpe ermana Melissa quʼn, aju tajtoq tuʼn t-xiʼ ajbʼel toj Betel moqa toj Xnaqʼtzbʼil kye Pakbʼal tiʼj Tkawbʼil Dios? Maske mlaytoq bʼant tuʼn kyxi qʼoʼn oklenj lu te, in tzaj tqʼamaʼn jlu: «In nok tilil wuʼne tuʼn woke te jun tbʼanel precursora ex in chin pakbʼane kyoj junxichaq tten pakbʼabʼil. In nonin jlu wiʼje tuʼn ntzalaje». Yajtzun te Nick, ¿tiʼ bʼant tuʼn tej mintiʼ tzaj qʼoʼn toklen te onil kye ansyan? Tqʼama jlu: «Ok nqʼoʼn nwiʼye tiʼjju jakutoq bʼant wuʼne ik tzeʼn tuʼn wexe pakbʼal ex tuʼn kyxi nqʼoʼne tbʼanel nyole kyoj chmabʼil. Ax ikx, kux nnojsaʼne jun solicitud tuʼn nxiʼye ajbʼel toj Betel, ex tej tikʼ jun abʼqʼi tzaj qʼoʼn txokbʼil wiʼje».

13. ¿Tiʼ jaku bʼaj qa in nok tilil quʼn tuʼn kybʼant junjun aqʼuntl toj ttnam Jehová? (Eclesiastés 2:24).

¹³ Qa ma tzʼok tilil quʼn tuʼn kybʼant junjun aqʼuntl quʼn toj tnam Jehová toj ambʼil jaʼlo, ¿ape t-xilen jlu qa tzul qʼoʼn mas qoklen aj tbʼet ambʼil? Bʼalo jaku, ik tzeʼn bʼaj tiʼj Nick. Qatzun mintiʼ ma tzaj qʼoʼn, jaku qo tzalaj ik tzeʼn bʼaj tiʼj Melissa (kjawil uʼjit Eclesiastés 2:24). Nya oʼkxju, ax ikx jaku txi qqʼamaʼn qa kbʼel qnaʼn nim tzalajbʼil aj tel qnikʼ tiʼj qa in tzalaj Jesús qiʼj aj tok tilil quʼn.

14. ¿Jakupe bʼant mas aqʼuntl quʼn toj qajbʼebʼil te Jehová?

¹⁴ Qa ya in nok tilil quʼn toj qajbʼebʼil te Jehová, ¿ape t-xilen jlu qa ya mintiʼ tuʼn tok tilil quʼn? Miʼn. Jaku kubʼ qximen tuʼn tbʼant-xix qpakbʼan ex qqʼon xnaqʼtzbʼil, ex tuʼn qonin kyiʼj erman. Jaku japun twi qximbʼetz qa ma ten qnabʼil ex qa ma qo onin kyiʼj txqantl ex nya oʼkx tuʼn qximen qiʼjx (Prov. 11:2; Hech. 20:35).

15. ¿Alkye junjuntl oklenj jaku qo tzalaj kyuʼn?

¹⁵ ¿Tiʼ mas jaku bʼant quʼn toj qajbʼebʼil te Jehová? Qqaninx te Jehová tuʼn tonin qiʼj tuʼn tel qnikʼ tiʼj qa jaku bʼant mas aqʼuntl quʼn toj ttnam (Prov. 16:3; Sant. 1:5). ¿Jakupe qo ximen tiʼj tuʼn qok te precursor auxiliar, regular, tuʼn qxiʼ ajbʼel toj Betel moqa tuʼn kyjaw bʼinchet Ja te Chmabʼil ik tzeʼn ma qo yolin tiʼj toj  tnejel taqikʼ toj xnaqʼtzbʼil lu? ¿Jakupe qo xnaqʼtzan tiʼj juntl yol tuʼn qpakbʼan kye mas xjal moqa jaku qoʼx ajbʼel jatumel kyaj erman onbʼil? Qa qaj tuʼn tok qbʼiʼn mas tqanil kyiʼj oklenj lu, jaku jaw quʼjin capítulo 10 toj uʼj Organizados para hacer la voluntad de Jehová ex jaku qo yolin kyukʼil ansyan jatumel in nok qchmon qibʼ. * Akux in nok tilil quʼn tuʼn kyjapun  twi qximbʼetz, mas qo tzalajel ex kʼokel kyqʼoʼn kywitz txqantl qiʼj qa in qo chʼiy toj qokslabʼil.

16. ¿Tiʼ jaku bʼant quʼn qa mlay bʼant junjun aqʼuntl quʼn toj ambʼil jaʼlo?

¹⁶ ¿Yajtzun qa mlay bʼant junjuntl aqʼuntl quʼn ik tzeʼn qeju ma qo yolin tiʼj? Qo ximen tiʼj aqʼuntl jaku bʼant quʼn. Qo xnaqʼtzan kyiʼj junjun techel.

17. Ik tzeʼn in tzaj tqʼamaʼn 1 Timoteo 4:13 ex 15, ¿tiʼ jaku bʼant tuʼn jun erman tuʼn tok te jun tbʼanel aj xnaqʼtzal?

¹⁷ (Kjawil uʼjit 1 Timoteo 4:13, 15). Qa o bautisarin teya, ¿jakupe tzʼok tilil tuʼna tuʼn kyex tqʼoʼna mas tbʼanel tchikʼbʼabʼila moqa tuʼn tbʼant-xix tuʼjina? Qa ma bʼant jlu tuʼna, kʼonil jlu kyiʼj kykyaqil qeju in che bʼin tiʼja. Qʼonka tilil tuʼn t-xnaqʼtzana ex tuʼn t-xi tbʼinchaʼna qe nabʼil in tzaj tqʼoʼn folleto Tzʼok tilil quʼn tuʼn tbʼant-xix quʼjin ex tuʼn qqʼon xnaqʼtzbʼil. Bʼaʼn tuʼn t-xnaqʼtzana tiʼj teyele junjun xnaqʼtzbʼil, bʼinchanku ttena tjaya ex lepeʼka kyiʼj nabʼil in tzaj tqʼamaʼn uʼj aj tex tqʼoʼna tchikʼbʼabʼila. Ax ikx, jaku txi tqanina onbʼil te ansyan in qʼon kyconsej txqantl moqa kye junjuntl ansyan in nok tilil kyuʼn «tuʼn kypakbʼan ex tuʼn kyqʼon xnaqʼtzbʼil» (1 Tim. 5:17). * Nya oʼkx tuʼn t-ximana tiʼj tzeʼn jaku txi tbʼinchaʼna aju in tzaj tqʼamaʼn folleto, sino ax ikx ximana tiʼj tzeʼn jaku tzʼonina kyiʼj erman tuʼn tchʼiy qʼuqbʼil kykʼuʼj ex tzeʼn jaku txi kybʼinchaʼn aju in nel kynikʼ tiʼj. Qa ma bʼant jlu tuʼna, nya oʼkx teya jaku tzalaj, sino ax ikx kye erman.

18. ¿Tiʼ jaku tzʼonin qiʼj tuʼn tbʼant-xix qpakbʼan ex tuʼn qqʼon xnaqʼtzbʼil?

 ¹⁸ Qkyaqilx o tzaj qʼoʼn qoklen tuʼn qpakbʼan ex tuʼn qqʼon xnaqʼtzbʼil (Mat. 28:19, 20; Rom. 10:14). ¿Qajpe tuʼn tok tilil quʼn tuʼn tbʼant-xix qpakbʼan ex tuʼn qqʼon xnaqʼtzbʼil? Qa ikju, bʼaʼn tuʼn qxnaqʼtzan tiʼj folleto Tuʼn qqʼon xnaqʼtzbʼil ex tuʼn qximen tiʼj tzeʼn jaku txi qbʼinchaʼn aju in nel qnikʼ tiʼj. Ax ikx, jaku che kanet tbʼanel nabʼil quʼn toj Uʼj te aqʼuntl toj chmabʼil Kyanqʼibʼil Okslal ex Kypakbʼabʼil, ex kyoj video tzeʼn jaku txi tzyet tuʼn qyolin, aju in che etz yekʼin kyoj chmabʼil in che ok txolekxi qʼij. Bʼaʼn tuʼn t-xi qbʼinchaʼn toj junxichaq tumel tuʼntzun tel qnikʼ tiʼj alkye mas tbʼanel jaku tzʼela toj kywitz xjal jatumel in qo pakbʼan. Qa ma chex qbʼiʼn nabʼil lu, jaku kubʼ qnaʼn tzalajbʼil tuʼnju qo okel te tbʼanel aj xnaqʼtzal (2 Tim. 4:5).

19. ¿Tiʼ jaku bʼant quʼn tuʼn kyten tbʼanel qmod?

¹⁹ Ax ikx, miʼn tzikʼ tnaʼl quʼn qa jaku che ten tbʼanel qmod, aju jaku tzalaj Jehová tuʼn (Gál. 5:22, 23; Col. 3:12; 2 Ped. 1:5-8). ¿Tzeʼn jaku bʼant jlu quʼn? Qo ximen tiʼj qa qaj tuʼn tchʼiy qʼuqbʼil qkʼuʼj. Tuʼn tbʼant quʼn, bʼaʼn tuʼn kyjaw quʼjin qe xnaqʼtzbʼil in che yolin tiʼj tbʼanel mod lu. Ax ikx, jaku tzʼok qkeʼyin junjun plaj video te JW Broadcasting^®, aqeju in che yolin kyiʼj erman kubʼ kyyekʼin qʼuqbʼil kykʼuʼj tej kyok weʼ kywitz nya bʼaʼn. Aj tbʼant jlu quʼn, qo ximen tiʼj tzeʼn jaku tzʼel qkanoʼn qʼuqbʼil kykʼuʼj.

20. ¿Tiʼ jaku bʼant quʼn tuʼn qtzalaj ex tuʼn miʼn ttzaj qbʼis?

²⁰ Qkyaqilx qaj tuʼn tok tilil quʼn tuʼn tbʼant mas aqʼuntl quʼn toj qajbʼebʼil te Jehová. Toj akʼaj twitz Txʼotxʼ, qo ajbʼel te Jehová tukʼil tkyaqil qkʼuʼj ex qipumal. Akux in pon ambʼil lu, qqʼonk tilil tuʼn txi qbʼinchaʼn aju jaku bʼant quʼn tuʼntzun qtzalaj ex tuʼn miʼn ttzaj qbʼis. Ex aju mas nim toklen, kjawil qnimsaʼn Jehová, «aju Dios at-xix tzalajbʼil tukʼil» (1 Tim. 1:11). Tuʼntzunju, kukx qo tzalaj tiʼjju jaku bʼant quʼn toj qajbʼebʼil te Jehová.